daiqi007

maigorh傳doc檔ho別人a！
許博盛
　　為什麼mai gorh傳doc檔ho別人呢？有足濟原因，有可能對家己m好，ma有可能對別人m好。咱愛先知影一個事實，雖然世界上足濟人用Microsoft Word做家己e文書編輯器，但是無代表所有e人攏是按呢。

　　相信大家攏有一個經驗，doc檔di家己e電腦gah di別人e電腦看起來無啥仝，gorh kah慘e情形是變gah亂七八糟，zit頁e圖跳去別頁，排版gah家己原本排e差十萬八千里。尤其是你若有用kah特別e字型，別人e電腦內底無，原本di你家己e電腦看起來足sui e文件，di別人e電腦內底有可能變gah連你家己攏認ve出來。照按呢a講，你排gah好好e文件，doc檔傳ho別人，別人看dor e 排版是按怎你完全無法度知影。Dor 算講是仝一個版本e Microsoft Word ma無法度保證di兩台電腦看起來一模一樣，m免講無仝版本e Microsoft Word lo，看起來假若是無仝e軟體leh。

　　理由m若按呢，doc檔是一個封閉e格式，也就是講除了 Microsoft，無人真正知影伊e規格，無人有法度寫出一個軟體，完完全全無任何差錯e顯示doc檔。看到zit 個所在，你可能感覺頭前hit兩句無什麼了不起e。咱來想一個情形，若是你ga光碟kng入去光碟機，伊de螢幕顯示講「歹勢！你無買阮dau e播放器，無法度放zit 個光碟」；iah 是另外一個情形，你ka電話去ho別人，電信公司竟然ga你講「你gah對方用e是無仝e電話，無法度gah lin接通」。看dor頭前所講e兩個例，相信你e感覺霧sa sa，doc檔gah zit兩個例是仝款e情形，咱若繼續傳doc檔ho別人，咱dor是le助長zit 種無合理e情形。

　　你一定e想veh講，若mai 傳doc檔ho別人，veh傳啥款格式e檔案hor人kah好呢？先ga你e doc檔轉做pdf再傳出去是一個足好e辦法，因為dng檔案轉做pdf，所有e內容、所有e排版攏ve gorh改變lo，dor算講你有用到一gua特別e字型，轉做pdf了後dor m免擔心別人無hit寡字型。轉做pdf了後再傳出去gorh有一點好處，別人無法度好下好去修改你e檔案。

　　所以，為著家己ma為著別人，請逐家mai gorh傳doc檔ho別人a！