目前日期文章:201101 (2)

瀏覽方式: 標題列表 簡短摘要
我e阿媽 台語五百字散文
林雯婷

我e台語是自細漢gah阿媽學e,所以一講到台語我就會想著伊。足久以前,我vat用華語寫過zit篇伊e故事,按怎寫攏怪怪,畢竟阿媽zit世人攏是用台語咧過,用華語寫免講嘛寫ve到位。如今,我有機會用台語寫文章,我決定veh重寫一篇關係我e阿媽e故事。
我e阿媽已經六十幾歲a,嘴角總是帶著笑容,ho人足親切e感覺。不過伊e故事,聽起來suah是ziah nih a ho人心酸。阿媽細漢e時陣,yin兜e經濟狀況並無好,m gorh,伊有一個疼愛子女e阿叔,鼓勵伊去讀冊。hit當陣大家攏無看好查某人去讀冊,m知影阿媽食偌濟苦,kah e sai得著讀冊e權利。
國小畢業了後,阿媽diohr離開了自細漢大漢e田庄,去都市cue頭路。阿媽去e所在是一間紡織工場,成品是zit ma足少看著 e黃麻布袋。he是一個真辛苦e kang kue,逐工攏有tinn ve了e黃麻布袋。十四、五歲e年紀應該是愛無煩無腦,m gorh阿媽suah愛幫忙厝內底趁錢。
Di工場dua兩年qua,阿媽diorh轉去厝內a。hit時陣,厝內除了阿媽e阿爸以外,無其他e查甫人,阿媽e阿兄gah小弟攏已經去外地cue 頭路 a。因為厝內e查甫人無夠濟,阿媽只好去田lin鬥sann工,m gorh阿媽竟然無嫌辛苦,顛倒笑咧講「誰講查某人無法度去田lin做穡e?」
Di厝lin鬥sann工e hit段日子,改變了阿媽e一生。hit e 時陣阿媽di厝內上大e kang kue dior是幫忙田lin e 一寡代誌。m gorh di冬天m免做穡e時陣,腳步停ve落來e伊,一個人去屏東,開始學做棉被。ma是因為按呢,阿媽日後ziah edang以做手工棉被顧腹肚。
Dua di厝lin四、五冬,阿媽也已經到veh做大人結婚e年紀a,阿媽是相親熟識對象e,阿公是伊頭一個e對象。di結婚進前,yin兩個人ganna見過兩gai面nia nia,第一gai是相親hit工,閣來diorh是阿公去厝lin講親成e時陣a。雖然講結婚e對象是父母cue e,m gorh ma是等gah阿媽dim頭zia guann定zit門婚事。結婚後無外久,阿公想veh出外拍拼家己e事業,阿媽dior hdue伊去一個完全生分e城市,度過伊e大半世人。
阿公gah阿媽選擇以手工棉被創業,來到異鄉e yin,一開始過著非常辛苦e生活。手工棉被是一個無簡單e kang kue,成本siunn guan,害著價數壓ve落來,所以大部分e人攏會選擇機器做e棉被。hit當陣,yin無熟識幾個在地人,生意攏是好朋友介紹來e。diorh算講有ziann好e工夫,無人客無生意無宣傳,diorh等是啥物攏無。姑不二終,阿媽只好牽著自輪車,載著沉重e棉被貨樣,一間厝一間厝dau dau a推銷。
我聽阿媽講,當時棉被e需要量足少,yin熟識e人ma足少,棉被閣無容易歹去。多數e人客攏是來自老一輩e人,嫁娶時定做棉被e習慣。di彰化e hit幾冬,日子一直是真painn過e,生意得著e利純dann du好有夠食飯nia nia。
以後e hit幾冬,因為台灣e經濟復活,厝內e狀況變gah卡寬裕。無過外久阿媽diorh生個e qin- a,組織一個六個人e大家庭,過著幸福e日子。m gorh di qin a漸漸大漢了後,阿媽e人生又閣出現了轉折。zit gai是阿公破病a,阿公e病無輕,是腦瘤,不過幸運e是,是一粒良性e腦瘤。zit場病ho阿公di病院dua個外月,diorh算講出院a,ma愛固定時間dng去病院做復健。
阿公dua院e hit段日子,阿媽一個人擔起厝內所有e代誌,為著醫藥費,伊放下身段ga身軀邊e人借錢;為著e dang好好照顧阿公,阿媽ga qin a委託ho附近e親成朋友。一個查某人,愛兼顧生活gah照顧子女,實在是足辛苦。m gorh,阿媽ma是堅強向前行。
大約是di阿媽五十五歲hit冬,阿公離開a。減一個人做伴e阿媽,決定搬倒轉去台南e祖厝,守護zit 個陪dior阿公大漢e所在,ma繼續做著已經漸漸失傳e工夫─手工棉被。摸著阿媽一針一線tinn出來e棉被,心內e感動是無法度用語言來形容e。阿媽e故事iah閣有真濟,m是三工、五工就會sai寫e完e。伊e故事,我願意用一世人dau dau a幫伊寫,一字一字寫出伊e人生gah伊e堅強。

daiqi007 發表在 痞客邦 PIXNET 留言(0) 人氣()

寒冬中e收成— ho 台語世界小說選e 課程 班上e 話語
張春凰

Dear all:
台語世界小說選e 課程 已經結束a, 咱 來做一個檢討。
Zit個課程 透過 台語世界小說選e 訓練, 提供同學 di式微e 母語環境中, 接觸著 基礎e 聽、 講、 讀、 寫e 機會。
期中考前e訓練 是 注重di基礎e 拼音教程gah練習, 藉著 台語雙拼教學法 授課gah設計ho同學 去教 一個初學者e習題, ho lin 體驗 教學相長e 浸透式學習法, zit部份 同學e回應 攏真積極。
前半段 選讀e文章 攏是 台灣本土e 台語文學, 主要 di閱讀e訓練, 全文注音資料 為著veh 引導 聽、 講、 讀e能力, 加上 期中考e 活動, 來評詁 學習e效果。
後半段, 課程進入 世界性e作家, 透過 世界經典名作, 咱來開啟 目光, 共同欣賞 人類共同e 文化資產, 以 台文形式 了解 台語文e 美質gah舞台, 所以 除了小說e賞析提問 題目 咱前後有:

為何veh讀經典?
為何veh 世界經典台譯?
並 簡述 你e台譯經驗。
簡述台語話劇 分組演出e經驗gah意義。

做為 期尾考e課題, zia-e題目 為加強lin一學期來 辛苦學習, 用心拍拚 展現e成果 有一個 檢討 gah 心聲表達e 交流。
同學再度 體悟著 聽講讀寫e 全程堅實學習e 意思。 尤其 di經過 台譯作業e 訓練 了後, 班上e同學 有 33/34位 可以流暢e 用母語 思考gah回答 問題, 可貴e是 yine拼音 攏有 一定e水準, di ziah短e時間內, 這可講是 台語文教學e 一個好現象。
真濟同學 攏表示 yin 對台譯zit份作業 起初是 辛苦e 處女作, 到尾仔愈寫愈順 愈有成就感, 酸甜苦甘 兼顧, 只要按照 老師 所提供e 資料gah步數, 配合 學生e 學習經驗、 成長背景 gah 動機, 其實di期中考e時陣 已經有 真濟學生 提前進入 期尾 所veh要求e 表現。
Zit回批改 期尾考e簡答題, 可看著 每一個學生 攏認真 deh 作答, 認真當中 閣有誠意, m是ganna veh求分數nia, 因為 我知影 di監考當中, 同學攏 沈di嚴肅e思考 當中, 尤其看著 考卷e答題, 更加 對一學期來e 用心態度, 老師可看著 同學對zit門課e 珍惜gah敬重, 師生雙方 攏有 真大e鼓勵, 期待zit份 好e 互動、 經驗、 成果 深入學生e心中 加強學習e 能量gah得取, ma可成為 人生e 一寡因素, 一世人 攏有zit款 訓練過e 氣質。
Di學習e各種 考試gah作業 當中, 期尾考 再次用essaye方式 測驗, 師生深切e把握 好酒沈甕底e 本事盡展, 這當然是 全新版e 鯉魚躍龍門, 因為前後 咱盡量用 浸透式e 學習機會。
有同學講 di學習 zit門課內底 時常ka電話 轉去gah爸母 ham 阿公、 阿媽講話 請教 台語問題, 其中 序大人 不免有 甜蜜e煩, 重要e是 老一輩e人 因為 受著珍惜 更加 受著鼓勵, 這攏是 親情、 家庭倫理e 語言文化 擴大, 各位同學 學期結束 了後 一段時間 將是歇寒, 寒假中 轉去厝內 ga台語 掛di嘴裡 把握 使用機會, ma 斟酌聽 咱e 序大人 講話, 聽yin 生活e智慧。
多謝 同學ga我講 yin zit組deh演戲前e 排演當中, 透早9點、 暗時10點e時段 逐個 攏真a-sa-li 無第二句話 diorh來赴約, zit份 同窗友誼, 是 演戲 合作gah體貼e 另外收穫。
感謝di ziah寒、 冷濕e 天氣當中, lin送我e zit份 寶貴e禮物, 老師 會 因為按呢, ma受著 真大e鼓勵。
各位 珍重!
(20110110)

daiqi007 發表在 痞客邦 PIXNET 留言(1) 人氣()