daiqi007

一封情批 李軝

親愛的○○：
今仔日ｅ暗時，窗外ｅ月娘高高掛di天邊，天頂e星光閃閃耀耀，耳孔內傳過來夜蟲ziu-ziu ｅ叫聲。Di zit款無眠ｅ暗眠，我一頭lim著茶米ｅ清香、一頭想起妳美麗e形影。頂一gai gah妳短暫ｅ離別，ho我更加深對妳無限ｅ相思。
妳甘會記：舊年ｅ春天，咱二個手牽手同遊日本東京，欣賞櫻花開ｅ快樂日子。輕輕仔行di上野公園，照di咱目睭前e，是滿天艷麗e櫻花，背後伴著古典ｅ廟寺，景色真sui。妳hit個清秀可愛ｅ嘴pe，摻著櫻花淡淡e清芳，使我迷戀ve止。是「人比花嬌」，a是「花襯儷影」，我分ve清楚。
咱二個鬥陣dor di櫻花樹腳，隨在落花飄滿一身，一種幸福、快樂ｅ情絲，充滿di妳我ｅ心內。一位日本人，ma感染著咱ｅ幸福，伊為咱二個hip著真濟張ｅ相片，ziaｅ相片，ma記錄著咱二個人堅定ve變ｅ愛情：
今仔日暗時ｅ風城，依然吹來一陣陣ｅ強風。立冬以後，寒意漸漸深，妳愛加穿一領衫，ma愛保重家己ｅ身體。Di黃昏ｅ時陣，看著一群群鳥仔向南飛去，ma希望我親像鳥仔仝款，有一對翅仔，會使飛到千里以外，飛去妳e身軀邊，gah妳每工做伙，以免去我對妳ｅ相思。最後，
祝妳
青春美麗！
友李軝謹上
98年11月28日