daiqi007

上親e聲音 林洵妤 台語現代文選～母親節



ui細漢開始，dio有zit leh聲音di咱e身邊，gah咱講『乖，ai食飯喔！』『乖乖睏喔！』，gau zit-ma zit leh聲音猶原常常出現di咱耳孔邊『家己出門在外ai 小心，三dng ai 食…』這dio是媽媽e聲音。

二十幾年來，雖然咱ma大漢啊、媽媽e皺紋ma gorh kah濟，mgor無變e是媽媽e聲，hit份偉大e親情gah關愛源源ve絕。無論咱dam sia-mi所在，永遠是媽媽掛念e寶貝仔giann。

大部分人一定有這款e經驗，當咱心情vai e時陣，一通電話ka轉去，媽媽一聲『喂』，目屎馬上len下來，這是一款奇妙e感覺，雖然無看到人，mgor聽到上親e聲gang kuann edang ho咱感到安全gah溫暖，這份無形e心靈感應，是上帝創造人類上din貴 e寶物。

母親是守護咱e天使，永遠kia di咱e面頭前，帶領咱向前行，保護咱無受傷害，永遠用伊上親e聲音，指引方向、提醒咱一寡a伊行過感覺ai注意e所在。雖然我感受到媽媽e辛苦，mgor母親e心情，真正是ai做過e人才有法度體會。

母親節u gorh gau啊！每年gau zit leh時陣，電視定定報導相關e新聞，足濟e康乃馨gah禮物。Mgro，母親e辛苦m na一天，是一世人，所以感謝gah感恩是隨時攏ai kng di心肝底。

咱永遠e qi li媽媽e聲音，媽媽e面容，不論大環境安怎改變，無變e是這份可貴親情ham媽媽上親e聲音！