daiqi007

印地安故事集-2 拍獵人gah禿鷹


DCH編著


拍獵人歸工守di山中 deh等候鹿出現， mgorh伊無成功， 一直到最後一滴力ma用盡a， ziah坐di柴箍頂面歇睏， ma deh想看 伊閣來veh按怎。 一隻常帶著神奇魔力ｅ禿鷹， ui頭殼頂飛來對伊講：問伊為何事操煩。
拍獵人ga代誌ｅ經過講ho禿鷹聽。 禿鷹ga拍獵人講， 越過guanguanｅ山脊， hia有真濟鹿， mgorh你需要飛guanguan ziah可看著鹿群。 禿鷹閣建議拍獵人飛起空中確認， mgorh拍獵人無可能di天頂飛。
禿鷹 閣提出 一個互相交換身份ｅ撇步， 禿鷹變做拍獵人、 拍獵人變做禿鷹。
拍獵人同意， 禿鷹外形是拍獵人 轉去拍獵人ｅ厝， ho厝內ｅ某看， 停一下仔 閣ga查某人講 伊有代誌需要處理，愛離開。
Di zit段時間 拍獵人變做禿鷹， 飛到有鹿ｅ山谷， 照兩個約束轉來原來ｅ所在， 形體暫時是禿鷹ｅ拍獵人先到， 然後禿鷹再出現。 兩人換回原有角色。
自按呢， 拍獵人逐gai去獵鹿 攏有掠著幾隻， he是 伊所需要ｅ量。

冬ｅ 苦澀gah想望
-- 敬悼 楊教授 克峻先生

雄雄ｅ一陣刺激
刺入去 敬愛你ｅ 親友弟兄
九降風ｅ哮叫 是 阮心酸ｅ代言

溫文紳士 深思觀照
zit塊土地ｅ走向
憂愁ｅ國 ho你 心肝結歸球
操煩ｅ心思 網束 你ｅ出口

無你ｅ人世間
滴滴珠淚 攏是 阮m甘ｅ苦汁

無你ｅ人世間
點點氣力 攏是 咱做伙拍拚ｅ想望
因為 你替阮 擔起苦澀 ho阮繼續向前ｅ氣魄

(江永進 張春凰 2011 1128 清大東院)

第九章 教學實務


教學實務-- 如何進行 生命書寫 張春凰
取自 《閱讀gah書寫》

一. Di 教習中 教gah學 做伙成長
閱讀gah書寫 zit門課 di 靜宜大學 自 2009年秋季 開始 必修 一學年， 主題注重 di生命教育， 上下期 分別 以 個人 生命書寫、 創意履歷表 做重心。
配合 阮班上ｅ 企業管理科系 背景， 一開始 ho yin 有 自主ｅ見解， 先嚴肅 面對 “為什麼veh 閱讀” ｅ 開張戲齣， 教師表明 一定會挑選 精彩部份 kng-di 本冊內底， 請同學 mai應付-- 白紙寫烏字ｅ 證據， ma重視 yinｅ參與感 di 期尾 邀請yin 簽名， 一步一腳印 為 教習圓滿 留著 珍貴ｅ回憶。
上學期 師生 照 整體課程規劃， 以 《流動》文選 做底， 做 相關搭配， 書寫文章ｅ 部份 總共有八篇， 另外 以 文章 做 隨堂閱讀 註記gah測驗。
Di本章， 咱 換一個角度 先來 講書寫， 再來 談論 閱讀， 配合 金字塔邏輯 圖解原理 gah PowerPoint大綱 運用， 舉例講述。
親像 中小學ｅ 作文課 按呢， 出題目、 交作業、 批改、 檢討互動。 學期中 可發現 有幾個學生 文才真好， 到了期尾 1500-3000字ｅ 生命書寫， 個人 有個人ｅ 故事， 看gah有感動、 有歡喜， 有人 勇敢反省、 有人 珍惜生命、 有人veh 去冒險、 有人 去菜市仔 幫助阿媽 賣冬節圓仔……， 師生如 一家人， 有時 分ve 清楚 你是deh 教課 或者是 做心理輔導師 或 朋友序大。
1. 關係 生命書寫
到學期尾， diorh是 好酒沈甕底ｅ 總收割期， 因為 校方ｅ網路 為 逐個同學 留下一欄 個人書寫ｅ生命車頭， 教師針對 一學期ｅ 讀寫， 做一個 總結引導-- “生命書寫”～～ 如何達到 1500-3000字 ， 以下是 分ho 學生ｅ講義(20091210)：
同學di七篇ｅ寫作當中， 有四篇心得： 油蔴菜籽、 童年往事、 謝智謀教授ｅ 演講、 電影 超人特攻隊；由zia 可看出lin 對 文章閱讀、 看電影ｅ 知覺、 聽話 掠重點ｅ能力 兼顧 書寫表達ｅ能力；三篇創作 為什麼veh閱讀、 童年中秋、 情書 是 檢視逐個ｅ 創作能力。 Zit學期 上尾後ｅ 重頭戲 di 佔百分40%ｅ 期尾傳送 “E學園”ｅ 〈生命書寫〉， 需要寫1500-3000字。 一學期來 lin 所寫ｅ 大約攏 di幾百字 到 千外字當中， zitma 一下veh 跳到3000字左右， 愛有一寡 撇步：

1.1 veh按怎構思？
a. “生命書寫” 簡單講 意思是 生命故事、 成長故事；
b. 針對題目 做分段 咱可以 用年代 分出 幼年、 童年、 青少年、 青年ｅ大綱；
c. di每一段 成長過程 有什麼代誌、 什麼人物 ( 老師、 朋友、 親人、 特殊人物ｅ傳記 或 冊中ｅ 一句話 ) ho咱印象深刻、 感動、 快樂、 痛苦、 打擊、 挫折 等， 改變咱ｅ 行為或事件 ho咱一生難忘， 來回想、 省思 zia-ｅ 過往gah意義；

1.2 veh 如何落筆？
a. 針對 咱veh寫ｅ人、 事、 物 分做 小副題， 按呢 卡容易 有一條 連接線， 比如 範文 簡媜ｅ〈漁父〉 gah 鍾文音ｅ 〈我ｅ天可汗〉 ， 文中運行 分做 幾個小部份， 以 時間序列 做軸， 再 加添細節、 再以 文學ｅ語言 支持理路 展開 情感美感ｅ 大體；
b. 咱ma edang 採取 〈油蔴菜籽〉 、 〈童年往事〉 自傳式ｅ 一路寫起來， 或 採取〈寂寞ｅ十七歲〉 集中 di十七歲ｅ 心事gah困境 表白；

1.3任何 活動 攏可取材
咱讀過 什麼冊、 聽過 什麼演講、 看過 什麼電影、 參加過 什麼 活動/比賽、 去過 什麼所在 旅遊 ho你 眼界大開， ho你得著 啟發或獎賞、 ho你了解 人生ｅ價值，任何 活動 攏是 取材ｅ對象， 咱ma會使 先寫了ziah來取題目；

1.4夢想 ma 是 生命書寫
咱決定veh做什麼 事業 、 行什麼路、 或 繼承家業， 有什麼 期待、 抱負、 願景gah責任 需要 精密ｅ計劃？ 夢想 咱ｅ未來 ， 引領咱ｅ 想像力 gah 創造力；

1.5 達到1500-3000字ｅ 運筆能力
有了 文章ｅ 段落架構， 再di每一段ｅ份量 文字ｅ重量gah質量 做撙節， 如 人ｅ 個性gah行為 有 什麼特徵 veh強調、 凸顯， 節奏 如何安排， 氣氛veh如何 渲染加料， 達到1500-3000字ｅ運筆能力；

1.6 落筆實踐
穩定型ｅ學生 請你量早寫， di寫ｅ過程中， 寫了去讀， 看家己 有 扣an主題 無? 有離題無？ 寫有順無? 讀了閣修改， 修改了 閣寫， 寫作 只要 你有耐性， diorh有辦法ga寫ho清楚； 天才型ｅ學生， 靈感往往ho你di睏眠中 一再演出， 可能di你 猶ve動筆 進前， 寫作ｅ細胞diorh deh絞滾， 你可能屬di 敏感ｅ天份， 按呢diorh恭喜你， 無認真寫diorh無采， 可惜啦！

1.7 真情誠意
愛會記ｅ， 真情感動 比 寫作技巧 卡重要， 寫你熟識ｅ 人、 事、 物 ， 寫你 上深刻ｅ 代誌！

1.8 充分利用 範本
選讀課本 〈流動． 光影〉中， 每一個單元 攏有導讀，可 先讀文章 家己先想， 再去 詳細品讀 別人ｅ觀點 補充 家己 無看著ｅ角度， 再度 去讀範文， 分析、 對比 家己ｅ經驗， 按呢 可提供咱 一寡 提示gah寫作ｅ 方向；

1.9 善用 文思診療室
學校 有 一流作家 輪流 di 文思診療室 駐校， 同學 愛好好 把握機會；

1.10 早早 提筆準備
穩定型ｅ學生 早早會準備， 準時交作業， 才氣型ｅ學生 會治一目nih 爆發伊ｅ靈思才華， 任何 機會gah機緣， m通ho飛走去。
寫作會ho咱 帶來快樂、 或 流目屎， 無論按怎， 攏ho咱提供 一個機會 想清楚， 即使是 痛苦 ma會 ho咱ｅ 靈魂淨化， 咱ve浪費生命， 寫了 咱會有 成就感。 把握 咱ｅ靈感， 親像 最近二禮拜 以來 老師寫了 六篇短篇 敘述散文， 平均 一篇三千字， zit款ｅ 經驗 來自 靈感一直vok出來， 任何代誌 攏可 暫時排開， 無ga 寫落來 靈感一目nih仔 diorh會消失去a。 後來ｅ 二禮拜 又閣 寫五篇，加上 進前寫ｅ一篇 總共十二 篇， diorh成 就一本 叫做 《冬節圓》ｅ冊。 平常 有題目diorh記落來， 身邊ｅ人， 你所聽ｅ、所看ｅ一句話 攏ho你靈感。

二. 金字塔思考方法、 PowerPoint 大綱 簡報 實作
經過 上學期ｅ 實務gah觀察， 結論是 學生 並無出現 閱讀gah書寫ｅ 問題。 閱讀gah 書寫 以外， 講gah組織能力 卡欠少 這du好是 第二學期 需要 加強ｅ所在。
台灣ｅ學生 主動講話ｅ意願真低 gah 表達ｅ 方式 真欠缺， 大部份學生 攏真斯文， 問問題 ｅ次數 無夠濟， 以下 veh 實做 金字塔思考方法gah PowerPoint 大綱 做簡報， 來試 來結合 學生ｅ 讀、 寫、 講ｅ 表達gah組織 能力。 因為 zit班 是 企業人， 不管以後 veh做 職員 或 頭家 或 改行， 結合 zit門 閱讀gah 書寫ｅ 課程訓練背景 做 一個基礎， 希望ho yin 有自信 ga家己ｅ能力、 專長， 以 讀寫ｅ 訓練 經驗gah 模式 注入yinｅ熱情、 精神、 氣質， 有條理 ga家己ｅ 理念計劃 di一定ｅ水準， 呈現出 一個人ｅ 豐美內在。
2.1 金字塔 圖解架構 實務
這是 以 第一學期ｅ 生命書寫 所完成ｅ文章， 第二學期 以 學生家己ｅ 創作做例， 來切入 做分析ｅ 教學效益個卡省力， 因為 yinｅ創作 已經內建 心底， 請學生以 家己ｅ作品 根據 金字塔思考方法 架構。

(待續)

明柔花木 情意深 張春凰

．銀柳 gah 蘭花

銀柳gah 蘭花 是 今春 親友送阮ｅ 二項禮物。
Veh過年a， 宜蘭三星 天送埤ｅ 天送伯a， 運送寄來 數量ve少ｅ銀柳。 自按呢， 銀柳來di阮兜ｅ客廳， 伴阮過了 跨年ｅ 冬春， 展出 伊ｅ美姿， 一直忠守著 長長ｅ 一個季節， 看伊綠色猶再 反勢會比 一個季節 閣卡長久。
過年佳期， 故鄉ｅ小姑 送來一盆 阿里山ｅ 桃紅蝴蝶蘭， 花蕊柔美 帶嬌艷， 一看diorh會ho sannh著， diorh按呢， zit盆貴客 ia來陪伴阮。
自來 阮mvat 真正 接觸過 銀柳gah蘭花。
這是一段 耐心ｅ約會、 ma是 體貼溫純ｅ 表徵。
銀柳 採枝 離田土， 約有 一公尺外 帶著 五六十個 烏do紅ｅ 花苞， 一如 小楷毛筆ｅ 形體。 Zit層包膜 堅實ｅ時 veh剝伊 未輸deh咬開瓜子ｅ 防護功能， 等到花veh開ｅ時， 閣假若 土豆膜 輕輕仔lut一下， diorh可ga伊ｅ外衣 褪掉。
銀柳 閣叫做 貓柳， 原來是 花苞 脫離外膜 了後， 正式ｅ 花蕊真形 ziah開始顯出 銀色貓尾花ｅ 身份。 通常zit個 身世階段 上gai普遍 。 西洋ｅ聖誕樹 通常 ve kng 過 新曆年ｅ初一、 二， 台灣 插花過年ｅ 鬧熱氣氛 大約ma ve 超過 一般花蕊ｅ 枯退期， 所以 銀柳ｅ命名， 注定dizia。
因為 無閒去ga管顧， 銀柳 逃過一般dansakｅ花期命運， 奇蹟diorh 呈現 di zit暫 後半存活ｅ 自然美貌。
精彩ｅ所在 dizia。
貓尾一開始 是 銀sihsihｅ珍珠輝， 一點一點 di禿枝上 若 夜暗ｅ天星。 飽實ｅ 毛筆尖花， 閣若像是 一隻無尾熊 anan kinn-di 樹箍身ｅ縮影， 等候 過了 一二工久， 花蕊閣開始 變到 放鬆ｅ身段， zit時 一蕊一蕊ｅ花毛絮(su2)， 閣若像是 無尾熊ｅ 膨紗毛， 按呢 銀灰銀灰 自有典雅。
鬆化ho人想著 年老ｅ退化、 結束ｅ前奏， mgorh 通例 必有例外， 驚喜 ma是dizia。 Di 幾百蕊ｅ 銀貓柳 當中， 有幾蕊苞柄， 出現 綠青ｅ色緻， 粉綠絨毛hit款顯目ｅ 特色， 在你閣卡無閒， ma ve去ga漏過， he是一種 明柔ｅ 訊息色水 來拍招呼。
生命ｅ飽水 ho人懷疑， 這敢是真ｅ？ 本底二公分ｅ 小楷毛筆頭 大部份攏 功成名退， 只有 其中 極少數 拓展到 二倍大， zit個形體 m是貓尾ｅ 小局面， 伊開始di花身 一直漲膨， 好參像是 有身ｅ女性， 腹肚內 有神聖ｅ任務 等待完成。
按呢ｅ現象， ho人連想著 一巢蜜蜂， 只有一隻 女王蜂ｅ存在， 其他大群ｅ工蜂， 攏是 為著群體 來付出， 甘願 用生命 為 家己ｅ種族 做一個幕後小卒仔？
閣過二工， zit蕊蜂王花 營養充足， 花托ｅ頭座 孵出幼幼ｅ 葉影， 花蕊本身 出現 一條一條ｅ花序， 斟酌ga看， 花絲頂面 閣有花藥， 花房粉翠、 花絲粉綠黃， 盛開ｅ銀柳 已經有 五六公分， 伊ｅ形態 有寡 膨鼠ｅ 翹尾溜。
再過二三工， zit蕊 多變化ｅ 花， 親像 一支 棕cing仔花 [刷子花] 按呢ｅ花絲， 閣有 淡薄仔 刺毛蟲ｅ 圓身形， 開始橫平， 身長 七公分、 身圍 二公分。
Zit時 凸枝ｅ身上， 葉仔穎 ma m認輸， zong出來 裝飾， 好一個 銀柳奇妙旅程。 朋友來厝裡， yin 用經驗ga阮講 yin mvat看過 銀柳zit段後力 豐美ｅ生命。
銀柳ｅ身邊 有一盆 桃紅蝴蝶蘭， 應該是 台灣原生ｅ 姬蝴蝶蘭。 Zit盆蘭花 逢春盛開， 枝頭到枝尾 點綴著 生機健美ｅ 花串， 一蕊一蕊 攏 幼秀柔美 ziau勻青春。 雖然 盆坩是 一個 真普通ｅ 塑膠套， 伊有氣根 攀著坩沿、 飽水ｅ葉片， 一銀一桃紅， 艷麗相映， 光亮ｅ銀柳 di暗暗ｅ室內 有光點， 陪伴著 山谷來ｅ 幽蘭， 富貴風尚 總是春輝。
銀柳gah 蘭花 親像一對 金童玉女， yin守護著 一室ｅ優雅， 充沛ｅ心力， 為阮seh轉ｅ人生， 帶來調適。
過了一季 花期原在， 當 阮ga親友敘述， 有人講 因為靠窗 空氣、 日光、 水氣 充分， 所以 生機旺盛； 有人講 花位ｅ風水 好， 叫阮緊坐di hia 設想投資ｅ計劃 必然有 好手氣。
O～oh～， a是 用一枝筆 記落 銀柳gah 蘭花ｅ 身段， 阮甲意 按呢想lin！

．緋櫻 gah桑椹
冬寒掃去 櫻花ｅ葉衣， 樹木枯枝 仝款是 自然sui。
年年冬節時分， 緋櫻 為世間 宣示 一冬閣到lo， 四季節氣 已經 一循環， 辛苦ｅ人啊， 請你 停一下仔腳， 品賞 樹箍身gah枝脈身骨。 就使 hit欉陳年五葉松 仝款 一身青衫 向天， zit排櫻樹 枝格紋理 可是 樹皮烏金金。
過了風寒， 春神手拽一下， zit排櫻樹 一時 精神起來， 平常恬靜ｅ 人行路道， 桃紅櫻花 來鬥春。 細細ｅ蜜蜂 沈醉di花蜜ｅ美味， 細細ｅ綠笛a 跳徙di 枝花當中。
緋櫻 來deh緊、 ma 謝幕了緊， 過幾工， 伊身傘下ｅ 土地 攏是 落花ｅ色水。
閣過了一暫仔， 嫩葉 代替花蕊 添滿樹欉， 一樹親像deh 變魔術， 一直deh換戲裝。
應該是 停止大變化ｅ 時陣a， 應該是 甘願安份ｅ 時陣a。
日出日落， 阮行過 無數ｅ來回。
有一回， 樹欉ｅ搖動 招醒 過路人ｅ心， 為什麼 鳥隻飛動 di枝葉間？
探頭ga相， 原來 隱藏di樹枝頂ｅ 櫻果 已經 鮮紅， 閣有 烏do紅ｅ深熟， gah櫻桃ｅ色緻 仝款， 原來 這是 生命循環ｅ 祕密。
幾冬前， 區內ｅ 一個太太， 來來回回 deh巡看 土腳ｅ 幼樹栽， 後來阮閣看著 伊deh 種zia-ｅ櫻花栽， di 日頭腳 cai竹棍 固定樹仔， 幾年後， 這diorh是 答案。
緋櫻 是 台灣原生樹種， 俗名叫做 山櫻花、 山櫻桃。
山櫻花 樹欉 卡明顯， 比 桂花 卡大欉， 比 桑椹 卡大閣結實。
土生ｅ桑椹 真qau 家己生湠， 有土 伊diorh會活， 花臺ｅ一小撮土， 伊攏 掠著機會m放。 土腳 只要 lu草ｅ工人 放過伊一季 來年 diorh有機會壯大。
有一欉桑椹 阮已經 看伊二十冬a， hit欉玉蘭花 十冬ｅ樹齡 早早diorh 大出伊ｅ 幾倍身guan， zit欉桑椹 仝款 凍結青春 di伊ｅ 軟枝 短巧身材。
Diorh di櫻花ｅ果實 熟透ｅ同時， 幽靜ｅ校園內， 一群樹鵲 ga-ga叫， 鳥群 一隻一隻 輪流輕歇 振動 細樹枝， 鳥喙 相準準 deh啄 桑椹ｅ果實。
院園內 樹欉真濟， gah 隔壁ｅ 光明新村 連做一片， 閣有 成功湖ｅ水塘， 鳥隻生態 多樣， 有影是 水木清華。 朋友來訪， 對著 幾欉 筆挺ｅ 南洋杉 講：“埕斗 有zit款稀寶， 子弟qau讀冊”。
講到zia， 過往ｅ 清大北院， 還ho 台灣銀行， 起造一大片ｅ 商店gah住宅， 現金 添加ｅ同時， 人類環境ｅ 肺部呼吸 閣減一塊， hia-ｅ樹欉花草 免不了 消滅。 唉呀！ Hia-ｅ 櫻、 桑、 苦楝舅 gah 南洋杉 深鎖di阮ｅ頭殼內。
佳哉！ 桑椹， 只要有 一小撮土， yin ve放棄 生存機會， 永遠ve放棄！
霧社緋櫻ho人想起 佳人英雄， hit款 風中溫存ｅ 母土之愛！ 所以 平地繁花點點， 點起 一段淒美ｅ 歷史過往。


．流蘇gah綠汽水
靜宜大學 靜園ｅ 小食部邊緣 有一片 空地， 清明前 ziann百欉ｅ流蘇 接著苦楝ｅ 粉茄仔 細蕊花， 現出 大範ｅ雪白。
流蘇gah苦楝 仝款 攏di 樹欉 上gai精華ｅ 頭殼部位 開蘗， 迎著風、 接著日月， 蜂蝶ma來聚會。
流蘇 遠遠ga觀賞 純潔淨雅， 近看ziah可察是 聚繖花序。 流蘇可比 女子ｅ飾帶， 名ｅ本身 diorh有 浪漫風神， 花蕊密實 形成花海 更是 數大美集， 一旦gah伊相du頭， 無去ga注目 應該m是常態。 Diorh按呢生， 阮拋棄 gah時間競賽ｅ 堅持， 暫時放落 有ｅ無ｅ 什麼代誌， 緊急veh去 gah伊相會， 彷彿 愛著病相思ｅ 青狂。
特出ｅ花 白paupau， 配對 新春ｅ 青嫩葉， 白青相伴， 光影清新 柔和。
少年ｅ時 身邊ｅ伴 總會邀請 阮去 伊ｅ母校 觀賞流蘇， 二十冬後， 第二代少年家 興hip相， ma歡喜put-put gah阮分享 伊ｅ心意， 流蘇牽連yin 父仔囝ｅ 校友情， 一份 仝款ｅ記憶 di生命流動。
Hit冬 感內 少年家ｅ熱情， 閣撥工 去看流蘇， 一份 愛情gah親情ｅ 滾絞gah延續， 滿足 自在心胸。
春陽軟勢， 午後ｅ咖啡座， 來 di課後ｅ放鬆。
我愛沿著 hit個公園， 享受 新春氣息， 再坐落 伊ｅ身邊。
伊 熱情款待 goziann阮 來一杯 伊du-zia 享用ｅ 透明綠soda， 無lim一杯，人生 會抱憾。
面前ｅ綠soda 猶velim， 心肝頭diorh sannh一下， 純觀看 是 頂級 透明化ｅ琉璃 上乘藝作， 一球 香草冰淇淋 粉米黃 配著 清汽水， 氣泡仔 一點一點， 杯面 有一層 翠綠玉ｅ 飲料， 智覺ga阮講， gam正實是veh ga灌入腹？
一滴一滴 透過吸管， 甜甜綿綿neh！ 夢ｅ滋味！
驚奇閣di後面， 冰淇淋 開始散開 慢慢沈落底， 歸杯汽水 開始 重新調色， ua！ 平常ganna lim白滾水ｅ人， zit份彩演 自然對比著 生活ｅ清淡。
莫怪 伊veh極力推薦。
變化 是 生活ｅ詩意， 四季變換 花木先cua頭。
花木美好 如此明柔， 賞心悅讀 出情意， 來吧！ 來吧！ 一切攏是 上好ｅ安排！

(原登台文戰線19期)