daiqi007

科技台文…利用砷 取代磷 來組成 生物分子e細菌 曾文宣
科學家di加州ｅMono Lake 發現一款細菌， 竟然ga DNA、 蛋白質 ham脂肪中ｅ磷 用原本對生物有毒ｅ砷 來取代。 這改變人類 對生物化學ｅ了解，將會改寫 所有 生物學冊本， 是一款 mvat發見未知ｅ 生命形態。 Zit個代誌表示講 這可能閣有 咱m知ｅ生命型態 存在di地球， 甚至 外星當中。
科學家 原本掠準 所有生物體 攏需要 磷zit個元素， 加上 氫、 氧、 碳、氣ham硫， 攏是 生命siong基本ｅ元素。 雖然 有科幻作家 認為di週期表上仝族ｅ元素 可能di生命體中 互相取代， 比如 用矽來取代碳 等等， 但科學家 幾百冬來 攏無發現 用其他元素取代he六個元素ｅ 生命體存在。
磷酸根PO43- di生物細胞中 有足重要ｅ角色 ：yin維持DNA以及RNAｅ結構、 組成 磷脂 來成為 細胞膜， 而且 dui ATP形式 傳送能量。 砷di週期表中di磷ｅ下腳， 所以 兩款元素 edang進行相像ｅ 化學反應。 例如 砷酸根AsO43- ham磷酸根 有相像ｅ結構。 Ma因為 砷gah磷 相像ｅ化學性質， 造成砷edang di細胞 來取代磷內 有足guan e毒性。
M gorh美國航太總署（NASA）天體生物學研究所 ham 美國地質調查所ｅ Felisa Wolfe-Simon zit群人， 發現一款 鹽單胞菌科（Halomonadaceae）細菌，suah edang用砷來取代磷。 美國加州大學聖塔巴巴拉分校ｅ 地質化學家David Valentine講，zit個發現表示diorh磷zit個元素將ui生命必要元素中 刪除。
Wolfe-Simon認為就算 砷有足guan e毒性， 伊ma是edang執行磷di細胞中ｅ工作。 所以 伊gau加州東部ｅMono湖 去尋找 是m是ganna 可耐受砷，而且閣使用砷ｅ生物。 Wolfe-Simon ui湖中 收集泥土， 閣ga樣本 放入缺磷suah有大量砷ｅ培養基 中。 然後yin進行系列稀釋 來洗去 殘留ｅ磷， 結果yin發現有一款微生物 di含砷ｅ環境中 生長速度 閣卡緊。 Yin ga hit個細菌 分離出來了後， 發現 伊di砷溶液中ｅ生長速率 是 di磷溶液中ｅ六成。 當缺磷ham砷時， zit個細菌diorh vedang生存。
Wolfe-Simon表示， yinｅ證據 在在顯示 砷di鹽單胞菌中 取代了磷， ma表示， 若是講 普通ｅ鹽單胞菌 攏edang用砷來取代磷， 按呢其他細菌ma edang。 He將是 一個攏無看過ｅ世界。
NASA天體生物學計畫ｅ主持人 Mary Voytek表示， zit個發現 非常有說服力。 伊認為zia ｅ證據加起來， 就painn有其他e解釋。 M gorh美國佛羅里達國際大學ｅ生化學家Barry Rosen講， 若是 真實愛有說服力， yin閣必須愛證實DNA ｅ骨架 ka su是砷建構ｅ。 閣有， 砷取代磷對細胞ｅ意義 猶m知。 咱閣需要知影細胞中 dor幾個分子有砷， dor幾個分子 真正有zit個功能。 比如， 當砷取代liau ATP中ｅ磷， 能量傳遞ｅ效率 gam有仝款？ 蛋白質ho磷酸化ｅ改變功能， 按呢ho砷酸化neh？ 美國佛羅里達應用分子演化基金會e Steven Benner表示， 砷酸di水中形成ｅ鍵結 比 磷酸 kah弱， 會di幾分鐘diorh分離， 所以講 有可能 存在 其他分子 穩定yin ｅ鍵結。 Yin閣解釋zia ｅ問題。 若是進一步化學分析 發現砷 真正取代了磷， 按呢 咱對生物系統ｅ分子ｅ了解diorh愛改寫lo !

台語文 浮世繪
台文gah 科普想像
黃鴻偉

1. A. 生活中 為何需要思考方法？
b. 請舉 二個思考方法 並略述其精義。

生活中一定會du著 家己無法度解決e問題， 這時陣diroh愛思考解決e方法， 但是， 問題百百種， gan na靠一種思考方法 是無才調應付， 所以， 咱愛學卡濟e思考法， 用vor仝e角度 去面對問題， 最後一定會cue出 一個 完滿e解決方法。
Laconia[拉哥尼亞]思考法是leh講用簡單e字來表現， diorh e dang造成真大e回應， 親像選舉用e口號， 歐巴馬講〝yes ,we can.〞這句話ho美國人e精神團結起來。
Domino[多明諾]思考法是leh講， 若是有一連串e反應， 小小e物件diorh會造成真大e影響， 所以， 咱ve dang忽略微小e物件， 親像大學生leh讀冊， 雖然一工讀落來真少， 但是， 四年了後， 累積起來e知識 是真濟ham真深。

2. （a）為何需要 以 漢羅並用書寫方式 表達台文？

假使全部 用漢字 去表現台文， 會du著一gua問題， 親像台語ui e音是漢字無法度表達e， 閣有， 讀e人 讀起來會感覺ve順， 所以咱愛用漢羅並用來書寫， an ne問題diorh會解決， 而且， 讀起來ma會感覺親切。

（b）為何 台語 需要聽力測驗？
台語會hiau講， 但是聽ma gai重要， 你若ve hiau聽， 你diorh聽vor別人leh講啥， 你diorh無法度回答別人e問題， 無法度ham人 用台語開講， 而且， 咱阿公阿媽hit輩份e， 攏ma用台語leh講話， 所以，為著友孝阿公阿媽， ma是為著 保存台語文化， 咱愛也hiau聽 ma愛也hiau講，聽有m zia有法度教別人。 Sin suah講一leh， 台語聽力測驗e時陣 e dang聽看mai正確e音安怎唸， m tang家己唸m對閣繼續m對落去。

3. 為何需要 台譯 世界經典？ 你對台譯心得如何？
讀中文冊是學中文siong好e方法； 讀英文冊是學英文siong好e方法。 工款e道理， 若是veh學台語， diorh愛讀台語冊。 世界e人siong愛讀e冊diorh是各國e經典， 所以 一本經典 可能包含 真濟翻譯本， 照安ne看起來， ve sai無台灣e母語：台語。 為著保存文化ham學台語， 咱需要台譯經典來幫助。
Qua leh翻譯經典e時陣， 是感覺真快樂e， 因為想著 這是為著veh保存台語文化， qua diorh想veh ga完成， 自小漢qua di厝diorh全部用台語ham厝內e人講話， qua感覺台語e dang ho厝內人e意識更加團結， 而且講起來真親切。 雖然翻譯e過程 ma是有du著問題， 親像這leh字ve hiau翻， m gorh qua盡量去翻出來， 最後ma是完成a， ho老師改出來了後 閣有發現家己m對e， 家己diorh會記起來， 提醒家己以後ve dang閣錯di仝款e字a！

4. Di《科學怪人》中 請以 下列四個問題論述：

（a）經典文學e觀點：
Di經典文學方面， zit本冊充滿著 恐怖， 血腥e畫面， 所以並vor贊成qin-a去讀。 M gorh， zit本小說寫了ve vai， 劇情e安排、 故事e發展、料想ve到e結局， 引領quan進入這本冊e情境， diorh親像 咱家己是主角， 一切攏發生di咱e面頭前， 隨著故事來冒險， ho咱讀起來真驚hiann，m gorh真趣味， 所以伊確定是一本ve vai e經典喔！

（b）兩性地位e觀點：
科學怪人內面 所使用e觀點 大部分是男性e觀點， 其實，ui古早到現代， 科學e領域差不多攏是查甫leh掌管e， 真少有查某， 所以講到科學領域自然diorh會想到查甫， 造成有關科幻e小說 差不多攏是 用男性e觀點來寫， 未來 是m是 會用查某e觀點來寫 值得期待。

（c）法律制度e觀點：
科學怪人是複製出來e生物， 所以di法律上 到底是m是 算一個獨立e個體， 這ho qua想著複製人e問題， 複製人hong製造出來 其中一個目的是veh用伊e器官， 但是， 用伊e器官 diorh表示 愛伊e生命， di法律上， 安ne gak有算犯殺人罪， 這e法律問題 值得思考。

（d）科學倫理e觀點：
仝款是複製人e問題， 今na日 若是有複製人， 伊e面貌ham hong複製e人一模一樣， 安ne yin厝內e人 是veh安怎稱呼 hit個複製人， 閣有，法律規定近親ve dang結婚， m過， 複製人ham yin a vor血緣關係a， 所以是e dang結婚？ 但是 結婚了後e 種種倫理問題是 veh安怎面對， 這e倫理問題 值得思考。

5. （a）《科學怪人》gah《隱形人》有何異同？
仝：1.攏是科幻小說。
2.內面e主角 攏為著追求 科學e突破 所以 發明出 創新e物件。
3.故事e結局 攏是用悲劇結束e。
4.攏是 用男性觀點去寫。

Vor工：1.科學怪人有好e一面， 親像科學怪人想veh一個家庭e愛； 隱 形人gan na攏是壞e想法nai nia。
2.科學怪人e科學家 為著追科學怪人， 表現出 辛苦e一面； 隱形人e主角 為著做歹代誌 去cong di人，表現輕鬆e一面。
3.科學怪人e結局是兩敗俱傷； 隱形人e結局是主角ho村民pah死。
4.科學怪人e科學家 想veh ham上帝仝款造人； 隱形人e主角是想 veh報仇。

（b）對當前 塑化劑 DEHP等 毒化國民 遺害健康 你有什麼見解？
塑化劑di保鮮膜內底存在真厚， 咱用完保鮮膜diorh dan掉， 伊會hong送去燒掉， 燒e過程 若出差錯， 伊diorh會釋放 真毒e物件 入空氣中， hit leh物件叫做：戴奧辛。 人若接觸著， 會產生文明病， 親像心臟病、 糖尿病等等， iau閣有， 塑化劑 會造成 內分泌失調， 然後造成不孕、 流產、 精子不足等等， 所以 塑化劑 對人e身體 來講， 是 一種接觸濟了後 會傷害身體e物件。 最近， 聽新聞leh講， lu來lu濟e飲料hong發現有塑化劑， 所以為著咱家己e健康， 應該要減lim飲料ziah對， 其實， lim水本來diorh真健康a， 而且， 水閣比飲料e dang止嘴焦leh。

台語文浮世繪
台文gah科普想像
洪英展

1. 生活中 為何需要思考方法？
請舉 二個思考方法 並略述其精意。

(a) 生活中diann diann會du著足濟e問題。 有時陣 因為想法e無仝 diorh edang 有 無仝e看法 gah 解決問題e方法， 所以有 愈濟無仝e思考法， diorh edang 提供咱 愈濟 看問題 gah 看代誌e 方法。

(b) 第一個 是 簡單思考法， diorh是想解決問e方法e時陣， mai想gah太複雜 太困難， 上好是 用腳頭u diorh edang 想出來， 因為 咱學e知識 愈來愈濟， 所以 咱diann diann會ga問題 想gah太複雜， ve記leh簡單思考法ｅ重要。
第二個是Napoleon思考法， diorh是 面對 困難gah挑戰e時陣 ai勇敢去做、 勇敢去試， mai拖sua， ai有hit leh 魄力 去面對， kah有可能解決問題。

2. a. 為何需要 以 漢羅並用書寫方式 表達台文？
b. 為何 台語需要聽力測驗？

(a) 因為 漢字 是 zit ma大家ka熟e文字， 羅馬拼音 是 全世界通用e 拼音方式， 所以 用 漢羅並用書寫方式 來表達台文 edang ho大家 卡快了解gah使用， 處理 外來語、 新生詞、台語特別詞 ma特別好用。

(b) 聽gah講 是 gah別人溝通 上重要e 兩個工具， 所以zit兩個能力 攏真重要。 di台語當中， 有足濟e聲調 來表達感情， 所以聽e能力gorh卡重要。

3. 為何需要 台譯 世界經典？ 你對台譯心得如何？

(a) 台語zit ma 常用diorh e所在 攏是生活中e溝通， di文學、 科技e方面卡少， 所以 用台語來翻譯 世界經典文學 zit方面edang豐富台語e 使用範圍， ho台語e使用gah保留 有gorh卡大e空間， 另外ma edang ho gorh卡濟 使用台語e lang edang讀世界經典文學， 豐富心境gah視野。

(b) 翻譯真困難， ai對兩種語言 攏有一定e了解卡有法度 做ho好， 雖然足
困難， a m gorh edang學著真濟， 對台文ma u gorh 卡濟e了解。


4. Di 《科學怪人》中 請以 下列四個問題論述：
(a) 經典文學ｅ觀點；
(b) 兩性地位ｅ觀點；
(c) 法律制度ｅ觀點；
(d) 科學倫理ｅ觀點；

(a) 科學怪人 是 第一本科幻小說， 而且 伊對情節e描述 真詳細gah細膩， 恐怖 e所在 diann diann ho讀者 感覺 身歷其境， vok怪是世界e經典文學。

(b) 科學怪人中e怪物 真想veh gah lang逗陣， a m gorh伊diann diann ho lang 欺負gah拒絕， 所以想veh有 另外一個女怪物 edang gah伊共同組織 一個 家 庭， ho伊有依靠。

(c) 法律制度來講 diorh有真濟e問題， 到底zit個 怪物 是m是lang？ 伊gann有 一般人 所有e權力？ 伊e父母是誰？ 伊所犯e罪 veh用什麼款e法律條例管理……等等， 有真濟e問題edang ho阮去思考。

(d) 科學倫理來講， 科學家 gam edang創造 ia是 毀掉一個生命？ a gorh有創造一個生命 是m是會害著 zit個世界？ 有真濟問題ai思考。

5. (a)《科學怪人》gah 《隱形人》有何異同？
(b) 對當前 塑化劑 DEHP等 毒化國民 遺害健康 你有什麼見解？

(a) 這兩本 攏是 科幻小說， 科學怪人 是講伊創造出來e 怪物ve受著伊e控制， 害著伊家己e親人， 隱形人是 講隱形 m好e所在， 親像講伊ve dang偷 拿錢， 因為 伊偷拿e時陣， 別人看著e狀況 是 錢di天頂飛， 自然diorh 會hong發現， 真趣味e 一本書。

(b) zit 個狀況diann diann發生， 可能是 因為 以前 大家e生活vor好， 所以ga趁錢 當zue是 第一要務， 但是suah ve記leh趁錢 愛有良心， 因此我gam覺zit ben e事件 是 真好e教訓， 希望咱以後e教育 愛教qin-a卡有倫理gah良心。

台語文浮世繪

台文與科普想像 張書桓

1. 一、生活中 為何需要思考方法？ (10%)
請舉 二個思考方法 並略述其精意。

(1) 咱每一工生活， 不管是大人、qin-a， 各行各業ｅ人 攏要面對yin生活中ｅ困難gah問題， 這時咱就需要動腦想方法來克服， 咱若知影閣edang用靈活ｅ用各種思考法來思考， 解決問題就會ka輕鬆。

(2)
拿破崙思考法：拿破崙是一個英勇ｅ法國將軍， 一生征戰無數。 伊上出名ｅ就是伊不管何時攏真有信心， 相信家己ｅ能力。 「di我ｅ字典內底， 無"不可能"zit個字」 伊安呢講過。 拿破崙思考法 就是要咱 時時對家己有信心、mtang輕易放棄， 培養一個 親像 拿破崙zit款堅強ｅ心。

Rockfeller思維： Rockfeller是以前上出名 ma是上成功ｅ大企業家。 di hit當時， 雖然伊用了 真濟不法ｅ手段 來拓展伊ｅ石油企業， 壟斷全國市場，mgorh伊做了 真濟企業家mvat做ｅ代誌。 伊收買 伊已經打敗ｅ對手， 擴大家己ｅ事業， 伊ma出真濟錢 做慈善。 Rockfellerｅ例ga咱講， 咱要試看mai「跳出家己ｅ圓」 mtang ho已有ｅ環境限制， 要用創新ｅ想法 來勇敢冒險。



二、a. 為何需要 以 漢羅並用書寫方式 表達台文？ (5%)
b. 為何 台語需要聽力測驗？(5%)

(a) di台灣， 台語e-sai講是華語以外 第二大ｅ語言， 大部分ｅ台灣人 就算mvat講， ma小可聽有台語， 但是 台語gorh deh成長當中， 若要保存落來就gan-na一部份愛用口述。 所以 咱若用 漢羅拼音 來寫， 同時e-sai借用音義相近ｅ華語詞， gorh加上羅馬拼音輔助， 就e-sai完成 台語書寫ｅ目標。

(b) 台語是咱ｅ母語之一， di歷史gah文化上有真大ｅ重要性。 日語、 英語等 語言 攏有專門ｅ測驗 來確定 語言能力。 台語ma是仝款ｅ， 而且台語人口 應該 比英語、 日語ka普及， 因此 台語聽力測驗 有伊ｅ必要性， ho咱知影 咱 是m是 真正了解母語。


三、為何需要 台譯 世界經典？ 你對台譯心得如何？

(1) 今a日講台語ｅ口雖然ve少， 生活中台語咱ma常常使用台語， mgorh di文本創作方面猶原是華語佔大部分。 台語na要永久留傳落來， 文字gah冊是ve-sai少。 na翻譯有名ｅ世界經典， 不但e-sai ga台語寫成冊， ziaｅ世界經典真濟人攏知影， ma edang提升 " 讀台語ｅ興趣 "， 對推廣台語 有足大ｅ幫助。

(2) 我di翻譯ｅ時 上大ｅ收穫 就是di翻譯ｅ過程中， e-sai不斷刺激台語ｅ表達方式。 一般ｅ敘述 可能ve-sai直接翻作台語， 要用另外ｅ台語詞才e-sai完成ka自然ｅ台語表達。 我想 這就是各語言 有yin 特別ｅ 韻味gah感覺， 需要咱 來 慢慢體會。


四、Di 《科學怪人》中 請以 下列四個問題論述：
(a) 經典文學ｅ觀點；
(b) 兩性地位ｅ觀點；
(c) 法律制度ｅ觀點；
(d) 科學倫理ｅ觀點；

(a) 經典文學 攏有一個共通點， 就是咱讀了以後， 咱會有一寡想法、 心得，甚至ziaｅ經典文學 會ho世人 真大ｅ啟示。 科學怪人 zit個 充滿想像力ｅ故事， di兩百冬前 就預估了 科學創造生命ｅ可能 gah 社會衝突， di科技發達ｅ今a日來看， 猶原ho人深省。

(b) di hit當時ｅ時代背景來講， 差不多大部分ｅ科學家 攏是查甫， 小說中創造出來ｅ ma是 查甫ｅ科學怪人。 我看冊中ｅ查某人， 真濟 是 個性ka柔弱、受壓抑ｅ， 並無gai大ｅ 影響力。 我想Marry Shelly可能想veh透用寫一種 「男性科學」來表現 當時無平等ｅ 男女地位。

(c) 法律 保障人類ｅ 權益義務 gah 自由平等， 但是對人以外ｅ生物呢？ 科學怪人所創造cuai ｅ怪人物 ma是 活著ｅ一個生命， 卻ho人討厭、 排斥。這ho我想著 gam講 咱ｅ法律 是 為了人類好 就好a？ 誰來 替其他生物 發聲？

(d) 今a日 科學進步， 高科技 不斷發展， di幾年前 已經有科學家 創造出複製羊。 na是有一工 複製人誕生， 咱veh安怎 來面對 呢？ 科學e-sai創造生命， 但是m知影後果。 科學怪人 zit本冊 其實已經預見了 今a日ｅ複製人爭議。


五、(a)《科學怪人》gah 《隱形人》有何異同？
(b) 對當前 塑化劑 DEHP等 毒化國民 遺害健康 你有什麼見解？

(a) zit兩本 攏是 hit當時開創性ｅ 科幻小說， 寫出 科學發展 引起ｅ社會影響。 雖然現在ｅ科技 無一定會 變作hit款， 但是 由 科學怪人 gah 隱形人 兩位人物ｅ一生， 仝款警示著 世世代代ｅ人。

(b) 我想 這不但是 違法gorh傷害人ｅ代誌， ma是 道德倫理ｅ問題。 為著趁錢方便， ga ve-dang食ｅ化學產品teh來做食物， 是非常嚴重ｅ代誌， gam講ziaｅ人攏 無想著 家己ｅqin-a有一工可能會食著？ 我認為 人做什麼代誌 無一定 愛搶第一、 趁大錢， 但是 需要 將心比心， m通傷害別人 來ho家己成功。

台語文 浮世繪

台文gah 科普想像

曾文宣

1. 生活中 為何需要思考方法？
請舉 兩個思考方法 並略述其精意。

A. di咱e生活中， 常常du著 難關gah問題， vor具備多元e思考方法話者，是vedang解決任何問題e。 若是死板板e 來看待 一件代誌， vor經過思考，按呢代誌絕對vor可能隨心解決， 幸運解決ma是ganna治標vor治本。 所以講 愛有多元e思考方法， 而且愛定定動腦筋， zit個方法vor適合diorh換另一款方法， 按呢du著問題diorh edang輕鬆解決lo。
B. 二個思考方法
a. Laconia思考法：”Laconia”e 意思是 簡潔ve模糊， zit個典故 是 發生di西元四世紀veh攻打 Laconia城邦”斯巴達”e 王腓力二世身上， 伊 收diorh回批， 頂guan只有一個字”If”， 結果腓力二世diorh放棄e攻打斯巴達e念頭。 簡單e物件edang有複雜e意義gah眾多e路用 正是Laconia思考法e精髓。 親像zit ma計算機電腦攏是用”1”gah”0”來演算出zia擠複雜e問題， ma親像數學中e公式， 化學中e元素結構， lu是簡單e物件diorh lu edang代表真濟e代誌，實在是真趣味~。
b. Domino思考法：domino是咱玩過e”骨牌”e意思。 若是後一塊骨牌大50%， ganna13塊， 愛ho第13塊倒下e力量 是 ho第一塊骨牌倒下e力e 20億倍左右。 所以講 咱vedang看微小e物件 diorh忽略它， 只要經過一連串e加成 ma是具有 很大e影響。 Domino思考法diorh是zit個意思， ma edang講是”蝴蝶效應”。

2. a.為何需要以漢羅並用書寫方式 表達台文？

漢羅文 是 真方便gah快速e 表達台文e方式， 大部分e人 攏了解羅馬拼音， 漢羅文針對zit點， ho ka vor好表達e字 用羅馬拼音 表示， 唸起來真通順， 寫起來ma是真方便。 上重要e是 zit款方式 ho真擠mvat台語e人ma edang唸， 所以講 正是一個 推廣咱台語上好e 方式。

b.為何 台語需要聽力測驗？

一個語言 是 溝通e媒介， 愛有人講ma一定愛有人le聽。 聽力測驗ho咱了解家己edang了解外深e台語意思， 藉著聽力測驗 ho大家加強家己e台語能力， 聽有才edang回應他人， 按呢咱e感情語言－台語diorh edang ho咱更親近、 更有人情味。

3. 為何需要 台譯 世界經典？ 你對台譯心得如何？

a. 世界經典是ui細漢時陣gau zit ma人人攏知e故事， qin-a人 足甲意zit款e故事， yin伴隨咱長大。 若是lu濟經典 台譯出來， diorh有gorh lu濟e qin-a人 讀著冊， ho yin愛上台語， 進一步 發展台語 di年齡層有降低e情形， ho大家 攏用感情語言 來分享故事， 培養在地e鄉土民情。

b. 一開始看了文篇 感覺真濟， 而且gorh有足濟e意思 無gai了解 ma m知veh安怎台譯。 Mgorh 逐工看diorh kah有了解其中e意義， gorh找看mai網路上 老師提供e資訊， 運用軟體來對照。 漸漸台譯diorh lu來lu順， edang ga世界經典台譯 正是一件上光榮e代誌。 多謝老師ho咱機會 來疼惜咱e母語， ga伊”Invisible man”台語版 推陳出新。


4. di《科學怪人》中 請以 下列四個問題論述：
a. 經典文學e觀點： 比照科學怪人gah真濟寓言故事， edang發現伊e題材真先進， 利用前端技術 復活死人， 無想diorh性地暴躁， gorh踢倒一鍋仔糜， 在在處處 警告咱 凡事mtang家己想家己對、 人會比過天， 人類mai siunn自傲了! 智慧下生身e咱 ma a因為 智慧死亡， 除非 咱尊重大自然， 利用咱e技術 保護唯一e地球， 和平共存 才是kah完善e方法。

b. 兩性地位e觀點：以前e社會 以男權為第一， di科學怪人中 ma時常發現相仝e問題。 因為 生理上e差異 diorh打倒任一性別 是 非常無客觀 ma無道理e。 兩性e地位 應該是 平等e， 生活中、 職場內， ziok濟e性別刻板印象 ma應該踢除。 傳統”查甫di外、 查某di內”e 想法 di zit ma社會 雖然kah無按呢認為， mgorh ui新聞當中 仝款edang發現 足濟需要來 改進e所在。 看了”科學怪人”查甫guan、 查某e e 狀況了後， 更應該反省 zit ma咱gam gorh有可能 達gau ”男女平權”e議題。


c. 法律制度e觀點：科學gah法律 是 雙面e代誌 應該愛嚴厲控管， 一旦 法律制度 無完善， 科學犯罪diorh 會發生 便無ziah簡單結束， 科學怪人diorh是一個例， gorh kah嚴重ｅ是 會危害全人類e 核武戰爭、 生化武器、 高科技Laser射線…等 lu是需要有 完善考量、 限制嚴厲e法律 來避免。 Veh安怎維持 中間e平衡 便是 執政者 應該詳細考量e所在。

d. 科學倫理e觀點：人工培育出e科學怪人 無一個好e成長環境， 伊ganna是科學家手頂guan leh sng e物件， 完全無半點人權， 無人edang保護yin。 生命是足可貴e， 科學 一旦跨過liau底線， 複製人、 代理孕母， 科學怪人 等 攏會發生 嚴重ｅ社會問題， 而且 yin e生命 是 交ho誰人來保障？ 一個傑出e科學家 愛有良好e 科學倫理ziah edang真正利用智慧來造福人類。

5. a. 《科學怪人》gah《隱形人》有何異同？

異：科學怪人 是 科技誕生新生命；隱形人 是 ui科學家家己實驗家己

同： 兩者攏是 1.高科技產物 2.奇怪社會問題



b. 對當前 塑化劑 DEHP等 毒化國民 遺害健康 你有什麼見解？

科技自來ui人性產生， 禍害ma是劣品人性所造成e。 對hia不肖廠商應gorh好好ga教育，希望 國內教育 應該lu gorh加強zit部份， mai ganna是注重學理當中， 基本e做人處世e道理 ma應該好好灌輸。

台語文浮世繪
許庭瑋



1. 生活中為何需要思考方法?
請舉兩個思考方法並略述其精意。

因為有時陣， 咱會無法度 用咱ｅ方式解決問題。 Na是一直用家己ｅ方法， 一定會有咱無法度想出 解決方法ｅ代誌發生。 Zzit個時陣， 咱diorh edang參考別人 是按怎 思考gah解決問題。 知影別人是按怎思考， 若是du著仝款ｅ問題， diorh知影如何思考。 用無仝款ｅ方法思考， ui無仝款ｅ角度 看問題。

囚犯思考法：
Na是家己無能力完成一ｅ代誌， diorh veh借別人ｅ能力 幫助咱完成zit個代誌。 有能力ｅ時陣， ma edang交hong比咱卡qauｅ人作， 代誌diorh ho完成a閣卡水。

Alexander思考法：
舊ｅ放ho去， mai ho 舊有ｅ思考方法限制diau。 跳脫一般人 定定陷入ｅ思考陷阱，用無仝閣無受限制ｅ思考， cue 著解決方式。


2. a. 為何需要 以 漢羅並用書寫方式 表達台文?
b. 為何需要 台語聽力測驗?

a.
na是完全攏是拼音， 看起來會花花ｅ，攏是外國字。 leh讀ｅ時陣，diorh需要卡濟時間來了解意思。 iau m gorh， 完全攏是漢字ｅ時陣， 有一寡台語ｅ話 無法度正確ｅ用漢字表示。 所以取二家好處， 漢羅並用。

b.
聽力測驗幫助 我知影我對別人講ｅ話edang了解到siann mih程度。 知影有siann mih需要加強ｅ， ziann ve聽無 別人講ｅ台語。

3. 為何需要 台譯世界經典? 你對台譯心得如何?
台譯世界經典edang ho慣習用台語思考ｅ人gah看無中文gah外文ｅ人 讀經典文學ｅ機會。 ho yin快速了解 冊ｅ內容。 另外一方面， 對推廣台文書寫ma有功勞。 ho veh學習台文ｅ人練習ｅ機會。

我感覺台譯是一件真辛苦ｅ代誌， gah寫冊仝款， veh一直修改到ho人看起來 真通順，文字ma vedang失去原味。 但是zit種代誌diorh ganna 翻譯家仝款， 想來ma真厲害。


4. Di 《科學怪人》中 請以 下列四個問題論述：
(a)經典文學ｅ觀點
(b)兩性地位ｅ觀點
(c)法律制度ｅ觀點
(d)科學倫理ｅ觀點

(a)
科學怪人di文學上， 作者對景色ｅ描寫gah氣氛ｅ營造攏真gau。 伊運用真濟文字去描寫週圍ｅ風景。 Zit個小說 di科幻小說ｅ領域 是先驅者， 作者ｅ題材新en， 為後世建立典範。

(b)
Elizabeth gah Justine 攏ho Victor inn兜收養， Elizabethｅ角色親像童養媳。 代表zit時陣ｅ女性地位vor男性高。J ustine更是去Victor yin兜 做女傭， ma是卡無地位。

(c)
雖然Justine有真大ｅ嫌疑， 但是無伊行凶ｅ證據。 最後Justine ia是ho判死刑， 這說明當時陣ｅ法庭真主觀， 只要逐家攏認為有罪 diorh是有罪。 對細節vor深入調查， edang解決diorh卡緊解決。

(d)
Victor只是veh滿足伊創造ｅ快感， 盡心盡力工作， 完成了後 卻無負淡薄a責任。 放怪人自生自滅 一點點仔ｅ品德 攏無。 這就親像一寡科學家， 享受發明ｅ快感， 卻vor想著後果仝款。




5. (a)《科學怪人》gah《隱形人》有何異同?
(b)對當前塑化劑DEHP等 毒化國民 遺害健康 你有什麼見解?

(a)
異：
科學怪人 m是 伊家己想veh生出來，伊只是無奈ｅhong創造出來， m是家己願意ｅ。
隱形人 卻是 伊家己努力研究， cue著方法 ho別人vedang看著伊。 伊是家己甘願ｅ。
同：
Yin攏是 世界上 獨一無二ｅ生物。 過著gah正常人vor仝款ｅ生活。 攏想cue著ho家己滿足ｅ生活方式， 但是攏失敗a。

(b)
黑心ｅ生理人 為著 veh 趁錢 veh ho口感更加好， 卻ga對人有害ｅ成分加落去。 Zit款行為實在是令人生氣， 傷害消費者ｅ健康 閣趁咱ｅ錢， 這實在是無道德。 商人雖然veh趁錢， ma是要用 卡正當ｅ方式 才對。

我ｅ 阿公
張乃懿


是第一gai抱你吧? de有記憶以來
逐暗 當拖著 sen-dau-dau-ｅ身軀轉來到厝， 總想veh ga你看看leh 看你 消瘦落肉
你gam會記得 hit片海 嗎? 用了 一世人gah海洋 搏鬥
de 你破病ｅ 上尾後一刻 閣是 gah海洋抗爭著
你閣會記得 hit台船ｅ形貌 嗎?
請 講ho我聽， 因為 我已淡忘了
無法陪伴你， 深深抱憾
看著有人 按呢欺負你， 我卻無能力
ho我撐過zit禮拜
我會保護你
以早 是你 保護我， zitma換我 保護你
拜託， 求天公伯a 留一寡時間 ho你gah我
我想veh cua你去看 hit片海， 只是 足艱難
我想veh cua你 去看 hit台船， 只是 已無留
我想veh cua你 去找 hit台 慢sor ｅ o-do-vai， 只是 已無留
拜託， 留寡時間 ho你gah我
m是報恩 m是同情
因為你 是我 永遠切ve斷ｅ 愛gah血緣

Ho伊發生！
張春凰

有可能ｅ火種 點著 看無ｅ無可能
Ho伊發生！

有可能ｅ想像 瓦解 無可能ｅ前提
Ho伊發生！

無可能 是 弱者被動ｅ萎縮
有可能 是 強者自重ｅ勝出

勵志 雖然可貴
理想 誠然高超
美夢 ho伊發生！

奇美ｅ創造力 行動力
Ho伊發生！

Ho任何ｅ可能 超趕 任何ｅ無可能
Ho伊發生！

Ho伊發生！！

(2011.0427 回應 雪花姊 make it happen ｅ 魄力！)

春～～
送ho永進gah春凰ｅ一首詩 顏雪花

手持蒲公英向著太陽
兩個半球
每個半球上黃色的滾邊
撒謊的眼
笑稱近者大 遠者小
春天美麗的騙術

紫色的小花
誘惑蝶的眼神
醡漿草
吹著口哨
跑出柵欄外
狂舞初春的面容

塵埃裡的足印
在車頂
畫出一條拉鍊的晨光
貓輕移腳步
探看淡藍的早春
土穴鳴唱的蚯蚓
是風的顏色



春
手提蒲公英向著太陽
兩粒半球
每一粒半球頂黃色的滾邊
講白賊的目睭
笑笑ah講 近的ka大 遠的ka小
春天美麗的騙術

紫色的小花
誘惑尾蝶的眼神
醡漿草
歕 kho si ah
走出去圍閘外
狂舞初春的面容

塵埃中的跤印
佇車頂
畫出一條jagu的晨光
貓仔輕輕徙動伊的跤步
探看薄藍的早春
土孔內鳴唱的土蚓
是風的色彩



The Spring

Gripped the dandelion toward the sun
The two hemispheres
Embroidery the yellow on each
Lying the eyes
Laughing over the near the bigger, the far the smaller
A beautiful trick in spring

Purple the blooms
Allured the eyes of butterfly
The sorrel
Whistled
Ran outside the fence
Danced with the countenance of early spring

The foot prints in dust
On the roof of the car
Drawing a zipper of morning light
Cat moved gently its steps
Explored the light blue in early spring
Sang the earthworm in the soil
A color of the wind

Ho伊感動著
張春凰
伊若di路中deh行， 剪鈕仔ve去向伊落手。 看伊ｅ穿插 普通普通，上班 騎一台腳踏車， 出門買菜 攏guann一個古losut古ｅ袋仔……， 伊無看頭。
其實， 伊ｅ舊皮包 不時ma貯 幾仔萬箍。 學生、 公益、 弱勢團體 若需要經費， 隨時dor有錢tang捐ho yin。 穿ｅ衫 是無破 mgu平時 hit幾軀(su1)粗粗素素 換來換去， 表面看起來 一點仔ma無 女老師ｅ派頭， 平時攏專心做kangkue無閒tang妝、 ma無愛美。 有啊！ 衫有兩軀上好ｅ， 是特別 去裁縫店 定做ｅ， 一套寒人、 一套熱人 tang好穿去 國內外 開國際學術會議。
冊教了好 是十五年來ｅ 事實， 高深ｅ 伊指導博士生 是 專門學問、 淺易ｅ 伊教大學通識課程 ma是 講gah誠趣味。 兩冬前， 我去聽 伊ｅ統計理論， 有一遍 伊di課堂 順續講小學ｅ時陣， 有一個同學 逐日ｅ下早仔時， 上課攏duh龜， 老師若ga罵 伊dor目屎nihnih流 一句話攏無講。 Zit個先生 發現其中 必有緣故， 自動ga伊問， 才知影qin-a人 逐下早仔 四、五點 天閣霧霧 別人dor猶deh睏， 人伊dor起床 款蕃薯菜veh飼豬……， 然後 卡閣褪赤腳 拚去學校上課， 乖學生 實在值得 人感心， 老師一時dor cua全班去yin兜參觀 按怎 剪豬菜、 sa豬食料、 飼豬…。 往事 是 伊ｅ故鄉， 故鄉 是 伊ｅ根。
伊ｅ故鄉 汐止 是 一個小庄腳， di 伊ｅ記憶內 是 伊深戀ｅ故鄉， 伊veh做台灣人。 有一gai， 伊送我 一塊陳明章ｅ錄音帶， 內面 有一條 汐止鎮鎮歌， 伊dor足歡喜唱 頭仔兩句 ho我聽 “汐止本名 是 水返腳 先民開拓 閣入山林”， “水轉腳 意思是 潮水到hia擋diau ｅ 閣返頭 流倒轉去 入大海，我di hia大漢ｅ， ma是 純樸ｅ草地， 我定定想起著 做qin-aｅ時代， hit個平凡 有人情ｅ所在……， 來！ 仝款ｅ歌曲 我買三十塊， 一塊ho 恁”； “三十卷！？”；“無啥， 阿dor我 看伊ｅ某 徛di邊仔 hia， 大腹肚 大身大命。”
不止是 本土ｅ歌曲， 台灣ｅ 野鳥圖鑑、 台灣ｅ 風景日曆、 台灣ｅ郵票、 台灣ｅ…， 伊攏是 按呢支持， 恬恬仔付出、 送出， 因為 我定定ma攏會 有一份。
講著寫文章， 伊講veh寫一篇 愛tuh足久。 本來 對hit種 酸酸ｅ、 談情說愛、 講gah五天外尾 無本土化ｅ散文 真厭sen， 但是 看著 陳烈ｅ散文，伊dor改變 原來ｅ看法， 顛倒 深深受感動， 趕緊買來 ho學生 作獎品。
賞鳥 是 伊ｅ 人生趣味， ui zia， 伊 愛 自然ｅ天機， 伊ｅ論文 dor有估計di台灣公ｅ、 母ｅ濱鷸（bin2 ut7）鳥類總數ｅ 統計方法 發表di學術期刊裡， ho法國學者 讀著， veh邀請伊 去發表 研究成果。 但是 ho台灣人 認識 比ho外國人 知影 對伊來講 閣卡有意義， 所以 是m是 veh去法國 並無非常重要。
學生畢業了後， 若m是 過年過節 寫一張卡片 來請安， dor是 三不五時帶伴手 轉來cue伊。 學生若走， 伊dor ga等路teh來 分ho逐個。 點心 是學生yin hiaｅ土產， yin 有ｅ是 當年 ho伊關愛過、 有ｅ是 ho伊保護過， 新ｅ來、 舊ｅ去， 來來去去， 做老師ｅ 總是vedang記hiah nih-a濟ｅ學生，mgu學生 攏ga老師ｅ 溫情gah愛心 記一世人。 人講 一日為師 終生為父，師生ｅ感情 往往是 人生ｅ 安慰gah鼓勵ｅ 泉源， 是 伊ga少年人ｅ福田 種一粒種籽。 寫到zia， ho我想起 有一遍 伊鼓勵我 閣去讀博士ｅ代誌， 我ga應講 若veh閣進修 當然需要 準備一筆錢， 伊趕緊 當祕書小姐面前 ga我講：“若是ganna錢ｅ問題niania， 我借你dor好。” 然後閣足客氣講：“錢 我有夠借你， 阮趁錢 大部份 攏無買別物， 趁ｅ錢攏有cun落來， 免掛意。” 我leh想， 伊趁ｅ錢 若去買股票、 買幾棟庴……， 若小計畫一下， 投資淡薄仔，zitma伊ma是一個好額人。 伊ｅ心 根本是kng di研究裡， 有一遍 我du好deh看 薪水按算公告， 伊行過 我ｅ面前， 我對嘴問伊 公務員薪水ｅ 加級 按怎算， 伊講mvat去注意過， m知影。 伊ｅ 脾氣、 性情 是 直來直去， 快言快語， 明顯表現出 科學家 追求 真、善、美ｅ 境界ham氣質： 專心做 研究栽培學生， 實際去 做研究， 錢項ｅ代誌 無重要。
伊愛環保， 買菜用 hit個舊相ｅ 環保袋仔， 幾仔冬來， 透早攏起床 煮飯ho qin-a帶便當， 講 按呢一冬edang省 幾仔百個 保利龍、 紙盒仔、 竹箸。印過一面ｅ紙 後壁面 ho學生 做考卷寫答案， 按呢 樹仔edang減剉寡。 無必要ｅ時 mtang開電火、 冷氣， 愛節省能源、 愛點點滴滴做， dor會 積小成多， 若無， 發電廠dor閣跳機l o！
Hit冬學校 veh起 綜合大樓 粗粗魯魯dor veh去剉樹仔， 僥倖噢！ 好佳哉伊一個小女子， 趕緊去ga學校 有關單位講： 伊veh家己出錢搬樹仔， 徙去別位栽。 學校一時 精神起來， 自動ga zit十外欉大榕樹 搬厝， 一冬後 zit群樹林 已經 茂然成影 發gah旺旺旺， 然後 學校dor發函 ho各單位 來感謝gah呵咾 同事移樹ｅ 勞力ham眼光。 有一gai， 我行過hia， 看著學校ｅ 一草一木， 想起伊 di zia讀冊、 教冊， 伊ｅ心 是 gah學校 黏結作伙ｅ。 伊ｅ青春di zia行過、 伊ｅ中年 奉獻di zia……， 心肝內ｅ感動 親像 一陣和風吹過 軟軟ｅ草仔枝， 一陣春雨 滋潤著 青青ｅ樹葉波， 和風gah春雨 是 伊ｅ真情、 是 伊慈愛ｅ 老母心。
伊有一套 自然療法。 做所長ｅ時陣 定定胃疼， 伊ma無愛食藥仔， 一直lim滾水 來沖散胃酸。 Qin-aｅ肉 若發燒， dor ho yin食西瓜汁、 lim汽水。透早去運動埕 走五lin， 去八樓辦公室 無坐電梯， 用腳爬樓梯。 教囝ｅ觀點是due殘障女英雄、女作家 劉俠ｅ媽媽 堅持ｅ信念：“上好ｅ照顧 是免去 照顧伊！”
伊有一個 美滿ｅ家庭， 人生ｅ幸福 伊攏有。 Ho我感動ｅ是 伊edang拍開心內ｅ門窗， 大方閣細膩 來幫助 別人ｅ心腸， 用伊ｅ能力 來分享ho別人、 來關懷別人， 假若是 天庭ｅ仙女 自願下凡來 照顧眾生， 態度 是 ziah nih-a自然、 誠懇。
台灣過去ｅ 白色恐佈 是伊心內 深深ｅ疼。 同行 陳文成博士ｅ過身， 十二冬ｅ 悲傷gah憤怒， di紀念 陳博士研究成就ｅ 演講結論， 是 芋仔根開蕃薯花ｅ伊 用Horlor話講：“Zit件代誌 咱edang原諒， 但是vedang放ve記得去！”； 是啊！ 陳博士 di伊ｅ心田 種一粒種籽， 台灣民主運動行街頭 yin翁仔某 大部份 攏有份。 伊閣是一個 有理想ｅ 實踐者， 若講起 對本土自主性ｅ 覺醒， 阮ho伊感動著！ 伊di阮ｅ心田 種一粒種籽。
伊ma是閣ziah nih-a樸素， 精神gah時間 攏用di工作上。 伊講退休了後，透早veh去掃街路， 像伊按呢 不時不陣 攏把握 一分一秒， 半世人 頂人一世人， 伊激起 阮ｅ腳步…， 咱來ia 咱家己 有意義ｅ種籽。
伊愛伊ｅ家庭， 愛伊ｅ學生， 愛伊 邊仔ｅ親友， 愛伊 mvatｅ台灣人， 愛台灣ｅ 生靈gah 風物， 聲聲句句 攏是 台灣心、 台灣情， di足久ｅ以前 一直到zitma ｅ現在， 一直 堅持閣堅持。 平平攏是 lim台灣水、 食台灣米， 伊攏比一般人 閣卡堅定， 親像 日出日落ziah nih-a平常。 日子一久， 熟sai伊ｅ阮， 心內擋ve diau 來讚歎伊， 自然會喝出 一聲閣一聲 “奇女子！ 奇女子！”
(1994年3月)


後記：2006年 某一個禮拜日 我du著伊 di東院邊仔ｅ 光復路， 用面桶捧水deh 沃路樹， 我問伊是按怎？ 伊講 hit欉樹仔veh焦死a。
2011年3月初6ｅ禮拜日 中晝 di東院 我du著伊 騎腳踏車， gah伊拍招呼， 問伊veh去dor位？ 伊講：guann飯gah pang veh去ho徐道寧老師，因為伊老啊行動無方便。 我看著車籃仔 有數包ｅ物件 應該是 一個老人 edang食真濟工ｅ份， 目睭展足大蕊， 反應緊ｅ伊 隨ga我安慰：“ganna禮拜日 niania！”
Zit幾工來， 我再度ho伊感動著！

(2011.3.8 4:27pm)

科技台文之6
大家來關心 台灣地層下陷ｅ問題

葉弘德
交通大學 環境工程研究所 教授

大家攏知影， 台灣本土 有嚴重ｅ 地層下陷 問題。 記得 舊年三月ｅ時陣， 電視 或者是 報紙， 有報導 遲緩六輕di雲林麥寮 建廠工程， 因為附近ｅ地層，三年內 沉落將近24公分， 王永慶suah li哀哀叫， 講veh停工囉。
Gorh最近ｅ報紙 報導， 台灣ｅ 土地地層 下陷ｅ面積， 將近有1060平方公里， 算起來， 佔咱台灣 總面積35分之一； 因為 台灣土地下陷ｅ所在，攏是di le平地， 假使ganna算 台灣平地ｅ 總面積， 按呢 下陷ｅ面積 dor佔veh10分之一。 台灣 發生 地層下陷kah嚴重ｅ地區， 是 宜蘭、 彰化、 雲林、 嘉義gah屏東ｅ 沿海地區。 事實上， zit款問題， 世界上 也發生 幾落所在， 比如講， 義大利ｅ 威尼斯、 英國ｅ倫敦、 美國ｅ休士頓 gah 洛杉磯。
引起 地層下陷ｅ 原因， edang分 人為gah自然 二種因素。 自然ｅ因素包括： 地動、 火山運動、 地球板殼運動 gah 石灰岩地質溶蝕 所產生。 人為ｅ因素， 包括 地面增加重量 （比如起厝、 建廠） gah 開發地下資源 （比如開發 地下水、 石油、 或者是 天然氣）。 咱台灣 所有 地層下陷ｅ問題， 主要是 因為 大量而且集中leh 抽地下水 所引起。
Di台灣西海岸， 大量集中 leh抽地下水， 不但引起 地層下陷， ma會有地下海水 侵入地層 gah 地上海水倒灌， zit款問題 直接ｅ後果， 產生 地面土壤鹽化、 排水不良 厝間沉落去土底gah受損害、 海岸線退縮、 土地繼續性ｅ沉落。 地層下陷 間接產生ｅ 不良後果， kah重要ｅ例， 是 西濱快速路、高鐵 gah 二高速路， 攏因為 西海岸地區ｅ下陷 來改路線， 致使 工程建設成本 增加 幾落百億。
目前 雲林麥寮地區， 每年 以將近8公分ｅ速度 leh陷落， 致使 雲林離島工業區ｅ 開發， 受著 足大ｅ威脅。 根據 雲林地區 實地ｅ調查， 雲林縣現有ｅ水井， 有七萬外口， di沿海地區ｅ水井， 有一萬外口； 但是 其中合法申請水權ｅ 水井， 全縣 只有 四千外口， di沿海地區 ganna有447口nia，ziann萬口 非法ｅ水井， 可能是 飼漁塭ｅ人， long井 來leh抽地下水。 由過去 漁塭產業ｅ 經濟分析， 知影 漁塭ｅ收益， 一冬大概是10億， 但是因為 土地下陷 致使 增加ｅ公共建設 支出， 包括 增高 海岸ｅ堤防、 排水設施、 設 地下水監測井， 攏總ｅ支出， 有155億外， 並且zit個數字 ma直直leh增加。
為著解決 西海岸地區下陷ｅ問題，有關ｅ主管， 有提出 各種防治ｅ對策，其中包括 取締 非法抽水ｅ水井， 徵收 地下水資源 等 措施。 同時，中南部幾個縣政府，也有提出沿海下陷地區土地e利用方式，彰化縣計劃veh ga伊發展做台灣ｅ 威尼斯。 目前， 經濟部水利司 提出 以五年為一期ｅ 防治執行方案， 並明確訂出 veh達成ｅ目標 有 五點， 其中kah重要ｅ二點， 分別是：
一. 在下陷量 超過一公尺 而且 過去三年 下陷量 超過45公分ｅ所在， 非法ｅ水井， 在五年內 veh減除一半。
二. 西元2000年ｅ時陣， 下陷ｅ地區， 一半以上 mai gorh再下陷。 過去大家攏知影 mai抽地下水， 地層dor ve沉落。 但是 地方主管機關， 無法度解決 zit個問題， 這是 因為 政治e因素， 所以 無去取締 違法ｅ水井。
目前，veh徹底解決 沿海地區地層下陷ｅ問題， 上主要是 主管機關 愛有決心gah魄力 去採取取締ｅ 行動。 最後， 希望 大家來關心 這個代誌， 尤其 更加希望 非法ｅ水井 edang自動取消 為咱ｅ囝孫 來設想， 對所有地層下陷 有盡心過ｅ人， 咱ma來 ho yin pok-a聲 ga鼓勵。
（原登di茄苳12期1996年5月）

科技台文之5
Hubble太空望遠鏡（HST，Hubble Space Telescope）

楊健
清華大學物理系/統計所

細漢 暗時 gah父母 di後埕 看天頂ｅ星， 是 阮以早上愛做ｅ代誌。 歸個天ｅ星 閃閃sihsih 假若呢 對你nih目睭。 後來 大漢了後 讀冊kah知影，星ｅ閃sih 是因為 咱dua ｅ地球 有一層氣層。 Zit個大氣層 會過濾 外太空ｅ光線， 使得 咱看著ｅ星 m是像 普通ｅ電火球仔 一直穩定deh發光， 是無停ｅ 一閃一sih。
咱攏知影， 地球ｅ大氣層 ho咱一個保護， 使咱ve受著 日頭光ｅ灼(ziok6)傷。 但是 對天文學家 來講， zit層大氣層 卻會使得 紫外線 大部分被過濾，使得 咱若deh觀察 外太空ｅ時陣， 不但無法度 進行 紫外線ｅ觀測， 也親像di水底 看邊仔ｅ世界， 隔有一層“朦朧”。 雖然 一閃一sih 真sui， 但是 這是 做科學工作 上無方便ｅ 代誌。 所以 di 1923年 dor有一位 號做Hermann Oberth科學家 提出 太空望遠鏡ｅ 概念， 希望 對太空ｅ觀察 有kah好ｅ改進， 但是 一直到1977年， 美國才進行 Hubble望遠鏡ｅ製造。
Hubble望遠鏡 全長約13.3公尺， 闊4.3公尺， 重11.6公噸， 造價大約二十億美金。 伊是 由美國ｅ太空梭發現號 裝載到 太空， kah gorh ga伊 放di地球ｅ 軌道頂面。 由 地面ｅ工作人員 經過電腦 來控制 伊ｅ 運動gah觀測。 而且 經過電波 ga伊所觀測著ｅ影像 送回地面。 因為 伊dua he地球大氣層ｅ頂面， 所以 伊edang比 地面任何ｅ望遠鏡 gorh看kah暗、 kah遠ｅ星體， 由zia 所觀察出來ｅ 數據， 科學家 edang更加 kah正確 來推算 宇宙ｅ 年紀gah星體ｅ 結構。 但是 趣味ｅ是， 離咱上近 兼上大ｅ日頭公－－ 太陽， Hubble 卻無法度 tang觀察， 因為 太陽ｅ強光 會ga Hubble內底精密ｅ儀器燒害去。
Hubble太空望遠鏡ｅ升空 滿足了 真濟科學家ｅ夢想， 但是 因為人為校正ｅ疏忽， 伊di製造主鏡 打磨ｅ過程 出現 鏡面弧度ｅ差， 致使聚焦（focus）ve準， 所hip出來ｅ相片 dor親像聚焦無對好ｅ hip像機 所攝影出來ｅ像， 無法度達到 科學家 預期ｅ 清晰度。 雖然 後來 科學家 也發展出來 一寡新ｅ數學方法 來處理 所得著ｅ 數據、 影像， 但是 iau有真濟 想veh做ｅ 觀測 無法度做。 這可能是 發展 新數學 成本上貴ｅ 方法。
現在美國太空總署（NASA）隨時攏ga Hubble所觀測著ｅ資料 送上網路，有興趣ｅ人 edang上網路：http://wfpc3.la.asu-edu/sah.htm 去找 上新ｅ資料gah圖片。 而且 國內ｅ報紙gah雜誌 ma無定時 會做zit方面ｅ報導， 咱攏edang隨時 留意參考。
（原登di茄苳12期1996年5月）

科技台文之4
管理者ｅ思考方式

王耀德
交通大學管理科學系教授

管理是什麼？ 有人deh講， 管理 是 一門科學。 管理應該gah代誌ｅ 計劃、 組織、 領導、 控制 有關係。 計劃 是根據 咱想veh達成ｅ目標， 想好所有應該做ｅ活動 是什麼。 組織 是 想好咱veh做ｅ活動 到底veh按怎做， 需要 什麼 人力gah物力。 領導 是 想辦法 ho人edang認真gah拍拼 去做代誌。控制 當然是 去檢查 咱所做ｅ活動 到底有 達成咱ｅ目標 無。 按呢 看起來，veh做好 管理ｅ kangkue 真需要 思考ｅ功夫， 因為 代誌ｅ 計劃、 組織、 領導、 gah 控制 攏愛用腦筋。 做管理kangkue ｅ人 應該有 真濟時間， edang靜靜去思考。
事實gam按呢？ 根據 學者ｅ研究， 公司內底ｅ管理者 攏真無閒。 一工gah暗攏dih做代誌， 對 一件代誌ｅ 注意時間 平均ganna有九分鐘 lan na，根本dor無法度 去做長時間 kah完整ｅ 思考。 按呢， 到底 做管理kangkue ｅ人annua去思考？ 無思考， 哪有可能 計劃、 組織、 領導、 gah控制？ 其實，管理者 ma是 愛用腦筋 思考， 只不過yin ｅ思考方式 gah咱 無仝款 而已。管理者 用行動 去思考 比坐ｅ 用心思考 kah濟。 一個人 坐ｅ思考時陣， edang處理真濟ｅ資訊， edang用理論 去做分析。 按呢ｅ思考 需要kah長ｅ時間， 需要用kah濟ｅ心思。 管理者ｅ思考方式 是 一面思考 一面採取行動：先做 一點仔思考， dor去 採取行動， 根據 行動結果 所產生ｅ資訊， 修正家己ｅ思考。 行動gah思考 結合起來， 因此 di真短ｅ時間， dor edang按代誌ｅ 計劃、 組織、 領導、 gah控制 做好。 比一個例， 咱dih練pah槍ｅ時， edang用二種方法 來調整 槍頭ｅ方向。 一個 是 用真科學ｅ方法， 測量距離、風向、 風速， 用 數學公式 來計算 槍頭瞄準ｅ 方向gah角度。 另外 一個方法， dor是 做大約ｅ瞄準， 拍一槍看mai， 按標兵 報轉來ｅ結果 調整風向。頭一個方法 愛kah用心， 用kah濟ｅ時間， 處理kah濟ｅ資訊。 第二個方法，結合行動gah思考， 真緊dor edang拍著目標。 由此可見， 行動中ｅ 思考方式 kah適合 真無閒無時間ｅ管理者。
敢是 所有ｅ管理者 攏愛做真濟ｅ思考？ 根據學者ｅ研究， 除了 思考能力 以外， 管理者 愛gorh有 真好ｅ 技術能力gah處理大眾關係ｅ能力。 公司內底， 愈低級ｅ 管理者， 愈需要 技術能力， 愈guan級ｅ 管理者， 愈需要思考能力， 不管guan級 a低級， 攏需要 大眾關係ｅ 能力。 可見， ganna有 科學技術ｅ知識， vedang ho一個人 做kah guan級ｅ管理者。 除了vat技術以外， gorh愛有 思考ｅ能力。
因此， 無m對， 管理 是 一門科學， 是 一門 需要di行動中做思考ｅ科學。 真濟 讀科學ｅ人 ma真qau思考， 可惜yin vedang做好管理ｅ kangkue，因為yin ve曉 一方面行動 一面思考， 所以 m是 所有ｅ人攏edang做 管理者。 請你自問， 你ｅ思考方式 是m是 行動中ｅ思考？ 若是， 緊去開公司， 做頭家， 一定大趁錢。
（原登di茄苳12期1996年5月）

科技台文之3
有頭腦ｅ機器

楊谷洋
交通大學控制工程系 教授

Di咱ｅ生活中， 充滿著 各式各樣ｅ 現代化產品， ma致使 咱過ｅ日 有更加一步ｅ 舒適gah方便， 比如講 zimma有一種智慧型模糊（fuzzy）洗衫機， 會曉根據衫a褲ｅ 數量gah質料， 自動調整 洗衫粉ｅ份量、 水量、 水溫、 gah轉速 等， 另外ma有智慧ｅ電鍋， 家己會斟酌 水gah米ｅ比例，煮熟QQ ｅ米飯， ho真濟查甫人 chue無理由講 免洗衫、 煮飯。 當然 咱會希望 以後會發明 愈巧ｅ產品， ma會愈體貼人心； di這ｅ機器ｅ 智慧化過程中， 到底未來 會對dor一方向 來發展neh？ 無定對 咱先來回顧看mai leh機器 是按怎 跟隨人類ｅ腳步 來演進ｅ， 無一定有 “知古鑑今”ｅ效果。
話ui頭仔講落來， di古早hit當時， 咱ｅ祖先a 利用 石頭、 樹枝 等 來製造 原始ｅ工具， 後來 因為提鍊金a 等 技術ｅ發展， 同時kah勇、 gorh kah精緻ｅ器具 ma due deh同濟出現， 但是 zit個時期ｅ工具， 基本上 攏無自身ｅ動力， ma無法度 自我運作， 比如講 做穑用ｅ犁、 馬車 等等， 完全靠人ia是動物 來提供動力 gah 操控。 了後， 人漸漸 dann學會曉 利用來 ui大自然界ｅ 風gah水ｅ 動力源， 親像 荷蘭真有名ｅ風車、 ia是 提供沃水ｅ水車等， 當然 風車gah水車ｅ 運作， 必須愛設計出 好ｅ控制方式， ho伊 會曉免靠人 ma知影 di變化ｅ風、 ia是 水流中 維持 伊ｅ穩定， 按呢， 機器算做 開始有一點a 聰明a。
十八世紀英國ｅ Watt[瓦特]發明了 蒸汽機， ma引起 第一次ｅ 工業革命， 蒸氣ｅ動力 di某一種程度頂面 ho人 m免靠 大自然ｅ動力， 這時陣 人類ｅ歷史 ma對陸權 進入去 海權時代， 利用蒸氣ｅ船隻 開始大步行走 海洋， ma開闊了 人類ｅ眼光； 二十世紀人類 發明了 飛ling機， ui大海 進一步 飛行起去天頂， 甚至利用 太空船、 太空梭 來探測無限、 神秘ｅ 外太空。 Zia e進展 除了講 有強gorh有力ｅ engyine以外，電腦ｅ出現 ma扮演著 一個真重要ｅ角色， 因為 伊快速ｅ運算能力 gah 大量ｅ記憶體， 使得kah新ｅ、 kah完善ｅ控制方式 edang實現， ho機器 di面對複雜ｅ狀況ｅ 時陣， 有能力 作出 正確ｅ判斷； di zit個時陣， 咱會用得講 機器 已經親像 具備有 一個“頭腦”。
一個有頭腦ｅ機器 ho人類 真大ｅ 鼓勵gah想像ｅ空間， 親像 真濟科幻電影中 攏有 無仝型式ｅ 智慧型機器人， 比如“生化電子人”、“機器戰警”、 “魔鬼終結者”等。 當然電影中ｅ事物 a是kah無實際， mgorh ma代表著 人類ｅ夢想； 另外一方面， 既然是 人腦gah電腦ｅ 對比， 按呢 是m是 會用ga人類ｅ智慧 送入機器ｅ電腦內， ho伊 親像人仝款聰明？ 這ma是 現此時一個真熱門ｅ 研究方向， 不過畢竟 人是人、 機器是機器， 雙方 有 基本ｅ差別， 比如講 人有感情、 有情緒、 ma有kah好ｅ 想像力， 倒反ｅ， 機器edang一直重複做 複雜ｅ 計算gah比對， 所以 另外一個 研究方向 是去chue出 人gah機器合作ｅ 方式， 好好利用 雙方ｅ優點， 比如講 遙控機器人ｅ觀念 dor是 結合人ｅ智慧 gah 機器人ｅ能力 來設計di未知、 a是危險ｅ環境情形下 來進行工作。
簡單開講 機器智慧化ｅ種種， 有一個奇怪ｅ想法 浮現di頭殼內：“人 是m是 ma會用算做 有頭腦ｅ機器？” 現代ｅ社會、 現代人ｅ生活方式， 的確是 愈來愈 機器化、 電腦化、 自動化， 希望咱dih deh追求 人工智慧、 建造新ｅ機器ｅ同時， ma會得著 啟示gah反省， 人當然應該 iau有淡薄a 無仝款，若無是 ganna一個 “有頭腦e機器” niania。
（原登di茄苳12期1996年5月）

科技台文 之2
台灣都市空氣ｅ污染 ~ 一葉知影污染

孫岩章
台大植物病蟲害學系教授、環境病害研究室主持人

Di 1989年春天ｅ 某一工， 台北縣 新莊鄉ｅ農會推廣人員 ham一群農民氣putput ga菜園ｅ蒿仔菜 攏總挽起來， 四處teh去陳情， 為什麼？ 因為蒿仔菜葉 一暝之間 一時攏總變gah ve賣zit。 Hit當時， a無人知影 是什麼原因。 所以yin dor ga一部分樣品 送來 台灣大學 ho我診斷gah鑑定。 等我看著zia ｅ蒿仔菜葉， 確實 ma是 驚一dior， 因為我過去 雖然看過ve少ｅ空氣污染案例， 可是mvat看過 zia慘ｅ代誌， ziaｅ蒿仔菜葉 是安怎會變成 臭尾da， 又gorh反光變銅色， 是一個 ho人感覺 真無正常ｅ事件。
在hit當時， 我di台灣大學ｅ實驗室 ziann du設立一冬， 內面 無什麼儀器 可以化驗。 但是我去bing 國外ｅ文獻資料 後， 慢慢a 感覺出 可能是一種 光化學污染物 所造成ｅ。 然後， 我dor一步一步 去買一寡 分析儀器， 希望edang 對空氣中 分析出 特殊ｅ污染物， di zit段漫長ｅ籌備期間， 我ｅ田野調查 ma攏無停過。 結果發現 臭尾da ｅ蒿仔菜 mdann是 出現di新莊， 包括 板橋、 土城、 樹林、 三峽、 泰山、 五股、 中和、 永和、 新店ｅ蒿仔菜ma攏總受害， 甚至 連台北市ｅ大部分地區 ma攏看會著。 到底 污染區ｅ範圍 有外大？ 這又gorh 變成一個 真好ｅ 研究調查題目。 因為 蒿仔菜葉ｅ受害 可以ho咱知影 污染ｅ存在， 菜葉ｅ 受害範圍 正是嚴重污染ｅ範圍。
Dor按呢，我痟痟衝 憨憨a veh去追究 一個到底， dor對台北向南， 一縣看過一縣， 一市看過一市， di 1980年調查清楚ｅ結果， 證明 全台灣 有三個大地區ｅ空氣 攏vai gah 會ho菜葉 會臭尾da。 Zit三個 dor是台北盆地、 台中盆地、 gah高屏地區。 若ga yin 每一地區 劃線圍起來， yin ｅ面積 大約是 台北450平方公里； 台中盆地連南投、 彰化是400平方公里； 高雄、 屏東、 台南、 包括 東爿到旗山、 美濃、 六龜、 南至 枋寮 是1200平方公里；以上三個 攏總加起來 是 2050平方公里， du好是 台灣平地ｅ 七分之一。 Zit個事實 證明 台灣ｅ都市空氣 已經是 出了 真大ｅ問題啦！
Di 1992年我ｅ儀器 設好了後，化驗ｅ結果， 證明台北ｅ天頂 大氣當中，一旦 di無風、 有日頭ｅ hit日， dor edang驗出一種 叫做”PAN”ｅ氣體， （伊ｅ全名中文 叫做 過氧硝酸乙醯酯， 英文叫做 peroxyacetylnitrate， 簡稱叫做PAN） 只要hit日 是 無風、 有日頭， 台北ｅ街a路 dor看ve到路尾。 遠遠看去dor是 一片 煙霧pupu， 四周圍ｅ 觀音山、 大屯山、 四獸山 攏vih di茫霧中， 這dor是 咱所講ｅ “化學煙霧”。 受著zit種污染後， 蒿仔菜 大約di hit暗出現病症， 隔日透早 dor看gah真清楚， 按呢ｅ情形， edang估計伊受害ｅ程度。 咱叫 zit種植物 是 「空氣污染指標植物」。
到目前為止， 阮ｅ實驗室 已經有 四種以上ｅ空氣污染指標植物 發展成功。 Zia ｅ品種 可以同時 監測PAN gah另一種污染－－臭氧（ozone）。 而且阮也徵求 台中、 嘉義 ham 高雄地區ｅ國中、 國小老師， 參加 空氣污染指標植物ｅ 合作計畫， ho yin di校園內 種zia e植物， 觀察有受害無、 di dor一日 出現病徵， 按呢edang知影 各地ｅ實際污染 情形。
古語有講：“一葉知秋”。一片蒿仔菜葉 確實會ga咱講 昨ang ｅ空氣 是外vai。 如果你若有興趣 veh試看mai， 歡迎您 向 台大植物系環境病害研究接詢，電話02-392-5622。
（原登di茄苳12期1996年5月）