媽媽e裁縫車仔
張春凰
Ui我e年歲猶未跳過二字數以前,應該講是有記持e時,媽媽e裁縫車仔就是阮家庭e 一份子。
媽媽e裁縫車仔 是一台kia架 箱仔款 木材gah鐵材 用腳踏 國產月友牌子e舊式針車,雖然伊是一台老型e古董,hit當時對媽媽來講是ziah nih-a重要,閣代表due會著時代e意義 ni!就親像咱人用步lian,後來有腳踏車,新工具e使用會改變生活e腳步,裁縫車仔對媽媽e方便閣親像蒸氣機發明了後,致使第一次e工業革命,歸個社會文明大大向前hann 一大步,機器代替手工了後 動力就有真好e替手,有ziah nih-a大e幫贊,莫怪媽媽一直ga留di身邊!
媽媽今年七十四歲,裁縫車仔zitma 是kng di伊e房間內e窗仔邊,ho一條繡花罩 罩diau leh,伊三不五時就會用著,veh用進前,伊攏先拭拭buann buann leh,才開始車車補補改改leh! 用好閣巡巡看看 油食食ho好 閣收ho好勢。
媽媽m vat拜師學過裁縫閣無讀冊,是有樣學樣 無樣家己想,變出來e衫gah褲,就是家己qiah舊衫,照舊形畫紙樣,比紙樣鉸領、手袖、前片、後片、褲身、褲叉仔……用針一針一針tinn,橫布接直布,直布套cuah布,布幼仔一塊一塊接連一領衫,自伊做查某囝仔姑娘e時陣就真伶俐。一直到入阮厝門,囝仔像粽guann按呢一個一個出世了後,家己創造e“媽媽流”就di厝內流行起來: 大領衫改細領衫、查甫衫改查某衫、大領衫變細領褲、大領褲變細領ga仔、褲腳管變lak袋仔、圓裙變窄裙、白布染烏布 麵粉袋仔變內褲……一陣qin-a穿gah 鮮鮮鮮,無注意看根本就看ve出來是舊衫變新衫,“媽媽流”講破實在無值半現錢: 省布、省錢nia-nia,變變變... 媽媽假若deh變魔術leh! 目睭珠金、腳手緊,魔術師e第一大功臣就是zit台裁縫車仔。   
裁縫車仔e配角:鉸刀、線gah針……鉸刀假若是司公e聖杯,媽媽e鉸刀數十冬來攏磨gah金金gah利劍劍,伊m准人用zit支鉸刀 鉸紙、鉸頭毛,理由是鉸刀若鉸鈍去,剪布會歪cuah,布 剪ve落去 kang-kue就ve做leh!線是消耗品,針穿線 線due針用來tinn鈕仔、縫褲腳gah裙尾…… 不管時一定是一支針穿一條線,結扑好好插di用頭毛包tinn 起來掛di車仔邊壁面e針包頂懸。“按呢edang一面應付穿di身軀e衫褲e鈕仔、褲ken仔 若一時落去veh tinn才會緊,一面是為著安全,因為針若鑿入去身軀內,會due血走,掠ma掠ve著,這就害啊! 愛斟酌 !”zit個故事是媽媽定定講e!
磨鉸刀、買車仔針、dah車油是細漢e時,印象非常深刻e代誌,車仔線一粒一粒 dinn好好,若有veh liu線,有時仔會扑結球、線結愈giu愈濟、心頭愈亂操操,這就知苦啊!Zit時媽媽就教阮愛有耐性,寬寬來 m tang急!
Zit台裁縫車仔,due阮兜搬過三遍厝: 大瓦厝到舊土角厝、閣搬倒轉來大瓦厝、閣搬入來zitmae樓仔厝,過程中媽媽e雙手、堅強e個性、勤勞理家、觀前顧後、 大大細細、事事萬項、無論是風雨、抑是平靜,媽媽攏是守著zit個家,裁縫車仔ma留di媽媽e身邊gah伊e主人忠心共守,伊e存在代表著我後頭厝e過去gah未來ham家庭文化,是媽媽一雙變形e腫頭辛辛苦苦gah爸爸鬥拍拚出來e,是yin e心胸坦白、做人仁慈ho in e子孫感受著平凡守本份!
好頭好尾e信念gah福氣,實在m是ui天跋落來! 媽媽惜福 ui掩di裁縫車頂面e kam 罩edang證明,zit條繡花罩是我初級中學e家事作品,二十外冬後,我嫁出門閣出國讀冊,看著 zit條白繡花布ho媽媽保存gah白siaksiak,白布身頂面e繡線色緻五彩分明,本成是一條普通e粗布ing iah無什麼特別e藝術圖案,但是ho媽媽e愛心放大gah真誠sui,ma ho我想起青春少年時,更加重要是感想著媽媽e身教!
二姐仔本來有一塊鐵飯碗,嫁了無外久,辭頭路專心相夫教子,用伊彈琴e雙手來做衫改衫,功夫誠有師父味, 雖然伊ma是無師自通,雖然伊ma是用相仝舊形e裁縫車!自從大嫂去成衣公司上班了後,厝內閣買一台卡專業、新型e裁縫車仔,伊e大漢查某囝去讀家職學校服裝設計科,畢業到現在一直用zit台車仔認真學功夫,阮兜第三代是“摩登時尚流”gah“媽媽流”無仝leh! 第二代e定位是di zit 二個流行派中間,媽媽gah伊e裁縫車仔,是阮初步e啟蒙老師。
熱人去寒天來,寒天過去熱人閣再來,數十冬來季節若變換,媽媽就用伊e裁縫車仔ga衫改ho卡合身,合伊e習慣,雖然厝內有新型e裁縫車,有少年e裁縫師,伊ma 是愛家己用彼台舊型e裁縫車,因為媽媽會曉做衫,厝邊隔壁一直認為古早伊去學校讀過冊!有可能這是其中e一個原因,老來伊閣拍拚讀佛經,人伊積少成多,加減ma識一千五百字左右!
是按呢,我知影媽媽有伊家己e福氣,是按呢,伊e裁縫車仔猶原好好閣due di伊e身邊!
(1993年9月)
創作者介紹

daiqi007

daiqi007 發表在 痞客邦 PIXNET 留言(0) 人氣()