細觀Miss Potter
許倩毓
一、 前言
電影Miss Potter[波特小姐] 中,藉著描寫Miss Potter伊充滿挑戰e出冊過程,來呈現伊gah動物互動e情形ham伊前衛e思想gah樂觀e個性。Zit篇報告將藉電影e內容討論Miss Potter gah動物互動e情形如何影響伊對環境e看法,ma分析Miss Potter身為女性di hit個時代所受e限制,了後討論Miss Pottere個性對伊e成就e影響。
二、 動物gah環境
Ui電影中edang發現Miss Potter看待動物e方式gah一般人無仝。伊將每一隻動物攏當作人仝款,gah yin講話、分享家己e心情。伊甚至edang看著畫中e動物deh din動、看著yin deh cittor、ia 是deh無歡喜。對Miss Potter 來講,動物gah人是無差別e,不管是人ia是動物,攏是有生命e、有感情e,攏edang體會環境e變化。伊zit款保惜生命、尊重生命e觀念真值得咱e學習。
Miss Potter zit款愛護生命e想法ma影響伊對環境保護e重視。Di Miss Potter 細漢e時陣,伊e老爸每冬攏會cua伊去湖區渡假,所以自細漢Miss Potter dior 定定gah大自然有接觸,對伊來講,湖區不止是渡假e所在,ma是充滿細漢時期記憶e所在,對zit個所在伊是有感情e。另外,因為Miss Potter 是zia ni a 珍愛動物,ia大自然是動物生存e所在,所以edang講Miss Potter 對環境保護e重視是源自伊對動物e愛護。
Dior是因為自細漢diorh ham湖區培養感情,gah加上對動物e喜愛,對 Miss Potter 來講,湖區e保護edang講是伊e生命。伊出錢出力,甚至到死後,gorh將遺產e一部份捐出來做湖區保育e基金,diorh是為著保護湖區自然e景色ve受污染gah破壞。
Di hit陣,正是工業革命後e時代,不管是工業ia是經濟攏快速發展,對土地e開發也愈來愈緊、愈來愈濟,大部份e人攏dann注意著繁榮e經濟ham愈來愈好e生活條件,真少人會注意著環境保護e議題,閣卡m免講是提家己e錢出來提倡環境保護,但是ziae代誌Miss Potter 攏做到a。Zit款前衛e想法,ma說明了Miss Potter 是一位有想法而且心胸寬闊、眼光長遠e人。
三、 女性e壓力
Di 19世紀後期到20世紀前期hit個保守e時代,身為一位女性,Miss Potter 所受e社會壓力是真大e。Hit當陣社會對女性e看法閣真保守ma真古板。女性di當陣hong認定應該趁少年diorh愛結婚,ma無需要讀qua濟冊,更m免出外趁錢。但是Miss Potter 真幸運,伊e老爸di伊細漢e時陣diorh請一位家庭教師來教伊,ho伊自細漢就裁培看冊e興趣,也因此拍在了伊後來寫冊e基礎。
女性e婚姻di hit陣ma 受著多方面e壓力,大部份e人認為女性應該趁少年緊嫁翁、生囝,了後好好diam di厝內相夫教子。Zit款觀念di當時深深deh壓迫女性di各方面e發展,di電影中ma edang發現Miss Potter e阿母就是一心希望伊edang緊找一個身份、地位、財產攏配會起yin厝e人嫁過去。但是Miss Potter 知影,伊愛e是一個edang陪di伊身邊,gah伊開講、分享生活樂趣、講心內話e人。
Miss Potter 真知影家己deh創啥,ma真知影家己心內真正e感受,所以並無聽信yin媽媽對伊婚姻e安排。但是這並無代表Miss Potter 無希望得著愛情,當伊du著伊心內理想e對象時,伊ma是全心全意去愛hit個人。雖然伊e第一段感情並無美好e結局,ma ho伊陷入深深e痛苦當中,但是伊後來ia是ui痛苦e深淵中行出來lo。尾手ma找著 edang陪伴伊一世人e人,做伙行完伊精彩e一生。
四、 個性gah成就
Ui第二gah第三節中edang看出Miss Potter是一位兼具理性gah感性e人。對待動物時,伊將動物當作人仝款對待,ham yin講話、談心;對待感情時,伊付出全心去愛hit個人;當伊e愛人離開時,伊也vat因為悲傷無法度冷靜、振作,這攏代表Miss Potter 感性e性格。
當伊面對家己e理想時,展現e是理性e伊。為著出冊伊找過真濟出版社,雖然hong拒絕真濟gai,伊猶原m願放棄、堅持理想,做伊認為對e代誌。對環境e保護伊ma有伊e堅持,伊付出心力維護湖區e自然景色、反對過分e開發,閣出資來為湖區e保護做實際e奉獻。當伊面對愛人e死,雖然vat因此消沈,但尾手ia是堅強e行出悲傷,繼續完成伊e理想。這攏是理性eMiss Potter。
感性ho Miss Potter edang體會別人無法度體會e代誌;ho伊edang觀察著身邊每一項變化;ho伊edang享受愛情e甜美;ma ho伊edang寫出動人e故事。理性ho Miss Potter edang堅持自己e理想,ve清彩放棄;ho伊面對壓力時edang堅強;ma ho伊di失去愛人了後,edang閣重新kia起來。
當面對挑戰e時陣,人總是會驚惶,siunn感性e人定定無法度冷靜思考做出正確e判斷,siunn理性e人有時suah做了siunn超過,ho人感覺無通情理。但是就是因為Miss Potter 兼具理性ham感性,ho伊edang冷靜思考每一項問題,將問題一項一項解決,但是伊ma會顧著人情ve做siunn超過。Zit款e處事態度決定了Miss Potter 後來e成功。
五、 結語
綜合以上e討論,edang發現Miss Potter (1866-1943)雖然活di跨頂世紀前,但是伊e想法已經超越當時保守e觀念。身為一位有知識e女性,伊並無因為社會壓力浪費伊e才能,堅持理想也ho伊成為有名e作家。不只是對家己e人生有規劃,對身軀邊e每一項代誌攏真關心,ma對環境e保護真重視。Miss Potter 破除當時社會對女性e限制,成功創作出一個新e女性模範,也為伊家己di後世留下ve hong放vue記e名聲。
創作者介紹

daiqi007

daiqi007 發表在 痞客邦 PIXNET 留言(0) 人氣()