daiqi007

序：
台譯《斷頭谷傳奇》、《李伯大夢》gah《時間機器》ｅ後半部
王睿農

真歡喜有zit個難得ｅ機會edang接觸著台文翻譯。當初是因為選擇春凰老師ｅ台文課，發現台文經過春凰老師趣味有料ｅ發揮，m na是咱一般ｅ對話，更加是一門真有特色ｅ藝術。作一個讀理工科ｅ學生，真濟人可能會對我投入翻譯感覺意外，無的確ma無認同。Ia mgorh自細漢我ｅ父母dor會gah我講台語，台語真自然dor是我ｅ母語，對台文翻譯有一種講ve出來ｅ親切。Di翻譯過程中，我真感謝我ｅ媽媽，伊會提醒我一寡台語優美ｅ使用方法，一直ga我鼓勵，支持我做我想veh做ｅ代誌。

這是我頭一擺作翻譯，一個人獨立完成《斷頭谷傳奇》、《李伯大夢》gah《時間機器》ｅ後半部。完成了後ｅ歡喜ho我感覺過程ｅ辛苦攏放ve記a。我所翻譯ｅzit三部作品攏真有特色，會吸引人想veh一直看落去。

《斷頭谷傳奇》主要是leh講一個di美國田庄通人知ｅ神秘ｅ故事，景物ｅ描寫真濟是作者真特別ｅ手法。Ui故事當中edang ho人感受著樸實ｅ作穡人yinｅ生活環境gah生活習慣，故事ｅ主要人物gah「無頭騎士」對抗ｅ過程ma真精采。雖然故事中對話無濟，看ｅ人愛閣卡用心ziah edang體會內容，mgorh讀zit個故事m是ganna文字，閣edang看著畫面，ho咱讀ｅ人好親像入去3D電影內底，gah故事ｅ進行作伙驚惶、緊張。

《李伯大夢》是世界有名ｅ故事。李伯因為食酒醉睏落深眠，一睏二十冬。Ziah-nih稀奇ｅ代誌、二十冬環境人事ｅ改變，攏ho李伯gah生活di伊四箍笠仔ｅ人m知影veh安怎。李伯di夢中所看著ｅ是一場夢？Ia是伊確實看著gah咱人無仝款ｅ人類？故事當中對人物ｅ特性做了真深入ｅ描寫，特別是主角李伯gah yin某天差地遠ｅ個性ho zit個故事閣卡趣味。李伯gah伊ｅ狗沃夫永遠ve變卦ｅ感情，ho我zit個愛狗ｅ人閣卡珍惜我gah我ｅ狗逗陣ｅ時間。

《時間機器》是一部行di時代頭前ｅ科學幻想小說。生長di 19世紀ｅ作者竟然edang寫出咱所生活ｅ21世紀gah閣卡遙遠ｅ幾落千萬年以後未來ｅ景象，zit款澎湃ｅ夢想，m是一般人有ｅ。Zit個故事真清楚表達作者對咱人破壞環境感覺著急，一般人看ve著ｅ可能，作者攏替咱想著a。Di未來ｅ世界，咱人變gah閣卡野蠻，生活當中攏是驚惶，是什麼原因造成zit款ｅ結局？時間機器是真濟人空思夢想想veh得著ｅ物件，mgorh作者想veh ho逐家知影，過去無法度改變，只有改變zit maｅ錯誤ziah edang得著未來ｅ幸福。

三篇故事攏leh講咱人真真假假ｅ幻想，veh相信ia是m相信dor看每一個人家己。我di翻譯過程中得著真濟快樂，ui無仝款ｅ角度去欣賞作者想veh表達ｅ意思。Di了解zit三個故事了後，我想veh用「李伯」作夢ｅ心情去享受「斷頭谷」美麗ｅ田庄，並且使用「時間機器」ｅ科技來體會無仝款ｅ人生。