daiqi007

Ho伊感動著
張春凰
伊若di路中deh行， 剪鈕仔ve去向伊落手。 看伊ｅ穿插 普通普通，上班 騎一台腳踏車， 出門買菜 攏guann一個古losut古ｅ袋仔……， 伊無看頭。
其實， 伊ｅ舊皮包 不時ma貯 幾仔萬箍。 學生、 公益、 弱勢團體 若需要經費， 隨時dor有錢tang捐ho yin。 穿ｅ衫 是無破 mgu平時 hit幾軀(su1)粗粗素素 換來換去， 表面看起來 一點仔ma無 女老師ｅ派頭， 平時攏專心做kangkue無閒tang妝、 ma無愛美。 有啊！ 衫有兩軀上好ｅ， 是特別 去裁縫店 定做ｅ， 一套寒人、 一套熱人 tang好穿去 國內外 開國際學術會議。
冊教了好 是十五年來ｅ 事實， 高深ｅ 伊指導博士生 是 專門學問、 淺易ｅ 伊教大學通識課程 ma是 講gah誠趣味。 兩冬前， 我去聽 伊ｅ統計理論， 有一遍 伊di課堂 順續講小學ｅ時陣， 有一個同學 逐日ｅ下早仔時， 上課攏duh龜， 老師若ga罵 伊dor目屎nihnih流 一句話攏無講。 Zit個先生 發現其中 必有緣故， 自動ga伊問， 才知影qin-a人 逐下早仔 四、五點 天閣霧霧 別人dor猶deh睏， 人伊dor起床 款蕃薯菜veh飼豬……， 然後 卡閣褪赤腳 拚去學校上課， 乖學生 實在值得 人感心， 老師一時dor cua全班去yin兜參觀 按怎 剪豬菜、 sa豬食料、 飼豬…。 往事 是 伊ｅ故鄉， 故鄉 是 伊ｅ根。
伊ｅ故鄉 汐止 是 一個小庄腳， di 伊ｅ記憶內 是 伊深戀ｅ故鄉， 伊veh做台灣人。 有一gai， 伊送我 一塊陳明章ｅ錄音帶， 內面 有一條 汐止鎮鎮歌， 伊dor足歡喜唱 頭仔兩句 ho我聽 “汐止本名 是 水返腳 先民開拓 閣入山林”， “水轉腳 意思是 潮水到hia擋diau ｅ 閣返頭 流倒轉去 入大海，我di hia大漢ｅ， ma是 純樸ｅ草地， 我定定想起著 做qin-aｅ時代， hit個平凡 有人情ｅ所在……， 來！ 仝款ｅ歌曲 我買三十塊， 一塊ho 恁”； “三十卷！？”；“無啥， 阿dor我 看伊ｅ某 徛di邊仔 hia， 大腹肚 大身大命。”
不止是 本土ｅ歌曲， 台灣ｅ 野鳥圖鑑、 台灣ｅ 風景日曆、 台灣ｅ郵票、 台灣ｅ…， 伊攏是 按呢支持， 恬恬仔付出、 送出， 因為 我定定ma攏會 有一份。
講著寫文章， 伊講veh寫一篇 愛tuh足久。 本來 對hit種 酸酸ｅ、 談情說愛、 講gah五天外尾 無本土化ｅ散文 真厭sen， 但是 看著 陳烈ｅ散文，伊dor改變 原來ｅ看法， 顛倒 深深受感動， 趕緊買來 ho學生 作獎品。
賞鳥 是 伊ｅ 人生趣味， ui zia， 伊 愛 自然ｅ天機， 伊ｅ論文 dor有估計di台灣公ｅ、 母ｅ濱鷸（bin2 ut7）鳥類總數ｅ 統計方法 發表di學術期刊裡， ho法國學者 讀著， veh邀請伊 去發表 研究成果。 但是 ho台灣人 認識 比ho外國人 知影 對伊來講 閣卡有意義， 所以 是m是 veh去法國 並無非常重要。
學生畢業了後， 若m是 過年過節 寫一張卡片 來請安， dor是 三不五時帶伴手 轉來cue伊。 學生若走， 伊dor ga等路teh來 分ho逐個。 點心 是學生yin hiaｅ土產， yin 有ｅ是 當年 ho伊關愛過、 有ｅ是 ho伊保護過， 新ｅ來、 舊ｅ去， 來來去去， 做老師ｅ 總是vedang記hiah nih-a濟ｅ學生，mgu學生 攏ga老師ｅ 溫情gah愛心 記一世人。 人講 一日為師 終生為父，師生ｅ感情 往往是 人生ｅ 安慰gah鼓勵ｅ 泉源， 是 伊ga少年人ｅ福田 種一粒種籽。 寫到zia， ho我想起 有一遍 伊鼓勵我 閣去讀博士ｅ代誌， 我ga應講 若veh閣進修 當然需要 準備一筆錢， 伊趕緊 當祕書小姐面前 ga我講：“若是ganna錢ｅ問題niania， 我借你dor好。” 然後閣足客氣講：“錢 我有夠借你， 阮趁錢 大部份 攏無買別物， 趁ｅ錢攏有cun落來， 免掛意。” 我leh想， 伊趁ｅ錢 若去買股票、 買幾棟庴……， 若小計畫一下， 投資淡薄仔，zitma伊ma是一個好額人。 伊ｅ心 根本是kng di研究裡， 有一遍 我du好deh看 薪水按算公告， 伊行過 我ｅ面前， 我對嘴問伊 公務員薪水ｅ 加級 按怎算， 伊講mvat去注意過， m知影。 伊ｅ 脾氣、 性情 是 直來直去， 快言快語， 明顯表現出 科學家 追求 真、善、美ｅ 境界ham氣質： 專心做 研究栽培學生， 實際去 做研究， 錢項ｅ代誌 無重要。
伊愛環保， 買菜用 hit個舊相ｅ 環保袋仔， 幾仔冬來， 透早攏起床 煮飯ho qin-a帶便當， 講 按呢一冬edang省 幾仔百個 保利龍、 紙盒仔、 竹箸。印過一面ｅ紙 後壁面 ho學生 做考卷寫答案， 按呢 樹仔edang減剉寡。 無必要ｅ時 mtang開電火、 冷氣， 愛節省能源、 愛點點滴滴做， dor會 積小成多， 若無， 發電廠dor閣跳機l o！
Hit冬學校 veh起 綜合大樓 粗粗魯魯dor veh去剉樹仔， 僥倖噢！ 好佳哉伊一個小女子， 趕緊去ga學校 有關單位講： 伊veh家己出錢搬樹仔， 徙去別位栽。 學校一時 精神起來， 自動ga zit十外欉大榕樹 搬厝， 一冬後 zit群樹林 已經 茂然成影 發gah旺旺旺， 然後 學校dor發函 ho各單位 來感謝gah呵咾 同事移樹ｅ 勞力ham眼光。 有一gai， 我行過hia， 看著學校ｅ 一草一木， 想起伊 di zia讀冊、 教冊， 伊ｅ心 是 gah學校 黏結作伙ｅ。 伊ｅ青春di zia行過、 伊ｅ中年 奉獻di zia……， 心肝內ｅ感動 親像 一陣和風吹過 軟軟ｅ草仔枝， 一陣春雨 滋潤著 青青ｅ樹葉波， 和風gah春雨 是 伊ｅ真情、 是 伊慈愛ｅ 老母心。
伊有一套 自然療法。 做所長ｅ時陣 定定胃疼， 伊ma無愛食藥仔， 一直lim滾水 來沖散胃酸。 Qin-aｅ肉 若發燒， dor ho yin食西瓜汁、 lim汽水。透早去運動埕 走五lin， 去八樓辦公室 無坐電梯， 用腳爬樓梯。 教囝ｅ觀點是due殘障女英雄、女作家 劉俠ｅ媽媽 堅持ｅ信念：“上好ｅ照顧 是免去 照顧伊！”
伊有一個 美滿ｅ家庭， 人生ｅ幸福 伊攏有。 Ho我感動ｅ是 伊edang拍開心內ｅ門窗， 大方閣細膩 來幫助 別人ｅ心腸， 用伊ｅ能力 來分享ho別人、 來關懷別人， 假若是 天庭ｅ仙女 自願下凡來 照顧眾生， 態度 是 ziah nih-a自然、 誠懇。
台灣過去ｅ 白色恐佈 是伊心內 深深ｅ疼。 同行 陳文成博士ｅ過身， 十二冬ｅ 悲傷gah憤怒， di紀念 陳博士研究成就ｅ 演講結論， 是 芋仔根開蕃薯花ｅ伊 用Horlor話講：“Zit件代誌 咱edang原諒， 但是vedang放ve記得去！”； 是啊！ 陳博士 di伊ｅ心田 種一粒種籽， 台灣民主運動行街頭 yin翁仔某 大部份 攏有份。 伊閣是一個 有理想ｅ 實踐者， 若講起 對本土自主性ｅ 覺醒， 阮ho伊感動著！ 伊di阮ｅ心田 種一粒種籽。
伊ma是閣ziah nih-a樸素， 精神gah時間 攏用di工作上。 伊講退休了後，透早veh去掃街路， 像伊按呢 不時不陣 攏把握 一分一秒， 半世人 頂人一世人， 伊激起 阮ｅ腳步…， 咱來ia 咱家己 有意義ｅ種籽。
伊愛伊ｅ家庭， 愛伊ｅ學生， 愛伊 邊仔ｅ親友， 愛伊 mvatｅ台灣人， 愛台灣ｅ 生靈gah 風物， 聲聲句句 攏是 台灣心、 台灣情， di足久ｅ以前 一直到zitma ｅ現在， 一直 堅持閣堅持。 平平攏是 lim台灣水、 食台灣米， 伊攏比一般人 閣卡堅定， 親像 日出日落ziah nih-a平常。 日子一久， 熟sai伊ｅ阮， 心內擋ve diau 來讚歎伊， 自然會喝出 一聲閣一聲 “奇女子！ 奇女子！”
(1994年3月)


後記：2006年 某一個禮拜日 我du著伊 di東院邊仔ｅ 光復路， 用面桶捧水deh 沃路樹， 我問伊是按怎？ 伊講 hit欉樹仔veh焦死a。
2011年3月初6ｅ禮拜日 中晝 di東院 我du著伊 騎腳踏車， gah伊拍招呼， 問伊veh去dor位？ 伊講：guann飯gah pang veh去ho徐道寧老師，因為伊老啊行動無方便。 我看著車籃仔 有數包ｅ物件 應該是 一個老人 edang食真濟工ｅ份， 目睭展足大蕊， 反應緊ｅ伊 隨ga我安慰：“ganna禮拜日 niania！”
Zit幾工來， 我再度ho伊感動著！

(2011.3.8 4:27pm)

科技台文之6
大家來關心 台灣地層下陷ｅ問題

葉弘德
交通大學 環境工程研究所 教授

大家攏知影， 台灣本土 有嚴重ｅ 地層下陷 問題。 記得 舊年三月ｅ時陣， 電視 或者是 報紙， 有報導 遲緩六輕di雲林麥寮 建廠工程， 因為附近ｅ地層，三年內 沉落將近24公分， 王永慶suah li哀哀叫， 講veh停工囉。
Gorh最近ｅ報紙 報導， 台灣ｅ 土地地層 下陷ｅ面積， 將近有1060平方公里， 算起來， 佔咱台灣 總面積35分之一； 因為 台灣土地下陷ｅ所在，攏是di le平地， 假使ganna算 台灣平地ｅ 總面積， 按呢 下陷ｅ面積 dor佔veh10分之一。 台灣 發生 地層下陷kah嚴重ｅ地區， 是 宜蘭、 彰化、 雲林、 嘉義gah屏東ｅ 沿海地區。 事實上， zit款問題， 世界上 也發生 幾落所在， 比如講， 義大利ｅ 威尼斯、 英國ｅ倫敦、 美國ｅ休士頓 gah 洛杉磯。
引起 地層下陷ｅ 原因， edang分 人為gah自然 二種因素。 自然ｅ因素包括： 地動、 火山運動、 地球板殼運動 gah 石灰岩地質溶蝕 所產生。 人為ｅ因素， 包括 地面增加重量 （比如起厝、 建廠） gah 開發地下資源 （比如開發 地下水、 石油、 或者是 天然氣）。 咱台灣 所有 地層下陷ｅ問題， 主要是 因為 大量而且集中leh 抽地下水 所引起。
Di台灣西海岸， 大量集中 leh抽地下水， 不但引起 地層下陷， ma會有地下海水 侵入地層 gah 地上海水倒灌， zit款問題 直接ｅ後果， 產生 地面土壤鹽化、 排水不良 厝間沉落去土底gah受損害、 海岸線退縮、 土地繼續性ｅ沉落。 地層下陷 間接產生ｅ 不良後果， kah重要ｅ例， 是 西濱快速路、高鐵 gah 二高速路， 攏因為 西海岸地區ｅ下陷 來改路線， 致使 工程建設成本 增加 幾落百億。
目前 雲林麥寮地區， 每年 以將近8公分ｅ速度 leh陷落， 致使 雲林離島工業區ｅ 開發， 受著 足大ｅ威脅。 根據 雲林地區 實地ｅ調查， 雲林縣現有ｅ水井， 有七萬外口， di沿海地區ｅ水井， 有一萬外口； 但是 其中合法申請水權ｅ 水井， 全縣 只有 四千外口， di沿海地區 ganna有447口nia，ziann萬口 非法ｅ水井， 可能是 飼漁塭ｅ人， long井 來leh抽地下水。 由過去 漁塭產業ｅ 經濟分析， 知影 漁塭ｅ收益， 一冬大概是10億， 但是因為 土地下陷 致使 增加ｅ公共建設 支出， 包括 增高 海岸ｅ堤防、 排水設施、 設 地下水監測井， 攏總ｅ支出， 有155億外， 並且zit個數字 ma直直leh增加。
為著解決 西海岸地區下陷ｅ問題，有關ｅ主管， 有提出 各種防治ｅ對策，其中包括 取締 非法抽水ｅ水井， 徵收 地下水資源 等 措施。 同時，中南部幾個縣政府，也有提出沿海下陷地區土地e利用方式，彰化縣計劃veh ga伊發展做台灣ｅ 威尼斯。 目前， 經濟部水利司 提出 以五年為一期ｅ 防治執行方案， 並明確訂出 veh達成ｅ目標 有 五點， 其中kah重要ｅ二點， 分別是：
一. 在下陷量 超過一公尺 而且 過去三年 下陷量 超過45公分ｅ所在， 非法ｅ水井， 在五年內 veh減除一半。
二. 西元2000年ｅ時陣， 下陷ｅ地區， 一半以上 mai gorh再下陷。 過去大家攏知影 mai抽地下水， 地層dor ve沉落。 但是 地方主管機關， 無法度解決 zit個問題， 這是 因為 政治e因素， 所以 無去取締 違法ｅ水井。
目前，veh徹底解決 沿海地區地層下陷ｅ問題， 上主要是 主管機關 愛有決心gah魄力 去採取取締ｅ 行動。 最後， 希望 大家來關心 這個代誌， 尤其 更加希望 非法ｅ水井 edang自動取消 為咱ｅ囝孫 來設想， 對所有地層下陷 有盡心過ｅ人， 咱ma來 ho yin pok-a聲 ga鼓勵。
（原登di茄苳12期1996年5月）

科技台文之5
Hubble太空望遠鏡（HST，Hubble Space Telescope）

楊健
清華大學物理系/統計所

細漢 暗時 gah父母 di後埕 看天頂ｅ星， 是 阮以早上愛做ｅ代誌。 歸個天ｅ星 閃閃sihsih 假若呢 對你nih目睭。 後來 大漢了後 讀冊kah知影，星ｅ閃sih 是因為 咱dua ｅ地球 有一層氣層。 Zit個大氣層 會過濾 外太空ｅ光線， 使得 咱看著ｅ星 m是像 普通ｅ電火球仔 一直穩定deh發光， 是無停ｅ 一閃一sih。
咱攏知影， 地球ｅ大氣層 ho咱一個保護， 使咱ve受著 日頭光ｅ灼(ziok6)傷。 但是 對天文學家 來講， zit層大氣層 卻會使得 紫外線 大部分被過濾，使得 咱若deh觀察 外太空ｅ時陣， 不但無法度 進行 紫外線ｅ觀測， 也親像di水底 看邊仔ｅ世界， 隔有一層“朦朧”。 雖然 一閃一sih 真sui， 但是 這是 做科學工作 上無方便ｅ 代誌。 所以 di 1923年 dor有一位 號做Hermann Oberth科學家 提出 太空望遠鏡ｅ 概念， 希望 對太空ｅ觀察 有kah好ｅ改進， 但是 一直到1977年， 美國才進行 Hubble望遠鏡ｅ製造。
Hubble望遠鏡 全長約13.3公尺， 闊4.3公尺， 重11.6公噸， 造價大約二十億美金。 伊是 由美國ｅ太空梭發現號 裝載到 太空， kah gorh ga伊 放di地球ｅ 軌道頂面。 由 地面ｅ工作人員 經過電腦 來控制 伊ｅ 運動gah觀測。 而且 經過電波 ga伊所觀測著ｅ影像 送回地面。 因為 伊dua he地球大氣層ｅ頂面， 所以 伊edang比 地面任何ｅ望遠鏡 gorh看kah暗、 kah遠ｅ星體， 由zia 所觀察出來ｅ 數據， 科學家 edang更加 kah正確 來推算 宇宙ｅ 年紀gah星體ｅ 結構。 但是 趣味ｅ是， 離咱上近 兼上大ｅ日頭公－－ 太陽， Hubble 卻無法度 tang觀察， 因為 太陽ｅ強光 會ga Hubble內底精密ｅ儀器燒害去。
Hubble太空望遠鏡ｅ升空 滿足了 真濟科學家ｅ夢想， 但是 因為人為校正ｅ疏忽， 伊di製造主鏡 打磨ｅ過程 出現 鏡面弧度ｅ差， 致使聚焦（focus）ve準， 所hip出來ｅ相片 dor親像聚焦無對好ｅ hip像機 所攝影出來ｅ像， 無法度達到 科學家 預期ｅ 清晰度。 雖然 後來 科學家 也發展出來 一寡新ｅ數學方法 來處理 所得著ｅ 數據、 影像， 但是 iau有真濟 想veh做ｅ 觀測 無法度做。 這可能是 發展 新數學 成本上貴ｅ 方法。
現在美國太空總署（NASA）隨時攏ga Hubble所觀測著ｅ資料 送上網路，有興趣ｅ人 edang上網路：http://wfpc3.la.asu-edu/sah.htm 去找 上新ｅ資料gah圖片。 而且 國內ｅ報紙gah雜誌 ma無定時 會做zit方面ｅ報導， 咱攏edang隨時 留意參考。
（原登di茄苳12期1996年5月）

科技台文之4
管理者ｅ思考方式

王耀德
交通大學管理科學系教授

管理是什麼？ 有人deh講， 管理 是 一門科學。 管理應該gah代誌ｅ 計劃、 組織、 領導、 控制 有關係。 計劃 是根據 咱想veh達成ｅ目標， 想好所有應該做ｅ活動 是什麼。 組織 是 想好咱veh做ｅ活動 到底veh按怎做， 需要 什麼 人力gah物力。 領導 是 想辦法 ho人edang認真gah拍拼 去做代誌。控制 當然是 去檢查 咱所做ｅ活動 到底有 達成咱ｅ目標 無。 按呢 看起來，veh做好 管理ｅ kangkue 真需要 思考ｅ功夫， 因為 代誌ｅ 計劃、 組織、 領導、 gah 控制 攏愛用腦筋。 做管理kangkue ｅ人 應該有 真濟時間， edang靜靜去思考。
事實gam按呢？ 根據 學者ｅ研究， 公司內底ｅ管理者 攏真無閒。 一工gah暗攏dih做代誌， 對 一件代誌ｅ 注意時間 平均ganna有九分鐘 lan na，根本dor無法度 去做長時間 kah完整ｅ 思考。 按呢， 到底 做管理kangkue ｅ人annua去思考？ 無思考， 哪有可能 計劃、 組織、 領導、 gah控制？ 其實，管理者 ma是 愛用腦筋 思考， 只不過yin ｅ思考方式 gah咱 無仝款 而已。管理者 用行動 去思考 比坐ｅ 用心思考 kah濟。 一個人 坐ｅ思考時陣， edang處理真濟ｅ資訊， edang用理論 去做分析。 按呢ｅ思考 需要kah長ｅ時間， 需要用kah濟ｅ心思。 管理者ｅ思考方式 是 一面思考 一面採取行動：先做 一點仔思考， dor去 採取行動， 根據 行動結果 所產生ｅ資訊， 修正家己ｅ思考。 行動gah思考 結合起來， 因此 di真短ｅ時間， dor edang按代誌ｅ 計劃、 組織、 領導、 gah控制 做好。 比一個例， 咱dih練pah槍ｅ時， edang用二種方法 來調整 槍頭ｅ方向。 一個 是 用真科學ｅ方法， 測量距離、風向、 風速， 用 數學公式 來計算 槍頭瞄準ｅ 方向gah角度。 另外 一個方法， dor是 做大約ｅ瞄準， 拍一槍看mai， 按標兵 報轉來ｅ結果 調整風向。頭一個方法 愛kah用心， 用kah濟ｅ時間， 處理kah濟ｅ資訊。 第二個方法，結合行動gah思考， 真緊dor edang拍著目標。 由此可見， 行動中ｅ 思考方式 kah適合 真無閒無時間ｅ管理者。
敢是 所有ｅ管理者 攏愛做真濟ｅ思考？ 根據學者ｅ研究， 除了 思考能力 以外， 管理者 愛gorh有 真好ｅ 技術能力gah處理大眾關係ｅ能力。 公司內底， 愈低級ｅ 管理者， 愈需要 技術能力， 愈guan級ｅ 管理者， 愈需要思考能力， 不管guan級 a低級， 攏需要 大眾關係ｅ 能力。 可見， ganna有 科學技術ｅ知識， vedang ho一個人 做kah guan級ｅ管理者。 除了vat技術以外， gorh愛有 思考ｅ能力。
因此， 無m對， 管理 是 一門科學， 是 一門 需要di行動中做思考ｅ科學。 真濟 讀科學ｅ人 ma真qau思考， 可惜yin vedang做好管理ｅ kangkue，因為yin ve曉 一方面行動 一面思考， 所以 m是 所有ｅ人攏edang做 管理者。 請你自問， 你ｅ思考方式 是m是 行動中ｅ思考？ 若是， 緊去開公司， 做頭家， 一定大趁錢。
（原登di茄苳12期1996年5月）

科技台文之3
有頭腦ｅ機器

楊谷洋
交通大學控制工程系 教授

Di咱ｅ生活中， 充滿著 各式各樣ｅ 現代化產品， ma致使 咱過ｅ日 有更加一步ｅ 舒適gah方便， 比如講 zimma有一種智慧型模糊（fuzzy）洗衫機， 會曉根據衫a褲ｅ 數量gah質料， 自動調整 洗衫粉ｅ份量、 水量、 水溫、 gah轉速 等， 另外ma有智慧ｅ電鍋， 家己會斟酌 水gah米ｅ比例，煮熟QQ ｅ米飯， ho真濟查甫人 chue無理由講 免洗衫、 煮飯。 當然 咱會希望 以後會發明 愈巧ｅ產品， ma會愈體貼人心； di這ｅ機器ｅ 智慧化過程中， 到底未來 會對dor一方向 來發展neh？ 無定對 咱先來回顧看mai leh機器 是按怎 跟隨人類ｅ腳步 來演進ｅ， 無一定有 “知古鑑今”ｅ效果。
話ui頭仔講落來， di古早hit當時， 咱ｅ祖先a 利用 石頭、 樹枝 等 來製造 原始ｅ工具， 後來 因為提鍊金a 等 技術ｅ發展， 同時kah勇、 gorh kah精緻ｅ器具 ma due deh同濟出現， 但是 zit個時期ｅ工具， 基本上 攏無自身ｅ動力， ma無法度 自我運作， 比如講 做穑用ｅ犁、 馬車 等等， 完全靠人ia是動物 來提供動力 gah 操控。 了後， 人漸漸 dann學會曉 利用來 ui大自然界ｅ 風gah水ｅ 動力源， 親像 荷蘭真有名ｅ風車、 ia是 提供沃水ｅ水車等， 當然 風車gah水車ｅ 運作， 必須愛設計出 好ｅ控制方式， ho伊 會曉免靠人 ma知影 di變化ｅ風、 ia是 水流中 維持 伊ｅ穩定， 按呢， 機器算做 開始有一點a 聰明a。
十八世紀英國ｅ Watt[瓦特]發明了 蒸汽機， ma引起 第一次ｅ 工業革命， 蒸氣ｅ動力 di某一種程度頂面 ho人 m免靠 大自然ｅ動力， 這時陣 人類ｅ歷史 ma對陸權 進入去 海權時代， 利用蒸氣ｅ船隻 開始大步行走 海洋， ma開闊了 人類ｅ眼光； 二十世紀人類 發明了 飛ling機， ui大海 進一步 飛行起去天頂， 甚至利用 太空船、 太空梭 來探測無限、 神秘ｅ 外太空。 Zia e進展 除了講 有強gorh有力ｅ engyine以外，電腦ｅ出現 ma扮演著 一個真重要ｅ角色， 因為 伊快速ｅ運算能力 gah 大量ｅ記憶體， 使得kah新ｅ、 kah完善ｅ控制方式 edang實現， ho機器 di面對複雜ｅ狀況ｅ 時陣， 有能力 作出 正確ｅ判斷； di zit個時陣， 咱會用得講 機器 已經親像 具備有 一個“頭腦”。
一個有頭腦ｅ機器 ho人類 真大ｅ 鼓勵gah想像ｅ空間， 親像 真濟科幻電影中 攏有 無仝型式ｅ 智慧型機器人， 比如“生化電子人”、“機器戰警”、 “魔鬼終結者”等。 當然電影中ｅ事物 a是kah無實際， mgorh ma代表著 人類ｅ夢想； 另外一方面， 既然是 人腦gah電腦ｅ 對比， 按呢 是m是 會用ga人類ｅ智慧 送入機器ｅ電腦內， ho伊 親像人仝款聰明？ 這ma是 現此時一個真熱門ｅ 研究方向， 不過畢竟 人是人、 機器是機器， 雙方 有 基本ｅ差別， 比如講 人有感情、 有情緒、 ma有kah好ｅ 想像力， 倒反ｅ， 機器edang一直重複做 複雜ｅ 計算gah比對， 所以 另外一個 研究方向 是去chue出 人gah機器合作ｅ 方式， 好好利用 雙方ｅ優點， 比如講 遙控機器人ｅ觀念 dor是 結合人ｅ智慧 gah 機器人ｅ能力 來設計di未知、 a是危險ｅ環境情形下 來進行工作。
簡單開講 機器智慧化ｅ種種， 有一個奇怪ｅ想法 浮現di頭殼內：“人 是m是 ma會用算做 有頭腦ｅ機器？” 現代ｅ社會、 現代人ｅ生活方式， 的確是 愈來愈 機器化、 電腦化、 自動化， 希望咱dih deh追求 人工智慧、 建造新ｅ機器ｅ同時， ma會得著 啟示gah反省， 人當然應該 iau有淡薄a 無仝款，若無是 ganna一個 “有頭腦e機器” niania。
（原登di茄苳12期1996年5月）

科技台文 之2
台灣都市空氣ｅ污染 ~ 一葉知影污染

孫岩章
台大植物病蟲害學系教授、環境病害研究室主持人

Di 1989年春天ｅ 某一工， 台北縣 新莊鄉ｅ農會推廣人員 ham一群農民氣putput ga菜園ｅ蒿仔菜 攏總挽起來， 四處teh去陳情， 為什麼？ 因為蒿仔菜葉 一暝之間 一時攏總變gah ve賣zit。 Hit當時， a無人知影 是什麼原因。 所以yin dor ga一部分樣品 送來 台灣大學 ho我診斷gah鑑定。 等我看著zia ｅ蒿仔菜葉， 確實 ma是 驚一dior， 因為我過去 雖然看過ve少ｅ空氣污染案例， 可是mvat看過 zia慘ｅ代誌， ziaｅ蒿仔菜葉 是安怎會變成 臭尾da， 又gorh反光變銅色， 是一個 ho人感覺 真無正常ｅ事件。
在hit當時， 我di台灣大學ｅ實驗室 ziann du設立一冬， 內面 無什麼儀器 可以化驗。 但是我去bing 國外ｅ文獻資料 後， 慢慢a 感覺出 可能是一種 光化學污染物 所造成ｅ。 然後， 我dor一步一步 去買一寡 分析儀器， 希望edang 對空氣中 分析出 特殊ｅ污染物， di zit段漫長ｅ籌備期間， 我ｅ田野調查 ma攏無停過。 結果發現 臭尾da ｅ蒿仔菜 mdann是 出現di新莊， 包括 板橋、 土城、 樹林、 三峽、 泰山、 五股、 中和、 永和、 新店ｅ蒿仔菜ma攏總受害， 甚至 連台北市ｅ大部分地區 ma攏看會著。 到底 污染區ｅ範圍 有外大？ 這又gorh 變成一個 真好ｅ 研究調查題目。 因為 蒿仔菜葉ｅ受害 可以ho咱知影 污染ｅ存在， 菜葉ｅ 受害範圍 正是嚴重污染ｅ範圍。
Dor按呢，我痟痟衝 憨憨a veh去追究 一個到底， dor對台北向南， 一縣看過一縣， 一市看過一市， di 1980年調查清楚ｅ結果， 證明 全台灣 有三個大地區ｅ空氣 攏vai gah 會ho菜葉 會臭尾da。 Zit三個 dor是台北盆地、 台中盆地、 gah高屏地區。 若ga yin 每一地區 劃線圍起來， yin ｅ面積 大約是 台北450平方公里； 台中盆地連南投、 彰化是400平方公里； 高雄、 屏東、 台南、 包括 東爿到旗山、 美濃、 六龜、 南至 枋寮 是1200平方公里；以上三個 攏總加起來 是 2050平方公里， du好是 台灣平地ｅ 七分之一。 Zit個事實 證明 台灣ｅ都市空氣 已經是 出了 真大ｅ問題啦！
Di 1992年我ｅ儀器 設好了後，化驗ｅ結果， 證明台北ｅ天頂 大氣當中，一旦 di無風、 有日頭ｅ hit日， dor edang驗出一種 叫做”PAN”ｅ氣體， （伊ｅ全名中文 叫做 過氧硝酸乙醯酯， 英文叫做 peroxyacetylnitrate， 簡稱叫做PAN） 只要hit日 是 無風、 有日頭， 台北ｅ街a路 dor看ve到路尾。 遠遠看去dor是 一片 煙霧pupu， 四周圍ｅ 觀音山、 大屯山、 四獸山 攏vih di茫霧中， 這dor是 咱所講ｅ “化學煙霧”。 受著zit種污染後， 蒿仔菜 大約di hit暗出現病症， 隔日透早 dor看gah真清楚， 按呢ｅ情形， edang估計伊受害ｅ程度。 咱叫 zit種植物 是 「空氣污染指標植物」。
到目前為止， 阮ｅ實驗室 已經有 四種以上ｅ空氣污染指標植物 發展成功。 Zia ｅ品種 可以同時 監測PAN gah另一種污染－－臭氧（ozone）。 而且阮也徵求 台中、 嘉義 ham 高雄地區ｅ國中、 國小老師， 參加 空氣污染指標植物ｅ 合作計畫， ho yin di校園內 種zia e植物， 觀察有受害無、 di dor一日 出現病徵， 按呢edang知影 各地ｅ實際污染 情形。
古語有講：“一葉知秋”。一片蒿仔菜葉 確實會ga咱講 昨ang ｅ空氣 是外vai。 如果你若有興趣 veh試看mai， 歡迎您 向 台大植物系環境病害研究接詢，電話02-392-5622。
（原登di茄苳12期1996年5月）

科技台文之1
台灣上濟e水鳥－－濱鷸

趙蓮菊 清華大學統計所 教授

Di新竹客雅溪出口，逐年十月gau隔冬ｅ四五月之間，是真濟水鳥 積聚歇睏ｅ所在。 Zit 個時陣 ma是阮ｅ朋友－－濱鷸 來gah台灣ｅ季節。 五六年前， hit當陣iau di鳥會做代誌ｅ永弘 來gau新竹， teh一寡干豆（關渡）地區濱鷸ｅ資料ho阮分析。 Hit個時陣 阮iaugorh m知影有關濱鷸ｅ詳細情形， 但是一接觸著 直覺上 dor感覺 足趣味ｅ， dor due鳥會ｅ朋友 四界去賞鳥， 阮ma想veh gau賞鳥 成做家己 後日a 上甲意ｅ藝量， ho我一生 受用不盡。
Zit幾冬來， 阮看過ｅ鳥 a有百外種， 但是 上愛ma是伊－－ 濱鷸（byin lut8）
濱鷸ｅ學名 叫Calidris alpyina， 英文名叫dunlyin，伊di熱天ham冬天ｅ羽毛無仝。 熱天時， 腳脊骿 是 暗豬肝色、 腹肚中央 有一塊烏色 是 伊ｅ特徵： 冬天ｅ時， 腳脊骿gah胸葉ｅ邊a 是 pu土色e， 腹肚是白色ｅ， 飛ｅ時 翅仔 展出來白色。 Yin上愛 歸群做伙出現 di河口、 浮崙a（沙洲）、lam土（沼澤）地帶， 腳步急促 若 逼鼓箸、 而且qau走。 Chue食ｅ時， 鳥喙插入去土縻漿中 啄食。 Di台灣ｅ淡水河、 客雅溪、 中港溪、 大肚溪 出現，是咱台灣 上濟ｅ水鳥。 根據干豆1988年9月份 gau 1989年四月份 總共 縛放390隻ｅ濱鷸資料：
鳥喙長（mm）35.2±2.58（平均±標準差），28.9-42.3（最小、最大值）
全頭長（mm）59.6±2.74（平均±標準差），110.0-136.0（最小、最大值）
重量（g）57.7±5.71（平均±標準差），42.0-78.0（最小、最大值）
Yin di四五月 向北飛轉去 “西伯利亞”凍原地帶 生湠了後， gau隔冬10月向南飛， 是一款 以查某鳥為主ｅ母系社會。 查某鳥ｅ體型kah大， 喙ma kah長， 但是ganna ui外觀 看起來 並無法度分辨 yin是公ｅ a是母ｅ， 所以必須 愛借著 統計分析 來幫助。 按照統計分析ｅ結果， 發現 愈靠南方ｅ所在， 公ｅ濱鷸鳥dor愈濟。 生物學家deh猜測是：可能是 鳥群 所停腳ｅ所在 若siunn窄、 而且 食物無夠ｅ時陣， 社會地位kah低ｅ公鳥 dor hong迫deh繼續 向南飛走， 所以愈南方yin歇ｅ所在， 公鳥ｅ比例dor愈guan， 台灣 是yin 上南ｅ 棲息所在， 根據干豆地區統計ｅ結果， 公鳥ｅ比例guan gau 65％！
逐冬四五月 阮看yin成群 飛轉去北方， 阮m知 下一冬yin gorh來客雅溪口ｅ時陣 因為“香山填海計畫”來失落yin ｅ厝？ 有一寡人 認為人ｅ生存 比 鳥ｅ生存gorh kah重要， 所以 必須 開發溼地 填海造陸， 但是 三年一閏、 世間好vai照輪，“今仔日鳥隻、明仔載咱人”人gah鳥 實在是 共存共亡ｅ， 一旦 鳥ｅ生存所在 被破壞、 蹧蹋以後， yin ma無愛gorh再來， gah yin相關ｅ植物 ma一定會消失去， gau hit時陣， 強風狂沙一吹來， 其實 咱人ma是漸漸會 失去zit塊土地。
Veh gau當時， 阮ziann m免煩惱neh？

（原登di茄苳12期1996年5月）

創造蘋果ｅ科技奇蹟—Steve Jobs[史帝夫‧賈布斯]
清大資工 薛雅芳

Steve Jobs 是一個 對電腦界 有貢獻ｅ人， 伊是一個 充滿創意ｅ 奇才。
．細漢 e 時陣
Steve Jobs di 1955年2月24日出世， di zitma Silicon Valley[矽谷]所在地 大漢， 伊是 一個孤兒， moghr 足幸運ｅ 是 ho Jobs翁仔某 領養。 Di伊讀高中ｅ時陣， yin歸家搬去Los Altos。
Di hit時陣， 伊對電子相關ｅ 課程 感覺足興趣， diorh利用 下課 ｅ時間 去 惠普電腦（Hewlett-Packard，HP）學一寡課程， 後來閣 di hia 作工讀生。 Diorh按呢， 伊熟識Stephen Wozniak [史蒂芬‧沃茲涅克]， 伊後來 ｅ 合作人。
Di 1972年 伊高中畢業了後， 伊去Portland ｅ Reed大學讀冊， 但是， 伊對hia e興趣無大，無外久伊diorh休學 a。

．創業 e 過程
1976年， Steve 說服 Wozniak gah伊 鬥陣創造 一台 個人電腦， 然後 蘋果一號就在 Steve yin兜 ｅ 車庫 做出來。 假若有 zit個產品， yin diorh 創立了 蘋果電腦， 而且 yin diorh按呢 趁足濟錢。
Di第二冬， yin 閣推出 第二款電腦， zit台電腦 伊有彩色ｅ 介面， 過了三冬， 伊diorh為 蘋果公司 增加著 原本公司價值ｅ 七倍收入。
但是 足可惜 ｅ 是 後來伊推出 ｅ 電腦攏賣無好， 閣 du好遇著 IBM zit間公司 發展了 上好 e 時陣， 實在足歹運。
不過，diorh di zit個時陣， 蘋果公司 發展了 Macintosh[麥金塔]電腦， zia- e 產品 為蘋果公司 帶來轉機， 伊ho蘋果 閣恢復 以早ｅ光景。
1985年ｅ 九月，Steve卻來 離開了水果公司， 這是 因為伊 m是一個好ｅ 領導人，伊siunn固執獨裁， 攏 m願意 聽別人ｅ意見， 這 ho 伊ｅ薪勞 攏足不滿， 所以 伊只好離開 蘋果公司。

．再領江湖
Steve 並無因為按呢 diorh放棄， 伊用 伊ｅ 蘋果公司 e 股票 買著 hit當時 diroh veh破產ｅ NeXT公司。 伊di zit間公司ｅ 時陣， 發展出 一項足重要ｅ 新技術：物件導向程式設計（OOP，Object Oriented Programming）， zit款 新技術 實在真重要， 伊ho程式設計變了卡簡單， di現在 所有讀資訊系 e 學生 攏必須愛 學習使用 OOP。
zit間公司 ma繼續開發出 一寡足有創意ｅ 電腦系統， mgor NeXT公司 zit間公司 並無ho Steve趁著錢， NeXT dak年 攏是了錢， mgorh伊卻可以 ho NeXT維持 ziah-濟年， 這diorh是 Steve 吸引人ｅ 所在。
Di 1986 Steve伊閣買著動畫公司 Pixar。 zit間公司 diorh是 製作 玩具總動員一、 二（Toy Story12）閣有 蟲蟲危機（A Bug's Life）zit兩部動畫ｅ 公司， 這攏是Steve ｅ 夢想。 Steve帶領Pixar 工作人員， 激發yin ｅ創意， m用足濟ｅ規定 去限制yin， 伊ho工作人員 足濟自由， 創造一種 活潑好sng ｅ 氣氛，diorh 是 di 按呢ｅ 工作環境中， 才edang創造出 ziah好趣味ｅ 經典動畫。

．重回蘋果
1996年， 蘋果電腦gah NeXT併購， Steve diorh轉去 蘋果。Mgorh zitgai轉去 蘋果公司ｅ 時陣， 蘋果公司 diorh m是 像伊當初離開 e 時陣 hiah-nih cia-iann。 Ziah-nih濟年過去 a， 蘋果公司 失去了競爭力， 市場ho人佔去， 虧損 ma愈來愈淒慘。
蘋果公司ｅ 前任執行總裁John Sculley， 伊ga Steve請回來 擔任 臨時執行總裁， 上趣味ｅ代誌是 John Sculley diorh是當初 ga Steve Jobs 趕出去 蘋果電腦ｅ人， mgorh John Sculley足了解Steve ｅ能力， 伊認為 經過zit段時間ｅ 鍛鍊， Steve會是 ga 蘋果電腦 帶向未來ｅ人。
Steve轉去了後， 推出 外型顯目ｅ iMac系列電腦， 而且 賣gah卡俗， zit台電腦使得 面對倒擔ｅ 蘋果電腦 又閣活過來了； 伊閣足有決斷力 去裁掉了 gah公司 主要生產方向 無關係ｅ 專案gah生意， zit段時間 是足艱苦， mgorh 種種ｅ決定 確確實實ho蘋果電腦 qiu回鬼門關。
其實di一開始，Steve Jobs堅持 只代理 執行總裁， 一直到 最近幾冬， 伊才正式接執行總裁ｅ位。

．Steve Jobsｅ 成功點
Veh di競爭激烈ｅ 電腦市場上 有地位 是 足無簡單ｅ， Steve Jobs ho蘋果電腦 不只 di實際ｅ技術上 受著 使用者ｅ肯定， 即使 蘋果電腦ｅ佔有率 無guan， mgorh一旦使用 蘋果電腦ｅ人 會對蘋果電腦 有高度ｅ忠誠。
Steve實在是 一位無簡單ｅ 企業領導者， 伊有 伊ｅ機智 可以想出 足濟 無合常規ｅ物件， 足濟gah伊 共同作工作ｅ人 攏形容伊 是一位 絕頂聰明， 足qau驅動員工ｅ主管。
Steve伊有一句足好e話──Think Different， mai ho環境限制思考， diorh是按呢 伊ziah會大成功。

(編者 記： zit篇文章 寫di iPod、 iPhone、 iPad iau未 上市以前， zit三項產品 ga 水果電腦 sak向一個高峰， 尤其是2010年推出 iPad 了後， 市值更加是 親像deh升天按呢， Steve Jobs 有一大堆ｅ故事， 伊ｅ夢想是出一台 俗俗ｅ 平板電腦， 用手指頭仔 輕輕 改變世界， di伊四度deh 大車拚 發揮 生命光彩ｅ 時， 健康ma出了警戒， 祝福伊！)

我ｅ阿媽 台語五百字散文
林雯婷

我e台語是自細漢gah阿媽學e，所以一講到台語我就會想著伊。足久以前，我vat用華語寫過zit篇伊e故事，按怎寫攏怪怪，畢竟阿媽zit世人攏是用台語咧過，用華語寫免講嘛寫ve到位。如今，我有機會用台語寫文章，我決定veh重寫一篇關係我e阿媽e故事。
我e阿媽已經六十幾歲a，嘴角總是帶著笑容，ho人足親切e感覺。不過伊e故事，聽起來suah是ziah nih a ho人心酸。阿媽細漢e時陣，yin兜e經濟狀況並無好，m gorh，伊有一個疼愛子女e阿叔，鼓勵伊去讀冊。hit當陣大家攏無看好查某人去讀冊，m知影阿媽食偌濟苦，kah e sai得著讀冊e權利。
國小畢業了後，阿媽diohr離開了自細漢大漢e田庄，去都市cue頭路。阿媽去e所在是一間紡織工場，成品是zit ma足少看著 e黃麻布袋。he是一個真辛苦e kang kue，逐工攏有tinn ve了e黃麻布袋。十四、五歲e年紀應該是愛無煩無腦，m gorh阿媽suah愛幫忙厝內底趁錢。
Di工場dua兩年qua，阿媽diorh轉去厝內a。hit時陣，厝內除了阿媽e阿爸以外，無其他e查甫人，阿媽e阿兄gah小弟攏已經去外地cue 頭路 a。因為厝內e查甫人無夠濟，阿媽只好去田lin鬥sann工，m gorh阿媽竟然無嫌辛苦，顛倒笑咧講「誰講查某人無法度去田lin做穡e？」
Di厝lin鬥sann工e hit段日子，改變了阿媽e一生。hit e 時陣阿媽di厝內上大e kang kue dior是幫忙田lin e 一寡代誌。m gorh di冬天m免做穡e時陣，腳步停ve落來e伊，一個人去屏東，開始學做棉被。ma是因為按呢，阿媽日後ziah edang以做手工棉被顧腹肚。
Dua di厝lin四、五冬，阿媽也已經到veh做大人結婚e年紀a，阿媽是相親熟識對象e，阿公是伊頭一個e對象。di結婚進前，yin兩個人ganna見過兩gai面nia nia，第一gai是相親hit工，閣來diorh是阿公去厝lin講親成e時陣a。雖然講結婚e對象是父母cue e，m gorh ma是等gah阿媽dim頭zia guann定zit門婚事。結婚後無外久，阿公想veh出外拍拼家己e事業，阿媽dior hdue伊去一個完全生分e城市，度過伊e大半世人。
阿公gah阿媽選擇以手工棉被創業，來到異鄉e yin，一開始過著非常辛苦e生活。手工棉被是一個無簡單e kang kue，成本siunn guan，害著價數壓ve落來，所以大部分e人攏會選擇機器做e棉被。hit當陣，yin無熟識幾個在地人，生意攏是好朋友介紹來e。diorh算講有ziann好e工夫，無人客無生意無宣傳，diorh等是啥物攏無。姑不二終，阿媽只好牽著自輪車，載著沉重e棉被貨樣，一間厝一間厝dau dau a推銷。
我聽阿媽講，當時棉被e需要量足少，yin熟識e人ma足少，棉被閣無容易歹去。多數e人客攏是來自老一輩e人，嫁娶時定做棉被e習慣。di彰化e hit幾冬，日子一直是真painn過e，生意得著e利純dann du好有夠食飯nia nia。
以後e hit幾冬，因為台灣e經濟復活，厝內e狀況變gah卡寬裕。無過外久阿媽diorh生個e qin- a，組織一個六個人e大家庭，過著幸福e日子。m gorh di qin a漸漸大漢了後，阿媽e人生又閣出現了轉折。zit gai是阿公破病a，阿公e病無輕，是腦瘤，不過幸運e是，是一粒良性e腦瘤。zit場病ho阿公di病院dua個外月，diorh算講出院a，ma愛固定時間dng去病院做復健。
阿公dua院e hit段日子，阿媽一個人擔起厝內所有e代誌，為著醫藥費，伊放下身段ga身軀邊e人借錢；為著e dang好好照顧阿公，阿媽ga qin a委託ho附近e親成朋友。一個查某人，愛兼顧生活gah照顧子女，實在是足辛苦。m gorh，阿媽ma是堅強向前行。
大約是di阿媽五十五歲hit冬，阿公離開a。減一個人做伴e阿媽，決定搬倒轉去台南e祖厝，守護zit 個陪dior阿公大漢e所在，ma繼續做著已經漸漸失傳e工夫─手工棉被。摸著阿媽一針一線tinn出來e棉被，心內e感動是無法度用語言來形容e。阿媽e故事iah閣有真濟，m是三工、五工就會sai寫e完e。伊e故事，我願意用一世人dau dau a幫伊寫，一字一字寫出伊e人生gah伊e堅強。

寒冬中ｅ收成— ho 台語世界小說選ｅ 課程 班上ｅ 話語
張春凰

Dear all：
台語世界小說選ｅ 課程 已經結束a， 咱 來做一個檢討。
Zit個課程 透過 台語世界小說選ｅ 訓練， 提供同學 di式微ｅ 母語環境中， 接觸著 基礎ｅ 聽、 講、 讀、 寫ｅ 機會。
期中考前ｅ訓練 是 注重di基礎ｅ 拼音教程gah練習， 藉著 台語雙拼教學法 授課gah設計ho同學 去教 一個初學者ｅ習題， ho lin 體驗 教學相長ｅ 浸透式學習法， zit部份 同學ｅ回應 攏真積極。
前半段 選讀ｅ文章 攏是 台灣本土ｅ 台語文學， 主要 di閱讀ｅ訓練， 全文注音資料 為著veh 引導 聽、 講、 讀ｅ能力， 加上 期中考ｅ 活動， 來評詁 學習ｅ效果。
後半段， 課程進入 世界性ｅ作家， 透過 世界經典名作， 咱來開啟 目光， 共同欣賞 人類共同ｅ 文化資產， 以 台文形式 了解 台語文ｅ 美質gah舞台， 所以 除了小說ｅ賞析提問 題目 咱前後有：

為何veh讀經典？
為何veh 世界經典台譯？
並 簡述 你ｅ台譯經驗。
簡述台語話劇 分組演出ｅ經驗gah意義。

做為 期尾考ｅ課題， zia-ｅ題目 為加強lin一學期來 辛苦學習， 用心拍拚 展現ｅ成果 有一個 檢討 gah 心聲表達ｅ 交流。
同學再度 體悟著 聽講讀寫ｅ 全程堅實學習ｅ 意思。 尤其 di經過 台譯作業ｅ 訓練 了後， 班上ｅ同學 有 33/34位 可以流暢ｅ 用母語 思考gah回答 問題， 可貴ｅ是 yinｅ拼音 攏有 一定ｅ水準， di ziah短ｅ時間內， 這可講是 台語文教學ｅ 一個好現象。
真濟同學 攏表示 yin 對台譯zit份作業 起初是 辛苦ｅ 處女作， 到尾仔愈寫愈順 愈有成就感， 酸甜苦甘 兼顧， 只要按照 老師 所提供ｅ 資料gah步數， 配合 學生ｅ 學習經驗、 成長背景 gah 動機， 其實di期中考ｅ時陣 已經有 真濟學生 提前進入 期尾 所veh要求ｅ 表現。
Zit回批改 期尾考ｅ簡答題， 可看著 每一個學生 攏認真 deh 作答， 認真當中 閣有誠意， m是ganna veh求分數nia， 因為 我知影 di監考當中， 同學攏 沈di嚴肅ｅ思考 當中， 尤其看著 考卷ｅ答題， 更加 對一學期來ｅ 用心態度， 老師可看著 同學對zit門課ｅ 珍惜gah敬重， 師生雙方 攏有 真大ｅ鼓勵， 期待zit份 好ｅ 互動、 經驗、 成果 深入學生ｅ心中 加強學習ｅ 能量gah得取， ma可成為 人生ｅ 一寡因素， 一世人 攏有zit款 訓練過ｅ 氣質。
Di學習ｅ各種 考試gah作業 當中， 期尾考 再次用essayｅ方式 測驗， 師生深切ｅ把握 好酒沈甕底ｅ 本事盡展， 這當然是 全新版ｅ 鯉魚躍龍門， 因為前後 咱盡量用 浸透式ｅ 學習機會。
有同學講 di學習 zit門課內底 時常ka電話 轉去gah爸母 ham 阿公、 阿媽講話 請教 台語問題， 其中 序大人 不免有 甜蜜ｅ煩， 重要ｅ是 老一輩ｅ人 因為 受著珍惜 更加 受著鼓勵， 這攏是 親情、 家庭倫理ｅ 語言文化 擴大， 各位同學 學期結束 了後 一段時間 將是歇寒， 寒假中 轉去厝內 ga台語 掛di嘴裡 把握 使用機會， ma 斟酌聽 咱ｅ 序大人 講話， 聽yin 生活ｅ智慧。
多謝 同學ga我講 yin zit組deh演戲前ｅ 排演當中， 透早9點、 暗時10點ｅ時段 逐個 攏真a-sa-li 無第二句話 diorh來赴約， zit份 同窗友誼， 是 演戲 合作gah體貼ｅ 另外收穫。
感謝di ziah寒、 冷濕ｅ 天氣當中， lin送我ｅ zit份 寶貴ｅ禮物， 老師 會 因為按呢， ma受著 真大ｅ鼓勵。
各位 珍重！
(20110110)

第九章 教學實務


教學實務-- 如何進行 生命書寫 張春凰
取自 《閱讀gah書寫》

一. Di 教習中 教gah學 做伙成長
閱讀gah書寫 zit門課 di 靜宜大學 自 2009年秋季 開始 必修 一學年， 主題注重 di生命教育， 上下期 分別 以 個人 生命書寫、 創意履歷表 做重心。
配合 阮班上ｅ 企業管理科系 背景， 一開始 ho yin 有 自主ｅ見解， 先嚴肅 面對 “為什麼veh 閱讀” ｅ 開張戲齣， 教師表明 一定會挑選 精彩部份 kng-di 本冊內底， 請同學 mai應付-- 白紙寫烏字ｅ 證據， ma重視 yinｅ參與感 di 期尾 邀請yin 簽名， 一步一腳印 為 教習圓滿 留著 珍貴ｅ回憶。
上學期 師生 照 整體課程規劃， 以 《流動》文選 做底， 做 相關搭配， 書寫文章ｅ 部份 總共有八篇， 另外 以 文章 做 隨堂閱讀 註記gah測驗。
Di本章， 咱 換一個角度 先來 講書寫， 再來 談論 閱讀， 配合 金字塔邏輯 圖解原理 gah PowerPoint大綱 運用， 舉例講述。
親像 中小學ｅ 作文課 按呢， 出題目、 交作業、 批改、 檢討互動。 學期中 可發現 有幾個學生 文才真好， 到了期尾 1500-3000字ｅ 生命書寫， 個人 有個人ｅ 故事， 看gah有感動、 有歡喜， 有人 勇敢反省、 有人 珍惜生命、 有人veh 去冒險、 有人 去菜市仔 幫助阿媽 賣冬節圓仔……， 師生如 一家人， 有時 分ve 清楚 你是deh 教課 或者是 做心理輔導師 或 朋友序大。
1. 關係 生命書寫
到學期尾， diorh是 好酒沈甕底ｅ 總收割期， 因為 校方ｅ網路 為 逐個同學 留下一欄 個人書寫ｅ生命車頭， 教師針對 一學期ｅ 讀寫， 做一個 總結引導-- “生命書寫”～～ 如何達到 1500-3000字 ， 以下是 分ho 學生ｅ講義(20091210)：
同學di七篇ｅ寫作當中， 有四篇心得： 油蔴菜籽、 童年往事、 謝智謀教授ｅ 演講、 電影 超人特攻隊；由zia 可看出lin 對 文章閱讀、 看電影ｅ 知覺、 聽話 掠重點ｅ能力 兼顧 書寫表達ｅ能力；三篇創作 為什麼veh閱讀、 童年中秋、 情書 是 檢視逐個ｅ 創作能力。 Zit學期 上尾後ｅ 重頭戲 di 佔百分40%ｅ 期尾傳送 “E學園”ｅ 〈生命書寫〉， 需要寫1500-3000字。 一學期來 lin 所寫ｅ 大約攏 di幾百字 到 千外字當中， zitma 一下veh 跳到3000字左右， 愛有一寡 撇步：

1.1 veh按怎構思？
a. “生命書寫” 簡單講 意思是 生命故事、 成長故事；
b. 針對題目 做分段 咱可以 用年代 分出 幼年、 童年、 青少年、 青年ｅ大綱；
c. di每一段 成長過程 有什麼代誌、 什麼人物 ( 老師、 朋友、 親人、 特殊人物ｅ傳記 或 冊中ｅ 一句話 ) ho咱印象深刻、 感動、 快樂、 痛苦、 打擊、 挫折 等， 改變咱ｅ 行為或事件 ho咱一生難忘， 來回想、 省思 zia-ｅ 過往gah意義；

1.2 veh 如何落筆？
a. 針對 咱veh寫ｅ人、 事、 物 分做 小副題， 按呢 卡容易 有一條 連接線， 比如 範文 簡媜ｅ〈漁父〉 gah 鍾文音ｅ 〈我ｅ天可汗〉 ， 文中運行 分做 幾個小部份， 以 時間序列 做軸， 再 加添細節、 再以 文學ｅ語言 支持理路 展開 情感美感ｅ 大體；
b. 咱ma edang 採取 〈油蔴菜籽〉 、 〈童年往事〉 自傳式ｅ 一路寫起來， 或 採取〈寂寞ｅ十七歲〉 集中 di十七歲ｅ 心事gah困境 表白；

1.3任何 活動 攏可取材
咱讀過 什麼冊、 聽過 什麼演講、 看過 什麼電影、 參加過 什麼 活動/比賽、 去過 什麼所在 旅遊 ho你 眼界大開， ho你得著 啟發或獎賞、 ho你了解 人生ｅ價值，任何 活動 攏是 取材ｅ對象， 咱ma會使 先寫了ziah來取題目；

1.4夢想 ma 是 生命書寫
咱決定veh做什麼 事業 、 行什麼路、 或 繼承家業， 有什麼 期待、 抱負、 願景gah責任 需要 精密ｅ計劃？ 夢想 咱ｅ未來 ， 引領咱ｅ 想像力 gah 創造力；

1.5 達到1500-3000字ｅ 運筆能力
有了 文章ｅ 段落架構， 再di每一段ｅ份量 文字ｅ重量gah質量 做撙節， 如 人ｅ 個性gah行為 有 什麼特徵 veh強調、 凸顯， 節奏 如何安排， 氣氛veh如何 渲染加料， 達到1500-3000字ｅ運筆能力；

1.6 落筆實踐
穩定型ｅ學生 請你量早寫， di寫ｅ過程中， 寫了去讀， 看家己 有 扣an主題 無? 有離題無？ 寫有順無? 讀了閣修改， 修改了 閣寫， 寫作 只要 你有耐性， diorh有辦法ga寫ho清楚； 天才型ｅ學生， 靈感往往ho你di睏眠中 一再演出， 可能di你 猶ve動筆 進前， 寫作ｅ細胞diorh deh絞滾， 你可能屬di 敏感ｅ天份， 按呢diorh恭喜你， 無認真寫diorh無采， 可惜啦！

1.7 真情誠意
愛會記ｅ， 真情感動 比 寫作技巧 卡重要， 寫你熟識ｅ 人、 事、 物 ， 寫你 上深刻ｅ 代誌！

1.8 充分利用 範本
選讀課本 〈流動． 光影〉中， 每一個單元 攏有導讀，可 先讀文章 家己先想， 再去 詳細品讀 別人ｅ觀點 補充 家己 無看著ｅ角度， 再度 去讀範文， 分析、 對比 家己ｅ經驗， 按呢 可提供咱 一寡 提示gah寫作ｅ 方向；

1.9 善用 文思診療室
學校 有 一流作家 輪流 di 文思診療室 駐校， 同學 愛好好 把握機會；

1.10 早早 提筆準備
穩定型ｅ學生 早早會準備， 準時交作業， 才氣型ｅ學生 會治一目nih 爆發伊ｅ靈思才華， 任何 機會gah機緣， m通ho飛走去。
寫作會ho咱 帶來快樂、 或 流目屎， 無論按怎， 攏ho咱提供 一個機會 想清楚， 即使是 痛苦 ma會 ho咱ｅ 靈魂淨化， 咱ve浪費生命， 寫了 咱會有 成就感。 把握 咱ｅ靈感， 親像 最近二禮拜 以來 老師寫了 六篇短篇 敘述散文， 平均 一篇三千字， zit款ｅ 經驗 來自 靈感一直vok出來， 任何代誌 攏可 暫時排開， 無ga 寫落來 靈感一目nih仔 diorh會消失去a。 後來ｅ 二禮拜 又閣 寫五篇，加上 進前寫ｅ一篇 總共十二 篇， diorh成 就一本 叫做 《冬節圓》ｅ冊。 平常 有題目diorh記落來， 身邊ｅ人， 你所聽ｅ、所看ｅ一句話 攏ho你靈感。

二. 金字塔思考方法、 PowerPoint 大綱 簡報 實作
經過 上學期ｅ 實務gah觀察， 結論是 學生 並無出現 閱讀gah書寫ｅ 問題。 閱讀gah 書寫 以外， 講gah組織能力 卡欠少 這du好是 第二學期 需要 加強ｅ所在。
台灣ｅ學生 主動講話ｅ意願真低 gah 表達ｅ 方式 真欠缺， 大部份學生 攏真斯文， 問問題 ｅ次數 無夠濟， 以下 veh 實做 金字塔思考方法gah PowerPoint 大綱 做簡報， 來試 來結合 學生ｅ 讀、 寫、 講ｅ 表達gah組織 能力。 因為 zit班 是 企業人， 不管以後 veh做 職員 或 頭家 或 改行， 結合 zit門 閱讀gah 書寫ｅ 課程訓練背景 做 一個基礎， 希望ho yin 有自信 ga家己ｅ能力、 專長， 以 讀寫ｅ 訓練 經驗gah 模式 注入yinｅ熱情、 精神、 氣質， 有條理 ga家己ｅ 理念計劃 di一定ｅ水準， 呈現出 一個人ｅ 豐美內在。
2.1 金字塔 圖解架構 實務
這是 以 第一學期ｅ 生命書寫 所完成ｅ文章， 第二學期 以 學生家己ｅ 創作做例， 來切入 做分析ｅ 教學效益個卡省力， 因為 yinｅ創作 已經內建 心底， 請學生以 家己ｅ作品 根據 金字塔思考方法 架構。

(待續)

Chekhov 短篇小說集 三篇 陳融廷 台譯
細粒蘋果
Di黑海gah Solovetsdky[所羅維茲基]群島之間， di某某經緯度ｅ所在，有一位叫做 Trifon Semyonovich[特萊豐‧西繆諾維奇]ｅ地主 已經di家己ｅ黑土地頂guan dua 真濟冬a。 伊ｅ姓 親像船ｅ撐竿， zit個姓 原來是zin響亮deh表示人類美德之一ｅ 拉丁字所演變來ｅ。Trifon[特萊豐]伊有大約八千英畝烏土ｅ庄園。 庄園雖講全部攏是伊ｅ，mgorh已經抵押等veh賣a。 「俗俗a賣」ｅ招牌 di deh伊頭殼頂 禿斑出現以前dor已經釘di hia a， 但是zit個庄園ia ve賣掉； Trifon edang無受著zit款歹運， 攏是因為 伊家己ｅ技巧gah hit個qau ho人騙去ｅ銀行經理。 當然， 總有一工 銀行會倒， 伊gah一大批人 仝款edang ga銀行借無利息ｅ貸款， 事實上， 逐bai伊付出 貸款ｅ淡薄a利息ｅ 時陣， 伊總是做gah ve輸真ｅ仝款， dor親像一個人 為著 建教堂 抑是 為死去ｅ人安魂， 來捐出一sen錢 仝款偉大。 若是zit個世界m是按呢生， 是另外一個世界， 若是所有ｅ物件 攏用yin特殊ｅ專有名詞來稱呼ｅ話， 按呢Trifon dor m免叫做 Trifon lo， 應該愛用平常保留ho牛馬用ｅ名來稱呼。 講一句老實話， Trifon確實是 一個zing牲； 我相信 連伊本人 ma 會同意 我ｅ看法。 伊若是 聽著zit句話 (因為 伊有ｅ時陣 ma 會看《田嬰》雜誌)， 若照講 伊ve氣gah ciak ciak dior， 因為 伊有 相當ｅ智慧， 真有可能會完全同意我ｅ看法， 無的確 閣會送我 一打 伊ｅ Antonovka [安東諾夫卡]蘋果， 來感謝我 無ga伊ｅ姓 洩漏出去ｅ 好意。 Di zia 我只有用 伊ｅ教名 gah ui父系傳落來ｅ名， 我無準備寫出 伊所有ｅ美德， ia若無dor會 lor lor長。 若veh完全 ga Trifon Semyonovich zit個人 寫出來， 無用長篇大論ve sai， 伊ｅ分量 e sai gah Eugene Sue [猶今．蘇]ｅ 《流浪ｅ猶太人》 來比。 我無想veh提起 伊安怎 用紙牌騙人， 抑是 di政治上 作弊cue門路， ho伊edang m免還債務lap抵押利息， 抑是 安怎創治 老神父gah副主祭， 抑是伊原始社會ｅ打扮 坐馬車 經過村內巷仔ｅ 模樣。 我限制家己 愛光明正大 提出 Trifon安怎 對待同胞ｅ 一件小故事。 根據gah同胞相處 四分之三世紀ｅ經驗， 伊vat趕biann biann 寫出 下面ｅ對句來歌頌人。
憨a， 飯桶， 庄腳song；
Sng牌(1)騙家己 騙別人， 自肥ma自毀。
Di deh熱天veh suahｅ 一個真美好ｅ透早， Trifon家己一個人du deh伊hit 個風景真suiｅ 水果園內底， 行di真窄 又閣長ｅ 小路頂guan。 Hit種edang ho詩人靈感ｅ 優美氣氛 充滿了 四箍笠仔ｅ環境。 親像deh講： 「時間掠ho an， 時機掠ho an， 愛趁時陣 享受快樂， 因為秋天 dit veh到a！」 但是 hit工透早 Trifon並無siann清爽， 第一 可能是 伊gah詩人 閣差真遠le； 第二 可能是 伊過了 非常無爽快ｅ 暗暝。 這 di牌桌頂guan 搏輸gah 真悽慘ｅ人 來講， 是 真平常ｅ代誌。 行di deh Trifon後壁ｅ 是 伊忠心ｅ 下腳手人， 年紀 六十外歲ｅ Karpushka [卡布須加]， 伊疑神疑鬼ｅ四界看。 Karpushka ｅ德行 gah Trifon 比起來， 實在是 半斤八兩， 伊 對擦鞋 真有一套， 對安怎tai狗仔 閣有絕招， 只要是伊手摸過ｅ物件 攏會 消失無蹤去， 做一個偵探， 伊實在是 無人edang比ｅ過ｅ人才。 村a內ｅ 幹事職司 攏叫伊做 「gor血蛇龍」。 差不多 逐工攏有 附近ｅ 做穡人 抑是 地主 來向Trifon 投訴 Karpushka所做ｅ 歹代誌， 但是 攏mvat有 任何回應。 Trifon ｅ理由是 Karpushka 是無人edang取替ｅ， 伊有講ve了 有關種種ｅ閒談、 童話、 傳說gah典故 等等ｅ 才情。 伊edang 有嘴講到無nuaｅ 講vesuah。 伊講話 順順若流水 閣 ve dun denn[不遲疑]， 至少du deh伊 iau ve聽著 任何 伊有興趣ｅ代誌 進前 是按呢ｅ。
Dor di zit 個特別ｅ透早， Karpushka dua di主人後壁行， 談論 有關 兩個戴白帽仔ｅ 查甫學生qin-aｅ 故事。 Yin兩個人 手teh武器 入去 水果園。 要求 Karpushka 允准yin di園a內 拍獵， 甚至 veh den出五十 [戈比]來ga伊ose[]。 但是， 主人ｅ脾氣 伊心內知知leh，mganna看ve起yinｅ拒絕有好處ｅoseh[賄賂]，gorh放出栗子gah灰灰兩隻狗去咬 yin。Zit個故事du講suah，伊開始大聲宣傳有關地方醫生ｅ德行，mgor故事iau ve了ｅ時陣，伊聽到ui左爿蘋果樹林內傳來ｅ一種si-si-su-su可疑ｅ聲音。所以無gorh講話，斟酌a聽；伊家己確定認出zit種聲音ｅ可疑來源，伊dor ga主人ｅ外套qiu一下，然後zong入去heh si-si-su-su聲音ｅ所在。特萊豐預想到會有什麼趣味ｅ代誌，hiong-hiong-gong-gong用老人ｅ腳步due di卡布須加ｅ後壁。Di水果園邊一欉kia ziann ziannｅ蘋果樹腳，一位du deh dau dau a哺一粒蘋果ｅ農家查某qin-a kia di hia，另外離伊無遠ｅ所在，有一位肩胛頭真闊ｅ農家子弟di deh土腳爬，ga ho風吹落來ｅ蘋果揀起來。伊ga iau ve熟ｅdan入去ge樹仔欉內底，ga已經熟ｅ蘋果用lah sapｅ闊手，細膩ｅ送ho伊ｅ杜琪妮亞。伊sua對家己腹肚ｅ狀況攏無ve 睬，三嘴做一嘴繼續一直吞，查甫qin-a 又gorh繼續di leh土腳揀蘋果，一點a攏無想著伊家己，ganna專心為伊hit 個獨一無二ｅ杜琪妮亞。
「ui樹仔頂van一個落來，」查某qin-a ge聲細膩ｅga sai-long[慫恿]。
「我m敢。」
「你是leh驚什麼，『血腥龍』? 伊真有可能du deh小酒館lim淡薄a酒……」
查甫qin-a跳guan起來，ui樹仔頂挽一粒蘋果ho查某qin-a。但是dor親像古早ｅ亞當gah夏娃仝款，zit個查甫qin-a gah 查某qin-a ma因為yinｅ蘋果，愛悽慘去受罪……伊ga一塊蘋果落來馬上交ho查甫qin-a。Yin兩個ziah du吃著蘋果ｅ酸味，兩個人ｅ面突然間青sun-sun……這 m是因為蘋果ｅ酸味yin zia按呢，是因為yin注意到特萊豐嚴肅ｅ面容gah卡布須加hit個奸巧惡毒ｅ嘴面。
「親愛ｅ，qau早a！」特萊豐向yin ua過去，「唉唷！lin du deh享受蘋果，希望我無ga lin攪擾著。」
查甫qin-a ga帽a tng落來， 頭le le， 查某qin-a ma頭le l e看伊ｅ圍裙。
「古烈格里， 最近過了好無？」 特萊豐對查甫qin-a繼續講， 「少年ｅ， 最近安怎？」
「我ganna teh一個nia nia，」 查埔qin-a小小聲講， 「是ui土腳 揀起來ｅ。」
特萊豐 ga目睭 撇過去 查某qin-a身上。
「你好無， 我ｅ小親親？」 這使伊 發現家己 更加專心 注意伊ｅ 圍裙。
「唷！qun ia ve慶祝linｅ婚禮le， 對無？」
「無le，先生！qun ia ve……我對天ziu zua，qun ganna挽一粒蘋果。hut le m是……」
伊uat頭對查甫qin-a講：
「好！好la！真好！學認字讀冊ve？」
「先生！ia ve。qun ganna teh一粒蘋果，qun是di土腳cue著ｅ……」
「你ia ve去讀冊leh，dor知影veh安怎偷teh物件，嘿嘿！好，按呢好！你無因為功課壓力感覺真沉重。你什麼時陣開始偷teh物件？」
「先生，我並無偷teh a。」
「若無你hit位suisuiｅ小貼心ｅle？」卡布須加ga伊主人ｅ話拍斷，對查甫qin-a講，「為什麼伊看起來hiah nih a失志？敢是因為你無向伊表達夠濟ｅ愛？」
「卡布須加！恬去！」特萊豐hua講，「古烈格里，我veh愛你講一個故事ho我聽看mai。」
古烈格里tiau故意sau一聲，做一個真奇怪ｅ笑面，
「先生，我vehiau講故事。我ma vuai你ｅ蘋果。veh愛蘋果，我家己去買！」
「我ｅqin-a，我真歡喜知影你真好額le！但是──我ma是 veh愛你講一個故事。我想veh聽，卡布須加ma想veh聽，你ｅ小貼心ma想veh聽，van驚歹勢，愛有膽量，『大膽是賊心。』我親愛ｅ小朋友，按呢講敢 mdiorh？」特萊豐一對ciabebeｅ目睭ga查甫qin-a qin diau diau。查甫qin-a額頭汗 cok cok流。
「先生，先生──」卡布須加無甲意ｅ用guan gorh iuｅ查甫聲拍斷伊主人ｅ話：「你為什麼m ho伊換唱一條qin-a歌？伊ve憨gah為咱講故事la。」
「卡布須加，恬去！伊愛先講一個故事。按呢好la！我ｅ小朋友，dor照我所講ｅ按呢去做la！」
「什麼故事我ma m知影。」
「你這是什麼意思……什麼故事你ma m知影？按呢你na會hiau去偷？十誡中ｅ第八誡是安怎講ｅ？」
「先生，你為什麼veh問我？我veh na會知影？上帝為證，qun ganna teh一個蘋果niania，而且gor是ui土腳kio起來ｅ。」
「講一個故事ho我聽」
卡布須加開始收集蕁麻。查甫qin-a真清楚知影伊是安怎veh收集蕁麻。Ga伊ｅ族人仝款，特萊豐有伊家己持法ｅ妙招。如果掠著賊偷，伊dor ga yin關di地窖二十四小時，ia是用蕁麻sut yin，ia是先將yin歸身軀tng了了，才會放yin suah。對你來講這敢是新聞？有zit種歹行為ｅ人滿滿是。古烈格里ui目睭邊看著蕁麻，張遲一下，細聲sau一下，伊並無講故事，顛倒講了一大套完全無意義ｅ廢話出氣。哀哼、流汗、悶悶，比平常時ka ziap拭鼻a，伊開始編造一寡有關俄國武士ga牛鬼蛇神各種惡魔頭殼割落來，然後gah美麗ｅ少女結婚ｅ故事。特萊豐kia di hia聽，伊ｅ視線mvat離開過講故事ｅ人。
「好a！」當查甫qin-a接ve到故事ｅ情節di hia烏白講ｅ時陣，伊講：「你講故事真在行，但是你gor ka ehiau偷。Zit ma──輪到我hit位suisuiｅ──」伊向查某qin-a uat頭，「你背主禱文看mai。」
sui查某qin-a面紅gigi用de低ｅ聲音背誦主禱文，氣攏m敢喘。
「然後背第八誡！」
「你掠準講qun teh了真濟蘋果？」查甫qin-a接落講，失望ｅ神態用兩手di空中搖，「如果你m相信我ｅ話，我edang向十字架ziu zua。」
「親愛ｅ，lin m知影第八誡，按呢dor真害a。我無ho lin一個教訓ve sai。我ｅ美人a，伊敎你偷嗎？我ｅ小天使，為什麼按呢恬恬？你一定愛回答！講a！你恬恬m講話，het dor是承認a。按呢，我ｅ小美人，因為你所愛ｅ人敎你偷，我愛你拍伊！」
「我vuai！」查某qin-a低聲講。」
「哦！只要小可拍伊一個dor edang a。伊是一個飯桶，應該教示伊。我親愛ｅ，ga拍a！如果你m願意，我veh叫卡布須加gah馬特威來ho你試看mai蕁麻ｅ滋味……你ia gorh m願意嗎？」
「vuai！我vuai！」
「卡布須加！過來a！」
Dor di-deh zit個時陣，查某qin-a頭向前ｅ走向查甫qin-a，ga伊sen一個嘴pe。查甫qin-a目睭含淚，憨憨a笑le。
「妙a！我親愛ｅ！zit ma qiu掉伊ｅ頭鬃！我ｅ寶貝，衝a！你vuai？卡布須加，過來a！」
查某qin-a qiu著伊愛人ｅ頭鬃。
「mai停落來， 用力ga qiu疼， 用力 qiu 卡 an e！」
查某qin-a真ｅ開始qiu an一愛人ｅ頭鬃，卡布須加歡喜ga veh掠狂，zi-zat ve diau[壓不住]心內ｅ興奮，大笑離開。
「有夠a！」特萊豐講，「你應該ho你女朋友一個教訓。伊ho你一個教訓，zit ma換你顛到過來還伊a！」
「慈悲ｅ上帝，你安怎edang想出zit款代誌來？為什麼我一定愛拍伊？」
「為什麼？哼，伊ho你拍，敢無？zit ma換你拍伊……按呢對伊有真大ｅ好處！你m願意嗎？好，ga你講ve行。卡布須加，去叫馬特威！」
查甫qin-a向土腳呸一嘴嘴nua，親像la-hiorh[老鷹] veh掠細隻雞a仝款ｅ一拳掠an伊愛人ｅ頭鬃，開始暴行相對。當伊出罰伊ｅ時陣，ganna一點a ma ve感覺超過，du-deh歡喜ｅ時，sua ve記一di毒拍家已ｅ愛人，顛倒是講伊di修理特萊豐。查某qin-a尖聲vava叫，伊gorh繼續拍真久一段時間。如果m是莎仙卡，特萊豐ｅ查某囝，ui樹欉背後突然真du好出現ｅ話，我真m知影zit個故事將會如何結束。
「爸爸，來dng去lim茶。」伊huah講。當伊看到當場ｅ情景時，忍不diau大笑起來。
「按呢夠a。」特萊豐講，「親愛ｅlin edang走a。再見！將來lin結婚，我會送一寡小蘋果做禮物e。」特萊豐向zit兩位zng入水果園ｅqin-a dom頭行禮離開。查甫查某qin-a清醒過來了後ma離開a。查甫qin-a向右爿行，查某qin-a向左爿行；事到如今，兩人無gorh見過面。Na是莎仙卡無ui樹欉突然出現ｅ話，yin huan se gorh會ho蕁麻sut拍。這dor是特萊豐老年ｅ時如何自娛ｅ方法，而且伊厝內ｅ人ma ve差伊外濟。伊ｅ查某囝對下層社會ｅ訪客，有將蔥仔頭tinn入去yin帽aｅ習慣；對lim酒醉ｅ人攏看做仝款，用粉筆di yin背後寫真大「笨桶」gah「憨人」ｅ字。舊年冬天，伊ｅ囝米地亞，一個退伍ｅ慰官，比伊老爸gorh ka有出脫。一個退伍大兵拒絕送伊一隻細隻狗，gorh敎家己ｅ查某囝mai ui伊手頂teh糖a gah薑餅，所以，di卡布須加ｅ幫助之下，米地亞ga人厝ｅ大門用diama膠[柏油]抹烏。
這dor是特萊豐‧西繆諾維奇， 真正ｅ特萊豐所以ho人稱作特萊豐ｅ緣故。



(1)這di原文Durachki(dunces)，是sng紙牌ｅ一種， ma是一個 真困難翻譯ｅ雙關語。





歡 喜
暗暝十二點，一位名叫做米地亞‧庫達洛夫ｅ少年人，真興奮ｅ亂糟糟ｅzong入去伊老爸老母ｅ公寓，ganna siau人仝款一間gor一間四界走。伊ｅ老爸老母已經上床a，妹妹di眠床頂看一本小說ｅ尾a幾頁，上小學ｅ弟弟攏已經睏gah死死a。
「安怎a？」伊ｅ爸爸媽媽ho zit個意外驚gah頭暈，「到底是安怎a la？」
「哦！mai問我！做眠夢ma想ve到會有zit款代誌發生。絕對料想ve到ｅ……完完全全ho人ve去相信！」
米地亞笑gah真大聲，歡喜gah兩隻腳軟ga bua坐di椅a頂。
「難以相信！」伊繼續講，「lin攏無法度想像！試想看看！」
伊ｅ妹妹ui床頂跳起來，qiu一條毯a圍di肩胛頭頂去見哥哥。小弟yin ma醒起來a。
「到底是安怎樣？你ganna完全起siau仝款！」
「He是因為我siunn歡喜a，媽媽。今a日全俄國ｅ人攏知影我zit個人！每──一個人！一直到今a日ganna lin知影我zit個人，米地亞‧庫達洛夫，一個學院註冊員ｅ存在。自今a日開始，人人攏知影！哦！媽媽！哦！上帝a！」米地亞跳起來又gorh ga所有ｅ房間zong一遍，然後buah入去椅a內底。
「好a！ga阮講發生了什麼代誌？請你冷靜冷靜！」
「lin──lin活親像野獸，m看報紙，『出名』對lin來講並無什麼意義。只有無平凡ｅ代誌才會登di leh報紙頂quanｅ，一有任何重大ｅ代誌發生，人人攏會知影，一項ma ve去ho漏去。我足歡喜。哦！上帝！lin知影吧，報紙ganna記載知名人物niania。哼！yin是記了一寡有關我ｅ代誌le！」
「是安怎樣ｅ記法？di dor位？」
爸爸面色翻青，媽媽望看聖像，di胸前畫十字。小弟yin ui眠床頂跳起來，dor ganna穿著薄薄ｅ睏衫走來看哥哥。
「是真ｅ！yin登了有關我ｅ代誌！zit ma全俄國ｅ人攏知影我zit個人a。媽媽，請你zit個留落來做紀念吧！你隨時攏edang看mai。Dor是zit個！」米地亞ui lak袋a teh出一份報紙交ho伊ｅ爸爸，伊指著藍筆框過ｅ所在，「念看mai！」伊ｅ爸爸ga目鏡戴起來。「趕緊！讀a！」
媽媽注視著聖像，又gorh畫十字。爸爸ga嚨喉清清一下開始讀：
「十二月二十九日暗暝十一點，學院註冊員米地亞‧庫達洛夫……」
「你看！你看！接落去！」
「……註冊員米地亞‧庫達洛夫ui小阿莫爾街柯致金ｅ酒菜館醉茫茫行出來……」
「Dor對a！我gah西米揚彼佐維奇鬥陣……一點a攏無m對！接落去，讀下一行！lin全部聽le！」
「……醉茫茫行出來，滑倒di出租車車伕伊凡‧都洛托夫ｅ馬下。伊凡是庫諾夫斯基地區杜里基hit村ｅ做穡人。著驚ｅ馬跳過庫達洛夫，拖著戴有莫斯科第二商會商人史第藩‧爐可夫ｅ滑雪枋，di歸條街a亂zong，到ho一位守門人遮著才停落來。庫達洛夫qong ga m知影人有一kun a，才ho人扛去到警察局，由一位退伍ｅ醫官檢查，伊ｅ頷a頸後壁有一de傷痕……」
「yin用浸過冷水ｅ繃帶ga我ｅ頷a頸綁著。讀a！dor是a！全俄國ｅ人攏知影zit件代誌！ga報紙還我！」
米地亞ga報紙teh dng，將伊摺好才kng入去lak袋a。
「我veh走去馬卡洛夫兜，ho yin看mai……然後到伊凡尼茲基兜。娜達麗亞‧伊凡諾芙娜gah安尼森瓦西里奇ma應該看mai……我愛來走a，再見！」
然後，米地亞凊采ga有花結ｅ帽a戴起來，勝利di-ziann愉快ｅ對街a走去。




郵 局
前幾工a，阮去參加老郵政局長史拉柯波佐夫yin某ｅ葬禮。按照祖先傳下來ｅ習俗，大家按照規矩攏去郵政局，dor di hia悼念史女士。當薄煎餅kng去桌a頂，老鰥夫悲傷ｅ哭講：「我可愛ｅ某gah zit盤薄煎餅仝款紅艷美麗。確實──是按呢。」
「He一點a dor無m對，」大家同意，「伊實在是有夠sui……上高級ｅ……」
「是──a！見過伊ｅ人攏是按呢驚嘆ｅ……但是，朋友a，我m是只愛伊外表ｅsui gah氣質。這屬di女人ｅ天性，di凡塵中cue攏無困難。我愛伊靈魂ｅ另一種特質。我愛伊──上帝ho伊安息吧！──因為，排除所有活潑幽默ｅ性格之外，伊對家己ｅ尪婿忠貞。雖然，我已經veh步入花甲之年，年紀ganna二十tongｅ伊，猶原對我忠實，對我按呢ｅ一個老芋a始終忠貞不二心。」
Gah阮鬥陣去食飯ｅ教堂司事充滿表情deh嗽一個。
「你ganna無相信？」鰥夫uat身向伊。
「並m是我m相信，」司事緊張ｅ講，「mgor……你知影ｅ……zit maｅ少年太太，定定……安怎講le……偷約會什麼ｅ……凊采gah人lam來lam去ｅ……」
「你m相信。我證明ho你看mai。我用各種策略守diau伊ｅ貞操。你edang按呢講，這是一種預防ｅ辦法。用淡薄a奸巧詭計，我ｅ太太無可能對我偷情。我用巧ｅ手段保護qun尪a某ｅ生活。我知影一寡話，一種口令。只要我講hit幾句話dor真有夠a。我edang無煩無惱a，m免操煩伊討契兄。」
「He是什麼話？」
「真簡單。我四界散播一種歹謠言。我想lin攏知影。進前我dng到人dor講：『我太太阿琉娜是警察局長依凡‧阿力克西維奇‧沙力柯瓦茨基ｅ情婦。』ganna講zit句話dor有夠a。因為驚惹警察局長生氣，無什麼人敢gah阿琉娜有任何交cap。任何談情說愛ｅ人，一見到伊dor驚gah連vih攏ve赴 a，以免沙力柯瓦茨基暗中施計。哈！哈！哈！你mai想veh佔人〈鬍鬚局長〉ｅ好處，你得著什麼便宜，伊可能因為你環境無衛生寫五個報告。伊會ga小可代誌宣傳gah驚天動地；看到你ｅ貓a di街a路走，伊會寫作牛di街a路亂seh le！」
「按呢，你太太無gah依凡睏過lo？」阮低聲驚嘆講。
「哦！當然無！哈！哈！哈！he是我變ｅ步數，ga lin少年人騙gah死死。全部ｅ故

開開ｅ窗仔(The Open Window)
Saki著； DCH台譯
「我ｅ阿姨liam mih dor會落來， Nuttel[納德爾]先生， 一個大約十五歲足穩重ｅ少女 按呢講： 「尚且請你 稍容忍我一下仔。」
Framton Nuttel[佛瑞東˙納德爾]想veh講寡適當ｅ話， 來呵咾目前zit位外甥女， mgorh ma無想veh冷淡dit veh來ｅ阿姨。 私下， 伊足掛疑， di zit款正式來拜訪zia-ｅ完全無熟識ｅ生份人， 對伊du患著 神經緊張ｅ症頭 會有什麼幫助。
「我知影你搬去hia了後，」 當伊準備好veh去庄腳隱遁ｅ時陣， 伊ｅ阿姊對伊講： 「你會ga你家己禁鎖起來， ma m gah任何人講話， 你會足鬱卒， 你qau緊張ｅ神經質 ma會愈嚴重。 Di hia我vat一寡人， 我來寫一寡介紹批ho yin， 我會記得 有寡人 是 外nih-a友善leh。」
Framton想無zit位女士是什麼款ｅ人， 伊dor是將veh ga介紹批送去ｅ Sappleton[莎波東]太太， 伊可能是一位友善ｅ人。
「Di zia你vat真濟人嗎？」 zit位厝主ｅ外甥女問伊， yin中間有真長ｅ恬靜ho少女臆答案。
「差不多半個ma無，」 Framton講， 「妳知影，四冬前， 阮阿姊dor dua過zia， dor di hit個教區， 伊幫我寫介紹批ho一寡在地人。」 伊用一種清楚gorh嘆息ｅ口氣回答。
「所以， 你對阮阿姨hit個人m知半項？」 Zit位穩重ｅ少女gorh追問。
「Ganna知影伊ｅ名gah地址。」 Zit位訪客坦白回答。 伊足想veh知Sappleton太太是有夫之婦或者是守寡ｅ。 Mgorh， ui房間內ｅ線索edang臆出好親像有查甫人dua di zia。
「伊ｅ大悲慘發生di三冬前， du好是三冬前。」少女講：「he是lin阿姊搬離開ziah發生e代誌。」
「發生了悲劇？」Framton問， di ziah平靜ｅ庄腳所在， 應該ve發生 任何不幸。
「你可能足好玄想veh知， 為什麼di十月ｅ下晡， hit片雙扇ｅ落地扇iau是完全拍開開。」 Zit位外甥女指著通向外口ｅ草坪hit片闊闊ｅ落地窗， 按呢講。
「今年現主時ｅ天氣iau是溫和， mgorh hit片窗仔gah悲劇 有什麼關係？」
「三冬前ｅ一工， 阿姨ｅ翁婿gah伊ｅ二個小弟， 經過hit片雙扇落地ｅ窗仔門， 出去拍獵， yin一去dor無回厝門。 跨過一片荒野地去yin喜愛ｅ藏vih拍獵區， yin三個人攏di一片神秘難料ｅ濕lam地區裡ho吞埋去a。 Hit冬熱天， 天氣濕悶， 熱gah hong煩心。 Hia ｅ所在，一向攏是足安全ｅ， 所以事先人ve去警覺。 尚且yin ｅ屍體攏cue無，zit件恐怖ｅ代誌， 實在hong人掛心放ve落。」 Zit時陣， 少女沉著ｅ口氣， 突然變gah大舌大舌， 「可憐ｅ阿姨一直認為總有一工， hit隻gah yin三人同齊失蹤ｅ土色長毛ｅ細隻狗， 會親像以早經過hit片窗仔， 做伙逗陣轉來。 所以逐工到夜暗時刻， hit扇窗仔總是開開。 我至愛e阿姨，伊定定ga我講， yin出去拍獵ｅ情形：伊ｅ翁婿ｅ手股頂面帶一領白色防水ｅ獵外套， iau有伊上細漢ｅ小弟Ronnie[羅尼]， 伊總是用唱歌e語調講： 『Bertie[珀兒蒂]，你是安怎攏看ve開neh？』 Zia ｅ弄笑ｅ話定定吵gah伊心煩。 你知無？ 親像ziah死寂ｅ暗時， 定定ho我感覺雞母皮一直起， 感覺著yin dor veh經過hit扇落地窗入來…...」
伊小可pi-pi-cuah， liam當時斷止講話。 好佳哉zit時， 阿姨雄狂狂入來房間， 因為無準時面略仔有歹勢歹勢， 伊ｅ出現ho Framton鬆一口氣。
「Vera[菲拉]有好好招待你無？」 伊問一下。
「伊一直攏真趣味」Framton講。
Sappleton用輕鬆ｅ口氣講： 「我希望你mai在意he落地窗是開開ｅ， 我ｅ翁婿gah小弟yin今仔日出去lam土區用槍拍獵， yin轉來ｅ時，攏愛經過zit扇門， yin會ga我ｅ地毯gor gah la sap li lor， lin查甫人定定是按呢， 敢m是hiorh？」
伊歡喜gorh講ve停deh談論著射獵ｅ情形， 以及鳥類生產siunn慢， 同時ma談著寒天愛cue鴨仔來拍ｅ代誌。 對Framton談論zia e代誌， ho伊起雞母皮。 伊盡量ga談論e題目轉向kah ve驚心ｅ話題， mgorh並無成功。 伊察覺著女主人並無興味聽伊講話。 同時， 伊ｅ目睭一直盯di開開ｅ落地窗gah外面ｅ草皮。 Di zit件悲劇ｅ週年紀念日來拜訪伊， 真正是足不幸ｅ巧合。
「醫生yin攏建議我愛完全靜養歇睏， mai有心理刺激， ma愛避免激烈ｅ體力運動。」Framton講， zit時伊已經為家己ｅ幻想苦纏， 認為 完全生份ｅ人gah見一面ｅ人ve著急想veh知影別人ｅ身苦病疼、 病因gah治療方法。 伊繼續gorh說明： 「關係飲食方面， yin ｅ意見dor無仝lo。」
「無仝嗎？」Sappleton太太無注心deh講， 接續來哈一個hi[打呵欠]。 突然間伊精神起來，出現歡喜ｅ表情，mgorh m是因為Framton所講ｅ話引起伊ｅ注意。
「Yin總算轉來a！」伊大聲huah叫， 「du-a好趕著lim下晡茶ｅ時間， yin看起來歸身軀攏是路糊糜。」
Framtonｅ身軀小可會cuah， 同時ma用一種想veh傳達同情了解ｅ眼神注目hit位外甥女。 Hit個外甥女帶著失神恐怖ｅ眼光， 看向hit扇拍開ｅ落地窗。 一捲莫名ｅ恐怖ho Framton萬分驚心起加冷sun， 伊趕緊ui坐椅頂面轉身過來， ma向仝一個方向看。
Di日光漸漸暗淡落來ｅ時陣， 有三個人影du deh跨過草坪向著hit扇開開ｅ窗仔行過來。Yin ga槍moh di手股， 其中一人ma幔一領白色ｅ外套。 一隻看起來足tiam ｅ土色長毛細隻狗ga yin due an an。 無聲無說， yin行過來倚近窗仔， 然後， di暗淡ｅ黃昏裡， 突然傳出少年又gorh sau聲， 親像deh歌唱ｅ聲講： 「Bertie，為什麼你看ve開？」
Framton激動gah m知veh安怎， 掠an伊e柺仔gah帽仔， 親像痟狗zing墓kong走向行人巷盡bong ｅ門gah鋪碎石頭ｅ停車道， ui燈光暗淡ｅ大門口衝出去。 差不多long著沿路騎腳踏車ｅ人， 害人急向籬笆邊緣轉方向， 若無yin dor面對面zong做一堆。
「阮轉來a，親愛ｅ。」 經過落地窗， hit位穿白色雨衣會查甫人講：「阮身軀頂有一寡lam土，mgorh大部分攏乾鬆a。 當阮入來hit一刻， 向外口亂走逃離ｅhit個人是誰？」
「一是Nuttel，一個足特出ｅ人，」 Sappleton回答： 「伊ganna談論伊家己e病症，當lin入來ｅ時， 伊連一句再會或失禮ｅ話攏無講， dor雄雄狂狂向門外衝出去， 別人iau略準伊是去看著鬼leh！」
「我臆是hit隻狗ｅ關係，」 hit位外甥女平靜講。 「伊ga我講， 伊對狗有驚心症。有一gai， 伊di印度恆河河岸頂面ｅ墓地， vat ho一群狗追過， 伊被逼藏vih di一座du-a挖好ｅ墓穴過夜， 頂面hit群青面獠牙喙波飛噴， 聲音悽慘e野狗對伊吠無停， zit款情景有夠ga人逼gah起痟a。」
Di短時間內， 真緊dor編導zit款hau siau ｅ神奇冒險ｅ故事， 正是zit位少女ｅ才能。

命運ｅ創治（The Hounds of Fate）
Saki著；DCH台譯
一個秋日ｅ下晡， 日頭斜西， Martin Stoner[馬丁˙史東尼]沿著一台輕便細台車 所留落來ｅ車輪 gau過ｅ lam土細條路行， suah m知影veh去dor位？
伊想講， 頭前無外遠ｅ所在， 是 一大片海洋， 對著海洋，伊ｅ腳步一直行向前， 伊無法度解說 為什麼 家己hiah tiam deh 奮鬥往 hit個目標進行， 親像伊一直ho一種直覺 纏diau leh， dor比如 直覺ho一隻hong壓迫罩綑ｅ鹿公 deh向絕崖ｅ 盡bong衝。伊ｅ情形 是 命運ｅ神， 殘酷deh逼壓著伊： iau餓、精力用了，加上絕望 ho伊感覺麻痺， 伊差不多 無法度 用一點仔元氣 去想 是什麼潛意識 迫伊行ve停。
有真濟不幸ｅ人， di人生ｅ旅途中 歷經苦難， 因為 生做貧惰骨 加上 無眼光 失去良機， 致使 連上普通ｅ代誌 攏做ve好勢，Stoner dor是zit款人。 Zitma伊是 走頭無路， 無任何其他ｅ代誌edang gorh再試。 絕望並無叫醒 伊沉di身上ｅ氣力， du好倒反，伸手sa無錢ｅ危機感 ho伊心智呆鈍。 穿一身破爛ｅ 衫仔褲， 納袋內 ganna cun半sen錢， 無一個朋友 或 任何相vat ｅ人 tang投靠， 暗時無所在過暝， 隔工ｅ三頓m知di dor， Stoner di澹ziunn ziunn ｅ 灌木樹林中 腳底無目標deh行， 伊ｅ頭殼空空， ganna潛意識裡 知影di頭前 某一位所在， 有一大片ｅ大洋 另外gorh有一款知覺－－ 感覺腹肚iau gah心肝亂操操， 花園ｅ盡bong 有一間看起來 冷清ｅ農家。 不管按怎， 天du deh飄著 sap-sap-a雨， Stoner想， 可能di zia 伊edang停腳一下， ma edang用伊上尾後ｅ一個銀角仔 買一杯牛乳。 伊氣力用盡， 慢sor慢sor 行入去花園，沿著 一條窄窄ｅ石板路 來到偏門。 伊iau ve kok門， 一個彎腰、曲痀臭老ｅ 老歲仔dor拍開門， gorh kia di門嘴ｅ一爿， 親像veh讓路ho伊入去。
「我敢esai入去vih雨？」Stoner講， mgorh老人切斷伊e話。
「入來， Tom少爺。 我知影有一工 你一定會轉來。」
Stoner腳步ve穩跨過戶碇， kia di hia愣愣看老人。
「請坐， ho我去準備一寡暗頓，」 老人身軀會顫， 熱心deh講。 Stoner因為雙腳行遠路顯出真sen， 伊遲鈍坐di sak向伊ｅ椅仔。 伊真緊dor ga kng di身邊桌頂ｅ冷盤， 乳粿gah pang大嘴吞入腹。
「Zit四冬來， 你並無啥改變，」老歲仔人續落講， Stoner感覺老人ｅ聲音di足遠ｅ所在飄渺， 親像di夢中。 「Mgorh你會發覺阮有真濟變化， 你ｅ阿姨gah我iau di leh， 其他hia ｅ kah早dua di zia ｅ人攏走了a。 我dor來去ga伊講你來a， 伊無想veh gah你見面，mgorh伊愛你留dua zia。 伊定定提起講， 若是你有一工倒轉來， 總該留落來， mgorh伊永遠m愛見你， ma m愛gah你講話。」
老歲仔人 kng一杯vi-luh di Stoner面頭前ｅ桌仔頂， 然後腳步歪歪倒倒deh行向長長ｅ走人巷。 Sap sap雨 已經轉變做 倒水大雨，拍動著門窗。 Hit位流浪漢身軀cuah leh cuah leh deh想， 夜色已經ui四箍笠仔包罩過來， 海邊m知變做安怎？ 伊食了食物， ma lim了vi-luh， 仝款憨神憨神deh等生份ｅ人轉來。 Ui角落hia ｅ hit座老時鐘， edang看著時間一分一秒過去， 一種新希望 ui少年人心中暗中deh buh出來； he ganna是頭前對食物ｅ siau想gah di zit間厝頂下cue著停腳ｅ安心來延伸e。 Ui走人巷ｅ通道盡bong， 傳來沉重ｅ腳步聲， 表示農舍內ｅ老歲仔人 回頭轉來a。
「Tom少爺， 女主人無想veh見你， mgorh伊叫你留落來。 當伊往生了後， zit落農舍dor是你ｅ， 按呢有夠公道a。 Tom少爺，你ｅ房間ｅ火已經點著a， 女使用人ma換好清氣ｅ床單。 你會發現樓頂一點仔 ma無改變。 可能你已經足tiam a， zitma dor去樓頂歇睏吧！」
Martin Stoner半句話ma無講， 身軀笨重起身， due著服侍伊ｅ「天使」 向走人巷行去。 爬上一段gi-gi-guainn-guainn ｅ階梯， gorh行一段走人巷， dor進入火光通紅， 溫暖舒適ｅ房間。 房間內設置幾項簡單、 質料好ｅ老古董家具；kng di盒仔內底ｅ一隻膨鼠cit-tor物仔gah一本四冬前ｅ舊日誌， 是房間內所有ｅ裝配。 Zit時，Stoner ｅ目睭ganna盯di眠床頂， 伊等ve赴脫落衫仔褲dor趕緊di眠床頂爽快倒落來。 Di短短ｅ時間內， 命運ｅ神主 好親像 deh創治伊。
透早冷冷ｅ日光中， Stoner了解家己ｅ身分， 真悲傷deh冷笑自我kau seh。 可能伊edang食一寡早頓， di人iau ve發現進前， 偷偷仔溜走。 Di樓腳ｅ房間內底， 伊發現hit個曲痀ｅ老歲仔人 已經為Tom少爺 準備 一盤燻肉gah炒蛋， 面腔冷酷ｅ女使用人 ma捧來一鼓燒茶， gorh為伊倒一杯。 當伊坐落來ｅ時， 有一隻毛長長、 垂到耳仔ｅ狗仔， 真好禮 過來靠近伊。
「這是老Bowker ｅ狗仔，」 老歲仔人解說， hit位表情冷酷ｅ女使用人 叫老歲仔“George”。 「伊上甲意你a， 自從你去Austraiee[澳大利]， 伊dor m是古早ｅ伊， 大約一冬前伊dor死a， zit隻是伊ｅ囝。」
Stoner並無對狗母ｅ死亡 有任何傷心， 論真來講 伊死去ma真好， 免得留下任何差錯。
「你veh騎馬出去seh一len無？ Tom少爺，」 這是老歲仔人ｅ提議。 「咱有一隻古錐、小白斑ｅ短腳馬， kng落馬鞍座位真舒適。 比老Biddy e年歲kah大一寡， 雖講無kng馬鞍騎起來ma真舒適， mgorh我iah是ga馬鞍kng起去， 牽來門腳口ho你騎。」
「Mgorh我無騎馬ｅ服裝，」 zit位hong流放ｅ人 大舌[口吃]deh講， 當伊看著一身耐磨ｅ衫仔褲， 自然dor自我取笑家己。
「Tom少爺，」 老歲仔人 差不多 帶著hong侮辱ｅ口氣講： 「你所有e衫仔褲 攏無振動著。 Ga hia e衫仔褲 kng di壁爐頭前 dior dior bue bue leh dor好a。 Zitma出去騎馬seh seh leh， 拍鳥， ma edang輕鬆散步。 你會發現附近ｅ人， 會用怨恨、 冷酷無情ｅ態度 對你。 Yin iau無放ve記得過去ｅ代誌， ma無原諒你。 無人會 接近你， 上好你是gah馬仔、 狗仔做朋友， yin ma足適合gah你作伴。」
老George腳步歪斜行去做伊e kangkue， a Stoner更加茫茫渺渺親像di陷眠， 伊上樓去檢查“Tom少爺”ｅ衫仔櫥。 騎馬是伊上愛gorh ng望ｅ代誌，而且騎馬ma edang避免面對gah Tom ｅ舊友伴就近ｅ觀察， 來發現伊是假仙ｅ。 當zit位介入者 穿著一寡 適合騎馬ｅ絨仔衫， 伊心內起疑著， 本尊ｅ Tom到底是 做了什麼孽，引起 全村ｅ人 攏討厭伊？ 伊ｅ腳 向地面踏一下， 發出pah ca ｅ聲， 拍斷了伊ｅ沉思。 同時， hit隻白斑馬仔 已經牽到門邊。
「我是馬頂ｅ大尾乞食，」 Stoner心內想， 昨ng， 伊是一身破衫， di lam土中行路ｅ 流放者， zitma伊卻騎馬 沿著zit條路走緊緊。
萬種考慮攏拋向頭殼後， 然後ho馬仔di一片發滿青草ｅ路上慢慢仔走。 當伊來到一個拍開ｅ入口， 伊調整速度， 方便ho兩台車進入廣場， 趕馬車ｅ少年人 時間有夠長 來檢視伊， 當伊騎過去ｅ時， 伊聽著 足激動ｅ聲嗽 deh講： 「he是Tom Prike！ 我vat伊， 伊又gorh di zia現身a？」
Di房間內跛腳行路ｅ老歲仔人， hiah-nih-a靠近伊， 攏ho騙去a， 真明顯， di近距離內， hit兩個少年人ｅ目睭 ma無外高明。
騎馬遊蕩當中， 伊看著真濟證據， edang確定 地方鄉親 並無ve記， ma無原諒 本尊ｅTom 過去所做ｅ惡行。 若du著人， yin dor用生氣ｅ面腔 看伊， 細聲談論， 互相振動手後曲 向伊dom頭，Bowker狗仔 安靜deh跟隨di伊身邊， 慢慢仔行， 好親像是 di zit個敵意ｅ世界中 唯一友善ｅ人。
當伊di邊仔門落馬ｅ時陣， 伊目神閃見著樓頂ｅ窗仔布後面，有一位消瘦ｅ老婦人deh偷看伊， 伊明顯是 收養伊ｅ阿姨。
享受豐湃料理ｅ中晝飯ｅ時， 伊有時間 詳細考慮著 家己zit款無平凡ｅ情境。 離家出走四冬， 真正e Tom有可能di任何時陣轉來農場， 任何時間ma可能寄批來。 Iau有， 關係農場繼承ｅ證明書， 假影ｅ Tom 有可能ho人叫來簽字， 到hit當時， 真歹想像veh安怎面對。 或者是 有一位親成來訪問， a伊並無是 親像阿姨按呢， 採取m相du面ｅ態度。 Zia ｅ代誌攏有可能爆發出 歹名聲ｅ底細。 另一面， 另一個選擇 dor是向曠闊ｅ天走向汪洋大海ｅ lam土小路。 不管安怎， 農場ganna提供伊 臨時e避難所，做穡是伊vat試過ｅ kangkue之一， 伊edang做一寡穡頭， 來回報伊 無權利去接受 少爺身分ｅ款待。
「暗頓來一盤冷豬肉好無？」 hit個一面冷酷表情e女使用人deh清理餐桌e時按呢問伊， 「或者你甲意食燒e？」
「燒豬肉加蔥頭」Stoner講。 Di伊一生中， he是一gai唯一快速下決心。 當伊點了暗頓ｅ菜色了後， 伊知影家己 決定veh留落來。
Stoner對著di伊所有活動ｅ房間， 伊嚴守著家己ｅ範圍。 當伊參加農場ｅ knagkue ｅ時， di無收著命令進前， 伊ve主動去動手。 Di zit個寂靜、冷清ｅ世界， ganna老George、 白花班ｅ馬仔、gah Bowker ｅ狗仔， 是伊ｅ友伴。 伊從來mvat看過農場ｅ女主人。有一gai， 當伊知影女主人去教堂做禮拜， 伊偷偷仔 走入去農舍ｅ客廳， 想veh查明一寡伊所占用ｅ身分， gah hit寡敗害名聲ｅ作為， 看edang得著一寡鼻縫[線索]無。 有真濟相片掛di壁頂， ma有安di相框裡。 Mgorh伊想veh cue ｅ 相片攏無di hia。 上尾後，伊看著一本相簿， di內底伊cue著伊veh 愛ｅ物件。 一系列標註「Tom」ｅ名， 一個穿奇怪古裝禮服ｅ矮矮膨皮ｅ三歲qin-a， 一個手中提著一隻蟋蟀仔ｅ棍仔， 看起來大約十二歲ｅ笨鈍査甫qin-a， 一個頭毛分開， 梳gah整齊英俊ｅ十八歲少年家， 上尾後，一個看起來流露著大膽表情ｅ少年人。 Stoner對zit張年紀上大e相片特別有興趣， 一絲仔dor無精差， gah伊有影真仝款。
Ui厚話ｅ老歲仔人嘴內， 伊慢慢仔知影Tom所犯ｅ過失， 致使別人對伊走避又gorh怨恨伊ｅ原因。
「附近ｅ人，對我ｅ作為有什麼口風？」 有一工， 當yin ui圍籬外ｅ田地行向厝內ｅ時， 伊按呢問起。
老歲仔人一直deh搖頭。
「Yin恨你，恨你足深足深， zit點實在足遺憾， 相當遺憾。」
伊dor是無法度講出一寡ho人歡喜ｅ話。
一個冰霜明顯ｅ暗時， 離聖誕節iau有幾工， Stoner kia di水果園ｅ角勢， edang看著闊闊ｅ田園景觀。 庄仔內ｅ人家厝， 散di四界， 厝內ｅ燈火gah蠟條火光閃sih， 出現佳節來臨ｅ 厚重氣氛。伊ｅ後面dor是陰森寂靜ｅ農舍。 內底， 從來無過 有人開嘴大笑，甚至連冤家ｅ吵鬧聲 ma edang hong認定是 ho人愉快ｅ。
當伊越過頭看著暗茫陰影ｅ建築物頭前， hit條陰灰ｅ行人巷ｅ時， 門拍開， 老George雄狂行過來。 Stoner聽著老歲仔人 憂心緊張ｅ聲音deh叫伊所借用ｅ名， 伊隨dor知影 不幸ｅ代誌發生a。Di伊心目中，平安hong滿意ｅ避難所，liam當時發生了大變化，zit當陣恐驚伊愛hong趕出去a。
「Tom少爺，」老歲仔人ｅ聲bit bit deh細聲講， 「你一定愛無聲無說ui zia逃出去幾工a。 Michael Leg[麥可˙雷格]伊轉來故鄉a， a伊咒誓只要去du著你， 一定veh ga你彈ho死。 真正ｅ，伊會ga你彈死， 伊看起來殺氣沖天。 暗時你趕緊秘密逃亡吧！ 只要一禮拜左右， 伊ve di zia停留幾工。」
「Mgorh我edang逃去什麼所在？」 Stoner感染著老歲仔人ｅ驚惶， 伊ti-ti-tu-tu deh問。
「Zitma隨沿海岸逃走去Punchford[潘奇福特]hia，dor vih di hia， 等Michael離開了後， 我會騎hit隻白斑ｅ馬仔去Punchford一位叫Green Dragon ｅ所在， 當你看著馬仔停di馬棚ｅ時陣， he dor是你edang倒轉ｅ記號。」
「Mgorh－－」Stoner猶deh躊躇。
「所費無問題，」 老歲仔人講： 「女主人ma認為你 上好按呢做， 伊ho我zia ｅ。」
老歲仔人 提出 三金鎊gah一寡銀幣。
當日暗時， Stoner zah著老婦仁人ho伊e錢kng di納袋仔內，然後ui農舍e後門逃走， 伊感覺 實在無應該 按呢欺騙 老婦仁人。老George gah Bowkerｅ狗， kia di hia恬恬目送伊離開埕斗。 伊無想講伊會gorh倒轉來， mgorh伊為hit兩個誠心等待著伊轉來ｅ朋友感覺足後悔。 有一工， 可能真正ｅ Tom會轉來， hia e單純ｅ農庄村民會感覺驚異， 一位vat藏身di yin ｅ門簷下ｅ hit個旅客ｅ身世。
對著家己ｅ命運， 伊現主時ve感覺焦慮， 三金鎊di世間ganna是一點點仔用途nia， mgorh對一個用penny[便士]來計量財力ｅ人來講，卻是一大筆財產。 前回， 當伊親像一個絕望ｅ冒險者行di zit條小路ｅ時， 幸運之神對伊特別照顧， 以後可能有機會cue著工作，重新開始， 伊愈行愈有精神。 漸漸伊恢復失去ｅ身分， 又gorh ve記得假做替身ho伊帶來ｅ操煩gah痛苦。 伊mvat操心去想有過深仇大恨ｅ敵手， 因為過往hit段虛存ｅ假身世ｅ生命過程， 對伊已經無重要。 幾個月來， 伊頭一gai哼出輕快ｅ歌聲。 Liam當時 垂落e橡樹陰影當中， 走出來一個qiah槍ｅ人。 M免懷疑， 你ma臆會cuai伊是誰， di月光照cior下， 伊目睭充滿怨恨， 面色白cang cang，dor親像Stoner四界deh流浪ｅ時仝款， 有時好、 有時vai ｅ情況。 伊趕緊用力跳向小路邊ｅ樹林內vih， mgorh he堅固ｅ樹箍身正面ga擋leh。 命運之神di hit條小路等伊， a zit gai ｅ歹運， 看起來伊是無法度逃脫la。

台語小品文 時間倒退lu 賴皇甫
自從科技 愈來愈發達， 有人想講gam有一工咱會使ho時間倒退， 按呢真濟使人痛心ｅ代誌 diorh ve發生啊， 雖然hiaｅ代誌會使 ho後代好好a 思考gah 變作一個借鏡， 但是 對 因為hit項代誌 來受著影響ｅ人 來講， 可能會勾起 in悲傷ｅ記憶； 若是真正有 zit個技術， 我想 逐個人 攏會想veh使用伊； 畢竟 每一個人 攏有 使in感覺 無想veh 面對ｅ回想， 只要有 zit項技術， diorh會使轉去 代誌ｅ根源 閣改變伊。
Di代誌發生進前， 定定攏會有一寡前兆， 而且是有一連串ｅ原因， 到上尾仔ziah 會爆發大錯， 所以一旦有時光倒流ｅ能力， 我ma會想veh轉去， 但是世界hong創造gah真公平， 無人有zit款能力， ma無人有法度發明zit項技術， 若是有zit項技術， 按呢世界就無安靜ｅ一工啊， 因為 逐個人 攏想veh 轉去 使家己後悔ｅ hit工， 到底是ai 轉去佗一工le， 這ai ho 啥人決定， 無人知影， 我想應該 ma無人敢出來 承擔 zit個責任， 而且為著 啥物代誌使用 ma m知影 ai按怎做決定， 恐驚 時間倒退ｅ技術 只是 ho世界變gah 更加亂操操nia nia。
好佳哉di 世界上 無人會使做到 zit件代誌， diorh是因為做未到， ziah 有hiah 濟人想講若是有會外好， 但是無想著ia 是真正有， ziah 是 麻煩ｅ開始。
雖然m知影 以後 科技 會進步到 啥程度， 但暗之中 應該有 注定zit種技術 無啥可能 發明出來， 因為 世界ma無像 電腦hiah簡單， 存一個檔案diorh會使 留到以後， 電腦若害去 diorh ui進前存ｅ檔案 去找 害去ｅ物件 來修理， 世界 無法度按呢做， 只有靠人 好好a維持 ziah會使 ho地球永遠保持。