睏,有什麼作用? 做夢,有什麼好處?
資工 陳孟鋒
人,是哺乳類,deh睏會做夢,貓仔ma是,ganna有哺乳動物睏e時陣會做夢;m是哺乳類,ma會做夢e,ganna有鳥仔。鳥仔囝bu出來了後一百工之內,di leh學唱歌e階段,ma會做夢。若是講細隻仔鳥仔di早起時仔orh唱歌,到暗時,用藥仔使伊腦中神經元無法度活化,ve做夢,按呢鳥仔囝e學習嚴重受害。

咱細漢e時陣vat聽人講,睏是大腦le休息;現在咱知影,睏e時陣大腦不但無le休息,伊活動gah比平時gorh厲害。利用腦造影技術,咱edang看著睏e人,視覺皮質仝款活跳,顯示伊le做夢。dui腦造影技術知影,睏是身體le休息,大腦仝款le做工,而且分泌真濟激素,di 第四個階段腦e分泌生長激素、正腎上腺素等眾多重要e神經傳送物。做夢e時陣,視覺皮質di腦造影下面光亮起來,顯示你 e夢是彩色e。

夢gah學習有足大e關係。咱做研究時,若是招請「個性溫和」e學生做測試者,di實驗室睏七工;di七工le睏e時陣,只要一做夢就hong叫醒,足少有人ve受氣e。人睏e時陣通常一暝會做四到五個夢,九十分鐘一個週期。睡眠edang分為四個階段,第一個階段,就是你讀冊讀到想veh睏一下e時陣,字攏浮起來e時陣;di你開始dom頭,dor是第二階段e睏;di你全身肌肉攏放輕鬆,便是第三階段,你可能已經仆落去a;若是講這時陣班長huah kia起來,你聽無,dor已經是第四階段,ia dor是睏gah沉熟a。

參考資料 科學人雜誌 http://sa.ylib.com

daiqi007 發表在 痞客邦 PIXNET 留言(0) 人氣()