序:
台譯《斷頭谷傳奇》、《李伯大夢》gah《時間機器》e後半部
王睿農

真歡喜有zit個難得e機會edang接觸著台文翻譯。當初是因為選擇春凰老師e台文課,發現台文經過春凰老師趣味有料e發揮,m na是咱一般e對話,更加是一門真有特色e藝術。作一個讀理工科e學生,真濟人可能會對我投入翻譯感覺意外,無的確ma無認同。Ia mgorh自細漢我e父母dor會gah我講台語,台語真自然dor是我e母語,對台文翻譯有一種講ve出來e親切。Di翻譯過程中,我真感謝我e媽媽,伊會提醒我一寡台語優美e使用方法,一直ga我鼓勵,支持我做我想veh做e代誌。

這是我頭一擺作翻譯,一個人獨立完成《斷頭谷傳奇》、《李伯大夢》gah《時間機器》e後半部。完成了後e歡喜ho我感覺過程e辛苦攏放ve記a。我所翻譯ezit三部作品攏真有特色,會吸引人想veh一直看落去。

《斷頭谷傳奇》主要是leh講一個di美國田庄通人知e神秘e故事,景物e描寫真濟是作者真特別e手法。Ui故事當中edang ho人感受著樸實e作穡人yine生活環境gah生活習慣,故事e主要人物gah「無頭騎士」對抗e過程ma真精采。雖然故事中對話無濟,看e人愛閣卡用心ziah edang體會內容,mgorh讀zit個故事m是ganna文字,閣edang看著畫面,ho咱讀e人好親像入去3D電影內底,gah故事e進行作伙驚惶、緊張。

《李伯大夢》是世界有名e故事。李伯因為食酒醉睏落深眠,一睏二十冬。Ziah-nih稀奇e代誌、二十冬環境人事e改變,攏ho李伯gah生活di伊四箍笠仔e人m知影veh安怎。李伯di夢中所看著e是一場夢?Ia是伊確實看著gah咱人無仝款e人類?故事當中對人物e特性做了真深入e描寫,特別是主角李伯gah yin某天差地遠e個性ho zit個故事閣卡趣味。李伯gah伊e狗沃夫永遠ve變卦e感情,ho我zit個愛狗e人閣卡珍惜我gah我e狗逗陣e時間。

《時間機器》是一部行di時代頭前e科學幻想小說。生長di 19世紀e作者竟然edang寫出咱所生活e21世紀gah閣卡遙遠e幾落千萬年以後未來e景象,zit款澎湃e夢想,m是一般人有e。Zit個故事真清楚表達作者對咱人破壞環境感覺著急,一般人看ve著e可能,作者攏替咱想著a。Di未來e世界,咱人變gah閣卡野蠻,生活當中攏是驚惶,是什麼原因造成zit款e結局?時間機器是真濟人空思夢想想veh得著e物件,mgorh作者想veh ho逐家知影,過去無法度改變,只有改變zit mae錯誤ziah edang得著未來e幸福。

三篇故事攏leh講咱人真真假假e幻想,veh相信ia是m相信dor看每一個人家己。我di翻譯過程中得著真濟快樂,ui無仝款e角度去欣賞作者想veh表達e意思。Di了解zit三個故事了後,我想veh用「李伯」作夢e心情去享受「斷頭谷」美麗e田庄,並且使用「時間機器」e科技來體會無仝款e人生。

daiqi007 發表在 痞客邦 PIXNET 留言(0) 人氣()