《數學家e故事》自序﹨劉信輝
會記三冬前,di台南e南鯤鯓台語文學營內底(我是hiae工作人員),第一擺gah張春凰老師ham yin翁婿江永進老師di hia見面。Hit當陣e我,經過別人e介紹,我ziah知影老師di清華大學leh教冊,而且gorh是教台語文,ho當時e我感覺真新en趣味,決定後一學期veh去修老師所開e課,zit個選擇,除了帶ho我台語文e訓練,ma會使講是zit本冊e源頭。
自細漢,我就di教會內底大漢,教會羅馬字我加減a看有,mgor,我並ve曉寫,ma m知台語是一種足suie語言,這一切攏愛感謝張老師ham我e高中老師—王宗傑老師e引cua教示,我ziah有法度寫出一寡仔台語文章,ma kah了解語言之間是需要尊重ham欣賞。
數學對我來講,是我家已e選擇,因為我甲意dang頭殼內想數學,di hia得著屬於我e成就感,所以讀數學是一種快樂e活動,ma是一種享受。Dor按呢,高中畢業以後,我選擇清華數學系做我e第一志願。
數學e歷史,對數學家來講,是重要e物件,因為伊是一款思想史,代表著人類思想e進步,ma代表著人類思考方式e轉變。另外一方面,數學e發展,定定ma對其他領域產生足大e影響,因此,數學e歷史,對人類來講,有另外e意義。Di zit本冊內底,我主要是寫卡早e數學家,yin做數學e一寡成就ham一寡小故事,gorh卡重要e是,數學家奮鬥e過程ham yin值得咱學習e骨氣,我攏盡量寫di zit本故事集中。
Zit本冊e誕生,愛ui我大學二年講起。當時e我,di修張老師e課以後,老師希望我edang寫一寡數學家e小故事,di hit當年e暑假,我無閒了數學營隊以後,我就開始寫故事。一開始,我m知如何編排,m知如何寫一個人e事蹟故事,我diorh隨我cue著e資料,按照我家已對傳記e印象開始寫。因為開始寫e速度足慢,di hit個暑假,我ganna寫出十篇,交ho老師修改,老師當然是改gah足艱苦,因為足濟所在攏無一定e格式,ma真濟用詞錯誤ah是無順,會有zit本冊,張老師e指導gah修改真正愛好好感謝。
接落來,我用我零星e時間繼續寫,總算是寫出zit寡物件,ma edang講是我拖沙出一寡成就lo。我感覺寫zit本冊e過程中,有足濟無仝款e感受,一開始是感覺真遙遠,m知愛外久kah寫會了,有e時陣更加感覺會煩,無想veh寫,所以我拖了真長e一段時間,ga老師加添足濟麻煩,di zia向老師道歉,ma感謝老師ho我ziah-nih濟e時間等我daudau做。我想,若是無老師di後壁若sak若幫忙,我想zit本冊應該是無可能有結果。
另外,ma愛感謝江老師e台音輸入法,ho我di leh寫故事e過程中,得著真濟好處。像講台語e一寡用詞,我真正m知veh如何寫,但是只要我有法度寫出拼音,台音輸入法就會有字,這對台語e寫作真正是一種便利。
現在,有一點仔故事集,未來若是有機會,我會繼續整理其他數學家e故事,簡單講,diorh是續集。
(2006.6.25)

daiqi007 發表在 痞客邦 PIXNET 留言(0) 人氣()