daiqi007

一本理論kah實務結合的好冊
方耀乾
春凰姊koh拍破一項記錄！春凰姊是台文界的破紀錄者，是先鋒。伊是第一個女性出版台語散文集的作家，伊是第一個出版台語文學概論的作家，伊是第一個用台語出版電影評論集的作家，tsit-ma伊是第一个出版有關台語閱讀kah書寫的作家。伊的台語書寫速度kah接觸的闊度值得咱呵咾、敬佩。
伊欲出tsit本冊名稱號做《閱讀gah書寫》，是用台語書寫的，是一本理論kah實務結合的好冊。過去，台語受著壓制，久長以來台語無hong容允ti正式的教育體制傳授，致使正式的教育體制無培養出任何台語的人才，咱無台語文本thang閱讀，咱也毋知欲去佗位學習書寫。佳哉，百幾冬來真濟有志ti民間、ti邊緣用土法煉鋼的方式出版一寡台語冊，包含字典、散文、詩、小說kah評論，咱今仔日才有一寡台語文本予咱閱讀，嘛才有法度提供「借鏡」予咱學習按怎書寫。春凰姊tsit本冊ui閱讀gah書寫的歷史發展、為何閱讀、為何書寫、到書寫kah閱讀的方法論long有真簡明、實用的論述，koh將伊ti大學開設通識課「閱讀gah書寫」的實踐方法、步數、順序、實例，一項一項拆明講透機。所以我講這是一本理論kah實務結合的好冊，真正值得咱提來好好看、好好讀。
當然tsit本冊毋是kan-ta欲用來閱讀「台語」的文本，咱會當透過tsit本冊來學習著閱讀「任何語言」的文本。千萬毋通因為伊是用台語寫的，所以就誤會伊的「實用性」較無，伊的「闊度」較欠。按呢，你就去想重耽去，大錯特錯囉。伊是一本用台語來介紹如何閱讀kah書寫的冊，當然春凰姊上向望你會當閱讀台語冊、書寫台語文。
Tsit本冊雖然有一寡理論，毋過逐個無免驚，冊裡並無焦燥、高深的理論，long是一般常民會當理解的理念。咱一面「閱讀」作者提供予咱的理論，一面按照實踐方法、步數、順序、實例來「書寫」，相信你真緊會成做「閱讀kah書寫」的高手。這是一本有意義的冊，我真願意為伊寫序。
（作者是 台中教育大學 台灣語文學系 副教授）
（2010.8.23台南永康永二街）