1、四季之美

春天上suie時陣是di日出e當時。漸漸轉白e山頂,透出va-vu光,紫色e雲彩輕輕仔飄di頂頭。

夏天是暗時上sui。有月娘e時m免講,就算無月e暗暝,也有火金姑四界飛來飛去,加上落一陣清涼e雨,dor更加有意思lo!

秋天是黃昏上sui。夕陽照映山崙,烏鴉歸siu〔註1〕,三隻、四隻,或者是兩、三隻同齊急促veh歸siue鳥隻飛過,加添心內傷感。有時看著排列成隊e雁影飛過遠天,然vong真細,更加有風情。等日頭落山以後,風吹過e聲gah蟲e叫聲,也是真趣味。

冬天是早起上sui。落雪時m免講,有當陣只是結透白e霜,iah是無霜雪ma感覺真寒e時,趕緊起一盆火,提著火炭分送ho人,ma真合時節。可惜到中晝e時陣,天氣漸漸溫暖,盆內e火炭變白灰,dor無啥心適lo。

註解

1.巢。

2、時節

時節是正月、三月、四五月、七八月、九月、十一月gah十二月上好,其實每一個季節攏有特色,歸年tang天攏會使遊賞體會。

3、正月初一

正月初一,天氣清朗,而且出現彩霞,所有e人攏將家己妝gah sui-sui-sui,除了祝福天皇,也為家己祈福,這是真有意思e代誌。

初七,di雪溶了e所在挽一寡野菜〔註1〕,平時真罕呢看著zit款青草、野菜e貴族,攏真歡喜,氣氛ma真鬧熱。Zit工也是參觀「白馬」〔註2〕e日子,di厝內e官員家屬將車美容結彩,前往參觀。當牛車通過待賢門戶碇e時陣,車身hainn來hainn去,坐di車內e人頭殼相kok,插di頭殼頂e梳仔ma落去,甚至拗斷,ho人感覺真歹勢閣足好笑。建春門外南爿e左衛門陣,有一寡殿上人,提著舍人〔註3〕e弓,嚇驚馬匹做滾笑。Ui牛車e布簾看出去,edang看著格子牆〔立蔀〕內面有主殿司〔註4〕gah女官〔註5〕行來行去,有夠趣味。這是外lin-a幸福,edang di九重禁地中自由行動,想起來感覺真欣羨。Zit角位仔只是宮中小小e一部分,舍人面頂e粉已經落去,白粉抹無著e所在,親像烏土頂面e雪幼仔,實在真歹看。馬e走跳ho人感覺可怕,所以將身軀vih入車內,dor什麼也看ve著a。

初八,逐家為著謝恩無閒,四界歡喜走zong,車聲嘈雜,鬧熱滾滾。

十五是食「望日糜」〔註6〕e日子,將糜進獻ho天皇,無論是公主iah是少年女官,逐家偷偷仔提著煮糜燒無了e柴,等待機會拍人,閣愛提防有人ui後面拍過來,zit款模樣有夠趣味。打著人e,歡喜gah笑聲連連,鬧熱ci-cap,hong拍著e人,感覺真歹勢,這也莫怪。

舊年結婚e翁婿,m知當時會來〔註7〕,害公主等gah坐vediau。一寡自認伶俐e女官先輩,vih deh內面偷看,di公主身邊侍候e人,忍vediau笑出來,mgor隨ho人勸講:「kah細聲e!」公主顛倒是什麼攏m知e款,端莊坐gah直直直。有人假意講:「ho我來收拾ziae物件。」Dor趁zit陣行倚來,將公主e腰拍一下diorh隨suan走,引起在場e人攏笑出來。新郎只是微微仔笑,新娘ma無感覺有什麼奇怪,mgor面suah紅起來,gah人sng做伙。逐家互相拍來拍去,連查甫也拍落去,這m知是什麼心境?Hong拍著e人na哭na生氣,閣罵拍伊e人,連歹吉兆e話ma講出來,這也真心適。親像王宮zit款嚴肅e所在,今仔日suah亂糟糟,一點仔dor無講規矩。

敘官除目〔註8〕e時陣,宮內非常鬧熱。大雪dng落,天寒地凍,逐個人提著自薦書走來走去,官居四位、五位e少年人,精神真好,看起來前途光明;頭毛白蒼蒼e老人,向大官拜託、講情,iah是到女官e處所講家已e優點,少年女官學yine氣口講sng笑,yin家己suah m知影,閣對女官講:「拜託e,向天皇好好廩告a!」講gah真費心,若有得著官位是無要緊,若是得ve著,按呢dor真可憐。

三月初三,天氣清朗,桃花初開,柳樹也值得觀賞。柳芽親像卷起來e蠶繭,但是一旦葉子ti開變大,dor ho人感覺ve爽快。拗一節長長e櫻花樹枝,插di大花矸內,比di外口e時ka好看。無論是人客,iah是皇后e兄弟公子,穿著表面白內底紅e直衣〔註9〕,下面露出美麗e內衫,做伙講話e模樣,看起來真風流。若是有鳥仔gah蝴蝶飛近yine面前,dor更加有情韻。

四月,賀茂祭〔註10〕e時尤其有意思。樹葉iah vue茂盛,葉仔ma真青幼,無霞無霧e天色,ho人有講vue出e感覺,di小可暗淡e黃昏iah是di暗暝,聽著杜鵑稀微e啼聲,假若有閣假若無,zit種心情實在無法形容。等到祭日veh到e時,使者捧著用紙凊采包e黃綠色、深茄仔色e布,四界無閒走zong。Hia-e下面染作深色e,深淺雜染e布,攏比平常時好看,按呢真趣味。女童梳妝打扮,雖然衫是穿舊e、斷線e,鞋仔帶ma是斷去e,猶原hi-hi-hua-huah歸厝間走來走去,ng望祭日趕緊到位。Mgor一旦穿著盛裝,平常時活潑愛din動e查某qin-a,突然變作像捧香爐e法師di練腳步。但是這ma ho人ve放心,所以親族中e婦女iah是阿姊,攏會di邊仔隨時看顧,按呢ma真趣味。

若veh得著藏人e職位,不管yin是m是會得著,ma是仝款穿青色e衫,zit款衫e質料一定是綾織物。

註解

1.正月初七挽七種野草、野菜,將葉仔煮作羹來食,edang除病避邪,zit個風俗來自中國。

2.初七看馬e風俗也是ui中國傳來,看馬edang消除一冬e災禍。

3.殿上人指公卿中edang登殿者,品級di五位以上;舍人是王宮侍衛。

4.主殿司是後宮十二司之一,掌管燈油、薪炭、拚掃e代誌。

5.宮中命婦以上e上級女官。

6.十五食「望日之糜」以除邪,有以煮糜e柴棍仔摃查某人e腰,edang生查甫qin-ae講法。

7.日本當時婚俗,由男方前往女方e厝內。

8.除去舊職就任新官職,正月初九至十一,是地方官員任免e日期。

9.公卿貴族e日常服叫做直衣。

10.四月酉日e祭祀。













-----
創作者介紹

daiqi007

daiqi007 發表在 痞客邦 PIXNET 留言(0) 人氣()