daiqi007

媽媽ｅ裁縫車仔
張春凰
Ui我ｅ年歲猶未跳過二字數以前，應該講是有記持ｅ時，媽媽ｅ裁縫車仔就是阮家庭ｅ 一份子。
媽媽ｅ裁縫車仔 是一台kia架 箱仔款 木材gah鐵材 用腳踏 國產月友牌子ｅ舊式針車，雖然伊是一台老型ｅ古董，hit當時對媽媽來講是ziah nih-a重要，閣代表due會著時代ｅ意義 ni！就親像咱人用步lian，後來有腳踏車，新工具ｅ使用會改變生活ｅ腳步，裁縫車仔對媽媽ｅ方便閣親像蒸氣機發明了後，致使第一次ｅ工業革命，歸個社會文明大大向前hann 一大步，機器代替手工了後 動力就有真好ｅ替手，有ziah nih-a大ｅ幫贊，莫怪媽媽一直ga留di身邊！
媽媽今年七十四歲，裁縫車仔zitma 是kng di伊ｅ房間內ｅ窗仔邊，ho一條繡花罩 罩diau leh，伊三不五時就會用著，veh用進前，伊攏先拭拭buann buann leh，才開始車車補補改改leh！ 用好閣巡巡看看 油食食ho好 閣收ho好勢。
媽媽m vat拜師學過裁縫閣無讀冊，是有樣學樣 無樣家己想，變出來ｅ衫gah褲，就是家己qiah舊衫，照舊形畫紙樣，比紙樣鉸領、手袖、前片、後片、褲身、褲叉仔……用針一針一針tinn，橫布接直布，直布套cuah布，布幼仔一塊一塊接連一領衫，自伊做查某囝仔姑娘ｅ時陣就真伶俐。一直到入阮厝門，囝仔像粽guann按呢一個一個出世了後，家己創造ｅ“媽媽流”就di厝內流行起來: 大領衫改細領衫、查甫衫改查某衫、大領衫變細領褲、大領褲變細領ga仔、褲腳管變lak袋仔、圓裙變窄裙、白布染烏布 麵粉袋仔變內褲……一陣qin-a穿gah 鮮鮮鮮，無注意看根本就看ve出來是舊衫變新衫，“媽媽流”講破實在無值半現錢: 省布、省錢nia-nia，變變變... 媽媽假若deh變魔術leh！ 目睭珠金、腳手緊，魔術師ｅ第一大功臣就是zit台裁縫車仔。　 　
裁縫車仔ｅ配角:鉸刀、線gah針……鉸刀假若是司公ｅ聖杯，媽媽ｅ鉸刀數十冬來攏磨gah金金gah利劍劍，伊m准人用zit支鉸刀 鉸紙、鉸頭毛，理由是鉸刀若鉸鈍去，剪布會歪cuah，布 剪ve落去 kang-kue就ve做leh！線是消耗品，針穿線 線due針用來tinn鈕仔、縫褲腳gah裙尾…… 不管時一定是一支針穿一條線，結扑好好插di用頭毛包tinn 起來掛di車仔邊壁面ｅ針包頂懸。“按呢edang一面應付穿di身軀ｅ衫褲ｅ鈕仔、褲ken仔 若一時落去veh tinn才會緊，一面是為著安全，因為針若鑿入去身軀內，會due血走，掠ma掠ve著，這就害啊！ 愛斟酌 ！”zit個故事是媽媽定定講ｅ！
磨鉸刀、買車仔針、dah車油是細漢ｅ時，印象非常深刻ｅ代誌，車仔線一粒一粒 dinn好好，若有veh liu線，有時仔會扑結球、線結愈giu愈濟、心頭愈亂操操，這就知苦啊！Zit時媽媽就教阮愛有耐性，寬寬來 m tang急！
Zit台裁縫車仔，due阮兜搬過三遍厝: 大瓦厝到舊土角厝、閣搬倒轉來大瓦厝、閣搬入來zitmaｅ樓仔厝，過程中媽媽ｅ雙手、堅強ｅ個性、勤勞理家、觀前顧後、 大大細細、事事萬項、無論是風雨、抑是平靜，媽媽攏是守著zit個家，裁縫車仔ma留di媽媽ｅ身邊gah伊ｅ主人忠心共守，伊ｅ存在代表著我後頭厝ｅ過去gah未來ham家庭文化，是媽媽一雙變形ｅ腫頭辛辛苦苦gah爸爸鬥拍拚出來ｅ，是yin ｅ心胸坦白、做人仁慈ho in ｅ子孫感受著平凡守本份！
好頭好尾ｅ信念gah福氣，實在m是ui天跋落來！ 媽媽惜福 ui掩di裁縫車頂面ｅ kam 罩edang證明，zit條繡花罩是我初級中學ｅ家事作品，二十外冬後，我嫁出門閣出國讀冊，看著 zit條白繡花布ho媽媽保存gah白siaksiak，白布身頂面ｅ繡線色緻五彩分明，本成是一條普通ｅ粗布ing iah無什麼特別ｅ藝術圖案，但是ho媽媽ｅ愛心放大gah真誠sui，ma ho我想起青春少年時，更加重要是感想著媽媽ｅ身教！
二姐仔本來有一塊鐵飯碗，嫁了無外久，辭頭路專心相夫教子，用伊彈琴ｅ雙手來做衫改衫，功夫誠有師父味， 雖然伊ma是無師自通，雖然伊ma是用相仝舊形ｅ裁縫車！自從大嫂去成衣公司上班了後，厝內閣買一台卡專業、新型ｅ裁縫車仔，伊ｅ大漢查某囝去讀家職學校服裝設計科，畢業到現在一直用zit台車仔認真學功夫，阮兜第三代是“摩登時尚流”gah“媽媽流”無仝leh！ 第二代ｅ定位是di zit 二個流行派中間，媽媽gah伊ｅ裁縫車仔，是阮初步ｅ啟蒙老師。
熱人去寒天來，寒天過去熱人閣再來，數十冬來季節若變換，媽媽就用伊ｅ裁縫車仔ga衫改ho卡合身，合伊ｅ習慣，雖然厝內有新型ｅ裁縫車，有少年ｅ裁縫師，伊ma 是愛家己用彼台舊型ｅ裁縫車，因為媽媽會曉做衫，厝邊隔壁一直認為古早伊去學校讀過冊！有可能這是其中ｅ一個原因，老來伊閣拍拚讀佛經，人伊積少成多，加減ma識一千五百字左右！
是按呢，我知影媽媽有伊家己ｅ福氣，是按呢，伊ｅ裁縫車仔猶原好好閣due di伊ｅ身邊！
(1993年9月)