daiqi007

網路 gah 我 陳琬蓉

網路是我zit ma 逐工攏會使用e 物件， 伊ho我ｅ生活 閣卡方便， 我e sai使用網路 知影天下事， m管是新聞 抑是學術， 攏e dang ui網路得著， m gorh 愛注意e是， 網路上ｅ消息 gah 知識 有時陣 會有錯誤， ve用攏總相信。
　　另外， 網路ｅ發明 帶來 ve少商機， 阮di厝內用手指頭仔 點一下 diorh買會著 真濟物件， 因為網路ho商家ｅ產品 e dit上傳ho所有人看著， 其實m ganna 是商品， 真濟音樂、 藝術、 文化 甚至是搞怪e創作ma e sai 經過網路ho 大家知影， 像我有時陣diorh 會看網路拍賣， 裡底攏有ve少品質ve vai 又gorh 俗 e產品， 我ma 會瀏看一寡商家e社群網站， 知影 上新近e藝文活動， 網路上 多元ｅ事物 豐富了 我e生活。
　　上重要ｅ是， 有網路了後， 眾多社群網站 na 雨後春筍hit款 bu出來，lu來lu濟人 di使用facebook gah撲浪， 我身軀邊e 親人好朋友 攏有leh用。 有人講， 社群網站ho人表面上 有di關心對方， 其實真疏遠， 我認為 無常來往e朋友 確實是按呢， m gorh 阮e sai用zit款方式 去加一寡熟識yin，而且原來diorh 真好e朋友， ma e dang 真緊知影 yin最近發生e代誌。 像我diorh定定注意 我 veh關心ｅ人ｅ近況， 有時陣ma會di我麻吉朋友 e塗鴉牆上 抑是阮e社團裡底鬧， 雖然講是鬧， 但這ma是 阮分享生活e一部分，阮樂在其中。 另外， facebook閣有一個真趣味ｅ所在， diorh是看得著真濟人分享 各種無仝ｅ連結， 有e 真笑詼， 像最近流行e「淡定紅茶」， 有e 是針對新聞作e評論，有e是真有創意、 ho人思考e圖 抑是相片， ma有e是ho人驚艷e表演影片。 我今仔日diorh發現 我朋友貼e一首足好聽e清華情歌gah坐di清華看星星e電子琴版本， 竟然是 我系上e 一位同學表演e， 實在足du 好。
　　總講一句， 網路e使用 充滿著我e生活， 莫怪zit ma 買手機攏希望伊有網路e tang食gah飽， m gorh我希望大家 mai顛倒聚di作伙時， 閣不時di leh用facebook， he diorh 真害啊， 咱抑是愛di真實ｅ世界中gah人相處ziah好。

網路gha我 陳約任

網路， di現在ｅ大學生ｅ生活中 已經未可無呀， 每一工dng去宿舍， 大家ｅ第一個動作 就是打開電腦， 閣來diorh是上網。
對我來講， 每一工攏愛看ｅ 就是現在上流行ｅ Facebook gah NBA囉！
Facebook是一個網站， di-hia我可以gah 我ｅ好朋友開講、 聯絡情感 閣有分享情緒。 讀到大學lo， 足濟以前ｅ好朋友 攏di 無仝ｅ所在 讀冊， di距離ziah遠ｅ情形下 阮也足難互相見面連絡， 所以， Facebook已經變我gah好朋友聯絡ｅ管道lo！ Facebook ｅ 速度緊、 使用簡單， 用ｅ人 也足濟， 對阮來講， 是非常好用ｅ方法 來聯絡彼此。 而且， 伊是m免錢ｅ！ 閣有， Facebook傳送訊息ｅ速度足緊， 足濟ｅ資訊 可以透過伊來知影， 實在足方便！
NBA是美國職籃ｅ簡稱， 也是我上愛ｅ興趣-- 看球賽。 我自細漢甲意運動， 尤其是籃球， 除了家己打以外 也愛看別人打！ 美國職籃 是 大家公認上厲害ｅ籃球天堂， 所以 我開始看yinｅ比賽。 無看無關係， 一看不得了！ 歸個擋vediau， 每一工攏愛看， 無看無爽快！ 根本中毒！ 大學住學校， 無像di厝有電視， 所以 攏愛用網路 來看， 不管是新聞 抑是比賽video， 透過網路 攏找會著！
網路對我來講 實在太重要， 每一工攏需要用著， na無伊， 足濟代誌 我攏m知， 我也無法度看我上愛ｅ比賽， 生活會變gha無聊， 實在無法度想像 無網路ｅ一刻呀！

做穡人分鵝
俄，托爾斯 集、 DCH譯

有一個ga人bak田ｅ做穡人， yin兜 已經無糧lo， dor veh去ga田主借糧穀。 伊想講空手去 ka無禮貌， dor ga厝內一隻鵝 掠來tai， gorh ga烘烘leh，做伴手teh去送田主。
田主ga禮物收落來，向做穡人講：
“多謝你ｅ禮物， mgor阮兜 有 阮翁仔某二個、 二個後生 二個查某囝，你想我veh按怎分dann會公平？”
做穡人講：“我來替你分！”伊dor qiah刀仔 ga鵝頭dok落來， 對田主講：“你是一家之主， 你是頭家， 得鵝頭！”伊gorh ga鵝尾椎ｅ部份 dok落來， ho頭家娘， 對伊講：“你顧家， 顧內頭， 款東顧西，是 厝內 上好ｅ守護者，所以 尾椎ｅ部份ho你！”
伊ga鵝ｅ腳 分ho二個查甫qin-a， 講：“Lin二個 愛遵守老父ｅ腳步，伊ｅ辛苦 攏是為著 lin全家。”
伊ga鵝ｅ翅股 分ho二個查某qin-a， 講：“Lin二人， dor會 飛離家庭嫁出去， 所以翅股ho lin！ Cunｅho我家己！”
田主 聽著 bak田人ｅ好言好語 足歡喜， dor呵咾 伊ｅ體貼， ho伊穀物gah一寡錢財。
另外一個 ka富裕ｅ 做穡人， 聽著zit項消息， ma送五隻鵝 veh來尊敬田主。
田主 接會(hue3)做穡人， 多謝伊ｅ禮物，伊講：“阮兜 有六個人， veh按怎分五隻鵝 ka算公平？”
好額ｅ做穡人， 想過來想過去， 想足久， 攏無撇步。
田主 請散赤ｅ做穡人 來幫忙分鵝， 伊掠取一隻鵝 對田主yin翁仔某講：“Lin二個加上zit隻鵝， 總數是三。” 伊gorh另外掠取第二隻鵝 對yin二個後生 講：“Lin二個加上zit隻鵝， 總數是三。” 然後， 伊gorh掠取第三隻鵝 對田主ｅ二個查某囝 講：“Lin二個加上zit隻鵝， 總數ma是三。”
“Cunｅ二隻鵝加上我一個， 總數ma是三， 按呢分， 上公平。”
田主笑haihai， ho伊 真濟糧穀gah錢銀， 然後 ga hit個好額ｅ做穡人 趕走。

曝 粟 游政榮(中三A )



六月冬
日頭赤炎
南風吹來收成e消息
稻仔一工一工黃
稻尾一日一日重
無閒e日子又閣來臨

一車一車載轉來e粟仔
將稻埕染作金黃
趁著好天
趕緊來做穡
bing過一ling閣一ling
汗水流落一滴閣一滴
面上e笑容
心內e歡喜
是豐收e年


游政榮(中三A 2003?)

Holmes ho少年ｅ 開嘴講台語 陳瓏文

一 (a)、Holmes gah Watson 如何配對？ 請敘述yin二人ｅ風格。
答題
1. Holmesｅ個性kah隨興、 古怪， Watsonｅ個性kah沉穩、 冷靜。 di leh故事中， 攏是以Watsonｅ冷靜來平衡Holmesｅ隨興， 取得zit leh ziork好ｅ平衡。
辦案時， Holmes負責分析、統籌一切ｅ計畫， Watson di Holmesｅ身邊輔以zit位醫生 所具備ｅ醫學知識 gah zit位軍人ｅmeh liah身手來協助Holmes辦案， 使案件edang順利來偵破。
2. Holmesｅ個性kah隨興、 古怪， kah歹接近， ve啥會gah人交陪， 頭殼相當精明，且具有實驗ｅ精神，經常會di厝內實驗。
Watsonｅ個性kah沉穩、 冷靜， kah vat人情， 比較會gah人交際， 頭腦vor Holmes hiah-nih-a精明， 經常扮演Holmesｅ助手。

一 (b)、為什麼倫敦Baker街設有Holmes博物館？ 為何veh ho Holmes開嘴講台語？
答題：
1. Di 十九世紀時， London真正有”貝克街”， mgorh門牌號碼指已到八十多號，di Holmes系列小說出版後， Holmesｅ影響力愈來愈大， diorh di 西元一九三六年London城市擴建ｅ時陣 增設著書中ｅ ”貝克街221號B” zit leh 地址， 而且gorh保留落來 變成了 今仔日 咱所看著ｅLondon貝克街Holmes博物館。
2. Di推理小說內底， Holmes是zit leh不可欠ｅ角色， di張春凰老師ｅ丈夫──江永進教授ｅ提議之下， 選擇vor仝趣味ｅ文本 edang滿足部分讀者ｅ需求， 按呢 張春凰老師di清大ｅ 通識教育課程內底， gah四方ｅ學生辛苦ｅ共筆心血， 扮演Holmes台語系列小說ｅ 促成者， di現今世界上 約有57種以上 vor仝語言翻譯ｅHolmes系列小說， 台語版ｅHolmes系列小說ma為其再添佳話。



一 (c)、Holmes電影gah文本有什麼異同？
答題：
相同處：
1. 課程所欣賞ｅHolmes電影中， Holmes三分無法無天、 三分浪子個性、 三分慵懶胡混， gah小說內底Holmesｅ形象 入骨入肉 相比較。
2. 電影內底， Holmes di leh厝內實驗槍枝ｅ消音器， gah小說內容仝款。
3. 電影內底， Holmesｅ性情古怪、 難以接近（ui厝主對他ｅ反感 dor edang觀察出來）， gah小說內Holmesｅ個性仝款。
相異處：
1. 電影故事ｅ整個主軸， 並vor採用小說內底ｅ故事， suah是家己開創zit leh冒險故事。
2. 電影內ｅHolmes攏vor出現過”獵鹿帽”， gah小說內底Holmes熊招牌ｅ獵鹿帽無仝。
3. 電影內ｅWatson地位提升， gah Holmes kah像平起平坐ｅ拍檔， 小說內ｅWatson對Holmes kah聽話， 所以di電影內gah小說內Watsonｅ形象vor仝。

二 (a)、芥川龍之介為何講”人生不如Baudelaire(波特萊爾) ｅ一zua詩”？
答題：
　　Ui芥川龍之介ｅ作品edang觀察出 他ｅ性情kah黑暗、厭世， 作品內底充滿了陰森ｅ感覺， 對他來說， 「藝術至上」是肯定ｅ， ui他所說ｅ「人生不如Baudelaireｅ一zua詩」便edang了解， 人生內底 所有ｅ美麗 攏比ve過一zua詩ｅ藝術之美， 由此可見 他對藝術完美ｅ 想望熱情。

二 (b)、講述〈地獄變〉大要， 並闡述zit篇小說ｅ意旨。
答題：
大意：
　　良秀是zit位ziork有才華， mgorh生做歹看、 個性ang-do古怪ｅ畫家，他有zit leh美麗ｅ女兒 di堀川大公豪宅當侍女， 有zit gai堀川大公 交代良秀 創作zit幅描繪地獄內底慘況ｅ屏風， 良秀藉由弟子模擬ziork濟悽慘ｅ畫面來畫di zit幅屏風頂頭， mgorh良秀想veh畫 zit位美女坐di車內ho火燒ｅ情景，為此 他去拜託大公 來幫忙， 大公 露出 奸邪ｅ笑容 答應之後， 擇zit暗備好一切， 請良秀來 閣放火落去燒車， vor外久， 眾人便觀察出 di車內ｅ是 良秀ｅ查某giann， ho火活活來燒死。 之後良秀 藉由 zit leh畫面完成 「地獄變」zit幅屏風ｅ隔工 dor吊dau自盡， ho人漸漸來遺忘， 畫作卻留下了永恆。
意旨：
　　良秀為dor追求作品ｅ完美， suah來忽視家己查某giann， 最後不只失去了查某giann， ma間接害死家己， 賠上 二條性命、 家破人亡， 相形之下，堀川大公 suah來得著zit幅寶貝ｅ「地獄變」屏風 作為傳家之寶， 兩人ｅ命運比起來更加是諷刺ａ。

三、你對台語演戲有什麼心得？
答題：
　　阮zit組所演ｅ是《金銀島》內底ｅ「烏帖」， 雖然是 短短ｅ故事，di台上演起來 大約五分鐘nia-nia， mgorh老師問我： 「雖然只有五分鐘， lin ma si準備liau ziork久吧？」， 老師講ｅvor m diorh， 人講 「台上十分鐘， 台下十年功」， 金銀島故事 di冊內底 是用「敘寫」ｅ方式來表達， 阮要家己ga他編成「對話式ｅ劇本」， 其中veh加入去 台語ｅ語氣、 肢體語言…等等， 而且gorh需要zit gai 閣 zit gai ga劇本讀ho熟， ga台語唸ho標準， 以上ziaｅ工作kai了阮ziork濟ｅ時間才完成， m是一、兩工dor edang輕易達成， mgorh藉由zit gai 台語演戲ｅ經驗， ho阮真正是 學著ziork濟 gah以前vor仝ｅ寶貴經驗， 相當有價值。


四、你對使用台語翻譯文章 有什麼義趣？
答題：
　　Di翻譯文章ｅ作業內底，我發現了有兩ｅ難處：
1. 第一dor是「表達方式ｅvor仝」：台語gah華語有各自ｅ修辭、句型…等等，愛先分析華語ｅ意思、句型， 再來cue台語中所對應ｅ 語詞、 句型， zia有法度gah華語完整、 正確來翻譯成台文噢。
2. 第二dor是「羅馬拼音gah華語混用ｅ抉擇」： 有時陣di羅馬拼音gah華語之間是ziork vor 簡單來決定， 像「啤酒」， 其實vedang直接寫華語， 需要寫成「vi-luh」；像「事情」ve使 寫成「dai-zi」， 需要寫成「代誌」； 「gorh」需要寫成「閣」， mai直接寫羅馬拼音…等等。
　　以上兩點 攏是需要 時間gah經驗 來累積， 透過練習 gah 老師幫忙來批改zia edang進步， 並ui其中學習。(其中有真濟 幼味細節ｅ考慮 )

五、如何ho台語文現代化？
答題：
　　其實di現今ｅzit leh時代， 台語愈來愈受到重視， 台語劇、 台語歌、台語新聞…等等， 攏ho台語更加貼近阮ｅ生活，我認為， 台語若是veh現代化，dor要加入zit寡現代上新ｅ用詞， 或是創造出 zit寡經典ｅ語句， cin像進前台語鄉土劇中， 劉文聰ｅ台詞： 「你na si惹著我， 我diorh送你zit桶汽油gah zit枝番仔火」， zit句台詞 di當時 足紅 足時行， 吸引大家模仿zit句台語ｅ台詞， 成做 順口溜之外， maｅ有gorh ka 濟人 去觀看台語ｅ戲劇， 按呢台語dor edang更加普遍、 更加 生生不息， 永遠流傳 閣 發揚光大。

一學期ｅ台語課 廖元圳
一. (a)Holmes gah Watson 如何配對？ 請敘述yin二人ｅ風格。
Waston 是一個醫生， Holmes是一個偵探， 平常時攏是Holmes有代誌 才會cue Waston， yin二人diann diann出生入死 di le冒險， 走cue證據 想veh破案， ui另外一個角度來看， yin二人根本diorh是生死之交， 換貼e。 mgorh Waston diann diann ho Holmes氣gah pik-pot跳sor對a。
Holms 伊ka勇敢ma ka巧。
Waston是一個冷靜思考e人， na是無Waston e 鬥相工， Holmes家己ma真歹破案。
(b)
倫敦貝克街原本是無Holmes 博物館， 但是因為柯南道爾寫e小說 實在是siunn過受歡迎， siunn過cing a， 然後hia幾間厝deh翻修e時陣diorh du a 好 ga博物館ki起來， 內底diorh是小說虛疑ｅ神探Holmes伊住e所在 gorh 有一寡a伊e物件。
Holmes開嘴講台語 有幾個目的:
edang 開啟台gah文本e豐美， 另類e小說閱讀方向， 無仝趣味e文本edang滿足一部分e人。 suah lorh來 繼承發起人e意志， 以原本作底， 輔以華文，撙節著對應e台詞， ga台語 推向 一個新e舞台， ma edang當作無仝款ｅ教育教材， sing suah配合 江永進老師新一代ｅ 拼音課程作學習， 以台語 向世人發聲台語之美。
(c)電影gah文本有幾個無仝e所在， 第一， 我感覺 電影e部分gah Holmes講gah siunn ham古 a， 看起來diorh親像神仝款， li na是有看冊， 雖然Holmes是真巧無m對， 但是ka實在。 講著Waston dor無hia大無仝。 第二， Holmes ehiau拍拳， 但是閣iau vedang gah人比賽相拍。 第三， 電影內e Holmes愛bok 薰， mgorh冊內底所寫e Holmes 閣卡親像 一個吸毒者。 電影ka刺激， 看冊ka有一項一項細細仔想e感覺， 有閒edang家己去是看mai。

三、台語演戲心得
阮 zit組一開始 先大家講看mai家己看著金銀島內底di le演啥， 用台語講特別親切， 大家選角色， 轉去準備物件ham道具， 前一暗， 阮用三點鐘排演，實在是有夠熱， 演gah歸身軀dam li落， mgorh真歡喜 按呢 大家作伙打拚合作演出。 我台語ka厲害， 所以di le演戲e時陣， yin na 是du著未曉e台詞攏會問我， 我ma ga yin 教要按呢講， 我雄雄了解老師要阮演戲e目的 m gan na 是為著表演， 而且是 愛阮家己練習講台語， 互相教台語， ho阮gorh ka qau講， gorh ka敢開嘴。

四、翻譯文章心得
華語e文章無hia ni a好翻，li須要先讀過了解意思， 然後家己再用台語思考，ga伊翻譯出來， 因為 有e華語 是無法度 直接翻e。 翻譯文章edang幫助我用台語思考gorh edang看著台語之美。


多謝老師zit學期e教育， ho我m dann ganna會曉講台語gorh會曉寫台語， 想veh傳播母語， siong重要e diorh是愛ga伊寫作文字 發揚出去。 希望老師加油，大家加油! 我愛講台噢。 感謝老師、助教。

Ho 少年ｅ開嘴講台語 陳亮潔

三. 你對台語演戲 有什麼心得？
阮 zit gai 演e 是金銀島， 阮四個工工系找峻育 gah 姵辰一組， 因為bheh 做伙演戲， 所以e dang 熟識別人 是一件真好ｅ代誌， 阮先ga 冊讀一遍，作伙討論劇本， 阮ma 學會曉 分工合作， 有e人做名牌， 有e人做ppt …等等。雖然我e台語m是足好， m gorh yin會教我， 我dor due 著yin e 腳步， liam mi dor e hiau a ！演戲e過程真歡喜， 我甲意逐家作伙 為著一件代誌 認真， 無清采， 付出gah 拍拼e 感覺， 多謝老師ho 阮 zit gai e 機會， e dang 享受演戲e過程。

四.你對使用台語翻譯文章 有什麼義趣？
Di 翻譯e過程中 有淡薄仔挫折， 因為我m知影老師bheh 叫阮對翻譯，m是改譯， 所以我dor 用家己ｅ意思翻譯文章， 跳過真濟所在， 另外， 我感覺文章中成語e部分卡歹翻， 有e m 知bheh 安怎翻， m gorh 因為zit 個作業ho我重新思考台語e流暢性， m是ganna ga 句ｅ意思翻ho對， 文章e頭前後壁ma愛連起來， 需要時間dua dua 仔做， 有bhe hiau e所在， 我會參考200條， 內底有足濟定定用到e詞！


五、如何ho台語文現代化？
台語真好聽ma 真趣味， m gorh zit ma 台灣人有真濟人 bhe hiau講台語，可能是台語e教育siunn 少， ho 台語文現代化， 我感覺e sai ga 台語生活化，變成一種平常時dor e sai 講e語言， 親像透早看dior 人 dor e sai 講 ghau 早，gah 台語變成生活中ｅ一部分。

加州美景 點線面
張春凰(原登台文戰線 22期)

一. Stanford U. 到 Saratoga

2010 0810下晡點半 是 一個 歡喜心ｅ時刻， 阮一家二代 相會di加州San Francison 機場。
親情 促成 美好ｅ團圓， 體內ｅ細胞 攏活跳起來， 甜蜜心思 鬆化了 個外月ｅ奔波， 這是 半個月內 三度來到 SFO空中驛站。
分享 過晝ｅ點心， 安穩著 輕浮四肢ｅ 太空漫步， 甘美ｅ感覺 超出 物質ｅ實體， 消除 機場邊仔 二點外鐘ｅ 租車延遲， 初接手ｅ Kindle閱讀機， du扮演一個 填滿 空閒ｅ時段。
停留 短短ｅ幾工， 每一寸時間 攏是寶貴ｅ。 一家人 順路來到Stanford大學 溜溜sehseh leh。 車入 zit個校舍， 親像 一個社區ｅ 告示牌， 真平民化 足親切 來引導 生份人 入校參觀。
入去學校內， 目nih-a 有 淡薄仔 面熟ｅ情景， 瘦抽高俊ｅ 粽櫚樹 liong出空中 隨風飄搖， 圓弧度ｅ綠樹 定di 起起浮浮ｅ 青草地面上， 青茵之上 綠蔭之下 有 青少年熱天學習營 歡聚， 傳來 一波一波 聲浪， 鼓舞著 安靜ｅ午後。
來到 學生中心， 室外 是 露天歇坐區， 教授、 學生、 遊客 一面歇睏、 一面充飢， 身邊有幾個 老師級ｅ身份， m知是 主持 什麼講座， ho人追想 古希臘Plato時代ｅ 自然教室， 無圍牆ｅ教養， 這有 Stanford大學校訓— ho自由ｅ風 在伊吹ｅ 氣息， zit句話 取自德語-- Die Luft der Freiheit weht， 自由 永遠是 開放個人 追求理想ｅ 底蒂。
2005年6月23日， 當今 科技界ｅ怪才 Steve Jobs以 Apple Computer & Pixar Animation CEO身份 為 當年ｅ畢業生 演講， 伊講：“人生有限， 千萬mtang ganna去應付別人ｅ期待 來活、 去ho 別人ｅ意見 掩kam家己ｅ心聲， 上重要ｅ是 請激起勇氣 追從家己”。 人生有夢 有望相隨， 伊閣引述 伊少年時代 Stewart Brand所出ｅ “The Whole Earth Catalog”雜誌封面， 背景 是 庄腳小路， 休閒ｅ自由心境， 有二句話 種di伊ｅ心肝崛仔： Stay Hungry、 Stay Foolish 意思是 追求新知識 隨時 若處 di腹肚iauｅ狀態， 同時 保持若戇呆ｅ 謙虛心 。 自按呢 伊 回想並串聯 伊家己人生ｅ 點點滴滴， 自稱 一世人當中 大學無畢業， 卻是一生中 上gai接近 畢業ｅ場合， 為畢業生 分享 家己ｅ 經營果實， 伊不時 deh提醒“Have the courge to follow your own heart and intuition”， 鼓舞家己 due你ｅ心思gah 直覺 行。
因為按呢， 五冬後， 新世代ｅ iPhone、 iPad 征服著 大大細細ｅ場合， 這是一個 無國界ｅ 科技藝術品， 少年人ga iPhone kngdi家己ｅ庫袋仔內， 不時不陣 yin攏是 一機貼身在手 比 身邊ｅ牽手 閣卡要意。 Steve Jobs創作出 多功能ｅ 新世紀 跨國戀人， zit款 以 自由 所帶領ｅ發明， 由 車庫工作室 凌駕過 教室ｅ創舉， 可見 自由心胸ｅ 爆發力。
學校ｅ 鐘塔， 底盤 用一座 透明ｅ 玻璃櫥窗 護圍起來， edang看著 機械內部裝置， 呈現著 立體機械 對稱之美， 可聽著 滴答ｅ聲音， 每隔 一時刻diorh聽著 響亮ｅ鐘聲， di校園內 阮聽著 數gai， 時間ｅ流動 推sak 著 旅人ｅ心。 鐘塔邊仔 直直ｅ埕斗道路 連接著 Meyer圖書館。
Meyer圖書館ｅ設立 di外表上， 遠遠看過去 有 台大新總圖ｅ架勢， 鐘塔ma ho人想著 台大ｅ古鐘。優雅ｅ圖書館 放送出 安靜ｅ智慧 收藏氣氛， 有人講 圖書館 是 大學ｅ心臟。
成排成列ｅ 腳踏車 其中iau有彎倒ｅ 放肆， di整齊ｅ排序中 凸顯浪漫。 粽櫚樹 di好天日光下 跳 咱台灣蘭嶼ｅ 頭毛舞， 天氣 清涼舒適。
校舍ｅ特色， hit當時 在地時行ｅ 西班牙式風格 起造， 四角形ｅ石 疊做牆壁， 闊闊ｅ門ginn 以 半圓形ｅ拱門 形成 走人巷 相連接， 這是 落雨ｅ時 上貼心ｅ設計。 紅瓦、 土粉黃ｅ壁色 是 主要ｅ色水， 上突出ｅ所在， 應算是 創校史上 第一屆畢業生ｅ校友-- Herbert Hoover總統 所捐贈ｅHoover塔， 圓針ｅ厝頂， zia是全校上guan點， 爬起去 可看著 校景。 創校者Stanford 夫人 為紀念去世ｅ Stanford先生 所建ｅ 紀念教堂， 彩色門窗玻璃 ma為校園景色 增加變化， 一寡藤蔓 附黏著 牆頂樓壁， gah綠土面 交織 互相呼應， 校徽 是一欉 枝葉層次對稱 長青杉， 印襯 紅色ｅ學校名。
順步來到 學府冊店， 文具 紀念品 真濟攏印著 校徽。 來到冊店， ho阮連想著ｅ是 二冬前 由 緊急通知 後生 dui美國網路冊店 所買ｅ“Space Between Words：the Origins of Silent Reading”zit本冊， 正是 Stanford大學出版社ｅ 出版品。 Zit本冊 對 提倡 “讓格書寫” 有 歷史性ｅ證據 gah 開啟性ｅ發覺。
曠闊ｅ校園， 遊客如阮， 來行踏， 一向有 觀光gah補償ｅ 感覺， 大人dua qin-a來， 一面親子， 親子活動 之外， ma 可能有 留著一個機會， 有一個印象， 日後 可能有機會 爭取 zit間學校ｅ 獎學金。
一入去zit座校園， 有目nih仔ｅ 熟識感覺， 真濟 建築風貌 樹欉花草 gah台大類似講， 尤其是 紅瓦 土粉黃ｅ壁牆， ho阮 想起 阮後頭厝 hit落 正身護龍ｅ 五間厝， ma是 紅瓦gah土粉黃ｅ壁牆， 帶著 長長闊闊ｅ 門ginn， 落雨來ｅ時， 幼年ｅ歡笑、 熱天暗時 坐di埕斗 講古ｅ趣味。
日頭 雖然uann-uann ziah會落山， Auguste Rodinｅ雕塑藝品 閣猶ve看，Hoover高塔 ma 猶ve登起， 可是 另赴一場邀約， 時間 已經逼到。 留著後日仔卡來， 假使若無 閣來， 阮ma真珍惜 zit zua“ ho 自由之風 吹落ｅ校園”。
來到Saratoga， 為著一份40冬ｅ同窗情， gah高中同學 Amy會面。
Amy一家伙 dua di Saratoga， 門前有竹， 東方花坩 擺設， 一看diorh知這是 伊ｅ家庭。 Amy cua阮一家伙參觀 伊ｅ後埕， 有 台灣種ｅ 蘭花 枇杷 玉蘭， yin ui 洛杉磯 搬轉來ｅ植物。 人di海外落腳， 思念故鄉 以物寄情。 女主人 為veh節省時間 gah阮講話， 已經di厝內 la一晡久ｅ 煮食， 臨時 閣為著 省洗碗盤， 走去附近 清真東來順 用餐。 接近 土耳其式ｅ 羊肉泡膜美食 以 熟透羊肉 加 白菜冬粉 ham高湯 混合， 來沖軟 用 洗清氣ｅ手 撥開ｅ 熟麵粉pang丸。 特殊ｅ所在 di 享用ｅ人客， 愛家己 分撥 zit粒烘好ｅpang團， 因為di取用當中 先ho你有 添飽ｅ欲望 來增加胃口。
阮兜 hit二個 來自 德州ｅ少年留學生， 親像 食著 山珍海味， 項項 攏真捧場， ho主人 真有面子。
用了暗頓， 天色已經暗淡， 已經超過9點a， 時間 過得真緊， 分手ｅ時刻 diorh閣來a。
為著 匆匆bongbong走一zua， 只要有ga看看leh diorh心安a。
為著 匆匆bongbong走一zua， Amy閣di阮離開 舊金山ｅ 前一暗， 帶果zi 來旅館cue阮。
我知影， 若是edang， 阮edang講 三暝三日， 講天講地， 講gah一飯le。
這ma ho回想起 di十外歲ｅ 青澀時代， 我對 阮後生新婦 講， hit當時， 因為 種種原因， suah來得著 嚴重ｅ胃潰瘍， Amy gah曙光 來厝裡 探看， 了後 yin驚我 胃酸過多， 通常di學校 veh食柑仔ｅ時陣， 攏先beh一van 先試食看mai 有酸無， ziah通ho我食。 這是60年代ｅ代誌， 到90年代 閣第二gai仝款症頭， Amy千里路遙 回台刁工 來看我， 為著按呢， zit回 去舊金山， 無論如何ma愛ga yin大細看看leh， 見一面ma好。 Zit份深情 是 掛意gah分享， 想著好友， 定著是 子女嫁娶ｅ 好日子 來相通報， 阮三劍客 分別 以 循環扣串式， di青少年時期 立著一個 趣味ｅ交陪， 以後成家， 分別做 各人子女ｅ god mother。 真聰明， 當年 用zit款方式 deh維持 zit份 同窗情。
自1988 阮 離開美國 之後， 二十外冬來 攏deh做 母語文ｅ代誌， zit次有機會 重踏故土， 親友 有人 自 遠遠ｅ所在 來會， 豈有無去 臨近探訪 好友ｅ道理。
Zit同窗情份， 以 一杯清水ｅ淡 保守di 心內， 無厚酒ｅ 一時燒烈， 卻是 滴滴 長流水。
花腳行踏di 舊金山 到Saratogaｅ範圍， du好是 包括著 高科技搖籃-- 矽谷。 名聲透四海ｅ Silicon Valley是 涵蓋著 Saratoga ham伊頂頭ｅSan Jose 到北爿San Francisco南灣區。 二禮拜前 阮已經di 號做 矽谷心臟ｅ Sunnyvale城鎮 活動過 僑教台語課程， 博士級鄉親 指著 綠樹林內ｅ 出名 高科技公司 位置 講這是 眾多 大公司 駐營ｅ所在， 可是 行程急促、 任務在身， 實在無緣 溜seh流覽， 只好安排 二禮拜後 做一個 文化參訪。
Stanford大學 位di Palo Alto， 號稱是 矽谷ｅ源頭地 (Birth Place of Silicon Valley)。 原因是 hit當時 身為 工程系主任gah副校長 Frederick Terman di20世紀中期 diorh 積極鼓勵 教師gah研究生 創業， gah社會人群 實用結合， m通 ganna做 一位 小小ｅ 純學術框架內ｅ 學究。 因為 伊ｅ眼光， 建立著 Stanford Research Park來開拓著 光彩閃sihｅ 矽谷科技明珠， hong人奉稱 伊叫做“矽谷之父”。
當今 矽谷 紅紅gah sia-sia叫， 吸引 全世界 上優秀ｅ 科技人才 積聚di zia， 領導環球 科技產業 穩坐 風騷龍頭， 可翻頭看 1939年代， zit位名師 出高徒ｅ故事。 HP 是 由 Frederickｅ二位學生， 一個叫 Bill Hewlett、 另一個叫 Dave Packard 代先di同一個車庫 以538美元 製造出 電子儀器， 這是HP公司ｅ初胚， 因為 當年 師父慷慨 借贊zit筆資金 閣鬥腳手 向銀行借一千， 成就了後， 四十冬後， HP 便以920萬ｅ美金 報答母校 建立 Frederick Terman工程學研究中心。
去羅馬城 人會講 你腳踏ｅ所在 下面diorh是古蹟， 來矽谷 身邊四界 攏是 新世代ｅ基礎， 科技產業 deh改變現代人ｅ 生活生態。
Cupertino、 Fermont、 Palo Alto、 Santa Clara、 Saratoga、 Sunnyvale、 San Jose、 San Mateo 親像一條環帶， 阮diorh幾工 di zit 歸個城鎮 seh 來seh去。 外濟 世代交替 deh展現 時代ｅ脈動， 外濟 英雄好漢 deh實現yinｅ夢想！ 世出將才， 一波一波 若 灣區ｅ海湧， 矽谷 眾英雄 如 Steve Jobs、 Andy Grove & Gordon Moore (Intel 創辦人)、 Larry Page (Google 創辦人)、 Larry Ellison (Oracle甲骨文創辦人)、 Sabeer Bhatia & Jessica Livingston (Hotmail 創辦人)、 陳士駿 (Steve Chen You Tube 創始人) 等等， 後浪sak前浪 已經捲過 當年80年代 永進做學生 di一份獎學金 飼一家人 之下， iau閣 興cih-cih 一月定18份科技雜誌， 每看了 趣味新en 有前瞻性ｅ 新人物、 新發覺、 新產品 總是 代先 對我放送， zit股風尚， 卻di20外冬後， 進入後中年ｅ 時刻， 親像 一港波浪di我ｅ心中滾絞， 往事 一幕一幕 現di目前， zit款 罕得 ho我 以 科技小史 做前提述ｅ 話題， suah由我 講gah lu-lu叫， 這顯然有 隱流數十冬 地下出泉效應。
Amyｅ後生 叫做 Derrick， 4冬半 修完學、 碩士， zitma di 矽谷地區 上班， 一派 少年青春活力， 真有 明日之星ｅ 潛力， ho人歡喜。
來到灣區， m是接近 收入上濟ｅ地盤， 真正ｅ意義 是 外濟英雄好漢 ｅ車拚， 人 流汗用心 經歷過 拚勢冒險ｅ過程， 錢 m是 空思夢想 veh追求ｅ物件， 是 去追求 理想ｅ 成就過程， 了後 名聲gah 財富 due deh 來。 Bill Gates 鎮坐北爿ｅ Seattle m是單純 以 長久ｅ 世界級 大好額人 出名， 是 伊做了 真濟好物件， Steve Jobs 經歷 失敗gah再生， 所有 高品質ｅ創作， 卡是 人類世代ｅ 傑出代表。
自按呢生 矽谷風潮 威振四方， 台灣ｅ 新竹、 南科 到 印度ｅ 科學園區，ma進入 當代世界 科技舞台。
二十一世紀初ｅ 頭十冬， 阮總算 見識著 帶領 世界風潮ｅ盤石， 注滿 一股 熱血奔走、 世代永續ｅ 奮鬥力！ 自由運用 創造、 想像、 發明 具體改變著 現代人ｅ 生活方式。


二. Yosemite 日夜遊

近 舊金山Concord城中ｅ Hilton旅社住宿， 行前以 線上標價 定房， 無網路 無早頓， 所費 可以平民化。
行程計劃 遊覽 Yosemite 國家公園， 由 現代ｅGPS導航， 親像 喪失了 看傳統地圖ｅ 整體感 gah 事先熟背 地圖ｅ必要， 又閣有 導盲狗ｅ 細膩情節， 尤其zitgai 由在 少年ｅ開車 正是 可全心全意 放鬆懶絲 去看 田野美景。
GPS di土地闊茫茫ｅ 美國， 親像 海上ｅ 羅經導航， 效益真大， 比di台灣土地小ｅ作用 閣卡有路用， 過去20外冬前 出外旅遊 所用ｅ地圖 是 大張紙版AAAｅ平面地圖， 時代 是deh向前行。
出了 舊金山 向東偏北行， hit層天賜ｅ 海灣 天然ｅ 冷氣雲傘 退盡， 日光照cior大地， 大片ｅ 原始山坡 開放地區 (open space)， 一粒山 接 一粒山， 山谷 起起落落， 牛、 馬、 羊群 di焦黃ｅ山坪 放牧。 加州ｅ雨季 di 11月到2月ｅ 冬節， 滿山滿谷ｅ 乾草 形成熱天 單調ｅ 焦黃金色 景觀， 有人講 加州ｅ別名 叫“Golen State” 是 由zit款景色來ｅ， 另外是 由 19世紀發現金礦 所來。
過了 全山焦草 di微風中 搖搖擺擺ｅ 輕拽草波， 漸漸有 橡樹 三二點綴， 這gah ui 飛行機頂 美國東西橫度 9次向下觀望ｅ 細綠點， di高空探看 下 親像是 沙漠ｅ山崙， 只是 無明ｅ 隱身 綠迷點。
沿途 接近Lodiｅ外圍， 大片ｅ 農作園區， 青翠茂盛。 草莓、 杏樹、 番麥、 桃樹、 葡萄、 青番仔薑、 橄欖 di日光 炎pah-pah之下， 進行 光合作用， 到暗時 天涼溫爽， zia-ｅ果園 du好 再調適出 yinｅ新陳代謝， ga加州 天賜ｅ福份 盡情發揮。 科技之外， zia是 舊金山gah首都Sacramentoｅ 綠地後花園。
在來， 加州 有一個 hong操心ｅ禁忌， m知什麼時陣 閣來 大地動， 驚罔驚， 若有機會 diorh愛珍惜， zia-ｅ大地風物， 見證著 生存ｅ歡喜。 有一首歌 叫做“Lodi”， 直接引用 zit個聽起來 悅耳有個性ｅ 名稱。
Lodi 是 一個雅氣ｅ 好所在， ziaｅ美酒， di遠遠ｅ路中 已有告示牌 標著品酒ｅ 場地廣告， 阮dizia 補充 一寡物件， 去銀行 辦一寡代誌。 紫色飽水ｅ 葡萄果 是 小城ｅ鎮徽， dizia春天gah夏天 攏會舉辦 好酒 嘉年華會， 休閒農場 ma提供 親近 大自然 露營ｅ場所。
氣候 是 一個優良ｅ 吸引因素， 天賜ｅ 幸福感， 包滿 zit個 新興郊區， Lodi 親像 是 阮veh 進入 Yosemite主題曲ｅ 前奏， 為阮 ia落美滿ｅ 導引氣氛。
由 州道120 Big Oak Flat路徑 入來Yosemite國家公園。 遊客中心 特別做 火災危害公告、 m通飼 野生動物 ho yin保持 野外求生本能、 回收環保概念 攏做伙dizia宣揚。
維持 一個 國家公園，是 經由 真濟經驗 來維護， 火災 是 森林 上大ｅ威脅 之一， 焦躁ｅ熱天、 油油ｅ杉木、 加上 雷公sih-na， 一點點仔ｅ 火星， 總有機率 造成大火， 山谷中 有幾個所在 立牌紀念 樹林災厄 殉職ｅ 男女 工作人員， 想像yin di 臨危受命ｅ 勤苦gah 犧牲， 山神ma慈悲。
直文文ｅ 杉木 佔著 樹林ｅ大宗， 林相範圍 由 2，000到13，000英英呎， ma 隨著高度， 公園中心 勘察出 真濟 步輪ｅ 自然小路， 在你 選擇行踏， 阮ganna 爬到7，000英呎ｅ坡度。
Di遊客中心附近， 山谷中ｅ 平地， 印地安族群 世居ｅ Ahwahnee， 有溪可掠魚、 有野味 可拍獵、 有橡果 可磨 營養粉， 水沖 悠遊奔走 di幾千幾萬年來ｅ 山林間。 天然美景 di 1864年ho Lincoln總統簽下 州立公園ｅ 保護條例， 1890年再晉升做 國家公園。
交一gai 入口費， 可保持 一禮拜ｅ 進出， 按呢ｅ體貼 意思是 一工無人觀賞 會十全ｅ 歇睏。 歇睏 有真濟種意思， 決定用 什麼角度 來看山河、 追溯 先民歷史、 採集 花草生態、 攀登岩石、 浸透di樹林步道、 等待 鹿熊羊ｅ 出現、 詳細觀察 鷹鳥ｅ飛姿、 di溪中消悶、 看暗時ｅ月光、 mai管熊會出現 好膽閣去moh 一欉紅木杉 細膩聽取 木身體內ｅ 樹汁流液 聲嗽， 啊！ 你會愛戀 zit片 離開 喧嘩塵世ｅ 谷地。
夕陽ｅ輝光， 反射 di清明ｅ溪水， 清涼ｅ溪水 流過阮ｅ手心， ui溪底ｅ落照， 選取 山gah水 緊合ｅ鏡頭， 上美滿ｅ 一刻。
向暗時分， 花崗岩石 光pu光pu 禿禿ｅ山頭， 切割ｅ紋路 外形無失， 親像di你面前， 又閣可觀 不可親近。 阮計劃veh出去 夜宿南爿ｅFresno城鎮， 可是路deh 翻舖打馬膠， 單方通車， 行行停停， 路 又閣 彎彎曲曲， 坐車ｅ人， 難免暈車。
擋擋luluｅ行程， 竟然 天ma 全部暗落來， 原野ｅ夜空， 滿天界ｅ星 散發出 無數ｅ鑽石光， 一世人 ma mvat du過 zit款 算ve了、 看ve盡ｅ億數天河。 北斗七星座 明顯可認， 若如牛乳ｅ 銀河長橋 明朗清析 牛郎織女 各守一頭， 夏秋星座 diveh交互出現， 身邊ｅ 天文少年家 講：“滿天際ｅ星， 濟gah 難以辨認！”過一下仔， 伊ma講 某幾個 星座 大約di 什麼方位、 夏季大三角， 可惜 落崎 再引起 耳孔ｅ鼓動， 加上 個外月來 連續 飛機起落ｅ 紛擾， 耳孔鬼 閣siaksiak叫， 我 仝款霧sasa， mgorh身處 寂靜山谷， 心是平和。
天若無邊， 星ma無限， 深烏ｅ山谷， 反映 自然天界， 人類 有電以後， 喪失了 體驗gah大自然ｅ 和諧寧靜， 身處 寂靜山谷， 滋潤心胸。
天幕 閣有 一齣好戲 deh開演， 俺人初三 月眉掛一邊， 金星走來 月娘ｅ下方， gah月娘 形成 一條垂直線， 曠闊ｅ山谷， 形成 自然界ｅ 天體陪襯，用普通 hip相機 diorh可hip著 奇景， 天地無限， 開導心境。
到了Oakhurst， 趕著 一間Pizza店 最後ｅ 營業時間， 三人胃口 算真好， 一人 ve勘得 旅途勞苦， 身魂難穩， 佳哉 夜景、 親情體貼 siann人 心歡喜。
勞累 想veh歇睏 閣神經質， 一路 體力鬆散 目睭瞌瞌 可是猶有 知覺ｅ奮鬥力， 這應該是 潛意識 隨時閣veh 探看 有什麼 奇景， veh 出zitzua 遠門， zit世人veh 重複ｅ機緣 無外濟。 Diorh按呢 模模糊糊 來到Fresno過暝。
早起， 日頭直落 地面， 青籃透光， 一定是 好天氣。 阮閣入去 國家公園。 沿路隨意 行行停停 路過Millerton Lake， 這是一個 湖gah水霸， 深紫藍ｅ湖水， 滿溢 四箍笠仔 攏是 焦草枝ｅ 山頭當中， 凸顯 沈穩氣質。
又閣 路經Oakhurst。 進入 國家公園， 今仔日veh 來親近 冰河點。 中途 若看著 什麼 特殊ｅ景物， 隨興停腳。 路邊ｅ老大 diorh算是 紅杉木， 阮四個大人 展手ga圍起來 ma無法度 接著 完整ｅ圓周， 期待來日 再等添加 新生代 可有機會 再來遊賞。
Zit位ｅ 杉木群 只是di路邊 隨機出現， 四五欉ｅ聚落， 方便遊客 做選擇，其實 管理處 真巧， dizia有 室外 自然落地 便所， 顯然是 指出 zia有景點可觀。 出世有名ｅ 大型紅杉木林 如Mariposa Grove 已經 di無外遠ｅ所在。 紅杉木ｅ 樹箍身 是 烏do紅ｅ樹皮， 粗厚樹枝 向四邊伸出， 勇壯ｅ枝身 寄佩著 粉金、 青黃、 淺綠ｅ 地衣， ho人聯想著 “Load of the Ring” 影片中ｅ 樹人威力， 樹界有yinｅ祕密， 回歸自然， 來感受 宇宙運作ｅ 韻律， ziah是 佔 地球 上大宗ｅ 人類， 需要 積極學習ｅ 大地教室。
幾千年來， zia-ｅ大木 總是 穩居dizia， 經過 生命ｅ洗禮 遙想先哲Lincolnｅ腳跡， 咱 必須 愛崇敬， zit份 開拓 公園管理概念ｅ 重要性。 因為按呢， 必要ｅ堅持， 一如 加州ｅ 眾多 開放地皮 (open space)， 一望 無邊際ｅ 山谷， 保留yin 比 開發做 商業價值ｅ 房厝gah 買場 來得重視。
一片杉木林ｅ 稀疏樹蔭， 日燒暗涼 致蔭著 身邊ｅ 野花、 野草， zit個時陣 是 公園內 一年一度ｅ 花開盛事。 三五遊客 專文deh hip相攝影 留存記錄， 我卻是 ga繽紛色水 約略kngdi頭殼內， zit份印象 卻是 真驚人， 日後di Yosemite網路植物誌， 知影 zia-ｅ花草 總共有1450種以上， 追蹤著 平常時 淡薄仔熟識ｅ 月見草 (evening primrose)、 金鳳花 (butter cup)、 紫菀 (aster)， 其他如 流星花 (shooting stars)、 gah 以 地區特色 號名ｅMariposa 百合花， 家己 刁工趁 zit個 書寫機緣 自我 養成教育 一下， 我知影 家己 有通過 zit個小小ｅ 考驗， zia-ｅ 每一件 小代誌， 沈di記憶之海 心心相印。
熊ｅ圖騰， di加州 無所不在 無所不止， 你無可能 忽視yin。 Yosemite是 加州熊ｅ 大本營， ma有人講 是 來自Miwok族意ｅ 灰熊 或 某人是殺手 ｅ 意思。 熊 是 加州ｅ 大型動物， 伊 應代表 力量， 自然ｅ 原生勢力， 雄渾ｅ 生命力， ho野生ｅ 還原野地， m是 馴化絕滅。 這是 深沈ｅ 硬頸精神。 人類 智覺 家己ｅ極限， 自古以來 diorh有 動物崇拜ｅ 傾向， 敬畏天地ｅ 教示， ui 尊重生界 開始。
山石 di公園內 代表地球 扮演著 地質學ｅ 生生世世， 冰河點 (Glacier Point) 有獨妙ｅ 視野觀賞台， Yosemite 四箍笠仔ｅ 景致， 盡收di眼內， 半圓山 (Half Dome)、 Vernal水沖、 Nevada水沖、 高山絕崖， 賞賜眼福。 Dizia 可想像 冰霜白粉 如何di寒冬造景， 可想像 日照、 日落ｅ 奇景變幻 驚動人心， 暗夜ｅ天星 按怎接近 人ｅ 空思夢想， di 山谷中 奔速跳衝ｅ 哮叫水聲。 甚至 想起 月光暝， 傳說中ｅ 狼人， 如何變回 狼體， diorh di 冷雪清光ｅ 山頭， 演一齣 飛岩走壁ｅ 天下絕技。
有一款鳥， 若 藍天ｅ使者、 靛海ｅ化身、 藍寶石ｅ 活動雕品， 初見面 掠準yin 是 啄木鳥， 原來是 Steller’s Jay。 伊有 天生表演ｅ 本事， 看著人群 若蚼蟻， mdann ve驚， 閣會表演， 看起來 真慣習 di山林gah遊客 中， 自由來回， 伊會代先 引起 你ｅ注目， 再選擇 飛歇枝頭 用 無仝款ｅ 姿態， 在你 取鏡頭。
Di冰河點， 阮可聽著 來自 無仝ｅ族語， 台語、 日語、 西班牙語、 華語、 英語……。 當年 先行者 John Muir、 Galen Clark 探險gah固守ｅ 勇氣， 帶來 後世 無國界ｅ 田野見習， 一直 延續、 延續……。
三度再來到Oakhurst， 因為 di Fresno dua 仝款ｅ旅宿。 天色du veh暗，Oakhurst 早夜ｅ餐廳 有Jazz樂隊 deh演奏， 六人組ｅ 樂隊gah歌手， 弄出來 夏天ｅ熱情， 親像deh 歌頌 平和ｅ日子， 隨時尋樂。 熱天ｅ黃昏 是 一年四季 上好ｅ時間， 大地ｅ子民 歡唱， di戶外跳躍， 為 冬天ｅ陰寒 儲備一寡 耐冬ｅ 精神脂肪。 微風 送來爽快 抹面， 引回qin-a時代 暗頭仔di故鄉ｅ 三角湧 看 走街仔仙ｅ 親切感受。
日落ziah了， 天邊ｅ金星 出來 拍招呼， 金星 總是 due阮去 天邊海角， di 24點鐘後ｅ月gah 金星， 位置 已經變a， 昨暗ｅ 頂下直線， 遷徙做 左右頂下， 星月相伴， 勾起 小夜曲 起浮輕響， “ 快樂幻影 像金色ｅ夢， 常駐 我心肝， 難忘 過去 舊情綿綿。 我 仝款看見， 你hit對 迷人ｅ目睭 ” 一再迴盪。
寧靜ｅ山谷、 寧靜ｅ路途， 一路 暗遐想， 一時 燈火通明， 是 Fresnoｅ呼叫。
Fresno 是 繁華ｅ都市，人口 五十萬人， 排名加州ｅ 第五大都市， 南有Los Angeles 北有San Francisco gah 首都Scramento， 隱居di 中加州， 親像 一塊 世外天地。
Fresno gah Lodi 仝款有 一條招牌歌 直接 採用地名 做歌名 “Walk into Fresno”， 運用歌曲 來凸顯家己 是 自我推銷 真好ｅ形式， 展現著 自信， zit類ｅ 造勢活動， di阮故鄉 大社 小所在 近來ma以 棗仔、 芭仔、 牛乳 造鎮。 Fresno 是 西班牙語 白楊樹 (white ash tree)， 市徽diorh是 白楊樹葉仔，城中攏有yinｅ身影， 親像 阮高雄縣 以紅papaｅ 吊燈仔花 做縣花。
Fresno 做為 Yosemiteｅ外圍城鎮， gah國家公園 互補著 城鄉、 綠野 功能。 做為 四通八達ｅ 補給驛站， ma有 州立ｅ大學、 機場。
離開Frenso 表示 結束 Yosemite假期， 阮再向 海景溜seh。

三. 看海
由 Frenso途經San Luis水庫、 Gilroy城， ui Monterey海岸北爿 回轉去 舊金山， 準備 逼近 太平洋海景。 沿路 枯焦黃金ｅ 草枝景觀 中， 清藍水道 不時可見， 綠色ｅ農田 出現ｅ頻率 愈來愈濟。
地中海氣候 影響 一大片ｅ 加州地區， 雖然面臨 大大ｅ 海洋， mgorh he m是 人類ｅziann水， 卻有 一片一片ｅ菜園、 水果園， 農地 有機器deh採收， 高速公路中 大卡車 載過 一櫃一櫃 無籃仔、 盒仔包裝ｅ 蒜頭、 青椒、 紅柑仔蜜。
水 是 生命ｅ大部， 人、 動物、 植物 攏需要。 San Luis水庫ｅ 指標 提醒著 若沙漠中ｅ 綠洲之寶 gah 凸顯 di山坡頂ｅ 灰白 風力發電柱， 攏有仝款 顯目ｅ特點。 抽水、 運水、 沃水 需要電， 這是 整體背後ｅ 關聯性， 民生、 工業、 農業用水 分配計劃 克服了 欠水ｅ危機， 優良 配水制度gah節水技術 ma 創造了 農業奇蹟。
全州 愈南 雨量愈少， 80%ｅ水源 是 北水南引， 由 貫通北南ｅ 中央水道， 鋪排 用水系統。 頂世紀尾 加州 發生嚴重ｅ 洘旱， 避免 驚惶悲劇 重演， 親像San Luis水庫ｅ 相關功能， 變做 加州人 集體ｅ 智慧資產， 大片ｅ荒野山谷， m是 在在處處 deh ga 世世代代ｅ 囝孫講， 咱ｅ 生存環境 實際上 diorh是按呢， 尤其 加州ｅ人口數 是 全國第一， 如何 生養繁殖 保持品質， 生生世世 diorh愛 ui現世節約 算計。
Gilroy以 出產蒜頭 出名， 每一冬ｅ 蒜頭慶祝歡會， 代表著 收成ｅ豐美， ma 代表著 zit片 陽光遍在ｅ 城鄉， 賦以蒜頭ｅ 創意美食， 這定著 聯代著 整體ｅ 農業供水 成果 gah 做穡人ｅ血汗。
路中 有真濟 水果擔， 表明 是 本地ｅ 櫻桃、 草莓、 瓜果、 桃仔李仔。阮ma來捧場 樹頭鮮。
人文風物 攏是 大數量ｅ 豐盛， 農產品 是 大宗、 大派頭ｅ 業界頭旗， 由 Montercy Bay、 延Santa Cruz 到 舊金山ｅ 海岸線， 海上運動ｅ 勝地， 不計其數， Waddell Beach 是 其中之一。 Zia 有 一片沙灘， 有 二尾美人魚 dihia曝日， 有寡人 deh sng水， 有寡人 deh衝海湧， 有寡人 deh駛帆船。 日頭 赤炎炎， mgorh 海風 ma假若 冷凍庫 吹來冷利。 海鳥 攏是 上忠實ｅ伴， 為 遼闊ｅ海洋 gaga叫 伴奏著 海湧推移、 為 海洋 翻飛出 美麗ｅ流線 增加 海景風釆。
風騷到Pigeon Point， 規模 gah Waddell Beach無仝風貌。 一百三十八冬前， dizia 啟用zit座 海角燈塔， 為 霧中迷航ｅ 船 指點迷津。 雖罔 zit個燈塔 已經di 2001年 完成 階段性ｅ任務 封關， mgorh每冬di 11月中附近， 攏會cue一工 為1872年11月15 做 週年紀念活動， 點著燈火， 新聞記者 愛hip相ｅ高手， 會來 取鏡頭。 講著zit座燈塔， 是 世界出名ｅ 燈火 之一， 燈塔 是 海上ｅ媽祖， ho歸鄉ｅ人， 近鄉心 有倚靠， 霧色中ｅ 通明燈火， 閣有 浪漫氣氛， 討海人 探險ｅ 英雄氣概， 攏混合di 海上航站ｅ 滾絞心情。
Zia有 涼冷ｅ海風， 海鳥 自由活動， 岩石 變做鳥厝， 海湧 拍著岩岸， 暗礁 di湧腳 退入海中 ziah浮現， 危險暗藏， 燈塔照明 vedang無。
燈塔下 有 國際 青年旅館 (youth hostel)， 白色ｅ壁， 藍色ｅ邊， gah白燈塔、 藍天青洋， 相配合。
有 土肉ｅ所在， 花草掠著 日頭 趕緊開花， 鮮艷 展風神， 番鼠 (土撥鼠) ma出來拾食。 來zia度假， 看早日、 觀暗霞、 聽濤音， 海角陸面 小巧玲瓏， 海ｅ呼吸， 船ｅ來往， 鳥ｅ跳躍， 風ｅ溫度， 早暗四季 變化、 天地ｅ節奏， 當入 詩人、 畫家、 作曲家 孕育靈感ｅ 章篇。
踏到Half Moon Bay， 連排ｅ 海邊別墅， 有淡薄仔 Victoria風格， 家家戶戶 繁花盛開， 紅牆薇、 繡球花 無稀奇， 稀奇ｅ 是 叫 忍冬ｅ 金銀花， ma有 銀杏樹。
蘆葦 di水性造園 吐出 暗紅蠟條， 水鳥點點。
臨海岸線， 一片 私人地， 有Ritz Carton豪華飯店， 沿海邊 近鄰 攏是goluh球場， 球場邊 是 散步道 兼 拍小白球ｅ 細台 人坐車道。 翁婿 拍小白球 交際 博感情， 牽手子女 di飯店ｅ 組房洋台， 享受 蠟條光宴， 美酒料理 有另類ｅ 幸福情景， 因為 海風 戶外 無適合 坐久， 瓦斯供能ｅ 仿戶外 火碳堆 造形， 提供溫度， ma 有人歸氣 捲毯仔 lim冰飲。
遊客 來來往往， 嘴角半彎月 互相 拍招呼。
飯店 有 婚禮排場， 外口ｅ小亭 有人deh演練 幸福進行曲， di半月灣 結連理， 意味著 雙人 各一半 成整體， 天作之合。
海岸線 連綿無限， 海平面 更加遙遠， 太平洋ｅ hit頭， 連接 咱故鄉 台灣， 生命ｅ根頭， 隔工 將veh回轉。 海洋若大， 故鄉情 ma深， 假若海湧拍岸， 貼心肝。
一家人diorh 若行若停， 若食若sng， 用車換來 遠足樂趣， 水、 白桃、 餅、 鱈魚香絲， 輪流分享， 搭配 放鬆心情， 來到San Mateo停腳。


四. 舊金山市心 逗鬧熱

Diorh di阮青澀ｅ 青少年時， “若到舊金山 m通ve記得di頭鬃 插一蕊花……”zit條歌 陪阮度過 濕hipｅ 歇熱時段， m知是zit條歌 已經消除 我苦悶ｅ 升高中ｅ挫折， 抑是 深沈 di奮鬥意志， di成長ｅ 過程中， ia無明顯ｅ 青春反抗期。 歲月流金， 幾十個春秋， 親像 一個 平凡守本份ｅ 作穡人， 恬恬 保守著 人生園地ｅ 種作。
四十幾冬後， 機緣成熟 腳踏 zit座城市， “若到舊金山 m通ve記得di頭鬃 插一蕊花……” 熱情重溫。
來到 漁人碼頭， 你愛 親目睭掃著 ziah會信dau4 什麼叫做 遊客相疊 逗鬧熱， ve輸 咱三月痟媽祖ｅ 盛況。
人潮 若蚼蟻出siuｅ點點 人山人海， 車水流席， 玎璫仔車、 遊覽車、 自輪車、 男男女女 老老幼幼， 成群結隊ｅ 阿公阿媽旅行團、 三五做伙ｅ 少年家 自助伴， 輸人m輸陣， 鬧熱滾滾。 人潮若錢水， 一波一波， dizia做乞食， 一工若有 千份之一ｅ人 ho伊十sen， 我想， 這ma是 一個 自由業。 Zia-ｅ趁食人， 已經是 進化過ｅ人， 大約攏是 服務業， 住ｅ、穿ｅ、 食ｅ、 用ｅ、 通行ｅ、 紀念品， 大細項， 包括 街頭藝人 扮演ｅ齣頭， 人物造形、雜耍、 南美Andes山脈 傳統樂器 演奏， 電子琴， 甚至 天主教ｅ 傳教隊 唱歌遊行， 三到九流 展示 多元文化。
停車場 出入口 分送地圖， 列出市區 主要景點， 商業廣告 以 pah折優待券， 贈送項目 滿滿是。 這gah紐約ｅFlushing區 仝款， 真濟人di 街頭捷運站 分送 傳單， 什麼免費 等等。
舊金山 漁人碼頭， 是 灣區內ｅ 一粒明珠。 盛夏天地， 海洋奇妙ｅ 調解作用 隔開 用sakｅ力， 侵入 你ｅ肌膚， 向你問好， 親像 zi-zuh白目ｅ天使， 叫醒 你身上 每一吋感覺， 這是海上 向人呼叫ｅ 禮儀， 有 陣行陣停 催束ｅ 掠振作用。
海港博物館 代表 過去 海上霸主 運送功能， 繁華世代 交互輪替。 如今 39號碼頭 經營出來 名點ｅ 觀光特色， 海產 人間美味， 別有 傳統美食ｅ 歷史氣味， 看你 所愛ｅ方式 帶deh走 或是 坐落來 品味佳肴， 擔頭點心、 高級餐廳 由在你算。
日本人 流行 鐵板燒， 當場煮ho你看， zia-ｅ美食專家 ma ve凍霜 驚你ga學去， 這以Boudin餐飲店 上具有 代表性， 店內 做pang師傅 隔著 透明玻璃， 看廚師 如何用 刻刀畫出 圖形紋路、 用小maikuh gah顧客、 觀眾對答， 按呢ma 創造出 生理賣點。
Boudin烘pang店餐飲， di碼頭邊仔， di ziah貴ｅ地盤 營業面積 親像 一間戲園 分做 頂下樓 gah 外口 幾十塊桌ｅ 坐位。 Zit間特有ｅ 若碗公面ｅ 微酸麵包， 中央挖空 貯入 各種厚湯， 海鮮奶油、 柑仔蜜， pang是特大ｅ納數gah量， 上愛以 各種動物ｅ 造形 烘出 人人感覺趣味ｅ 麥食變化， 這gah園藝 愛ga樹欉 鉸出 動物形 有類似ｅ 角色對換。 土司 挾 肉片肉排 蔬菜水果， 涼菜沙拉 保存酵素ｅ 食法， 省力 閣保持營養。 來碼頭 前一暗， 阮已經 diSan Mateoｅ一間Mall 有 Boudin分店， 享用過 zit項美味， hit種pang皮ｅ韌， 又閣牽動 齒岸gah嘴pue。
堆做小山ｅ 蟹蟳 排疊di 玻璃廚內， ho你看顯顯， 炸鮮魚過程 ma攏透明。 細漢時， 媽媽 煮ｅ蟳仔， 其實diorh是 白滾水 去炊ｅniania， 主要是 新鮮甜味， 天生麗質， 無什麼撇步，這應該是 品質保證， 閣講 巧新婦 ma難成 無米煮飯ｅ 前提下， yin有好食材 確實m驚你 di腳脊後 ga抄去leh。
冬溫夏涼， 遊客直直來， 柑紅蟹蟳 變做 漁人碼頭ｅkangbang， 為 霧都 加添顏色， 這是地標。
39號碼頭 經營成功， 伊 有 真濟 配套方案， 觀光企業 結合文化， 地利 人文 因素 加上 腹地 支應條件 計劃ｅ眼光， 造就 舊金山 di 1906年大地動 大損失ｅ 重建， 行向重生。 大手筆ｅ 枋架木板， 延伸出 海岸。
碼頭內部 紀念品、珠寶服裝、 chokolato、 鮮水果、 餐廳、 小食點心、 愛什麼 有什麼， 有 轉seh騎馬盤 為兒童設想、 ma有 露天表演 舞台， 輪流上台 表演吞火、 講笑詼、 變魔術 ga遊客 吸著腳步， 做伙同樂， 台上台下 隨著 一人表演，主導劇情 點名觀眾 做伙鬧熱， 一堆人 賞伊小費， 事後 可觀察著 表演人 精巧deh 操作著 觀眾ｅ心理。
港口外部 近岸邊 diorh有海獅 歇deh曝日， 岸邊 有 真濟 遊輪、 小遊艇， 遠遠ｅ 金門大橋 di海上 佩帶 一條珠鍊， 偏偏diorh di無外遠ｅ 正前方 有二個島， 一個 關犯人ｅ 惡魔島 (Alctraz)、 gah一個 天使島。 二個離島 攏有 黑暗歷史 過往， 看過去， 增加城市ｅ 講古話題。
情人 親族伴侶 倚di碼頭 hip相， 以 太平洋ｅ 壯美 做見證、做 共同記憶ｅ 背景， 深情意愛 加一味。
今仔日 中晝頓 應該有 別種滋味， 海洋ｅ滋味， 歡暢ｅ風味。
阮轉向 日本城 veh去 買日本冊， 附近看著 Tully咖啡， 停腳落來 飯後一杯 芬芳熱飲， 親近 舊金山 城市 歐洲休閒風味。
品賞咖啡， 仝款回味 一路看晃ｅ Victoria小築， 家家戶戶， 門庭深鎖， 第一樓 攏是 英式通稱ｅ 車庫地下室， 第二樓 是 車庫頂面 凸窗式ｅ 落地窗， 罕罕有二、 三間 dior開窗仔布， 老人 坐di 搖椅 看報紙， 安靜ｅ午後， 幾班公車 擋車聲 劃過 起起落落ｅ 山坡街路。
來到日本社區， du好是 辦 日本慶典ｅ 市集 ( Nihonmachi Street Fair)， 外圍通路 暫時封守 汽車通行， 專為 行踏漫步 停腳者 文化seh街。 路邊廣場 搭起來舞台， 排好坐椅， 傳統ｅ太鼓 透過 日裔 少年鼓手 鼓聲翻天， 和平塔邊仔 閣有 現代五六人Jazz樂團， 閣奏閣唱， 和風 美食、 手藝品 沿路 排過去。
日本社區， 聽講 過去時 di美國 有 五十個分佈， 目前ganna cun三個，阮di個外月ｅ 十個北美 主要城市 巡迴， 每一站 台僑 攏反應講 台語教會、 台語社團 數量 攏deh萎縮ｅ 感歎， 因素真濟， 後接無人 卡是憂心。
紀伊國屋冊店 是 zitzua 來採買ｅ目的， 聽講zia是 全美 上大間ｅ 日本冊店。 日本 現代化 了後， 閱讀ｅ人口 增加， 真濟 出版社 發行文庫， 以 冊皮封面 紙本體積 裝訂， 冊店 為讀者 標示各種 文庫名號 掛牌。 一寡華麗ｅ 雜誌冊皮 ma gah 台灣冊店 銷售ｅ封面 仝款， 以 美麗古錐ｅ 淑女、 西施、 辣妹 做招牌， 不管是 資訊 或是 時尚 月刊， 總是 十花五色， 卡特殊ｅ是有包裝ｅ雜誌 所附送ｅ 禮品、 小用品， 為 少女姊、 少年兄 做體貼ｅ服務， 有一寡 並m是 hiah熱愛 雜誌本身， 是 附贈ｅ 細項物件 征服 心智上 小小ｅ迷想。
日本町 是 典型ｅ 日本市場， di物質上， 食品、 日用品、 禮品 應 為思鄉ｅ僑胞 提供需要， di精神上 接合 母國ｅ 過去gah 未來， 台灣ｅ 西門町， 是 哈日族ｅ 一個 小縮影 。
Seh翻頭到 藝術宮 (The Palace of Fine Art)， 這是 舊金山 veh紀念發現 太平洋 gah Panama運河落成 di1915年初春 所開幕ｅ Panama Pacific萬國博覽會 來起造。 建築本身 學仿 羅馬廢城， 景觀ｅ 理念意義， 有 1906年 當地大地動， 加上 火燒慘狀， 親像 古羅馬 消滅廢城ｅ 天災地變， ui 悲傷當中， 鼓舞人心 重見光明 。 宮前水池 天鵝、 水鴨、 海鳥 仙心遊歇， 一對一對 新婚新人 坐著 租來ｅ長禮車， 來zia留下 美好ｅ畫。
藝術宮 週邊ｅ房厝， 小巧有個性， 門廊 色彩各自 有變化， 流線型ｅ 室外階梯 點綴著 代先入眼ｅ 入門 gah路面平guanｅ 車庫。 按呢ｅ 建築風格， 無像 巴黎市區hiaｅ 一棟一棟 長長guanguan 黏做伙， 初看 真有氣派， 可是 外表色水 攏卡單調。 Victoria建築 sui di具有 高尚優雅 親切秀麗ｅ 幼路， 無像 王宮hit款豪華 無土味、 定著無 教堂hit款 嚴肅。
隨興 閣veh去Golden Gate 州公園ｅ時， Alamo 區域ｅ 指標 閣出現幾回， 德州m是 有一個 Alamo戰士紀念碑 gah zia-ｅAlamo 有什麼關係 啊？ 原來是 Alamo區 有六座 典型ｅ Victoria 仕女彩繪 房舍， 人稱 六姊妺， zit六棟厝 外表生做 仝款仔仝款， 親像 一家人 只是 穿無仝款ｅ 服裝。 “Alamo獨立ｅ戰士” 是 ui詩人陳明仁 台語詩 讀來ｅ 印象， 一柔一剛 二項 無仝款ｅ 代誌。
來到Golden Gate 州公園 已經 下晡七點， 日頭 猶未落山， zia 是 一個植物園， du好deh展出 會掠mop蟲類ｅ 植物， 捕蠅草 是 宣傳布旗 頂面ｅ主角， 因為 已經關館， 只好 探頭去看 透明ｅ 綠色花房。 Zit目nih仔ｅ 觀看， 開啟阮 對 食蟲植物ｅ 認識， ga家己 上了 寶貴ｅ一課。 天生一物， 必有道理， 動物食肉 ma食草， 植物食水、 食日食肥 ma食肉。 而且 一切 攏愛遵守 適當原則， 比如 捕蠅草 只食鮮 m食臭、 經過 刺激感覺 偵察判斷， 有機制性ｅ 時間運作， 適當ｅ撙節， 卡會有 相對ｅ 生存效益， 捕蟲夾齒ｅ 長度大細、 消化腺體 開合天成， 只要 有夠diorh好！
箭飛ｅ行程， 緊中有慢， 前後有序。 Zit步veh行 金門大橋。
Veh去ｅ方向 通行、 對面ｅ車道 可是一路塞， 單向收費 是 原因之一。 霧色gah初夜 漸漸交織， 過橋 是 一個 景色觀賞點 (Vista Point)。 濟濟人 積聚dizia 搶鏡頭， 路點ｅ雙爿， 各有千秋， 東西南北 三面有海 一面有地， 橋 是 連接ｅ通道， 四季日日 十二時辰 攏是 看晃ｅ山水， 展盡 三千大千世界。
景觀點停一下a， 總是感受 輸人m輸陣ｅ 鬧熱， 路過 Sausalito小鎮， 看著昨暗 溜過去ｅ In-N-Out Burger 店， ga車kau翻頭， 非去養嘴 不可。
In-N-Out成做 美西出名ｅ 速食店， 製作ｅ過程 其實m是 hiah快速， 因為 物件 攏是現做ｅ m是 冷凍ｅ， 味芳柔軟 有汁， 排隊ｅ人 真濟， 食品 流動性大， 口傳品牌 實有特色， 所以 生理 愈做愈大， 這是 馬太效應 (Matthew Effect) 另一個顯示。
四邊 燈火通明， Berkeley大學 實在需要 去看一下， 按呢卡甘願。 暗時認路 卡食力， 可是 zia是 一塊 學術吸石、 自由風雲 起步ｅ所在， ma是 接近 社區住民ｅ 都會型大學。 有名氣ｅ 正式校門-- Sather Gate 是 幼秀ｅ 鐵線條造形， 無什麼門限， 其他ｅ邊門 看起來 diorh是 通道點， 更加 無明顯ｅ 內外隔界。 透過燈光， 校區 四箍笠仔ｅ 街路， 安穩寧靜， 大學城 du好deh放暑假， 頂世紀 滾絞ｅHippies文化， 前衛多元ｅ 匯流， 親像 zit間大學ｅ 拉丁文校訓 -- Fiat Lux， 意思是 Let There Be Light， ho hia有光。
入夜ｅ 舊金山， 貴氣淡雅， 車行 是 慢板搖滾樂， 燈光中ｅ 城邑聚落 gah 日時所見ｅ 莊園房舍， 構成 市民文化ｅ 城市圖畫， 所踏ｅ所在， 地名攏是 當年 西班牙建城ｅ 歷史氣氛， di傳統過往 人文背景 之下， 現代化 進行gah put-put跳。
雖然 將近 暗時十點， 過收費站 ma是仝款 deh 塞車， 預算十點veh 到機場 慢了一刻。
到了 還車場， 租車公司 職員 手以 讀條碼機， bi一聲， 所有ｅ手續 攏完成。
接坐 去機場ｅ 電聯車， 人數 無過二字數， 戶外 一陣一陣 冷利ｅ低溫， 先去 代先起飛ｅ 國內櫃台 ho後生新婦 辦登機， m甘分手 閣互相 攬攬ｅ， 我ga心 暫時 放di舊金山， 我ga夏季ｅ愛 留di舊金山， 轉身行向 國際登機櫃台， 過暝、 透早 將會到 溫暖ｅ故鄉。

Ui《枕草子》、 《三姐妹看世界》 到 《福爾摩斯台文一OO一譯系列》
陳怡蒨

Di zit學期， 老師ho阮讀真濟 台語讀本gah冊， ui《枕草子》、 《三姐妹看世界》 到 《福爾摩斯台文一OO一譯系列》甚至是 後來教得《地獄變》， 逐本攏足好看， 對我來講ma gai心適。 我甲意《枕草子》內底， 日本女性 清少納言 記錄hit當時 宮中 生活gah 社會動態、 人、 事、 物、 風景、 人文等等， ga日本hit當時ｅ代誌 用隨筆方式 寫落來， 留ho後世ｅ人懷念， ma edang ho咱了解 當時ｅ歷史樣貌； 讀了 《三姐妹看世界》， 透過 張春凰老師yin三姐妹 細膩、 生動ｅ 文字下， 講diorh逐個國家趣味ｅ代誌， 好參像雲遊了 三大洲；《福爾摩斯台文一OO一譯系列》 實在是 有夠趣味， 看福爾摩斯gah華生辦案， 精彩刺激， ho人一看 gorh想veh再看！ 老師除了讀本以外， ma搭配 福爾摩斯ｅ電影， ho阮gorh卡理解 文本內容， 足讚！《地獄變》 是一篇 ho我感覺驚惶ｅ小說， 之前雖然有看過 芥川龍之介ｅ作品 《羅生門》， 但是zit遍 讀伊ｅ《地獄變》 有無仝款感受， 一款ga-ling-sun暗暗竄出來， 續想veh看落去， 芥川龍之介ｅ文字 實在真有迷力！ 若是 愛我選一本 我上甲意ｅ 冊ia是篇章， 我一定會選《三姐妹看世界》！
是安怎 我會喜歡《三姐妹看世界》leh？ 本底我diorh有一個 出國ｅ夢想，zit本冊滿足了 我想veh出國ｅ幻想， 先用冊本 行過一遍世界， ho我ｅ夢想更加 釘根深固。 Due著zit本冊， 我去過巴黎， 坐di船頂， 看著塞納河[La Senie River]兩爿， 行過 一座gorh一座ｅ橋， 聽過 一段又一段ｅ故事， ma去有《鐘樓怪人》ｅ巴黎聖母院、 去市郊看風景， 透過文字 我gana身歷其境， ma加了ve少 人文氣息， 真是快樂！ M na安呢， 我ma due著老師ｅ姊妺 去厄瓜多爾[Ecuador] ， 一座受著保護ｅ 自然島嶼-- Galapagos， 聽老師講， 入去Galapagos ve使帶食物， ma vedang遺留排泄物， ui zia， 咱esai 看著yinｅ政府 對 環境ｅ保護 gah 維持 自然原始生態ｅ用心， 反觀咱ｅ政府， m na無veh保存台灣美麗， gorh想空想縫 veh開發台灣ｅ淨土—東部地區， 誠是了然，應該愛學習 別人ｅ長處， 來增強 咱ｅ家園 才是真正 愛這片土地。
眼一nih， 一個學期又gorh過去loh， 一學年ｅ台語課 也得veh畫下句點，想起一開始 講著 ve輪轉台語ｅ我 (雖然現在ma iau是無啥輪轉， 但是進步gai濟)， 對著漢羅拼音懵懂， 以及上課ｅ點滴， 感傷ui心肝底 滿出來。 每一堂課攏帶ho我真大ｅ收穫， 每一本冊 攏帶我 悠遊 無仝ｅ世代、 穿越 無仝ｅ時空， gah領導 我看過無仝ｅ風景； 老師ｅ 談話gah分享 ma ho我 增廣見聞。 Zit學期， 真正是 過了足充實， 課內， 我學習著ｅ m-ganna是台語羅馬拼音， 也學習著 每一個文本ｅ作者ｅ敘事方式 參yinｅ寫作技巧， 更學了翻譯ｅ要領……等等。 Ho我體會著 台語世界ｅ美好， a我neh！ 也會繼續將zit份美好 延續落去。

網路gah我
化工 陳敬薇
　　網路dui我細漢ｅ時陣開始發展，以前無啥人會曉用，到zim ma 已經變gah足普遍ｅ,甚至連三歲ｅ細漢qin仔ma會曉用。
　　對我來講，我感覺網路足方便ｅ，功課ve曉寫ｅ時陣，上網找一leh ，真緊就edang找著 答案， mgorh網路頂guan寫ｅ無一定是對ｅ， 若是想veh聽歌、 看影片， 用網路找 非常方便 而且有 足濟通選擇。 網路ｅ發明為咱ｅ生活帶來方便gah趣味，只要打開電腦、連上網路，diorh ｅ dang看電影、 買衫、買火車票， 免出門diorh知影世間大大小小ｅ代誌， zit樣ｅ方便 大大改變了現代人ｅ生活。
　　卡早細漢ｅ時陣，我真甲意sng網路遊戲，看電腦內底小sen尪仔di hia 走來走去，逐工練功，hit陣定gah哥哥搶leh sng 電腦，後來漸漸感覺zit種遊戲無趣味a，換開始di網路頂guan看小說，zim ma有真濟小說家會ga 家己ｅ小說kng di 網路頂guan，先刺探讀者口味ziah出冊。最近開始流行Facebook，現在逐工dng到宿舍第一件代誌diorh是打電腦、 連上網路、 開Facebook看有新消息無，連veh討論分組作業攏用Facebook。
　　Di zit個網路十分發達ｅ時代， edang講有足濟重要ｅ訊息攏透過網路傳達，我會使講若一工無上網diorh會感覺gui身軀攏無爽快、足qai扭ｅ，做代誌diorh縛腳縛手施展ve開，網路已經變作我生活中vedang缺少ｅ部份囉。

媽媽e手 工工 陳芷綾


自我有記智以來，一直有一雙手deh照顧我、安慰我、ga我養ho大。 細漢e時陣， 只要出去， 媽媽diorh 會用伊e雙手ga我牽diau-diau； 發燒e時陣， 媽媽攏會 ga我抱di胸腹中， ho我感覺足安心e。

Zit ma我已經大漢a， 足久無牽著媽媽e手。 有zit bai我看著媽媽e手 已經變得足粗bit， 我心內足m甘， ma足感謝媽媽辛苦ga阮養大。 Zit ma因為大漢會歹勢e關係， 我足少ga媽媽sai nai a si講一寡貼心e話。 但是，di我e心中， 做媽媽e qin-a 是全世界上幸福e代誌。

所以，di母親節e 時陣，我想bheh 大聲ga媽媽講：媽媽，我愛你！

第二十個母親節
資訊工程學系 – 陳瓏文

親愛ｅ阿母：
　　阿母， 你gam知影， 每一年ｅ母親節 diorh 親像 我ｅ生日 仝款， 每過 一個母親節， diorh 累積 母親對我一年ｅ愛， ho我有大一歲ｅ感覺， 今年已經是第二十個母親節ａ， ho 你照顧至今 已經二十 冬 gue ａ， di ze 二十 dang lai de， 你對我 vor 怨 vor 悔ｅ， diorh sng 我惹你生氣、 ho 你操煩， 媽媽依然對我抱著ziork大ｅ期望， 希望我 e dang 有好ｅ表現、 好ｅ成績 ki gah 別人競爭， ho我上好ｅ環境gah資源， 買教科書ho我、 sang我ki 補習、 m giann 風雨接送我siong ha ko、 dak gang m驚艱苦 teh 我打點好tak ceh 以外ｅdai zi， diorh 是 希望我 e dang 專心tak ceh， m 免煩lor 有其他事務 來giau riau 我ｅ心思。
　　這封批， du liau我自己 bheh hiong阿母se dor sia以外， ma bheh teh弟弟妹妹ga 阿母se dor sia， yin iah閣細漢， m bhat dai zi， 所以由 我zit個 哥哥teh yin表達心中ｅgam un， gam sia 阿母用心盡力對 zit 個 家庭ｅ付出， mui 一日為著準備 za dng ho gui ge hue ａ 食， diroh愛比阮 閣 ka 早起床， am si 洗衣閣 愛比阮 ka uann睏， 平常時閣 愛操煩 家中每一個人ｅ身體gah 大hang 小hangｅdai zi， 實在si ziork 辛苦， 勞心又閣勞力，zit ma 我回想起來， 實在si 足 m甘 阿母an ne 受苦， zit ma 我 e dang 做ｅ diorh si作一個乖囝，mai ho 你 操煩， 認真tak ceh， mai ho 你 栽培我所開ｅ 錢、 時間gah心力浪費掉， 請你閣 忍耐幾年， 等我完成學業e dang 出社會趁錢ｅ時陣， 我會ziork pah拼ｅ， 希望e dang ho 阿母gue ka 好ｅ生活， 完成你 想bheh出國遊山玩水ｅ願望。
祝福li 母親節快樂
　　　　　　　　　　　　　　　　　　　　　　　後生　陳瓏文　敬上

對媽媽ｅ思念 工工 廖元圳

親愛ｅ媽媽， m知最近 你過了好vor? 我心內一直deh想: 厝內溪底ｅ西瓜lin veh 安怎van? 因為 細漢ｅ時陣 讀冊還未ziah無閒， 而且我gorh是查甫qin-a edang gah lin dau sa工， 你ｅ身軀diann diann zia痛hia痛 ho我足煩惱，媽媽辛苦你啊!
我di外口 過了真好 請你 m通煩惱， 我大漢啊 ehiau照顧 我家己。 我知影你了解我ｅ個性， 但是你m免驚 我ve ga錢省di leh食ｅ方面。
我di學校 感覺我 過了真好命， 坐di椅子頂上課，有當時gorh有冷氣通吹， m免di 外口 曝日頭， 有當時 我diorh會反省 我家己， 反省 我有認真讀冊無， 才ve來辜負lin ｅ期望。
最近天氣變卦kah 濟， 你 gah爸爸diorh愛好好照顧家己， 哪是有什麼心事edang ka電話ho我，我攏會聽你講。
媽媽我愛你， 母親節快樂
Love~囝兒元圳

海
川端康成 作 蕭宇喬 譯

Di七月ｅ發白光ｅ山路上， 一隊韓國人 為著徙動 來行走。 行到接近 已經edang看著大海ｅ時陣， 逐家攏真tiam a。
Yin是di leh 起造 一條跨透 zit座山ｅ路， 差不多 七十個勞工 做了三冬ｅkang kue以後， 新ｅ路 已經開到 山頂上。 山頂hit爿 因為是 無仝款ｅ 承包商，yin diorh 無kang kue通做。
婦仁人 yin di天veh光ｅ時陣 diorh ui山裡ｅ庄落 出發， di edang看著大海ｅ時陣， 一個十六、七歲ｅ少女 伊面色 已經青sunsun 白gah像紙hit款， 腳步ma ve穩。
「我ｅ腹肚足疼， vedang 行a!」
「真害， 歇睏一下， 等下ziah閣 due查甫工yin 做伙行。」
「Yin大家 等下ma m知會來 無?」
「當然會來， 閣會像河水 按呢 流過來呢!」
Diorh按呢 有講有笑， hia ｅ 查某人diorh 背著 行李 抑是包袱仔 ui大海hit爿 落山行去。
少女ga身軀上 背ｅ物件 kng落來， 踞di草地上。 差不多 十個工人 ui少女ｅ面頭前 行過去。
「喂！ 按怎a?」
「等下yin大家 抑閣會有人來 無?」
「當然會來。」
「我腹肚足疼， 等下卡走。」
一看著 熱天ｅ海， 少女diorh會感覺 一陣眩憨。 夏蟬ｅ叫聲 ho人全身軀 攏振動起來。 Ui山裡出發ｅ 工人， 有人行頭前、 有人行後壁， 三四人 做一群ui少女面頭前 行過去， 逐遍行過， diorh會按呢 問一聲。 少女攏是 回答仝款ｅ話。
「喂， 按怎a?」
「抑閣有 什麼人 會過來無?」
「當然會來。」
一個少年工人， 家己一個人， 背著 一個足大ｅ 柳枝行籠， ui杉林 行出來。
「喲， na會哭起來a?」
「後面 閣有人 來無?」
「無a。 我 是 特別留到 上尾後， 才m甘gah hit個查某人 分手ｅ。」
「真正ve閣 有人來 a?」
「真正ve a。」
「真正 ?」
「喂， mai哭a。 發生 什麼代誌?」
工人di少女ｅ邊仔 坐落來。
「我ｅ腹肚疼gah ve用ｅ行。」
「原來是按呢。 我抱你行啦? 你diorh嫁ho我好a。」
「M愛。──我老爸講過：mai di我ho人tai死ｅ土地上 結婚。 Mai嫁ho 去過日本ｅ人。 轉去韓國 嫁人。」
「哼! diorh是 因為按呢， 你老爸 才會按呢死去。 看你家己ｅ衫。」
「這，」少女 ann頭看 身軀上 秋天花草圖案ｅ衫， 「別人送ｅ。 足想veh有 火車費 gah 韓國衫。」
「Hit件行李 是什麼?」
「鍋gah碗。」
「Gah我做夫妻 好a。」
「Gam閣有人 會過來?」
「我diorh是 最後一個a。 Diorh算是 ho你閣再等三年 ma無韓國人 會經過zit條路a。」
「真正ve來a?」
「Gah我 做翁仔某 吧！ 你m是 行veh動a? 我是veh來走a。」
「真正 一個人 攏ve來a?」
「是啊。 所以， 聽我ｅ話。」
「好啦。」
「來啦。」
工人 扶起 少女ｅ肩胛頭 kia起來。 兩個人 背起 真大ｅ行李。」
「真正 一個人ma ve來a?」
「有夠囉嗦!」
「Ga我cua走。 Mai ho我 看著海。」

台語333教學心得
資工系　　陳瓏文
教學對象：來自桃園縣中壢市的室友。
教學背景：由於室友本身就會不少台語，對於台語的語感算是不錯，因此主要是教室友認識基本羅馬拼音的符號，然後再深入到台語的短束音及變調。

　　拿出上課老師分發的直讀雙拼法講義，由我先朗讀，然後室友跟著朗誦，帶著室友認識ㄅ、ㄆ、ㄇ…等注音符號所對應到的羅馬符號，看著表，一下子室友便能自己朗誦了，花了一點時間讓室友把ㄅ、ㄆ、ㄇ…所對應的羅馬符號熟記，畢竟比較不熟悉，花一點時間熟記是必要的，這樣子之後看到羅馬拼音時才能夠直覺地讀出來。
　　熟悉了直讀音節之後，便開始教雙拼音節，雙拼音節並沒有很難，由中文的ㄅ、ㄆ、ㄇ…一個一個代換成羅馬符號，並且遵守「子音不落單」、「重複雙拼」的規則，一下子便能上手，唯獨空韻需要特別注意，比較麻煩的是ㄩ音，變化上較為繁雜，因此我們花了點時間在ㄩ音上，把講義上細節的部份一一讀過，以便掌握大部分ㄩ音的變化規則。
　　掌握了羅馬拼音符號之後，我們便從華語的羅馬拼音正式進入台語的羅馬拼音教學，我首先讓室友知道學習台語拼音有三個部分，也就是老師上課所教授的「台語雙拼333」：第一部分是「基礎音節」，第二部分是「三大技巧」，第三部分是「台語變調」。
　　基礎音節的部份，一開始在bh的部份室友比較不容易發出這個音，當我告訴他把雙唇放軟來發音的技巧之後，練習個三、四次，室友便能輕鬆發出bh的音了，gh音的部分室友還算是能掌握，但是進入到ng音的時候，室友很容易將gh和ng兩個音搞混，於是我用了老師上課告訴我們的方法：「把鼻子捏起來」，室友照著做，他唸一遍、我唸一遍，反覆練習了約三分鐘，仔細比較gh和ng音的差別，最後終於能區別gh和ng音的差別，基礎音節的教學也就到此。
　　接著進入三大技巧的教學，雙拼技巧的部份，我把老師上課教我們的曲調搬出來教唱，要室友跟著我一起唱，不一會兒便輕易的掌握了雙拼技巧。鼻化技巧的部份也沒有難倒我們，有了先前的經驗，這次我們首先把鼻子捏起來練習，練習了一會兒之後再把鼻子給鬆開，一下子便能掌握鼻化技巧。聲技巧的部份比較難理解，室友只能理解這四個音（p、t、k、h）是瞬間把發音給終止，無法體會這四個不同短束音真正的相異處，於是我帶著室友一個一個朗讀這四個短束音，並且告訴他每個短束音在結尾時雙唇與舌頭的位置，p結尾是雙唇擋、t結尾是舌尖擋、k結尾是舌根擋、h結尾是聲門擋，並且找了一些實際例子來練習，讓室友藉由實際的例子來感受四種短束音的相異之處，漸漸地室友便能分辨出這四個短束音的差別了。
　　最後進入台語變調的部份，藉由台語船、長尾C、h減三的變調規則，其實並沒有太大的難處，因為室友本身懂台語，所以這部份藉由實際例子的練習來驗證台語變調的三個規則，室友蠻驚訝的，他說：「平常說台語都沒想過台語有什麼太多的規則，但是練習了這麼多實例之後才驚覺台語原來是這麼有規律性的」，因此室友和我上課時一樣，也對於江老師的台語分析感到讚嘆與敬佩，能將台語作出如此有系統的分析以及教學，著實是一件耗費心力與時間的大工程呢！