daiqi007

我ｅ阿母是一本活字典

我，是一個自認為台語講了vevaiｅ大學生，雖然定定臭屁講台語真zai，vatｅ語詞也真濟，所倚靠ｅ不止是ziap講nia-nia，上重要ｅ是愛感謝做我私人台語字典ｅ阿母。

我ｅ阿母，嘉義縣竹崎鄉人，受教育ｅ程度無guan，ganna到初中畢業。雖然臺面上只到初中，ka按哪算ma只有九冬ｅ額，但是mai未記li哦，伊使用台語ｅ年歲已經veh倚五十冬a。ma是因為伊受教育ｅ程度無guan，所以伊ｅ台語是原汁原味ｅ哦。

為啥麼講受教育ｅ程度gah台語ｅ好mai有關係呢？這gah yin hit時代ｅ政治因素有關。阿母定氣put-put ga我講，yin di學校讀冊ｅ時陣，是vesai講台語，若講台語hong發現dor愛罰錢，所以好佳哉阿母di學校ｅ時間無長，無我ｅ台語可能dor講gah lili-laklak a。

其實zitma ma仝款，雖然無強制di學校一定愛講國語，mgorh de gah同學開講ia是討論功課，攏慣習用華語，我dor有感覺阮姊aｅ台語dor比我kah好，阿母有講過，冊讀愈guan台語dor愈vai，因為無ziap用、無ziap講ｅ關係。

阿母頭殼內deｅ是正港本土ｅ語言，無受著zin愈來愈濟ｅ外來語詞所影響，所以伊保留一大guann古早味ｅ詞句，這正是我感覺台語上水ｅ所在，也是我真想veh ga保存落來ｅ部份。Zit部份正是阿母大字典ｅ特色。

阿母大字典分做幾aｅ部份；有動物類、植物類、無生命物a類ham諺語類等等。為diorh veh ho逐家知影阿母大字典有外好用，我來舉一寡例：你甘知“蝙蝠”、“貓頭鷹”、“老鷹”ｅ台語veh按怎講？根據阿母大字典ｅ講法，叫做“日婆”、“貓頭gu”ham“la-hior”。你知影“抓扒a”、“剪鈕仔”、“糖酸丸”是講啥麼款ｅ人vo？he是講“愛打小報告ｅ人”、“扒手”gah“心肝仔寶貝”。“住li巷a內”ｅ人是啥麼人，你甘知？有臆著vo？是“內行人”。你知影“一bat溜溜去”是啥麼意思？gah“long-liu-len”有啥麼無仝vo？

當然ia gorh有真濟真濟ｅ資料，kng di 阿母ｅ頭腦li，de等待我去發覺；速度比任何ｅ電腦字典gorh ka meh、使用方法ma加kah簡單，而且同義詞、反義詞、使用時機、相近詞比較ma做一擺講講出來，保證教ga你會曉為止。上重要ｅ是，m免開一sen五銀哦！

最後，我veh gah逐家學生囝仔分享ｅ是，阿母大字典第一篇所寫ｅ：「冊是為你家己讀ｅ；別人無法度為你讀，你ma無法度為別人讀。Veh ho家己以後輕可過，a是像做工人賺艱苦錢，攏zai你，因為生活是你le過ｅ，m是別人。」人講“少年未曉想，食老dor m成樣”，希望di外地讀冊ｅ囝仔，逐家攏真qau想，mai ho di家鄉ｅ老母煩惱，我想這dor是上好ｅ母親節禮物。



林慧婷96.5.7@新竹