目前日期文章:201012 (6)

瀏覽方式: 標題列表 簡短摘要
第九章 教學實務


教學實務-- 如何進行 生命書寫 張春凰
取自 《閱讀gah書寫》

一. Di 教習中 教gah學 做伙成長
閱讀gah書寫 zit門課 di 靜宜大學 自 2009年秋季 開始 必修 一學年, 主題注重 di生命教育, 上下期 分別 以 個人 生命書寫、 創意履歷表 做重心。
配合 阮班上e 企業管理科系 背景, 一開始 ho yin 有 自主e見解, 先嚴肅 面對 “為什麼veh 閱讀” e 開張戲齣, 教師表明 一定會挑選 精彩部份 kng-di 本冊內底, 請同學 mai應付-- 白紙寫烏字e 證據, ma重視 yine參與感 di 期尾 邀請yin 簽名, 一步一腳印 為 教習圓滿 留著 珍貴e回憶。
上學期 師生 照 整體課程規劃, 以 《流動》文選 做底, 做 相關搭配, 書寫文章e 部份 總共有八篇, 另外 以 文章 做 隨堂閱讀 註記gah測驗。
Di本章, 咱 換一個角度 先來 講書寫, 再來 談論 閱讀, 配合 金字塔邏輯 圖解原理 gah PowerPoint大綱 運用, 舉例講述。
親像 中小學e 作文課 按呢, 出題目、 交作業、 批改、 檢討互動。 學期中 可發現 有幾個學生 文才真好, 到了期尾 1500-3000字e 生命書寫, 個人 有個人e 故事, 看gah有感動、 有歡喜, 有人 勇敢反省、 有人 珍惜生命、 有人veh 去冒險、 有人 去菜市仔 幫助阿媽 賣冬節圓仔……, 師生如 一家人, 有時 分ve 清楚 你是deh 教課 或者是 做心理輔導師 或 朋友序大。
1. 關係 生命書寫
到學期尾, diorh是 好酒沈甕底e 總收割期, 因為 校方e網路 為 逐個同學 留下一欄 個人書寫e生命車頭, 教師針對 一學期e 讀寫, 做一個 總結引導-- “生命書寫”~~ 如何達到 1500-3000字 , 以下是 分ho 學生e講義(20091210):
同學di七篇e寫作當中, 有四篇心得: 油蔴菜籽、 童年往事、 謝智謀教授e 演講、 電影 超人特攻隊;由zia 可看出lin 對 文章閱讀、 看電影e 知覺、 聽話 掠重點e能力 兼顧 書寫表達e能力;三篇創作 為什麼veh閱讀、 童年中秋、 情書 是 檢視逐個e 創作能力。 Zit學期 上尾後e 重頭戲 di 佔百分40%e 期尾傳送 “E學園”e 〈生命書寫〉, 需要寫1500-3000字。 一學期來 lin 所寫e 大約攏 di幾百字 到 千外字當中, zitma 一下veh 跳到3000字左右, 愛有一寡 撇步:

1.1 veh按怎構思?
a. “生命書寫” 簡單講 意思是 生命故事、 成長故事;
b. 針對題目 做分段 咱可以 用年代 分出 幼年、 童年、 青少年、 青年e大綱;
c. di每一段 成長過程 有什麼代誌、 什麼人物 ( 老師、 朋友、 親人、 特殊人物e傳記 或 冊中e 一句話 ) ho咱印象深刻、 感動、 快樂、 痛苦、 打擊、 挫折 等, 改變咱e 行為或事件 ho咱一生難忘, 來回想、 省思 zia-e 過往gah意義;

1.2 veh 如何落筆?
a. 針對 咱veh寫e人、 事、 物 分做 小副題, 按呢 卡容易 有一條 連接線, 比如 範文 簡媜e〈漁父〉 gah 鍾文音e 〈我e天可汗〉 , 文中運行 分做 幾個小部份, 以 時間序列 做軸, 再 加添細節、 再以 文學e語言 支持理路 展開 情感美感e 大體;
b. 咱ma edang 採取 〈油蔴菜籽〉 、 〈童年往事〉 自傳式e 一路寫起來, 或 採取〈寂寞e十七歲〉 集中 di十七歲e 心事gah困境 表白;

1.3任何 活動 攏可取材
咱讀過 什麼冊、 聽過 什麼演講、 看過 什麼電影、 參加過 什麼 活動/比賽、 去過 什麼所在 旅遊 ho你 眼界大開, ho你得著 啟發或獎賞、 ho你了解 人生e價值,任何 活動 攏是 取材e對象, 咱ma會使 先寫了ziah來取題目;

1.4夢想 ma 是 生命書寫
咱決定veh做什麼 事業 、 行什麼路、 或 繼承家業, 有什麼 期待、 抱負、 願景gah責任 需要 精密e計劃? 夢想 咱e未來 , 引領咱e 想像力 gah 創造力;

1.5 達到1500-3000字e 運筆能力
有了 文章e 段落架構, 再di每一段e份量 文字e重量gah質量 做撙節, 如 人e 個性gah行為 有 什麼特徵 veh強調、 凸顯, 節奏 如何安排, 氣氛veh如何 渲染加料, 達到1500-3000字e運筆能力;

1.6 落筆實踐
穩定型e學生 請你量早寫, di寫e過程中, 寫了去讀, 看家己 有 扣an主題 無? 有離題無? 寫有順無? 讀了閣修改, 修改了 閣寫, 寫作 只要 你有耐性, diorh有辦法ga寫ho清楚; 天才型e學生, 靈感往往ho你di睏眠中 一再演出, 可能di你 猶ve動筆 進前, 寫作e細胞diorh deh絞滾, 你可能屬di 敏感e天份, 按呢diorh恭喜你, 無認真寫diorh無采, 可惜啦!

1.7 真情誠意
愛會記e, 真情感動 比 寫作技巧 卡重要, 寫你熟識e 人、 事、 物 , 寫你 上深刻e 代誌!

1.8 充分利用 範本
選讀課本 〈流動. 光影〉中, 每一個單元 攏有導讀,可 先讀文章 家己先想, 再去 詳細品讀 別人e觀點 補充 家己 無看著e角度, 再度 去讀範文, 分析、 對比 家己e經驗, 按呢 可提供咱 一寡 提示gah寫作e 方向;

1.9 善用 文思診療室
學校 有 一流作家 輪流 di 文思診療室 駐校, 同學 愛好好 把握機會;

1.10 早早 提筆準備
穩定型e學生 早早會準備, 準時交作業, 才氣型e學生 會治一目nih 爆發伊e靈思才華, 任何 機會gah機緣, m通ho飛走去。
寫作會ho咱 帶來快樂、 或 流目屎, 無論按怎, 攏ho咱提供 一個機會 想清楚, 即使是 痛苦 ma會 ho咱e 靈魂淨化, 咱ve浪費生命, 寫了 咱會有 成就感。 把握 咱e靈感, 親像 最近二禮拜 以來 老師寫了 六篇短篇 敘述散文, 平均 一篇三千字, zit款e 經驗 來自 靈感一直vok出來, 任何代誌 攏可 暫時排開, 無ga 寫落來 靈感一目nih仔 diorh會消失去a。 後來e 二禮拜 又閣 寫五篇,加上 進前寫e一篇 總共十二 篇, diorh成 就一本 叫做 《冬節圓》e冊。 平常 有題目diorh記落來, 身邊e人, 你所聽e、所看e一句話 攏ho你靈感。

二. 金字塔思考方法、 PowerPoint 大綱 簡報 實作
經過 上學期e 實務gah觀察, 結論是 學生 並無出現 閱讀gah書寫e 問題。 閱讀gah 書寫 以外, 講gah組織能力 卡欠少 這du好是 第二學期 需要 加強e所在。
台灣e學生 主動講話e意願真低 gah 表達e 方式 真欠缺, 大部份學生 攏真斯文, 問問題 e次數 無夠濟, 以下 veh 實做 金字塔思考方法gah PowerPoint 大綱 做簡報, 來試 來結合 學生e 讀、 寫、 講e 表達gah組織 能力。 因為 zit班 是 企業人, 不管以後 veh做 職員 或 頭家 或 改行, 結合 zit門 閱讀gah 書寫e 課程訓練背景 做 一個基礎, 希望ho yin 有自信 ga家己e能力、 專長, 以 讀寫e 訓練 經驗gah 模式 注入yine熱情、 精神、 氣質, 有條理 ga家己e 理念計劃 di一定e水準, 呈現出 一個人e 豐美內在。
2.1 金字塔 圖解架構 實務
這是 以 第一學期e 生命書寫 所完成e文章, 第二學期 以 學生家己e 創作做例, 來切入 做分析e 教學效益個卡省力, 因為 yine創作 已經內建 心底, 請學生以 家己e作品 根據 金字塔思考方法 架構。

(待續)





daiqi007 發表在 痞客邦 PIXNET 留言(0) 人氣()

Chekhov 短篇小說集 三篇 陳融廷 台譯
細粒蘋果
Di黑海gah Solovetsdky[所羅維茲基]群島之間, di某某經緯度e所在,有一位叫做 Trifon Semyonovich[特萊豐‧西繆諾維奇]e地主 已經di家己e黑土地頂guan dua 真濟冬a。 伊e姓 親像船e撐竿, zit個姓 原來是zin響亮deh表示人類美德之一e 拉丁字所演變來e。Trifon[特萊豐]伊有大約八千英畝烏土e庄園。 庄園雖講全部攏是伊e,mgorh已經抵押等veh賣a。 「俗俗a賣」e招牌 di deh伊頭殼頂 禿斑出現以前dor已經釘di hia a, 但是zit個庄園ia ve賣掉; Trifon edang無受著zit款歹運, 攏是因為 伊家己e技巧gah hit個qau ho人騙去e銀行經理。 當然, 總有一工 銀行會倒, 伊gah一大批人 仝款edang ga銀行借無利息e貸款, 事實上, 逐bai伊付出 貸款e淡薄a利息e 時陣, 伊總是做gah ve輸真e仝款, dor親像一個人 為著 建教堂 抑是 為死去e人安魂, 來捐出一sen錢 仝款偉大。 若是zit個世界m是按呢生, 是另外一個世界, 若是所有e物件 攏用yin特殊e專有名詞來稱呼e話, 按呢Trifon dor m免叫做 Trifon lo, 應該愛用平常保留ho牛馬用e名來稱呼。 講一句老實話, Trifon確實是 一個zing牲; 我相信 連伊本人 ma 會同意 我e看法。 伊若是 聽著zit句話 (因為 伊有e時陣 ma 會看《田嬰》雜誌), 若照講 伊ve氣gah ciak ciak dior, 因為 伊有 相當e智慧, 真有可能會完全同意我e看法, 無的確 閣會送我 一打 伊e Antonovka [安東諾夫卡]蘋果, 來感謝我 無ga伊e姓 洩漏出去e 好意。 Di zia 我只有用 伊e教名 gah ui父系傳落來e名, 我無準備寫出 伊所有e美德, ia若無dor會 lor lor長。 若veh完全 ga Trifon Semyonovich zit個人 寫出來, 無用長篇大論ve sai, 伊e分量 e sai gah Eugene Sue [猶今.蘇]e 《流浪e猶太人》 來比。 我無想veh提起 伊安怎 用紙牌騙人, 抑是 di政治上 作弊cue門路, ho伊edang m免還債務lap抵押利息, 抑是 安怎創治 老神父gah副主祭, 抑是伊原始社會e打扮 坐馬車 經過村內巷仔e 模樣。 我限制家己 愛光明正大 提出 Trifon安怎 對待同胞e 一件小故事。 根據gah同胞相處 四分之三世紀e經驗, 伊vat趕biann biann 寫出 下面e對句來歌頌人。
憨a, 飯桶, 庄腳song;
Sng牌(1)騙家己 騙別人, 自肥ma自毀。
Di deh熱天veh suahe 一個真美好e透早, Trifon家己一個人du deh伊hit 個風景真suie 水果園內底, 行di真窄 又閣長e 小路頂guan。 Hit種edang ho詩人靈感e 優美氣氛 充滿了 四箍笠仔e環境。 親像deh講: 「時間掠ho an, 時機掠ho an, 愛趁時陣 享受快樂, 因為秋天 dit veh到a!」 但是 hit工透早 Trifon並無siann清爽, 第一 可能是 伊gah詩人 閣差真遠le; 第二 可能是 伊過了 非常無爽快e 暗暝。 這 di牌桌頂guan 搏輸gah 真悽慘e人 來講, 是 真平常e代誌。 行di deh Trifon後壁e 是 伊忠心e 下腳手人, 年紀 六十外歲e Karpushka [卡布須加], 伊疑神疑鬼e四界看。 Karpushka e德行 gah Trifon 比起來, 實在是 半斤八兩, 伊 對擦鞋 真有一套, 對安怎tai狗仔 閣有絕招, 只要是伊手摸過e物件 攏會 消失無蹤去, 做一個偵探, 伊實在是 無人edang比e過e人才。 村a內e 幹事職司 攏叫伊做 「gor血蛇龍」。 差不多 逐工攏有 附近e 做穡人 抑是 地主 來向Trifon 投訴 Karpushka所做e 歹代誌, 但是 攏mvat有 任何回應。 Trifon e理由是 Karpushka 是無人edang取替e, 伊有講ve了 有關種種e閒談、 童話、 傳說gah典故 等等e 才情。 伊edang 有嘴講到無nuae 講vesuah。 伊講話 順順若流水 閣 ve dun denn[不遲疑], 至少du deh伊 iau ve聽著 任何 伊有興趣e代誌 進前 是按呢e。
Dor di zit 個特別e透早, Karpushka dua di主人後壁行, 談論 有關 兩個戴白帽仔e 查甫學生qin-ae 故事。 Yin兩個人 手teh武器 入去 水果園。 要求 Karpushka 允准yin di園a內 拍獵, 甚至 veh den出五十 [戈比]來ga伊ose[]。 但是, 主人e脾氣 伊心內知知leh,mganna看ve起yine拒絕有好處eoseh[賄賂],gorh放出栗子gah灰灰兩隻狗去咬 yin。Zit個故事du講suah,伊開始大聲宣傳有關地方醫生e德行,mgor故事iau ve了e時陣,伊聽到ui左爿蘋果樹林內傳來e一種si-si-su-su可疑e聲音。所以無gorh講話,斟酌a聽;伊家己確定認出zit種聲音e可疑來源,伊dor ga主人e外套qiu一下,然後zong入去heh si-si-su-su聲音e所在。特萊豐預想到會有什麼趣味e代誌,hiong-hiong-gong-gong用老人e腳步due di卡布須加e後壁。Di水果園邊一欉kia ziann zianne蘋果樹腳,一位du deh dau dau a哺一粒蘋果e農家查某qin-a kia di hia,另外離伊無遠e所在,有一位肩胛頭真闊e農家子弟di deh土腳爬,ga ho風吹落來e蘋果揀起來。伊ga iau ve熟edan入去ge樹仔欉內底,ga已經熟e蘋果用lah sape闊手,細膩e送ho伊e杜琪妮亞。伊sua對家己腹肚e狀況攏無ve 睬,三嘴做一嘴繼續一直吞,查甫qin-a 又gorh繼續di leh土腳揀蘋果,一點a攏無想著伊家己,ganna專心為伊hit 個獨一無二e杜琪妮亞。
「ui樹仔頂van一個落來,」查某qin-a ge聲細膩ega sai-long[慫恿]。
「我m敢。」
「你是leh驚什麼,『血腥龍』? 伊真有可能du deh小酒館lim淡薄a酒……」
查甫qin-a跳guan起來,ui樹仔頂挽一粒蘋果ho查某qin-a。但是dor親像古早e亞當gah夏娃仝款,zit個查甫qin-a gah 查某qin-a ma因為yine蘋果,愛悽慘去受罪……伊ga一塊蘋果落來馬上交ho查甫qin-a。Yin兩個ziah du吃著蘋果e酸味,兩個人e面突然間青sun-sun……這 m是因為蘋果e酸味yin zia按呢,是因為yin注意到特萊豐嚴肅e面容gah卡布須加hit個奸巧惡毒e嘴面。
「親愛e,qau早a!」特萊豐向yin ua過去,「唉唷!lin du deh享受蘋果,希望我無ga lin攪擾著。」
查甫qin-a ga帽a tng落來, 頭le le, 查某qin-a ma頭le l e看伊e圍裙。
「古烈格里, 最近過了好無?」 特萊豐對查甫qin-a繼續講, 「少年e, 最近安怎?」
「我ganna teh一個nia nia,」 查埔qin-a小小聲講, 「是ui土腳 揀起來e。」
特萊豐 ga目睭 撇過去 查某qin-a身上。
「你好無, 我e小親親?」 這使伊 發現家己 更加專心 注意伊e 圍裙。
「唷!qun ia ve慶祝line婚禮le, 對無?」
「無le,先生!qun ia ve……我對天ziu zua,qun ganna挽一粒蘋果。hut le m是……」
伊uat頭對查甫qin-a講:
「好!好la!真好!學認字讀冊ve?」
「先生!ia ve。qun ganna teh一粒蘋果,qun是di土腳cue著e……」
「你ia ve去讀冊leh,dor知影veh安怎偷teh物件,嘿嘿!好,按呢好!你無因為功課壓力感覺真沉重。你什麼時陣開始偷teh物件?」
「先生,我並無偷teh a。」
「若無你hit位suisuie小貼心ele?」卡布須加ga伊主人e話拍斷,對查甫qin-a講,「為什麼伊看起來hiah nih a失志?敢是因為你無向伊表達夠濟e愛?」
「卡布須加!恬去!」特萊豐hua講,「古烈格里,我veh愛你講一個故事ho我聽看mai。」
古烈格里tiau故意sau一聲,做一個真奇怪e笑面,
「先生,我vehiau講故事。我ma vuai你e蘋果。veh愛蘋果,我家己去買!」
「我eqin-a,我真歡喜知影你真好額le!但是──我ma是 veh愛你講一個故事。我想veh聽,卡布須加ma想veh聽,你e小貼心ma想veh聽,van驚歹勢,愛有膽量,『大膽是賊心。』我親愛e小朋友,按呢講敢 mdiorh?」特萊豐一對ciabebee目睭ga查甫qin-a qin diau diau。查甫qin-a額頭汗 cok cok流。
「先生,先生──」卡布須加無甲意e用guan gorh iue查甫聲拍斷伊主人e話:「你為什麼m ho伊換唱一條qin-a歌?伊ve憨gah為咱講故事la。」
「卡布須加,恬去!伊愛先講一個故事。按呢好la!我e小朋友,dor照我所講e按呢去做la!」
「什麼故事我ma m知影。」
「你這是什麼意思……什麼故事你ma m知影?按呢你na會hiau去偷?十誡中e第八誡是安怎講e?」
「先生,你為什麼veh問我?我veh na會知影?上帝為證,qun ganna teh一個蘋果niania,而且gor是ui土腳kio起來e。」
「講一個故事ho我聽」
卡布須加開始收集蕁麻。查甫qin-a真清楚知影伊是安怎veh收集蕁麻。Ga伊e族人仝款,特萊豐有伊家己持法e妙招。如果掠著賊偷,伊dor ga yin關di地窖二十四小時,ia是用蕁麻sut yin,ia是先將yin歸身軀tng了了,才會放yin suah。對你來講這敢是新聞?有zit種歹行為e人滿滿是。古烈格里ui目睭邊看著蕁麻,張遲一下,細聲sau一下,伊並無講故事,顛倒講了一大套完全無意義e廢話出氣。哀哼、流汗、悶悶,比平常時ka ziap拭鼻a,伊開始編造一寡有關俄國武士ga牛鬼蛇神各種惡魔頭殼割落來,然後gah美麗e少女結婚e故事。特萊豐kia di hia聽,伊e視線mvat離開過講故事e人。
「好a!」當查甫qin-a接ve到故事e情節di hia烏白講e時陣,伊講:「你講故事真在行,但是你gor ka ehiau偷。Zit ma──輪到我hit位suisuie──」伊向查某qin-a uat頭,「你背主禱文看mai。」
sui查某qin-a面紅gigi用de低e聲音背誦主禱文,氣攏m敢喘。
「然後背第八誡!」
「你掠準講qun teh了真濟蘋果?」查甫qin-a接落講,失望e神態用兩手di空中搖,「如果你m相信我e話,我edang向十字架ziu zua。」
「親愛e,lin m知影第八誡,按呢dor真害a。我無ho lin一個教訓ve sai。我e美人a,伊敎你偷嗎?我e小天使,為什麼按呢恬恬?你一定愛回答!講a!你恬恬m講話,het dor是承認a。按呢,我e小美人,因為你所愛e人敎你偷,我愛你拍伊!」
「我vuai!」查某qin-a低聲講。」
「哦!只要小可拍伊一個dor edang a。伊是一個飯桶,應該教示伊。我親愛e,ga拍a!如果你m願意,我veh叫卡布須加gah馬特威來ho你試看mai蕁麻e滋味……你ia gorh m願意嗎?」
「vuai!我vuai!」
「卡布須加!過來a!」
Dor di-deh zit個時陣,查某qin-a頭向前e走向查甫qin-a,ga伊sen一個嘴pe。查甫qin-a目睭含淚,憨憨a笑le。
「妙a!我親愛e!zit ma qiu掉伊e頭鬃!我e寶貝,衝a!你vuai?卡布須加,過來a!」
查某qin-a qiu著伊愛人e頭鬃。
「mai停落來, 用力ga qiu疼, 用力 qiu 卡 an e!」
查某qin-a真e開始qiu an一愛人e頭鬃,卡布須加歡喜ga veh掠狂,zi-zat ve diau[壓不住]心內e興奮,大笑離開。
「有夠a!」特萊豐講,「你應該ho你女朋友一個教訓。伊ho你一個教訓,zit ma換你顛到過來還伊a!」
「慈悲e上帝,你安怎edang想出zit款代誌來?為什麼我一定愛拍伊?」
「為什麼?哼,伊ho你拍,敢無?zit ma換你拍伊……按呢對伊有真大e好處!你m願意嗎?好,ga你講ve行。卡布須加,去叫馬特威!」
查甫qin-a向土腳呸一嘴嘴nua,親像la-hiorh[老鷹] veh掠細隻雞a仝款e一拳掠an伊愛人e頭鬃,開始暴行相對。當伊出罰伊e時陣,ganna一點a ma ve感覺超過,du-deh歡喜e時,sua ve記一di毒拍家已e愛人,顛倒是講伊di修理特萊豐。查某qin-a尖聲vava叫,伊gorh繼續拍真久一段時間。如果m是莎仙卡,特萊豐e查某囝,ui樹欉背後突然真du好出現e話,我真m知影zit個故事將會如何結束。
「爸爸,來dng去lim茶。」伊huah講。當伊看到當場e情景時,忍不diau大笑起來。
「按呢夠a。」特萊豐講,「親愛elin edang走a。再見!將來lin結婚,我會送一寡小蘋果做禮物e。」特萊豐向zit兩位zng入水果園eqin-a dom頭行禮離開。查甫查某qin-a清醒過來了後ma離開a。查甫qin-a向右爿行,查某qin-a向左爿行;事到如今,兩人無gorh見過面。Na是莎仙卡無ui樹欉突然出現e話,yin huan se gorh會ho蕁麻sut拍。這dor是特萊豐老年e時如何自娛e方法,而且伊厝內e人ma ve差伊外濟。伊e查某囝對下層社會e訪客,有將蔥仔頭tinn入去yin帽ae習慣;對lim酒醉e人攏看做仝款,用粉筆di yin背後寫真大「笨桶」gah「憨人」e字。舊年冬天,伊e囝米地亞,一個退伍e慰官,比伊老爸gorh ka有出脫。一個退伍大兵拒絕送伊一隻細隻狗,gorh敎家己e查某囝mai ui伊手頂teh糖a gah薑餅,所以,di卡布須加e幫助之下,米地亞ga人厝e大門用diama膠[柏油]抹烏。
這dor是特萊豐‧西繆諾維奇, 真正e特萊豐所以ho人稱作特萊豐e緣故。



(1)這di原文Durachki(dunces),是sng紙牌e一種, ma是一個 真困難翻譯e雙關語。





歡 喜
暗暝十二點,一位名叫做米地亞‧庫達洛夫e少年人,真興奮e亂糟糟ezong入去伊老爸老母e公寓,ganna siau人仝款一間gor一間四界走。伊e老爸老母已經上床a,妹妹di眠床頂看一本小說e尾a幾頁,上小學e弟弟攏已經睏gah死死a。
「安怎a?」伊e爸爸媽媽ho zit個意外驚gah頭暈,「到底是安怎a la?」
「哦!mai問我!做眠夢ma想ve到會有zit款代誌發生。絕對料想ve到e……完完全全ho人ve去相信!」
米地亞笑gah真大聲,歡喜gah兩隻腳軟ga bua坐di椅a頂。
「難以相信!」伊繼續講,「lin攏無法度想像!試想看看!」
伊e妹妹ui床頂跳起來,qiu一條毯a圍di肩胛頭頂去見哥哥。小弟yin ma醒起來a。
「到底是安怎樣?你ganna完全起siau仝款!」
「He是因為我siunn歡喜a,媽媽。今a日全俄國e人攏知影我zit個人!每──一個人!一直到今a日ganna lin知影我zit個人,米地亞‧庫達洛夫,一個學院註冊員e存在。自今a日開始,人人攏知影!哦!媽媽!哦!上帝a!」米地亞跳起來又gorh ga所有e房間zong一遍,然後buah入去椅a內底。
「好a!ga阮講發生了什麼代誌?請你冷靜冷靜!」
「lin──lin活親像野獸,m看報紙,『出名』對lin來講並無什麼意義。只有無平凡e代誌才會登di leh報紙頂quane,一有任何重大e代誌發生,人人攏會知影,一項ma ve去ho漏去。我足歡喜。哦!上帝!lin知影吧,報紙ganna記載知名人物niania。哼!yin是記了一寡有關我e代誌le!」
「是安怎樣e記法?di dor位?」
爸爸面色翻青,媽媽望看聖像,di胸前畫十字。小弟yin ui眠床頂跳起來,dor ganna穿著薄薄e睏衫走來看哥哥。
「是真e!yin登了有關我e代誌!zit ma全俄國e人攏知影我zit個人a。媽媽,請你zit個留落來做紀念吧!你隨時攏edang看mai。Dor是zit個!」米地亞ui lak袋a teh出一份報紙交ho伊e爸爸,伊指著藍筆框過e所在,「念看mai!」伊e爸爸ga目鏡戴起來。「趕緊!讀a!」
媽媽注視著聖像,又gorh畫十字。爸爸ga嚨喉清清一下開始讀:
「十二月二十九日暗暝十一點,學院註冊員米地亞‧庫達洛夫……」
「你看!你看!接落去!」
「……註冊員米地亞‧庫達洛夫ui小阿莫爾街柯致金e酒菜館醉茫茫行出來……」
「Dor對a!我gah西米揚彼佐維奇鬥陣……一點a攏無m對!接落去,讀下一行!lin全部聽le!」
「……醉茫茫行出來,滑倒di出租車車伕伊凡‧都洛托夫e馬下。伊凡是庫諾夫斯基地區杜里基hit村e做穡人。著驚e馬跳過庫達洛夫,拖著戴有莫斯科第二商會商人史第藩‧爐可夫e滑雪枋,di歸條街a亂zong,到ho一位守門人遮著才停落來。庫達洛夫qong ga m知影人有一kun a,才ho人扛去到警察局,由一位退伍e醫官檢查,伊e頷a頸後壁有一de傷痕……」
「yin用浸過冷水e繃帶ga我e頷a頸綁著。讀a!dor是a!全俄國e人攏知影zit件代誌!ga報紙還我!」
米地亞ga報紙teh dng,將伊摺好才kng入去lak袋a。
「我veh走去馬卡洛夫兜,ho yin看mai……然後到伊凡尼茲基兜。娜達麗亞‧伊凡諾芙娜gah安尼森瓦西里奇ma應該看mai……我愛來走a,再見!」
然後,米地亞凊采ga有花結e帽a戴起來,勝利di-ziann愉快e對街a走去。




郵 局
前幾工a,阮去參加老郵政局長史拉柯波佐夫yin某e葬禮。按照祖先傳下來e習俗,大家按照規矩攏去郵政局,dor di hia悼念史女士。當薄煎餅kng去桌a頂,老鰥夫悲傷e哭講:「我可愛e某gah zit盤薄煎餅仝款紅艷美麗。確實──是按呢。」
「He一點a dor無m對,」大家同意,「伊實在是有夠sui……上高級e……」
「是──a!見過伊e人攏是按呢驚嘆e……但是,朋友a,我m是只愛伊外表esui gah氣質。這屬di女人e天性,di凡塵中cue攏無困難。我愛伊靈魂e另一種特質。我愛伊──上帝ho伊安息吧!──因為,排除所有活潑幽默e性格之外,伊對家己e尪婿忠貞。雖然,我已經veh步入花甲之年,年紀ganna二十tonge伊,猶原對我忠實,對我按呢e一個老芋a始終忠貞不二心。」
Gah阮鬥陣去食飯e教堂司事充滿表情deh嗽一個。
「你ganna無相信?」鰥夫uat身向伊。
「並m是我m相信,」司事緊張e講,「mgor……你知影e……zit mae少年太太,定定……安怎講le……偷約會什麼e……凊采gah人lam來lam去e……」
「你m相信。我證明ho你看mai。我用各種策略守diau伊e貞操。你edang按呢講,這是一種預防e辦法。用淡薄a奸巧詭計,我e太太無可能對我偷情。我用巧e手段保護qun尪a某e生活。我知影一寡話,一種口令。只要我講hit幾句話dor真有夠a。我edang無煩無惱a,m免操煩伊討契兄。」
「He是什麼話?」
「真簡單。我四界散播一種歹謠言。我想lin攏知影。進前我dng到人dor講:『我太太阿琉娜是警察局長依凡‧阿力克西維奇‧沙力柯瓦茨基e情婦。』ganna講zit句話dor有夠a。因為驚惹警察局長生氣,無什麼人敢gah阿琉娜有任何交cap。任何談情說愛e人,一見到伊dor驚gah連vih攏ve赴 a,以免沙力柯瓦茨基暗中施計。哈!哈!哈!你mai想veh佔人〈鬍鬚局長〉e好處,你得著什麼便宜,伊可能因為你環境無衛生寫五個報告。伊會ga小可代誌宣傳gah驚天動地;看到你e貓a di街a路走,伊會寫作牛di街a路亂seh le!」
「按呢,你太太無gah依凡睏過lo?」阮低聲驚嘆講。
「哦!當然無!哈!哈!哈!he是我變e步數,ga lin少年人騙gah死死。全部e故






daiqi007 發表在 痞客邦 PIXNET 留言(0) 人氣()

開開e窗仔(The Open Window)
Saki著; DCH台譯
「我e阿姨liam mih dor會落來, Nuttel[納德爾]先生, 一個大約十五歲足穩重e少女 按呢講: 「尚且請你 稍容忍我一下仔。」
Framton Nuttel[佛瑞東˙納德爾]想veh講寡適當e話, 來呵咾目前zit位外甥女, mgorh ma無想veh冷淡dit veh來e阿姨。 私下, 伊足掛疑, di zit款正式來拜訪zia-e完全無熟識e生份人, 對伊du患著 神經緊張e症頭 會有什麼幫助。
「我知影你搬去hia了後,」 當伊準備好veh去庄腳隱遁e時陣, 伊e阿姊對伊講: 「你會ga你家己禁鎖起來, ma m gah任何人講話, 你會足鬱卒, 你qau緊張e神經質 ma會愈嚴重。 Di hia我vat一寡人, 我來寫一寡介紹批ho yin, 我會記得 有寡人 是 外nih-a友善leh。」
Framton想無zit位女士是什麼款e人, 伊dor是將veh ga介紹批送去e Sappleton[莎波東]太太, 伊可能是一位友善e人。
「Di zia你vat真濟人嗎?」 zit位厝主e外甥女問伊, yin中間有真長e恬靜ho少女臆答案。
「差不多半個ma無,」 Framton講, 「妳知影,四冬前, 阮阿姊dor dua過zia, dor di hit個教區, 伊幫我寫介紹批ho一寡在地人。」 伊用一種清楚gorh嘆息e口氣回答。
「所以, 你對阮阿姨hit個人m知半項?」 Zit位穩重e少女gorh追問。
「Ganna知影伊e名gah地址。」 Zit位訪客坦白回答。 伊足想veh知Sappleton太太是有夫之婦或者是守寡e。 Mgorh, ui房間內e線索edang臆出好親像有查甫人dua di zia。
「伊e大悲慘發生di三冬前, du好是三冬前。」少女講:「he是lin阿姊搬離開ziah發生e代誌。」
「發生了悲劇?」Framton問, di ziah平靜e庄腳所在, 應該ve發生 任何不幸。
「你可能足好玄想veh知, 為什麼di十月e下晡, hit片雙扇e落地扇iau是完全拍開開。」 Zit位外甥女指著通向外口e草坪hit片闊闊e落地窗, 按呢講。
「今年現主時e天氣iau是溫和, mgorh hit片窗仔gah悲劇 有什麼關係?」
「三冬前e一工, 阿姨e翁婿gah伊e二個小弟, 經過hit片雙扇落地e窗仔門, 出去拍獵, yin一去dor無回厝門。 跨過一片荒野地去yin喜愛e藏vih拍獵區, yin三個人攏di一片神秘難料e濕lam地區裡ho吞埋去a。 Hit冬熱天, 天氣濕悶, 熱gah hong煩心。 Hia e所在,一向攏是足安全e, 所以事先人ve去警覺。 尚且yin e屍體攏cue無,zit件恐怖e代誌, 實在hong人掛心放ve落。」 Zit時陣, 少女沉著e口氣, 突然變gah大舌大舌, 「可憐e阿姨一直認為總有一工, hit隻gah yin三人同齊失蹤e土色長毛e細隻狗, 會親像以早經過hit片窗仔, 做伙逗陣轉來。 所以逐工到夜暗時刻, hit扇窗仔總是開開。 我至愛e阿姨,伊定定ga我講, yin出去拍獵e情形:伊e翁婿e手股頂面帶一領白色防水e獵外套, iau有伊上細漢e小弟Ronnie[羅尼], 伊總是用唱歌e語調講: 『Bertie[珀兒蒂],你是安怎攏看ve開neh?』 Zia e弄笑e話定定吵gah伊心煩。 你知無? 親像ziah死寂e暗時, 定定ho我感覺雞母皮一直起, 感覺著yin dor veh經過hit扇落地窗入來…...」
伊小可pi-pi-cuah, liam當時斷止講話。 好佳哉zit時, 阿姨雄狂狂入來房間, 因為無準時面略仔有歹勢歹勢, 伊e出現ho Framton鬆一口氣。
「Vera[菲拉]有好好招待你無?」 伊問一下。
「伊一直攏真趣味」Framton講。
Sappleton用輕鬆e口氣講: 「我希望你mai在意he落地窗是開開e, 我e翁婿gah小弟yin今仔日出去lam土區用槍拍獵, yin轉來e時,攏愛經過zit扇門, yin會ga我e地毯gor gah la sap li lor, lin查甫人定定是按呢, 敢m是hiorh?」
伊歡喜gorh講ve停deh談論著射獵e情形, 以及鳥類生產siunn慢, 同時ma談著寒天愛cue鴨仔來拍e代誌。 對Framton談論zia e代誌, ho伊起雞母皮。 伊盡量ga談論e題目轉向kah ve驚心e話題, mgorh並無成功。 伊察覺著女主人並無興味聽伊講話。 同時, 伊e目睭一直盯di開開e落地窗gah外面e草皮。 Di zit件悲劇e週年紀念日來拜訪伊, 真正是足不幸e巧合。
「醫生yin攏建議我愛完全靜養歇睏, mai有心理刺激, ma愛避免激烈e體力運動。」Framton講, zit時伊已經為家己e幻想苦纏, 認為 完全生份e人gah見一面e人ve著急想veh知影別人e身苦病疼、 病因gah治療方法。 伊繼續gorh說明: 「關係飲食方面, yin e意見dor無仝lo。」
「無仝嗎?」Sappleton太太無注心deh講, 接續來哈一個hi[打呵欠]。 突然間伊精神起來,出現歡喜e表情,mgorh m是因為Framton所講e話引起伊e注意。
「Yin總算轉來a!」伊大聲huah叫, 「du-a好趕著lim下晡茶e時間, yin看起來歸身軀攏是路糊糜。」
Framtone身軀小可會cuah, 同時ma用一種想veh傳達同情了解e眼神注目hit位外甥女。 Hit個外甥女帶著失神恐怖e眼光, 看向hit扇拍開e落地窗。 一捲莫名e恐怖ho Framton萬分驚心起加冷sun, 伊趕緊ui坐椅頂面轉身過來, ma向仝一個方向看。
Di日光漸漸暗淡落來e時陣, 有三個人影du deh跨過草坪向著hit扇開開e窗仔行過來。Yin ga槍moh di手股, 其中一人ma幔一領白色e外套。 一隻看起來足tiam e土色長毛細隻狗ga yin due an an。 無聲無說, yin行過來倚近窗仔, 然後, di暗淡e黃昏裡, 突然傳出少年又gorh sau聲, 親像deh歌唱e聲講: 「Bertie,為什麼你看ve開?」
Framton激動gah m知veh安怎, 掠an伊e柺仔gah帽仔, 親像痟狗zing墓kong走向行人巷盡bong e門gah鋪碎石頭e停車道, ui燈光暗淡e大門口衝出去。 差不多long著沿路騎腳踏車e人, 害人急向籬笆邊緣轉方向, 若無yin dor面對面zong做一堆。
「阮轉來a,親愛e。」 經過落地窗, hit位穿白色雨衣會查甫人講:「阮身軀頂有一寡lam土,mgorh大部分攏乾鬆a。 當阮入來hit一刻, 向外口亂走逃離ehit個人是誰?」
「一是Nuttel,一個足特出e人,」 Sappleton回答: 「伊ganna談論伊家己e病症,當lin入來e時, 伊連一句再會或失禮e話攏無講, dor雄雄狂狂向門外衝出去, 別人iau略準伊是去看著鬼leh!」
「我臆是hit隻狗e關係,」 hit位外甥女平靜講。 「伊ga我講, 伊對狗有驚心症。有一gai, 伊di印度恆河河岸頂面e墓地, vat ho一群狗追過, 伊被逼藏vih di一座du-a挖好e墓穴過夜, 頂面hit群青面獠牙喙波飛噴, 聲音悽慘e野狗對伊吠無停, zit款情景有夠ga人逼gah起痟a。」
Di短時間內, 真緊dor編導zit款hau siau e神奇冒險e故事, 正是zit位少女e才能。

daiqi007 發表在 痞客邦 PIXNET 留言(0) 人氣()

命運e創治(The Hounds of Fate)
Saki著;DCH台譯
一個秋日e下晡, 日頭斜西, Martin Stoner[馬丁˙史東尼]沿著一台輕便細台車 所留落來e車輪 gau過e lam土細條路行, suah m知影veh去dor位?
伊想講, 頭前無外遠e所在, 是 一大片海洋, 對著海洋,伊e腳步一直行向前, 伊無法度解說 為什麼 家己hiah tiam deh 奮鬥往 hit個目標進行, 親像伊一直ho一種直覺 纏diau leh, dor比如 直覺ho一隻hong壓迫罩綑e鹿公 deh向絕崖e 盡bong衝。伊e情形 是 命運e神, 殘酷deh逼壓著伊: iau餓、精力用了,加上絕望 ho伊感覺麻痺, 伊差不多 無法度 用一點仔元氣 去想 是什麼潛意識 迫伊行ve停。
有真濟不幸e人, di人生e旅途中 歷經苦難, 因為 生做貧惰骨 加上 無眼光 失去良機, 致使 連上普通e代誌 攏做ve好勢,Stoner dor是zit款人。 Zitma伊是 走頭無路, 無任何其他e代誌edang gorh再試。 絕望並無叫醒 伊沉di身上e氣力, du好倒反,伸手sa無錢e危機感 ho伊心智呆鈍。 穿一身破爛e 衫仔褲, 納袋內 ganna cun半sen錢, 無一個朋友 或 任何相vat e人 tang投靠, 暗時無所在過暝, 隔工e三頓m知di dor, Stoner di澹ziunn ziunn e 灌木樹林中 腳底無目標deh行, 伊e頭殼空空, ganna潛意識裡 知影di頭前 某一位所在, 有一大片e大洋 另外gorh有一款知覺-- 感覺腹肚iau gah心肝亂操操, 花園e盡bong 有一間看起來 冷清e農家。 不管按怎, 天du deh飄著 sap-sap-a雨, Stoner想, 可能di zia 伊edang停腳一下, ma edang用伊上尾後e一個銀角仔 買一杯牛乳。 伊氣力用盡, 慢sor慢sor 行入去花園,沿著 一條窄窄e石板路 來到偏門。 伊iau ve kok門, 一個彎腰、曲痀臭老e 老歲仔dor拍開門, gorh kia di門嘴e一爿, 親像veh讓路ho伊入去。
「我敢esai入去vih雨?」Stoner講, mgorh老人切斷伊e話。
「入來, Tom少爺。 我知影有一工 你一定會轉來。」
Stoner腳步ve穩跨過戶碇, kia di hia愣愣看老人。
「請坐, ho我去準備一寡暗頓,」 老人身軀會顫, 熱心deh講。 Stoner因為雙腳行遠路顯出真sen, 伊遲鈍坐di sak向伊e椅仔。 伊真緊dor ga kng di身邊桌頂e冷盤, 乳粿gah pang大嘴吞入腹。
「Zit四冬來, 你並無啥改變,」老歲仔人續落講, Stoner感覺老人e聲音di足遠e所在飄渺, 親像di夢中。 「Mgorh你會發覺阮有真濟變化, 你e阿姨gah我iau di leh, 其他hia e kah早dua di zia e人攏走了a。 我dor來去ga伊講你來a, 伊無想veh gah你見面,mgorh伊愛你留dua zia。 伊定定提起講, 若是你有一工倒轉來, 總該留落來, mgorh伊永遠m愛見你, ma m愛gah你講話。」
老歲仔人 kng一杯vi-luh di Stoner面頭前e桌仔頂, 然後腳步歪歪倒倒deh行向長長e走人巷。 Sap sap雨 已經轉變做 倒水大雨,拍動著門窗。 Hit位流浪漢身軀cuah leh cuah leh deh想, 夜色已經ui四箍笠仔包罩過來, 海邊m知變做安怎? 伊食了食物, ma lim了vi-luh, 仝款憨神憨神deh等生份e人轉來。 Ui角落hia e hit座老時鐘, edang看著時間一分一秒過去, 一種新希望 ui少年人心中暗中deh buh出來; he ganna是頭前對食物e siau想gah di zit間厝頂下cue著停腳e安心來延伸e。 Ui走人巷e通道盡bong, 傳來沉重e腳步聲, 表示農舍內e老歲仔人 回頭轉來a。
「Tom少爺, 女主人無想veh見你, mgorh伊叫你留落來。 當伊往生了後, zit落農舍dor是你e, 按呢有夠公道a。 Tom少爺,你e房間e火已經點著a, 女使用人ma換好清氣e床單。 你會發現樓頂一點仔 ma無改變。 可能你已經足tiam a, zitma dor去樓頂歇睏吧!」
Martin Stoner半句話ma無講, 身軀笨重起身, due著服侍伊e「天使」 向走人巷行去。 爬上一段gi-gi-guainn-guainn e階梯, gorh行一段走人巷, dor進入火光通紅, 溫暖舒適e房間。 房間內設置幾項簡單、 質料好e老古董家具;kng di盒仔內底e一隻膨鼠cit-tor物仔gah一本四冬前e舊日誌, 是房間內所有e裝配。 Zit時,Stoner e目睭ganna盯di眠床頂, 伊等ve赴脫落衫仔褲dor趕緊di眠床頂爽快倒落來。 Di短短e時間內, 命運e神主 好親像 deh創治伊。
透早冷冷e日光中, Stoner了解家己e身分, 真悲傷deh冷笑自我kau seh。 可能伊edang食一寡早頓, di人iau ve發現進前, 偷偷仔溜走。 Di樓腳e房間內底, 伊發現hit個曲痀e老歲仔人 已經為Tom少爺 準備 一盤燻肉gah炒蛋, 面腔冷酷e女使用人 ma捧來一鼓燒茶, gorh為伊倒一杯。 當伊坐落來e時, 有一隻毛長長、 垂到耳仔e狗仔, 真好禮 過來靠近伊。
「這是老Bowker e狗仔,」 老歲仔人解說, hit位表情冷酷e女使用人 叫老歲仔“George”。 「伊上甲意你a, 自從你去Austraiee[澳大利], 伊dor m是古早e伊, 大約一冬前伊dor死a, zit隻是伊e囝。」
Stoner並無對狗母e死亡 有任何傷心, 論真來講 伊死去ma真好, 免得留下任何差錯。
「你veh騎馬出去seh一len無? Tom少爺,」 這是老歲仔人e提議。 「咱有一隻古錐、小白斑e短腳馬, kng落馬鞍座位真舒適。 比老Biddy e年歲kah大一寡, 雖講無kng馬鞍騎起來ma真舒適, mgorh我iah是ga馬鞍kng起去, 牽來門腳口ho你騎。」
「Mgorh我無騎馬e服裝,」 zit位hong流放e人 大舌[口吃]deh講, 當伊看著一身耐磨e衫仔褲, 自然dor自我取笑家己。
「Tom少爺,」 老歲仔人 差不多 帶著hong侮辱e口氣講: 「你所有e衫仔褲 攏無振動著。 Ga hia e衫仔褲 kng di壁爐頭前 dior dior bue bue leh dor好a。 Zitma出去騎馬seh seh leh, 拍鳥, ma edang輕鬆散步。 你會發現附近e人, 會用怨恨、 冷酷無情e態度 對你。 Yin iau無放ve記得過去e代誌, ma無原諒你。 無人會 接近你, 上好你是gah馬仔、 狗仔做朋友, yin ma足適合gah你作伴。」
老George腳步歪斜行去做伊e kangkue, a Stoner更加茫茫渺渺親像di陷眠, 伊上樓去檢查“Tom少爺”e衫仔櫥。 騎馬是伊上愛gorh ng望e代誌,而且騎馬ma edang避免面對gah Tom e舊友伴就近e觀察, 來發現伊是假仙e。 當zit位介入者 穿著一寡 適合騎馬e絨仔衫, 伊心內起疑著, 本尊e Tom到底是 做了什麼孽,引起 全村e人 攏討厭伊? 伊e腳 向地面踏一下, 發出pah ca e聲, 拍斷了伊e沉思。 同時, hit隻白斑馬仔 已經牽到門邊。
「我是馬頂e大尾乞食,」 Stoner心內想, 昨ng, 伊是一身破衫, di lam土中行路e 流放者, zitma伊卻騎馬 沿著zit條路走緊緊。
萬種考慮攏拋向頭殼後, 然後ho馬仔di一片發滿青草e路上慢慢仔走。 當伊來到一個拍開e入口, 伊調整速度, 方便ho兩台車進入廣場, 趕馬車e少年人 時間有夠長 來檢視伊, 當伊騎過去e時, 伊聽著 足激動e聲嗽 deh講: 「he是Tom Prike! 我vat伊, 伊又gorh di zia現身a?」
Di房間內跛腳行路e老歲仔人, hiah-nih-a靠近伊, 攏ho騙去a, 真明顯, di近距離內, hit兩個少年人e目睭 ma無外高明。
騎馬遊蕩當中, 伊看著真濟證據, edang確定 地方鄉親 並無ve記, ma無原諒 本尊eTom 過去所做e惡行。 若du著人, yin dor用生氣e面腔 看伊, 細聲談論, 互相振動手後曲 向伊dom頭,Bowker狗仔 安靜deh跟隨di伊身邊, 慢慢仔行, 好親像是 di zit個敵意e世界中 唯一友善e人。
當伊di邊仔門落馬e時陣, 伊目神閃見著樓頂e窗仔布後面,有一位消瘦e老婦人deh偷看伊, 伊明顯是 收養伊e阿姨。
享受豐湃料理e中晝飯e時, 伊有時間 詳細考慮著 家己zit款無平凡e情境。 離家出走四冬, 真正e Tom有可能di任何時陣轉來農場, 任何時間ma可能寄批來。 Iau有, 關係農場繼承e證明書, 假影e Tom 有可能ho人叫來簽字, 到hit當時, 真歹想像veh安怎面對。 或者是 有一位親成來訪問, a伊並無是 親像阿姨按呢, 採取m相du面e態度。 Zia e代誌攏有可能爆發出 歹名聲e底細。 另一面, 另一個選擇 dor是向曠闊e天走向汪洋大海e lam土小路。 不管安怎, 農場ganna提供伊 臨時e避難所,做穡是伊vat試過e kangkue之一, 伊edang做一寡穡頭, 來回報伊 無權利去接受 少爺身分e款待。
「暗頓來一盤冷豬肉好無?」 hit個一面冷酷表情e女使用人deh清理餐桌e時按呢問伊, 「或者你甲意食燒e?」
「燒豬肉加蔥頭」Stoner講。 Di伊一生中, he是一gai唯一快速下決心。 當伊點了暗頓e菜色了後, 伊知影家己 決定veh留落來。
Stoner對著di伊所有活動e房間, 伊嚴守著家己e範圍。 當伊參加農場e knagkue e時, di無收著命令進前, 伊ve主動去動手。 Di zit個寂靜、冷清e世界, ganna老George、 白花班e馬仔、gah Bowker e狗仔, 是伊e友伴。 伊從來mvat看過農場e女主人。有一gai, 當伊知影女主人去教堂做禮拜, 伊偷偷仔 走入去農舍e客廳, 想veh查明一寡伊所占用e身分, gah hit寡敗害名聲e作為, 看edang得著一寡鼻縫[線索]無。 有真濟相片掛di壁頂, ma有安di相框裡。 Mgorh伊想veh cue e 相片攏無di hia。 上尾後,伊看著一本相簿, di內底伊cue著伊veh 愛e物件。 一系列標註「Tom」e名, 一個穿奇怪古裝禮服e矮矮膨皮e三歲qin-a, 一個手中提著一隻蟋蟀仔e棍仔, 看起來大約十二歲e笨鈍査甫qin-a, 一個頭毛分開, 梳gah整齊英俊e十八歲少年家, 上尾後,一個看起來流露著大膽表情e少年人。 Stoner對zit張年紀上大e相片特別有興趣, 一絲仔dor無精差, gah伊有影真仝款。
Ui厚話e老歲仔人嘴內, 伊慢慢仔知影Tom所犯e過失, 致使別人對伊走避又gorh怨恨伊e原因。
「附近e人,對我e作為有什麼口風?」 有一工, 當yin ui圍籬外e田地行向厝內e時, 伊按呢問起。
老歲仔人一直deh搖頭。
「Yin恨你,恨你足深足深, zit點實在足遺憾, 相當遺憾。」
伊dor是無法度講出一寡ho人歡喜e話。
一個冰霜明顯e暗時, 離聖誕節iau有幾工, Stoner kia di水果園e角勢, edang看著闊闊e田園景觀。 庄仔內e人家厝, 散di四界, 厝內e燈火gah蠟條火光閃sih, 出現佳節來臨e 厚重氣氛。伊e後面dor是陰森寂靜e農舍。 內底, 從來無過 有人開嘴大笑,甚至連冤家e吵鬧聲 ma edang hong認定是 ho人愉快e。
當伊越過頭看著暗茫陰影e建築物頭前, hit條陰灰e行人巷e時, 門拍開, 老George雄狂行過來。 Stoner聽著老歲仔人 憂心緊張e聲音deh叫伊所借用e名, 伊隨dor知影 不幸e代誌發生a。Di伊心目中,平安hong滿意e避難所,liam當時發生了大變化,zit當陣恐驚伊愛hong趕出去a。
「Tom少爺,」老歲仔人e聲bit bit deh細聲講, 「你一定愛無聲無說ui zia逃出去幾工a。 Michael Leg[麥可˙雷格]伊轉來故鄉a, a伊咒誓只要去du著你, 一定veh ga你彈ho死。 真正e,伊會ga你彈死, 伊看起來殺氣沖天。 暗時你趕緊秘密逃亡吧! 只要一禮拜左右, 伊ve di zia停留幾工。」
「Mgorh我edang逃去什麼所在?」 Stoner感染著老歲仔人e驚惶, 伊ti-ti-tu-tu deh問。
「Zitma隨沿海岸逃走去Punchford[潘奇福特]hia,dor vih di hia, 等Michael離開了後, 我會騎hit隻白斑e馬仔去Punchford一位叫Green Dragon e所在, 當你看著馬仔停di馬棚e時陣, he dor是你edang倒轉e記號。」
「Mgorh--」Stoner猶deh躊躇。
「所費無問題,」 老歲仔人講: 「女主人ma認為你 上好按呢做, 伊ho我zia e。」
老歲仔人 提出 三金鎊gah一寡銀幣。
當日暗時, Stoner zah著老婦仁人ho伊e錢kng di納袋仔內,然後ui農舍e後門逃走, 伊感覺 實在無應該 按呢欺騙 老婦仁人。老George gah Bowkere狗, kia di hia恬恬目送伊離開埕斗。 伊無想講伊會gorh倒轉來, mgorh伊為hit兩個誠心等待著伊轉來e朋友感覺足後悔。 有一工, 可能真正e Tom會轉來, hia e單純e農庄村民會感覺驚異, 一位vat藏身di yin e門簷下e hit個旅客e身世。
對著家己e命運, 伊現主時ve感覺焦慮, 三金鎊di世間ganna是一點點仔用途nia, mgorh對一個用penny[便士]來計量財力e人來講,卻是一大筆財產。 前回, 當伊親像一個絕望e冒險者行di zit條小路e時, 幸運之神對伊特別照顧, 以後可能有機會cue著工作,重新開始, 伊愈行愈有精神。 漸漸伊恢復失去e身分, 又gorh ve記得假做替身ho伊帶來e操煩gah痛苦。 伊mvat操心去想有過深仇大恨e敵手, 因為過往hit段虛存e假身世e生命過程, 對伊已經無重要。 幾個月來, 伊頭一gai哼出輕快e歌聲。 Liam當時 垂落e橡樹陰影當中, 走出來一個qiah槍e人。 M免懷疑, 你ma臆會cuai伊是誰, di月光照cior下, 伊目睭充滿怨恨, 面色白cang cang,dor親像Stoner四界deh流浪e時仝款, 有時好、 有時vai e情況。 伊趕緊用力跳向小路邊e樹林內vih, mgorh he堅固e樹箍身正面ga擋leh。 命運之神di hit條小路等伊, a zit gai e歹運, 看起來伊是無法度逃脫la。


daiqi007 發表在 痞客邦 PIXNET 留言(0) 人氣()

台語小品文 時間倒退lu 賴皇甫
自從科技 愈來愈發達, 有人想講gam有一工咱會使ho時間倒退, 按呢真濟使人痛心e代誌 diorh ve發生啊, 雖然hiae代誌會使 ho後代好好a 思考gah 變作一個借鏡, 但是 對 因為hit項代誌 來受著影響e人 來講, 可能會勾起 in悲傷e記憶; 若是真正有 zit個技術, 我想 逐個人 攏會想veh使用伊; 畢竟 每一個人 攏有 使in感覺 無想veh 面對e回想, 只要有 zit項技術, diorh會使轉去 代誌e根源 閣改變伊。
Di代誌發生進前, 定定攏會有一寡前兆, 而且是有一連串e原因, 到上尾仔ziah 會爆發大錯, 所以一旦有時光倒流e能力, 我ma會想veh轉去, 但是世界hong創造gah真公平, 無人有zit款能力, ma無人有法度發明zit項技術, 若是有zit項技術, 按呢世界就無安靜e一工啊, 因為 逐個人 攏想veh 轉去 使家己後悔e hit工, 到底是ai 轉去佗一工le, 這ai ho 啥人決定, 無人知影, 我想應該 ma無人敢出來 承擔 zit個責任, 而且為著 啥物代誌使用 ma m知影 ai按怎做決定, 恐驚 時間倒退e技術 只是 ho世界變gah 更加亂操操nia nia。
好佳哉di 世界上 無人會使做到 zit件代誌, diorh是因為做未到, ziah 有hiah 濟人想講若是有會外好, 但是無想著ia 是真正有, ziah 是 麻煩e開始。
雖然m知影 以後 科技 會進步到 啥程度, 但暗之中 應該有 注定zit種技術 無啥可能 發明出來, 因為 世界ma無像 電腦hiah簡單, 存一個檔案diorh會使 留到以後, 電腦若害去 diorh ui進前存e檔案 去找 害去e物件 來修理, 世界 無法度按呢做, 只有靠人 好好a維持 ziah會使 ho地球永遠保持。

daiqi007 發表在 痞客邦 PIXNET 留言(0) 人氣()

台語小品文 原諒 梁凱澤

這世間有六十憶 e 人口, edang原諒別人e 過錯gorh有qua ze人? 原諒 看來 真簡單, 但是ma 足困難。
原諒 其實是 赦免ga 己, an zuann 講? Gam講 m原諒別人, 反倒 變成仇人? 原諒別人, 放下仇恨, ga 己e心 ma vue一直鎖diau e, 心ma vue為diorh 歹代誌 想siunn ze, 傷腦筋, 你講 是m是? 原諒別人 其實是 赦免ga 己, 為ga 己好。

為什麼 vue原諒別人? 是為diorh ga 己有器度, 阿是 慈悲為懷? 每一個人 攏是會 犯錯, 連神仙 攏會失手, 何kong是 普通人? 每一個 犯錯者 攏 希vang人 hit道原諒e光edang cua伊倒轉去 正途。 反背gah原諒e 作者, gah伊e前夫 打官司, 掩kam ga己e病情, 到最後 勝訴e關鍵 是 選擇原諒。 di 原諒中, 體悟e道理, 比失去e物件 閣卡珍貴。 為什麼vue原諒別人?是為diorh體悟e道理, 是為diorh 犯錯e人, 是為diorh ga己。
俗語 講gah足 好:人情 留一suann, 日後 好相看。 對一個 罪不可赦e人 vueh按怎原諒, 我講是-- 原諒 其實是 赦免ga己。

daiqi007 發表在 痞客邦 PIXNET 留言(0) 人氣()