目前分類:台語小品文 (11)

瀏覽方式: 標題列表 簡短摘要
坐飛凌機 台語會話

胡雅潔

空服員:阿嬤, 你坐di第七排 倚窗仔門e 位置。
阿嬤:請問 我e行李 bheh kng di dua?
空服員:kng di 頭殼頂e 置物櫃, 來, 我ga你逗相工。
(廣播: 飛凌機bheh啟航la, 請大家ga安全帶 縛起來。)
空服員:阿嬤, 你愛縛安全帶 kah無危險。
阿嬤:但是, 安呢足歹喘氣。
空服員:你先忍耐一時仔, 等待飛凌機kah穩定, dior e -sai bak開安全帶。
(過幾分鐘)
阿嬤:小姐, 我想bheh吸新鮮e空氣, 請你幫我開窗仔門, 伊親像鎖起來。
空服員:阿嬤歹勢, 飛凌機e 窗仔門 無法度開。
阿嬤:無要緊, 安呢我歇睏一時仔dior 好。
(暗時)
空服員:阿嬤, 你bheh食牛排 iah是羊排?
阿嬤:今仔日是初一, 我愛食菜, gam有別種e sai食?
空服員:米香gah pang, 你愛食啥?
阿嬤:我愛pang, 米香我食bhe lua。
(過了一日gah一暝)
阿嬤: 總算到啊! 總算e- sia看dior我e孫仔!
孫仔: 阿嬤, 我di zia la!
阿嬤: 坐飛凌機 足無爽快, 空氣無流通, 坐di邊a e阿督仔 攏講英語, 我攏無人e dang講話, 足無聊。
孫仔: 阿嬤你m免煩惱, 下禮拜 我會gah你作伙轉去台灣; 咱先來去食好料。
阿嬤: 但是 我 足tiam 足愛睏。
孫仔:阿嬤你m tang日時睏, 按呢你暗時會睏bhe去。
阿嬤:好啦! 無你買一杯燒咖啡ho我lim, 我歸身軀攏起ga冷sun。
孫仔:莫怪 你e面色 青sun sun。
阿嬤:阿嬤e身軀 一工比一工差, 好佳哉 閣有氣力 來看你……
(孫仔e目睭紅紅, 恬恬無講話)

daiqi007 發表在 痞客邦 PIXNET 留言(0) 人氣()

Seh夜市足趣味! 彭姜綺


阿綺:暗時 咱來去seh夜市好無?
小農: 好啊! 我上甲意去夜市食好食e 物件。 每一擺 我若食著好食e, 我dior e dang 歡喜足久!
阿家: 我ma veh去! 我愛hia e鬧熱!
(到夜市了後……)
小農:zia-e 物件 看起來足好食e neh! 我想veh食 蚵a煎 gah 貢丸湯, 實在是 俗gorh 大碗neh!
阿家: 隔壁zit攤 賣鹽酥雞 生意ziah好, 一定足好食e! 我緊來排隊 鬥鬧熱。
鹽酥雞頭家:zit個少年e小姐, 你veh di啥?
阿家: 我veh 一包大包e鹽酥雞 gah 一份甜不辣, 胡椒粉 幫我 kng卡濟leh!
鹽酥雞頭家:無問題! 按呢總共是85ko! ho你三支籤a gam會使?
阿家:OK! 多謝你! 有夠好食啦!
阿綺:ua~我veh來sng 這攤擲圓ko-a, 足久無sng! 有夠懷念, 我細漢e時陣上愛sng ze, 阮兜附近 夜市e頭家 看著我 攏會驚, 因為我太厲害a! 哈哈哈!
套圈圈頭家: 緊來sng喔! sng一gai 30ko有10 個 ko-a, 禮物足齊全e喔!看這大仙尪仔有夠古錐e,ma有活e金魚喔!趕緊來sng!
阿綺:頭家, 我veh 20 個 ko-e, gam是kia di zit 條線後面?
套圈圈頭家:無錯, dor是hia。
阿家:伊講 伊古早有deh練喔! 頭家你愛細膩喔, 獎品攏veh ho 伊贏去a!
阿綺:哈哈, lin看! 我得大獎a! 來, lin想veh di 啥, ga我講, 我幫lin te禮物!
套圈圈頭家:小姐, 算我拜託你, 你緊去別攤a, ho按呢sng落去, 我有影會倒攤…..。
小農:你足ghau e neh!ing暗 真正 有夠歡喜e啦!

daiqi007 發表在 痞客邦 PIXNET 留言(0) 人氣()

車上船頂e溫情 張春凰

一.
下班時間, 開向Paris 東爿e市郊外 Noisy le Grand e地下鐵, 逐個 攏目睭瞌瞌 做修護疲勞 e歇睏。
一個少婦 坐di位上 左右晃蕩, 邊仔e人 掠準她deh du-gu。
Liam當時, pong一聲 仆ui頭前去, zit聲 害啊! 是 昏倒失控e 現象。
全車箱e人 攏斟酌著 她, 有人 趕緊qiu警報 通知列車長 發生 緊急狀況, 列車 也隨停落來 觀照zit位乘客。
當眾人 來到 她e面前, 十嘴九尻川 逐個無閒ci-cap, zit位乘客 精神過來 講: 「 我 無什麼 大問題 只是有身, 因為 血糖降低, 致使 無力支持, Merci! 勞力! 歹勢! 」
聽著按呢, 當下 閣有人熱心 宣佈 看什麼人 身上有 補給e物件, 結果 糖仔餅、 pang啦 各種點心 一大堆 攏送送過來。
列車停落來 對zit位婦仁人 管顧, 後壁e列車 攏受著影響, mgorh這是 對顧客e 基本看顧, 全車e人 攏感受著 當該按呢!
這是 我e親小妹 拜六早起(2013,0928) 越洋電話 所提起e實事, 也是 拜五 下班e列車 坐di她e邊仔e少婦, 阮受著感動 ga講 我當會ga zit則溫馨故事 寫ho學生看。
為何會提起 zit則 小插曲? 因為 小妹來電講 我寄去e小包 已經收著a, 內底攏是 故鄉口味e 點心gah乾糧, 三不五時 人di異國 攏會 心悶家園, 家鄉味 或者是 媽媽e手路菜, 攏是 解悶e仙丹。
我 再次提醒 小妹, 可kng一寡 di手袋仔裡, 下班e時 身心疲勞e時, 隨趕緊 小塞一塊!


二.
幾冬前, di一個 義診e場合, 有一位 無見過面 e女士 問過阮: 「 妳deh無閒啥?」
阮回答: 「 無閒deh做 母語e代誌!」
女士 目睭展大蕊 講: 「 oh! 無簡單! 前幾工 我有看著 日本NHK 放送一則 真實e故事。」
阮講: 「 oh! 真趣味囉! 」
她 認真整理 情緒 了後dor 開始敘述:
有一台船頂, 內底 有 一個 Éire ( Ireland、愛爾蘭 ) e老婦仁人, 她e身體 已經 相當虛弱, 船長過來關懷, 船長 輕聲細說 問講: 「 阿婆 妳按怎? dor位無爽快? 」
阿婆 用盡 細漢時以來 食母奶e元氣 講話, mgorh 船長 大約知影 她deh講 鄉音, 是Erice母語, 隨用maikuh宣佈: 「 什麼人 通曉Erice母語, 現此時 有一位 生命有危險e 阿婆 需要人來幫贊, 同時 船頂 若有醫生 請過來幫忙。」
一個 中少年人 過來, 自稱細漢e時 di家鄉gah阿公阿媽 講母語, 應該edang溝通。
透過 中少年e通譯, ziah知影 阿婆自知 可能生命 已經到 盡bong啊! Mgorh她 有 一個心願, 希望gah她 失散多年e 孫仔 相會, 按呢她dor會 含笑歸西, 一世人 無閣再有 遺憾e代誌。
Hit當陣, zit個 中年e 少年人, 摸著 他胸前e 珮鍊, 珮塊內底 有一張 他細漢時 e相片, 講起 細漢 di家鄉e故事, 兩人 藉著鄉音 心靈相通, 慢慢相認, 原來 他 dor是 她 失散幾十冬 e金孫!
阿婆 因為得著 親情滋潤 zit帖藥方, 也解救著 她e生命!
聽了, 阮 再次 深深體悟著 為什麼講: 母語 是 感情e語言、 母語 是靈魂e語言。
Paris捷運車頂e 溫情小故事 ho阮 觸動著 書寫zit個故事e神經!

daiqi007 發表在 痞客邦 PIXNET 留言(0) 人氣()

美夢成真
張春凰 編著

二○○九年十月, 全美國 有 上百萬個 觀眾, 收看著Tereai Trent 上Oprahe節目, 講述著 她家己 求學e 心路歷程。

Tereai出世di非洲e Zimbabwe[辛巴威]e庄腳, di hit個庄仔內 查甫qin-a 卡 edang去學校讀冊, 大部份e 查某qin-a 到十一歲dor愛嫁。

查某人e命運 dor di傳統e觀念下 受盡束縛。

Tereai di九歲e時, di厝內 ga哥哥 帶轉來e課本 用功知道 自修gah會曉 讀寫。 甚至 幫哥哥 做家庭作業, 學校e老師 發覺 zit位學生di 厝內 完成e作業 比di學校教室內底 所做e成果 好真濟, ziah追究著 zit位背後e女孩。

學校e老師 去向Tereaie老父 一再請求, ho Terai上學。 總算 ho她 去學堂。

Tereai 真愛讀冊, mgorh di厝內 有真濟代誌 愛做, 只要 無做kangkue 去讀冊, 定定會ho老父ga拍。 到gah十一歲e時, 她dor按照習俗 ho老父 ga嫁出去。 十七歲e時, 她已經是 三個qin-ae媽媽。

到 她二十歲e時, hit當時 國際小牛母扶助貧困組織( Heifer Internationgal )e義工 Jo Luck, 來到 Tereai e村庄, zit個組織 主要是deh贊助 教育地區 落後e居民, 期待 透過教習 ho yin學習著 過生活 有 自力更生e 技能。

當Jo Luck 問著 Tereaie時陣: 「 你有什麼 希望gah夢想?」, zit位失學e女子, 真流暢講出 隨dor答出: 「 我想veh去美國 讀冊 尚且veh讀學士、 碩士、 gah博士! 」 Zia-e話 zit出嘴, dor ho Jo Luck 女士 驚喜, 她mvat di zit款所在 聽著有 婦仁人 有ziah大e 抱負。 Jo Luck 目睭展大蕊 對Tereai 講: 「 你若有 zit款想望, 你一定做會到! 」

Tereai 因為自修 讀著 名人e傳記, 知影 學位等級e 代誌。

同時, Tereaie老母 對她 想veh讀冊 出頭天 zit項代誌 相當贊同, 鼓勵她ga她e願望 寫di紙頂, kng di矸內 封ho好 閣埋di 祕密e所在。 Tereai將zit個祕密 藏di她 細漢e時 飼牛e所在, 埋di牛diau[牛房]e 土腳石頭底, 期望 將來有一工, 親像 她e阿母 所講e: 「 總有一工, zia-e夢想 會呼叫你 倒轉來」。

希望di Tereai 心中 體內 運作, 無一時 停止過。

一九九八年, Tereai 申請著 美國Oklahoma州立大學e 入學允准, 她帶著翁 gah子女 去 生分e所在 讀冊。 求學期間 Tereai 兼真濟工作, 而且閣愛 時常遭受著 先生e虐待, 但是 這困難 並無 ga她拍倒。 一直到 她無法度 交學費, ho學校e 行政人員 Bill(?) 發現著 她e困境, Bill替她募款 閣透過 國際仁人家園 ( Habitat for Humanity ) 幫忙她 度過難關。 二○○一年, Tereai得著 農業教育e學士學位, 過了兩冬 她 也得著碩士, 同時 她e先生 因為 無改善e虐待她 遭受 驅離出境。 以後她再嫁 現此時 有五個qin-a,過著 幸福e生活。

Tereaie最後目標 也di 二○○九年e十二月 達成心願, 提著Western Michigan U.e博士學位。 也是當她deh 書寫 關係 非洲 如何防治 愛滋病e 博士論文e期間, 她接著 名嘴 Oprahe邀請電話, 請她gah全國e人民 分享 zit則 非洲貧困婦女e 平凡傳奇。

二○一一年e十月, Tereai 轉去出世e庄腳, zit回 是 轉去參觀 新落成eMatau小學, zit間小學 是 Oprah 跨國捐贈、 求助兒童會 ( Save the Children)協辦 所建立e小學, 特別veh幫助 提升 散赤孩童e 教育程度 尤其是 Sahara [撒哈拉] 沙漠以南e 非洲婦女, 這dor是 Tereai e 內心深深 願望之一。

Tereai 對著 Matau小學生 講: 「 yin 各位 必須愛堅強, 重視教育, 閣有m通 過頭早 結婚!」 出身弱勢者 是 如何 關懷同類。

Tereai回到故鄉, 當地e婦女 唱著: 「 她 足勤勞 足奮進!」e歌 歡迎她!

美夢成真, 認真e查某人 上gai sui!


參考資料:
Oprah: Hope in Box
Shane J. Lopez著、 劉玉文 譯。 Making Hope Happening = 希望:蓋洛普調查主張, 最有力量的幸福信念, 台北:三采文化,2013年,8月。






daiqi007 發表在 痞客邦 PIXNET 留言(0) 人氣()

印地安故事集-1
張春凰 編著

蜂鳥取火

古早古早, 海洋 一直升高 一直升高, 一直到淹埋大地。
鷹gah蜂鳥做伙 kia di山峰e頂點, 免去受難, 真傷心看著 失落e大地。
鷹決定veh用魔法 醫治世界e傷痕, 伊用盡心力 抽乾大水, 所以伊足餓足餓。
有找著一寡物件 edang食, mgorh yin需要火來煮食。
鷹 知影 有一位所在 可cue著火, 伊派細漢孫仔--蜂鳥 去 Badger族e祕密地洞取火。
Badger族人拒絕分火ho蜂鳥。“Ga火kam起來!”當yin看著蜂鳥 diorh同齊喊出來。 Yin用一領鹿皮kam火, ga火藏起來。
Mgorh 鹿皮頂面有一孔, 是ho箭射過e。
蜂鳥用伊長閣尖e喙 穿過hit個孔。 伊釣出一塊燒碳火, 趕緊走。 伊ga火種安心夾di過耳孔(腋下), 火將伊e嚨喉 燒做金紅色。
這是為什麼 蜂鳥有一副紅嚨喉。 這diorh是火 如何重回人間e由來。

daiqi007 發表在 痞客邦 PIXNET 留言(0) 人氣()

日落紅毛港
陳瓊羽

鴨卵黃e太陽漸漸veh落山a,m願離開e伊,將大海ma染成柑a色,ho逐家攏esai將眼前e zit個美景,當做是太陽存在過e記憶,ma是討海人一工e結束。
天iau未光,海湧di港邊來來回回, diorh已經吵醒討海人e好眠,鹽味、腥味變成yin e記號,雙手e繭滿滿是,為著yin e家庭,zia已經是yin金習慣e生活a,拉機歐開gah上大聲,聽天氣報導來知影天公伯a今a日veh ho yin出海vor,suah落來〈裡町人生〉e歌曲開始漂浮di大海e頂面,哼哼唱唱e音樂gah海湧拍diorh船e節奏,變成一條索仔,拉開天頂e ca-deng﹝窗簾/curtain﹞,ho日頭照遍海邊e紅毛港。
有e時陣,一出海diorh是十多工,上少ma愛半工,大海已經是討海人e朋友a,yin會互相幫助iau是分擔心情,海流e前進是討海人轉去厝內唯一e一條路,滿歸e漁獲gah歷史e記憶攏隨著海湧e沉浮完成,母親e思念ma化做白雲due著海湧陪伴diorh討海人,ho yin一路上ve再孤單,因為yin知影日頭落山之時,海口e雙臂會為yin pah開。
正月初二,si母親轉去後頭厝e日子,阿爸開車駛到偎輪渡站e時陣攏會打開窗a門,ho海水e鹹味喚醒阮e記憶,唯一e大路「海汕路」,乘載diorh所有紅毛港人e回憶,大舅gah三舅veh討海一定會經過,表姊透早veh上課ma會經過,阿爸ma是ui zit條路娶diorh阿母zit個美麗e新娘a,陪阿母轉去後頭厝ma是愛di zit條路留落印跡,ziah edang回到伊生命e源頭,尤其紅毛港只要有人veh娶人客e時陣,歸條路好親像海龍王穿diorh伊e紅西裝,ma作伙來食流水席dau熱鬧,順便為生命e結合gah流傳做見證。
Hiah-nih-a美麗e所在猶原抵ve過政府e決定,為diorh veh擴充貨櫃放置e所在,海水e偎靠站──紅毛港變成堆積木e紅毛土地,記憶e出發點zitma已經m知影veh去叨位找,gorh ka濟e目屎gah m願ma阻擋ve了怪手e無情,挖開ho阮安心e厝頂ma挖走外公、外媽e汗水,本底鴨卵黃e紅毛港,zitma已經蓋diorh一層烏灰e面紗,永遠vedang gorh再掀開,好好a面對海龍王e邀請。
Kia di阿母e後頭厝頭前,我知影zit gai是最後一遍轉來紅毛港,看diorh門口頂guan刻上「洪」zit字,外濟e歷史gah討海人共同e記憶攏di紅毛港zit塊土地醞釀,爬上去厝頂,歸片e紅瓦屋頂是討海人ui海上轉來e依據,ma是外媽等待大舅gah三舅轉來e日落心情,ui厝頂看e diorh鴨卵黃e大海,diorh表示海上e孤船ma看會著紅瓦e思慕。
相片內e紅毛港,雖然已經vedang閣再轉去a,mgorh ui三舅唱〈裡町人生〉e歌聲中,我知影逐家守護e紅毛港會永遠留di心肝內底,漁船ma會找diorh轉去e路,紅瓦e思念之情ma替阮找diorh到未來e路。

daiqi007 發表在 痞客邦 PIXNET 留言(0) 人氣()


我e 阿公
張乃懿


是第一gai抱你吧? de有記憶以來
逐暗 當拖著 sen-dau-dau-e身軀轉來到厝, 總想veh ga你看看leh 看你 消瘦落肉
你gam會記得 hit片海 嗎? 用了 一世人gah海洋 搏鬥
de 你破病e 上尾後一刻 閣是 gah海洋抗爭著
你閣會記得 hit台船e形貌 嗎?
請 講ho我聽, 因為 我已淡忘了
無法陪伴你, 深深抱憾
看著有人 按呢欺負你, 我卻無能力
ho我撐過zit禮拜
我會保護你
以早 是你 保護我, zitma換我 保護你
拜託, 求天公伯a 留一寡時間 ho你gah我
我想veh cua你去看 hit片海, 只是 足艱難
我想veh cua你 去看 hit台船, 只是 已無留
我想veh cua你 去找 hit台 慢sor e o-do-vai, 只是 已無留
拜託, 留寡時間 ho你gah我
m是報恩 m是同情
因為你 是我 永遠切ve斷e 愛gah血緣

daiqi007 發表在 痞客邦 PIXNET 留言(0) 人氣()

Ho伊感動著
張春凰
伊若di路中deh行, 剪鈕仔ve去向伊落手。 看伊e穿插 普通普通,上班 騎一台腳踏車, 出門買菜 攏guann一個古losut古e袋仔……, 伊無看頭。
其實, 伊e舊皮包 不時ma貯 幾仔萬箍。 學生、 公益、 弱勢團體 若需要經費, 隨時dor有錢tang捐ho yin。 穿e衫 是無破 mgu平時 hit幾軀(su1)粗粗素素 換來換去, 表面看起來 一點仔ma無 女老師e派頭, 平時攏專心做kangkue無閒tang妝、 ma無愛美。 有啊! 衫有兩軀上好e, 是特別 去裁縫店 定做e, 一套寒人、 一套熱人 tang好穿去 國內外 開國際學術會議。
冊教了好 是十五年來e 事實, 高深e 伊指導博士生 是 專門學問、 淺易e 伊教大學通識課程 ma是 講gah誠趣味。 兩冬前, 我去聽 伊e統計理論, 有一遍 伊di課堂 順續講小學e時陣, 有一個同學 逐日e下早仔時, 上課攏duh龜, 老師若ga罵 伊dor目屎nihnih流 一句話攏無講。 Zit個先生 發現其中 必有緣故, 自動ga伊問, 才知影qin-a人 逐下早仔 四、五點 天閣霧霧 別人dor猶deh睏, 人伊dor起床 款蕃薯菜veh飼豬……, 然後 卡閣褪赤腳 拚去學校上課, 乖學生 實在值得 人感心, 老師一時dor cua全班去yin兜參觀 按怎 剪豬菜、 sa豬食料、 飼豬…。 往事 是 伊e故鄉, 故鄉 是 伊e根。
伊e故鄉 汐止 是 一個小庄腳, di 伊e記憶內 是 伊深戀e故鄉, 伊veh做台灣人。 有一gai, 伊送我 一塊陳明章e錄音帶, 內面 有一條 汐止鎮鎮歌, 伊dor足歡喜唱 頭仔兩句 ho我聽 “汐止本名 是 水返腳 先民開拓 閣入山林”, “水轉腳 意思是 潮水到hia擋diau e 閣返頭 流倒轉去 入大海,我di hia大漢e, ma是 純樸e草地, 我定定想起著 做qin-ae時代, hit個平凡 有人情e所在……, 來! 仝款e歌曲 我買三十塊, 一塊ho 恁”; “三十卷!?”;“無啥, 阿dor我 看伊e某 徛di邊仔 hia, 大腹肚 大身大命。”
不止是 本土e歌曲, 台灣e 野鳥圖鑑、 台灣e 風景日曆、 台灣e郵票、 台灣e…, 伊攏是 按呢支持, 恬恬仔付出、 送出, 因為 我定定ma攏會 有一份。
講著寫文章, 伊講veh寫一篇 愛tuh足久。 本來 對hit種 酸酸e、 談情說愛、 講gah五天外尾 無本土化e散文 真厭sen, 但是 看著 陳烈e散文,伊dor改變 原來e看法, 顛倒 深深受感動, 趕緊買來 ho學生 作獎品。
賞鳥 是 伊e 人生趣味, ui zia, 伊 愛 自然e天機, 伊e論文 dor有估計di台灣公e、 母e濱鷸(bin2 ut7)鳥類總數e 統計方法 發表di學術期刊裡, ho法國學者 讀著, veh邀請伊 去發表 研究成果。 但是 ho台灣人 認識 比ho外國人 知影 對伊來講 閣卡有意義, 所以 是m是 veh去法國 並無非常重要。
學生畢業了後, 若m是 過年過節 寫一張卡片 來請安, dor是 三不五時帶伴手 轉來cue伊。 學生若走, 伊dor ga等路teh來 分ho逐個。 點心 是學生yin hiae土產, yin 有e是 當年 ho伊關愛過、 有e是 ho伊保護過, 新e來、 舊e去, 來來去去, 做老師e 總是vedang記hiah nih-a濟e學生,mgu學生 攏ga老師e 溫情gah愛心 記一世人。 人講 一日為師 終生為父,師生e感情 往往是 人生e 安慰gah鼓勵e 泉源, 是 伊ga少年人e福田 種一粒種籽。 寫到zia, ho我想起 有一遍 伊鼓勵我 閣去讀博士e代誌, 我ga應講 若veh閣進修 當然需要 準備一筆錢, 伊趕緊 當祕書小姐面前 ga我講:“若是ganna錢e問題niania, 我借你dor好。” 然後閣足客氣講:“錢 我有夠借你, 阮趁錢 大部份 攏無買別物, 趁e錢攏有cun落來, 免掛意。” 我leh想, 伊趁e錢 若去買股票、 買幾棟庴……, 若小計畫一下, 投資淡薄仔,zitma伊ma是一個好額人。 伊e心 根本是kng di研究裡, 有一遍 我du好deh看 薪水按算公告, 伊行過 我e面前, 我對嘴問伊 公務員薪水e 加級 按怎算, 伊講mvat去注意過, m知影。 伊e 脾氣、 性情 是 直來直去, 快言快語, 明顯表現出 科學家 追求 真、善、美e 境界ham氣質: 專心做 研究栽培學生, 實際去 做研究, 錢項e代誌 無重要。
伊愛環保, 買菜用 hit個舊相e 環保袋仔, 幾仔冬來, 透早攏起床 煮飯ho qin-a帶便當, 講 按呢一冬edang省 幾仔百個 保利龍、 紙盒仔、 竹箸。印過一面e紙 後壁面 ho學生 做考卷寫答案, 按呢 樹仔edang減剉寡。 無必要e時 mtang開電火、 冷氣, 愛節省能源、 愛點點滴滴做, dor會 積小成多, 若無, 發電廠dor閣跳機l o!
Hit冬學校 veh起 綜合大樓 粗粗魯魯dor veh去剉樹仔, 僥倖噢! 好佳哉伊一個小女子, 趕緊去ga學校 有關單位講: 伊veh家己出錢搬樹仔, 徙去別位栽。 學校一時 精神起來, 自動ga zit十外欉大榕樹 搬厝, 一冬後 zit群樹林 已經 茂然成影 發gah旺旺旺, 然後 學校dor發函 ho各單位 來感謝gah呵咾 同事移樹e 勞力ham眼光。 有一gai, 我行過hia, 看著學校e 一草一木, 想起伊 di zia讀冊、 教冊, 伊e心 是 gah學校 黏結作伙e。 伊e青春di zia行過、 伊e中年 奉獻di zia……, 心肝內e感動 親像 一陣和風吹過 軟軟e草仔枝, 一陣春雨 滋潤著 青青e樹葉波, 和風gah春雨 是 伊e真情、 是 伊慈愛e 老母心。
伊有一套 自然療法。 做所長e時陣 定定胃疼, 伊ma無愛食藥仔, 一直lim滾水 來沖散胃酸。 Qin-ae肉 若發燒, dor ho yin食西瓜汁、 lim汽水。透早去運動埕 走五lin, 去八樓辦公室 無坐電梯, 用腳爬樓梯。 教囝e觀點是due殘障女英雄、女作家 劉俠e媽媽 堅持e信念:“上好e照顧 是免去 照顧伊!”
伊有一個 美滿e家庭, 人生e幸福 伊攏有。 Ho我感動e是 伊edang拍開心內e門窗, 大方閣細膩 來幫助 別人e心腸, 用伊e能力 來分享ho別人、 來關懷別人, 假若是 天庭e仙女 自願下凡來 照顧眾生, 態度 是 ziah nih-a自然、 誠懇。
台灣過去e 白色恐佈 是伊心內 深深e疼。 同行 陳文成博士e過身, 十二冬e 悲傷gah憤怒, di紀念 陳博士研究成就e 演講結論, 是 芋仔根開蕃薯花e伊 用Horlor話講:“Zit件代誌 咱edang原諒, 但是vedang放ve記得去!”; 是啊! 陳博士 di伊e心田 種一粒種籽, 台灣民主運動行街頭 yin翁仔某 大部份 攏有份。 伊閣是一個 有理想e 實踐者, 若講起 對本土自主性e 覺醒, 阮ho伊感動著! 伊di阮e心田 種一粒種籽。
伊ma是閣ziah nih-a樸素, 精神gah時間 攏用di工作上。 伊講退休了後,透早veh去掃街路, 像伊按呢 不時不陣 攏把握 一分一秒, 半世人 頂人一世人, 伊激起 阮e腳步…, 咱來ia 咱家己 有意義e種籽。
伊愛伊e家庭, 愛伊e學生, 愛伊 邊仔e親友, 愛伊 mvate台灣人, 愛台灣e 生靈gah 風物, 聲聲句句 攏是 台灣心、 台灣情, di足久e以前 一直到zitma e現在, 一直 堅持閣堅持。 平平攏是 lim台灣水、 食台灣米, 伊攏比一般人 閣卡堅定, 親像 日出日落ziah nih-a平常。 日子一久, 熟sai伊e阮, 心內擋ve diau 來讚歎伊, 自然會喝出 一聲閣一聲 “奇女子! 奇女子!”
(1994年3月)


後記:2006年 某一個禮拜日 我du著伊 di東院邊仔e 光復路, 用面桶捧水deh 沃路樹, 我問伊是按怎? 伊講 hit欉樹仔veh焦死a。
2011年3月初6e禮拜日 中晝 di東院 我du著伊 騎腳踏車, gah伊拍招呼, 問伊veh去dor位? 伊講:guann飯gah pang veh去ho徐道寧老師,因為伊老啊行動無方便。 我看著車籃仔 有數包e物件 應該是 一個老人 edang食真濟工e份, 目睭展足大蕊, 反應緊e伊 隨ga我安慰:“ganna禮拜日 niania!”
Zit幾工來, 我再度ho伊感動著!

(2011.3.8 4:27pm)

daiqi007 發表在 痞客邦 PIXNET 留言(0) 人氣()

我e阿媽 台語五百字散文
林雯婷

我e台語是自細漢gah阿媽學e,所以一講到台語我就會想著伊。足久以前,我vat用華語寫過zit篇伊e故事,按怎寫攏怪怪,畢竟阿媽zit世人攏是用台語咧過,用華語寫免講嘛寫ve到位。如今,我有機會用台語寫文章,我決定veh重寫一篇關係我e阿媽e故事。
我e阿媽已經六十幾歲a,嘴角總是帶著笑容,ho人足親切e感覺。不過伊e故事,聽起來suah是ziah nih a ho人心酸。阿媽細漢e時陣,yin兜e經濟狀況並無好,m gorh,伊有一個疼愛子女e阿叔,鼓勵伊去讀冊。hit當陣大家攏無看好查某人去讀冊,m知影阿媽食偌濟苦,kah e sai得著讀冊e權利。
國小畢業了後,阿媽diohr離開了自細漢大漢e田庄,去都市cue頭路。阿媽去e所在是一間紡織工場,成品是zit ma足少看著 e黃麻布袋。he是一個真辛苦e kang kue,逐工攏有tinn ve了e黃麻布袋。十四、五歲e年紀應該是愛無煩無腦,m gorh阿媽suah愛幫忙厝內底趁錢。
Di工場dua兩年qua,阿媽diorh轉去厝內a。hit時陣,厝內除了阿媽e阿爸以外,無其他e查甫人,阿媽e阿兄gah小弟攏已經去外地cue 頭路 a。因為厝內e查甫人無夠濟,阿媽只好去田lin鬥sann工,m gorh阿媽竟然無嫌辛苦,顛倒笑咧講「誰講查某人無法度去田lin做穡e?」
Di厝lin鬥sann工e hit段日子,改變了阿媽e一生。hit e 時陣阿媽di厝內上大e kang kue dior是幫忙田lin e 一寡代誌。m gorh di冬天m免做穡e時陣,腳步停ve落來e伊,一個人去屏東,開始學做棉被。ma是因為按呢,阿媽日後ziah edang以做手工棉被顧腹肚。
Dua di厝lin四、五冬,阿媽也已經到veh做大人結婚e年紀a,阿媽是相親熟識對象e,阿公是伊頭一個e對象。di結婚進前,yin兩個人ganna見過兩gai面nia nia,第一gai是相親hit工,閣來diorh是阿公去厝lin講親成e時陣a。雖然講結婚e對象是父母cue e,m gorh ma是等gah阿媽dim頭zia guann定zit門婚事。結婚後無外久,阿公想veh出外拍拼家己e事業,阿媽dior hdue伊去一個完全生分e城市,度過伊e大半世人。
阿公gah阿媽選擇以手工棉被創業,來到異鄉e yin,一開始過著非常辛苦e生活。手工棉被是一個無簡單e kang kue,成本siunn guan,害著價數壓ve落來,所以大部分e人攏會選擇機器做e棉被。hit當陣,yin無熟識幾個在地人,生意攏是好朋友介紹來e。diorh算講有ziann好e工夫,無人客無生意無宣傳,diorh等是啥物攏無。姑不二終,阿媽只好牽著自輪車,載著沉重e棉被貨樣,一間厝一間厝dau dau a推銷。
我聽阿媽講,當時棉被e需要量足少,yin熟識e人ma足少,棉被閣無容易歹去。多數e人客攏是來自老一輩e人,嫁娶時定做棉被e習慣。di彰化e hit幾冬,日子一直是真painn過e,生意得著e利純dann du好有夠食飯nia nia。
以後e hit幾冬,因為台灣e經濟復活,厝內e狀況變gah卡寬裕。無過外久阿媽diorh生個e qin- a,組織一個六個人e大家庭,過著幸福e日子。m gorh di qin a漸漸大漢了後,阿媽e人生又閣出現了轉折。zit gai是阿公破病a,阿公e病無輕,是腦瘤,不過幸運e是,是一粒良性e腦瘤。zit場病ho阿公di病院dua個外月,diorh算講出院a,ma愛固定時間dng去病院做復健。
阿公dua院e hit段日子,阿媽一個人擔起厝內所有e代誌,為著醫藥費,伊放下身段ga身軀邊e人借錢;為著e dang好好照顧阿公,阿媽ga qin a委託ho附近e親成朋友。一個查某人,愛兼顧生活gah照顧子女,實在是足辛苦。m gorh,阿媽ma是堅強向前行。
大約是di阿媽五十五歲hit冬,阿公離開a。減一個人做伴e阿媽,決定搬倒轉去台南e祖厝,守護zit 個陪dior阿公大漢e所在,ma繼續做著已經漸漸失傳e工夫─手工棉被。摸著阿媽一針一線tinn出來e棉被,心內e感動是無法度用語言來形容e。阿媽e故事iah閣有真濟,m是三工、五工就會sai寫e完e。伊e故事,我願意用一世人dau dau a幫伊寫,一字一字寫出伊e人生gah伊e堅強。

daiqi007 發表在 痞客邦 PIXNET 留言(0) 人氣()

台語小品文 時間倒退lu 賴皇甫
自從科技 愈來愈發達, 有人想講gam有一工咱會使ho時間倒退, 按呢真濟使人痛心e代誌 diorh ve發生啊, 雖然hiae代誌會使 ho後代好好a 思考gah 變作一個借鏡, 但是 對 因為hit項代誌 來受著影響e人 來講, 可能會勾起 in悲傷e記憶; 若是真正有 zit個技術, 我想 逐個人 攏會想veh使用伊; 畢竟 每一個人 攏有 使in感覺 無想veh 面對e回想, 只要有 zit項技術, diorh會使轉去 代誌e根源 閣改變伊。
Di代誌發生進前, 定定攏會有一寡前兆, 而且是有一連串e原因, 到上尾仔ziah 會爆發大錯, 所以一旦有時光倒流e能力, 我ma會想veh轉去, 但是世界hong創造gah真公平, 無人有zit款能力, ma無人有法度發明zit項技術, 若是有zit項技術, 按呢世界就無安靜e一工啊, 因為 逐個人 攏想veh 轉去 使家己後悔e hit工, 到底是ai 轉去佗一工le, 這ai ho 啥人決定, 無人知影, 我想應該 ma無人敢出來 承擔 zit個責任, 而且為著 啥物代誌使用 ma m知影 ai按怎做決定, 恐驚 時間倒退e技術 只是 ho世界變gah 更加亂操操nia nia。
好佳哉di 世界上 無人會使做到 zit件代誌, diorh是因為做未到, ziah 有hiah 濟人想講若是有會外好, 但是無想著ia 是真正有, ziah 是 麻煩e開始。
雖然m知影 以後 科技 會進步到 啥程度, 但暗之中 應該有 注定zit種技術 無啥可能 發明出來, 因為 世界ma無像 電腦hiah簡單, 存一個檔案diorh會使 留到以後, 電腦若害去 diorh ui進前存e檔案 去找 害去e物件 來修理, 世界 無法度按呢做, 只有靠人 好好a維持 ziah會使 ho地球永遠保持。

daiqi007 發表在 痞客邦 PIXNET 留言(0) 人氣()

台語小品文 原諒 梁凱澤

這世間有六十憶 e 人口, edang原諒別人e 過錯gorh有qua ze人? 原諒 看來 真簡單, 但是ma 足困難。
原諒 其實是 赦免ga 己, an zuann 講? Gam講 m原諒別人, 反倒 變成仇人? 原諒別人, 放下仇恨, ga 己e心 ma vue一直鎖diau e, 心ma vue為diorh 歹代誌 想siunn ze, 傷腦筋, 你講 是m是? 原諒別人 其實是 赦免ga 己, 為ga 己好。

為什麼 vue原諒別人? 是為diorh ga 己有器度, 阿是 慈悲為懷? 每一個人 攏是會 犯錯, 連神仙 攏會失手, 何kong是 普通人? 每一個 犯錯者 攏 希vang人 hit道原諒e光edang cua伊倒轉去 正途。 反背gah原諒e 作者, gah伊e前夫 打官司, 掩kam ga己e病情, 到最後 勝訴e關鍵 是 選擇原諒。 di 原諒中, 體悟e道理, 比失去e物件 閣卡珍貴。 為什麼vue原諒別人?是為diorh體悟e道理, 是為diorh 犯錯e人, 是為diorh ga己。
俗語 講gah足 好:人情 留一suann, 日後 好相看。 對一個 罪不可赦e人 vueh按怎原諒, 我講是-- 原諒 其實是 赦免ga己。

daiqi007 發表在 痞客邦 PIXNET 留言(0) 人氣()