目前日期文章:200705 (6)

瀏覽方式: 標題列表 簡短摘要

細漢qin-a gah細隻金魚仔

(伊朗)

幾a百冬前,di藍色e青空之下,一片青翠e森林內底,有一間厝。Hia dua一對翁仔某,yin有一個細漢後生。日時,zit個細漢囝gah別個qin-a sng,暗時,阿父教伊讀冊寫字。

有一工 阿母ga伊講:

“乖囝a,zitma你已經漸漸大漢a,應該幫助lin老父做一寡代誌。今仔日,厝裡du好無什麼物件tang食啦,你dor去海邊掠一寡魚轉來煮。”

Qin-a擔著魚網仔,dor向海邊去。伊向水ia落網,gorh用力ga qiu起來,發現網仔內有一隻細細小小、金e、紅e、藍e三色金魚。細隻金魚用憂愁e目睭看伊,用人e聲音ga哀求:

“乖qin-a兄,你放我倒轉去大海吧!你若ga我放生,我dor送你一支神仙e鉸刀,用zit支鉸刀 鉸什麼任何形體,伊dor變成真e實體。”

細漢qin-a並無相信細隻金魚e話,mgor伊可憐伊,dor ga魚放轉去大海。

伊du將hit隻魚放落大海,m知按怎,伊e手中dor忽然間有一支鉸刀。伊又gorh向四箍笠仔注意看,看著一片黃葉仔ui樹頂落落來。伊撿起來這片樹葉仔,用鉸刀ga鉸做一座宮殿e形體。伊所看著e情景是伊手內e宮殿愈變愈大,通尾仔變做一座大落、黃金閃sih e宮殿。伊又gorh kiorh一寡樹葉仔,有黃e、青e、紅e、土色e,用yin鉸做各種樹木、花草,dor按呢,宮殿e四箍笠仔dor gorh加一座大花園。

Qin-a走轉去厝內,用紙ga父母gah家己鉸一寡衫仔褲。Yin dor得著各種e綢仔、緞仔、絲仔gah絨仔e服裝,yin穿著zia-esui衫,做伙搬入豪華e宮殿,日子過得足富裕。

過一段時日了後,qin-a開始悶悶不樂,因為厝內人無願肯ho伊走出花園,ma無veh ho伊gah永早e qin-a伴交陪,zitma a無人陪伊cit-tor。阿母教伊愛惜好衫,mtang gor la-sap去,mtang sng沙仔,ve使做zit項,ma ve使做hit項。

父母ma m准伊去森林、田野,連海邊ma禁止,因為,yin驚hit細隻金魚會gahit支神仙鉸刀討倒轉去。

按呢e生活方式,ho qin-a過得足無自由,ma足寂寞。逐gai,伊若聽著遠遠傳來e陣陣笑聲,伊dor足想veh拚出去gah過去e qin-a伴做伙笑、做伙sng。伊想veh gorh再去森林內底,幫厝內kiorh一寡柴,a是去田裡做kang-kue。

有一暗半暝,伊勻勻仔ui厝內走出來,經過花園,一直走到海邊。

“我e金、紅、藍三色e細隻金魚a,你di dor位?我走來ga你講,我無需要zit座宮殿。細隻金魚仔,你出來幫忙我,我想veh恢復過去e生活方式!”

細隻金魚連鞭浮起來水面,對伊講:

“我e好朋友,你dor去過著以早e生活方式吧!你zitma雖然有錢、有地位,mgor,m是靠雙手拍拚得來e金錢,是vedang帶來人真正e快樂gah幸福。按呢啦!等日頭若出來,你dor ga鉸刀dan轉來大海,gorh ko三聲si-a了後,你dor會gah以早仝款幸福、快樂。”

早起,東爿du露出魚肚白e日花仔,金色e日頭du出一點點仔光絲,qin-a ga鉸刀dan回大海中,gorh ko三聲si-a。

伊轉去厝裡,金宮殿連影dor無,阿母gah古早仝款,kia di矮厝仔e門腳口,嘴角微微仔笑,等待伊e囝轉來!













-----

daiqi007 發表在 痞客邦 PIXNET 留言(0) 人氣()

趣味台語

一孔掠雙隻。 —好孔。好處,好運。

一二三五六七八九十。 —無寫四 。可憐,台語「無寫四」是可憐e意思。

一粒田螺煮九碗湯。 — 無味(無趣味)。

一盤魚脯仔。 —全全頭,攏是頭、攏想veh做主人、多頭馬車。

五堵。— 腹肚iau。五堵(地名),餓肚,諧音。

六月棉被。— 揀人蓋(揀/ging4。甲中意,不一定以也中意。比如六月天氣熱,有人已不用棉被,有人卻還要用)。

六月芥菜。— 假有心(假情假義)。按芥菜在農曆六月芯空,看似有芯,其實無芯,至十二月,其芯方大,稱大心菜。

十全欠兩味。— 八珍。

十二月芥菜。 —在腹有心、有誠意。

十二月屎桶。 —盡拼、全盤吐露。

十五個人deh講。 —七嘴八舌。講(gang4)。

二十兩。 —近視(二十兩即斤四,斤四諧音近視)。

人肉鹹鹹。 —Ve食e,(m通欺負人siunn過)。

七月半鴨仔。 —M知死,m知災難臨頭。七月半(農曆七月十五)為中元普渡,zit工雞鴨大量hong tai做祭品。

八仙過海。— 隨人變通(各顯神通)。

十二月甘蔗。 — 倒尾甜(蔗尾ka甘甜)。十二月e甘蔗顛倒是頭ziann(淡)尾甜。

十二月天,睏厝頂。 —凍到m成身命,凍霜(吝嗇)。

十五枝拐仔,舉雙手。 —七拐、八拐(七騙八騙)。拐

(手杖。Gah拐騙即誘騙e雙關語)。

三人共五目。 —後擺無長短腳話。

三十暗無月娘。 — 無光明、無望。

四十減二。 — 三八。

Kiorh石頭teh路。 — 絕交。

Lim滾水放茶米茶。 — 火大。

Me鹽sinn心肝。 — 死心、斷念。

Qiah鋤頭耙心肝。 — 清心(無煩無惱)。

Qin-a,食紅蟳。 — 興管 (甲意食大腳足管),興講gah愛講話同音。

Qin-a痛風,老人疳癪。— 顛倒平、ve發生e代誌。

Qin-a跋倒。— 馬馬虎虎 (音同,媽媽huhu e)。

大兄坐無正。 — 歪哥。(貪污)。

大港無人顧。 — 氣死。

大港無kam蓋。 — 去死。

大砲打麻雀。 —真無采(足可惜之意)。

木水流破布。— 流到破,住到破(表示流浪到什麼地方,就住在什麼地方)。

大目降,牛販。— 先講先贏(先說為勝)。大目降(地名)─即新化。

大人穿qin-a褲。— 真繃。(足緊。無簡單。)

大蛇趖sor ve過田岸。— 慢吞吞。

土牛入海。 — 去了了。

土地公看傀儡。 —愈看愈花。

土豆beh殼。 — 愛人(rin、仁)

土豆撥落去豬血桶。血仁(廢人)。土豆仁落去豬血桶裡就變成gor血e土豆仁即血仁,諧音為廢人。

亡仔埔,童乩。 — Ve靠得(亂講)。

小卷,花枝。 —無血無目屎(心殘忍)。小卷(烏賊)。

上帝公buah輸局。—摃龜。

乞食假仙。 — 比喻散赤人假有錢、無毛雞假大格。(即土包子、假紳士、膨風)。

乞食,趕廟公。— 廟公(廟祝。)喻喧賓奪主。

乞食伴羅漢腳。— 好味好素(合得來)。狐群狗黨結伙成伴。

乞食,唱山歌。— 窮開心。

乞食相爭巷仔頭。 — 爭小利。

乞食,下大願。— Vedang實現e奢望,歹實現。

乞食,背葫蘆。— 假仙(假佯)。

乞食,拾黃金。 — 卯死a。(樂不可支。)

乞食講仙話。 —亂講、胡說。

水鬼升城隍。 —升格或升得足緊(有小人得志e意味)。

水鬼騙城隍。 —騙ve過。

水鬼瞄城隍。 —騙內行人。

水雞生尾。— 假龜。比喻假裝門面,展風神。

水淹到領管。 — 遇著(du著,即碰到,不得已,ve喘氣)。

水牛過溪。— 厚屎尿(花樣多)。

日本仔飯。— 舒適。即壽司(すし)

日本藝妲。— 大色(抬高身價,抬高架子)。

火炭做枕頭。 — 烏gui、頷頸仔烏去。

火燒竹仔林。 —無竹殼(無的確e諧音,可能,無一定)。

火燒豬頭。 — 半面相熟(有一點點仔認識)。

火燒墓仔埔。 — 薰鬼。罵人菸鬼(死了,iau deh抽煙)。墓仔埔(墓地,墓音亡)。

牛肉,灌水。 — 雜滴(麻煩)。

牛面前,讀經。 —講也路用。馬耳東風。

太監veh娶某。— 有孔無榫(sun)。

天下,火碗。— 平平大(屬於同類,差不了多少)。

月亮下,看影。 —自看自大。

太子爺,起腳。—Lang-gang(跑掉)。

北港馬祖。— 興外郷(在外郷e景況比在本地好)。北港媽祖名聞全省,常迎至各地。

半暝看日頭。 —Iau早leh。

半暝食西瓜。 —天光反症(臨時變更意見)。

尼姑死契兄。—無可能e代誌(契兄即情夫)。

目睭毛,漿am。— 有眼不識泰山(眉毛糊著粥汁,目識差)。

仙人頭殼碗髓。 — 無簡單得著e重要物件。

外行家長。— 夥計遭殃(家長即管理人,如果是外行,下腳手e夥計會吃虧)。

外甥舉燈火。— 照舅(照舊)。

白賊七仔講古。— 騙憨人。

用麵線,網鴨母。 — 一去無回頭。民間故事一個憨囝婿,看見河裡e鴨仔,想veh掠,竟投了麵線做網,哪知麵線攏ho鴨仔食了了。

田蛤仔攬芋莖。 — 盪拐。田蛤仔(青蛙)。形容一個人qau嫌東揀西。

田螺,含水過冬。 — 待時機(冬眠)。

田中央去起廟。 — 正經。(正耕)。

白帶魚鬥牲禮。 — 有長就好。鬥:湊和。

老牛拖破車。 — 行一步算一步。

老猴beh樹仔頂。— penn penn喘。

豆腐kap石頭。— ve kap得。

師公e落袋仔。— 袋符(弟婦)。師公:道士。落袋仔:口袋。

師公拍案。— 嚇鬼。

米粉筒。— 百百孔(多事)。米粉筒(做米粉用的e筒狀器具,筒上有足濟細孔)。

米缸弄鐃。— 弄鐃(nau4,喪葬超度e法事)。無半項(空空如也)。

米苔目包餡。 — Ve做。即無可能做之意。

米甕打銅鐘 。—赤貧(散gah)如洗。或謂「米甕deh弄鐃」。

老婆仔炊碗粿。— 倒塌、倒貼。

老鼠食油。— 目睭金(眼睛很光,很機警)。另解為,目前光(顧前,無顧後)。

老鼠食油,目睭光。— 意氣風發。

老鼠,泅過溪。 — 人人huah pah。(因為惡毒平時ho人討厭惡,人人huah打)。

老鼠入牛角。—穩篤篤(dak,穩當,絕對可靠)。

老人食蟳。— 管無效(講無效)。管:指蟳腳。

老人,食麻油。— 鬧熱(熱鬧)。鬧熱,老熱(同音)。

阿媽生查某囝。— 生姑/菇。

阿婆仔炊粿。—倒塌 (即倒貼、賠本之意)。

阿公娶某。 — 加/家/雞婆。(即加管閒事之意)。

阿伯仔爬山。—邊仔喘。

阿公a 挖土。 — 公開。

曲龜放屁。— 曲龜 (駝背)。彎彎曲曲。

西北雨。—大落。

底片走光。— 無影。

西瓜藤,搭菜瓜棚。 — 出風頭。

竹篙尾纏麵線。— 糾糾纏 (篙篙纏)。

年尾,無轉去厝。— 無某 (無太太,年底無轉去祖厝)。

有應公童乩。—講鬼話。童乩 (巫師)。

耳孔,塞破布。— 有聽,假無聽。

吊肉,滑死貓。— 可望而不可及。

吊鼎。— 厝無米通煮炊,鍋、鼎攏吊起來。

死囝仔墓。— 無望 (無希望)。墓、望 (諧音)。

先生娘寫e。— 細字 (細膩),指小心之意。先生娘:舊時俗稱醫生e太太。

佛蘭西水。— 食一點氣 (爭一點氣)。佛蘭西水 (汽水舊稱)。

豆腐gah石頭。— 無適配、m是對手。

灶君公上天。— 奏好歹話 (陳奏好壞)。

河邊洗黃蓮。— 河苦 (何苦)。

青盲,戴眼鏡。— 無路用 (看無,無效果)。

青盲貓,咬雞。— M肯放下。

青盲e,顧柑。— 顧喊 (一直叫)。叫目睭看無e人看守柑園,雖然知道有賊,ma是ganna用huah nia。

青盲點燈。— 白費 (多此一舉)。

青暝,食圓仔湯。 — 心裏有數。

金斗入水。— 激骨 (個性偏執),金斗是貯枯骨e壺,壺裏入水,解為激骨。或者講「黃金貯水」(黃金即金斗)。

和尚頭,cue虱母。— 無端生有,誣賴。

和尚gor船。— 無法度(無髮)。

紅龜抹油。—sui面。

紅龜粿包鹹菜。—無好貨。

林投葉,拭屁股。— 倒裂 (無ka好)。

狗食糯米。— ve變kiau (不會應機而變)。

狗頭滴著麻油滓。—想veh食ma食無 (雖di眼前,卻無可奈何)。近在眼前,卻取ve著。

狗咬鐵釘火。—M甘放 (固執di小代誌肯放)。

長工望落雨。—趁機會笨惰。

放屁攪沙。— ve做堆 (一盤散沙,ve團結)。

食紅柿,配燒酒。—存死 (冒死)。

食蟳。— 興講 (興管,愛講話) 講、管 (諧音,用於雙關語)。

食芎蕉皮。— 失戀 (俗謂,失戀食芭蕉皮)。

便所內彈吉他。— 臭彈 (吹牛之意)。

便所蠟條。— 臭火 (討厭e人)。

姜太公釣魚。— 願者上鈎 (無強制),俗謂姜太公釣魚,其魚竿離水三寸,鉤針是直e。

姜太公釣魚,離水三寸。有無攏好 (無強迫)。或謂「姜太公釣魚,願者上鈎」。

茄仔,開黃花。— 變性 (性情變a)。

風頭,松柏。—老練、老資格。

胡蠅鑽入去龍眼殼。 — 蓋頭蓋面。胡蠅:即蒼蠅。蓋頭蓋面,形容一個人mvat局面。

查某囝,嫁大爺。— 好名聲 (查某qin-a嫁ho大爺,名聲好)。另外解為,笑下賤e人假裝權貴e人。

紅毛土攪水。— 決定。紅毛土,即水泥。

城隍爺出巡。 —大事 (臺語「大代志」,事大,非同小可)。

剃頭店歇睏。—無你法 (無可奈何)。無你法 (音諧「無理髮」)。

草厝掛煙筒。—稀罕。

草厝掛玻璃窗。— 無調和、無四配。

筊白筍開花。— 全公e (專工e),刁持e。註:筊白筍ganna公e才會開花,因此筊白筍開花dor「全公e」。

臭頭包布。— 風神 (即拉風之意)。

草人mua棕簑。— 假鬼假怪。

草厝仔dau鐵窗。— 無四配。

茶鼓破孔。—漏茶/題。

恩主公lim燒酒。—看ve出。恩主公即 (關公)。

破雨傘。— 興展 (愛da、愛展)。愛ga破雨傘拍開。展 (打開)。

破船鎮港內。 —漏不修 (老不修)。

烏牛,大影。 —好看m好食 (外表好看,無內容)。

海口人嫁查某囝。—無物。按:海口人嫁查某囝e時攏會講「無物咧!」。

海龍王辭水。— 假細膩 (故意裝客氣)。海龍王ve有辭掉海水e道理。

蚊仔,釘lam pa。 —歹打 (vedang拍,painn辦,左右為難) 釘 (刺) lam pa (音卵胞)。

蚊仔,釘牛角。— 無采工 (徒勞,無關痛癢)。或者講「蚊子,釘佛像」。

厝尾頂發白菜。— 強發 (勉為其難)。

鬼仔,騙鬼王。— Ve騙得。

缺嘴,食米粉。— 看現現 (kam ve diau,一看dor清楚)。缺嘴 (兔唇)。

缺嘴,興噴火。— 愛辯愛講話。

美國西裝。— 大輸/su。

烏人食豆油。—烏食烏。

陳皮,蘇黨。—勢均力敵,平大。陳皮,蘇黨,攏是中藥名。

麻豆旗竿。— 菁仔欉 (檳榔樹。謂女罵男痴,冒失鬼)。

腳底抹粉。— 庄腳 (鄉下之意)。

保護玄奘去取經。—著猴。

捧糖,無洗手。— 足親蜜 (teh過糖e手無洗)。

掠兔仔。—兔、吐 (諧音)。戲謂,酒後醉吐。

啞口,ho蜂釘著。— 有苦難言。

啞口e,壓死囝。—啞口e壓死自己囝,即有苦難言,無話可講。壓(de2)。

接骨師父。—逗鬥腳手(指幫忙之意)。

牽被,蓋腳。—剛好(無過分,無不足)。

寄生,佔苦螺仔殼。— 橫佔。

假死鯪鯉,當(dng1)蚼蟻。—假仙dinn m知。鲮鯉(穿山甲)掠食螞蟻e時,會裝死,ve振動。

假死,插雉雞尾。—假仙dinn m知。

鬃簑糊蠅。—食毛(食無,無通食)毛(mo1)、無(腔口諧音)。

貓仔,de落布袋內。—無出頭e日子。

貓爬樹。—m成猴。

貓食鹽。—存死(m驚死,勇往直前)。

貓哭老鼠。— 假仁假義。假仙做同情狀。

貓鼠無洗身軀。—有鼠味(有趣味)。

貓鼠穿草鞋。—腳卡大身。

插雉雞尾。—假番(假mvat,m按牌理)。舊時原住民頭上飾以插雉雞尾。

番仔tai[殺]加蚋。—亂做。

番仔嘴鬚。無半撒(無能,無一技之長)。山地人不留口鬚,因而說連半撒(半邊)都沒有。

番仔銅鼎。— 無才(ve端莊)。山地人用e鍋子,因不經鑄造,底面沒有經過了鑄造的痕跡(此痕跡,臺語消才)。

產婆摸尻川。—外行。

南洋鯽仔假赤鯮。—無夠紅。

烏矸仔,de豆油。— 看ve出來(分ve出來,烏矸de豆油,雙方攏是烏sorsor)

菜脯un豆油。—加了e(浪費)或鹹du鹹。(極吝嗇之意)。

菜頭拔掉。—孔原在(仍舊留有痕跡)。

菜瓜槓摃狗。—去一節(去了一半,損本錢,有損無益)。

請鬼,貼藥單。— 該死(叫鬼去拿藥單,真是用錯了人)。

圓仔炒大麵。—Gorgor纏。即糾纏ve清。圓仔:湯圓。

開飯店,驚人大食。— 豈有此理(既要開飯攤,哪有會驚人大食e道理)。

無齒,食豆腐。— du-a好(剛好,剛適合)。

猴,爬上旗杆尾。—盡磅bong(走到盡頭,走到無路可走)。

新埔碰柑。—上好(最好)。

矮仔人爬厝頂。—欠tui(欠揍)。

碗公煎茶。— 冒險事(用碗煎茶,碗必定會破)。

隔壁,噴燈火。—愛管閒事。

臺灣蟳。— 無膏(無學問)。

臺南擔仔麵。—食好dau相報。

散食人娶老某。— 暫度。散食人:即窮人。

演武亭e雀鳥仔。—m驚槍(因聽習慣了,ve驚槍聲)。司空見慣。或謂「三門大槍,無嚇翅」。

廣東目鏡。—在人合目(適gah不適,隨人無仝)。或謂「水晶目鏡,在人合目。」

頷頸仔生瘤。—抵著(既然碰到,無可奈何)頷頸仔(脖子)。

墨賊仔頭。— 無血無目屎。(形容無同情心)。

閻羅王開酒店。— M驚死eziah來。

閻羅王嫁查某囝。— 只有本人才知影,別人一無所知。

蚼蟻上樹。— 隨人爬(各人做各人e)。

擔山填海。— 了戇工。(做憨事,白費苦工)。

鴨卵dan過河。—看破。Dan:拋。

鴨卵塞石車。— 無路用。(用鴨蛋是沒有辦法塞石車的)。

鴨卵dan過山。看破。

鴨母放落埤。— 一去不回頭。譏一出門dor m知veh轉來e人。

鴨母食土蚓。—ve費氣。以強欺弱。

鴨母吞石頭。—定歸(一定)。硬胃(音gah定歸諧音,鴨子吞了石頭,胃硬)。

錫口鋤頭。— 口利(口舌尖利)。嘴巴逞強,只說不會做。錫口(地名)。

鍋蓋蚼蟻。 —逃也無路。

Un龜e行路。— 栽栽(知知)。隱龜:即駝背。

點心拋棄掉。— 放炮。棄掉(音hiah-gak)。

鎮守古廟。— 老神在在。

雞啄鈕仔。— 無彩嘴(即浪費唇舌之意)。

歸欉好好。— 無剉(無錯)。

舉鋤頭,扒心肝。—清心(心足清閒)。

離天,七里外路。—無譜(天淵之差)。

蟲入蚼蟻巢。— 準無命(一定會喪命,該死)。

蟾蜍展氣功。— 膨風。

關公賣豆腐。—對方實力差,輕易可取,以弱欺強。

羅漢請觀音。— 人客少,主人濟。

籠床蓋無密。— 漏氣。

廳頭,吊聯。—看款(看情形來定)。喜事,客廳懸對聯,veh看聯上e落款按照親疏貴賤e次序來掛。

博士班畢業。— 無校/效。

澎湖菜瓜。— 雜念。

蝦仔行路。— 倒彈。

黃麻布做褲。— 看現現。

摸蛤仔兼洗褲。— 順續工。

頭殼頂插揆扇。— 出鋒/風頭。

















-----

daiqi007 發表在 痞客邦 PIXNET 留言(0) 人氣()

Androcles gah獅 Nanomii改寫

Androcles是一個快樂e自由人。有一工,真歹運suah去hong強掠去做奴隸。伊cue機會偷走,再gorh hong掠轉來了後,殘酷e頭家叫人ga伊送去大馬戲團飼獅。伊hong押去競技場,hia有一隻猛獸deh等伊。

Mgor,隨後所發生e情景,suah ho在場e逐個觀眾驚一大diorh。

看著Androcles,腹肚iau gah gigu叫e獅,並無hop過去ga吞食落腹,獅顛倒di Androclese身軀來來回回、頂頂下下ga鼻鼻leh。了後,獅gorh用舌親切ga伊zinnh。

Hit場表演是皇帝Augustus所舉辦e,伊當場ho zit種怪奇e情景吸引著。皇帝命令人ga Androcles叫來面前,問伊到底是按怎會按呢。

Androcles ga皇帝講伊e出世:原底伊e故鄉是di北非,因為命運e無情致使著伊一生做奴才e可憐人,伊e頭家足殘暴,家己想盡辦法veh逃開主人e虐待,有一工dor偷走a,走去一個山洞內vih。Gorh有一工,伊du著一隻獅,發現著zit隻獅行路e時,一腳跛leh跛leh,看起來真痛苦。Androcles ga獅e身軀巡巡leh,發現伊e腳有一支大刺,伊幫助獅ga刺van起來,解救著獅e痛苦。

自按呢,獅gah伊二個生活做伙,di原野中,獅變做伊e保護者。

後來Androcles無想veh gorh過著山洞e生活,轉來到人間。過無外久,伊gorh ho士兵發見著,gorh ga掠轉來頭家hia受苦。Zit時,伊e頭家ma搬轉來羅馬,同時hit隻獅ma hong掠來羅馬做表演。

真du好,Androcles gah zit隻獅di競技場上重逢,親像是上天e巧安排。Augustus對Androclese故事,足感慨,當場di觀眾e請求下,伊決定veh赦免伊e死刑,恢復伊e自由身。

自按呢生,民眾定定看著Androcles ham伊e救命恩人相依uah快活deh過日子,ma ciannciann ho人看著yin做伙di城邊散步。













-----

daiqi007 發表在 痞客邦 PIXNET 留言(0) 人氣()

感念母恩 王昭堂(陳緣代筆)

阿母出生在朴仔腳大槺里,自細家貧閣失去父母,小小年紀就愛負起照顧六、七個gorh kah細漢e小弟小妹,因此養成勤儉骨力e個性。

嫁ho阿爸以後,為著改善生活,翁仔某總是比過去gorh kah拍拚,因為一切攏愛靠家己,加上囡仔一個一個出世,開銷變大,無讀冊e阿母只有以gorh kah濟e時間做kangkue,m管是早期due阿爸做豆油、醬菜,抑是後來e豆奶gah包仔、饅頭,攏是遐認真拍拚,因為阿母比什麼人攏gorh kah知影勤儉骨力是唯一edang改善生活e方法。

家己大漢了後,每擺聽人講起阿爸、阿母「勤儉」、「干那知影一直做kangkue,攏m甘開錢享受」,竟然會感覺歹勢無面子…。Ma vedang思考「如果若無阿爸、阿母e勤儉,那有能力裁培四個序細」?一直到ga家己結婚、生囝,才體會父母的心情,ma慚愧【cam-kui】家己e無知。

阿母自細就di艱苦e環境成長,結婚了後為著一家大細,gorh due阿爸辛苦拍拚,無時間好好gah囝兒序細相處、更加無時間注意家己e身體,所以di七、八年前身體開始lam,四界看醫生、食藥仔攏無效,後來連續接受龍骨開刀、心臟開刀、目睭開刀…,ui林口e長庚病院到朴子長庚病院,最後五、六年,攏di朴子長庚病院來來去去。多謝二個小弟陪在阿母e身邊,尤其胞弟阿雄,付出e精神gah體力是無法度用簡單e言語形容,相信ma是阿母上大e安慰。

人講「樹欲靜而風不止,子欲養而親不在」,雖然五、六年來,ma是新竹朴子來來去去,但是自細gah阿母互動真少,每擺轉來,總是坐di伊e身邊,用學來無外成熟e技術ga阿母按摩,用無外契合e話語問安,看著阿母愈來愈退化e身體,雖然m甘,卻是無法度以適當e言語表達,這是我對阿母上大e遺憾。

寫di阿母將veh離開人間e時

















-----

daiqi007 發表在 痞客邦 PIXNET 留言(0) 人氣()

李田螺



一、

古早有一個彭員外,脾氣真歹。

伊有三個zo-giann,大姊、二姊遺傳著員外e脾氣,定定愛拍貓、虐待狗、罵長工、詈(le)zo-gan,厚性地gorh愛摔物件,人人懼怕yin。

第三zo-giann,叫三妹,雖然無外歹,mgor面niau-niau。外表是一項,內心卻是好gorh善良,保護貓、保護狗,乞食若來分,一定有救濟。

彭夫人身體lam,厚破病,三日二頭倒眠床。大姊、二姊m愛照顧,ciann-ciann cue藉口出去cit-tor,ganna三妹m驚苦,歸年tang天看顧阿母,守di床邊。

但是無外久,夫人ma是過身去。

彭員外dor主意三個zo-gianne婚姻,大姊、二姊分別ga嫁ho有錢阿舍,過得奢華e日子。

三妹仔呢?員外按算ga做ho鎮上好額e人家,mgor三妹回講:“聽講hit個人,veh食m做,雖然家內有錢,gorh如何?若是伊,我m嫁。”

“有錢翁dor好,食穿免煩惱,按呢ka贏嫁一個散赤鬼!”老父回伊。

三妹回講:“好額翁ka輸勤勞翁,身體健康,做人精功,散赤若有什麼要緊呢!”

員外講三妹ve過,正di氣頭上。Zit個時陣,厝外傳來賣田螺e喝叫聲,員外講:“好!我將你嫁ho zit個賣田螺e!”員外吩咐人去叫賣田螺e人入來。

賣田螺e姓李,逐個時行叫伊李田螺。聽著員外講三妹veh嫁ho伊做某,dor講:“彭員外你ma mai講笑,我一ko人,散gah有一頓無二頓,某囝dann飼會起?三妹是千金小姐,我作夢ma m敢siau想!”

彭員外回伊講:“聘金免,什麼攏m免,今仔日娶轉去,娶轉去做某!緊娶轉去!”

就按呢,無定婚、無聘金、無嫁妝、無酒宴,ganna帶著彭員外e一腹火氣,兩個人dor做伙轉去過苦日子。

結婚了後,三妹煮飯gorh兼洗衫,李田螺去拾田螺用竹籃掛扁擔,三妹in柴gorh掃地,李田螺deh洗田螺,三妹擔水gorh補鞋,李田螺去賣田螺,三妹織布兼做衫,李田螺算術田螺賣外濟。

日子一工一工過,yine生活一點一點deh改善,雖然辛苦、操勞,ma是快樂幸福。

Zit一工,李田螺去山拾田螺,du著大雨,大雨落gah歸四界,大雨落到下晡ziann停,vih雨等到雨停e李田螺,dor出來沿山邊詳細巡,巡gah烏暗眩,但是攏拾無田螺,突然間,面前出現一隻兔仔di面頭前走過去。

李田螺cua一dior,mgor伊隨時dor想講:“拾無田螺,換掠兔,上無暗頓ma有準算!”

兔仔在前,伊在後,伊逐兔仔走,離得近,兔仔dor轉uat,離得遠,兔仔居然停落來等,親像deh cua路。一個走、一個逐,不知不覺來到一個山洞口。

Di山洞口,李田螺飛身ma4去掠兔,兔仔跳入去山洞,李田螺也摔入去洞內,洞內足暗,兔仔veh去due cue?

過一下仔,適應烏暗e李田螺,看著閃sih綠色e光,行前一下看,原來是一堆會發光e石頭。李田螺心內想:“會發光e石頭!m知什麼寶貝,teh倒轉ho三妹看mai。”伊動手將石頭裝入de田螺e竹籃內。

突然間,出現一個白眉毛、長嘴鬚e老阿公,大聲喝:“你ganna一粒烏金命,veh使加teh!”gorh講,“我是土地公,dizia替李門環顧烏金,你m是李門環,緊走!緊走!”

李田螺只好乖乖teh一塊石頭beh出洞外,zit時陣天已經暗a,路ma看無,摸轉去到厝,已經半暝。三妹雖然有身a,仝款di厝內織布,deh等候翁婿轉來。

李田螺ga代誌e經過,講ho三妹聽。Teh石頭ho三妹看,“啊!這應該是叫“烏金”e物件,以早阮老爸有ga我講過,烏金edang用來點火照光,比蠟條、油燈攏方便,是真值錢e物件!”

李田螺ka落一小塊,用火ga點ho著,dor燒起來,厝內dor光paing-piang,親像日時仝款。

“真正是好物件,可惜我ganna edang teh一塊nia-nia,而且土地公有交待,其他e攏是李門環e,李門環m知是誰?hia有一大堆,李門環真正是有福氣!”

過幾工了後,三妹去溪邊洗衫,看著一個臭mo-mo gorh老kok-koke乞食,一雙腳攏是爛粒仔,伊di路邊哀哀叫:“誰人做好代,ga我e粒仔膿qik-qike,ai-ior-ue我veh疼死!”

三妹軟心,過去ga老乞食qik粒仔膿,膿膏噴著伊e嘴pue。老乞食講:“少奶奶,你ziah好心,一定有好報。”講了dor無去a。三妹感覺面肉黏黏,dor去溪邊洗面。

面洗清氣,日光透射di清幽e水鏡,水中映出一個e面影,三妹掠準是dor一個sui仙女ui天庭下凡來,舉頭四界探看,除了伊家己,dor無別人,伊看水底esui面,有兩蕊目睭ma deh對伊看。

“Zit個sui查某面e,gam是我本人?這gam是真e?”伊m敢相信,對著水中e面臚仔看無停,看一遍gorh一遍了後,ka guann衫籃仔轉去。

李田螺賣完田螺轉來,du入門看著厝內有一個sui人客,掠準是三妹e姊妹仔伴,zit個人對伊一直看,gorh對伊笑微微,李田螺suah面紅紅,頭le-le,三妹ma面紅紅,尾仔伊dann先開嘴:“ai-ia!是我la,你是目睭cu-cu?”

聽著聲了後,李田螺gorh看三妹e腹肚,確定是三妹,實在m敢相信目睭前e一切!三妹ga代誌e經過講ho伊知。

過無外久,三妹生一個胖皮e後生。翁仔某二個大歡喜。厝邊隔壁來ga dau歡喜,三妹ga紅嬰仔剃頭,洗頭e面桶水內底有kng蝦仔、石頭、銅錢gah雞卵,蝦仔表示活潑put-put跳,石頭會頭殼ding身體健康,銅錢會帶來錢寶田園,雞卵表示緣投面,逐個人圍著yin母仔囝講好話。了後,翁仔某抱著qin-a,guann紅盛籃去附近e廟拜拜,答謝神e保庇!

紅嬰ka大一點e時陣,李田螺抱囝去cue外公,請伊ga號名。

幼孫ho員外抱過手,開嘴大哮,搖過正爿ma哮,搖過倒爿ma哮,哮ve suah,外公teh cit tor物ga弄,幼孫ma是仝款哮,外公m知veh按怎dann好,孫仔moh leh di大廳kok-kok seh,尾仔走去廳門,手kok門ken liang-liang叫弄孫,孫仔聽著門kene響聲,dor恬去a,門ken繼續kiau,孫gorh轉笑。

外公手抱金孫,看著家己弄孫e才調,心花開,靈機起動,dor suah嘴uat頭ga囝婿講:“有a!好勢a!定著a!dor ga號做李門環(ken1)!“

李田螺聽著李門環,心肝ciak一下,想著洞內土地公ga講e話,dor是身邊du出世e後生本身,m管三七二十一,趕緊ui丈人爸搶過來,三腳走、二腳跳,抱著心肝仔囝沿路衝去vih雨e洞內。

“有夠好!有夠好!”所有e烏金攏iau di hia,李田螺對後生講:“囝e!原來zit大堆攏是你e!”伊ga烏金搬轉去,zit gai土地公無出來阻擋。

有一個唐山來e大生理人,聽著風聲,dor去cue李田螺。生理人講:“聽講你有烏金,我用五千兩銀ga你買,全部攏賣我,你看按怎?”

李田螺一世人mvat聽過zia大e數目,聽gah頭qong-qong,m知veh按怎回。三妹人聰明,手diak-diak算算leh,感覺價數合理,dor一手交貨,一手收錢。

有錢了後e翁仔某,仝款是過得樸素e生活,dua舊厝、穿舊衫,仝款拍拚做kangkue。

正月初二zo-qiann日,三妹gah李田螺抱著李門環轉去後頭厝。Yin ga白銀kng di籃仔e下底,頂面cu一層香蕉葉( hah),上頂guan gorh鋪半籃仔田螺。

大家看著李田螺穿舊衫,gorh guann田螺做伴手,攏笑伊song gorh無看頭。大姊gah二姊di邊仔m cap zit個妹婿,ganna拖著三妹入去房間內。

三妹ga頭布巾仔tau落來,二個大姐看著,同齊叫一聲:“你是有什麼秘方,變gah ziah sui面?你m是due一個散赤翁,早暗操勞,我掠準你磨gah面皮liap-liap-liap,無疑誤,你顛倒白pau-pau,幼mi-mi!你是有什麼秘方?緊ga阮講!”

三妹ga面肉變suie代誌講ho yin知。

足du好,門口埕du好有一個乞食veh來分,二個大姐m管三七二十一dor ga人拖來,二雙手dor對人e臭腳粒仔亂亂qik,m管乞食疼gah哀哀叫,強ga臭粒仔膿抹家己e面。然後,yin dor去ciunn井水來洗面。想ve到,yine嘴pue攏是發honge紅點斑,兩人對看,變做苦瓜面。

Di大廳食桌e大姊夫gah二姊夫,大聲相爭展家己是外好額du外好額。大姊夫苦嘆:“ai-ia,人mtang有siunn濟田園,按呢足費氣,單單ui頭到尾巡一遍,dor愛幾仔工,若是田園ka少e,m知外好!”

“dor是按呢講m!”二姊夫dor gorh假仙講:“我上討厭去收田租,足想veh ga田園攏賣賣leh!”

古意e李田螺聽了,dor應講:“即然lin攏ziah ceh田地,ador攏賣ho我,好無?”

在坐大家掠準李田螺deh起痟、講痟話,dann會ga人e臭da話當作真話。Gorh講憑一個拾田螺e散赤鬼,絕對無錢tang 好 hak田園,dor刁工寫契約書,gorh叫丈人爸仔做見證。

大姊夫ham二姊夫講:“算ka俗leh ho你,只要半價dor好!”講suah dor目睭釘di李田螺e身上,準備veh看伊漏氣。

李田螺講:“大家攏是親成代,你算我半價,我ma ga lin過一半e田地dor好!”伊實實仔講,ga田螺籃仔guann過來ga田螺gah金銀倒di桌頂面,眾人看著金銀是用籃仔dee,gorh 是ui李田螺e手中倒出來e,一時之間攏qang去,伊gorh繼續講:“lin算cune攏是丈人爸e!”

彭員外看著zit景,又gorh見笑,又gorh歡喜,zit時陣三妹抱李門環ui內房出來,彭員外講:“iah是我ka qau號名!”

厝埕e樹仔腳hit個乞食講:“若m是三妹,李田螺dor ve大腹肚!m對!若m是李田螺,三妹dor ve大腹肚!哈!哈!哈!”(江永進、張春凰編寫2003,01.17)













-----

daiqi007 發表在 痞客邦 PIXNET 留言(0) 人氣()

我e阿母是一本活字典

我,是一個自認為台語講了vevaie大學生,雖然定定臭屁講台語真zai,vate語詞也真濟,所倚靠e不止是ziap講nia-nia,上重要e是愛感謝做我私人台語字典e阿母。

我e阿母,嘉義縣竹崎鄉人,受教育e程度無guan,ganna到初中畢業。雖然臺面上只到初中,ka按哪算ma只有九冬e額,但是mai未記li哦,伊使用台語e年歲已經veh倚五十冬a。ma是因為伊受教育e程度無guan,所以伊e台語是原汁原味e哦。

為啥麼講受教育e程度gah台語e好mai有關係呢?這gah yin hit時代e政治因素有關。阿母定氣put-put ga我講,yin di學校讀冊e時陣,是vesai講台語,若講台語hong發現dor愛罰錢,所以好佳哉阿母di學校e時間無長,無我e台語可能dor講gah lili-laklak a。

其實zitma ma仝款,雖然無強制di學校一定愛講國語,mgorh de gah同學開講ia是討論功課,攏慣習用華語,我dor有感覺阮姊ae台語dor比我kah好,阿母有講過,冊讀愈guan台語dor愈vai,因為無ziap用、無ziap講e關係。

阿母頭殼內dee是正港本土e語言,無受著zin愈來愈濟e外來語詞所影響,所以伊保留一大guann古早味e詞句,這正是我感覺台語上水e所在,也是我真想veh ga保存落來e部份。Zit部份正是阿母大字典e特色。

阿母大字典分做幾ae部份;有動物類、植物類、無生命物a類ham諺語類等等。為diorh veh ho逐家知影阿母大字典有外好用,我來舉一寡例:你甘知“蝙蝠”、“貓頭鷹”、“老鷹”e台語veh按怎講?根據阿母大字典e講法,叫做“日婆”、“貓頭gu”ham“la-hior”。你知影“抓扒a”、“剪鈕仔”、“糖酸丸”是講啥麼款e人vo?he是講“愛打小報告e人”、“扒手”gah“心肝仔寶貝”。“住li巷a內”e人是啥麼人,你甘知?有臆著vo?是“內行人”。你知影“一bat溜溜去”是啥麼意思?gah“long-liu-len”有啥麼無仝vo?

當然ia gorh有真濟真濟e資料,kng di 阿母e頭腦li,de等待我去發覺;速度比任何e電腦字典gorh ka meh、使用方法ma加kah簡單,而且同義詞、反義詞、使用時機、相近詞比較ma做一擺講講出來,保證教ga你會曉為止。上重要e是,m免開一sen五銀哦!

最後,我veh gah逐家學生囝仔分享e是,阿母大字典第一篇所寫e:「冊是為你家己讀e;別人無法度為你讀,你ma無法度為別人讀。Veh ho家己以後輕可過,a是像做工人賺艱苦錢,攏zai你,因為生活是你le過e,m是別人。」人講“少年未曉想,食老dor m成樣”,希望di外地讀冊e囝仔,逐家攏真qau想,mai ho di家鄉e老母煩惱,我想這dor是上好e母親節禮物。



林慧婷96.5.7@新竹













-----

daiqi007 發表在 痞客邦 PIXNET 留言(0) 人氣()