daiqi007

序 春凰ｅ“冬節圓”

王淑芬

當 春凰請我 為伊ｅ 新冊文集-- 「冬節圓」寫序， 我確實是 ziah受疼愛、心肝有diuh驚ｅ感覺， 因為 在情誼、 在寫作ｅ 領域 裡， 阮攏m是 「第一等親」ｅ關係。 雖是按呢， 我想 阮是 足有緣ｅ人， 阮攏 di第一次ｅ 會面 裡， 足歡喜 熟識對方， 阮ma di 彼此無仝ｅ 寫作風格 裡， 互相欣賞； 像兩道 來自東西 不無仝方向ｅ 光， 阮cue著 心靈ｅ火彩。
我 di2009年十一月 應伊ｅ邀請 去參觀 伊 di清華大學ｅ 台文課， he是 我 第一次 見著伊 gah 伊ｅ先生 江永進教授。 Yin二人用 上熱情ｅ心 款待 我這個遠客。 老實講， di見著 yin進前， 我對 台文ｅ知識 親像是「文盲」， 我雖罔 ui細漢 講台語， 但是 我 gah 真濟傳統ｅ 台灣人 一樣， 習慣用 「華文」 寫文章、 發表意見， 我甚至 m知影 台文ｅ 世界 裡， 閣有 各派無仝ｅ 表達方式。
Mgorh， di參觀了 伊ｅ課 後， 又gah伊 ham伊 台文工具 幕後推手ｅ 翁婿聊過 後， 我出自內心 veh 足誠懇ｅ 表達 我對yin 翁仔某兩人ｅ 尊敬。 江教授講起 溫柔可愛ｅ 牽手 時， 滿心ｅ 推崇， 尤其 對 春凰ｅ 寫作天分 讚賞有cun； a 春凰講起 江教授 用 統計學方法 自創ｅ「台語拼音 雙拼法」 時， he 敬重ｅ神情， ho我對 zit一對夫婦 更有 進一程ｅ 欽羨， yin真是 一對 為 台語文 研究gah推行， 付出 上珍貴精神ｅ 天使， yin 甚至決定 di厝裡 mai有 電視， 只是 逐工 浸透 di台語文ｅ 雕琢世界， yin互相 di綿綿無停ｅ 台文學術領域 gah 寫作研究 裡， 找著 人生ｅ樂趣。
我足歡喜 成做 春凰 zit本新冊ｅ 搶先讀者， 我用 無啥精通ｅ 台文理解能力， 食力閣認真ｅ 讀伊 zit12篇小說， 足感佩 於 伊 觀察細膩 gah 充滿 鄉土文思ｅ 寫作方式。 伊 di主題文「冬節圓」裡， 寫著 水木婆 zit個 傳統ｅ 台灣婦仁人， ui 晟養家己ｅ 八個子女 開始， 親像 diorh註定了 一世人ｅ 辛勞， 但是 伊好像 ma足認命 於 按呢ｅ人生， diorh像足濟 老一輩ｅ 台灣查某人， 伊用 虔誠ｅ心 敬神， 祈求神明 ho 伊 gah 厝內人平安、 順利ｅ 日子， 伊用 勤儉ｅ 生活習慣 gah 拍拚ｅ 工作精神， 來顯示 伊對 家gah厝內大細ｅ 愛， 即使到了 囝孫滿堂、 可以享福ｅ 老年歲月 裡， 伊ｅ心中， 仝款 只有定定ｅ 對 家中大細gah神明 無怨悔ｅ 付出。 Di 水木公 去世時， 伊感心ｅ 捧送 一碗 伊愛食ｅ 鹹湯圓， 為 水木公ｅ一生， 舖劃上 圓滿ｅ 休止符， 也用 燒燒燒ｅ 一碗圓仔， 解讀 伊家己 對 家人ｅ 勞苦ham疼愛。 Zit款 看起來 平凡ｅ 台灣女性ｅ 人生， 卻ho 咱讀了 心神感動， 因為伊 ho咱看著 家己ｅ親人、 鼻著 團圓瞑時， 燒溫燒溫ｅ 圓仔湯味。
讀 春凰ｅ 新作， ma ho我 想著 我qin-a時代ｅ 生活， 充滿了 鄉土味， 伊文章裡 hia-ｅ人物， diorh像 咱 di台灣ｅ 真濟角落 看著ｅ 一般人， 平凡 但卻有著 芬芳入鼻ｅ 本土氣息， 活靈靈ｅ di文字間 跳來跳去。 「大地為家」ｅ 「旺伯」「旺姆」， 「歡喜婆」裡 將 一禮拜七工 分類ｅ 古錐阿婆， 攏好像 咱身邊ｅ人， 雖然平凡 卻又是 hit-nih-a親切， 讀了 嘴角 攏會 自然微微仔笑。 即使寫 有學問ｅ 哲學家， 春凰 攏ho讀者 輕鬆ｅ ga伊ｅ妙筆， 行踏 di充滿樂趣ｅ 時空 裡， 伊ｅ 「電腦邊ｅ哲學家」， 大概也是 yin夫婦 生活ｅ寫照 吧！
春凰 不但 寫散文， 伊也是 一個詩人， dizit本 近似小說ｅ 敘事散文集 裡， 也gah讀者 分享 伊ｅ詩作。 就像伊 di才出版ｅ 新冊「旅行心詩」裡 寫ｅ： 「詩心 親像 一款強烈ｅ 戀愛感覺， 來ｅ時 跳動ｅ心律， 自然 無法度停止， 擋攏擋vediau。」， 我想， 伊也是用 戀愛hit款ｅ 心情， 以 細膩ｅ筆 deh抒發 zit本《冬節圓》。
因為 愛為伊寫序， 我有幸 瀏覽了 春凰 其他ｅ作品， 對 伊 漂撇ｅ 生產力 驚奇閣呵咾， ui1994年 伊出版 第一本散文集「青春ｅ 路途─我ｅ生活台文」到現主時， dit-veh二十冬ｅ 台文生活 裡， 伊ｅ文思 像 充沛ｅ泉水， 源源湧現 di伊ｅ冊 裡， 隨意舉例， 伊ｅ冊 「雞啼」、 「夜空流星雨」、 「台語文學評論集」、 「台語詩集」 閣有 旅行各地ｅ 「三姊妹看世界」 等等作品， ho我 真心佩服 伊ｅ創作力， 又看著伊 無辭勞苦ｅ 參與翻譯 多本世界名著， 譬如 狄更司ｅ 「聖誕鐘聲」、 芥川龍之介ｅ小說、 清少納言ｅ 「枕草子」等等， 為 台文教育 準備 世界各地材料ｅ 熱心， 攏ho我 感佩 伊hit份 無停止ｅ 熱誠gah精力。
作為一個 生長di台灣， 旅居國外ｅ 文字工作者， 我一直關心 我母國家園裡ｅ 文化發展， 我外呢a寄望 看著 我親愛ｅ故鄉， 行出家己ｅ 文化之路。 看著 春凰 gah 伊ｅ夫婿永進， 認真ｅ deh為 咱ｅ母親-- 台灣ｅ語文， 耕耘出家己ｅ天地， 我真誠ｅ 感激也歡喜， 我期盼見著 伊ｅ 真濟本著作 gah 研究成果， di 台文ｅ園地 裡， ia落種子、 播種花苗， di我 所愛ｅ 家鄉土地 上 開花、 結果。
我veh多謝 春凰 溫馨感人ｅ 寫作， 也多謝 永進 為 台文學術研究ｅ貢獻， 祝福lin！

( 2010.1月 寫di Atlanta. Georgia ， ChunHong台譯)

搭 時代ｅ筆 飛seh (原登 台文前線 第15期)


張春凰

時代ｅ筆 引導 自由心思 飛行， 不時不陣， 我坐著 zit台 幻化ｅ飛行船， 到 天涯海角 去旅行， di 街頭巷尾 看雜藝， ma di古文明ｅ 所在， 去尋cue 傳說中 古老ｅ 奧義之書。
長久以來， 我決心 veh寫 一本冊， 冊名 叫做《筆》。
思路 是 沿著 各式各樣ｅ 符碼， 想veh 探討ｅ 祕密。
我去閱讀 有關 世界字母ｅ 故事、 文字ｅ故事、 印刷術ｅ故事， 我去搜尋 筆ｅ歷史、 紙ｅ發明，到當今 身處di 網際網路ｅ 天下。
Logos 是 人類使用 口才本能 講述ｅ言談， 保存著 記憶承傳ｅ 風格， 呈現 所謂ｅ 原始部落ｅ 智慧意味， 經過 拍索仔 做記號、 di洞穴石壁 畫圖做記錄、 di龜殼 刻圖紋、 di泥板 印符號， 人類 千方百計 用 樹枝、 石頭、 gah尖刀 di 沙粒頂面 寫字， di 方尖碑頂面 記述 國家大事。
筆ｅ 原始身份 gah 帝王、 貴族、 士紳、 神職、 書記、 歷史學家 配批， 是一種 特殊ｅ背景， 有身份ｅ人， ga 咱ｅ嘴、 心思、 理智、 巧手， 融合做 金頭腦ｅ寶藏， yin 掌握著 書寫ｅ 權勢gah貴氣。
祭司gah童乩 透過特殊ｅ 職務， 傳送天機， 接觸著 普羅大眾 無ｅ 神通技藝， 種種ｅ規矩、預言 gah 警示， 卜掛 更加牽連著 筆ｅ魔力。
人民認定 筆 來自勢力 gorh有 神聖ｅ任務。
為著 一支筆， 和平ｅ使者， 拋棄了劍， 年久月深， 筆是文雅、 才子ｅ代名詞， 西方 有 一句話語：“筆勝過劍”(The pen is mightier than the sword.)。
欣羨筆士ｅ 風流gah 威猛， 貴族、 專能ｅ 筆， 一步一步 進入 個人化，毛筆、 鉛筆、 色筆、 原子筆、 電子感應筆……， 突破ganna用 手筆表示ｅ 筆路， 寫情批ｅ 時陣， ve閣驚 字體、 字形， 影響著個人 筆字ｅ風格， 致使 跳過 其他才華ｅ 排斥。
有了筆， 筆ｅ書寫 延伸著 記憶ｅ體系， 人ve閣去 為著 失落ｅ頭神，pi-pi-cuah。
有了筆， 知識m是 王族特權 獨佔， 日頭腳 民主ｅ素養 漸漸成形， 布衣平民 有了歡笑， 階級 無再hiah hiaubai 。
為什麼 古老ｅ 希臘羅馬文化 di歐洲 烏暗時代 消失無形， 為什麼 南美州ｅ文明 Inca、 Maya、 Aztec消失 無影， 透過筆 留落來ｅ 殘餘證據， 透過翻譯， 使得 文藝復興 再領風騷， 透過筆ｅ 重整， 世人看見 失落ｅ文明。
筆引發 思維ｅ傳播， 丈量世界。
過去ｅ電報 傳達著 互動ｅ訊息， 現在ｅMSN 即時聯絡， di地球ｅ 另一端， 你享有影像 親像 面對面ｅ 談論， 親像 di彈鋼琴ｅ 風姿， 指尖 按落筆ｅ關鍵， 用 十支指尖 彈織出 歌詩。
長久以來， 我珍愛 身邊ｅ人， 伊為我、 為逐個 做一支奇妙ｅ 現代筆—台音輸入法， 伊看我 di齒盤 倒彈ｅ癆傷， 伊 用珍貴ｅ 青春gah智力， 閣deh拍拚 突破 語音辨識ｅ 機密。
筆 佈滿 我ｅ細胞 ， 我驚異、 ma讚歎， 我呵咾， 我力行， 長年短月， zit支 漫妙之筆， 浸透著 我ｅ生活。
傷愁ｅ時陣， zit支筆 點著 我ｅ光， 歡喜ｅ時刻 zit支筆 替我記事， 為日後 年老ｅ衰弱， 鋪排一塊 小小樂園。 聽講 人老ｅ時 攏記著 古早ｅ代誌， 我期待 zit寡 古早ｅ代誌， m是 孩童時代 ganna gah 親密ｅ小妹仔 dak嘴nia， 這應該是 家己ｅ 故事核心， 家己鋪排 靈魂ｅ所在， 快樂qin-a時代ｅ 放蕩， 隨心滋養。
我kia di當代 時間坐標ｅ 盡bong， 坐di 筆ｅ慧星 seh 來seh去， 用一世人ｅ 精力， 來看待 zit支心靈ｅ 筆舌。 時時刻刻， ga 感內ｅ事物， 運用 zit支時代ｅ 筆尖， 透過 台音輸入法， 我ｅ心、 左右手指， 靈活deh移動， 親像 魂遊按呢， 一字、 一字、 一句、 一句、 一篇、 一篇、 一本、 一本 生產出來。
是啊！ 我將有 尾站ｅ時陣， 我 為何悲傷？ 是啊！ 凡俗之中， 我離ve開 憂悶gah自大， 因為 透過zit支筆， 伊 安搭著我、 檢視著 幼稚gah憤怒ｅ 情緒， ho我反省、 ho我平穩， ho我體悟。
到zitma， 我仝款 無ve記得 veh寫一本 叫做《筆》ｅ冊， 只是 di 伊世出進前， 我ｅ 跳躍之心， di 心智ｅ平洋 漫步或走跳。
我為家己 無童話ｅ 童年補白， he是 成就《世界童話360》ｅ 巡禮。
寫gah讀 永遠deh 循化， 為何 咱veh 讀經典？ 筆ｅ負擔、 筆ｅ責任、筆ｅ任務， 引領探索 跨世紀、 跨時空ｅ《台文1001譯》。
筆 圓滿 作家gah靈魂ｅ 對話。
繁華都會ｅ 櫥窗， 展著流行ｅ 花花世界， 會引誘我， 跳脫現實， 我夢想ga家己 打扮做 一位女王， 可是 zia-ｅsiann神， 終歸尾 攏收拾di 一支筆下。
Mai ga我講 物件 有外好食 du外好食， 花有 外芬芳？ 因為 長久以來 我閣deh熱戀ui筆 所流露ｅ情分， 一直到 我無力掌握ｅ 時陣， ho我 來去畫圖！ he是 另外一個 線條ｅ書寫， ho我 來去跳舞！ he是 姿態線條ｅ 書寫， ho我 來去講故！ he是 聲波線條ｅ 書寫…… 所有 di筆 所延伸ｅ 夢境， ho我 lak著筆ｅ 魂髓脫化。
做伙來 用 時代ｅ筆， 改變世界！
(20090416)