daiqi007

二個天才數學家ｅ悲劇故事



歷史上，有真濟成就足guanｅ數學家，mgor，親像下底veh介紹天生ｅ天才數學家suah無濟。逐家公認ｅ頭一個是Abel, Niels Henrik[阿貝爾]，第二個是Galois, Evariste[伽羅瓦]。Yin二人dor親像天頂ｅ流星，是hia-ni-a光彩、hia-ni-a使人注目，mgor，伊siu一下dor消失di hit個烏暗ｅ世界。

Abel出世di 1802年ｅNorway[挪威]，老父是一個牧師，厝內有七ｅqin-a。因為當時瑞典ham英國爆發戰爭，所以當時ｅ生活環境非常ｅsan食，mgor yin dau逐個人猶原非常互相體貼恩愛，是一個幸福ｅ家庭。

Abel 15歲ｅ時陣，di學校內底並無展現出伊驚天動地ｅ才能，一直到伊ｅ好運cue伊報到ho伊du著一個好老師Holmboe[霍姆彪]。Di hit個老師ｅ教示之下，Abel發覺著家己ｅ數學興趣gah才能，開始研究前人ｅ著作，包括Gauss[高斯]ｅ《算術研究》。從此以後，數學著變成伊ｅ職業，ma變成伊上大ｅ趣味。而且，伊ｅ老師ma ziann做Abel足好足親ｅ朋友。

Di Abel 18歲hit冬，yin老父過身，Abel扛起厝內扶養其他兄弟姊妺ham照顧yin媽媽ｅ責任，伊開始收一寡學生，趁錢飼厝內ｅ大大細細。雖然生活重擔落di伊ｅ身上，mgor伊猶原樂暢，相信伊家己edang 成做大學教授，所以伊ia是繼續拍拚做研究，mvat斷停過。

Abel vat研究過一般ｅ“五次方程式”，伊di當時想講伊算出一般解法，mgor，無外久dor發覺伊家己錯了，伊並無因此失志，顛倒換另外ｅ角度去研究zit個問題，伊證明出一般ｅ五次ia是gorh kah guanｅ方程式無一般ｅ解法，dor是無法度用加、減、乘、除、開次方等等ｅ方法來表示。伊將伊ｅ結果寄ho 當時ｅ大數學家Gauss，mgor無受著Gaussｅ看重，這是一個不幸ｅ開始。若是Gauss有好好看過，Abelｅ一生反勢完全無仝。

後來，Abel di伊ｅ恩師ｅ幫助之下，先keh 著初等學位，gorh去當時ｅ數學聖地德國ham法國去朝聖觀摩，結果suah受著真濟大數學家ｅ無尊重ham看輕，唯一ｅ好運dor是伊du著Crelle[克萊爾]，幫Abel發表論文，gorh ho Abel足濟幫贊。Mgor Crelle並無di Abel在世ｅ時陣帶來名聲ham完成Abelｅ夢想。

Abel di 1829年hit冬，因為生活愈來愈艱苦，上尾後因為破病來過身，hit冬伊ziah 26歲，di伊死後二工，Crelle 卡寫批gah Abel講伊ｅ拍拚有了結果，veh聘伊來做柏林大學ｅ教授，這是一個ho人怨嘆、慢來ｅ榮譽。

另外一個是Galois，伊出世di 1811年ｅ巴黎一個小莊園內底，爸母攏是有知識教養ｅ人，11歲進前攏是yin媽媽leh教，12歲卡進入高中，伊活di一個暴動ham革命ｅ時代，所有ｅ學生攏ho人控制diaudiau。所以漸漸Galois對文藝ham古典文學感覺討厭，ganna 求會得過dor好。

一直到Galois du著Vernier[弗尼爾]，伊ｅ數學熱情ziah來引發出來，伊開始讀一寡數學大師ｅ著作，包括Legendre[勒讓得]、Lagrange[拉格朗日]，後來gorh讀了Abelｅ論文，當時伊只不過是一個十幾歲ｅqin-a niania。Abelｅ天才，完全di數學頂guan展現出來，伊定定di伊ｅ頭殼內底做上困難ｅ數學研究，而且伊ｅ想法攏足奇怪，學校對伊ｅ評語是「特殊、怪異、有創造力gorh兼封閉」ｅ獨行人。

Galois di 16歲ｅ時陣，ham Abel犯了仝款ｅ錯誤，伊ma認準伊解出一般五次方程式，mgor當然是一下仔著發覺m對，只是伊無像Abel繼續研究落去。後來，伊去報考伊理想中ｅ大學 -- 綜合工科學校，因為伊ham主考官爭論一個數學難題，發生了衝突，而且hit個主考官gorh相當固執，Galois感覺家己ｅ希望veh破滅ｅ時陣，開始失去耐性，烏枋hu-a sa起來，dor對hit個考試官ｅ面get落去，拍 gah準準準，攏無歪，mgor，從此以後，學校ｅ大門ma無gorh為伊來拍開。除了考試無順以外，yin爸爸ma因為一寡人ｅ中傷來自殺，di告別式中，gorh受著市民ｅ破壞，Galois因此受著第二層ｅ傷害，開始行上極端ｅ人生觀ham政治觀。

17歲ｅGalois，將伊進前所研究ｅ基本發現寫做論文，交ho科學院，當時數學界ｅ權威Cauchy[柯西]答應幫伊提交，mgor Cauchy suah vue記，Galoisｅ論文ma對zia以後無聲無說，zit個災難ho Galois開始怨恨科學院ham內底ｅ院士。一個天才數學家著因此受著掩kam，失去了光彩。

Di考試失敗以後，Galois猶原孤單ｅ進行伊ｅ研究。1830年，伊用伊ｅ代數方程ｅ論文veh去爭取科學院ｅ數學大獎，mgor上天並無因此加gah照顧，悲劇gorh再度發生，論文ho Fourier[傅立葉]cong無去，Galois ganna edang目睭金金看Abel ham Jacobi[傑克比]得著zit個榮耀。Di極度ｅ失志當中，伊去參加激烈ｅ共和主義，加入炮兵部隊，並帶領暴動，反對帝制，mgor無外久伊著ho人掠去關。

Di坐監ｅ時間中，伊ma是繼續數學研究，而且，伊gorh di hia熟識伊ｅ初戀情人，mgor，伊ｅ情人是一個伯爵夫人，伊注定不幸。伊決定veh ham伯爵ding-go-gi[???]，di伊veh去決鬥ｅ前一暗，伊將伊ｅ研究成果寫落來，並且寄ho伊ｅ朋友，zia ｅ成果dor是數學界足出名ｅ「Galois理論」。隔工，Galois dor ho對手開槍彈死，hit冬伊21歲，一個天才dor按呢 ham zit世間告別。

Zit二個悲劇，edang講是上天ｅ創治，Abel因為siunn過san食，所以才能無法度展現；Galois suah因為人ｅ疏忽ho伊ｅ生命無法度發揮到極致，真正可惜。Yin二人ｅ成就，帶ho數學界足大ｅ進步，ma ho其他ｅ數學家開始無閒，替數學注入新ｅ生命。如果yin二人若是edang活kah久淡薄a，數學界反勢dor有新ｅ面貌出現。Zit二個故事真正驗證了天才總是孤單，命運總是悲慘ｅ話語。Di仝款ｅ時代，二個天才，二個悲劇，真正無采。Mgor，yinｅ悲劇，hiaｅ大數學家ma愛檢討，定定攏是因為人ｅ地位提高了後，dor開始看人無，我想，這kah是真正ｅ悲哀。





簡介：我是信輝，台南人，讀台南一中畢業，現在di清華讀數學系，未來想veh繼續讀數學。自細漢di台南大漢，所以對台語有一寡興趣，希望未來edang寫出一寡物件。Ui大學二年修有關係台語課程，dor開始deh寫《數學家ｅ故事》，zit本冊加上全羅注音，將di 2007 veh出版。