daiqi007

卜肉傳奇



1920年代ｅ三星街仔，一間無上目ｅ日本酒亭仔開di hia。Hit個年代ｅ庄腳所在，會有偌濟ｅ人客來交關呢？除了，除了寒天，毛毛落，落be3停，停gorh落ｅ宜蘭雨水。雖然偏僻，頭家卻是領有牌照ｅ總舖師；雖然細間，各種日本料理、雕花、擺設攏是照步行，be3 a1 sa1 pu1 luh4來襯採；雖然生理普普，每一位人客，頭家猶是用上好ｅ態度來對待，親像宜蘭雨，微微、瞑瞑、綿綿、、、

尾暗，總算則有生理，頭家熱心服務逐家。一個生份面liam當時探頭入來看伊煮菜，看一時仔講：「肉按呢cinn3 be3好食，我教你一路天婦羅、、、肉愛按呢切，醬料愛、、、」頭家雖然感覺奇怪，也是真認真ga這路菜學起來。生份人看頭家會曉，伊則講：「我經過你zia幾仔擺，看會出生理無講真好；mgor你ｅ用心ho我感動，希望這路菜對你ｅ生理有所幫助。」講完伊就走啊！m知影伊ｅ名，伊來自何處。後來頭家將手藝傳ho伊ｅ囝婿，囝婿將店徙去天送埤、、、

第二次世界大戰結束，台灣換一個政府，換一種語言。貼di壁頂ｅ日語「天婦羅」，換寫作用臺灣語翻ｅ「爆肉」。當時印刷無普遍，人客點菜攏是用手寫，「爆」ｅ筆劃過頭濟，寫ｅ時陣就用「卜」來代替，年久月深「卜」就代替「爆」了。但是讀法無變，抑是讀「pok4 肉」，m是讀變調「pok8肉」。經過第三代伊ｅ外孫口味ｅ改良，也將「一塊一塊切角ｅ爆肉」變成「一條一條長形ｅ卜肉」；到第四代，卜肉已經是頂港有名聲下港有出名ｅ宜蘭口味了。

頂面ｅ故事是現在ｅ頭家ga我講ｅ，我問伊zit間店會使存在ziah久ｅ原因是什麼？伊想一睏講：「做一工和尚kiau一工鐘」。「做學生就認真做學生，做總舖就認真做總舖、、、」，這是伊做事ｅ態度，也順續講ho逐家做參考。小朋友，恁茨附近有什麼特別ｅ宜蘭口味boo3？揣一個時間去訪問吧！可能另外一個傳奇故事就ui hia開始、、、

天送伯2002/10/29

【記者ｅ筆親像一枝刀，是手術ｅ刀？抑是tai人ｅ刀？】

【老師手中ｅ鞭，是拍人ｅ藤？抑是指引學生ｅ丈呢？】