科技台文之5

Hubble太空望遠鏡(HST,Hubble Space Telescope)



楊健

清華大學物理系/統計所



細漢暗時gah父母di後埕看天頂e星,是阮以早上愛做e代誌。歸e天e星閃閃sihsih假若呢對你nih目睭。後來大漢了後讀冊kah知影,星e閃sih是因為咱dua e地球有一層氣層。Zit個大氣層會過濾外太空e光線,使得咱看著e星m是像普通e電火球仔一直穩定deh發光,是無停e一閃一sih。

咱攏知影,地球e大氣層ho咱一個保護,使咱ve受著日頭光e灼(ziok6)傷。但是對天文學家來講,zit層大氣層卻會使得紫外線大部分被過濾,使得咱若deh觀察外太空e時陣,不但無法度進行紫外線e觀測,也親像di水底看邊e世界,隔有一層“朦朧”。雖然一閃一sih真sui,但是這是做科學工作上無方便e代誌。所以di 1923年dor有一位號做Hermann Oberth科學家提出太空望遠鏡e概念,希望對太空e觀察有kah好e改進,但是一直到1977年,美國才進行Hubble望遠鏡e製造。

Hubble望遠鏡全長約13.3公尺,闊4.3公尺,重11.6公噸,造價大約二十億美金。伊是由美國e太空梭發現號裝載到太空,kah gorh ga伊放di地球e軌道頂面。由地面e工作人員經過電腦來控制伊e運動gah觀測。而且經過電波ga伊所觀測著e影像送回地面。因為伊dua he地球大氣層e頂面,所以伊edang比地面任何e望遠鏡gorh看kah暗、kah遠e星體,由zia所觀察出來e數據,科學家edang更加kah正確來推算宇宙e年紀gah星體e結構。但是趣味e是,離咱上近兼上大e日頭公--太陽,Hubble卻無法度tang觀察,因為太陽e強光會ga Hubble內底精密e儀器燒害去。

Hubble太空望遠鏡e升空滿足了真濟科學家e夢想,但是因為人為校正e疏忽,伊di製造主鏡打磨e過程出現鏡面弧度e差,致使聚焦(focus)ve準,所hip出來e相片dor親像聚焦無對好e hip像機所攝影出來e像,無法度達到科學家預期e清晰度。雖然後來科學家也發展出來一寡新e數學方法來處理所得著e數據、影像,但是iau有真濟想veh做e觀測無法度做。這可能是發展新數學成本上貴e方法。

現在美國太空總署(NASA)隨時攏ga Hubble所觀測著e資料送上網路,有興趣e人edang上網路:http://wfpc3.la.asu-edu/sah.htm去找上新e資料gah圖片。而且國內e報紙gah雜誌ma無定時會做zit方面e報導,咱攏edang隨時留意參考。

(原登di茄苳12期1996年5月)















-----

daiqi007 發表在 痞客邦 PIXNET 留言(0) 人氣()