daiqi007

細漢qin-a gah細隻金魚仔

(伊朗)

幾a百冬前，di藍色ｅ青空之下，一片青翠ｅ森林內底，有一間厝。Hia dua一對翁仔某，yin有一個細漢後生。日時，zit個細漢囝gah別個qin-a sng，暗時，阿父教伊讀冊寫字。

有一工 阿母ga伊講：

“乖囝a，zitma你已經漸漸大漢a，應該幫助lin老父做一寡代誌。今仔日，厝裡du好無什麼物件tang食啦，你dor去海邊掠一寡魚轉來煮。”

Qin-a擔著魚網仔，dor向海邊去。伊向水ia落網，gorh用力ga qiu起來，發現網仔內有一隻細細小小、金ｅ、紅ｅ、藍ｅ三色金魚。細隻金魚用憂愁ｅ目睭看伊，用人ｅ聲音ga哀求：

“乖qin-a兄，你放我倒轉去大海吧！你若ga我放生，我dor送你一支神仙ｅ鉸刀，用zit支鉸刀 鉸什麼任何形體，伊dor變成真ｅ實體。”

細漢qin-a並無相信細隻金魚ｅ話，mgor伊可憐伊，dor ga魚放轉去大海。

伊du將hit隻魚放落大海，m知按怎，伊ｅ手中dor忽然間有一支鉸刀。伊又gorh向四箍笠仔注意看，看著一片黃葉仔ui樹頂落落來。伊撿起來這片樹葉仔，用鉸刀ga鉸做一座宮殿ｅ形體。伊所看著ｅ情景是伊手內ｅ宮殿愈變愈大，通尾仔變做一座大落、黃金閃sih ｅ宮殿。伊又gorh kiorh一寡樹葉仔，有黃ｅ、青ｅ、紅ｅ、土色ｅ，用yin鉸做各種樹木、花草，dor按呢，宮殿ｅ四箍笠仔dor gorh加一座大花園。

Qin-a走轉去厝內，用紙ga父母gah家己鉸一寡衫仔褲。Yin dor得著各種ｅ綢仔、緞仔、絲仔gah絨仔ｅ服裝，yin穿著zia-ｅsui衫，做伙搬入豪華ｅ宮殿，日子過得足富裕。

過一段時日了後，qin-a開始悶悶不樂，因為厝內人無願肯ho伊走出花園，ma無veh ho伊gah永早ｅ qin-a伴交陪，zitma a無人陪伊cit-tor。阿母教伊愛惜好衫，mtang gor la-sap去，mtang sng沙仔，ve使做zit項，ma ve使做hit項。

父母ma m准伊去森林、田野，連海邊ma禁止，因為，yin驚hit細隻金魚會gahit支神仙鉸刀討倒轉去。

按呢ｅ生活方式，ho qin-a過得足無自由，ma足寂寞。逐gai，伊若聽著遠遠傳來ｅ陣陣笑聲，伊dor足想veh拚出去gah過去ｅ qin-a伴做伙笑、做伙sng。伊想veh gorh再去森林內底，幫厝內kiorh一寡柴，a是去田裡做kang-kue。

有一暗半暝，伊勻勻仔ui厝內走出來，經過花園，一直走到海邊。

“我ｅ金、紅、藍三色ｅ細隻金魚a，你di dor位？我走來ga你講，我無需要zit座宮殿。細隻金魚仔，你出來幫忙我，我想veh恢復過去ｅ生活方式！”

細隻金魚連鞭浮起來水面，對伊講：

“我ｅ好朋友，你dor去過著以早ｅ生活方式吧！你zitma雖然有錢、有地位，mgor，m是靠雙手拍拚得來ｅ金錢，是vedang帶來人真正ｅ快樂gah幸福。按呢啦！等日頭若出來，你dor ga鉸刀dan轉來大海，gorh ko三聲si-a了後，你dor會gah以早仝款幸福、快樂。”

早起，東爿du露出魚肚白ｅ日花仔，金色ｅ日頭du出一點點仔光絲，qin-a ga鉸刀dan回大海中，gorh ko三聲si-a。

伊轉去厝裡，金宮殿連影dor無，阿母gah古早仝款，kia di矮厝仔ｅ門腳口，嘴角微微仔笑，等待伊ｅ囝轉來！