地獄變
芥川龍之介 原作 張春凰、 邱玉山 台譯
一、
親像 dua di 堀川ｅ zit個所在ｅ zit個大人(dai3rin5)， 不止過去無， 恐驚後代 ma cue無 第二個。 聽講大人 dih veh 出世ｅ時 ，大威德明王(註1) vat來 ga yin 老母托夢。 不管安怎， 伊一世人 dor gah一般人 無仝款， dor是按呢， 伊ｅ 行為， 無一項 m是超出 咱ｅ按算 以外。 先講 di堀川府宅ｅ 規模好 a， m知是veh講 壯麗， 或者是 有派頭， hit寡 特別ｅ所在， 根本m是 咱普通人 edang掠準ｅ。 Dor按呢， 有人講 一寡 五四三ｅ話語 ga伊比做 秦始皇 或 隋煬帝， zia-e講法 dor親像 「青盲人 deh摸象」。 伊極m是 hit種 縳褲腳做人 ganna顧 家已一身ｅ 榮華富貴， 伊是 為 百姓人仔 設想， edang講是 gah大眾 同甘樂， 足有肚量ｅ 人。
Dor按呢， du著 二條大宮ｅ 鬼眾夜遊， 伊一絲仔 ma無受影響。 Iau有hit寡 仿著 陸奧鹽竈(註2)風景 來起造 有名聲ｅ 東三條河洛原院， 聽講 融左大臣ｅ靈魂 逐暗 攏會出現， mgorh經由 大人 一聲huah嚷 了後， dor m敢 再出現a。 大人ｅ威嚴 ziah大， 莫怪 近來 洛中京城ｅ 男女大細， 一聽著 大人 dor敬畏崇拜， ga伊 當作神明 下凡來。 有一gai， 大人 ui大內ｅ梅花宴 轉來， dior車ｅ牛 逃走， 撞著 過路ｅ 老歲仔人 受傷， 老歲仔人 di zit 款時陣 iau合掌禮敬， 嘴講 去ho大人ｅ牛 撞著 是 愛感謝ｅ。
所以 di大人zit代， 有真濟故事 流傳到 後世。 比如： vat di宴會上 賞賜三十隻白馬， di長良橋ｅ 橋柱頂 cai立 心愛ｅ童像， 請過 傳授 華陀醫術ｅ 中國比丘 ga伊 切除 生di腳腿ｅ粒仔……， 若veh 一項一項 算詳細， he dor真正 算ve清lo。 Di 所有zia-e 風聲傳奇 中， 無比 大戶人家 所看重ｅ 傳家寶物-- 「地獄變」屏風ｅ由來 ho人 更會膽寒lo。 連 平常穩重冷靜ｅ 大人， ma di hit個時陣 驚心動魂， 閣卡 m免講 阮zit群 di伊身邊 侍侯ｅ人， 阮逐人 ma攏 驚gah 失魂落魄。 Dor親像 我服侍大人 巳經有 二十多冬a， di zit 層代誌 發生ｅ前後 ma無任何 比這 卡可怕ｅ。
若veh談論 zit件事， dor先愛講 hit個 描繪hit幅 「地獄變」屏風ｅ 畫師，zit個人 叫良秀。
二、
講著良秀， 可能iau有人 會記得 zit個人。 伊 是 出名ｅ畫師， hit當時ｅ人 公認伊 是 一粒一ｅ 畫師。 Hit件代誌 發生ｅ時陣， 伊ｅ歲頭仔 ma過半百a。 外表 看起來， 體格矮矮a， 瘦gah 腳脊骿 透 bing仔骨， 是 一個歹心形ｅ 老歲仔人。 伊去府宅ｅ時， 攏會穿 薰芳ｅ禮衫， 戴軟烏帽仔。 品格猥瑣， 無一個 老人款， 伊ｅ嘴唇 赤紅， 紅 gong gong ho人驚惶， 假若deh展 野獸ｅ歹惡。 有人講 伊定定去 舐（zinn2）畫筆， 才會 ga嘴唇染gah 紅gi gi， m管事實 是安怎， dor有 歹嘴ｅ人 講， 良秀ｅ舉動 好親像 猴仙仔， 閣 ga 取一個「猴秀」ｅ 外名。
講著良秀， iau 有 一段故事。 Hit 當時， 伊iau有 一個 孤查某囝， di 大人ｅ府宅 做 zo-gan-a[小侍女]。 Zit 個 十五歲ｅ zo-qin-a[小女孩]， 一點仔 ma 無像 yin老父， 生做秀美。 可能是 老母早過身ｅ 關係， 天生足有 同情心、 巧智、 精功， 少歲年輕， 對人 轉頭越角 真體貼， 所以 夫人 gah 其他女眷 攏真疼惜伊。
有一 gai， 丹波國 進貢 一隻訓練過ｅ 猴仙仔 來府上， ho hit 當陣 du 是 liu-ciuh[頑皮]ｅ 小公子 ga 號名 叫「良秀」。 Hit 隻猴仙ｅ外形 實在 足笑詼，閣加上 zit 款名， ho 府內 每一個人 看著 dor起愛笑。 若是 ganna笑nia dor無要緊， 是 逐家 愛創治伊 ， 三不五時 dor 大細聲 huah： ai-ia， 良秀跳去埕斗ｅ 松樹項， ai-ia， 良秀 gor la-sap房間ｅ 草蓆仔， ma 刁故意 veh 戲弄伊。
有一工， 良秀 ｅ zo-giann teh著 縳臘梅枝椏ｅ 批信， 經過長長ｅ 走人巷， 看著 猴仔囝 ui 遠遠ｅ qiu門hit爿， 跛腳ｅ形， 無像平常時 按呢 爬去樑柱， 是 喪氣傷痛 hit款， 一拐一拐 ui 伊zia 跳走過來。 小公子 qiah 一支捶仔 ui 後面追， 嘴內 閣嚷： 「柑仔賊， 好膽mai走！」， 伊看著 zit款情形， 張持一下， du 猴仙仔 走來 qiu 伊ｅ裙裾， 發出可憐ｅ 哀叫---- 目一下 心肝 m甘diuh diuh， dor 一手 qiah 梅枝椏， 一手輕輕仔 hainn 開 茄仔色 ｅ 疊衫長袖， 溫柔 ga猴仔囝 抱 leh， 向小公子行禮， 輕聲細說 講： 「拜託 饒伊 一條命， 伊 只不過是 精牲 nia nia 。」。
小公子 du 走過來 一腹肚火， dor變一個面， zan腳dor蹄 講： 「為何 veh 保護伊， zit 隻猴仙仔 是 柑仔賊 a！」
「a伊 dor是 一隻精牲nia，……」
Zo-qin-a 閣求一遍情， 然後 冷微笑一下， 閣 下定決心 講：
「因為 伊叫良秀， ho 我感覺 是 阮老父 deh hong罵， 我 dor veh 為伊。」 聽著 zia-e 話， 小公子 只好心服。
「是按呢siorh？ 既然是 deh替阿爹 求饒， 我 dor 姑不二終 饒赦伊。」
小公子 無情無願 講了， ga 捶仔 dann 去邊仔， dor ui 原來ｅ qiu門hit爿 行去a。
三、
Ui hit件代誌 開始， 良秀 ｅ zo-giann gah 猴囝 dor足親密。 Zo-qin-a ga小姐 送 ho伊ｅ 金鈴仔 用 sui sui ｅ 大紅線穿 leh， 掛 di 猴ｅ頷頸， yin 二個 形影相隨伴 有一 gai， zo-qin-a 感冒倒 di 眠床頂， 猴囝 dor 乖乖 di 抌頭邊 陪伊， 看起來 真煩惱ｅ形， 伊心理不安， 一直deh ke爪仔。
足奇ｅ是， 自按呢， dor 無人 閣再欺負 zit 隻猴囝 lo。 反倒是 開始疼伊， 連小公子 ma 定定 dan 一寡 柿、 栗子 飼伊， 有一 gai 一個武士 踢伊， 小公子 閣會生氣leh。 後來 大人 特別下令 叫 良秀ｅ zo-giann 抱猴去 晉見伊， 聽講ma是 因為 小公子 起性地ｅ 代誌， a zo-qin-a疼惜猴 ｅ 理由 ma 入去伊ｅ 耳孔內。
「有影 伊 是 一個孝女， 值得呵咾！」
因為 大人ｅ 好意， 伊賞賜 一su 紅衫 ho zo-qin-a ｅ hit當時， 這閣是 zit隻猴仔 弄猴弄 學人樣 恭敬 去接禮物， ho大人 特別歡喜心。 大人疼惜 良秀 ｅ zo-giann 完全是 看在伊 疼惜猴 gah 孝敬心， 極 m是 一般人 所講ｅ hit 款 好色心。 有 zit款話屎 ma是有原因 ｅ， zit方面ｅ 理由 咱 以後 慢慢仔講。 Di zia ganna想veh 向各位講， 無論 伊 有外秀美， 大人對伊 ma ve 對畫師身份ｅ zo-giann sannh心。
良秀 ｅ zo-giann di大人面頭前 面子十足， mgorh 伊本底 dor是 聰敏伶俐ｅ少女， ma 無受著 hia-ｅ 心腸窄ｅ 女眷怨妒。 反倒是 ui hit gai 事情了後， 伊gah猴 攏受著 卡好ｅ款待， ma 一直 deh 伺侍公主， 逐gai 陪公主 出遊坐車ｅ 機會 ma無漏過。
Zitma暫時 mai 提 少女伊本身， 咱來談論 伊ｅ老父 良秀。 雖罔 猴仙仔 真緊 dor得著 人人ｅ疼惜， mgorh， 良秀本人 ma是仝款 人人看著 dor 討厭， di 尻川後 猶 deh 叫伊猴秀。 出去府宅 之外， di 橫川 是 主持身份ｅ 方丈 若講著 良秀 dor變面色， 好親像 見著魔神仔， 伊 dor 氣gah 咬牙切齒。 (當然， 有人講 這起因 di良秀 ga方丈ｅ行為 畫做 笑詼kauseh 戲畫ｅ 緣故， 不二過， 這ma是 下腳手人yin 所傳ｅ話屎， m免信dau。) 總講一句， 無論到due， 良秀ｅ風評 攏足差。 若有人 對伊 無惡評 是vat伊ｅ 二、 三位畫師， 閣有 zit 寡 vat 伊ｅ圖畫， m知 伊ｅ個性ｅ 人 lo。
事實上， 良秀 不但 外貌猥sue， 伊iau有 更hong棄嫌ｅ 惡習慣， 所有ｅ一切 攏是 家己做起來ｅ， mai怪人。
四、
講著 良秀ｅ 歹習慣， dor是 凍霜、 冷酷、 無恥、 貧惰、 痟貪……，其中 上嚴重ｅ是 hiau bai自大， 不時不刻 攏ga本朝當今 第一畫師ｅ身份 掛di鼻頭頂。 若是 ganna畫圖方面 iau可理解， mgorh 講著 zit個查甫人ｅ 屈強 m認輸ｅ 個性， 伊 是 連世上 所有ｅ習慣、 規範 攏無 看在眼內。 聽一個久長 di伊身邊ｅ 學徒 講， 有一工 di某人ｅ府宅， 出名ｅ 檜桓紅姨婆 ho鬼附身， 講出 恐佈ｅ神旨， 伊ma當無聽著， iau用 現有ｅ筆墨， 詳細畫落 紅姨婆 可怕ｅ表情。 若親像 zit款鬼靈 作怪ｅ代誌， di hit個人 眼中， 只不過是 騙qin-aｅ 把戲。
伊dor是zit款人， 所以 di畫 吉祥天女神ｅ時， 畫出ｅ是 賤下ｅ傀儡面； deh畫 不動明王ｅ時， 又閣畫作 鱸鰻捕役ｅ 形體， 做出足濟 過分ｅ代誌。有人責問伊ｅ時， 伊閣冷靜 講： 「我良秀 畫ｅ神佛 會ho良秀 著災， he dor是 怪事lo！」 Dor是按呢， 連伊ｅ徒弟 ma堪ve diau， 因為 驚有災厄 降身，雄雄離開ｅ人 ma ve少。 …… 總講一句， dor是 孤驕自大吧， 總是掠準 hit當時 全天下 無人hiah偉大 可gah伊比拚。
Dor按呢， 良秀 di繪畫界ｅ地位 有外guan dor m免加講a。 當然 伊di畫圖方面， 無論是 筆調或色水， 攏ham別人無仝， dor有真濟 gah伊kiorh恨ｅ畫師 批評伊 是 一個 大騙仙仔。 照zia-e人 講， 若提著 川成、 金岡 等過去名家 筆下ｅ作品ｅ 時， 攏會呵咾 一寡 奇妙ｅ傳述， 比如講 木枋門頂ｅ 梅花 會di月光ｅ暗夜 溢出芳味， 或者是 聽著 屏風頂面ｅ 公卿bun品仔ｅ樂聲 等。 若講著 良秀ｅ圖， 無論 什麼時陣 攏有一寡 ho人驚惶ｅ 怪異流言。 用伊 畫di龍蓋寺 大門ｅ “五趣生死圖”(註3) 來講， 半暝 ui大門 經過ｅ時， 會聽著 天神ｅ 哀嘆gah哭聲。 M dann按呢， 閣有人 鼻著 屍體ｅ臭味。 另外， 伊後來照大人ｅ命令 所畫出來ｅ 女眷活像 ma是仝款， 聽講hong畫落來ｅ人， 無出三冬 攏會 原神失去 來破病 死去。 按hia-e刻薄ｅ人 所講， he dor是 良秀ｅ畫 淪陷 di邪道ｅ 上大證據。
Dor親像 頭前所講ｅ， 良秀 是 一個 專制固執ｅ人， 種種ｅ批評 顛倒ho伊 更加自大。 有一gai， 大人 用 講sng笑ｅ口氣 ga講： 「你 假若足愛 邪惡恐怖ｅ物件。」 良秀 伊hit款gah年歲無合、 會驚人ｅ 紅嘴唇 dor笑笑， ma傲慢回講： 「無錯， 淺腹ｅ畫師 是ve了解 醜惡ｅ極美。」
Dor算是 本朝 第一大畫師， ma無應該 當大人ｅ面前 按呢大聲 bun雞gui， ma莫怪 頭前所提ｅ hit位徒弟 私底下ga師父 取一個 「智羅永壽」ｅ 烏名， 來kau-seh 伊ｅhiau-bai激氣。 可能 你ma知影， 「智羅永壽」 是 以早 ui中國過海來ｅ 天狗名（註4）。
Mgorh， zit個良秀 - - 一切攏無 看di眼內， 蠻橫無理性ｅ 良秀， ma會di某一方面 具有 人性基本ｅ 溫情。
五、
聽講 良秀 若起痟 按呢， ga伊hit個 做侍女ｅ 孤囝明珠 疼gah 入骨入肉。 若前述所講， zit個少女 性情溫柔， 是 足為老父設想ｅ 女性， 相對ｅ，老父 對家已ｅ骨肉 ma一點仔 dor無輸。 伊 一向對 寺廟ｅ募款 攏足凍霜，ganna查某囝veh穿ｅ衫仔褲 或 髮飾 等 物品， 伊dor 獻手海派， 什麼 攏準備好好， ho人意外。
Mgor， 良秀ting sing[寵愛]愛女， m ganna是 ting sing nia nia， 若是 veh替伊 cue一個 好對象 是免想la。 Mdann按呢， 若是 有人去追求 hit個查某qin-a， 伊反會去招 hit寡cittor少年， 趁暗時 暗擊 hit個查甫人。 所以 大人下令 叫少女去宮內 做qin-a gan， 伊 是 足怨氣ｅ， 有一陣仔 去到 大人ｅ面前， ma攏表現出 足無歡喜ｅ。 若是講 大人 ho zit個少女ｅ 美麗sannh著心， 無顧 老父ｅ情面， 強veh ga 召入宮府ｅ 流言， 可能dor是 di zit種狀況 流出來ｅ。
當然， dor算 zit個流言 無確實， 出自強烈ｅ 親情關愛， 良秀 真實一直deh祈禱 女兒 edang轉來身邊。 有一gai， 大人吩咐伊 替幼囝 文殊 畫一張像， 結果 伊ga大人ting sing ｅ qin-a 畫gah活靈靈， 大人極滿意， dor足罕見 對伊講： 「你愛什麼獎賞， 做你講吧！」 良秀 神色驚惶， 本底掠準 伊 有什麼 特殊要求， 結果是 伊厚面皮 回講： 「請放阮go-giann 轉來阮兜。」若是di其他宮府 iau無話講， 可是 di堀川ｅ大人 身邊奉待ｅ人， 少女 閣安怎古錐， 用 ziah-nih無禮ｅ方式 求去， dor一國 會允准la？ 可是 大人聽了， 一絲仔 無歡喜ｅ面色 ma無， 只是 恬恬注目 良秀， 了後 dann嚴聲拒絕：「he ve sai！」 講了 dor起身離開a。 像 按呢ｅ代誌， 前前後後 mdann 四五gai。 Zitma想起來， 大人 看良秀ｅ目神 一gai比一gai 冷清。 關係 zit件代誌， zo-giann ma替 老父ｅ安危 憂心， 伊退回房間， 定定會 qiu疊衫ｅ長袖 咬di嘴內， yi-yi-u-u哮出聲。 大人 對 良秀ｅ女兒 有甲意ｅ流言 ma愈傳愈大。Iau有人講， 地獄變屏風ｅ由來 其實是 因為 少女m肯依順 大人ｅ 關係， 當然 這是 無可能ｅ代誌。
照咱看來， 大人m ho少女 轉去厝理， 完全是 少女出身可憐， 若veh ho伊 住厝內 di hit個 頑固ｅ老父 身邊， 不如 ho伊di宮府 自由自在 生活， 這是為伊想ｅ， 是deh愛惜 生性溫柔ｅ伊。 講大人 好色 是 有孔無sun。 無lo， 應該講是 根本 dor無根據ｅ 白賊話 卡妥當。
Zia-e代誌， 咱mai論， 查某qin-a ｅ代誌 ho大人 對良秀 印象變差ｅ時，m知是 什麼想法， 大人 liam當時 召見良秀， 命令伊 畫出 「地獄變」ｅ 屏風。
六、
若提著 「地獄變」屏風， hia-e 恐怖驚死人ｅ 畫面dor閣清楚 浮出目前。 仝款是 地獄變， 良秀所畫ｅ gah別個畫師 比起來， 第一 di構圖上 dor真特別。 He是 di屏風ｅ一角， ga 十殿閻羅王 gah yinｅ眷屬 畫gah細細， 其他ｅ部份 dor是 一大片、 一大片ｅ 火舌， 連 劍山刀樹 ma吐出 燒焰滾環ｅ 捲螺仔烈火。 Dor按呢， 除了 唐人hit樣ｅ 冥官衫衣 有 黃、 藍色 點綴， 其他攏是 發劍光 閃極焰ｅ 色彩， 中間iau有 爆飛ｅ烏煙 gah 挑飛金粉ｅ 火星紋火， 若“卍”字 hit款 掠狂亂舞。
Ganna按呢 dor巳經 hong看gah 展目吐舌 a ， 頂面iau有 ho業火燒身，du deh掙脫痛苦ｅ 罪人， 每人 掛礙ｅ形 攏m是 平常地獄圖 所見ｅ。 原因是 良秀 di眾多罪人 當中， 表白出 各種身份， 上自 王卿大夫， 下至 乞食賤民。 有威嚴ｅ 束帶高官、 穿五層衫衣ｅ 嬌美少奶奶、 掛念珠ｅ比丘、 穿guan踏木屐ｅ 武士學徒、 穿細長衫ｅ 查某qin-a、 捧供品ｅ 陰陽師…… 實在算ve了。 總講一句， 有各式各樣ｅ人 di火gah煙ｅ 捲螺仔霧障中， 受著牛頭馬面ｅ凌治， 若如ho狂風 吹四散ｅ敗葉， 搶veh逃離困境。 頭毛纏插鋼叉， 手腳縮gah 比 蜘蛛 閣卡細ｅ 婦仁人， 可能是 神巫 hit款身份。 胸崁 ho長矛刺透， 若如 夜婆倒吊ｅ 查甫人， 大約是 無實力ｅ 國司官員。 其他 受鐵桿仔 鞭diap， 受 千鈞磐石 困壓， 或遭受 怪鳥ｅ尖喙 啄食， 或 嵌di毒龍ｅ下頦……， 刑罰 ma按罪人ｅ類型 有 算ve了 真複雜ｅ變化。
Mgorh， 其中上hong 驚心跳膽ｅ 是， 有 一台牛車 ui半空中 墜落， 接近 掠過 發滿獸牙 hit款ｅ 刀樹頂端（zit欉刀樹 密密zat zat佈滿身軀 ho穿透ｅ亡者）。 車頂ｅ簾布 ho地獄陰風 吹飄掀開， 內底 有 一個宮女 穿戴華麗， 長長飄逸ｅ 烏頭鬃 di火焰中 散遊， 白paupauｅ頷頸 扭轉， 受盡折磨。
講著 zit位宮女ｅ模樣， 接來講 燒火中ｅ 牛車， 無一項 ve ho人聯想著地獄火團 燒燙ｅ苦難。 整個畫面ｅ 氣氛極恐怖， edang講是 攏集困 di zit個人 身上。 觀看ｅ時， 自然會懷疑 耳孔 是m是 有淒慘ｅ 哀叫聲， 這確實是 一幅 出神入化ｅ 大作。
啊！dor是因為 veh達到 畫圖ｅ意境， ziah會發生 hiah nih恐怖ｅ 代誌。若m是按呢， 良秀 哪有可能 逼真畫出 墜入地獄ｅ 極苦leh？ A hit個人di完成屏風了後， ma愛用 陪命ｅ慘場 收尾。 換一句話講， zit幅畫ｅ 地獄界 dor是 本朝 第一畫師 良秀 終歸尾家已 veh墬落ｅ冥府。
我因為 急veh點出 hit幅稀奇ｅ「地獄變」屏風， dor ga故事ｅ順序 倒反。Mgorh下面 dor veh繼續 談論 良秀 接受 大人ｅ命令 描繪 地獄圖ｅ 經過。
七、
自按呢了後， 有 將半冬ｅ時間， 良秀 攏無 去宮府 踏腳到， 一直deh畫屏風圖。 親像 伊hiah疼zo-giann ｅ人， 聽講 一開始 連zo-giann ma 無想veh見， 這m是 真意外嗎？ 照頭前 提過ｅ弟子 講， hit個人 若投入kang kue， dor親像 狐仙ga附身 仝款。 無no！ 實際上， hit陣人 攏deh謠傳， 良秀 di畫界出名， dor是因為 伊 向 福德大神 下願， 這証據是， 伊deh畫作ｅ時， 只要偷偷仔ga探， 一定會看著 陰森ｅ靈狐， m是一隻， 是一群， di伊ｅ四箍笠仔 seh來seh去， 一旦 伊teh起畫筆， 頭殼內 全精神攏deh想 veh按怎 來完成 hit幅圖， ga其他ｅ代誌 dor放了了， 伊 透早透暝 攏關di hit間房內， 足少見著 日頭光……。 尤其是 deh畫「地獄變」屏風 過程中， 閣更加沈迷。
話閣講 倒轉來， zit個人 連日時 ma放落枋窗 關di房間， di燈火下 調配 秘方顏料， 若無， dor是 叫徒弟 穿藍綢衫、 禮衣ｅ裝扮， 斟酌ga畫描落來…。 Zit種程度ｅ 怪異， 免講是 畫地獄變ｅ屏風， 凡是deh畫作， 通常dor是 zit款情形。 無no！ 伊早早 deh畫 龍蓋寺ｅ “五趣生死圖”ｅ時， 伊dor vat去 一般人 攏特愛去 閃避ｅ 路邊屍 頭前， 悠閒 坐deh描繪 半爛臭ｅ面、 腳手， 連一支頭毛 dor無ding dann 總ga畫起來。 伊 hiah專心投入 到底是deh binn什麼vang？ 這一定 有人 vedang理解。 Zitma我無閒 tang詳細講， 自我聽著ｅ 主要情形 是按呢：
良秀 有一個徒弟 （頭前提著ｅ hit個人）， 有一工du deh調顏料ｅ時， 師傅liam當時ga伊講： 「我veh來睏中晝， mgorh zitma時常 做歹夢。」 zit款代誌 一點仔 ma無稀奇， 徒弟ｅ手 仝款deh調色料， dor凊采應一聲： 「是oh！」 良秀露出 無平常ｅ 寂寞態度， 小可客氣 deh要求： 「所以， 我睏晝ｅ時， 希望你 di我ｅ枕頭邊 坐leh！」
徒弟對師傅 一時間 在意講著 眠夢ｅ代誌 感覺奇怪， mgorh zit款小要求簡單， dor回答講：「esai！」
師傅ma 閣足煩惱， 心頭掠ve定 講： 「a dor緊入來內底。 Mgorh 若有徒弟來， vesai ho伊入來 我睏ｅ所在。」
內面 dor是 伊畫作 ｅ 房間， hit 座 用炭筆 畫構ｅ草圖 di邊仔 做一環。 一到 hia， 良秀 dor用手股 做枕頭， 像一個 tiam gah ve ko雞、 ve bun火ｅ人， 一下仔 dor睏去lo。 Mgorh， 無夠 半個時辰， 坐di枕頭邊ｅ 弟子， 雄雄聽著 m知 veh安怎形容ｅ 恐怖聲。
八、
一開始 ganna是聲音， 無外久 dor漸漸 演變做 陷眠話， 好像是 dih veh淹死ｅ人 di水中哀哼ｅ聲 ：
「什麼， 叫我過去……， 去dor位…… 過去dor位？ 去地獄 去燒滾熱ｅ地獄……， 是誰啊！ 是誰deh講話……你是誰人……？ 到底是誰人？」
弟子 自然停止 調色料ｅ手， 心肝pok pok cainn deh探看 師傅ｅ面， he是 一個liap皮， 白sun sun ｅ面， 歸個面 冒出 大粒凊汗， 嘴齒疏疏a， 嘴唇da燥， 嘴開開 deh大心氣喘， 嘴內有物件， ho人疑心 是m是有 線絲deh操弄 按呢， 緊速deh轉ve停， he m是舌嗎？ 斷停發出聲 dor是 ui舌根 發出來ｅ。
「我掠準是誰人……ng！ 是你呀。 我臆是你， 創啥？ 是veh來接我ｅ？所以來地獄。地獄內……地獄內 有 我ｅ zo-giann deh等。」
Zit時， 弟子看著 一個 霧霧ｅ怪影， sut過 屏風頭前， 閣 一團一團 落落地， ho人 起雞母皮。 當然 弟子 緊用力 ga良秀 搖ho醒， 陷眠ｅ師父iau deh胡言亂語， 叫ve醒ｅ夢遊 hit款扮勢， 伊dor急deh ga邊仔ｅ洗筆水 hua la hua la 潑 di老仙師ｅ面。
「我等你， 坐zit台車來…… 坐zit台車 來地獄……」 du講zit句， 嚨喉 dor親像 ho異物 束著按呢 i-onn叫， 良秀lo尾 ga目睭ti開， 掠狂跳起床， 看起來 比ho針刺著 閣卡驚狂， 大概是 夢中ｅ妖魔鬼怪 iau di目睭皮m甘退消。 一開始 伊ganna露出 驚惶ｅ目神， 嘴合ve uah來， qiah頭向天 注目了， 才回神過來。
「好la！ 去邊a！」良秀 閣冷意交待。 弟子知影 若是 di zit時 違背伊ｅ意思， 一定會 換一頓 hau喝， dor雄狂 離開房內， 看著外口 明亮ｅ日光， 才親像 ui惡夢中 精神過來， 鬆一口氣。
Zit件代誌 iau是 無嚴重， 大約 一個月後， zit回 是 另外一個弟子 ho刁工叫入 房內， 良秀 仝款 di昏暗ｅ 油燈火中 咬畫筆， liam當時 對弟子講： 「煩勞你lo， veh 閣 請你褪掉 衫仔褲。」
之前， 師父dor定定吩咐 弟子 按呢做， 歸身光光， 伊閣 怪形怪狀、 結目頭講： 「我想veh看人 hong縛起來ｅ形， 雖是 對不住你， 敢esai暫時ho我擺弄一下？」 話按呢講， suah一絲仔 dor ve在意， 話氣 足冷森。 本底zit位弟子 dor是 勇健結實ｅ 少年人， 去teh長刀 比teh畫筆 卡妥當， liam當時 對 師父ｅ要求 正是著驚， 過足久以後 ziah講著 zit件代誌ｅ時， iau閣講： 「我掠準是 師父起痟a， 想veh ga我tai死！」 hit當時， 良秀看伊 無行動 三心二意ｅ形， dor無耐煩， m知 ui dor位 抽出 一條鐵鏈， hua la la纏di手裡， 然後 用 撲殺ｅ姿勢 跳去 弟子ｅ腳脊頂， 硬ga伊ｅ雙手 扭guainn吊起來， ga鐵鏈 一len一len ga捆綁起來。 續落來 ga鐵鏈ｅ一頭 用力qiu一下， 弟子 受堪ve diau， 身軀 隨著重力 摔di土腳， dor按呢 倒di hia。
九、
Hit時陣， 徒弟 dor親像 ga酒甕cia倒 di土腳ｅ 身形， 因為 腳手攏冷酷deh hong扭轉， ganna頭殼edang振動。 壯實ｅ身體 ho鐵鏈纏an 血流ve通， 面、 身軀、 皮膚 攏紅gong gong。 良秀 並無注心 人ｅ痛苦， 猶原di四邊seh來seh去， 觀察hit款 親像酒甕ｅ 身體， 尚且 出手去畫作 幾張仝款ｅ 寫實圖。 Di zit段時間， hong縳著ｅ徒弟仔 有外痛苦， dor m免 再描述a。
若是ganna繼續按呢， 無別款代誌 發生， 徒弟ｅ痛若 恐驚會 延長足久。 好佳哉（m知是 幸運或不幸） 過了一下a， 房間壁角ｅ 壼罈烏影中， 有烏油hit款物件 細條細條 變軟 溜流出來。 起先 伊 假若黏tih tih， 慢慢仔 deh sor振動， 後來 開始順deh滑行， 再閣 發出閃光， 弟子目見伊 流來鼻頭， 無法度 dor禁氣大叫：
「蛇……蛇！」
伊hit陣a 感覺 全身ｅ血 攏凍固起來a， 這edang理解。 蛇 其實 iau差一絲仔 dor veh ga冰寒ｅ 舌尖 吐du著 ho鐵鏈束綑ｅ 頷頸仔肉。 突發ｅ意外， 良秀 閣安怎cior dior ma驚一大dior， 趕緊 丟dan掉筆， 一彎身， 快身手 dor掠diau蛇尾， ga倒吊掠leh， 吊倒ｅ蛇頭 qiah頭起， 溜軟 deh捲旋身長， mgorh無論安怎 ma ve liong到 hit個人ｅ手。
「攏是你， 害我 畫歹一筆！」
良秀 氣put put嚷出嘴， 直接ga蛇 dan入 房間壁角ｅ 壼罐仔內， 然後m情願 去解開 徒弟身上ｅ 鐵鏈。 伊 只不過是 ga解開nia nia， 對受苦ｅ弟子 a無一句 安搭ｅ話語。 親像 畫歹去一筆 比 徒弟 受蛇害 閣卡 vedang忍受吧！……後來聽講 hit隻蛇 ma是伊 為veh素描 所飼ｅ。
Ganna聽著zit件事， dor可知 良秀 hit款 痟癲狂亂 ho人畏怕ｅ 偏執性情。 這閣m是 上極端ｅ， 另一zan 是 一個 十三四歲ｅ徒弟， ma是因為 地獄變屏風ｅ 擬真， 差一點仔 dor無命。 Zit位弟子 生做一身 白pau pau 若少女ｅ肉色。 有一暗， 伊無意中 ho師父 叫入房間， 良秀di燈台腳， 手心 kng一塊 臭腥ｅ肉， du deh飼一隻 罕見ｅ鳥仔， 鳥體 親像 貓仔ｅ大細a， 伊ｅ 兩爿鳥毛 像 一對耳仔 向外翹出， 大大圓圓ｅ目睭 是 琥珀色， 安怎看 dor像貓。
十、
良秀 本底 dor足討厭 人管伊ｅ代誌， 連 蛇sor出來 拍斷ma是， 仝款zit類代誌 伊並ve ho徒弟知。 有時桌頂 kng骷髏頭， 有時 排銀碗， 漆泥金畫作ｅ guan腳盤， 看伊 所作ｅ畫面 有所改變， 攏是ho人 足意外ｅ物件。 Mgorh， 平常zia-e物件 攏收藏 di dor位 並無人知。 所以講 伊有 福德大神ｅ保佑ｅ 流言， di某種程度 確實 gah zit件代誌 有關。
話講來 學徒看著 桌頂怪異ｅ鳥， 心內想講 這應當是 為著 畫地獄變屏風 才添加ｅ， dor來到 師父ｅ面前， 恭敬好禮 問：
「有什麼代誌 veh吩咐無？」
良秀 無聽入耳， zinn著 伊ｅ紅嘴唇， 用下骸 向鳥講： 「安怎， 是m是 足溫順？」
「這是 什麼鳥？ 我mvat看過。」
弟子如是講， 驚驚看著 zit隻有耳仔 像貓仔ｅ鳥， 良秀dor用 平常ｅ口氣 恥笑講：
「什麼？ 無看過？ 都市song dor是ziah害。 這是 二三工前 京都鞍馬山ｅ 拍獵師 ho我ｅ， 號做 耳木兔， 只是 veh像 ziah-nih溫順ｅ， 真罕！」
Zit個人 講著話， ga手 款款仔 qiah起來， 輕輕仔 ui下身往上 sor著 du食了肉ｅ 耳木兔 腳脊ｅ毛。 Dor di zit個時陣， 鳥 突然發出 短短急促ｅ 尖叫聲， 雄狂ui桌頂起飛， 兩支腳爪 tih開， 衝向 徒弟ｅ面。 若m是 弟子趕緊 用手袖遮leh， 受傷 是逃ve過ｅ。
伊 「啊」叫一聲， hiu開手袖， du deh ga趕走， 耳木兔dor 閣 雄gaigai向伊衝啄……徒弟ve記師父dor di面前， 有時 kia起來閃避， 有時 坐落趕鳥，不管三七二十一 dor di窄窄ｅ房內 走來逃去。 怪鳥隨著 人ｅ動作， guan guan 低低反應， 相準 對方ｅ目睭 飛來。 每一gai 攏會pa-da pa-da拍動翅股， 運作出 掃落葉ｅ氣、 水沖ｅ飛瀑 或 猿酒發酵ｅ熱氣 等 奇怪驚人ｅ 氣氛， 真正 有夠恐怖。 講起來， zit個徒弟ma vat講過， 連 微暗ｅ油燈火 攏像 霧霧ｅ月光， 師父ｅ房間 攏假若是 di陰森遙遠ｅ 深山中 ho妖氣罩著ｅ 山谷， ho人心肝 pok pok跳。
Mgorh， ho弟子 極驚惶ｅ是， m ganna是 ho耳木兔 攻擊ｅ代誌。 更ho人 起雞母皮ｅ是， 良秀 di邊仔 冷眼看 zit場 攻擊防守ｅ戰事， 一副 老神在在 deh展紙整筆， 描畫著 hit個生做 若少女ｅ 少年人 ho奇怪ｅ大鳥 欺負ｅ 驚人狀況。 弟子 看著 師父hit款， 隨有一種 講ve出嘴ｅ驚惶， 事實上 ma有 lim當時 會ho師父害死ｅ 著驚 留di心肝頭。
十一、
實際上 ma m是 無完全ve ho師父 害死ｅ可能。 其實， hit暗 良秀 特別叫 弟子過去， dor有使弄 耳木兔 攻伊ｅ意圖， 伊想veh ga弟子 四界走閃ｅ 真景 畫落來。 因此， 弟子看著 師父ｅ情形， dor自然 會用手袖 掩頭， 發出 無助ｅ慘叫， 一直走去壁角ｅ qiu門邊， giu縮一團 ve振ve動。 Zit時， 良秀 ma m知 為何驚惶 叫出聲， 想veh kia起來， mgorh耳木兔ｅ 拍翅聲 suah更加激烈， 接續來ｅ是 物件 東倒西歪， 摃破pin-pin-piang-piang ｅ 嘈碎聲。 弟子閣再 卡驚惶， ga掩著ｅ頭 qiah起來 探看， 房間 m知di什麼時陣 變gah 暗sor sor， ui內面傳出 師父 deh叫傳 弟子ｅ 緊急聲。
歸終尾 有一位弟子 ui遠遠ｅ所在 回應， 然後qiah燈火 入來， di有臭油味ｅ 燈照明下， 看著 燈台cia倒， 地枋gah榻榻米 潑gor著油漬， 耳木兔ma哀苦 deh拍動翅股， 軟軟無力 倒di土腳。 良秀 di桌ｅ另一邊 半撐身，iau有驚惶ｅ表情， 嘴內seh seh唸著 別人聽無ｅ 雜語』。……這ma莫怪， hit隻耳木兔ｅ 身上 有一隻 烏金ｅ蛇， ui鳥ｅ頷頸仔 一直ga纏到 一爿ｅ翅肢。大概是 弟子di壁角 giu做一團ｅ時， ga壼罐en倒， 蛇dor sor出外口， 耳木兔veh去掠蛇， 引起 雙方決鬥。 兩個弟子 相對看， 一時之間 ganna憨呆憨呆 deh看zit幕 奇妙ｅ怪場， 過一下a 只有回神過來 向師父 行一個禮， 無聲 退出房間。 蛇gah耳木兔ｅ 尾場如何， dor無人知a。
親像 zit款代誌， m是ganna zit件， iau有真濟。 頭前ma講過， 大人下令 veh畫 地獄變屏風 是 初秋ｅ代誌， 一直到冬尾， 良秀ｅ弟子 dor一直遭受 師父 出各種怪招ｅ 威脅。 到冬末， 良秀可能di屏風ｅ繪圖出問題， 一個人 變gah 閣卡陰沈， 講話ｅ態度 ma變gah 更加 暴力粗鹵。 仝時陣， 屏風ｅ草圖 一直無進展。 無no！ 連進前 畫好ｅ所在 ma有可能 拭掉重畫。
到底 屏風di dor位 出問題， ma無人知， ma無想veh知。 弟子 為著各種 奇奇怪怪ｅ代誌 受苦， 感覺 好參像 gah虎狼 dua仝所在， 下定決心， 盡量 無愛去 接近師父。
十二、
關係 zit段時間ｅ代誌， 無什麼 特別值得 報導ｅ， 若強 veh zuh一寡，dor是 hit位 倔強主觀ｅ 老歲仔 m知為什麼 變gah 特別會 流目屎， 聽講伊時常di無人ｅ所在， 孤一人哮gah cng cng叫。 特別是 有一工， 一位弟子有代誌 去埕斗， 看著伊 kia di行人巷， 茫茫心思 qiah頭看去 春尾ｅ天頂， 目箍內 gam滿目屎。 弟子 看著師父 hit款情形， 反倒 m敢接近伊， dor無聲說 翻頭 倒轉去。 Hit個 為著veh畫 “五趣生死圖”， 連路邊屍 攏畫過ｅ 傲慢查甫人， 竟然為著 無法度 順利畫出 屏風圖， dor懊惱 gah qin-a仝一款deh哮泣（kip7）， m是 真奇怪嗎？
話講 良秀zit爿 dor若頂面 所講ｅ按呢， 伊真反常 deh熱心專注 畫屏風圖， 另一爿 少女zia， m知 為什麼， 伊 愈來愈鬱卒， 連di阮面頭前 ma是一款 強忍目屎ｅ 可憐形。 伊本底是 一個 面貌憂愁， 皮膚白pau-pau， 溫文好禮ｅ 少女， 近來dor是 目睭毛 變gah足沈重， 目箍 變gah烏sor sor， 神態真慘。 起初 ma有 真濟猜測， 掠準伊是 心悶老父， 或為 戀情操煩，mgorh中間 開始有流言， he是 大人愛伊 順伊ｅ意ｅ 原因， 自按呢， 親像逐個人 攏ga伊 放ve記去a， 無人 閣提起伊。
Du 好是 中間 zit段時間ｅ 代誌吧！ 有一工深夜， 我一人 經過 行人巷， hit隻 良秀猴 liam當時 dor跳過來， 做出 qiu我ｅ衫仔角ｅ 動作。 He確實有鼻著 梅花清芳， 有幽淡月色ｅ 溫暖ｅ夜暗，mgorh月光一照， 猴歪著 伊ｅ白喙齒， 鼻頭liap liap， 像起痟按呢 尖聲gi gi 叫。 我有 三分驚 七分氣， 因為 新褲ho猴qiu leh ｅ氣， 起初想veh 用腳ga踢走， 閣繼續行， mgorh停一下 閣想著， 之前 有 一個武士 痛打zit隻猴， suah惹公子 無歡喜， 而且 猴ｅ動作 親像 無平常， dor決定 照伊qiu向ｅ所在 行ziann十公尺。
然後， di行人巷 一個彎角， du好行到di暗時 ma有白色ｅ水池邊， edang看著 枝椏優美ｅ松樹 另一頭 闊闊ｅ景色。 附近房間內 傳出有人 deh爭吵ｅ聲， 慌狂、 亂異 鑽入 我ｅ耳孔。 四箍笠仔 寂靜， 分ve清是 月火或薄霧ｅ 氣氛， ganna魚跳水聲 以外， 一點仔聲嗽 攏無。 因為si- si suainn- suainn ｅ聲， 我dor kia leh注意， 心想講 有歹徒， 一定veh ho伊 一寡 拳頭姆， dor禁氣， 輕步行去 hit道門外。
十三、
可能是 猴看我動作 siunn過溫吞慢sor 。 伊足著急 di我ｅ腳邊 seh兩、三lin， 然後 發出嚨喉 hong束著ｅ聲， 猛掠一跳 kinn di我ｅ肩胛頭， 我自然扭轉 我ｅ頷頸仔， 想veh閃開 伊ｅ爪仔， 猴suah咬著 我ｅ藍手袖， m愛滑離我ｅ身軀 - - zit個力量 ho我 無法度控制 觸(dak)顛兩、三步， 腳脊piann大力long著hit片門。 到zit款地步，ma vedang延遲dor qiu開門，跳入去月娘照ve到ｅ房裡。 Zit時 遮著我ｅ目線ｅ 是 - - 無no！ ho我閣卡著驚ｅ是， di仝時陣， 房間裡 有一個查某人 親像 hong 彈出來 按呢 走出來。 查某人 差一點仔 dor撞著我， 直接 滾去外口， m知為什麼 dor跪落去， 氣喘ve順 好像是 看著 什麼恐怖ｅ 著驚人物， 身軀gi-gi cuah deh看我ｅ面。
M免講 ma知影， he是 良秀ｅ查某囝。 Hit暗， zit個少女 彷彿變做 另一個人， 真實 入我ｅ目中。 伊目睭 大蕊大蕊 有光， 面紅紅 deh燒熱， 散亂ｅ 裙gah內衫 ho伊脫離 平常ｅ幼稚， 變gah 特別美麗。 He是 柔弱無依， 事事溫順ｅ 良秀ｅ查某囝嗎？── 我ｅ身軀 靠著qiu門， 看見 di月光下 美麗姑娘， 指著 雄狂離腳ｅ 腳步聲， 恬恬 用目神 問伊： 「是誰人？」
少女咬嘴唇， 搖頭 無話句。 Hit個形 足委屈。
我dor彎身， ga嘴 貼di伊ｅ耳邊 細聲問： 「是誰人？」 mgorh， 伊仝款搖頭， 一字dor m回答。 無no！ di zit時， 伊長目睭毛 gam滿目屎， 嘴唇咬gah 比du-ziah 閣卡密合愈an lo。
天性遲鈍ｅ我， 除了 真坦白清楚ｅ 代誌 以外， 什麼 彎曲ｅ代誌 ma m知。 所以， 我m知 veh講什麼， 一時只會曉 伴di hit個 pi-pi-cuah ｅ查某qin-a， cai-cai kia di hia。 當然其中ｅ原因是， m知 為什麼 總會感覺 閣追問落去 dor有失禮。
M知 過外久， 我 dann關合qiu門， 越頭去看 心神 有淡薄仔 回復過來ｅ查某qin-a， 盡心力 溫和安慰伊 講： 「轉去你房間！」我家已 親像 看著 無應該看ｅ代誌， 心肝十下五下 m知對誰人 感覺愧對 hit樣， 恬恬轉來 原來ｅ所在。 Mgorh行無夠十步， 又閣有 什麼人 緊張qiu著 我衫裾， 我著驚 越頭看， lin會掠準是什麼？
原來是 良秀猴 di我ｅ腳邊， 像 一個人仝款 雙手貼地， 金鈴仔 liang liang叫， 對著我 恭敬行禮 幾 a gai。
十四、
Hit暗了後， 大約閣 過了 半個月。 有一工， 良秀 突然出現 di府宮， 要求 馬上晉見 大人。 伊ｅ身份 雖是低下， 可能是 平常特別 受人欣賞， 無凊采 召見人ｅ大人， di hit 工 ma足豪爽 dor答應a， 隨dor叫伊 來到面前。 Hit個人 仝款穿 薰芳ｅ禮衫， 戴軟烏帽， 流露出 比平時 閣卡陰沈ｅ 表態， 恭敬 向前跪拜， 了後 用沙濁ｅ聲 講：
「關係 您進前吩咐ｅ 地獄變屏風， 我日暗拚deh畫， 巳經 大有成果，到 收工ｅ階段lo！」
「按呢 真恭喜la， 我足滿意lo！」
大人ｅ聲音 m知為何 特別 軟弱鬆散 無氣力， 無精無神。
「無no！ he一點仔 ma無 值得祝賀。」 良秀 有一點仔 氣惱， 目睭垂垂。
「雖是 大致上 攏畫好a， mgorh 有一個所在， 我到zitma iau畫ve 出來。」
「有什麼 畫ve出來ｅ 所在？」
「是按呢la！ 我 通常需要 親目睭見著 才畫會出來。 Dor算edang畫， ma ve滿意。 結果是 gah 畫ve出來 仝款。」
聽著按呢， 大人ｅ面 露出kau seh ｅ笑講：
「若按呢 veh畫出 地獄變ｅ屏風， dor一定 愛看著 地獄dann有成果lo？」
「是a， di舊年 發生 大火燒ｅ時， 我dor親目 見著 gah燒燙地獄 相當ｅ熱火， 我edang畫出 “扭身不動明王像”( 註5) 背後ｅ 圖案火景， dor是因為 親目看見 hit場火災ｅ 關係。 您大概知影 hit幅畫honn？」
「罪人呢？ 你應該 mvat看過獄卒 honn？」 大人親像 無聽著 良秀ｅ話，接deh追問。
「我看過人 ho鐵鏈綑纏ｅ 形樣， ma詳細描繪著 人ho怪鳥纏鬥ｅ 情景。 按呢 dor vedang講 m知影 罪人 受刑ｅ苦楚。 若獄卒……」 良秀一面講， 露出 恐怖ｅ苦笑， 續deh講： 「獄卒 di我 半陷眠中 出現過 足濟遍。 有ｅ是牛頭馬面， 有ｅ是 三頭六臂ｅ鬼形， m出聲 deh拍pok-a， m出聲 嘴開開， 差不多 逐工 攏來折磨我……我畫ve出ｅ圖景 m是這。」
聽著按呢， 連大人 ma驚奇。 伊一時 只是無耐 煩目相著 良秀， 然後dann嚴歹 deh結目頭， 喝聲講：
「a你 到底是 什麼 畫ve出來？」
十五、
「我想veh di屏風中 畫一台 檳榔毛車 (註6) ui空中 墮落ｅ情況。」 良秀 講， 目光利劍 看著大人。 聽講 hit個人 若談著 畫作， dor親像 起痟按呢， hit時 伊ｅ目神 有影 有hit款 恐怖ｅ形影。
「Hit台車頂 愛有 一個嬌美ｅ 查某人， di大火中 散亂 烏頭鬃， 忍受痛苦。 面ho火燻著， 結眉頭， qiah頭 看車蓋， 手 tiah破布簾， 若deh防止 親像 落雨 hit款火星。 四箍笠仔 有一、二十隻ｅ 怪猛鳥類， 長嘴 牽聲哮喝， 一直di邊仔 seh來seh去。 ……啊！ hit種 牛車內底ｅ 查某人， 我dor是 畫ve出來。」
「a……veh安怎？」
大人m知安怎， 神色 真正 特別歡喜， 口氣催促著 良秀。 Mgorh良秀suah親像 發燒ve自在 deh cuah著 伊ｅ 鮮紅嘴唇， 用 若眠夢ｅ口氣 講：
「He我 dor是 畫ve出來。」 伊 又閣 重覆一gai， liam當時 下著決心 deh要求：
「請大人 edang di我面頭前 燒一台 檳榔毛車， 若是edang……。」
大人 面色沈一下， 又閣 放肆 大聲笑， 笑中帶喘 講：
「ua！ dor照 你ｅ意思， m免 閣談論a！」
聽大人 按呢講， 我直覺上 感受著 話語內底 帶殺氣。 實際上， 大人ｅ面形 是 嘴角 bu白波仔nua， 目頭 若閃電 hit款抽顫， 有染著 良秀ｅ痟狂範， 真奇異。 話講了， 大人又閣 若爆發hit款， 嚨喉 一直發出 kok kok叫。
「Dor di檳榔毛車頂 點火吧！ ma愛安排 一個嬌艷ｅ 查某人 坐內底，di火焰gah烏煙ｅ 攻擊下， 查某人 受盡痛苦 死亡……， edang想著zit點 dor是 在腹ｅ 天下第一 大畫師。 有夠qau！ 一度贊！」
聽大人ｅ話， 良秀 一時dor隨變面色， 喘大氣， 嘴唇一直 cuah ve停，了尾 歸身軀肉 好親像 鬆化落來， 雙手 貼di榻榻米頂， 用細聲gah 聽無ｅ話， 答恩：
「感謝大人。」
這可能是 因為 伊所計畫ｅ 恐怖圖面， 隨著 大人ｅ話 活跳跳 親像 已經di面前。 我一世人dor ganna zit gai 認為良秀 真正是 一個可憐人。
十六、
He是 兩三工了後ｅ 暗夜。 大人 照約束 召見良秀， 叫伊 親身去看 檳榔毛車 火燒ｅ場面。 焚燒ｅ所在 m是di堀河府宮， 是di俗稱 「雪解御所」ｅ地點， 以早 大人ｅ小妹 dua ｅ 京城郊外山莊。
這「雪解御所」 是 拋荒足久 無人dua ｅ住所， hiah大ｅ埕園 隨在伊去破廢， 大概是 vat目見 zit位所在 無半人行腳到 來推論吧！ 關係di zia亡逝ｅ小妹a， ma有 真濟傳說， 有人 di無月娘ｅ暗暝， 到zitma iau有怪誕ｅ紅裙， 無du著土腳 di行人巷 行踏── 這ma莫怪， 御所 di日時dor足死靜， 日頭一落山， 引水ｅ聲音 特別陰沈， di星光下 飛行ｅ白鴒鷥 ma像怪物 按呢， ho人驚畏。
Du好zit暗無月娘， 四界烏sor sor， mgorh ui大殿 di油燈火中 看過去， 大人 坐di倚近 行人巷ｅ位置， 穿著 米黃色ｅ便服 gah 深紫色浮紋ｅ 闊褲， di guan guan滾白色錦邊ｅ 圓座椅上 盤坐。 伊ｅ 前後左右 有五六個侍士 恭敬坐leh， 其中一人 特別慓武， 是 舊年 di陸奧戰役過程中 腹肚iau 去食死人肉ｅ 武士， 聽講自按呢， 伊ｅ力 dor大gah 有夠 撥開鹿角。 伊ｅ下身 穿鐵甲， 佩帶ｅ長刀 像鳥尾 按呢倒翹， di門簷腳 威嚴踞kut 衛守leh。 眾人身 di暗風吹透ｅ 燈火裡， 分ve清是 實境或夢境， 恐怖ｅ氣氛 溢滿。
加上 埕園 停一台 檳榔毛車， 夜色重 沈沈壓著guan guan ｅ車蓋， 頭前無牛， 烏烏ｅ車轅(uan5) kiki 掛di榻架頂， 車頂ｅ金屬 若天星 閃閃sih sih。 看著 zia-e景觀， 雖是 di春天， 卻會冷寒。 尤其是 hit台車內， 用浮紋綢緞滾邊ｅ印色布簾 嚴嚴密密 封diau diau， m知內底 是什麼。 車ｅ四邊 有雜差 teh著火把， 斟酌著 mtang ho煙 吹去 行人巷， 謹慎deh防備。
良秀本人di 卡遠一寡ｅ所在， du好 di面向行人巷ｅ 地點跪坐leh， 穿插 仝款是 薰香ｅ 禮服gah軟烏帽， 可能是 di星空ｅ 罩壓下， 看起來 比平常 卡無看頭。 伊ｅ後壁 有一個人， 穿插仝款ｅ 烏帽禮服 姿勢踞leh， 可能是 陪伊來ｅ 弟子。 Hit二人攏 踞di遠遠ｅ 陰暗處， ui我所diam ｅ 廊巷下看過去， 連禮服 ｅ 色水 ma無法度 分清。
十七、
時間 巳接近半暝， mua罩 林泉ｅ夜景 無聲極靜， 親像禁氣 deh偷看眾人ｅ氣息， ganna風 傳來聲音， 一直飄來 火把ｅ 臭煙味。 大人 禁聲一下， 一直看向 zit款 奇異ｅ景色， 了後ziah向前 徙動腳頭u。
「良秀！」 尖利ｅ 呼叫聲。
良秀回應了 一寡話語， mgorh 我ｅ耳孔 ganna聽著 模糊ｅ回音。
「良秀， 今暗 dor照你ｅ希望， 放火燒車 ho你看夠氣。」
大人按呢講， 目睭 向 邊仔ｅ人 掃過。 Zit時 大人親像 gah其中 某一個人 交換了 一款 無單純ｅ笑， 這可能是 我siunn敏感。 Zit時 良秀 足驚惶 qiah頭看 行人巷， mgorh無出聲。
「斟酌看， 這是 我平常坐ｅ車， 你應該ma vat看過……， 我veh放火燒zit台車， ho zit種火燙ｅ地獄出現di你ｅ面頭前。」
大人 又閣封嘴， ga邊仔ｅ人 使目尾， 再突然 轉話 用憂悶ｅ口氣 講： 「hin內底 有一個 負罪ｅ侍女， hong縛di車頂。 車內 火若點著， hit個查某 定著 dor肉焦骨碎， 傷重極苦 亡死。 這對你 veh完成ｅ 屏風 是上gai好ｅ模本。 趁機會 好好仔看 伊 雪白ｅ肌膚 ho燒爛ｅ 情形， 烏頭鬃散iann iann 飄做 火花ｅ情味 ma愛詳細看。」
大人 第三gai封口， m知 想著什麼， zit回 ganna搖動 肩胛頭， 陰陰無出聲 deh笑。
「Zit個景觀 後代人 看ve著， 我ma veh di zia 看晃。 人來a！ ga簾仔 掀ho開， ho良秀看 內底ｅ 查某人 吧！」
命令du出， 一個雜奴 dor guan qiah火把， 大步向牛車， 雄雄伸手 ga簾仔 sa起來。 火把 pi-pi-piak-piak， 夾著 紅gong-gong ｅ 火光 搖搖擺擺， 照著車廂。 Di車座內 ho鐵鏈 夭壽綑綁ｅ 查某人……啊！ 有誰人 會看 走精去leh? 繡櫻花艷美ｅ 禮服頂面， 披著 烏溜金色ｅ sui頭鬃， 插ki斜ｅ金簪(ce)閃出光 iann-iann ｅ 輝彩， 打扮 雖是特別， mgorh hit款 細細玲瓏ｅ 體格、白pau-pau ｅ頷頸仔， iau有 hit個恬靜、 孤沈ｅ 半爿面， 絕對是 良秀ｅ 查某囝。 我差一絲仔 dor 叫出。
Dor di zit 個時陣， 坐di我對面ｅ 武士 雄狂起身， 一手按刀柄， 嚴厲deh監視良秀。 目前ｅ一切， 我cuah一dior， hit個查甫人 面對著 zit款情景 dor親像 失去 一半ｅ理智。 伊 ui踞di下腳ｅ 身軀 liam當時 跳起來， 雙手伸去 頭前， 想veh走過去 牛車hia， mgorh dor親像 頭前講過 按呢， 伊身 di遠遠ｅ 陰影裡， 面貌 無法度 看清楚， mgorh按呢想 ma是 一目nih-a nia-nia， 面腔變樣ｅ 良秀， 親像 有什麼看無ｅ 力量 ga伊 吊di空中， 伊ｅ身影 隨dor透過烏暗 清楚現 di目前。 隨著 大人命令 「點火」， 少女所坐ｅ 檳榔毛車 ho雜奴 投引ｅ火把 燒gah 火星pok pok跳。
十八、
目見 火吞車蓋。 附di車ｅ 邊緣ｅ 紫線鬚 ho火力 竄燒gah 飄飄搖搖， he下面 昏暗捲起 di夜色 白霧ｅ煙卷中， 車簾、 手袖、 車ｅ金屬 輪番 碎裂飛散， 火星 若雨ｅ飄舞…… hit款慘烈 是 無法形容ｅ。 無no！ 上驚人ｅ是 吐出 火團ｅ火舌 攀上 門邊ｅ格仔， 猛火升到 半空中ｅ焰彩， 親像 夕陽落山， 天火 dudeh爆裂。 之前， 我差一絲仔 dor 叫出聲， zitma 全攏失去 心魂， ganna嘴開開， 茫茫看著 恐怖 ｅ光景， ma vedang按怎出手。 Zit時陣 伊ｅ老父 良秀， ……。
良秀 hit陣ｅ表情， 到zitma 我iau 記diau diau。 Hit個人 本能想veh走向牛車， mgorh火一著 伊dor停腳， 手仝款 向前伸， 目神 一直盯看， 親像ga車ho包diau ｅ 火煙 吸引去a。 伊全身照 di 火光中， 皺紋滿面 ｅ 歹看面， 連嘴鬚尖端 攏看gah 清清楚楚。
若講著 hit對 展gah像牛目ｅ 大目睭， 歪曲ｅ嘴唇， 閣有 一直giu痙ｅ面肉 cuah抽動， 一再 攏deh顯示出 良秀心內 交纏ｅ 驚惶gah悲傷。 若是面對 斷頭台刑死ｅ 賊盜， 甚至是 十惡不赦ｅ 罪犯， ma ve出現 zit款痛苦ｅ表情。 按呢， 連 hit個慓惡ｅ武士 ｅ 面色 ma 自有變化， iam-iam-iap-iap deh偷看 大人ｅ神情。
大人ga嘴唇 咬 an an， 有時露出 恐怖ｅ微笑， 目線 一直盯di牛車……ai-ia， hit當時 di內底ｅ 少女模樣， 我 實在無勇氣 來說明詳細。 He ho 煙 嗆gah qiah頭向上 掙脫ｅ 白死殺ｅ面貌， 焰火掃過 伊ru-cang-cang ｅ 長頭毛， iau有一絲時 a dor 化做火星ｅ 櫻花禮服美妙 - - 有夠悽慘 ｅ 景象啊！- -。 尤若是 一陣夜風 吹來， 煙火 飛向另一爿， ganna看著 紅gong gong若像deh ia 金粉ｅ火河中， 浮出 嘴內咬 頭毛絲， 身軀 使盡氣力 veh ga鐵鍊 拐斷ｅ形象， 使人感受著 he正正是 地獄苦難ｅ 寫實。 不只是我， 連hit個慓悍ｅ武士 ma起加冷sun， 身毛cang直起來。
又閣 吹起一陣風， 飛過埕斗ｅ 樹尾－－ 逐個人 攏是 按呢想吧！ He 聲音 di烏 sor sor ｅ 暗夜中， m知veh 向dor位 流竄， liam 當時， 有什麼 烏lu lu ｅ物件， 無落地 ma無 飛上天， 親像 跳球， ui 御所ｅ厝頂 以直線 投向 火燒車。 Di 朱紅ｅ 門邊格仔 燒gah 亂七八糟， moh著 身軀 ging倒起來ｅ 少女ｅ肩胛頭， 伊 痛苦gah 無法度 出話語， 若 絲仔布 裂離拆開ｅ 尖叫聲 牽長傳到 煙霧以外。
接續落來ｅ 閣聽著 兩三聲－－逐人齊聲喝“啊！”ｅ 驚叫聲。 隔一層 若布簾ｅ 火焰， an an moh著 少女ｅ 肩胛頭 ｅ， 正正是 hit隻 綁di 堀河府內， 外號叫做 良秀ｅ猴。 伊是按怎 偷溜來ziaｅ， 定著 無人知。 正正是 為著平常時 疼惜伊ｅ zo-qin-a， 猴 做伙來 跳火海吧！
十九、
猴ｅ身影 ganna 出現 一目nih-a， 一串 若泥金畫ｅ 火焰 pi-li-hua-la 升上天， 猴 gah少女ｅ 身影攏埋 di烏煙團裡， 埕斗中央 ganna有 一台 火燒車 pi-li-pa-la 淒淒慘慘ｅ音 燒gah 烈 kong kong。 無 no！ he 竄飛去 空中滾絞ｅ 恐怖火焰， 若講是 火燒車， 不如講是 火燒柱 閣卡適當。
良秀 看著 火燒柱， 定神法 柴柴 kia di hia－－有夠 掠ve著伊ｅ 心思 啊。 Ta-du-a iau deh為 地獄ｅ折磨 苦惱ｅ伊， 一時 di伊 皺紋滿面ｅ 面上 浮出 無法度 形容ｅ 光彩， hit種 茫緲ｅ 歡喜心， m管身處 di大人面前， 雙手 an an貼 kng di 胸前， kia di hia。 親生ｅ查某囝 痛苦身死ｅ 慘境並無看入 di伊ｅ目中， ganna美艷 ｅ火彩， di內底 受苦難ｅ 查某人 形體， ho 伊 產生 無限喜樂－－ 看起來， 這是真ｅ。
尚且， 真不可思議ｅ是 不只是 hit個人 歡歡喜喜 看著 家己ｅ 孤查某囝慘死。 Hit時 良秀ｅ 面貌， m知為何 有一種 m是普通人ｅ， 若夢幻中ｅ 獅王起怒 hit 種 奇異ｅ莊嚴。 一大堆夜鳥 ho意外ｅ火舌 驚著， 一頭驚叫 一頭飛來飛去， ma m敢飛近 良秀ｅ 軟烏帽。 可能是 di單純ｅ 鳥隻目中， hit個人ｅ 頭頂 親像 有光輝， 有 不可思議ｅ 威嚴。
連 鳥隻 攏按呢a， 何況是 阮gah雜工， 逐人 攏禁氣 歸身軀 pi-pi-cuah， 充滿 另類ｅ隨喜心， 假若 注目deh看 開眼ｅ佛像， 目線 無離開 一直deh 觀注 良秀。 聲振天頂ｅ火燒車 所引起ｅ火焰 gah 失魂呆kia ve振ve動ｅ 良秀 - - 何等莊嚴， 何等歡喜 啊！ mgorh， dor有一個人， ma dor是 行人巷ｅ大人， 變做 另一個人 hit 樣， 面色青sunsun， 嘴角 bu白泡仔nua， 雙手 an an qiu著 紫色褲ｅ腳頭u， 親像 喉嚨乾燥ｅ 野獸 一直deh喘氣……。
二十、
Hit 暗大人 di 雪解御所 放火燒車ｅ 代誌， m知 ui誰人 傳出去， 引來真濟批評。 第一個 是 為什麼 大人 veh 燒死 良秀ｅ 查某囝 - - 流傳上濟 ｅ 是， 因為 伊求愛 無成， 見笑 轉仇恨 來報復。 Mgorh 大人 dor算是 存心 放火燒車 殺人， 定著是 對 屏風畫師 劣根性ｅ 處罰， 這我vat聽 大人 親嘴講過。
良秀 雖是 親目看見 查某囝 hong 燒死， 閣固執 veh畫屏風圖， zit款鐵石心肝， ma hong人 講 ve suah。 有人責備伊 為著畫圖 拋捨 父女親情， 是人面獸心ｅ 大歹惡。 He橫川ｅ 方丈主持 ma是 認為按呢， 時常表示 講： 「無論如何 精注 一藝一能， 做人ma 應當識守 五常ｅ道理， 若無 dor 愛落地獄 是 免不了ｅ ！」。
過了 一個月後， 地獄變ｅ 屏風圖 完成 a， 良秀 趕緊送去 府宮， 恭請大人 鑑賞。 Du 好方丈 ma在場， 雄雄看著， 隨著 hit款 漫天滿地 團團 kam著ｅ 狂暴烈火 驚振著， 本底 一直 激一個面 gin良秀ｅ伊， 看了 畫 ma 禁ve diau 拍腳頭 u 講： 「有夠好！」 聽著 zit 句話， 大人 若笑ｅ模樣， 我iau記gah 真清楚。
自按呢了， 至少 di府宮內， 攏無人 閣再講著 hit個人ｅ 歹話 a 。 便若是 任何人 看過屏風， 平時 無論 外討厭良秀， 攏會 不可思議 deh ho hit 款 莊嚴ｅ心情 感動著， 可能是 因為yin確實 感受著 燒燙燙ｅ 地獄ｅ 大苦難 吧！
到 zitma， 良秀 已經無 di人間。 伊 di 完成屏風ｅ 第二暗， dor di 家己ｅ房間內 吊dau自盡 a 。 既然失去 孤傳骨肉， 恐驚家己 ma無法度 平靜活落去。 屍體 iau 閣留埋 di hit間厝內ｅ 舊所在。 Hit 座 小小ｅ墓牌 經過 數十冬ｅ 風雨吹打， 定著是 已經 生滿青苔， 看ve出 是 誰人ｅ墓 lo！〈1918.4〉
註解：
1. 大威德明王：五大明王之一， 三面六臂， 手qiah矛、 劍、 輪、 杵， 騎大白牛、 守護西方， 制服所有ｅ 毒蛇惡龍。 五大明王 為 東方 降三世明王、 西方 大威德明王、 南方 軍荼利明王、 北方 金剛叉明王， 居中ｅ 不動明王， 合稱 五大明王。
2. 地名， 指zitma仙台附近ｅ 宮城縣鹽釜市， 陸奧 是 東北地方ｅ簡稱。
3. 佛教用語， 五種世界 是 天、 人、 鬼、 畜、 地獄， 眾生身後 依照 伊生前 善惡行為 生、 降鋪排。
4. 一種 想像ｅ妖怪， 有翅， 紅面 guan 鼻， dua di 深山林內， 神通廣大， 會飛， ma 引用來 形容人ｅ 自大。
5. 不動明王 為佛教守護神 之一， 梵音為Acalanatha 意為 不動尊 或 無動尊 慈悲堅守 意為不動， 明ｅ意思 是 智慧光明， 王ｅ意思 是 駕導一切現象者， 面容扭曲 怒目暴牙 威嚴顯赫 來趕惡魔， 或 憂心重重 關照生靈， 畫像背後 通常攏是 一團一copｅ 火焰圖紋gah圖彩。
6. 一種 用檳榔葉 曝乾拆開葉絲 掩 di 車蓋頂， 專 ho 高官、 貴婦人 做ｅ牛車。
(感謝博凱 第一gai 校對本篇！)
芥川龍之介 原作 張春凰、 邱玉山 台譯
一、
親像 dua di 堀川ｅ zit個所在ｅ zit個大人(dai3rin5)， 不止過去無， 恐驚後代 ma cue無 第二個。 聽講大人 dih veh 出世ｅ時 ，大威德明王(註1) vat來 ga yin 老母托夢。 不管安怎， 伊一世人 dor gah一般人 無仝款， dor是按呢， 伊ｅ 行為， 無一項 m是超出 咱ｅ按算 以外。 先講 di堀川府宅ｅ 規模好 a， m知是veh講 壯麗， 或者是 有派頭， hit寡 特別ｅ所在， 根本m是 咱普通人 edang掠準ｅ。 Dor按呢， 有人講 一寡 五四三ｅ話語 ga伊比做 秦始皇 或 隋煬帝， zia-e講法 dor親像 「青盲人 deh摸象」。 伊極m是 hit種 縳褲腳做人 ganna顧 家已一身ｅ 榮華富貴， 伊是 為 百姓人仔 設想， edang講是 gah大眾 同甘樂， 足有肚量ｅ 人。
Dor按呢， du著 二條大宮ｅ 鬼眾夜遊， 伊一絲仔 ma無受影響。 Iau有hit寡 仿著 陸奧鹽竈(註2)風景 來起造 有名聲ｅ 東三條河洛原院， 聽講 融左大臣ｅ靈魂 逐暗 攏會出現， mgorh經由 大人 一聲huah嚷 了後， dor m敢 再出現a。 大人ｅ威嚴 ziah大， 莫怪 近來 洛中京城ｅ 男女大細， 一聽著 大人 dor敬畏崇拜， ga伊 當作神明 下凡來。 有一gai， 大人 ui大內ｅ梅花宴 轉來， dior車ｅ牛 逃走， 撞著 過路ｅ 老歲仔人 受傷， 老歲仔人 di zit 款時陣 iau合掌禮敬， 嘴講 去ho大人ｅ牛 撞著 是 愛感謝ｅ。
所以 di大人zit代， 有真濟故事 流傳到 後世。 比如： vat di宴會上 賞賜三十隻白馬， di長良橋ｅ 橋柱頂 cai立 心愛ｅ童像， 請過 傳授 華陀醫術ｅ 中國比丘 ga伊 切除 生di腳腿ｅ粒仔……， 若veh 一項一項 算詳細， he dor真正 算ve清lo。 Di 所有zia-e 風聲傳奇 中， 無比 大戶人家 所看重ｅ 傳家寶物-- 「地獄變」屏風ｅ由來 ho人 更會膽寒lo。 連 平常穩重冷靜ｅ 大人， ma di hit個時陣 驚心動魂， 閣卡 m免講 阮zit群 di伊身邊 侍侯ｅ人， 阮逐人 ma攏 驚gah 失魂落魄。 Dor親像 我服侍大人 巳經有 二十多冬a， di zit 層代誌 發生ｅ前後 ma無任何 比這 卡可怕ｅ。
若veh談論 zit件事， dor先愛講 hit個 描繪hit幅 「地獄變」屏風ｅ 畫師，zit個人 叫良秀。
二、
講著良秀， 可能iau有人 會記得 zit個人。 伊 是 出名ｅ畫師， hit當時ｅ人 公認伊 是 一粒一ｅ 畫師。 Hit件代誌 發生ｅ時陣， 伊ｅ歲頭仔 ma過半百a。 外表 看起來， 體格矮矮a， 瘦gah 腳脊骿 透 bing仔骨， 是 一個歹心形ｅ 老歲仔人。 伊去府宅ｅ時， 攏會穿 薰芳ｅ禮衫， 戴軟烏帽仔。 品格猥瑣， 無一個 老人款， 伊ｅ嘴唇 赤紅， 紅 gong gong ho人驚惶， 假若deh展 野獸ｅ歹惡。 有人講 伊定定去 舐（zinn2）畫筆， 才會 ga嘴唇染gah 紅gi gi， m管事實 是安怎， dor有 歹嘴ｅ人 講， 良秀ｅ舉動 好親像 猴仙仔， 閣 ga 取一個「猴秀」ｅ 外名。
講著良秀， iau 有 一段故事。 Hit 當時， 伊iau有 一個 孤查某囝， di 大人ｅ府宅 做 zo-gan-a[小侍女]。 Zit 個 十五歲ｅ zo-qin-a[小女孩]， 一點仔 ma 無像 yin老父， 生做秀美。 可能是 老母早過身ｅ 關係， 天生足有 同情心、 巧智、 精功， 少歲年輕， 對人 轉頭越角 真體貼， 所以 夫人 gah 其他女眷 攏真疼惜伊。
有一 gai， 丹波國 進貢 一隻訓練過ｅ 猴仙仔 來府上， ho hit 當陣 du 是 liu-ciuh[頑皮]ｅ 小公子 ga 號名 叫「良秀」。 Hit 隻猴仙ｅ外形 實在 足笑詼，閣加上 zit 款名， ho 府內 每一個人 看著 dor起愛笑。 若是 ganna笑nia dor無要緊， 是 逐家 愛創治伊 ， 三不五時 dor 大細聲 huah： ai-ia， 良秀跳去埕斗ｅ 松樹項， ai-ia， 良秀 gor la-sap房間ｅ 草蓆仔， ma 刁故意 veh 戲弄伊。
有一工， 良秀 ｅ zo-giann teh著 縳臘梅枝椏ｅ 批信， 經過長長ｅ 走人巷， 看著 猴仔囝 ui 遠遠ｅ qiu門hit爿， 跛腳ｅ形， 無像平常時 按呢 爬去樑柱， 是 喪氣傷痛 hit款， 一拐一拐 ui 伊zia 跳走過來。 小公子 qiah 一支捶仔 ui 後面追， 嘴內 閣嚷： 「柑仔賊， 好膽mai走！」， 伊看著 zit款情形， 張持一下， du 猴仙仔 走來 qiu 伊ｅ裙裾， 發出可憐ｅ 哀叫---- 目一下 心肝 m甘diuh diuh， dor 一手 qiah 梅枝椏， 一手輕輕仔 hainn 開 茄仔色 ｅ 疊衫長袖， 溫柔 ga猴仔囝 抱 leh， 向小公子行禮， 輕聲細說 講： 「拜託 饒伊 一條命， 伊 只不過是 精牲 nia nia 。」。
小公子 du 走過來 一腹肚火， dor變一個面， zan腳dor蹄 講： 「為何 veh 保護伊， zit 隻猴仙仔 是 柑仔賊 a！」
「a伊 dor是 一隻精牲nia，……」
Zo-qin-a 閣求一遍情， 然後 冷微笑一下， 閣 下定決心 講：
「因為 伊叫良秀， ho 我感覺 是 阮老父 deh hong罵， 我 dor veh 為伊。」 聽著 zia-e 話， 小公子 只好心服。
「是按呢siorh？ 既然是 deh替阿爹 求饒， 我 dor 姑不二終 饒赦伊。」
小公子 無情無願 講了， ga 捶仔 dann 去邊仔， dor ui 原來ｅ qiu門hit爿 行去a。
三、
Ui hit件代誌 開始， 良秀 ｅ zo-giann gah 猴囝 dor足親密。 Zo-qin-a ga小姐 送 ho伊ｅ 金鈴仔 用 sui sui ｅ 大紅線穿 leh， 掛 di 猴ｅ頷頸， yin 二個 形影相隨伴 有一 gai， zo-qin-a 感冒倒 di 眠床頂， 猴囝 dor 乖乖 di 抌頭邊 陪伊， 看起來 真煩惱ｅ形， 伊心理不安， 一直deh ke爪仔。
足奇ｅ是， 自按呢， dor 無人 閣再欺負 zit 隻猴囝 lo。 反倒是 開始疼伊， 連小公子 ma 定定 dan 一寡 柿、 栗子 飼伊， 有一 gai 一個武士 踢伊， 小公子 閣會生氣leh。 後來 大人 特別下令 叫 良秀ｅ zo-giann 抱猴去 晉見伊， 聽講ma是 因為 小公子 起性地ｅ 代誌， a zo-qin-a疼惜猴 ｅ 理由 ma 入去伊ｅ 耳孔內。
「有影 伊 是 一個孝女， 值得呵咾！」
因為 大人ｅ 好意， 伊賞賜 一su 紅衫 ho zo-qin-a ｅ hit當時， 這閣是 zit隻猴仔 弄猴弄 學人樣 恭敬 去接禮物， ho大人 特別歡喜心。 大人疼惜 良秀 ｅ zo-giann 完全是 看在伊 疼惜猴 gah 孝敬心， 極 m是 一般人 所講ｅ hit 款 好色心。 有 zit款話屎 ma是有原因 ｅ， zit方面ｅ 理由 咱 以後 慢慢仔講。 Di zia ganna想veh 向各位講， 無論 伊 有外秀美， 大人對伊 ma ve 對畫師身份ｅ zo-giann sannh心。
良秀 ｅ zo-giann di大人面頭前 面子十足， mgorh 伊本底 dor是 聰敏伶俐ｅ少女， ma 無受著 hia-ｅ 心腸窄ｅ 女眷怨妒。 反倒是 ui hit gai 事情了後， 伊gah猴 攏受著 卡好ｅ款待， ma 一直 deh 伺侍公主， 逐gai 陪公主 出遊坐車ｅ 機會 ma無漏過。
Zitma暫時 mai 提 少女伊本身， 咱來談論 伊ｅ老父 良秀。 雖罔 猴仙仔 真緊 dor得著 人人ｅ疼惜， mgorh， 良秀本人 ma是仝款 人人看著 dor 討厭， di 尻川後 猶 deh 叫伊猴秀。 出去府宅 之外， di 橫川 是 主持身份ｅ 方丈 若講著 良秀 dor變面色， 好親像 見著魔神仔， 伊 dor 氣gah 咬牙切齒。 (當然， 有人講 這起因 di良秀 ga方丈ｅ行為 畫做 笑詼kauseh 戲畫ｅ 緣故， 不二過， 這ma是 下腳手人yin 所傳ｅ話屎， m免信dau。) 總講一句， 無論到due， 良秀ｅ風評 攏足差。 若有人 對伊 無惡評 是vat伊ｅ 二、 三位畫師， 閣有 zit 寡 vat 伊ｅ圖畫， m知 伊ｅ個性ｅ 人 lo。
事實上， 良秀 不但 外貌猥sue， 伊iau有 更hong棄嫌ｅ 惡習慣， 所有ｅ一切 攏是 家己做起來ｅ， mai怪人。
四、
講著 良秀ｅ 歹習慣， dor是 凍霜、 冷酷、 無恥、 貧惰、 痟貪……，其中 上嚴重ｅ是 hiau bai自大， 不時不刻 攏ga本朝當今 第一畫師ｅ身份 掛di鼻頭頂。 若是 ganna畫圖方面 iau可理解， mgorh 講著 zit個查甫人ｅ 屈強 m認輸ｅ 個性， 伊 是 連世上 所有ｅ習慣、 規範 攏無 看在眼內。 聽一個久長 di伊身邊ｅ 學徒 講， 有一工 di某人ｅ府宅， 出名ｅ 檜桓紅姨婆 ho鬼附身， 講出 恐佈ｅ神旨， 伊ma當無聽著， iau用 現有ｅ筆墨， 詳細畫落 紅姨婆 可怕ｅ表情。 若親像 zit款鬼靈 作怪ｅ代誌， di hit個人 眼中， 只不過是 騙qin-aｅ 把戲。
伊dor是zit款人， 所以 di畫 吉祥天女神ｅ時， 畫出ｅ是 賤下ｅ傀儡面； deh畫 不動明王ｅ時， 又閣畫作 鱸鰻捕役ｅ 形體， 做出足濟 過分ｅ代誌。有人責問伊ｅ時， 伊閣冷靜 講： 「我良秀 畫ｅ神佛 會ho良秀 著災， he dor是 怪事lo！」 Dor是按呢， 連伊ｅ徒弟 ma堪ve diau， 因為 驚有災厄 降身，雄雄離開ｅ人 ma ve少。 …… 總講一句， dor是 孤驕自大吧， 總是掠準 hit當時 全天下 無人hiah偉大 可gah伊比拚。
Dor按呢， 良秀 di繪畫界ｅ地位 有外guan dor m免加講a。 當然 伊di畫圖方面， 無論是 筆調或色水， 攏ham別人無仝， dor有真濟 gah伊kiorh恨ｅ畫師 批評伊 是 一個 大騙仙仔。 照zia-e人 講， 若提著 川成、 金岡 等過去名家 筆下ｅ作品ｅ 時， 攏會呵咾 一寡 奇妙ｅ傳述， 比如講 木枋門頂ｅ 梅花 會di月光ｅ暗夜 溢出芳味， 或者是 聽著 屏風頂面ｅ 公卿bun品仔ｅ樂聲 等。 若講著 良秀ｅ圖， 無論 什麼時陣 攏有一寡 ho人驚惶ｅ 怪異流言。 用伊 畫di龍蓋寺 大門ｅ “五趣生死圖”(註3) 來講， 半暝 ui大門 經過ｅ時， 會聽著 天神ｅ 哀嘆gah哭聲。 M dann按呢， 閣有人 鼻著 屍體ｅ臭味。 另外， 伊後來照大人ｅ命令 所畫出來ｅ 女眷活像 ma是仝款， 聽講hong畫落來ｅ人， 無出三冬 攏會 原神失去 來破病 死去。 按hia-e刻薄ｅ人 所講， he dor是 良秀ｅ畫 淪陷 di邪道ｅ 上大證據。
Dor親像 頭前所講ｅ， 良秀 是 一個 專制固執ｅ人， 種種ｅ批評 顛倒ho伊 更加自大。 有一gai， 大人 用 講sng笑ｅ口氣 ga講： 「你 假若足愛 邪惡恐怖ｅ物件。」 良秀 伊hit款gah年歲無合、 會驚人ｅ 紅嘴唇 dor笑笑， ma傲慢回講： 「無錯， 淺腹ｅ畫師 是ve了解 醜惡ｅ極美。」
Dor算是 本朝 第一大畫師， ma無應該 當大人ｅ面前 按呢大聲 bun雞gui， ma莫怪 頭前所提ｅ hit位徒弟 私底下ga師父 取一個 「智羅永壽」ｅ 烏名， 來kau-seh 伊ｅhiau-bai激氣。 可能 你ma知影， 「智羅永壽」 是 以早 ui中國過海來ｅ 天狗名（註4）。
Mgorh， zit個良秀 - - 一切攏無 看di眼內， 蠻橫無理性ｅ 良秀， ma會di某一方面 具有 人性基本ｅ 溫情。
五、
聽講 良秀 若起痟 按呢， ga伊hit個 做侍女ｅ 孤囝明珠 疼gah 入骨入肉。 若前述所講， zit個少女 性情溫柔， 是 足為老父設想ｅ 女性， 相對ｅ，老父 對家已ｅ骨肉 ma一點仔 dor無輸。 伊 一向對 寺廟ｅ募款 攏足凍霜，ganna查某囝veh穿ｅ衫仔褲 或 髮飾 等 物品， 伊dor 獻手海派， 什麼 攏準備好好， ho人意外。
Mgor， 良秀ting sing[寵愛]愛女， m ganna是 ting sing nia nia， 若是 veh替伊 cue一個 好對象 是免想la。 Mdann按呢， 若是 有人去追求 hit個查某qin-a， 伊反會去招 hit寡cittor少年， 趁暗時 暗擊 hit個查甫人。 所以 大人下令 叫少女去宮內 做qin-a gan， 伊 是 足怨氣ｅ， 有一陣仔 去到 大人ｅ面前， ma攏表現出 足無歡喜ｅ。 若是講 大人 ho zit個少女ｅ 美麗sannh著心， 無顧 老父ｅ情面， 強veh ga 召入宮府ｅ 流言， 可能dor是 di zit種狀況 流出來ｅ。
當然， dor算 zit個流言 無確實， 出自強烈ｅ 親情關愛， 良秀 真實一直deh祈禱 女兒 edang轉來身邊。 有一gai， 大人吩咐伊 替幼囝 文殊 畫一張像， 結果 伊ga大人ting sing ｅ qin-a 畫gah活靈靈， 大人極滿意， dor足罕見 對伊講： 「你愛什麼獎賞， 做你講吧！」 良秀 神色驚惶， 本底掠準 伊 有什麼 特殊要求， 結果是 伊厚面皮 回講： 「請放阮go-giann 轉來阮兜。」若是di其他宮府 iau無話講， 可是 di堀川ｅ大人 身邊奉待ｅ人， 少女 閣安怎古錐， 用 ziah-nih無禮ｅ方式 求去， dor一國 會允准la？ 可是 大人聽了， 一絲仔 無歡喜ｅ面色 ma無， 只是 恬恬注目 良秀， 了後 dann嚴聲拒絕：「he ve sai！」 講了 dor起身離開a。 像 按呢ｅ代誌， 前前後後 mdann 四五gai。 Zitma想起來， 大人 看良秀ｅ目神 一gai比一gai 冷清。 關係 zit件代誌， zo-giann ma替 老父ｅ安危 憂心， 伊退回房間， 定定會 qiu疊衫ｅ長袖 咬di嘴內， yi-yi-u-u哮出聲。 大人 對 良秀ｅ女兒 有甲意ｅ流言 ma愈傳愈大。Iau有人講， 地獄變屏風ｅ由來 其實是 因為 少女m肯依順 大人ｅ 關係， 當然 這是 無可能ｅ代誌。
照咱看來， 大人m ho少女 轉去厝理， 完全是 少女出身可憐， 若veh ho伊 住厝內 di hit個 頑固ｅ老父 身邊， 不如 ho伊di宮府 自由自在 生活， 這是為伊想ｅ， 是deh愛惜 生性溫柔ｅ伊。 講大人 好色 是 有孔無sun。 無lo， 應該講是 根本 dor無根據ｅ 白賊話 卡妥當。
Zia-e代誌， 咱mai論， 查某qin-a ｅ代誌 ho大人 對良秀 印象變差ｅ時，m知是 什麼想法， 大人 liam當時 召見良秀， 命令伊 畫出 「地獄變」ｅ 屏風。
六、
若提著 「地獄變」屏風， hia-e 恐怖驚死人ｅ 畫面dor閣清楚 浮出目前。 仝款是 地獄變， 良秀所畫ｅ gah別個畫師 比起來， 第一 di構圖上 dor真特別。 He是 di屏風ｅ一角， ga 十殿閻羅王 gah yinｅ眷屬 畫gah細細， 其他ｅ部份 dor是 一大片、 一大片ｅ 火舌， 連 劍山刀樹 ma吐出 燒焰滾環ｅ 捲螺仔烈火。 Dor按呢， 除了 唐人hit樣ｅ 冥官衫衣 有 黃、 藍色 點綴， 其他攏是 發劍光 閃極焰ｅ 色彩， 中間iau有 爆飛ｅ烏煙 gah 挑飛金粉ｅ 火星紋火， 若“卍”字 hit款 掠狂亂舞。
Ganna按呢 dor巳經 hong看gah 展目吐舌 a ， 頂面iau有 ho業火燒身，du deh掙脫痛苦ｅ 罪人， 每人 掛礙ｅ形 攏m是 平常地獄圖 所見ｅ。 原因是 良秀 di眾多罪人 當中， 表白出 各種身份， 上自 王卿大夫， 下至 乞食賤民。 有威嚴ｅ 束帶高官、 穿五層衫衣ｅ 嬌美少奶奶、 掛念珠ｅ比丘、 穿guan踏木屐ｅ 武士學徒、 穿細長衫ｅ 查某qin-a、 捧供品ｅ 陰陽師…… 實在算ve了。 總講一句， 有各式各樣ｅ人 di火gah煙ｅ 捲螺仔霧障中， 受著牛頭馬面ｅ凌治， 若如ho狂風 吹四散ｅ敗葉， 搶veh逃離困境。 頭毛纏插鋼叉， 手腳縮gah 比 蜘蛛 閣卡細ｅ 婦仁人， 可能是 神巫 hit款身份。 胸崁 ho長矛刺透， 若如 夜婆倒吊ｅ 查甫人， 大約是 無實力ｅ 國司官員。 其他 受鐵桿仔 鞭diap， 受 千鈞磐石 困壓， 或遭受 怪鳥ｅ尖喙 啄食， 或 嵌di毒龍ｅ下頦……， 刑罰 ma按罪人ｅ類型 有 算ve了 真複雜ｅ變化。
Mgorh， 其中上hong 驚心跳膽ｅ 是， 有 一台牛車 ui半空中 墜落， 接近 掠過 發滿獸牙 hit款ｅ 刀樹頂端（zit欉刀樹 密密zat zat佈滿身軀 ho穿透ｅ亡者）。 車頂ｅ簾布 ho地獄陰風 吹飄掀開， 內底 有 一個宮女 穿戴華麗， 長長飄逸ｅ 烏頭鬃 di火焰中 散遊， 白paupauｅ頷頸 扭轉， 受盡折磨。
講著 zit位宮女ｅ模樣， 接來講 燒火中ｅ 牛車， 無一項 ve ho人聯想著地獄火團 燒燙ｅ苦難。 整個畫面ｅ 氣氛極恐怖， edang講是 攏集困 di zit個人 身上。 觀看ｅ時， 自然會懷疑 耳孔 是m是 有淒慘ｅ 哀叫聲， 這確實是 一幅 出神入化ｅ 大作。
啊！dor是因為 veh達到 畫圖ｅ意境， ziah會發生 hiah nih恐怖ｅ 代誌。若m是按呢， 良秀 哪有可能 逼真畫出 墜入地獄ｅ 極苦leh？ A hit個人di完成屏風了後， ma愛用 陪命ｅ慘場 收尾。 換一句話講， zit幅畫ｅ 地獄界 dor是 本朝 第一畫師 良秀 終歸尾家已 veh墬落ｅ冥府。
我因為 急veh點出 hit幅稀奇ｅ「地獄變」屏風， dor ga故事ｅ順序 倒反。Mgorh下面 dor veh繼續 談論 良秀 接受 大人ｅ命令 描繪 地獄圖ｅ 經過。
七、
自按呢了後， 有 將半冬ｅ時間， 良秀 攏無 去宮府 踏腳到， 一直deh畫屏風圖。 親像 伊hiah疼zo-giann ｅ人， 聽講 一開始 連zo-giann ma 無想veh見， 這m是 真意外嗎？ 照頭前 提過ｅ弟子 講， hit個人 若投入kang kue， dor親像 狐仙ga附身 仝款。 無no！ 實際上， hit陣人 攏deh謠傳， 良秀 di畫界出名， dor是因為 伊 向 福德大神 下願， 這証據是， 伊deh畫作ｅ時， 只要偷偷仔ga探， 一定會看著 陰森ｅ靈狐， m是一隻， 是一群， di伊ｅ四箍笠仔 seh來seh去， 一旦 伊teh起畫筆， 頭殼內 全精神攏deh想 veh按怎 來完成 hit幅圖， ga其他ｅ代誌 dor放了了， 伊 透早透暝 攏關di hit間房內， 足少見著 日頭光……。 尤其是 deh畫「地獄變」屏風 過程中， 閣更加沈迷。
話閣講 倒轉來， zit個人 連日時 ma放落枋窗 關di房間， di燈火下 調配 秘方顏料， 若無， dor是 叫徒弟 穿藍綢衫、 禮衣ｅ裝扮， 斟酌ga畫描落來…。 Zit種程度ｅ 怪異， 免講是 畫地獄變ｅ屏風， 凡是deh畫作， 通常dor是 zit款情形。 無no！ 伊早早 deh畫 龍蓋寺ｅ “五趣生死圖”ｅ時， 伊dor vat去 一般人 攏特愛去 閃避ｅ 路邊屍 頭前， 悠閒 坐deh描繪 半爛臭ｅ面、 腳手， 連一支頭毛 dor無ding dann 總ga畫起來。 伊 hiah專心投入 到底是deh binn什麼vang？ 這一定 有人 vedang理解。 Zitma我無閒 tang詳細講， 自我聽著ｅ 主要情形 是按呢：
良秀 有一個徒弟 （頭前提著ｅ hit個人）， 有一工du deh調顏料ｅ時， 師傅liam當時ga伊講： 「我veh來睏中晝， mgorh zitma時常 做歹夢。」 zit款代誌 一點仔 ma無稀奇， 徒弟ｅ手 仝款deh調色料， dor凊采應一聲： 「是oh！」 良秀露出 無平常ｅ 寂寞態度， 小可客氣 deh要求： 「所以， 我睏晝ｅ時， 希望你 di我ｅ枕頭邊 坐leh！」
徒弟對師傅 一時間 在意講著 眠夢ｅ代誌 感覺奇怪， mgorh zit款小要求簡單， dor回答講：「esai！」
師傅ma 閣足煩惱， 心頭掠ve定 講： 「a dor緊入來內底。 Mgorh 若有徒弟來， vesai ho伊入來 我睏ｅ所在。」
內面 dor是 伊畫作 ｅ 房間， hit 座 用炭筆 畫構ｅ草圖 di邊仔 做一環。 一到 hia， 良秀 dor用手股 做枕頭， 像一個 tiam gah ve ko雞、 ve bun火ｅ人， 一下仔 dor睏去lo。 Mgorh， 無夠 半個時辰， 坐di枕頭邊ｅ 弟子， 雄雄聽著 m知 veh安怎形容ｅ 恐怖聲。
八、
一開始 ganna是聲音， 無外久 dor漸漸 演變做 陷眠話， 好像是 dih veh淹死ｅ人 di水中哀哼ｅ聲 ：
「什麼， 叫我過去……， 去dor位…… 過去dor位？ 去地獄 去燒滾熱ｅ地獄……， 是誰啊！ 是誰deh講話……你是誰人……？ 到底是誰人？」
弟子 自然停止 調色料ｅ手， 心肝pok pok cainn deh探看 師傅ｅ面， he是 一個liap皮， 白sun sun ｅ面， 歸個面 冒出 大粒凊汗， 嘴齒疏疏a， 嘴唇da燥， 嘴開開 deh大心氣喘， 嘴內有物件， ho人疑心 是m是有 線絲deh操弄 按呢， 緊速deh轉ve停， he m是舌嗎？ 斷停發出聲 dor是 ui舌根 發出來ｅ。
「我掠準是誰人……ng！ 是你呀。 我臆是你， 創啥？ 是veh來接我ｅ？所以來地獄。地獄內……地獄內 有 我ｅ zo-giann deh等。」
Zit時， 弟子看著 一個 霧霧ｅ怪影， sut過 屏風頭前， 閣 一團一團 落落地， ho人 起雞母皮。 當然 弟子 緊用力 ga良秀 搖ho醒， 陷眠ｅ師父iau deh胡言亂語， 叫ve醒ｅ夢遊 hit款扮勢， 伊dor急deh ga邊仔ｅ洗筆水 hua la hua la 潑 di老仙師ｅ面。
「我等你， 坐zit台車來…… 坐zit台車 來地獄……」 du講zit句， 嚨喉 dor親像 ho異物 束著按呢 i-onn叫， 良秀lo尾 ga目睭ti開， 掠狂跳起床， 看起來 比ho針刺著 閣卡驚狂， 大概是 夢中ｅ妖魔鬼怪 iau di目睭皮m甘退消。 一開始 伊ganna露出 驚惶ｅ目神， 嘴合ve uah來， qiah頭向天 注目了， 才回神過來。
「好la！ 去邊a！」良秀 閣冷意交待。 弟子知影 若是 di zit時 違背伊ｅ意思， 一定會 換一頓 hau喝， dor雄狂 離開房內， 看著外口 明亮ｅ日光， 才親像 ui惡夢中 精神過來， 鬆一口氣。
Zit件代誌 iau是 無嚴重， 大約 一個月後， zit回 是 另外一個弟子 ho刁工叫入 房內， 良秀 仝款 di昏暗ｅ 油燈火中 咬畫筆， liam當時 對弟子講： 「煩勞你lo， veh 閣 請你褪掉 衫仔褲。」
之前， 師父dor定定吩咐 弟子 按呢做， 歸身光光， 伊閣 怪形怪狀、 結目頭講： 「我想veh看人 hong縛起來ｅ形， 雖是 對不住你， 敢esai暫時ho我擺弄一下？」 話按呢講， suah一絲仔 dor ve在意， 話氣 足冷森。 本底zit位弟子 dor是 勇健結實ｅ 少年人， 去teh長刀 比teh畫筆 卡妥當， liam當時 對 師父ｅ要求 正是著驚， 過足久以後 ziah講著 zit件代誌ｅ時， iau閣講： 「我掠準是 師父起痟a， 想veh ga我tai死！」 hit當時， 良秀看伊 無行動 三心二意ｅ形， dor無耐煩， m知 ui dor位 抽出 一條鐵鏈， hua la la纏di手裡， 然後 用 撲殺ｅ姿勢 跳去 弟子ｅ腳脊頂， 硬ga伊ｅ雙手 扭guainn吊起來， ga鐵鏈 一len一len ga捆綁起來。 續落來 ga鐵鏈ｅ一頭 用力qiu一下， 弟子 受堪ve diau， 身軀 隨著重力 摔di土腳， dor按呢 倒di hia。
九、
Hit時陣， 徒弟 dor親像 ga酒甕cia倒 di土腳ｅ 身形， 因為 腳手攏冷酷deh hong扭轉， ganna頭殼edang振動。 壯實ｅ身體 ho鐵鏈纏an 血流ve通， 面、 身軀、 皮膚 攏紅gong gong。 良秀 並無注心 人ｅ痛苦， 猶原di四邊seh來seh去， 觀察hit款 親像酒甕ｅ 身體， 尚且 出手去畫作 幾張仝款ｅ 寫實圖。 Di zit段時間， hong縳著ｅ徒弟仔 有外痛苦， dor m免 再描述a。
若是ganna繼續按呢， 無別款代誌 發生， 徒弟ｅ痛若 恐驚會 延長足久。 好佳哉（m知是 幸運或不幸） 過了一下a， 房間壁角ｅ 壼罈烏影中， 有烏油hit款物件 細條細條 變軟 溜流出來。 起先 伊 假若黏tih tih， 慢慢仔 deh sor振動， 後來 開始順deh滑行， 再閣 發出閃光， 弟子目見伊 流來鼻頭， 無法度 dor禁氣大叫：
「蛇……蛇！」
伊hit陣a 感覺 全身ｅ血 攏凍固起來a， 這edang理解。 蛇 其實 iau差一絲仔 dor veh ga冰寒ｅ 舌尖 吐du著 ho鐵鏈束綑ｅ 頷頸仔肉。 突發ｅ意外， 良秀 閣安怎cior dior ma驚一大dior， 趕緊 丟dan掉筆， 一彎身， 快身手 dor掠diau蛇尾， ga倒吊掠leh， 吊倒ｅ蛇頭 qiah頭起， 溜軟 deh捲旋身長， mgorh無論安怎 ma ve liong到 hit個人ｅ手。
「攏是你， 害我 畫歹一筆！」
良秀 氣put put嚷出嘴， 直接ga蛇 dan入 房間壁角ｅ 壼罐仔內， 然後m情願 去解開 徒弟身上ｅ 鐵鏈。 伊 只不過是 ga解開nia nia， 對受苦ｅ弟子 a無一句 安搭ｅ話語。 親像 畫歹去一筆 比 徒弟 受蛇害 閣卡 vedang忍受吧！……後來聽講 hit隻蛇 ma是伊 為veh素描 所飼ｅ。
Ganna聽著zit件事， dor可知 良秀 hit款 痟癲狂亂 ho人畏怕ｅ 偏執性情。 這閣m是 上極端ｅ， 另一zan 是 一個 十三四歲ｅ徒弟， ma是因為 地獄變屏風ｅ 擬真， 差一點仔 dor無命。 Zit位弟子 生做一身 白pau pau 若少女ｅ肉色。 有一暗， 伊無意中 ho師父 叫入房間， 良秀di燈台腳， 手心 kng一塊 臭腥ｅ肉， du deh飼一隻 罕見ｅ鳥仔， 鳥體 親像 貓仔ｅ大細a， 伊ｅ 兩爿鳥毛 像 一對耳仔 向外翹出， 大大圓圓ｅ目睭 是 琥珀色， 安怎看 dor像貓。
十、
良秀 本底 dor足討厭 人管伊ｅ代誌， 連 蛇sor出來 拍斷ma是， 仝款zit類代誌 伊並ve ho徒弟知。 有時桌頂 kng骷髏頭， 有時 排銀碗， 漆泥金畫作ｅ guan腳盤， 看伊 所作ｅ畫面 有所改變， 攏是ho人 足意外ｅ物件。 Mgorh， 平常zia-e物件 攏收藏 di dor位 並無人知。 所以講 伊有 福德大神ｅ保佑ｅ 流言， di某種程度 確實 gah zit件代誌 有關。
話講來 學徒看著 桌頂怪異ｅ鳥， 心內想講 這應當是 為著 畫地獄變屏風 才添加ｅ， dor來到 師父ｅ面前， 恭敬好禮 問：
「有什麼代誌 veh吩咐無？」
良秀 無聽入耳， zinn著 伊ｅ紅嘴唇， 用下骸 向鳥講： 「安怎， 是m是 足溫順？」
「這是 什麼鳥？ 我mvat看過。」
弟子如是講， 驚驚看著 zit隻有耳仔 像貓仔ｅ鳥， 良秀dor用 平常ｅ口氣 恥笑講：
「什麼？ 無看過？ 都市song dor是ziah害。 這是 二三工前 京都鞍馬山ｅ 拍獵師 ho我ｅ， 號做 耳木兔， 只是 veh像 ziah-nih溫順ｅ， 真罕！」
Zit個人 講著話， ga手 款款仔 qiah起來， 輕輕仔 ui下身往上 sor著 du食了肉ｅ 耳木兔 腳脊ｅ毛。 Dor di zit個時陣， 鳥 突然發出 短短急促ｅ 尖叫聲， 雄狂ui桌頂起飛， 兩支腳爪 tih開， 衝向 徒弟ｅ面。 若m是 弟子趕緊 用手袖遮leh， 受傷 是逃ve過ｅ。
伊 「啊」叫一聲， hiu開手袖， du deh ga趕走， 耳木兔dor 閣 雄gaigai向伊衝啄……徒弟ve記師父dor di面前， 有時 kia起來閃避， 有時 坐落趕鳥，不管三七二十一 dor di窄窄ｅ房內 走來逃去。 怪鳥隨著 人ｅ動作， guan guan 低低反應， 相準 對方ｅ目睭 飛來。 每一gai 攏會pa-da pa-da拍動翅股， 運作出 掃落葉ｅ氣、 水沖ｅ飛瀑 或 猿酒發酵ｅ熱氣 等 奇怪驚人ｅ 氣氛， 真正 有夠恐怖。 講起來， zit個徒弟ma vat講過， 連 微暗ｅ油燈火 攏像 霧霧ｅ月光， 師父ｅ房間 攏假若是 di陰森遙遠ｅ 深山中 ho妖氣罩著ｅ 山谷， ho人心肝 pok pok跳。
Mgorh， ho弟子 極驚惶ｅ是， m ganna是 ho耳木兔 攻擊ｅ代誌。 更ho人 起雞母皮ｅ是， 良秀 di邊仔 冷眼看 zit場 攻擊防守ｅ戰事， 一副 老神在在 deh展紙整筆， 描畫著 hit個生做 若少女ｅ 少年人 ho奇怪ｅ大鳥 欺負ｅ 驚人狀況。 弟子 看著 師父hit款， 隨有一種 講ve出嘴ｅ驚惶， 事實上 ma有 lim當時 會ho師父害死ｅ 著驚 留di心肝頭。
十一、
實際上 ma m是 無完全ve ho師父 害死ｅ可能。 其實， hit暗 良秀 特別叫 弟子過去， dor有使弄 耳木兔 攻伊ｅ意圖， 伊想veh ga弟子 四界走閃ｅ 真景 畫落來。 因此， 弟子看著 師父ｅ情形， dor自然 會用手袖 掩頭， 發出 無助ｅ慘叫， 一直走去壁角ｅ qiu門邊， giu縮一團 ve振ve動。 Zit時， 良秀 ma m知 為何驚惶 叫出聲， 想veh kia起來， mgorh耳木兔ｅ 拍翅聲 suah更加激烈， 接續來ｅ是 物件 東倒西歪， 摃破pin-pin-piang-piang ｅ 嘈碎聲。 弟子閣再 卡驚惶， ga掩著ｅ頭 qiah起來 探看， 房間 m知di什麼時陣 變gah 暗sor sor， ui內面傳出 師父 deh叫傳 弟子ｅ 緊急聲。
歸終尾 有一位弟子 ui遠遠ｅ所在 回應， 然後qiah燈火 入來， di有臭油味ｅ 燈照明下， 看著 燈台cia倒， 地枋gah榻榻米 潑gor著油漬， 耳木兔ma哀苦 deh拍動翅股， 軟軟無力 倒di土腳。 良秀 di桌ｅ另一邊 半撐身，iau有驚惶ｅ表情， 嘴內seh seh唸著 別人聽無ｅ 雜語』。……這ma莫怪， hit隻耳木兔ｅ 身上 有一隻 烏金ｅ蛇， ui鳥ｅ頷頸仔 一直ga纏到 一爿ｅ翅肢。大概是 弟子di壁角 giu做一團ｅ時， ga壼罐en倒， 蛇dor sor出外口， 耳木兔veh去掠蛇， 引起 雙方決鬥。 兩個弟子 相對看， 一時之間 ganna憨呆憨呆 deh看zit幕 奇妙ｅ怪場， 過一下a 只有回神過來 向師父 行一個禮， 無聲 退出房間。 蛇gah耳木兔ｅ 尾場如何， dor無人知a。
親像 zit款代誌， m是ganna zit件， iau有真濟。 頭前ma講過， 大人下令 veh畫 地獄變屏風 是 初秋ｅ代誌， 一直到冬尾， 良秀ｅ弟子 dor一直遭受 師父 出各種怪招ｅ 威脅。 到冬末， 良秀可能di屏風ｅ繪圖出問題， 一個人 變gah 閣卡陰沈， 講話ｅ態度 ma變gah 更加 暴力粗鹵。 仝時陣， 屏風ｅ草圖 一直無進展。 無no！ 連進前 畫好ｅ所在 ma有可能 拭掉重畫。
到底 屏風di dor位 出問題， ma無人知， ma無想veh知。 弟子 為著各種 奇奇怪怪ｅ代誌 受苦， 感覺 好參像 gah虎狼 dua仝所在， 下定決心， 盡量 無愛去 接近師父。
十二、
關係 zit段時間ｅ代誌， 無什麼 特別值得 報導ｅ， 若強 veh zuh一寡，dor是 hit位 倔強主觀ｅ 老歲仔 m知為什麼 變gah 特別會 流目屎， 聽講伊時常di無人ｅ所在， 孤一人哮gah cng cng叫。 特別是 有一工， 一位弟子有代誌 去埕斗， 看著伊 kia di行人巷， 茫茫心思 qiah頭看去 春尾ｅ天頂， 目箍內 gam滿目屎。 弟子 看著師父 hit款情形， 反倒 m敢接近伊， dor無聲說 翻頭 倒轉去。 Hit個 為著veh畫 “五趣生死圖”， 連路邊屍 攏畫過ｅ 傲慢查甫人， 竟然為著 無法度 順利畫出 屏風圖， dor懊惱 gah qin-a仝一款deh哮泣（kip7）， m是 真奇怪嗎？
話講 良秀zit爿 dor若頂面 所講ｅ按呢， 伊真反常 deh熱心專注 畫屏風圖， 另一爿 少女zia， m知 為什麼， 伊 愈來愈鬱卒， 連di阮面頭前 ma是一款 強忍目屎ｅ 可憐形。 伊本底是 一個 面貌憂愁， 皮膚白pau-pau， 溫文好禮ｅ 少女， 近來dor是 目睭毛 變gah足沈重， 目箍 變gah烏sor sor， 神態真慘。 起初 ma有 真濟猜測， 掠準伊是 心悶老父， 或為 戀情操煩，mgorh中間 開始有流言， he是 大人愛伊 順伊ｅ意ｅ 原因， 自按呢， 親像逐個人 攏ga伊 放ve記去a， 無人 閣提起伊。
Du 好是 中間 zit段時間ｅ 代誌吧！ 有一工深夜， 我一人 經過 行人巷， hit隻 良秀猴 liam當時 dor跳過來， 做出 qiu我ｅ衫仔角ｅ 動作。 He確實有鼻著 梅花清芳， 有幽淡月色ｅ 溫暖ｅ夜暗，mgorh月光一照， 猴歪著 伊ｅ白喙齒， 鼻頭liap liap， 像起痟按呢 尖聲gi gi 叫。 我有 三分驚 七分氣， 因為 新褲ho猴qiu leh ｅ氣， 起初想veh 用腳ga踢走， 閣繼續行， mgorh停一下 閣想著， 之前 有 一個武士 痛打zit隻猴， suah惹公子 無歡喜， 而且 猴ｅ動作 親像 無平常， dor決定 照伊qiu向ｅ所在 行ziann十公尺。
然後， di行人巷 一個彎角， du好行到di暗時 ma有白色ｅ水池邊， edang看著 枝椏優美ｅ松樹 另一頭 闊闊ｅ景色。 附近房間內 傳出有人 deh爭吵ｅ聲， 慌狂、 亂異 鑽入 我ｅ耳孔。 四箍笠仔 寂靜， 分ve清是 月火或薄霧ｅ 氣氛， ganna魚跳水聲 以外， 一點仔聲嗽 攏無。 因為si- si suainn- suainn ｅ聲， 我dor kia leh注意， 心想講 有歹徒， 一定veh ho伊 一寡 拳頭姆， dor禁氣， 輕步行去 hit道門外。
十三、
可能是 猴看我動作 siunn過溫吞慢sor 。 伊足著急 di我ｅ腳邊 seh兩、三lin， 然後 發出嚨喉 hong束著ｅ聲， 猛掠一跳 kinn di我ｅ肩胛頭， 我自然扭轉 我ｅ頷頸仔， 想veh閃開 伊ｅ爪仔， 猴suah咬著 我ｅ藍手袖， m愛滑離我ｅ身軀 - - zit個力量 ho我 無法度控制 觸(dak)顛兩、三步， 腳脊piann大力long著hit片門。 到zit款地步，ma vedang延遲dor qiu開門，跳入去月娘照ve到ｅ房裡。 Zit時 遮著我ｅ目線ｅ 是 - - 無no！ ho我閣卡著驚ｅ是， di仝時陣， 房間裡 有一個查某人 親像 hong 彈出來 按呢 走出來。 查某人 差一點仔 dor撞著我， 直接 滾去外口， m知為什麼 dor跪落去， 氣喘ve順 好像是 看著 什麼恐怖ｅ 著驚人物， 身軀gi-gi cuah deh看我ｅ面。
M免講 ma知影， he是 良秀ｅ查某囝。 Hit暗， zit個少女 彷彿變做 另一個人， 真實 入我ｅ目中。 伊目睭 大蕊大蕊 有光， 面紅紅 deh燒熱， 散亂ｅ 裙gah內衫 ho伊脫離 平常ｅ幼稚， 變gah 特別美麗。 He是 柔弱無依， 事事溫順ｅ 良秀ｅ查某囝嗎？── 我ｅ身軀 靠著qiu門， 看見 di月光下 美麗姑娘， 指著 雄狂離腳ｅ 腳步聲， 恬恬 用目神 問伊： 「是誰人？」
少女咬嘴唇， 搖頭 無話句。 Hit個形 足委屈。
我dor彎身， ga嘴 貼di伊ｅ耳邊 細聲問： 「是誰人？」 mgorh， 伊仝款搖頭， 一字dor m回答。 無no！ di zit時， 伊長目睭毛 gam滿目屎， 嘴唇咬gah 比du-ziah 閣卡密合愈an lo。
天性遲鈍ｅ我， 除了 真坦白清楚ｅ 代誌 以外， 什麼 彎曲ｅ代誌 ma m知。 所以， 我m知 veh講什麼， 一時只會曉 伴di hit個 pi-pi-cuah ｅ查某qin-a， cai-cai kia di hia。 當然其中ｅ原因是， m知 為什麼 總會感覺 閣追問落去 dor有失禮。
M知 過外久， 我 dann關合qiu門， 越頭去看 心神 有淡薄仔 回復過來ｅ查某qin-a， 盡心力 溫和安慰伊 講： 「轉去你房間！」我家已 親像 看著 無應該看ｅ代誌， 心肝十下五下 m知對誰人 感覺愧對 hit樣， 恬恬轉來 原來ｅ所在。 Mgorh行無夠十步， 又閣有 什麼人 緊張qiu著 我衫裾， 我著驚 越頭看， lin會掠準是什麼？
原來是 良秀猴 di我ｅ腳邊， 像 一個人仝款 雙手貼地， 金鈴仔 liang liang叫， 對著我 恭敬行禮 幾 a gai。
十四、
Hit暗了後， 大約閣 過了 半個月。 有一工， 良秀 突然出現 di府宮， 要求 馬上晉見 大人。 伊ｅ身份 雖是低下， 可能是 平常特別 受人欣賞， 無凊采 召見人ｅ大人， di hit 工 ma足豪爽 dor答應a， 隨dor叫伊 來到面前。 Hit個人 仝款穿 薰芳ｅ禮衫， 戴軟烏帽， 流露出 比平時 閣卡陰沈ｅ 表態， 恭敬 向前跪拜， 了後 用沙濁ｅ聲 講：
「關係 您進前吩咐ｅ 地獄變屏風， 我日暗拚deh畫， 巳經 大有成果，到 收工ｅ階段lo！」
「按呢 真恭喜la， 我足滿意lo！」
大人ｅ聲音 m知為何 特別 軟弱鬆散 無氣力， 無精無神。
「無no！ he一點仔 ma無 值得祝賀。」 良秀 有一點仔 氣惱， 目睭垂垂。
「雖是 大致上 攏畫好a， mgorh 有一個所在， 我到zitma iau畫ve 出來。」
「有什麼 畫ve出來ｅ 所在？」
「是按呢la！ 我 通常需要 親目睭見著 才畫會出來。 Dor算edang畫， ma ve滿意。 結果是 gah 畫ve出來 仝款。」
聽著按呢， 大人ｅ面 露出kau seh ｅ笑講：
「若按呢 veh畫出 地獄變ｅ屏風， dor一定 愛看著 地獄dann有成果lo？」
「是a， di舊年 發生 大火燒ｅ時， 我dor親目 見著 gah燒燙地獄 相當ｅ熱火， 我edang畫出 “扭身不動明王像”( 註5) 背後ｅ 圖案火景， dor是因為 親目看見 hit場火災ｅ 關係。 您大概知影 hit幅畫honn？」
「罪人呢？ 你應該 mvat看過獄卒 honn？」 大人親像 無聽著 良秀ｅ話，接deh追問。
「我看過人 ho鐵鏈綑纏ｅ 形樣， ma詳細描繪著 人ho怪鳥纏鬥ｅ 情景。 按呢 dor vedang講 m知影 罪人 受刑ｅ苦楚。 若獄卒……」 良秀一面講， 露出 恐怖ｅ苦笑， 續deh講： 「獄卒 di我 半陷眠中 出現過 足濟遍。 有ｅ是牛頭馬面， 有ｅ是 三頭六臂ｅ鬼形， m出聲 deh拍pok-a， m出聲 嘴開開， 差不多 逐工 攏來折磨我……我畫ve出ｅ圖景 m是這。」
聽著按呢， 連大人 ma驚奇。 伊一時 只是無耐 煩目相著 良秀， 然後dann嚴歹 deh結目頭， 喝聲講：
「a你 到底是 什麼 畫ve出來？」
十五、
「我想veh di屏風中 畫一台 檳榔毛車 (註6) ui空中 墮落ｅ情況。」 良秀 講， 目光利劍 看著大人。 聽講 hit個人 若談著 畫作， dor親像 起痟按呢， hit時 伊ｅ目神 有影 有hit款 恐怖ｅ形影。
「Hit台車頂 愛有 一個嬌美ｅ 查某人， di大火中 散亂 烏頭鬃， 忍受痛苦。 面ho火燻著， 結眉頭， qiah頭 看車蓋， 手 tiah破布簾， 若deh防止 親像 落雨 hit款火星。 四箍笠仔 有一、二十隻ｅ 怪猛鳥類， 長嘴 牽聲哮喝， 一直di邊仔 seh來seh去。 ……啊！ hit種 牛車內底ｅ 查某人， 我dor是 畫ve出來。」
「a……veh安怎？」
大人m知安怎， 神色 真正 特別歡喜， 口氣催促著 良秀。 Mgorh良秀suah親像 發燒ve自在 deh cuah著 伊ｅ 鮮紅嘴唇， 用 若眠夢ｅ口氣 講：
「He我 dor是 畫ve出來。」 伊 又閣 重覆一gai， liam當時 下著決心 deh要求：
「請大人 edang di我面頭前 燒一台 檳榔毛車， 若是edang……。」
大人 面色沈一下， 又閣 放肆 大聲笑， 笑中帶喘 講：
「ua！ dor照 你ｅ意思， m免 閣談論a！」
聽大人 按呢講， 我直覺上 感受著 話語內底 帶殺氣。 實際上， 大人ｅ面形 是 嘴角 bu白波仔nua， 目頭 若閃電 hit款抽顫， 有染著 良秀ｅ痟狂範， 真奇異。 話講了， 大人又閣 若爆發hit款， 嚨喉 一直發出 kok kok叫。
「Dor di檳榔毛車頂 點火吧！ ma愛安排 一個嬌艷ｅ 查某人 坐內底，di火焰gah烏煙ｅ 攻擊下， 查某人 受盡痛苦 死亡……， edang想著zit點 dor是 在腹ｅ 天下第一 大畫師。 有夠qau！ 一度贊！」
聽大人ｅ話， 良秀 一時dor隨變面色， 喘大氣， 嘴唇一直 cuah ve停，了尾 歸身軀肉 好親像 鬆化落來， 雙手 貼di榻榻米頂， 用細聲gah 聽無ｅ話， 答恩：
「感謝大人。」
這可能是 因為 伊所計畫ｅ 恐怖圖面， 隨著 大人ｅ話 活跳跳 親像 已經di面前。 我一世人dor ganna zit gai 認為良秀 真正是 一個可憐人。
十六、
He是 兩三工了後ｅ 暗夜。 大人 照約束 召見良秀， 叫伊 親身去看 檳榔毛車 火燒ｅ場面。 焚燒ｅ所在 m是di堀河府宮， 是di俗稱 「雪解御所」ｅ地點， 以早 大人ｅ小妹 dua ｅ 京城郊外山莊。
這「雪解御所」 是 拋荒足久 無人dua ｅ住所， hiah大ｅ埕園 隨在伊去破廢， 大概是 vat目見 zit位所在 無半人行腳到 來推論吧！ 關係di zia亡逝ｅ小妹a， ma有 真濟傳說， 有人 di無月娘ｅ暗暝， 到zitma iau有怪誕ｅ紅裙， 無du著土腳 di行人巷 行踏── 這ma莫怪， 御所 di日時dor足死靜， 日頭一落山， 引水ｅ聲音 特別陰沈， di星光下 飛行ｅ白鴒鷥 ma像怪物 按呢， ho人驚畏。
Du好zit暗無月娘， 四界烏sor sor， mgorh ui大殿 di油燈火中 看過去， 大人 坐di倚近 行人巷ｅ位置， 穿著 米黃色ｅ便服 gah 深紫色浮紋ｅ 闊褲， di guan guan滾白色錦邊ｅ 圓座椅上 盤坐。 伊ｅ 前後左右 有五六個侍士 恭敬坐leh， 其中一人 特別慓武， 是 舊年 di陸奧戰役過程中 腹肚iau 去食死人肉ｅ 武士， 聽講自按呢， 伊ｅ力 dor大gah 有夠 撥開鹿角。 伊ｅ下身 穿鐵甲， 佩帶ｅ長刀 像鳥尾 按呢倒翹， di門簷腳 威嚴踞kut 衛守leh。 眾人身 di暗風吹透ｅ 燈火裡， 分ve清是 實境或夢境， 恐怖ｅ氣氛 溢滿。
加上 埕園 停一台 檳榔毛車， 夜色重 沈沈壓著guan guan ｅ車蓋， 頭前無牛， 烏烏ｅ車轅(uan5) kiki 掛di榻架頂， 車頂ｅ金屬 若天星 閃閃sih sih。 看著 zia-e景觀， 雖是 di春天， 卻會冷寒。 尤其是 hit台車內， 用浮紋綢緞滾邊ｅ印色布簾 嚴嚴密密 封diau diau， m知內底 是什麼。 車ｅ四邊 有雜差 teh著火把， 斟酌著 mtang ho煙 吹去 行人巷， 謹慎deh防備。
良秀本人di 卡遠一寡ｅ所在， du好 di面向行人巷ｅ 地點跪坐leh， 穿插 仝款是 薰香ｅ 禮服gah軟烏帽， 可能是 di星空ｅ 罩壓下， 看起來 比平常 卡無看頭。 伊ｅ後壁 有一個人， 穿插仝款ｅ 烏帽禮服 姿勢踞leh， 可能是 陪伊來ｅ 弟子。 Hit二人攏 踞di遠遠ｅ 陰暗處， ui我所diam ｅ 廊巷下看過去， 連禮服 ｅ 色水 ma無法度 分清。
十七、
時間 巳接近半暝， mua罩 林泉ｅ夜景 無聲極靜， 親像禁氣 deh偷看眾人ｅ氣息， ganna風 傳來聲音， 一直飄來 火把ｅ 臭煙味。 大人 禁聲一下， 一直看向 zit款 奇異ｅ景色， 了後ziah向前 徙動腳頭u。
「良秀！」 尖利ｅ 呼叫聲。
良秀回應了 一寡話語， mgorh 我ｅ耳孔 ganna聽著 模糊ｅ回音。
「良秀， 今暗 dor照你ｅ希望， 放火燒車 ho你看夠氣。」
大人按呢講， 目睭 向 邊仔ｅ人 掃過。 Zit時 大人親像 gah其中 某一個人 交換了 一款 無單純ｅ笑， 這可能是 我siunn敏感。 Zit時 良秀 足驚惶 qiah頭看 行人巷， mgorh無出聲。
「斟酌看， 這是 我平常坐ｅ車， 你應該ma vat看過……， 我veh放火燒zit台車， ho zit種火燙ｅ地獄出現di你ｅ面頭前。」
大人 又閣封嘴， ga邊仔ｅ人 使目尾， 再突然 轉話 用憂悶ｅ口氣 講： 「hin內底 有一個 負罪ｅ侍女， hong縛di車頂。 車內 火若點著， hit個查某 定著 dor肉焦骨碎， 傷重極苦 亡死。 這對你 veh完成ｅ 屏風 是上gai好ｅ模本。 趁機會 好好仔看 伊 雪白ｅ肌膚 ho燒爛ｅ 情形， 烏頭鬃散iann iann 飄做 火花ｅ情味 ma愛詳細看。」
大人 第三gai封口， m知 想著什麼， zit回 ganna搖動 肩胛頭， 陰陰無出聲 deh笑。
「Zit個景觀 後代人 看ve著， 我ma veh di zia 看晃。 人來a！ ga簾仔 掀ho開， ho良秀看 內底ｅ 查某人 吧！」
命令du出， 一個雜奴 dor guan qiah火把， 大步向牛車， 雄雄伸手 ga簾仔 sa起來。 火把 pi-pi-piak-piak， 夾著 紅gong-gong ｅ 火光 搖搖擺擺， 照著車廂。 Di車座內 ho鐵鏈 夭壽綑綁ｅ 查某人……啊！ 有誰人 會看 走精去leh? 繡櫻花艷美ｅ 禮服頂面， 披著 烏溜金色ｅ sui頭鬃， 插ki斜ｅ金簪(ce)閃出光 iann-iann ｅ 輝彩， 打扮 雖是特別， mgorh hit款 細細玲瓏ｅ 體格、白pau-pau ｅ頷頸仔， iau有 hit個恬靜、 孤沈ｅ 半爿面， 絕對是 良秀ｅ 查某囝。 我差一絲仔 dor 叫出。
Dor di zit 個時陣， 坐di我對面ｅ 武士 雄狂起身， 一手按刀柄， 嚴厲deh監視良秀。 目前ｅ一切， 我cuah一dior， hit個查甫人 面對著 zit款情景 dor親像 失去 一半ｅ理智。 伊 ui踞di下腳ｅ 身軀 liam當時 跳起來， 雙手伸去 頭前， 想veh走過去 牛車hia， mgorh dor親像 頭前講過 按呢， 伊身 di遠遠ｅ 陰影裡， 面貌 無法度 看清楚， mgorh按呢想 ma是 一目nih-a nia-nia， 面腔變樣ｅ 良秀， 親像 有什麼看無ｅ 力量 ga伊 吊di空中， 伊ｅ身影 隨dor透過烏暗 清楚現 di目前。 隨著 大人命令 「點火」， 少女所坐ｅ 檳榔毛車 ho雜奴 投引ｅ火把 燒gah 火星pok pok跳。
十八、
目見 火吞車蓋。 附di車ｅ 邊緣ｅ 紫線鬚 ho火力 竄燒gah 飄飄搖搖， he下面 昏暗捲起 di夜色 白霧ｅ煙卷中， 車簾、 手袖、 車ｅ金屬 輪番 碎裂飛散， 火星 若雨ｅ飄舞…… hit款慘烈 是 無法形容ｅ。 無no！ 上驚人ｅ是 吐出 火團ｅ火舌 攀上 門邊ｅ格仔， 猛火升到 半空中ｅ焰彩， 親像 夕陽落山， 天火 dudeh爆裂。 之前， 我差一絲仔 dor 叫出聲， zitma 全攏失去 心魂， ganna嘴開開， 茫茫看著 恐怖 ｅ光景， ma vedang按怎出手。 Zit時陣 伊ｅ老父 良秀， ……。
良秀 hit陣ｅ表情， 到zitma 我iau 記diau diau。 Hit個人 本能想veh走向牛車， mgorh火一著 伊dor停腳， 手仝款 向前伸， 目神 一直盯看， 親像ga車ho包diau ｅ 火煙 吸引去a。 伊全身照 di 火光中， 皺紋滿面 ｅ 歹看面， 連嘴鬚尖端 攏看gah 清清楚楚。
若講著 hit對 展gah像牛目ｅ 大目睭， 歪曲ｅ嘴唇， 閣有 一直giu痙ｅ面肉 cuah抽動， 一再 攏deh顯示出 良秀心內 交纏ｅ 驚惶gah悲傷。 若是面對 斷頭台刑死ｅ 賊盜， 甚至是 十惡不赦ｅ 罪犯， ma ve出現 zit款痛苦ｅ表情。 按呢， 連 hit個慓惡ｅ武士 ｅ 面色 ma 自有變化， iam-iam-iap-iap deh偷看 大人ｅ神情。
大人ga嘴唇 咬 an an， 有時露出 恐怖ｅ微笑， 目線 一直盯di牛車……ai-ia， hit當時 di內底ｅ 少女模樣， 我 實在無勇氣 來說明詳細。 He ho 煙 嗆gah qiah頭向上 掙脫ｅ 白死殺ｅ面貌， 焰火掃過 伊ru-cang-cang ｅ 長頭毛， iau有一絲時 a dor 化做火星ｅ 櫻花禮服美妙 - - 有夠悽慘 ｅ 景象啊！- -。 尤若是 一陣夜風 吹來， 煙火 飛向另一爿， ganna看著 紅gong gong若像deh ia 金粉ｅ火河中， 浮出 嘴內咬 頭毛絲， 身軀 使盡氣力 veh ga鐵鍊 拐斷ｅ形象， 使人感受著 he正正是 地獄苦難ｅ 寫實。 不只是我， 連hit個慓悍ｅ武士 ma起加冷sun， 身毛cang直起來。
又閣 吹起一陣風， 飛過埕斗ｅ 樹尾－－ 逐個人 攏是 按呢想吧！ He 聲音 di烏 sor sor ｅ 暗夜中， m知veh 向dor位 流竄， liam 當時， 有什麼 烏lu lu ｅ物件， 無落地 ma無 飛上天， 親像 跳球， ui 御所ｅ厝頂 以直線 投向 火燒車。 Di 朱紅ｅ 門邊格仔 燒gah 亂七八糟， moh著 身軀 ging倒起來ｅ 少女ｅ肩胛頭， 伊 痛苦gah 無法度 出話語， 若 絲仔布 裂離拆開ｅ 尖叫聲 牽長傳到 煙霧以外。
接續落來ｅ 閣聽著 兩三聲－－逐人齊聲喝“啊！”ｅ 驚叫聲。 隔一層 若布簾ｅ 火焰， an an moh著 少女ｅ 肩胛頭 ｅ， 正正是 hit隻 綁di 堀河府內， 外號叫做 良秀ｅ猴。 伊是按怎 偷溜來ziaｅ， 定著 無人知。 正正是 為著平常時 疼惜伊ｅ zo-qin-a， 猴 做伙來 跳火海吧！
十九、
猴ｅ身影 ganna 出現 一目nih-a， 一串 若泥金畫ｅ 火焰 pi-li-hua-la 升上天， 猴 gah少女ｅ 身影攏埋 di烏煙團裡， 埕斗中央 ganna有 一台 火燒車 pi-li-pa-la 淒淒慘慘ｅ音 燒gah 烈 kong kong。 無 no！ he 竄飛去 空中滾絞ｅ 恐怖火焰， 若講是 火燒車， 不如講是 火燒柱 閣卡適當。
良秀 看著 火燒柱， 定神法 柴柴 kia di hia－－有夠 掠ve著伊ｅ 心思 啊。 Ta-du-a iau deh為 地獄ｅ折磨 苦惱ｅ伊， 一時 di伊 皺紋滿面ｅ 面上 浮出 無法度 形容ｅ 光彩， hit種 茫緲ｅ 歡喜心， m管身處 di大人面前， 雙手 an an貼 kng di 胸前， kia di hia。 親生ｅ查某囝 痛苦身死ｅ 慘境並無看入 di伊ｅ目中， ganna美艷 ｅ火彩， di內底 受苦難ｅ 查某人 形體， ho 伊 產生 無限喜樂－－ 看起來， 這是真ｅ。
尚且， 真不可思議ｅ是 不只是 hit個人 歡歡喜喜 看著 家己ｅ 孤查某囝慘死。 Hit時 良秀ｅ 面貌， m知為何 有一種 m是普通人ｅ， 若夢幻中ｅ 獅王起怒 hit 種 奇異ｅ莊嚴。 一大堆夜鳥 ho意外ｅ火舌 驚著， 一頭驚叫 一頭飛來飛去， ma m敢飛近 良秀ｅ 軟烏帽。 可能是 di單純ｅ 鳥隻目中， hit個人ｅ 頭頂 親像 有光輝， 有 不可思議ｅ 威嚴。
連 鳥隻 攏按呢a， 何況是 阮gah雜工， 逐人 攏禁氣 歸身軀 pi-pi-cuah， 充滿 另類ｅ隨喜心， 假若 注目deh看 開眼ｅ佛像， 目線 無離開 一直deh 觀注 良秀。 聲振天頂ｅ火燒車 所引起ｅ火焰 gah 失魂呆kia ve振ve動ｅ 良秀 - - 何等莊嚴， 何等歡喜 啊！ mgorh， dor有一個人， ma dor是 行人巷ｅ大人， 變做 另一個人 hit 樣， 面色青sunsun， 嘴角 bu白泡仔nua， 雙手 an an qiu著 紫色褲ｅ腳頭u， 親像 喉嚨乾燥ｅ 野獸 一直deh喘氣……。
二十、
Hit 暗大人 di 雪解御所 放火燒車ｅ 代誌， m知 ui誰人 傳出去， 引來真濟批評。 第一個 是 為什麼 大人 veh 燒死 良秀ｅ 查某囝 - - 流傳上濟 ｅ 是， 因為 伊求愛 無成， 見笑 轉仇恨 來報復。 Mgorh 大人 dor算是 存心 放火燒車 殺人， 定著是 對 屏風畫師 劣根性ｅ 處罰， 這我vat聽 大人 親嘴講過。
良秀 雖是 親目看見 查某囝 hong 燒死， 閣固執 veh畫屏風圖， zit款鐵石心肝， ma hong人 講 ve suah。 有人責備伊 為著畫圖 拋捨 父女親情， 是人面獸心ｅ 大歹惡。 He橫川ｅ 方丈主持 ma是 認為按呢， 時常表示 講： 「無論如何 精注 一藝一能， 做人ma 應當識守 五常ｅ道理， 若無 dor 愛落地獄 是 免不了ｅ ！」。
過了 一個月後， 地獄變ｅ 屏風圖 完成 a， 良秀 趕緊送去 府宮， 恭請大人 鑑賞。 Du 好方丈 ma在場， 雄雄看著， 隨著 hit款 漫天滿地 團團 kam著ｅ 狂暴烈火 驚振著， 本底 一直 激一個面 gin良秀ｅ伊， 看了 畫 ma 禁ve diau 拍腳頭 u 講： 「有夠好！」 聽著 zit 句話， 大人 若笑ｅ模樣， 我iau記gah 真清楚。
自按呢了， 至少 di府宮內， 攏無人 閣再講著 hit個人ｅ 歹話 a 。 便若是 任何人 看過屏風， 平時 無論 外討厭良秀， 攏會 不可思議 deh ho hit 款 莊嚴ｅ心情 感動著， 可能是 因為yin確實 感受著 燒燙燙ｅ 地獄ｅ 大苦難 吧！
到 zitma， 良秀 已經無 di人間。 伊 di 完成屏風ｅ 第二暗， dor di 家己ｅ房間內 吊dau自盡 a 。 既然失去 孤傳骨肉， 恐驚家己 ma無法度 平靜活落去。 屍體 iau 閣留埋 di hit間厝內ｅ 舊所在。 Hit 座 小小ｅ墓牌 經過 數十冬ｅ 風雨吹打， 定著是 已經 生滿青苔， 看ve出 是 誰人ｅ墓 lo！〈1918.4〉
註解：
1. 大威德明王：五大明王之一， 三面六臂， 手qiah矛、 劍、 輪、 杵， 騎大白牛、 守護西方， 制服所有ｅ 毒蛇惡龍。 五大明王 為 東方 降三世明王、 西方 大威德明王、 南方 軍荼利明王、 北方 金剛叉明王， 居中ｅ 不動明王， 合稱 五大明王。
2. 地名， 指zitma仙台附近ｅ 宮城縣鹽釜市， 陸奧 是 東北地方ｅ簡稱。
3. 佛教用語， 五種世界 是 天、 人、 鬼、 畜、 地獄， 眾生身後 依照 伊生前 善惡行為 生、 降鋪排。
4. 一種 想像ｅ妖怪， 有翅， 紅面 guan 鼻， dua di 深山林內， 神通廣大， 會飛， ma 引用來 形容人ｅ 自大。
5. 不動明王 為佛教守護神 之一， 梵音為Acalanatha 意為 不動尊 或 無動尊 慈悲堅守 意為不動， 明ｅ意思 是 智慧光明， 王ｅ意思 是 駕導一切現象者， 面容扭曲 怒目暴牙 威嚴顯赫 來趕惡魔， 或 憂心重重 關照生靈， 畫像背後 通常攏是 一團一copｅ 火焰圖紋gah圖彩。
6. 一種 用檳榔葉 曝乾拆開葉絲 掩 di 車蓋頂， 專 ho 高官、 貴婦人 做ｅ牛車。
(感謝博凱 第一gai 校對本篇！)
全站熱搜
留言列表
