daiqi007

感念母恩 王昭堂（陳緣代筆）

阿母出生在朴仔腳大槺里，自細家貧閣失去父母，小小年紀就愛負起照顧六、七個gorh kah細漢ｅ小弟小妹，因此養成勤儉骨力ｅ個性。

嫁ho阿爸以後，為著改善生活，翁仔某總是比過去gorh kah拍拚，因為一切攏愛靠家己，加上囡仔一個一個出世，開銷變大，無讀冊ｅ阿母只有以gorh kah濟ｅ時間做kangkue，m管是早期due阿爸做豆油、醬菜，抑是後來ｅ豆奶gah包仔、饅頭，攏是遐認真拍拚，因為阿母比什麼人攏gorh kah知影勤儉骨力是唯一edang改善生活ｅ方法。

家己大漢了後，每擺聽人講起阿爸、阿母「勤儉」、「干那知影一直做kangkue，攏m甘開錢享受」，竟然會感覺歹勢無面子…。Ma vedang思考「如果若無阿爸、阿母ｅ勤儉，那有能力裁培四個序細」？一直到ga家己結婚、生囝，才體會父母的心情，ma慚愧【cam-kui】家己ｅ無知。

阿母自細就di艱苦ｅ環境成長，結婚了後為著一家大細，gorh due阿爸辛苦拍拚，無時間好好gah囝兒序細相處、更加無時間注意家己ｅ身體，所以di七、八年前身體開始lam，四界看醫生、食藥仔攏無效，後來連續接受龍骨開刀、心臟開刀、目睭開刀…，ui林口ｅ長庚病院到朴子長庚病院，最後五、六年，攏di朴子長庚病院來來去去。多謝二個小弟陪在阿母ｅ身邊，尤其胞弟阿雄，付出ｅ精神gah體力是無法度用簡單ｅ言語形容，相信ma是阿母上大ｅ安慰。

人講「樹欲靜而風不止，子欲養而親不在」，雖然五、六年來，ma是新竹朴子來來去去，但是自細gah阿母互動真少，每擺轉來，總是坐di伊ｅ身邊，用學來無外成熟ｅ技術ga阿母按摩，用無外契合ｅ話語問安，看著阿母愈來愈退化ｅ身體，雖然m甘，卻是無法度以適當ｅ言語表達，這是我對阿母上大ｅ遺憾。

寫di阿母將veh離開人間ｅ時