為什麼會有風颱
王駿隆

Di 熱人 e 時陣, 因為海面受著日頭e直接照射, 所以海水diorh會kah容易蒸發, 造成海vin 上e空氣濕度kah大, 溫度ma升guan, zit種空氣因為溫度e提高來造成vit do減少, 所以重量diorh變輕, 然後往頂頭流動, 此時周圍kah冷e空氣diorh流入來補充, 連後再上升,zit款對流e現象一直發生, 最後造成歸個空氣攏是溫度guan, 重量輕, 按呢e空氣diorh叫zue”熱帶低氣壓”。
空氣e流動是對高氣壓流向低氣壓, diorh親像水按guan e 所在流向低e所在仝款, 這種空氣e流動diorh造成”風”。Di熱天差不多七、八、九月e時陣, 因為日頭直接照射e所在ui赤道慢慢往北爿sua, 所以di南半球e東南信風diorh轉變成西南季風吹入去北半球, zit種氣流gah原本di北半球e東南信風攏作夥, 因為兩種氣流e流動方向無仝款, 所以diorh gah中間e空氣sak 向頂guan, 增加空氣e對流作用, ma造成真濟e空氣波動gah漩渦。Di 北半球, 主要是往正爿seh, di南半球diorh變作往倒爿seh。
這種西南季風gah東北信風攏作夥所造成e輻合作用, 加上原本一直進行e對流作用, ben使得原本已成做低氣壓e漩渦加深, 四周空氣流入去中心e速度ma愈來愈緊。 Dng接近地面e空氣流動速度超過每一秒17.2公尺e時陣, 咱gorh將zit款現象叫zue風颱(typhoon)。Di其他所在, zit款現象有其他無同e稱呼, di北太平洋東部將zit款現象號zue颶風(hurricane), 而di Bangladesh [孟加拉]灣等所在叫伊旋風(cyclone)。
按天頂看落來, 風颱中心是一個無雲e所在, 號zue”風颱眼”, 風颱眼是一個風颱氣壓上低e所在。Di zia是無風無搖e, 時常風颱e強度若是愈強, 風颱眼diorh愈細粒。Ui風颱眼向外靠出去, 是一層真厚e雲, di zia是風力最強e所在, 風颱e強度diorh依照zia 風速e無仝分作三級, gorh是輕度,中度,gah強烈風颱。Zia e雲若愈厚, diorh代表zia e 風愈透, 雨ma愈大。
Zitma風颱e名字是由西北太平洋gah南海地區14個國家所共同號e, 每一個國家攏需要提供10個名, 總共140個名輪流使用, 其中有一gua是神話人物, 有一gua是動物抑是珠寶e名, ma有用人名抑是地名來號e, gorh複雜gah無規則。
Di台灣, 古早是號zue”風篩”, 因為看到雨水ho風吹gah噴來噴去, 親像ho大風篩過, 了後ziah慢慢變成現在e”風颱”。
若是di 海面上, 因為水氣edang一直補充, 加上海面上無物件會阻擋伊e流動, 風颱e強度diorh有可能會增強。如果風颱一旦ui海面行到土面上, 因為土面上有山脈等物件, 風颱diorh會因為地形阻擋來破壞了伊e流動, 加上失去了水氣e補充, 風颱diorh慢慢減弱ah。親像風颱大部分攏是ui台灣e東爿起來,len au因為中央山脈e阻擋, 所以到西爿e時陣風颱e威力已經減輕真濟ah。
若是風颱ui西爿起來,因為無山脈e阻擋, 加上西爿大部分是平地, 所以diorh會直接對台灣西爿造成真嚴重e破壞。親像民國六十六年e Thelma[賽洛瑪]風颱, diorh連高雄港e大支吊手攏ho吹倒去。
風颱大部分攏是di七月到九月之間發生e, 平均每一年差不多有三, 四個風颱經過台灣。風颱時常會帶來真濟e雨水, 就是咱講e風颱雨。加上風颱引進e西南氣流, diorh時常di短時間內落大量e雨水。尤其di山區, 時常diorh因為風颱帶來e大量雨水造成崩山, 土石流等等e災害發生。但是, 風颱帶來e雨水ma對解除春天時因為雨水無夠e欠水e現象有真大e幫助, 而且, 因為中南部di冬天e時陣edang講是無de落雨e, 這時陣用e水攏是靠熱天收集e雨水, 所以風颱帶來e雨水對台灣人來講, esai講是生活所必要e。
Di 風颱來e時陣, 海邊仔攏會捲起真大e海湧, 海湧拍di海huan時diorh會產生痟狗湧, 這款海湧e速度真緊, 若是ho捲入去diorh mai肖想veh拖出ah。如果風颱來e時陣du仔好是海水漲水e日子, 海水漲水再加上大量e雨水, 海口附近e所在diorh有海水倒灌e危險。
除了雨水以外, 強烈e風ma是造成災害e一個原因。因為風颱目nih-a e風速若是愈緊, 產生e力量diorh愈大, 所以di風颱離開了後, 街仔路頂頭攏e sai看著ho風sam倒e樹仔抑是kan bam(招牌), 甚至有一寡用杉仔起e厝, ma會ho sam倒去。

參考資料http://rdc28.cwb.gov.tw/data.php
http://life.nthu.edu.tw/~labtcs/ls2143/052.htm


arrow
arrow
    全站熱搜

    daiqi007 發表在 痞客邦 留言(0) 人氣()