目前分類:書寫 (2)

瀏覽方式: 標題列表 簡短摘要
序 春凰e“冬節圓”

王淑芬

當 春凰請我 為伊e 新冊文集-- 「冬節圓」寫序, 我確實是 ziah受疼愛、心肝有diuh驚e感覺, 因為 在情誼、 在寫作e 領域 裡, 阮攏m是 「第一等親」e關係。 雖是按呢, 我想 阮是 足有緣e人, 阮攏 di第一次e 會面 裡, 足歡喜 熟識對方, 阮ma di 彼此無仝e 寫作風格 裡, 互相欣賞; 像兩道 來自東西 不無仝方向e 光, 阮cue著 心靈e火彩。
我 di2009年十一月 應伊e邀請 去參觀 伊 di清華大學e 台文課, he是 我 第一次 見著伊 gah 伊e先生 江永進教授。 Yin二人用 上熱情e心 款待 我這個遠客。 老實講, di見著 yin進前, 我對 台文e知識 親像是「文盲」, 我雖罔 ui細漢 講台語, 但是 我 gah 真濟傳統e 台灣人 一樣, 習慣用 「華文」 寫文章、 發表意見, 我甚至 m知影 台文e 世界 裡, 閣有 各派無仝e 表達方式。
Mgorh, di參觀了 伊e課 後, 又gah伊 ham伊 台文工具 幕後推手e 翁婿聊過 後, 我出自內心 veh 足誠懇e 表達 我對yin 翁仔某兩人e 尊敬。 江教授講起 溫柔可愛e 牽手 時, 滿心e 推崇, 尤其 對 春凰e 寫作天分 讚賞有cun; a 春凰講起 江教授 用 統計學方法 自創e「台語拼音 雙拼法」 時, he 敬重e神情, ho我對 zit一對夫婦 更有 進一程e 欽羨, yin真是 一對 為 台語文 研究gah推行, 付出 上珍貴精神e 天使, yin 甚至決定 di厝裡 mai有 電視, 只是 逐工 浸透 di台語文e 雕琢世界, yin互相 di綿綿無停e 台文學術領域 gah 寫作研究 裡, 找著 人生e樂趣。
我足歡喜 成做 春凰 zit本新冊e 搶先讀者, 我用 無啥精通e 台文理解能力, 食力閣認真e 讀伊 zit12篇小說, 足感佩 於 伊 觀察細膩 gah 充滿 鄉土文思e 寫作方式。 伊 di主題文「冬節圓」裡, 寫著 水木婆 zit個 傳統e 台灣婦仁人, ui 晟養家己e 八個子女 開始, 親像 diorh註定了 一世人e 辛勞, 但是 伊好像 ma足認命 於 按呢e人生, diorh像足濟 老一輩e 台灣查某人, 伊用 虔誠e心 敬神, 祈求神明 ho 伊 gah 厝內人平安、 順利e 日子, 伊用 勤儉e 生活習慣 gah 拍拚e 工作精神, 來顯示 伊對 家gah厝內大細e 愛, 即使到了 囝孫滿堂、 可以享福e 老年歲月 裡, 伊e心中, 仝款 只有定定e 對 家中大細gah神明 無怨悔e 付出。 Di 水木公 去世時, 伊感心e 捧送 一碗 伊愛食e 鹹湯圓, 為 水木公e一生, 舖劃上 圓滿e 休止符, 也用 燒燒燒e 一碗圓仔, 解讀 伊家己 對 家人e 勞苦ham疼愛。 Zit款 看起來 平凡e 台灣女性e 人生, 卻ho 咱讀了 心神感動, 因為伊 ho咱看著 家己e親人、 鼻著 團圓瞑時, 燒溫燒溫e 圓仔湯味。
讀 春凰e 新作, ma ho我 想著 我qin-a時代e 生活, 充滿了 鄉土味, 伊文章裡 hia-e人物, diorh像 咱 di台灣e 真濟角落 看著e 一般人, 平凡 但卻有著 芬芳入鼻e 本土氣息, 活靈靈e di文字間 跳來跳去。 「大地為家」e 「旺伯」「旺姆」, 「歡喜婆」裡 將 一禮拜七工 分類e 古錐阿婆, 攏好像 咱身邊e人, 雖然平凡 卻又是 hit-nih-a親切, 讀了 嘴角 攏會 自然微微仔笑。 即使寫 有學問e 哲學家, 春凰 攏ho讀者 輕鬆e ga伊e妙筆, 行踏 di充滿樂趣e 時空 裡, 伊e 「電腦邊e哲學家」, 大概也是 yin夫婦 生活e寫照 吧!
春凰 不但 寫散文, 伊也是 一個詩人, dizit本 近似小說e 敘事散文集 裡, 也gah讀者 分享 伊e詩作。 就像伊 di才出版e 新冊「旅行心詩」裡 寫e: 「詩心 親像 一款強烈e 戀愛感覺, 來e時 跳動e心律, 自然 無法度停止, 擋攏擋vediau。」, 我想, 伊也是用 戀愛hit款e 心情, 以 細膩e筆 deh抒發 zit本《冬節圓》。
因為 愛為伊寫序, 我有幸 瀏覽了 春凰 其他e作品, 對 伊 漂撇e 生產力 驚奇閣呵咾, ui1994年 伊出版 第一本散文集「青春e 路途─我e生活台文」到現主時, dit-veh二十冬e 台文生活 裡, 伊e文思 像 充沛e泉水, 源源湧現 di伊e冊 裡, 隨意舉例, 伊e冊 「雞啼」、 「夜空流星雨」、 「台語文學評論集」、 「台語詩集」 閣有 旅行各地e 「三姊妹看世界」 等等作品, ho我 真心佩服 伊e創作力, 又看著伊 無辭勞苦e 參與翻譯 多本世界名著, 譬如 狄更司e 「聖誕鐘聲」、 芥川龍之介e小說、 清少納言e 「枕草子」等等, 為 台文教育 準備 世界各地材料e 熱心, 攏ho我 感佩 伊hit份 無停止e 熱誠gah精力。
作為一個 生長di台灣, 旅居國外e 文字工作者, 我一直關心 我母國家園裡e 文化發展, 我外呢a寄望 看著 我親愛e故鄉, 行出家己e 文化之路。 看著 春凰 gah 伊e夫婿永進, 認真e deh為 咱e母親-- 台灣e語文, 耕耘出家己e天地, 我真誠e 感激也歡喜, 我期盼見著 伊e 真濟本著作 gah 研究成果, di 台文e園地 裡, ia落種子、 播種花苗, di我 所愛e 家鄉土地 上 開花、 結果。
我veh多謝 春凰 溫馨感人e 寫作, 也多謝 永進 為 台文學術研究e貢獻, 祝福lin!

( 2010.1月 寫di Atlanta. Georgia , ChunHong台譯)

daiqi007 發表在 痞客邦 PIXNET 留言(0) 人氣()

搭 時代e筆 飛seh (原登 台文前線 第15期)


張春凰

時代e筆 引導 自由心思 飛行, 不時不陣, 我坐著 zit台 幻化e飛行船, 到 天涯海角 去旅行, di 街頭巷尾 看雜藝, ma di古文明e 所在, 去尋cue 傳說中 古老e 奧義之書。
長久以來, 我決心 veh寫 一本冊, 冊名 叫做《筆》。
思路 是 沿著 各式各樣e 符碼, 想veh 探討e 祕密。
我去閱讀 有關 世界字母e 故事、 文字e故事、 印刷術e故事, 我去搜尋 筆e歷史、 紙e發明,到當今 身處di 網際網路e 天下。
Logos 是 人類使用 口才本能 講述e言談, 保存著 記憶承傳e 風格, 呈現 所謂e 原始部落e 智慧意味, 經過 拍索仔 做記號、 di洞穴石壁 畫圖做記錄、 di龜殼 刻圖紋、 di泥板 印符號, 人類 千方百計 用 樹枝、 石頭、 gah尖刀 di 沙粒頂面 寫字, di 方尖碑頂面 記述 國家大事。
筆e 原始身份 gah 帝王、 貴族、 士紳、 神職、 書記、 歷史學家 配批, 是一種 特殊e背景, 有身份e人, ga 咱e嘴、 心思、 理智、 巧手, 融合做 金頭腦e寶藏, yin 掌握著 書寫e 權勢gah貴氣。
祭司gah童乩 透過特殊e 職務, 傳送天機, 接觸著 普羅大眾 無e 神通技藝, 種種e規矩、預言 gah 警示, 卜掛 更加牽連著 筆e魔力。
人民認定 筆 來自勢力 gorh有 神聖e任務。
為著 一支筆, 和平e使者, 拋棄了劍, 年久月深, 筆是文雅、 才子e代名詞, 西方 有 一句話語:“筆勝過劍”(The pen is mightier than the sword.)。
欣羨筆士e 風流gah 威猛, 貴族、 專能e 筆, 一步一步 進入 個人化,毛筆、 鉛筆、 色筆、 原子筆、 電子感應筆……, 突破ganna用 手筆表示e 筆路, 寫情批e 時陣, ve閣驚 字體、 字形, 影響著個人 筆字e風格, 致使 跳過 其他才華e 排斥。
有了筆, 筆e書寫 延伸著 記憶e體系, 人ve閣去 為著 失落e頭神,pi-pi-cuah。
有了筆, 知識m是 王族特權 獨佔, 日頭腳 民主e素養 漸漸成形, 布衣平民 有了歡笑, 階級 無再hiah hiaubai 。
為什麼 古老e 希臘羅馬文化 di歐洲 烏暗時代 消失無形, 為什麼 南美州e文明 Inca、 Maya、 Aztec消失 無影, 透過筆 留落來e 殘餘證據, 透過翻譯, 使得 文藝復興 再領風騷, 透過筆e 重整, 世人看見 失落e文明。
筆引發 思維e傳播, 丈量世界。
過去e電報 傳達著 互動e訊息, 現在eMSN 即時聯絡, di地球e 另一端, 你享有影像 親像 面對面e 談論, 親像 di彈鋼琴e 風姿, 指尖 按落筆e關鍵, 用 十支指尖 彈織出 歌詩。
長久以來, 我珍愛 身邊e人, 伊為我、 為逐個 做一支奇妙e 現代筆—台音輸入法, 伊看我 di齒盤 倒彈e癆傷, 伊 用珍貴e 青春gah智力, 閣deh拍拚 突破 語音辨識e 機密。
筆 佈滿 我e細胞 , 我驚異、 ma讚歎, 我呵咾, 我力行, 長年短月, zit支 漫妙之筆, 浸透著 我e生活。
傷愁e時陣, zit支筆 點著 我e光, 歡喜e時刻 zit支筆 替我記事, 為日後 年老e衰弱, 鋪排一塊 小小樂園。 聽講 人老e時 攏記著 古早e代誌, 我期待 zit寡 古早e代誌, m是 孩童時代 ganna gah 親密e小妹仔 dak嘴nia, 這應該是 家己e 故事核心, 家己鋪排 靈魂e所在, 快樂qin-a時代e 放蕩, 隨心滋養。
我kia di當代 時間坐標e 盡bong, 坐di 筆e慧星 seh 來seh去, 用一世人e 精力, 來看待 zit支心靈e 筆舌。 時時刻刻, ga 感內e事物, 運用 zit支時代e 筆尖, 透過 台音輸入法, 我e心、 左右手指, 靈活deh移動, 親像 魂遊按呢, 一字、 一字、 一句、 一句、 一篇、 一篇、 一本、 一本 生產出來。
是啊! 我將有 尾站e時陣, 我 為何悲傷? 是啊! 凡俗之中, 我離ve開 憂悶gah自大, 因為 透過zit支筆, 伊 安搭著我、 檢視著 幼稚gah憤怒e 情緒, ho我反省、 ho我平穩, ho我體悟。
到zitma, 我仝款 無ve記得 veh寫一本 叫做《筆》e冊, 只是 di 伊世出進前, 我e 跳躍之心, di 心智e平洋 漫步或走跳。
我為家己 無童話e 童年補白, he是 成就《世界童話360》e 巡禮。
寫gah讀 永遠deh 循化, 為何 咱veh 讀經典? 筆e負擔、 筆e責任、筆e任務, 引領探索 跨世紀、 跨時空e《台文1001譯》。
筆 圓滿 作家gah靈魂e 對話。
繁華都會e 櫥窗, 展著流行e 花花世界, 會引誘我, 跳脫現實, 我夢想ga家己 打扮做 一位女王, 可是 zia-esiann神, 終歸尾 攏收拾di 一支筆下。
Mai ga我講 物件 有外好食 du外好食, 花有 外芬芳? 因為 長久以來 我閣deh熱戀ui筆 所流露e情分, 一直到 我無力掌握e 時陣, ho我 來去畫圖! he是 另外一個 線條e書寫, ho我 來去跳舞! he是 姿態線條e 書寫, ho我 來去講故! he是 聲波線條e 書寫…… 所有 di筆 所延伸e 夢境, ho我 lak著筆e 魂髓脫化。
做伙來 用 時代e筆, 改變世界!
(20090416)

daiqi007 發表在 痞客邦 PIXNET 留言(0) 人氣()