台語教學e心得
電機12 王致捷


zitgai我選擇教台語拼音e人是我e室友,伊是一個本來就會台語e人,所以我想講教伊應該卡好雕。
我一開始先提出老師上課e投影片ho伊看,當然啦一定是霧煞煞,完全m知我deh講什麼,所以我就開始一個音一個音慢慢e念ho伊聽,並且請伊due著我念,後來伊ma也漸漸發現拼音e me角,反正加念加發音自然diorh會了,後來我閣ga老師上課e講義ham hit幾條歌提ho伊看,發現其實拼音就是按呢,無hiah難啦。
教完以後,我覺得我e室友真正足厲害,竟然這麼快就學會了台語拼音,ho我攏真自然愈來愈佩服伊。

教學法e系統化 應該是重點 吧。

daiqi007 發表在 痞客邦 留言(0) 人氣()

台語教授心得 高子倫
我教台語注音e對象是我e室友,因為伊本來就會曉講台語,加上u教授提供e雙拼法教學投影片,所以伊真緊就學會曉an nua注音a,伊講m是足困難,只是一寡專有名詞無聽過nia nia(親像台語五調有高平調、中平調、低降調、高降調、降升調),教完了後,伊講印象siong深e是台語船gah長尾C,這款用圖形幫助記憶e方法 使原本有一點仔困難emih giann變gah卡較簡單a,只是會du著一個問題,因為zu se han咱學台語攏bhor親像學國語仝款有注音e幫助,攏是聽大人de講才慢慢學起來e,所以聽錯就念錯a,雖然聽起來有一點仔bho仝,大家ma是聽u我deh講什麼,所以以前無感覺有什麼問題,但是使用台語輸入法e時陣,若是音念錯就注錯音a,zit點ai改過來,另外,ghun nng個 long gam gak台語輸入法zin ho sng!

daiqi007 發表在 痞客邦 留言(0) 人氣()

台語拼音教學心得 洪國欽

這學期我真歡喜選了這門課,因為這是我頭一遍接觸台語拼音,ma3是我頭一遍教人台語拼音。因為我e2同學以前攏未hiau4講台語,雖然我ma3 m3 敢講我已經真熟台語拼音,但是在老師e要求ga我真正想要教我同學講台語,我就教伊台語拼音。因為阮以前攏是受ㄅㄆㄇe教育,一開始我e2同學還iau無足適應台語拼音,但是di老師教我e教法中,我e同學已經漸漸熟悉台語拼音,我di教伊e過程中,我ma3更加e熟練台語拼音,我e同學現在ma3無親像以前m3敢講台語,因為我已經教伊台語拼音了,我閣teh我e上課教材ho伊看,伊ma3差不多會念hia a台語,伊學完後足歡喜e3 ga3我講:「多謝你教我台語拼音,ho我e台語比以前更加輪轉了!」聽完伊zit句話,我ma3真歡喜我e3 dang3學台語拼音,希望以後有機會ma3 e3 dang3教更加濟人台語拼音,ho大家攏會講台語,發揚台語e文化gah內涵。

1. 做台灣e親善大使,有意思!
2. 一個成功e經驗,ho 咱腳步實在!

daiqi007 發表在 痞客邦 留言(0) 人氣()

台語教學e心得
林育瑄
zit gai台語教學e心得,du仔開始教zit套方法e時,實在是有一點仔無習慣,加上gorh是第一擺教,歸個diorh是怪怪。教發音 e時,親像讀日本五十音仝款 ,同學是感覺ia ve歹,但是有一寡所在確是我按怎解釋ma解釋ve了,親像“ca”讀是讀“ca”e音,m是咱平時英語讀e“ka”e音。但是按呢教,同學是有了解台語e發音,m過ia是e淡薄仔qnai3ior1 ,可能是我教e是有淡薄仔基礎e人吧,ia是無習慣zit套方法,gah我du仔開始仝款。但是歸個來講,伊ia閣真kun-ding e。

daiqi007 發表在 痞客邦 留言(0) 人氣()

台語現代文學─ 台文教學記錄與心得
化學 王莉婷

設計40分鐘,真超級e教案
 教學對象:社團同學
 教學時間:40分鐘
 教學內容:台語拼音雙拼法(雙拼旋律) [10分鐘]
五聲變調(台語船) [5分鐘]
台語歌曲 [10分鐘]
台語諺語 [10分鐘]
台語文學介紹 [5分鐘]
 教學者教法gah心得:
di上學期ma教過朋友台文,有一寡經驗,所以zit遍想veh作一寡改變,gah頂gai仝款e是di一開始e部分,猶原是先教台語拼音雙拼法,因為zit位社團e朋友本底diorh會曉講台語,只不過gah我仝款是細漢ka有de講,大漢了後sua 無啥de講,所以iah算是有基礎e台語拼音學習者,只用了短短仔十分鐘diorh學ga差不多lo,伊e學習速度比我原先設想e緊真濟,伊講學台語e拼音並無親像伊一開始想e困難。
下一e部分教e是台語船,雖然ma是短短幾分鐘diorh了解zit項規則,mgor阮攏感覺發明出用zit條台語船簡單表示出台語變調e人實在厲害,zit條船e巧妙關係ho阮感覺真正神奇,上完課了後阮gor拚死de想veh找出是m是會有例外sua攏失敗。
擱來阮作伙唱幾條台語歌,老師出e台語歌作業du好提來用,五月天e垃圾車gah再會啦心愛e無緣e人,擱du好zit位朋友會曉彈吉他,這部分e教學是更加趣味lo。
阮ma用來來回回一人講一句台語諺語來比賽,可能是阮攏ka少de講台語a,講無幾句dor失敗,好佳哉老師di台語007頂面有真濟資源edang提來用。
最後,我向朋友介紹幾本台語寫e冊,親像是我之前讀過e數學家e故事、科學怪人、青鳥,伊講伊真有興趣,ma借幾本轉去看,我想,按呢ma算是有成功吧!

daiqi007 發表在 痞客邦 留言(0) 人氣()

台語教學報告
張育豪
我教e人是zit個已經會響講台語e人,伊已經有zit寡底啊,所以教起來ve講ziorh vai教e。zit開始,我先ga投影片傳ho伊看,ho伊先了解我等eveh教啥。但是伊無看完dior無想veh看啊!我dior dit接對伊講。du-a開始emih-giann真簡單,伊學e zior 真gin,問題是di後壁。後壁轉音e所在有一寡lam度,是有開dior zit寡時間。最後總算是完全攏教完,順利完成我veh教e mih-giann。伊後來gorh ga我討台音輸入法,伊感覺zit 個輸入法zior 好sng e。
教完了後,我感覺zit個已經會響講台語e人學起來真輕鬆,只是後來因為dak-ghe人e口音攏有zit寡無同,所以教到後來有ka 辛苦。ga zia e mih-giann 全部教完差不多開我二點鐘e時間,算起來ma ve講zior長e啦!

daiqi007 發表在 痞客邦 留言(0) 人氣()

教一位同學台語心得
電機11蔡承庭
上過江老師e台語拼音法之後,學習著羅馬拼音e方法,雖然m是足了解,但ma是面皮激厚厚去教一個同學台語。伊是我e室友,聽有台語,mgorh無定定講,所以台語對伊也是有淡薄仔點難。因此,我就決定教伊台語。zit開始唸墊板上台語拼音,閣有唱發音e歌。伊本來感覺我超奇怪,走去修zit門通識,閣veh教伊講台語;不過隨著我e耐心gah愛心,伊漸漸ho我e熱情打動。學習如何ga念出來,我ga老師上課ePOWER POINT傳ho伊,印一張台語墊板e正反面ho伊,閣有幫伊e電腦灌上台語輸入法(其實是強迫~),伊ma感覺足趣味。除了zia,我也ga我e眾生相課本the ho伊看(可送伊一本),ho伊加讀一寡台語e課外讀物,教完感覺iau真有成就感e~
1. 心誠則靈通
2. 你e耐心gah用心、愛用di各方面,學業、事業會順利!^︶^

daiqi007 發表在 痞客邦 留言(0) 人氣()

台文教學心得
小老師 黃律迪
學生 黃律凱
這學期修台文~家中攏感覺足趣味~閣講sng笑:我mtag hong當掉耶!這gai轉去家ga拼音法 gah發音 ga厝內人教~大家攏做一球講:我半路出師~閣講我講台語講gah超奇怪e啦!<阿兜仔說台語>
做小弟e心得:小老師老哥教了~一開始先教我台語雙拼 啥麼ba be bi bo bu bor我e心理一直os好好笑唷 真趣味 老哥閣一直強調什麼鼻化 放軟。中間教我什麼三大技巧,一直唱~阿姨~阿姨~阿姨~愛~哈哈!台語真猛 真正是博大精深~最後教一下伊講伊ma ve曉e變調~<�台語船 長尾C和H-3> 課後 老哥閣一直找我合唱 鳳飛飛e心肝寶貝~無想著 原本對台語興味無啥有e老哥 ma開始唱台語歌了呢! 結論是 老哥真是一位名師~呵呵

daiqi007 發表在 痞客邦 留言(0) 人氣()

台語拼音教學心得報告

孔維暄

Zit開始接觸台語拼音法時,感覺有zit點難liah diorh正確e字音,當然!本身e台語ma m 是足好la!而且,台語拼音gorh 有八種e音調,di教學e過程中,qua認為區分音調是上難e部分。Zit次qua e 教學對象是qua e 小妹a,伊本身是讀英文系a,所以羅馬拼音dui伊來講m是足困難e,按m gorh,音調e部分伊無法度完全了解。親像是用力、送氣、鼻化gorh有放軟zit寡發音,伊卡會當了解。
quan認為“雙拼旋律”是zit個非常讚e方法,因為du好有台語e五種聲調,而且e sai幫助理解zit個原理:前音節 + 後音節 □(→┴雙拼旋律 ) 新音節。
台語拼音是zit個非常u意義e發明,對於lan 台灣本土文化e保存u非常大e幫助!對 zit 個veh有效講台語e lang來講,台語拼音是zit個入門e方法,ma是zit個學著正確台語發音e好助手。



評語:音調e部分,請伊聽、核對“菩薩e故事”e CD。

daiqi007 發表在 痞客邦 留言(0) 人氣()

台語拼音333 教學心得 朱育萱
我zit bai 是教阮媽媽台語e拼音。開始時,伊聽著台語有拼音,感覺zin 趣味,想veh 看看是什麼kuann e 物件。但是等我提出雙拼法e 表了後,伊感覺zit個表足複雜,所以我veh 解釋ho 伊聽。第一,先教雙拼e 前音節、後音節gah 子音音節。像日語e五十音,m過比日語ge zin 濟。Zit個 部分無什麼問題,若有也是記智gah ㄗㄘㄙe 分辨ka 容易聽m 對。再來是雙拼技巧e 部分。雙拼旋律容易學,用音樂 ka 快記著。雖然講zin簡單,媽媽a si 有一寡ve dang ga兩個 音合起來念,因為hit 兩e 音差ka 濟。經過幾ben e 練習,才會 ka 順。
鼻化技巧e部分也無問題。媽媽會 曉台語,變調e 部分ven教就講gah zin 好。伊感覺zit 個 系統ve vai。



評語:
1. 猶太建國後,母語(希伯來語) e學習,是di 學校由老師教學生,學生再轉去教父母,是yin有名e母語復興運動。序大講無問題,書寫dor愛加強。
2. 真好e親媽學習。

daiqi007 發表在 痞客邦 留言(0) 人氣()

台文拼音教學心得
郭家辰
我教e是一位本來就會曉講台語e同學,mgorh伊是第一遍聽著講台語也有拼音,伊ma感覺真趣味、真想veh學看mai。
所以,我就照著江老師e講義開始ga伊教。一開始先教e是前音節,大部份是無什麼問題,除了講放軟e技巧ka歹掌握。mgorh 對比念幾遍以後,伊就會曉a。續lai就教伊後音節ga子音e部份,我有特別ga伊解說‘n’gah‘ng’e差別,一個是用舌尖發音e舌尖擋,zit個是用舌根發音e舌根擋。
gorh來就是重點e雙拼技巧。我照著講義,用唱歌e方法來ga伊教,伊ma感覺這個方法真趣味,而且gorh真好學。因為伊頭前音節學了gorh ve vai,所以zit個部份我感覺對伊來講是真簡單。續lai e 鼻化技巧ga 短束技巧伊ma真緊就會曉a。
第三個部份是一kua變調e技巧。伊感覺這實在是gai神奇,想ve到伊平常時di用e變調竟然也有這呢系統性e方法。
我用了差不多點qua鐘就ga伊教liau a。伊感覺zit個教法真有系統性而且gorh趣味,所以學了特別緊。我ma感覺zit個教法實在是簡單gorh好教gorh好學。

daiqi007 發表在 痞客邦 留言(0) 人氣()



爸爸e手風琴 張春凰

爸爸e樂器,前後有烏笛仔、小吹、口琴、小提琴、手風琴、鋼琴、電子琴。講前後e意思是用印象中e深淺來區分e,時間e順序並無重要。
爸爸真少年e時陣,參加過西樂e樂團gah樂隊,媽媽講伊bun過烏笛仔、小吹,但是這我並無記憶。Di中學e時學校veh考口琴e樂器,我dor vat請教過爸爸。小提琴、手風琴、鋼琴、電子琴dor時常聽伊qiu彈過,其中上ho我欣賞edor是手風琴。
Di我e心目中,手風琴應該講是專屬爸爸e代表。
爸爸並m是啥麼了不起e音樂家,伊只不過是一個真隨意e自我娛樂e演奏者。伊qiu violin、彈手風琴、piano、電子琴e樂曲,其實攏是仝款真少有變化,mgor伊ma是從來dor mvat看譜。逐遍伊攏彈仝一組樂曲,樂曲中,伊所演奏ehit首“何日君再來”e曲調若響,大概ma知影伊e個人音樂會dor是dih veh結束啊。
若聽著伊deh cih奏zit首樂曲e時陣,感染著不只是伊完全投入e感情,閣是伊愈彈愈入神,假若行雲流水e表演技術dann真真正正有專業e水準。Zit首曲eguan低,到zit個時陣有一定e間奏出現。本來阮攏dor忍受伊一開始假若deh練習e歌曲,不時dor有一點仔tai雞割m斷管e聲,慢慢順溜了後,一直到最後“何日君再來”e出現,情勢dor一定轉360度。Zit個時陣,阮會due伊e音樂唱,甚至會暫停手邊ekangkue ga伊拍奏,原因dor是伊釋放出來e是一種自由,zit種自由e氣味是一般普羅大眾e心聲,伊一直deh吸引阮閣ho阮有參與感。奇怪e是du好是阮dann veh開始參與,伊dor一定結束,連阮veh叫“encore”e機會dor無。
Zit種感覺從來dor無di伊qiu小提琴、彈鋼琴gah電子琴出現過。
細漢e時,媽媽總是以爸爸做第一,比如:食飯e時,爸爸若暗轉來,媽媽一定愛特別ga阮交待阿爸仔iau ve食,需要留伊e額;洗爸爸esetzu一定愛用米am漿過,等候dae時,卡閣熨ho平坦坦cinn-cinn。爸爸dor是一家伙仔e龍頭,伊e權威性十足,但是去動伊e手風琴,我dor有一種講ve出來e勝利感,至少是摸會著閣無任何心理壓力e代誌,這講來講去其實是對大人e世界e好奇。而且接近手風琴並無di受著禁止e行列,而且伊摔ve歹去,是無親像hit當時物質缺欠e時陣,ganna摃破一塊玻璃甌dor該死a。接近手風琴ho我有滿足感,因為琴我抱無法,上加是將琴盒仔拍開,ga琴齒e所在diorh起來ho出聲,其實手風琴攏m免摸著琴齒,ganna ga琴齒qiu開掠起來dor有聲,雖然是亂七八糟e聲,總是m免具備特別e技巧dor有音流出來,這dor阿草e心適。
想veh做一個百萬富翁e夢想,不但di平民e心目中一直deh追求,dor是di電視連續劇e角色內面一直有總經理、董事長e身份安排。成功是疊實加上運氣好,失敗是虛榮du著歹運。少年e時陣,爸爸一定想過veh過好日子,但是想罔想,彈琴e時陣應該講是將生活e現實拋開一爿,輕鬆一下。當年做ve成百萬富翁,至少手風琴ma陪伴著爸爸一路行過來。伊一世人起二遍大厝,二落大厝攏有伊e琴聲繚繞著。
“你以前去阮兜,gam vat聽過阮老父彈手風琴?”寫到zia我忍未diau問阮翁,伊講“有!有!”
“媽媽a,爸爸e手風琴leh? Hiah-gak去啊是m是?”長途電話開嘴dor問,“無啊!無啊!he是古董,kng di樓腳。”
後回轉去後頭厝一定愛去看看leh!看爸爸e手風琴。
如今爸爸e耳孔攏重聽lo!我ma mgann問伊何時會使閣彈一曲“何日君再來”,只有哼著以往e旋律,頭殼內一直迴seh著爸爸少年時代e琴韻心聲。
(寫1996年年尾;原登di台語世界第9期1997年3月號)

後記:看著9月初一 自從爸爸8月14日離開阮了後 又另一月 心中艱苦 再以此文追思

daiqi007 發表在 痞客邦 留言(0) 人氣()

Lān Da̱i-ūi ī-sū/ghūan-zōk: Li Siau-hong, gai-sià: Ghō Diāng-lĭng
1899 nĭ, īng-gōk gī-dōk diuⁿ-no-ga̱u bho̱k-su Lān Da̱i-ūi ī-su di̱ Ziōng-hu̱a kāi-set Du̱a-siā Diuⁿ-no-ga̱u be̱ⁿ-īⁿ(zit-mà ē Ziōng-hu̱a Gī-dok-ga̱u be̱ⁿ-īⁿ).1928 nĭ, u̱ zi̱t ē Dāi-ŭan siàu-lĕn Ziū Gīm-ia̱u zìaⁿ-bĭng kā-dā-u siak siu̱-siong, sè-kùn gam-riàm, dì-su kāng-cu̱i nūa ciòr ghu̱a dn̆g, kiong gīaⁿ ài gì ka. Lān ī-su gong, ‘zìng pŭe ciu-sūt hu̱an-se̱ si̱ zi̱t ē hī-bhāng.
da̱n-si̱ zìng-pŭe ciu-sūt bho̱k-zĭng gān-nā si̱ sū-bhi̱n li-lūn, iah-bhu̱e zīn-zìaⁿ sīng-gong.’ dn̄g Lān ī-su di siōng nau-gin ē sī-zūn, ga̱ng-kuan si̱ īng-gok-lăng ē Lan hū-rĭn gong, ‘ga-su gùa ghua ē pūe-hu, bo gàu Gīm-ia̱u ē kāng-cu̱i, gam e̱-sāih?’ Lān ī-su zùe-āu ziap-siu̱ Lān hū-rĭn ē ì-ge̱n, zìn-hĭng Dāi-ŭan li̱k-su siōng de̱-it bài ē zìng-pŭe ciu-sūt. zit du̱aⁿ “cet hu zī a̱i” ē gò-sū, bèn-zòr Dāi-ŭan ghu̱a-kōr ī-su kō-a-lāi bhen-lē ē bhīng-ghĕn. zit u̱i īng-gok-lăng gùa ī du̱a-tùi ding-bhīn ē zi̱t dè pūe-hu ho̱ Dāi-ŭan siàu-lēn-gē-à, zit ziong tìaⁿ-sim si̱ ciāu-uat zing-zōk ē sè-gān zĭng. si̱t-zāi sù lāng kīm-pu̱e gah ha̱k-sip.

daiqi007 發表在 痞客邦 留言(0) 人氣()

Ma-gai ē gò-sū/ghūan-zōk: Li Siau-hong, gai-sià: Ghō Diāng-lĭng
Gā-na-dāh ē Ma-gāi bhok-su di 1872 nĭ lāi bak Dai-ŭan tūan-gąu, sių-dior ząi-dę-lăng ē bhu-riok, dàn zior-tău, pùa sai-riōr, sin-zì siōr gàu- dng. dąn-si cųa Dāi-ŭan bēⁿ-bō-zok zā-bho-lăng zòr bhò ē Ma-gai, bàh-buaⁿ tūn-lùn, ī orh ę-hiau gųt-liu ē Dąi-ghì, zit bhin bò-dō, zit bhin tè Dāi-ūan-lăng bhen-hųi bhan cùi-kì. Ma-gai di Dāi-ŭan cīn-ciù gą Dāi-ūan-lăng bhàn gųe ē cùi-kì zong-giōng ų nng bhān zit cīng ghųa kì. Ling-ghųa Ma-gai gorh bhen-hųi sàng Mā-la-li-à ē dik-hąu-iorh gīm-gē-ląp-song ho sàn-ciāh ē hųan-zià.
‘Ma-gai ē bęh ior-zùi’sùah cut-miă ki ląi. 129 nī zĭng (1880 nĭ), Ma-gai di Dąm-zùi kāi-set ‘Gāi ī-gùan’, si bak Dāi-ŭan dę-it gīng sē-īuⁿ-sīk ē bęⁿ-īⁿ. sųa lorh di 1882 nĭ gorh gèn-lip ‘li hąk dng dųa sū-īⁿ’(dior si ghū-gīn hąk-dng, di gīn-a-rit ē zīn-li dąi-hak ląi-dè) nng nī āu gorh còng-lip Dąm-zùi lu hąk-dng, si Dāi-ŭan dę-it gīng lu-zu hąk-hāu. 1901 nĭ Ma-gai gùe-sin, ūi-ghĕn gāu-dąi māi-zòng diàm Dāi-ŭan. gīn-a-rit Dąm-gāng diōng-hak ląi-bhīn Ma-gai ē bhōng-à ų zit dè zior-bi, ding-bhīn sū-sia dior Ma-gai zùe-āu ē zit siu si, ding-bhīn si an-ne sià, ‘ghun zīn sim so ąi ē Dāi-ŭan āh! ghun gą iu sing zī nĭ zūan-bō hòng-hęn ho lì, ghun zīn gà-ì di zia dųa lorh ląi. ghun lān-hun-lān-sią e Dāi-ŭan āh! ghun gą iu sing zī nĭ zūan-bō hòng-hęn ho lì…ghun zīn hūaⁿ-hi di zia kùaⁿ hng-hng ē so-zāi. di hit ē dųa pōr-lōng pà hųaⁿ-biⁿ ē hiang-liąng siaⁿ diōng-gan, di hit ē iōr-iōr- hàiⁿ-hąiⁿ e dik-ną cių-ìm ę-ka, dąn-ghųan ę-dàng cųe dior ghun ē gūi-siōk, dng-dāng ghun hong-hęn sīng-ghăi get-sōk ē sĭ.’ Ding-bhīn ē gò-sū ho lan gam-gak Ma-gai dùi Dāi-ŭan sit-zāi zīn ų tìaⁿ-sim ląh.

daiqi007 發表在 痞客邦 留言(0) 人氣()

搭 時代e筆 飛seh (原登 台文前線 第15期)


張春凰

時代e筆 引導 自由心思 飛行, 不時不陣, 我坐著 zit台 幻化e飛行船, 到 天涯海角 去旅行, di 街頭巷尾 看雜藝, ma di古文明e 所在, 去尋cue 傳說中 古老e 奧義之書。
長久以來, 我決心 veh寫 一本冊, 冊名 叫做《筆》。
思路 是 沿著 各式各樣e 符碼, 想veh 探討e 祕密。
我去閱讀 有關 世界字母e 故事、 文字e故事、 印刷術e故事, 我去搜尋 筆e歷史、 紙e發明,到當今 身處di 網際網路e 天下。
Logos 是 人類使用 口才本能 講述e言談, 保存著 記憶承傳e 風格, 呈現 所謂e 原始部落e 智慧意味, 經過 拍索仔 做記號、 di洞穴石壁 畫圖做記錄、 di龜殼 刻圖紋、 di泥板 印符號, 人類 千方百計 用 樹枝、 石頭、 gah尖刀 di 沙粒頂面 寫字, di 方尖碑頂面 記述 國家大事。
筆e 原始身份 gah 帝王、 貴族、 士紳、 神職、 書記、 歷史學家 配批, 是一種 特殊e背景, 有身份e人, ga 咱e嘴、 心思、 理智、 巧手, 融合做 金頭腦e寶藏, yin 掌握著 書寫e 權勢gah貴氣。
祭司gah童乩 透過特殊e 職務, 傳送天機, 接觸著 普羅大眾 無e 神通技藝, 種種e規矩、預言 gah 警示, 卜掛 更加牽連著 筆e魔力。
人民認定 筆 來自勢力 gorh有 神聖e任務。
為著 一支筆, 和平e使者, 拋棄了劍, 年久月深, 筆是文雅、 才子e代名詞, 西方 有 一句話語:“筆勝過劍”(The pen is mightier than the sword.)。
欣羨筆士e 風流gah 威猛, 貴族、 專能e 筆, 一步一步 進入 個人化,毛筆、 鉛筆、 色筆、 原子筆、 電子感應筆……, 突破ganna用 手筆表示e 筆路, 寫情批e 時陣, ve閣驚 字體、 字形, 影響著個人 筆字e風格, 致使 跳過 其他才華e 排斥。
有了筆, 筆e書寫 延伸著 記憶e體系, 人ve閣去 為著 失落e頭神,pi-pi-cuah。
有了筆, 知識m是 王族特權 獨佔, 日頭腳 民主e素養 漸漸成形, 布衣平民 有了歡笑, 階級 無再hiah hiaubai 。
為什麼 古老e 希臘羅馬文化 di歐洲 烏暗時代 消失無形, 為什麼 南美州e文明 Inca、 Maya、 Aztec消失 無影, 透過筆 留落來e 殘餘證據, 透過翻譯, 使得 文藝復興 再領風騷, 透過筆e 重整, 世人看見 失落e文明。
筆引發 思維e傳播, 丈量世界。
過去e電報 傳達著 互動e訊息, 現在eMSN 即時聯絡, di地球e 另一端, 你享有影像 親像 面對面e 談論, 親像 di彈鋼琴e 風姿, 指尖 按落筆e關鍵, 用 十支指尖 彈織出 歌詩。
長久以來, 我珍愛 身邊e人, 伊為我、 為逐個 做一支奇妙e 現代筆—台音輸入法, 伊看我 di齒盤 倒彈e癆傷, 伊 用珍貴e 青春gah智力, 閣deh拍拚 突破 語音辨識e 機密。
筆 佈滿 我e細胞 , 我驚異、 ma讚歎, 我呵咾, 我力行, 長年短月, zit支 漫妙之筆, 浸透著 我e生活。
傷愁e時陣, zit支筆 點著 我e光, 歡喜e時刻 zit支筆 替我記事, 為日後 年老e衰弱, 鋪排一塊 小小樂園。 聽講 人老e時 攏記著 古早e代誌, 我期待 zit寡 古早e代誌, m是 孩童時代 ganna gah 親密e小妹仔 dak嘴nia, 這應該是 家己e 故事核心, 家己鋪排 靈魂e所在, 快樂qin-a時代e 放蕩, 隨心滋養。
我kia di當代 時間坐標e 盡bong, 坐di 筆e慧星 seh 來seh去, 用一世人e 精力, 來看待 zit支心靈e 筆舌。 時時刻刻, ga 感內e事物, 運用 zit支時代e 筆尖, 透過 台音輸入法, 我e心、 左右手指, 靈活deh移動, 親像 魂遊按呢, 一字、 一字、 一句、 一句、 一篇、 一篇、 一本、 一本 生產出來。
是啊! 我將有 尾站e時陣, 我 為何悲傷? 是啊! 凡俗之中, 我離ve開 憂悶gah自大, 因為 透過zit支筆, 伊 安搭著我、 檢視著 幼稚gah憤怒e 情緒, ho我反省、 ho我平穩, ho我體悟。
到zitma, 我仝款 無ve記得 veh寫一本 叫做《筆》e冊, 只是 di 伊世出進前, 我e 跳躍之心, di 心智e平洋 漫步或走跳。
我為家己 無童話e 童年補白, he是 成就《世界童話360》e 巡禮。
寫gah讀 永遠deh 循化, 為何 咱veh 讀經典? 筆e負擔、 筆e責任、筆e任務, 引領探索 跨世紀、 跨時空e《台文1001譯》。
筆 圓滿 作家gah靈魂e 對話。
繁華都會e 櫥窗, 展著流行e 花花世界, 會引誘我, 跳脫現實, 我夢想ga家己 打扮做 一位女王, 可是 zia-esiann神, 終歸尾 攏收拾di 一支筆下。
Mai ga我講 物件 有外好食 du外好食, 花有 外芬芳? 因為 長久以來 我閣deh熱戀ui筆 所流露e情分, 一直到 我無力掌握e 時陣, ho我 來去畫圖! he是 另外一個 線條e書寫, ho我 來去跳舞! he是 姿態線條e 書寫, ho我 來去講故! he是 聲波線條e 書寫…… 所有 di筆 所延伸e 夢境, ho我 lak著筆e 魂髓脫化。
做伙來 用 時代e筆, 改變世界!
(20090416)

daiqi007 發表在 痞客邦 留言(0) 人氣()