卜肉傳奇



1920年代e三星街仔,一間無上目e日本酒亭仔開di hia。Hit個年代e庄腳所在,會有偌濟e人客來交關呢?除了,除了寒天,毛毛落,落be3停,停gorh落e宜蘭雨水。雖然偏僻,頭家卻是領有牌照e總舖師;雖然細間,各種日本料理、雕花、擺設攏是照步行,be3 a1 sa1 pu1 luh4來襯採;雖然生理普普,每一位人客,頭家猶是用上好e態度來對待,親像宜蘭雨,微微、瞑瞑、綿綿、、、

尾暗,總算則有生理,頭家熱心服務逐家。一個生份面liam當時探頭入來看伊煮菜,看一時仔講:「肉按呢cinn3 be3好食,我教你一路天婦羅、、、肉愛按呢切,醬料愛、、、」頭家雖然感覺奇怪,也是真認真ga這路菜學起來。生份人看頭家會曉,伊則講:「我經過你zia幾仔擺,看會出生理無講真好;mgor你e用心ho我感動,希望這路菜對你e生理有所幫助。」講完伊就走啊!m知影伊e名,伊來自何處。後來頭家將手藝傳ho伊e囝婿,囝婿將店徙去天送埤、、、

第二次世界大戰結束,台灣換一個政府,換一種語言。貼di壁頂e日語「天婦羅」,換寫作用臺灣語翻e「爆肉」。當時印刷無普遍,人客點菜攏是用手寫,「爆」e筆劃過頭濟,寫e時陣就用「卜」來代替,年久月深「卜」就代替「爆」了。但是讀法無變,抑是讀「pok4 肉」,m是讀變調「pok8肉」。經過第三代伊e外孫口味e改良,也將「一塊一塊切角e爆肉」變成「一條一條長形e卜肉」;到第四代,卜肉已經是頂港有名聲下港有出名e宜蘭口味了。

頂面e故事是現在e頭家ga我講e,我問伊zit間店會使存在ziah久e原因是什麼?伊想一睏講:「做一工和尚kiau一工鐘」。「做學生就認真做學生,做總舖就認真做總舖、、、」,這是伊做事e態度,也順續講ho逐家做參考。小朋友,恁茨附近有什麼特別e宜蘭口味boo3?揣一個時間去訪問吧!可能另外一個傳奇故事就ui hia開始、、、

天送伯2002/10/29

【記者e筆親像一枝刀,是手術e刀?抑是tai人e刀?】

【老師手中e鞭,是拍人e藤?抑是指引學生e丈呢?】













-----
創作者介紹

daiqi007

daiqi007 發表在 痞客邦 PIXNET 留言(0) 人氣()