daiqi007

為啥麼以 「自在拼音教學法」做台語拼音輔助教材

前言：

di實際教學中，濟少攏會聽著家長講「為啥麼台語愛教拼音？」，ma有

老師講「反正教育部iah未決定用dor一套拼音，何苦教拼音？」。

以上ｅ講法卡實有一寡道理，但是認真思考gah分析，問題並非是「拼音有教iah是無教」、ma不是「教育部有決定用dor一套拼音iah是無」，重點可能是『「學拼音」zit件代誌看起來好親像真困難』，所謂ｅ困難，當然ma包括老師、家長gah學生。



一、 學拼音卡實有一點仔困難：



過去因為無編教材ｅ問題，台語拼音edang講千奇百怪，所以初學者攏各有師門，對台語ｅ認識，以我個人來講「講講leh、念念leh」並無問題，但是若veh家己寫文章，du著無看過或者是cue無ｅ字，字典是真濟，每一套ｅ拼音方法攏無仝，更加mai講用電腦拍字囉，di zit種情行下台語ｅ能力是無法度提升。

為著veh提升家己ｅ台語書寫能力，我iah學過至少5種ｅ拼音法，過程中ma產生過衝突、拗腦、矛盾gah失望，甚至自問「di zit種情行下，veh如何要求小學生學台語拼音？」。

這就是我感覺學拼音卡實有一點仔困難ｅ理由，但是自從我決定用通用拼音了後，一切ｅ困擾攏解決。



二、 選擇好ｅ拼音輔助教材gah方法是克服學拼音ｅ第一要素：



通用拼音雖然ma是有少數人講伊無夠完美，但是以我實際教學ｅ角度看起來，是目前上適合di小學推廣ｅ。

我本人不是台語方面ｅ學者，ma不是台語方面ｅ專家，但是卻是第一線ｅ專業教師。所以如何教學生，如何選擇上適合學生學ｅ教材，有比台語學者gah專家閣卡深ｅ了解、閣卡好ｅ能力。

當像我zit種第一線老師，開始體會台語文能力ｅ提升gah「會曉拼音」，是有正相關ｅ時，拼音輔助教材ｅ研發gah選擇，就變做是一件非常重要ｅ工作，所以看見江永進教授以無瞑無日研發出來ｅ「自在拼音教學法」教材，

心中充滿了感動gah歡喜，ma第一擺di心中對台語拼音教學ｅ發展有樂觀ｅ向望。









三、 只要有信心「台語拼音教學」一定會落實

有真濟人希望教育部卡緊決定「一套」拼音，才未ho第一線老師m知veh

如何起步，事實上，這m是重點。教育部決定ｅ前題應該是考慮「dor一種拼音卡適合學生」、「dor一種拼音卡有法度gah講求ｅ化ｅ時代結合」、「台語推廣ｅ目標是啥麼？是希望普羅大眾學會曉？iah是veh培養未來ｅ台語文學者？」。

我是一個卡憨ｅ第一線老師，ma是一個希望普羅大眾學會曉台語文e一般百姓。平常時，若du著有感覺，edang用電腦將心內ｅ感動寫落來ｅ提來gah人分享。所以我無等「教育部ｅ腳步」做決定，我用我ｅ專業gah對台語ｅ m甘，di學校選擇上適合學生學ｅ教材gah方法來教「台語拼音」gah日常ｅ台語文，ma有信心將台語教學di校園內落實。



結語：

如果你是一個對台語有感動iah是有心ｅ老師，當你看著江永進教授用心為台語研發出來ｅ相關教材gah方便使用ｅ台音輸入法，就edang體會gah了解

台語文因為有zit寡人ｅ無私付出，一定會愈來愈有成果gah向望。



新竹市東園國小 陳 緣老師 2006.02.22