親愛e媽媽:
我細漢e時陣你dor gah 爸爸離婚,mvat代誌e我,聽厝內e人講著你,攏是批評。我第一gai 寫e作文,「我e媽媽」,寫e ma攏是歹聽話。我e國小老師ga我教示,按呢講自己e母親是m對e,我真委屈,m知影為什麼老師ziah-nih嚴肅。
足久足久以後,gorh看到你,已經無任何對你e印象a,你講你足思念阮三姊妹,足對不起阮,但是你m是m愛阮,只是你gah爸爸無適合。你哭le講阮iau 真細漢,vedang了解‧‧‧
我hit當時確實無法了解,mgorh我ma ve恨你,只是慣習無老母e生活,m知影你e出現有什麼意義。
就按呢,斷斷續續e接觸gui擺,每一擺攏是幾a冬後。逐擺你攏真艱苦,一直哭,一直重講hia e話。
其實,我真早就dau-dau-a了解你e心情a。因為你gah爸爸是父母作主結婚e,爸爸zit爿e人gorh真傳統,恁是想法差siunn濟,所以你veh來離開。你當時e作法是傷害了爸爸,mgorh你已經因此痛苦ziah久a,頂一代e恩怨,阮早就m在意a。
雖然阮攏gah你講,mai gorh來找阮。咱已經田無溝、水無流,也mgorh這m是恨你,只是爸爸無願意gah你有交cap,阮必須尊重伊。Dor 按呢,你哭gah真傷心,掛掉電話。
後來聽講你結婚a,阮實在為你真歡喜。為著mai ho你有遺憾,阮又gorh打電話找你lo。你真歡喜,也mgorh仝款對阮ve放心,最後仍是會爆發一寡崩潰e情緒。按呢suah ho我真驚,m知影找你gam是對e?
親愛e媽媽,你ho家己e折磨有夠啊!你ziah-nih-a幸運,gorh edang找著愛你e人。Zitma gorh生一個查某囝,你著ga你對阮所有e虧欠gah愛,攏報答ho你現在e翁婿,好好疼惜恁e查某囝。阮,ma會過gah真好,咱互相來祝福‧‧‧

最後ma是愛gah你講一句,

我愛你,媽媽!

你著愛過好日子!

Iau iu 筆
創作者介紹

daiqi007

daiqi007 發表在 痞客邦 PIXNET 留言(0) 人氣()