三人五目,日後無長短腳話(劇本)

新竹國小 盧玟伶



第一幕:做媒人

人物:媒人婆仔、獨眼e小姐、獨眼小姐e阿爸(老爺)gah阿母(夫人)

地點:獨眼小姐in兜e客廳

啟幕e時,老爺gah夫人坐di客廳lim〔喝〕茶,媒人婆仔按外口入來,na行,手na拽伊e手巾仔。



媒人婆仔:老爺、夫人lin找我有什麼代誌?

老爺:媒人婆仔,阮知影你是庄仔頭上ghau做媒人e,今仔日想bheh請你ga阮查某囝找一個親成。

媒人婆仔:這無問題啦!若別項咱就mai講;若做媒人,你找我就對a。M是我le臭彈,講著做媒人,咱庄仔內是無人due我會對,看你bheh找什麼款e親成,作你講,包你滿意。(手長心肝頭掛保證)

老爺:(表情真歡喜)若按呢,我先ga你說多謝。

媒人婆仔:m知老爺想bheh找什麼款e囝婿?

老爺:會疼某閣顧家e少年家,我上甲意,厝內散赤無要緊。

媒人婆仔:這無問題。是講… …(媒人婆仔講話吞吞吐吐),m知敢會使看小姐一下。

老爺:查某囝in阿娘,去ga咱查某囝叫出來。

媒人婆仔:(di小姐e身邊看前看後)老爺,做你放心,安啦!。相親hit一工,會記zit ga小姐準備一支葵扇,叫小姐ga hit蕊〔lui〕無看e目睭zah 〔遮住〕leh,m通bhe 記o!





第二幕:相親

人物:媒人婆仔、獨眼小姐、跛腳少爺。

地點:媒人婆仔in 兜。

起幕e時,跛腳少爺徛di樓梯邊,一隻腳kue di樓梯。獨眼小姐ui房間行出來,手舉一支葵扇,葵扇ga hit蕊〔lui〕無看e目睭zah〔遮住〕 le。



媒人婆仔:(行ui小姐hia去)小姐,zit位就是我ga你講過hit個緣投、漂撇閣大範e少爺,少爺m定家世好、學問guan〔高〕,人品更加無話講、真正是一粒一e人才。

(獨眼小姐愈聽愈歹勢,頭愈ann愈低〔愈壓愈低〕。)

媒人婆仔:(行對少爺hia去)少爺,zit位就是我ga你介紹hit個妖嬌閣迷人e小姐。小姐e個性溫柔、賢淑,得人疼。你拍燈仔火ma找無第二個,你若娶著伊,絕對是人人欣羨、人人呵咾e。

媒人婆仔:少爺,m知你e意思啥款?

少爺:(媒人婆仔愈講,少爺愈甲意。)好!真好!真好!有啦!有啦!我有甲意!我有甲意啦!

媒人婆仔:a!小姐,你le!

小姐:(小姐歹勢gah面仔紅gi-gi,一粒頭ann gah低低低,ham看少爺ma m敢看。)(細聲ga媒人婆仔講)我有甲意啦!

媒人婆仔:既然lin攏有甲意對方,若按呢我就當lin二人e面ga話講ho清楚,zit zan〔這件〕婚事是lin二人歡喜甘願e。今仔日,你我三人五目,日後是bhe使有長短腳話o!



第三幕:理論

人物:媒人婆仔、獨眼小姐、跛腳少爺。

地點:媒人婆仔in 兜。

背景:成親了後,小姐發覺少爺跛腳,少爺發現小姐獨眼,二人相招去找媒人婆仔理論。

起幕e時,媒人婆仔坐di客廳舉葵扇拽風,少爺gah小姐氣put-put ui外口行入來。媒人婆仔看in按呢,趕緊kia〔站〕起來。



少爺:(氣put-put)媒人婆仔,nai按呢!你m是講小姐外好du外好,nai〔怎會〕是獨眼e!

小姐:(氣put-put)就是啊!你m是講少爺外緣投、外漂撇,nai〔怎會〕是一個跛腳e。

媒人婆仔:少爺、小姐,lin ma mai受氣,我a無ga lin騙a。當初時,我dor ga lin講過a,「你我三人五目,日後bhe使有長短腳話」。

媒人婆仔:少爺,你想看mai,咱三個人應該有六蕊目睭,但是我是講『你我三人五目』,當然dor是leh講咱其中有一個人是獨眼e。而且,小姐除了獨眼以外,敢m是真賢慧、人人呵咾?你看人伊e身材是葫蘆腰,皮膚ma是白pau-pau、幼綿綿lo!外sui你敢知!

少爺:(若啞gau〔啞巴〕有話講bhe出嘴。)(di-di-du-du nai〔支支吾吾〕)是啊!

媒人婆仔:iah閣有,小姐,我ma有講過「日後無長短腳話」,這明明dor是leh ga你講,你有一雙好腳,我ma有一雙好腳,若按呢當然有一個人是長短腳lo!而且,少爺除了跛腳以外,甘m是體貼、顧家閣真疼你?你看人伊e面生做一表人才,鼻dor是鼻、嘴dor是嘴,講話嘴會振動、目睭ma會看人,外靈敏你敢知!

小姐:(目睭大大蕊,掠媒人婆仔憨憨看,越頭閣看少爺)有啦!有影啦!

媒人婆仔:相親e時,我就講「你我三人五目,日後無長短腳話。」lin hit陣攏無意見,zit mai奈會使後悔!

(少爺gah小姐二人目睭相對相,na看suah na愛笑。想想e,媒人婆仔講e話ma是有理。二人ga媒人婆仔說〔se〕多謝,歡歡喜喜牽手相cua轉去。)



謝幕。







問題討論:

1.你若是hit個跛腳e少爺、iah是獨眼e小姐,你會安怎?

2.媒人婆仔講e話,你感覺敢有道理?

3.換你講你想bheh討論e問題,ho大家來討論。





















-----
創作者介紹

daiqi007

daiqi007 發表在 痞客邦 PIXNET 留言(0) 人氣()