目前日期文章:200811 (3)

瀏覽方式: 標題列表 簡短摘要
Doris Lessing得Nobel文學獎了後…
張春凰
英國88歲e女作家Doris Lessing,di 2007年得著Nobel文學獎,半冬外了後,接受BBC廣播電台e訪問,伊講得獎是該死e災難,伊用流血流滴e災厄(bloody disaster)來形容zit種世界 上喜樂難得e大榮譽。
這無失去老薑e尖利言語,當下qiah棍仔摃家己e頭,因為得獎了後,伊e名聲tang四海,成名之累,害伊一直接受訪談gah hip相e活動,將近90歲e人,除了難得e頭殼清楚,edang有按呢e體力,可喜。
可恨e是,伊e精力攏分散去了,無法度tang專精神書寫,所以講得獎是大災難。
得獎可能是一zua人生e分水嶺,進前專心修煉,了後ga腦汁智慧貢獻ho世間,所以好、vai攏是做伙來e,zit點想會通dor真爽快。
因為是按呢,所以Doris Lessing dor講出一世人e經驗結晶心聲,伊ga少年講:“『mai想像 你會 永遠 攬抱著伊,』 當你有e時 dor 好好運用, 因為伊會離開, 伊dor像水流 ui 出水口恬恬溜走按呢。」” (don’t imagine you’ll have it forever.’ Use it while you’ve got it because it’ll go, it’s sliding away like water down a plughole.)

daiqi007 發表在 痞客邦 PIXNET 留言(0) 人氣()

Holmes回憶錄:祖厝e禮典(The Musgrave Ritual)
by Conan Doyle;台譯:李威寬、張春凰、游政榮
我定定感覺我e朋友Sherlock Holmese思考方法精確有條理,伊身軀頂e衫仔褲樸素gorh整齊,但是伊e生活習慣卻是真散仙,ho gah伊住做伙e人感覺心煩。我家己di zit方面gah伊無仝。我以前di Afghanistan[阿富汗]做兵,染著hit爿人民ve愛計較e性情,ho我變gah足cin-cai,m是一個醫生應當有e嚴格。但是對我來講總是有限度。親像伊ga薰kng di薰吹內,薰吹kng di Persian[波斯]cen拖仔裡,a一寡伊e朋友寄來iau未答覆e信件卻ho伊用一支大大eau折刀,插di木製壁爐台正中央e時陣,我diorh開始感覺家己ia gorh比伊kah規矩。另外,我認為逐gai手槍練習是一種戶外消遣,a Holmes興趣若iann起來,diorh坐di伊e扶手椅頭仔內,對壁烏白開槍,試伊e槍法,所以he壁頂有真濟槍籽空,伊感覺按呢真趣味。
  阮e房間kng真濟化學藥品,比如講牛奶杯裡定定裝著伊e化學藥品。另外,桌頂gah厝角攏堆滿伊kah早e批ham伊探案時e證物。Zit堆物件攏對伊真珍貴,suah完全無分類kng ho好。伊每一冬只有一兩gai集中精力去歸納處理yin。因為逐gai伊辦案了後,攏已經過度疲勞,必須歇睏。Di zit個期間,伊定定用伊甲意e音樂ham冊本來消除伊e疲勞,除了ui膨椅到桌邊以外攏ve sua動。按呢一個月gorh一個月,伊e文件愈積愈厚,厝裡每一個角落攏堆著一捆一捆e手稿,diorh差不多veh gah人平guan,mgorh伊m-na m肯燒掉,而且除了伊本人以外,誰ma不准ga yin sua動一腳步。
  有一個冬天e暗時,阮做伙坐di壁灶邊,互相開講,ma真趣味。我diorh趁zit時陣向伊提出,請伊ga堆積親像山e批ham冊整理ho好,按呢厝裡會kah闊淡薄仔。伊聽著我e話,感覺真對,突然間ma無法度拒絕,伊淡薄仔受氣行入伊e房間,轉來e時陣身後拖著一ka鐵皮大箱仔。伊ga箱仔kng di地板中央,diorh gu落去,拍開zit個箱仔蓋。我看箱仔內滿滿攏貼著文件,攏用紅帶仔捆做一捆一捆。
  伊用失意e目睭ga我相,講:「Watson,zit個箱仔內有真濟案件。我想若是你知影我內底全部e案件,按呢你diorh會愛我ga裝入去e檔案攏總teh出來leh。」
  我問講:「按呢講,這攏是你早期辦案e記載lo?我早早diorh想veh請你ga kah早e偵探寫入我e紀錄裡leh。」
  「是a,我e朋友,這攏是di我iah未出名以前辦e案件。」伊講,慎重teh出一捆一捆e文件。然後伊gorh講:「Watson,zia-e攏m是成功e紀錄,因為我hit當時經驗gorh淺,mgorh其中ma有真濟真趣味e案件。親像Tarleton〔托爾登〕兇殺案報告,Vamberry〔范貝里〕酒商案,Russian〔俄羅斯〕o-vah-sange冒險案,gorh有鋁造手枴奇案ham bai腳eRicoletti〔裏寇里特〕gah伊可惡牽手e案件。Iah有一件,這是一件非常奇怪e案件。」
  伊ga手伸入箱仔內,ui箱仔底teh出一個小木盒仔,diorh親像qin-a cit-tor物仔e盒仔。伊e盒仔蓋edang活動,內底藏著一張riau-riaue紙,一個舊式銅鎖匙,一支纏著線球e木釘,gorh有三個生sen、圓箍型e舊金幣。
  Holmes笑笑ga我相,講:「朋友,你看zit個物件會想著啥?」「Zia足濟奇奇怪怪e物件,一定是一件奇怪e代誌。」「無錯,假使你知影zin件代誌e真相,一定會驚一dior。」 「按呢,這內底gorh掩kam一段歷史嗎?」「確實掩kam一段歷史,而且原因gorh足複雜。」「He到底是什麼案件leh?」
  Holmes無講話,ganna ga盒仔中逐項物品攏teh出來,kng di桌頂。伊gorh轉身坐落來,足驕傲deh相著zia-e物件。
  過一段時間,伊ziah講:「我看著zit個物件gorh想起Musgrave典禮中e怪事lo。」
  我聽過zit個奇怪案件e名,已經m-na一gai,但是伊講gah足無清楚,所以我gorh m知zit個案件e真相。
我講:「若是你願意ga zit項奇案講ho我聽,我一定足歡喜來注意聽。」
  Holmes歡喜gah大叫。「Watson,我真歡喜ga zit個案件e案情講ho你聽。Mgorh按呢diorh無工夫整理文件lo。你m是嫌厝裡亂糟糟嗎?Zit件案e情節,ham普通e案件完全無仝,所以我有自信di全國ia是其他e國家e任何罪案,攏ve比zit件案gorh kah奇怪a。若是收集我e各種案件,suah ga zit案漏gau去,按呢記載diorh ve-sai算做完全lo。」
  「你應該gorh會記『扣船案』e代誌,我gah hit個不幸e人交談了後,我ziah決定以偵探做為我一世人e職業。你看我zitma已經名聲tang四海a,警方ham公眾人物攏ga我當做疑難案件上gai guane上訴法院。Di你gah我第一gai見面,咱做伙偵探『血字e研究』hit案e時陣,我已經di社會上有淡薄仔e虛名lo。我e工作du開始e時陣,ma經過足濟困難,ma食過真濟你真歹想像e苦,後來ziah di偵探界慢慢有家己e名聲。」
  「當初我du-du來到倫敦,住di大英博物館附近eMontague〔蒙塔格〕街,我閒閒無代誌,diorh專心研究各種科學,增長家己e智識,經營以後出頭天e基礎。Hit當時已經定定有人委託我調查疑難e案件,不斷有人求我破案,主要攏是我一寡老同窗紹介來e。因為我di大學畢業e時陣,我思想e細膩ham手段e敏掠di同窗裡已經真有名a。Musgravee奇案是我做偵探了後e第三個案件。我因為破解zit個案件,ho我做偵探e興趣愈來愈guan,而且zit件案e結果關係gorh kah大。了後我diorh盡力di偵探學頂面拍拚研究,一直到我zitmae地位。」
  「Reginald Musgrave是我大學時e同窗,我ham伊平日ma定定有來往。伊e態度真高傲,diorh親像一個貴族egiann孫。所以伊gah同學yin攏無法度足熟悉。伊e漢草無算好,鼻仔真guan,目睭ma真大,mgorh伊e行為舉動suah真溫馴文雅,無失伊e身分。Musgrave家族本來diorh是英國北方一家上gai古老貴族e後代,yine名聲透全國。Di十六世紀e時陣,yin家族中egiann孫,有搬厝去西爿eSussex〔蘇薩克斯〕,Reginalde祖先,diorh di zit時陣搬去伊zitma住eHurlstone〔賀爾斯頓〕莊園內。所以zitma yin兜e田ham厝攏是祖公仔留落來e家產。伊是一個貴族,雖然現此時家境無外好,但是伊e教養gorh定定表示di伊e講話gah穿衫頂面。我逐gai gah伊開講e時陣,伊定定真呵咾我e思想gah才能。」
  「自從畢業了後,我有四冬無看過伊。但是一工e透早,伊hiong-hiong到
我Montague街e公寓來找我。Zit時伊e態度ma是無什麼變化,mgorh伊e衫足sui,已經是一個due時行e紳士lo。」
  「阮握手了後,我問伊講:『Musgrave,你近來好無?』」。
  「伊講:『我已經變成孤獨e人lo。我e老爸死兩冬a。Ui hit時開始Hurlstone厝裡逐項代誌攏是我愛管理。我e生活真操煩。Holmes,我知影你有特殊e本領。Zitma ziah聽講你ga你e才能應用到實際e事務頂guan。』」
  「我講:『見笑!見笑!我不過diorh是靠一寡奸巧當做頭路zuan食nia!』」
  「『你做偵探zit途,自然edang發揮你e才能,我替你歡喜。我zitma來zia,diorh是veh請求你e幫忙,因為阮Hurlstone莊園內發生ve少怪事。Hit個警察已經無法度a,所以不得已請你來hia調查,希望esai查明hit寡怪事e真相。』」
「Watson,你想我hit時聽著伊講e話,心內當然足想veh試看mai。因為我di hit段時間已經淡薄仔顯露出我做偵探e才能,iah未遭遇過失敗。所以我自信edang 解決別人無法度破解e案件。」
  「我大聲講:『請你ga案件裡e詳情講ho我聽,ho我esai ga zit件代誌細膩推理。』」
  「Reginald Musgrave di我對面坐落來,ga我ho伊e薰點ho dorh慢慢仔suh。」
  「伊講:『你zitma必須愛知影我e處境,才edang明白hit寡種種e怪事。我雖然是一個羅漢腳,但是di Hurlstone莊園內聽我指揮e使用人卻ve少。因為莊園di真偏僻e所在,人濟ziah edang家己守護家己。而且我逐個月gorh定定出外拍獵,ma一定愛cua使用人做伙去,所以阮兜欠使用人是ve-saie。我厝裡總共有八個查某gan仔[女僕],一個刀煮師,一個管家,兩個長工ham一個管食e使用人。另外,花園gah馬間內ma有專職e使用人,無包含di我du ziah算e內底。』」
  「『Di足濟使用人裡,管家e名叫Brunton〔布倫敦〕。伊是阮老爸時陣e使用人,已經di阮兜服侍足久a。伊iah未來阮兜以前,vat做過小學校e老師,只是因為後來飄泊無依無ua,ziah降格做使用人e頭路。伊生做真清秀,ma是一個辦事敏掠精明e人,所以阮兜e人攏gah伊成為好朋友。伊di阮兜食頭路已經二十冬,mgorh伊zitmae年歲若像gorh iau未滿四十。伊對音樂特別精通,任何樂器攏會曉彈奏,而且gorh有才調講真濟國家e語言。伊有按呢e才能,suah m甘願做zit款奴隸e頭路,應該是因為阮用真情對待伊,所以ziah無願意ho伊離開。伊di阮Hurlstonee使用人中,是一個足特殊e人物。』」
  「『Mgorh伊有一個缺點。伊生性愛pa-pa走,是庄仔內有名e薄情少年。伊以前vat結過婚,行為舉止ma真斟酌。後來因為伊e牽手過身a,ziah變款,變gah真愛遊蕩。但是di幾個月以前,伊gah阮兜e查某gan仔——Rachel Howells[瑞契爾.霍惠絲]訂婚a。Mgorh過無外久,伊gorh ham狩獵場e查某qin-a發生感情。Rachel本來是一個真好e查某gin-a,但是有Welsh[威爾斯]人hit款急躁gah容易發性地e天性。因為伊e未婚夫ga伊放sat,ho伊鬱卒gah得著嚴重e腦膜炎。這幾工來,伊真煩躁ve安寧。這diorh是阮Hurlstone莊園內第一幕e悲劇。後來Brunton suah愈來愈奇怪,第二幕e怪事gorh按呢發生a。』」
  「『代誌e開始是按呢e:我已經講過Brunton zit個人真巧[聰明],mgorh 愈巧,愈會做出犯罪e代誌。因為伊家己認為才能無人edang gah伊比,講話舉動diorh真失分寸。我kah早iah未發覺伊e奸惡,zitma親目睭看著怪事,我ziah感覺代誌真嚴重。』」
  「『這是我閒閒di厝e時陣發生e。是頂禮拜e一個暗暝──我會記差不多是禮拜四e暗時。我因為di暗頓進前,lim了一杯厚厚e咖啡,ho我睏ve落眠,一直到半暝兩點,ia是睏ve去。所以我diorh爬起來,ga檯頂e蠟條點ho dorh,想veh teh一本小說來讀。我日時讀e冊,攏kng di dong3球〔撞球〕房裡。所以我diorh披著我e外套,teh蠟條出去veh teh冊。』」
  「『Veh ui房間到dong球房,我必須愛落一段樓梯,然後經過一段長廊巷。沿hit條走廊一直行到上尾仔diorh是冊房gah槍庫,zit時我hiong-hiong看著一道閃sihe燈火ui冊房開e門透出來。我看著感覺足奇怪,因為我di睏以前ui冊房出來,diorh已經ga火bun hua,而且ga門鎖起來a。Zitma看著zit種情況,一定是有人入去vih di內面。阮Hurlstonee長廊e壁頂攏掛滿著足濟古早時陣e兵器。Hit當時我diorh teh了一支戰斧,an-an gim di手裡,gorh ga手中e火bun hua,kng di土腳,然後恬恬m敢發出聲,行到hit片開開e門hia,向內底看去。』」
  「『我看著he vih di冊房內e人員diorh是管家Brunton。Hit時伊身軀頂e衫仔褲真整齊,家己坐di一liau安樂椅內。伊腳頭hu頂guan 展著一張紙,看去na親像是一張地圖。伊面前e檯仔頂kng一pa燈火,ui he黯淡e燈光中,看伊兩手抱頭殼,na親像deh苦思。我看著按呢,感覺足奇怪,diorh vih di暗中看詳情。突然間,我gorh看伊ui安樂椅裡kia起來,行到一個冊櫥邊仔。伊teh出鎖匙,拍開櫥門,ui冊櫥內teh出一張紙,gorh轉去椅仔頂坐落來。伊ga hit張紙ia di檯仔頂,di燈下斟酌看。Hit時我看著伊半暝偷偷入去我e冊房,gorh敢偷teh我櫥仔內所藏e冊,zit種行為ho我感覺真受氣,行入去veh責備伊。Zit時Brunton聽著我e腳步聲,回頭看著我teh戰斧kia di門口,diorh急gah跳起來。伊e面充滿了驚hiann,趕緊ga伊du仔看ehit張親像地圖e紙藏di袋仔內。』」
  「『我受氣deh問伊講:「你竟然做zit種歹代誌!阮平日安怎對待你,zitma你suah按呢報答阮對你e信任。你明仔zai dorh ga包袱仔款款e,離開zia,我vedang gorh請你a。」』」
  「『伊聽著我e指責,dorh頭ann-ann,著急逃走a。Hit時檯仔頂e燈火,ma是gorh dorh著,我ui he黯淡e燈光裡,看著Brunton ui橱仔內偷theehit張紙,iau留di桌頂。我teh起來看,感覺真驚訝。原來hit張紙寫e不過是我Musgrave祖厝e禮典中無什麼要緊e問答話語。Musgrave祖厝e禮典,是阮兜歷代祖先用手抄落來傳ho giann孫e文件,其中記載e大部分攏是vedang考證e古早e禮制ham ho人無法度了解問答e話句nia-nia。Zit種舊抄件,可能edang ho考古學者做參考,mgorh真正m知伊是安怎注意著zit種無什麼路用e文件。』」
  「我講:『你先mai一直講zit個儀式,繼續講落去。』」
  「Musgrave有淡薄仔遲疑deh回答:『若是你m愛聽zit個儀式e代誌,我diorh繼續講落去好a。Hit當時我ga Brunton所偷tehe紙藏轉去櫥仔内。Gorh ga四周圍看看e了後,我準備veh出去a。Zit時Brunton hiong-hiong gorh走入來,kia di我e面前,ga我e路zah著。』」
  「『伊激動,sau聲喝講:「Musgrave先生,我vedang sia zit個面子。我一世人看家己真夠格,無想veh因為zit gaie失策,來破壞我e名聲。先生,你若是zit gai ve-sai寬恕我,我會自殺,ga血噴di你e身軀頂。若是你看di上帝e面子寬恕我,我di一個月內,一定會家己辭頭路,ve ho你為難。Musgrave先生,請你千萬m-tang di眾人面前ga我趕走,按呢我會終身受著屈辱e!」』」
  「『我講:「Brunton,你家己做zit種歹代誌,gorh有什麼話tang講?Mgorh既然你di阮兜做kangkue做ziah久,我dor mai ga你e行為講ho大家知影。Zitma我gorh ho你一禮拜e時間,你edang家己包袱仔款款leh離開。一個月e請求有kah長,我vedang答應你。」』」
  「『伊ga我哀求:「先生,你ganna ho我一個禮拜e期限嗎?這期限siunn短──這期限真正小可kah短淡薄仔。」』」
  「『我足受氣罵伊:「我ho你一個禮拜e期限,ma已經寬赦你a。一禮拜了後,你一定愛離開,m免gorh講什麼a。」』」
  「『伊聽著我e話,頭ann-ann走a。伊面色白死殺,親像足鬱卒。我ga火bun ho hua,轉去家己房間。』」
  「『事後兩工,Brunton ma是真骨力做伊ekangkue,阮ma攏相安無事。Mgorh我想伊離開e時陣,m知veh用什麼藉口,tang掩kam伊做e壞代誌。但是di第三工e透早,伊hiong-hiong無去。一直到我早頓食了,ma無看著伊來我面前服務。早頓食了,我ui餐廳出來,du a好du著hit個查某gan仔Rachel Howells,我du-a 已經ga你講,伊已經破病足久,zit時ziah開始繼續服務。但是我看伊面色無好,na像iah未完全好。』」
  「『我講:「你趕緊轉去房間歇睏,ziaekangkue,等你身體好了後,ziah來做。」』」
  「『伊聽著我e話,用伊hit雙奇怪e目睭ga我相足久。』」
  「『伊講:「Musgrave先生,多謝你,我已經真健康a。」』」
  「『我講:「咱愛先聽醫生安怎講。Zitma你先停止做kangkue,轉去房間歇睏,你去到樓腳e時陣,替我ga Brunton叫來。」伊講:「伊已經走a。」「走a!伊到dor位去?」「伊確實走a,無人知影伊去dor位。伊已經無di伊e房內。Ai,伊確實走a──伊真正走a!」伊講e時陣hiong-hiong ua di牆邊,親像起痟仝款尖聲一直笑。我看著按呢,趕緊叫人來dau相工ga伊扶轉去房間。伊轉去伊e房間,ma是一直哀一直叫。我趕緊去看Bruntone房間,果然已經無人di a。伊e眠床真整齊,昨暝應該無睏過。但是無人看著伊出去,真正m知影伊是安怎行出厝裡e,連伊e房間e窗仔門透早ma攏關diau-diau。而且伊e衫仔褲、手錶、gah伊e錢ma攏di房間內,mgorh伊定定穿e一領烏衫ham一雙cen拖仔suah攏無去a。我想,Brunton到底是到什麼所在去lo?』」
  「『阮想伊可能vih di厝裡,所以diorh di厝裡一直ciau,suah一直無發現伊e蹤影。而且前暝gorh落過大雨,阮莊園厝外攏是爛土,阮diorh去外面找看mai,suah仝款無看著任何腳印。我看伊拋棄一切,hiong-hiong逃走,suah m知伊到底ui dor位出去。所以我感覺足怪異,只好走去報警。警員到阮兜來調查suah無成績,但是奇怪e代誌ia是一直發生。』」
  「『Rachel Howells di尾後兩工病gah真嚴重,有時神經錯亂,有時放聲大哭,我diorh請一個看護逐夜看顧伊。Di Brunton離開了後e第三個暗暝,伊e病情na像有kah好,睏gah真熟。看護看著按呢,心頭放kah輕鬆,而且gorh操勞過度,diorh坐di扶手椅頂duh-gu睏去a。等到伊透早睏醒,suah看著眠床已經無人,窗仔門ma拍開,病人已經無去a。我聽著zit個消息,趕緊cua兩個使用人去找。但是看著伊e腳印,踏出厝裡,經過草地,沿一條細條路,一直去到八呎深e小湖hia,但是腳印suah 突然無去a,阮看著按呢,認為hit個可憐e查某,可能是因為傷心過度,跳湖自殺。』」
  「『我因為zit個緣故,diorh請人去湖內ho。但是一直攏無找著伊e死體。Mgorh suah di湖裡ho著一個布袋仔。袋仔內藏著一塊古老e金屬物件,色緻足黯淡而且已經生sen,看ve出是什麼物件。另外一方面,袋仔內gorh有幾塊寶石,ma攏無光彩。阮看著zit個物件,更加感覺頭茫茫,一直到昨hng,阮gorh四界探聽,但是ma 攏無Rachel gah Bruntone消息。庄內e警察,早diorh已經用盡智力。所以我只好特別來zia委託你偵探zit件代誌。請你用你e才能,幫我解決zit個案件,你是阮上尾仔e希望a。』」
Holmes講到zia,對我講:「Watson,我zit時聽著伊e話,擋ve diau想veh緊破解zit個案件e真相。Mgorh zit案e情節足奇怪,原因ma真複雜,我一定愛先整理出一寡線索,ziah edang 放手去做。」
  「我diorh ga管家ham查某gan仔ehiong-hiong失蹤,查某gan仔gah管家e戀愛、伊失戀了後e怨恨,以及伊e起痟,gah伊以後e突然失蹤,一直到伊ga hit個藏著金屬物件e布袋dan di湖內等等e疑點慢慢推測,一時之間suah找ve著什麼線索。我想了真久,真正無法度了解其中到底有什麼神祕e代誌。最後我ziah hiong-hiong了解,找出一條線索。」
  「我diorh ga伊講:『Musgrave,我必須先看著hit份文件才edang繼續調查。我想lin hit個管家甘願ho人當做賊仔ham失去伊e頭路去研究zit張紙,推想zit張紙裡一定有什麼祕密。』」
  「伊講:『阮禮典內e文字,攏真li-li-lak-lak,足好笑,只是因為阮歷代相傳,ziah ga伊保存完好nia。如果你zitma veh看hit張紙,我zia有he問答話句e抄本。你teh去看好a。』」
  伊按呢講,diorh teh ho我一張紙。講:「Watson,這盒仔中藏e一張舊紙,diorh是hit當時伊ho我e。我zitma diorh ga紙頂e內容讀ho你聽。He詞按呢寫e:
『這是siange物件?』『是hit個離開e人e。』『Siang應該得著伊?』『Hit個dit veh到位e人會接受。』『Di幾月?』『Ui一月到六月。』『Di dor位?』『Di橡樹頂guan。』『影di dor位?』『Di榆樹下腳。』『Ui dor位行去?』『往北十步gorh十步,往東五步gorh五步,往南兩步gorh兩步,往西一步gorh一步,diorh di hia下腳。』『咱愛teh什麼去換伊?』『Ga咱所有e一切完全攏送ho伊。』『為什麼愛teh去送伊leh?』『因為信託。』」
  「Musgrave看著我研究zit張紙,na像無安怎贊同。伊ga我講:『這原件並無記載年代,但是ui he文法頂guan來看,一定是十七世紀中葉e拼寫法。Mgorh我認為研究zit張怪異e紙,ganna會浪費你e精力,對你無什麼幫助。』」
  「我講:『我感覺m是按呢,我認為這確實是一件奇聞。伊e怪異可能比你du ziah ga我講egorh kah怪異,而且各種奇案e情節攏是互相關聯e。Musgrave,請你原諒我,我想你e管家一定是一個足巧e人。伊edang研究zit個奇文,可能伊e才能贏過伊e主人neh。』」
  「Musgrave講:『你e意見我m敢認同。我感覺zit張紙對我無什麼路用。』」
  「『Mgorh我感覺zit份文件有足重要e意義,我想Brunton gah我e看法仝款。伊開始研究zit張紙e時間,應該是di你看著伊hit夜以前。』」
  「『你講e無m對,因為伊veh偷看zit張紙,本來diorh是真簡單e代誌。』」
  「『根據我e推測,伊已經得著zit張紙所寫e祕訣。我知影伊gorh有一張gah這問答話句互相參考e圖。你hit工m是有看著伊ga一張親像地圖e紙藏di袋仔内嗎?』」
  「『確實是按呢,mgorh伊ganna是阮兜e一個使用人。伊研究阮e舊抄本到底是veh cong什麼leh?』」
  「『Zit個問題我zitma vedang答覆你。咱去坐頭一班e火車到Susakesi ,來去lin兜實地考察,ziah edang破解zit個疑問。』」
  「Zit工下晡,我gah伊到Hurlstone莊園內。我想你早diorh di圖畫ia是遊記中看過zit個偉大e古堡建築。我zitma ga你講,hiae厝一間接一間,排成一個L型。長ezit排厝,比短ezit排gorh kah新。He舊厝門斗真低,頂guan石頭刻著1607年。但是ui zit條看來,na像gorh kah古早。He厝e壁真厚,窗仔門足細,所以yin兜e人,di頂一個世紀diorh搬去新厝a,厝ganna是用來kng物件e所在。厝e四箍笠仔攏是大樹,ui厝開始行兩百碼edang到一個小湖,hia diorh是伊ho著hit個奇怪布袋e所在。厝起di有山有水,風景優美e一個所在。」
  「Watson,我zit時已經有淡薄仔把握,感覺zit代誌並m是足神祕。Zit案e關鍵dor是Musgrave yin兜典禮內問答e話。若是我edang解這其中e祕密,Brunton gah Howellse失蹤,diorh esai完全明白。Brunton到底是為什麼理由veh研究伊主人e冊?伊甘願冒著危險,放sat伊e一切hiong-hiong失蹤,可見一定是有什麼重大e原因。」
  「我diorh ga he儀式e話句gorh反覆讀足濟gai。我感覺雖然伊e描寫足奇怪,mgorh suah na親像he偷偷e講一種測量。這雖然是我e假設,mgorh我知影he問答話句中清清楚楚講出橡樹gah榆樹兩種物件,攏一定是測量時用e標準。因為di厝外e倒手爿栽足濟橡樹,我看著一欉橡樹足guan足guan,diorh gorh kah相信我e料想已經真接近事實a。」
  「阮講到hiae時,行過hit欉橡樹,我ga伊講:『這樹e年代,應該ham lin e儀式e年代差不多久吧?』伊應講:『這樹gorh是諾曼第時代e戰利品。伊e年代,可能比阮e禮典gorh kah古早。Zit欉樹有三十三呎左右。』『Lin另外gorh有榆樹嗎?』『He ma是一欉真古早e樹仔。但是di十冬前ho雷火燒死,阮早diorh已經ga伊e根部掘去a 。』『你gorh edang講出he樹仔kah早e遺址嗎?』『我以前定定看著,zitma自然gorh edang講出來。』『Zia gorh有別欉榆樹嗎?』『Ganna有zit欉老榆樹,其他e攏是一寡矮矮e小樹nia-nia。』『我想veh先去看hit叢老榆樹e遺址。』」
  「阮diorh坐雙輪馬車,直直行到hit間厝外e草地頂guan。Hia有一個無草e所在,hit qiah diorh是榆樹e遺址。我發覺zia du du好diorh di厝gah橡樹e中間。」
  「我問講:『我想咱無可能知影zit欉榆樹eguan度吧?』」
  「『我edang ga你講,hit欉樹仔攏總guan六十四呎。』」
  「我驚一dior,問:『你哪會知影?』」
  「『我以早gah我e家庭教師練習三角數學e時陣,定定測驗逐項物件eguan度。因此我對各種樹仔gah建築,攏會測定yineguan度,絕對無可能m對。』」
  「我聽著zia-e話,感覺真歡喜;但是我zit時hiong-hiong gorh得著另外一種感想。」
  「我問伊講:『請你ga我講,line管家vat問你榆樹e代誌嗎?』」
  「Reginald Musgrave真著驚ga我相,稍歇一下,伊ziah 講:『Zitma我聽了你講e話,我ziah想起來幾個月前,我ham幾個使用人開講e時陣,Brunton確實問過我zit個問題。』」
  「Watson,我zit時gorh kah確定我e推理是對e。我qiah頭看日頭,日頭已經dauh-dauh-a往西爿去。我想di一點鐘以內,diorh會sua到hit欉老kok-koke橡樹枝頂guan,diorh會gah he儀式內e問答話句互相呼應。所以我gorh想著gah hit榆樹e影有關ehit幾句話,我iorh一定是di日頭照di橡樹頂guane時陣,看著he榆樹e影。Di he樹影上尾仔e所在,一定diorh是儀式話句中he主要e標記a。我ganna愛di he日頭照di橡樹頂e時陣,找著he榆樹影上尾仔e所在,定著edang找著案件e線索lo。」
  我聽到zia,擋ve diau插話講:「Holmes,這確實是案中主要e線索。Mgorh he榆樹已經ho人挖去,應該找無伊e影a。」
  Holmes講:「無錯,mgorh既然Brunton edang找著,我一定ma edang找著。Zitma既然無樹身,我diorh ham Musgrave轉去厝裡,我先做一個木釘仔,gorh di頂guan縛一條長長e索仔,di紙頂每隔一碼,我拍一個結。另外,我又gorh teh兩枝釣篙仔〔釣竿〕接做伙,du好六呎長。阮做伙出來,hit時日頭已經照di橡樹頂guan,我ga釣篙仔cai di榆樹e遺址hia。日頭照著釣篙仔產生e影,用索仔一量,du du好九呎。」
  「我看著zit個影,dor edang推測榆樹影e長度lo。因為釣篙仔長六呎,影有九呎,若按呢,榆樹guan六十四呎,以比例來算,diorh edang知影榆樹e影攏總長六十四呎lo。所以我diorh用索仔di土腳量,he榆樹影上尾仔已經到厝e邊仔,我用木釘仔釘di hit爿e土內。Watson,zit時我非常歡喜,因為ui我釘釘仔算起兩呎e所在,ma有一個用木釘仔釘過e細空,gorh留di土腳。我一看diorh做zit個記號,ma知影he是Brunton留落來e記號a。」
  「續落去,我ui袋仔內teh出羅盤,找出方向,然後ui厝e壁爿,往北行二十步,做一個記號了gorh往東行十步,往南行十步,hit時我行到一間舊厝e門腳口。然後我按照儀式裡講e話,gorh往西行兩步,diorh行到hit扇門倒爿e石頭仔路去a。」
「Watson,我di he日頭照e光內,細膩觀察hit爿e石頭,看起來真平整,na親像已經足濟年無ho人sua動過。我diorh用我e手枴仔kok hiae石板,mgorh攏無聽著任何空空ia是奇怪e聲。Zit時我感覺真失志,想講Brunton可能iah未做到zit種地步。Hit時Musgrave對我做zia-e調查,伊知影我e用意。伊看著我躊躇e款,na像有什麼新e想法,伊ga我講:
  『你敢講ve記儀式中e「diorh di zia下腳」hit句話a?你對zit句diorh di下腳e話,為什麼無研究leh?』」
  「我聽著zit句話e意思,hiong-hiong覺悟過來,我叫講:『敢講zia gorh有別個地下室?』」
  「伊講:『是a,diorh di zit片門後壁,he地下室e年歲,ma ham zit間厝仝款古老a。』」
「阮diorh做伙拍開hit片舊門,ui石樓梯入去,內底非常烏暗。阮點著一枝番仔火,ga he壁頂e一pa燈點dorh,ziah di燈火中看見厝裡e模樣,na親像已經有人先來過。我想一定diorh是Brunton lo。」
  「Zia疊e柴ko,早diorh已經sua開變做一條窄窄e小路,一直到一塊足大粒e石頭hit爿。Hit塊石板e中央,裝著一個已經生sene鐵箍仔,頂頭gorh縛一條長長e巾仔。Hit塊巾仔足堅固,edang提起重e物件。」
「我e朋友大叫:『天a,這是Bruntone物件a。我定定看著伊teh zit條巾仔,edang確定he diorh是伊e物件。但是伊為什麼veh di zia做zit種代誌neh?』」
  「我看著按呢,無閒gah伊講話,diorh趕緊去sa著圓箍仔e長巾仔,出力去掀hit塊石板。但是hit塊石板siunn過重,我一個人無法度,我diorh去叫庄仔內e警察來dau相工。阮足濟人用盡氣力,ziah ga hit塊石板sua到邊仔。石板sua到邊仔了後,diorh出現一個四角形烏暗e地下室。Musgrave teh燈仔火照dui下面去。」
「He地下室真細間,大約ganna有七呎深,四箍笠仔攏是四呎,內底好像是一間gorh kah細間e小房間。Di壁邊有一個柴做e箱仔,ui he燈光內看去,箱蓋suah開開。箱仔e邊仔有一個舊舊e銅鎖匙,凸出di鎖匙空外。箱仔內卡足濟青苔,看起來青sun-sun,早diorh已經生蟲,足破舊a。我看內底只有一寡圓e金屬物件,其他什麼攏無。」
  「阮準備研究zit ka柴箱仔,hiong-hiong gorh看著箱仔邊有一堆烏烏e物件,he是一個穿烏衫e人跪di土腳,伊e身軀往前趴,頭ua di箱仔頂,雙手直直ekng di兩爿。阮看著,攏驚一dior,diorh做伙行入地下室。摸zit個死體,早diorh已經ding-kok-kok,看起來已經死真濟工a。伊e頭殼因為趴di土腳e時間有一下仔久,血結凍di面頂,變做茄仔色,看起來足奇怪,已經無人edang認出伊是siang。但是伊e嘴鬚、伊e衫仔褲gah伊e頭毛等等,我e朋友已經認出這diorh是伊e管家。但是我看伊身軀頂完全無傷痕,m知伊是安怎死e。過一段時間,阮diorh ga zit個死體扛出地下室,但是阮對其中e情形猶原是霧sa-sa。」
  「Watson,我原先e計畫,認為照he禮典中e怪話慢慢仔去找線索,入去hit個祕密e地下室,diorh edang破解zit個案件。但是我zitma雖然找著Bruntone死體,suah iau是霧sa-sa,m知veh安怎。我想Brunton會死,應該gah hit個查某人hiong-hiong失蹤,ham hit個柴箱仔裡所藏e物件等等足濟足濟e事件,攏是真歹了解e怪代誌。所以我diorh坐di厝腳hit個柴桶仔頂guan,分析真濟疑點,想veh知影代誌e真相。」
「Watson,你敢知影有一寡案件,靠我e假設diorh edang解決案件中e祕密。Zit個案件ma是其中一個。Hit當時我既然知影zit個案件e情況,第一步diorh憑著Bruntone行為,推測伊進行e步數:伊一開始知影儀式e祕密,入來zit個地下室,伊e目的,一定是veh得著zit個地下室內所藏e寶物。但是伊一個人e力量,是無法度sua動地下室頂guanehit粒大石頭。按呢伊第二步veh安怎做?所以伊一定愛別人dau相工。Hit當時有法度ga dau相工e人,一定diorh是厝内e人。因為伊做賊,一定愛di半暝動手,但是hit陣門窗gorh關diau-diau,若是伊veh叫人dau相工,diorh一定愛是厝裡e人lo。但是伊veh叫什麼人來dau相工neh?Di伊e心內,一定認為上gai有法度信任e人ganna有hit個查某gan仔。因為查甫人攏m知影家己e薄情,又gorh看ve起查某人,掠準用一寡技巧,diorh edang恢復查某人kah早對伊e感情,甘願ho人利用。伊diorh是有zit款想法,diorh誘拐hit個查某gan仔,希望恢復以早e感情,而且要求伊dau相工為伊做歹代誌,Howells本來diorh是一個無主張e查某人,容易ho伊誘拐,答應伊e要求。Hit一暝,yin兩個diorh做伙sua開hit塊大粒石頭。」
「但是yin ganna有兩個人,一個gorh是查某人,做zit款搬石頭e粗重kangkue,一定無法度。因為我gah所有Susakesie警察用盡氣力ziah ga hit石頭移開。按呢,yin安怎克服zit個難題?一定是愛靠別項物件來dau相工。我一想到zia,diorh kia起來,斟酌看著土腳hia疊e柴ko。Hiong-hiong看著一枝柴ko仔,大約有三呎長,一爿有一條bit-sun,gah別枝柴ko完全無仝,我diorh知影Brunton edang入去zit個地下室,一定是靠著zit枝柴ko仔。我想yin一定先qiu hit條石頭頂e長巾仔,ho石頭出現一條bit-sun,然後diorh ga hit枝柴koe一爿插入去bit-sun內,用力攪動,hit塊石板diorh ho柴ko dauh-dauh-a giau開lo。一直到hit塊石板sua開到ho一個人出入,ziah用hit枝柴ko du ho diau,因為若無按呢,hit塊石板diorh會gorh合起來。但是因為石頭siunn重,hit枝柴ko di土腳e一爿,diorh出現hit個bit-sun。」
「然後,我繼續推理Brunton到底是安怎死e,我想hit個地下室既然ganna有法度ho一個人出入,按呢入去地下室e人,一定diorh是Brunton lo。Hit個查某gan仔一定diorh守di地下室外口等待。Brunton將箱仔內e物件teh ho查某gan仔,家己suah猶原留di地下室,ga四箍笠仔ka透透,想veh滿足伊e慾望。但是後來發生什麼代誌?Iau gorh發生什麼變化leh?」
  「我認為di伊diam地下室ka透透e時陣,hit pa怨毒e火,diorh di Welsh查某人e胸kam內gorh再dorh起來。伊想起以早e代誌,真怨毒,而且hit時陣,iau gorh縛di伊e手內,伊diorh想講不如tai死zit個薄情人,出一口怨氣。但是伊veh安怎下手leh?無的確diorh是伊ga柴ko teh走,ho石頭合起來,ga Brunton害死,無的確伊認為這diorh是伊應該有e命運,ziah按呢做e。但是無論安怎,Brunton已經活活hong埋di地下室內。」
  「Howells ga hit粒石頭合起來,趕緊teh著ui地下室內得著e珍寶,走走出去。但是伊beh樓梯e時陣,真清楚聽著伊e舊情人di地下室用手long石壁e聲。Zit種求救e聲伊一定聽gah真清楚。」
「伊本來有腦膜炎,聽著zit種怪聲diorh驚一dior,所以di第二工e透早,痟笑到上尾仔,伊舊症頭iann起來。但是hit ka箱仔內到底是藏什麼珍寶?伊以後又gorh是安怎做leh?我想diorh是我e朋友ui湖中勾著e布袋,gah袋仔內所藏e古早金屬物件。He一定是伊病kah好e時陣,恐驚代誌爆發,diorh ga hit 個物件全部dan入湖中,然後走去別e所在,希望家己脫罪。但是物件suah ho我e朋友勾著。」
「我想了二十分鐘,diorh無疑問破案a。Hit當時Musgrave猶原面色白cang-cang,kia起來想一寡代誌,無外久,gorh越頭行入地下室。」
  「伊ui柴箱仔裡teh出一寡金銀角仔,轉來ga我講:『這是英王Charles一世時陣e遺物。我講阮兜e禮典,當然diorh是hit時e舊抄本。』」
  「我聽著伊e話,diorh了解禮典內問答話句e意思。所以我diorh講:『咱愛gorh找著一寡Charles時代e其他物件。請你ga你勾著e金屬物仔ho我看,我ziah edang明白zit個案件e真相。』」
  「阮diorh做伙轉去伊e冊房。伊將勾著e逐項物件ho我看。我ziah明白伊為什麼會認為hit個物件攏無價值,因為yin攏真黯淡,金石ma ho土沙粉仔kam gah無什麼光彩。我hit當時teh著zit粒寶石,di我e衫頂guan拭拭leh,hit粒金石diorh閃閃sih-sih,親像一粒星。Hit個金屬因為長時間埋di土腳,已經變形凹去a,但是猶原edang看出是一種重複e圓箍仔。」
「我講:『我認為zit個物件,一定是英王Charles死了後,hia-e貴族m敢zah出國e珍寶,所以diorh將hia珍寶埋di土腳。Yin偷偷ga埋e所在記落來,di日後平安轉來國家了後edang teh出來,zia-e物件一定diorh是hit當時所埋e寶物lo。』」 
「我e朋友講:『可能是按呢無m對。因為我e祖先 Sir Ralph Musgrave本來diorh是Charles一世時陣e保王黨。Charles二世走出去di外口e時陣,diorh將伊當做心腹。』」
  「我應講:『好a,zitma咱已經得著最後e解答lo。你雖然經過足濟代誌,但是你祖先仔所藏e祕密寶貝,已經ho你找著lo,而且gorh了結歷史上一件重大e公案。』」
  「伊足奇怪deh問我講:『按呢,這到底是什麼珍寶leh?』『這m是別項物件,這是英國古早時代e一頂王冠。』『王冠嗎?』『確實是。你敢ve記,禮典e問答話句是安怎講e嗎?Hit句「zit項物件是siange」、「是hit個走了e人e」e話,diorh是清楚講出這是Charles一世e遺物lo,按呢,he「siang應該得著伊」、「hit個diorh veh到位e人」一句,斟酌推理伊e用意,diorh是講Charles二世lo。我推測yin做zit種奇怪e問答,diorh是veh ho後代e人edang照按呢來走找,重新找著zit頂王冠nia。』『若按呢,是安怎會iau gorh di 湖裡neh?』『Zit個問題,m是一時陣diorh edang回答e。』我diorh ga du-a所得著e理解,對伊詳細解釋。我e話講了,月娘已經升到頭殼頂a。」
「Musgrave聽了後,na將hia-e物件kng入去袋仔內,na問講:『Zitma經過你e解釋,代誌已經明朗lo。Mgorh Charles二世回國了後,若無追問zit個王冠leh?』」
  「『其中e祕密,我ma無法度去知影。無的確yine祖先死di外國。而且lin zia-e giann孫suah 無注意禮典e用意,一直到zitma,zia-e寶物ziah發現。』」
  「Watson,這diorh是Musgrave禮典e故事。Hit頂王冠diorh留di Hurlstone莊園裡──無的確yin diorh愛經過法律e手續gah金錢ziah edang保留王冠。但是你到hia,只要報我e名,diorh esai看著zit個古早e王冠lo。Mgorh ui hit陣開始,hit個查某gan仔diorh失蹤lo。無的確伊已經離開英國,走去海外lo。」





daiqi007 發表在 痞客邦 PIXNET 留言(0) 人氣()

台灣味 時行台灣語文
魚刺肉粳、蚵仔麵線是台灣味e美食。
拜六時, 行過台北城e冊店區, 補習班e人潮已經退去? 或者是iau未下課? 或者是升學率已經超過百分百? 或者是經濟衰退?
冷清e街路,有一擔阿財魚刺肉粳,燒lor燒lore感覺,無sann人e街路邊,排幾liau椅仔,兩人叫一碗來分享。少少a,氣味真好,食少好滋味,食濟無趣味。Hmh~味覺vevai。
慢慢仔seh來西門町,坐一下a,天色ma暗luai a。
暗頓ma愛解決a,m知veh食啥?liam當時,uat角仔e所在,有一間阿財魚刺肉粳,a無dor gorh ga食一碗。
Zia 距離阿宗蚵仔麵線有二、三個區格(block),a少年人攏dizia,yin穿流行e服裝,deh看時行e商品,街頭巷尾攏是細細間e點,不時ma有一二台 烏頭仔車 駛入來徒步區e邊緣,zia du好是 叫做 便所桶餐飲店e交點。

daiqi007 發表在 痞客邦 PIXNET 留言(0) 人氣()