daiqi007

七里香 張春凰

續連幾工ｅ 悶氣， 低壓 熱對流 帶來 下晡ｅ陣雨， 內底ｅ燒hip 猶未退消， 外口ｅ雨聲 急來 滴滴答答。
昏茫ｅ雨 落di暗頭， 日時ｅ溫燒 閣deh延續， 雨拍樹葉 pi-pi-piak-piak。
日出， 土腳 一片濕澹， 樹圍仔 ｅ平面 有盛開ｅ月柑， 土面ma 鋪了一層白花， 親像 四月雪 油桐ｅ落謝。
隔一片 圖紋打造ｅ 鉛線圍牆， 隔壁ｅ村落， 桂花 仝款墨綠， 光線下， 細膩注目， 葉片di 風中微動， iau無 細細米粒大ｅ 花蕊。
月柑 盛開lo！ 做 中秋ｅ先鋒， 月眉ziah deh變大， 啊！ 昨暗 雷震傳， 無月光， 你ma 綠海白雲， 無人看顧， 盡情驚艷， 這是 你ｅ時節！
閣是 大炎日ｅ下晡， hiong-hiong 暗淡落來， 做一個預告， 厝前厝後 烏雲罩霧， 一波一波ｅ 雷聲， 一直ｅ-sak 過來， hong-long hong-longｅ天音 再來臨， 雷公sih-nah 包抄， 密密捷捷， 金光滾絞、 咆哮轟叫， 氣勢 排山倒海。 天地爆裂、 生命拓展， 大大細細， 等待何時？
溫和ｅ平時， 你用 一陣一陣ｅ 暗芳 放送 厚重ｅ味， 飄送 七里、 九里、 千里、 萬里， 閣有 柑仔味ｅ 誘弄。
雨來日猛 你di 雜草中 展出 你ｅ清秀。
天頂ｅ雷響 再度 為你 先鼓開路， diorh di zit個悶hipｅ 午後， 拍開 心內ｅ門窗， 你 清秀ｅ身影， 天地間 佔一席 掀開阮 心冊ｅ一頁！
(20100910下晡)

第二款意見思考法 張春凰 (選自 《台語世界級錦頭腦》)

第二款意見思考法， 是 江永進教授 所提議， ma是 伊di 學習、 教學、 研發、 生活中ｅ 思考細胞。
第二款意見思考法， 是用 第二種意見(Second Opinion) 來思考、 表達 你ｅ想法。 簡單講 diorh是 針對一個 命題、 話題、 定點， 刁工提出 第二種無仝款ｅ意見。
第二款意見思考法， 是 一種 真簡單 引導入去 思考ｅ 練習法。
Veh提出 第二種意見 可用 正反、 橫直、 左右、 前後、 單複、 加減、 混合、 交叉、 推理、 跳脫、 超越、 集中、 擴散、 質疑、 反對、 贊同、 辯論比賽 等 方式， 反應出 各種意見， 交互 激發腦力。 平常時，第二款意見 定定演練 使得zit個 第二款思考法， 有 足大ｅ機會 想著 突破點， 往往 會助咱 來 跳出 局限di 某一個 死角ｅ 困擾， 或 發覺一寡 奇妙ｅ樂趣， 甚至 知見著 別人 生目睭 mvat 看過ｅ 代誌、 生耳仔 mvat聽過ｅ 話語 或 解決問題ｅ 辦法， 再 進一步diorh是 創新發明 lo。
江永進教授 所提ｅ 簡單公式 是 P = n / N 。
P = n / N (這基本上是 統計ｅ 大數法則) ，小 n代表 成功ｅ次數， 大 N 是 試驗ｅ次數， P是成功ｅ機率 ，只要 N成本低， diorh可 大量去試驗， 因為P固定， 所以n 成功次數 diorh變大。
自 小學開始ｅ 作文課 來看 這 是 典型ｅ 第二款意見思考法， 仝款ｅ 作文題目， 全班ｅ學生 每一個人 攏有 無仝款ｅ 文路gah情景。 對著 仝款ｅ問題， 眾多ｅ看法 攏有 可能出現， 生出各種ｅ 觀點， diorh是 第二款思考法ｅ 特色。
換 一句話講， 你ｅ 智力銀行 內底， 儲存真濟 奇奇怪怪ｅ 步數， 見招拆招， 顧問、 評論家、 意見領袖、 領導者、 發明家、 節目主持人、 心理醫生， yin 不時不陣 自然 反應出 對 事物ｅ觀察 省思， 年久月深 了後， 親像 你ｅ褲袋仔 內底， 貯著 真濟球， 看款情形 你diorh qim出球， ui 你ｅ手中 順順仔 去 應對 閣會發光。 第二種意見思考法 一旦變做 你ｅ 天生ｅ個性 以外ｅ 習性特質(second nature)， 浸透 di 生活中， 按呢 你diorh是 專家人才、 社會ｅ精英， 個人迷人ｅ 氣質、 自信ｅ氣度 diorh會 自然流露。
“為什麼”、 “是什麼”、 “veh什麼” 攏是 培養 第二種意見 思路ｅ 基本功， 簡單講 可化做 “5W、 1H”ｅ原則。 對 可能發生ｅ 無數濟ｅ量、 用無仝款ｅ 角度、 方向 去試驗， 閣檢驗 yinｅ可行性、 可靠度， 數量大， 成功ｅ機率 diorh會 隨機增加。
用 減肥 做例， 各人有 各人ｅ 方式gah主意， 有人提出 運動ｅ建議， 有人講 反意見， 理由是 運動了 腹肚真iau， 閣去食卡濟 顛倒 瘦ve落來； 有人提出 節食、 素食； 有人講 先 享受美食 了後， 再去做 灌腸、 斷食、 排毒； 有人講 食飯ｅ順序 m對， 愛先 食果菜 再用 卵白質ｅ 豆肉類； 有人講 先天有 肥ｅ基因， 無法度 控制； 有年紀a， 新陳代謝 慢a， 體重 減ve落來； 有人叫人 去割脂肪； 有人指責 你無耐心 做養生， 自暴自棄 等等； 免不了 ma 有人招你 去跳 有氧體操、 去健身房、 做YOGA、 朝山拜拜； 面對 以上 ｅ論點， 提出任何ｅ 第二個意見 包括 支持gah否定 所有ｅ 可能性 攏是 提意見ｅ 思考法。
所以， 第二款意見， ma可提供 選擇性ｅ 供需商機， 比如 聰明ｅ 生理人， diorh會針對著 健美、 驚老、 驚死ｅ心態， 提出 有機食品、 纖維食膳、 健身房、 太極拳 等 多樣多種ｅ 產品gah活動， ho你 有機會 去揀， 有效無效 去試diorh知， 市場銷路 diorh是按呢 出現ｅ leh！
健身房ｅ 器具設計， 又閣 可連結 工具功能ｅ 效用， 效用本身 diorh是 創新調整ｅ 需求。 Zia-e 需求本身 是 供應者 gah 消費者 背後 無數ｅ意見 所發展cuaiｅ 面貌。
誠實ｅ 創新者 永遠無 絕對ｅ解答， yin 會 不時挑戰 家己ｅ智力， zia-ｅ 腦筋動deh緊ｅ 才子gah才女， 用無滿意 家己成就ｅ 心性， 或者是 因為 興趣， yin用 另類ｅ 想法gah 眼光 歡歡喜喜 去創新， 一世人 發明 一大堆 新物件， 對作家 來講 diorh是 創作出 一大堆ｅ 作品。
第二款意見 是 破壞性創新ｅ 一種設想， 用甲式 試看mai， ma用乙式 試看mai， 各種想法 edang有 互相比較、 交替、 驗證、 連續、 改良ｅ 作用。 物理學家Richard Feynman[理查 費曼1918-1988]， 對 蚼蟻行路ｅ 好玄 觀察著yin 直線行路ｅ 方式， sannh迷著 後來ｅ 科學家， 根據 按呢ｅ想法 科學家 yin閣發展出 “蚼蟻行路．演算法”， ga zit套演算法 用di 電信、 資訊、 水資源、 運輸、 工廠管理、 軍事戰略， 後來 又閣出現 “群體智慧”、 “蟲群戰略” 等 新辭彙。
發明 gam diorh愛 親像 得著Nobel獎ｅ Feynman， hit款天才？
發明真困難？
發明gam有簡單？
薰包gah糖仔包ｅ 包裝玻璃紙， 有一細條 金金 可qiu開ｅ 塑膠線， 親像 食物配醬 小包ｅ hit個 小小ｅ缺口， 咱 是m是 動一下手 來查看 專利ｅ網頁， 看veh 按怎 查著 zit個 小小ｅ發明？ 各種 關鍵詞ｅ 搜尋 以外， 閣有什麼 可用ｅ 其他辦法， zia-ｅ 其他辦法 攏是 無數無限ｅ 第二種想法ｅ 本尊gah 分身。
思考帶領 實用ｅ實現。 實用ｅ發明 對比 概念ｅ 思考法， ui 專利ｅ觀點 來看， “概念” (idea) ma edang申請專利。 比如 2002年4月初9 美國專利 第6,368,227號， 五歲ｅSteven Olson ， diorh 申請著 “hainn韆鞦”ｅ 專利， 伊 提出ｅ 新解法 是 di hainn韆鞦ｅ 過程中 用手 交替輪流 qiu 韆鞦雙爿ｅ 鐵鏈仔， 按呢ｅ理由 顛覆傳統ｅ 踏地liong腳ｅ 推力 gah 黑猩猩ｅ 統合體能。所以講 創新想法 是 一連串 無仝款想法ｅ 成果。
現主時 逐個ga “know how”掛di 嘴舌 不如 家己動腦， 思考 是 天生 上好ｅ禮物。 第二種意見思考法 是 上簡單 、 上好 ho你 訓練思考ｅ 法門之一。
初念淺 轉念深， 初淺ｅ念意， 有人 看過、 想過、 聽過 閣ga 當做 一回事， 引起 好玄、 興味， 用心力 去追究 通常會 激起 第二種思考法， 舊ｅ 第二種思考法， 可能 ho 上新ｅ 第二種思考法 取代， 按呢 一直 循環推演kia di 頭前ｅ 經驗 所累積ｅ 成果， 會幫咱 向前sak 步。 初淺ｅ念意， 一再轉seh、 靈活運用， 轉念深入， 日子一久， 微觀 會擴展做 宏觀。
第二種思考法， di 日常用qin-aｅ講法 ， diorh是顛倒頭看(up-side-down)， 日本兒童詩人 窗．道雄 有出一本冊叫做 《另一雙目睭》， 意思是 叫咱用 親像qin-aｅ hit對無限制ｅ 目睭 來看 世間ｅ物件， diorh有無仝ｅ 發見。
初念淺 轉念深！ 煮飯、 行路、 陷眠ｅ 時 攏可有 變化、 自由、 開放ｅ 思考練習， 電腦界奇才 Steve Jobs 講：“想無仝ｅ！” (Think Different！)， 用按呢 去試看mai！

後記：
江永進教授 gah我 做伙生活 30冬， 我聽伊ｅsecond opinion 超過 30冬以上。 伊 製作 台音輸入法 等 軟體、 整理 台語拼音系統、 研發 拼音教學法、 做 語音辨識、 語言翻譯統計 等， ma有專利製作。
2009年3月， 發表di《台灣風物》第59期ｅ 〈讓格書寫： 意義、 理由gah 簡則〉， 經由 伊一世人ｅ second opion方法， 觀察 深思 歸納 簡潔 表述gah計算著 “space書寫” 演化、 普遍需要ｅ 價值。 伊所講ｅ“simple and powerful”、 “practice makes progress”、 “bring the goodness out together”、 “成功 是 唯一ｅ 美德”、 “無未來 diorh無傳統”、 “練習練習 閣練習” 等等， 對我 影響足大。
有 本冊ｅ出世 定著愛 講著伊， 因為 是 伊ga “影響全世界的50個經典思維”買轉來 厝裡， ho我 一口氣讀了 ， 決定veh做 學期ｅ 參考冊 之一。


註解：
“5W、1H”是 who、what、when、where、which， how


延伸閱讀：
廖和信。專利，就是科技競爭力。 台北： 天下， 2003。
Eliyahu M. Goldratt著；羅嘉穎 譯。 仍然不足夠：ERP加TOC的企業電腦化新境界。 台北 : 天下遠見，2004。
Claytin M. Christensen 著；李芳齡 譯。創新者的解答。台北 : 天下遠見，2003。
王家玲。 費曼與螞蟻 好奇走出一條路。 見 http:/e-info.org.twfspecies/2003
Michael Marquardt 著； 方吉人 譯。你會問問題嗎? 台北：臉譜，2006。
齊藤孝 著； 傅稜君 譯。 提問力。 台北：如何，2006。
窗．道雄 著； 米雅 譯。 另一雙眼睛。 台北 ： 信誼，2002。
江永進、 楊佩琦、 林淑卿、 張春凰、 高明達、 呂仁園、 陳孟彰。 讓格書寫 以及 台華互譯 初探。 第二十一屆 自然語言 與 語音處理 研討會，p.399-413。 台中市：中興大學 資訊科學 與 工程學系etc.， 2009，9月1、2日。
江永進、 張春凰、 呂菁菁。 讓格書寫：意義、理由gah 簡則。台灣風物，vol.59，第一期，p.111-132，2009，3月。

萬物攏有情
天送伯

嗨！各位鄉親序大、囡仔兄，天送伯足久無講古囉！趁著這擺新校舍落成出校刊ē機會，講一寡gah生物有關ē代誌，遮攏是天送伯頭手放送喔！稍等一下，話先踏頭前， gah正港專家上山落海，歸年tàng天研究比起來，我這種算cit-tŏ (業餘)爾爾，逐家罔看罔看，若無精彩di遮先講失禮。
※接觸
在萬物界「人類」的名聲真bhài，屬於看著影就驚ē「惡類」，愛欣賞大自然ē少數人只好zà吊鏡，穿偽裝衫來「接近」。二十外年來遇到無將我放在眼內ē動物，實在無幾擺，用手指頭仔就算會出來。上刺激ē場面有兩擺。第一擺是du來天送埤十一月天ē一个拜六，hit 當時拜六愛讀半工，利用下晝，一個人位學校行去九芎湖看鳥仔兼運動。行到一爿全是種竹仔ē所在，難得東北季風làng縫，「秋」是一隻溫純白貓，「山」是一條青底繡花巾、、、-
風吹竹搖葉仔歇
戲班山娘來相招
日斜照
輕鬆一身挑
已經行兩點鐘ē我bhe悿顛倒有淡薄仔醉了。雄雄感覺有踢著物件，斡頭一看，阿母喂！一尾龜殼花橫di路面斜頭看我，m知帶念我是新老師？ia是天氣冷sian –siān笨duan 咬我，若無，荒郊野外zit聲我無死嘛半條命。
第二次是今年熱天，我ga猴演一齣二十分鐘ē對手戲。hit工di bheh中晝，我準備bheh落山，真du好一陣野生猴群向我行過來。路就ziah大條，我想講in會bè樹仔閃開，想bhe到歸个猴陣di我附近停落來，扒癢ē扒癢，食物件ē食物件當作無看著我；三、四隻猴仔囝走來我身軀邊踅來踅去，無閒cì-cih，對我這个像猴ē生物充滿興趣。有時叫出聲、做出引起我注意ē動作，有時ua近，手bheh 摸 m 摸，興gor驚ē模樣真是古錐。猴仔囝e眼神ga表情和咱小朋友仝款仝款，原來「好奇」ga「天真」是萬物囡仔時共同ē標記。ze二十分鐘我只是小角色，乖乖kia diàm遐，除了手振動翕相，攏無徙腳，過程親像看一部刺激緊張ē電影。
※溝通
會記得十幾年前報紙寫講，宜蘭一位厝主因為著路，m甘伊厝前hit叢大樹ho人剉掉，一直反對，四界求情，最後公所同意ga樹仔徙走，地主zia無gorh再堅持。本來每工尾暗攏有真濟鳥仔會飛來歇睏，鳥仔聲鬧熱滾滾；等協議決定，厝主將徙ē日子ga大樹講，講也奇怪，bheh徙ē前一工，鳥仔竟然攏無轉來，歸叢樹仔恬恬恬。
最近嘛有新聞報導，一隻四十幾歲ē猩猩過身，十幾隻同類『哀傷目送』。可見傳達意念，表達感情m是人類ē專利。
我捌聽過『腹斑蛙』ho『白腹游蛇』咬著臨死ē哭聲，也捌聽過平常時吵ga bheh死ē粟鳥仔談戀愛所唱ē綿綿情歌；接觸大自然屢久屢相信萬物攏有家己溝通ē方式。我聽上久一遍動物對話，主角是『食蟹獴』。
今年春天ē一日早起，我去福山植物園做志工，一隻『食蟹獴』發現橋頂ē我，伊無啥情願若行若叫，慢慢離開溪邊向樹林入去。橋腳這條溪只cūn『攔砂壩』hia有一窟水，一堆苦花困di遐無所在通去，看來是我攪擾伊掠魚。失望兼抱歉ē心情ia bhe落底，仝一个水邊竟然出現第二隻，無幾秒伊嘛看著我，m過並無走，ga樹林hit隻互相發出聲音，聲音有懸有低，有長有短，親像dit討論，伊若叫若dān頭看我，留ia m留？走ia m走？躊躇ē動作真明顯。代先離開hit隻gorh位樹林出來，行落來溪邊口氣無好和第二隻又叫一kun，甚至起了衝突；最後各自堅持，第一隻仝款選擇離開，第二隻留落來，奮鬥二十幾分鐘掠著一尾魚。
※放生
我來憲明十幾年，一直在保育議題教育學生。拄來hit兩三年，定定有鳥仔不幸撞著玻璃翹去，排頭一名是『鶇科』，有一年寒天，天送伯騎ōr-dor-bhài欲來學校上課就是ga一隻『虎鶇』高速對撞，造成一死一輕傷。咱ziap看著ē「粟鳥仔」、「白頭殼仔」顛倒真少發生這種代誌，就算飛入教室嘛會曉家己飛出去。後來我和學生di玻璃頂貼紙，要求學生放學ga窗仔門關hō好，類似不幸ē代誌ziah減少。
有一年秋天一隻『赤腹鶇』撞著玻璃昏去，嘴角有血，學生想講死去，三个人你一句我一句報我緊去處理，頭一擺接行政ē我當dit無閒，隨嘴應講「死去就dàn去糞埽桶」，講完感覺無妥當ia是撥出時間過去，一囥di手底伊就精神啊，好佳在無判伊死刑。我講：「伊看起來無要緊，咱同齊來放ho伊飛。」四个人行去後壁停車場，bheh放ē時陣聽伊「啾」叫一聲，我ziah發現m知何時邊仔ē樟仔已經恬恬飛來四隻仝款ē『赤腹鶇』，gan-na來提醒我「人dit做，天dit看。」
頂個月，四年仔發現一隻被烏秋啄落來土腳ē『小雨燕』，愛看鳥仔ē人士攏知影『小雨燕』是無法度家己位地面飛起來，這幾个有愛心ē學生救了伊一命，看來人ga動物ē故事並無隨新校舍起好，舊校舍拆除來消失。
m知新校舍zià-ni濟窗仔門，對生物是好？ia是bhài？
m知未來ē鳥仔是m是ga學生仝款屢來屢少？
Hit隻燕仔歇兩節課了後用眼神表示伊恢復、、、「燕仔飛低低，起厝買田地；燕仔飛懸懸，囝孫中狀元。」放手時ē期待ga祝福，十幾年來攏無變。
天送伯2009/11/13

溫柔有情的旅行詩路
──序張春凰台語詩集《旅行心詩》
胡長松

成做一个台語文學運動者、教學者、散文家、詩人，張春凰新的詩集《旅行心詩》近期欲出版，已經距離伊寫第一本散文集《青春ｅ路途》將近20年矣，予人驚奇的是，詩文內面青春的氣力，並無因為時間反黃去，伊的心，續是愈來愈有活力，愈來愈溫柔，嘛愈來愈清醒。我想，這是伊對生命的體會佮對台灣母地的感情直接的表現。
《旅行心詩》講是「旅行」，實際上，是對台灣山林的「行禮」、「巡禮」開始的。張春凰成做詩人的筆，位山野、氣候、樹林直到動植物，有全面性的鋪排，而且閣毋是乾焦囥佇平面地圖彼款的紀錄，詩中有留落伊成做詩人意識的有情觀照，嘛時常出現伊佇歷史的小路出入行踏的跤跡，確實是值得咱款款仔品讀的溫柔「心詩」。
講起心詩的有情觀照，我真佮意伊所寫的〈大雨〉中的詩句，描寫的是一群老同窗旅行途中的大雨：

車窗糊一面水廉
薄紗內外
互相看ve清ｅ面貌
只有真實沈底ｅ同窗情誼
添加心內ｅ感動
愈遠愈深

按呢的詩句，描寫大雨中車窗的景緻，描寫同窗的情誼，嘛同時描寫詩人本身的心情，這款多層次的描寫佇詩句疊貼做伙，就是即款「心詩」的眉角，嘛是將眼中風景「詩化」（或者講是「文學化」）的基礎。透過即個詩化的過程，風景不再是水tsiann2的風景，轉化做有詩人意識存在當中的有鹽份的藝術，閣親像即首描寫東北海岸的水佮石的〈依戀〉:

海水潑來 石e腳底
輕聲細語
勻勻仔ga搭貼

海水爬附 石ｅ半身
吟調唱歌
柔柔仔ga攬腰

海水攀纏 石e耳際
款款仔ga獻心詩

海水流洗 石e頭面
深情深意m甘離

看會出來，張春凰的作品是屬佇春天浪漫的詩質。詩裡時常是溫暖、歡喜、輕鬆的色水，這展現的，是詩人佮風景之間的「親密」：因為「親密」，就袂共風景看做普通；因為「親密」，嘛袂共石頭當做無生命的焦燥的物件；因為「親密」，嘛給咱佮風景之間的疏離感縫補起來。確實，佇人佮環境分裂甲這呢嚴重的現代工業社會，咱需要這款有心的詩，來回復咱佮環境的關係。另外，這本詩集內面，有幾首詩是詩人的心佮歷史風景的互動，比如講下面即首：
綠島組曲之五 目屎池

一堵刻烙囚禁者名字ｅ石壁
親像越戰紀念碑ｅ勇士
白骨一堆
無可回頭
來述說稀微ｅ流年

短月長年
吞辱忍冤
暗茫無盡ｅ哀思
親像岸邊ｅ海湧
無停止ｅ吞蝕抽絲

一直到
愛ｅ目屎 淨化了怨恨ｅ苦海
一直到
愛ｅ目屎 珍惜了受難ｅ卑微

　 位詩的風景tshua咱進入歷史的觀照：因為有心，目睭前的風景成做有歷史意識的風景；因為有情，風景嘛成做有情味的詩。詩一首過一首讀落去，就親像咱一步行過一步的旅行。這一系列的旅行，位山林行入夜都市，佇〈銀樓珠寶街〉出現按呢的批判的風景：
世人只愛鑽石e高貴
超級e財寶物
ve記得gor著qin-a e血gah目屎
流血留滴e烏市gah虛華ham罪惡e非洲e內戰
　　
　　即首詩值得咱注意的，是風景中「陰影」的書寫，將鑽石的高貴佮伊背後的罪惡牽連對比，詩人真有把握的能力：

行過銀樓珠寶街
一陣一陣ui遙遠ｅ烏色世界殘酷ｅ相殺陰氣
通過歸身軀 起一陣一陣e加冷sun
鑽石商ga引進來台灣
為著用血洗過e超級錢寶物
銀樓珠寶街e店頭 加上一牌告示：
“本店裝備保全系統連線監視控中”
自按呢了後
冤親債主糾纏due 絆
無了時

　　毋過，按呢的物件佇這本詩集內面算是佔較少數的，講起來，可能嘛是春天的氣質對題材自然選擇的結果。

　　即本「心詩」「旅行」的後半段，位山林都市，行入詩人人生旅行的體會。我上佮意〈壁角ｅ舊腳桶〉，詩人按呢描寫伊佮老母的感情：
壁角hit個鉛做e舊腳桶
桶沿
若阿母你ga我做e
hit 領有滾邊 捏ging荷花裙

iau有hit塊ce衫ｅ cing仔
塑膠e鬃毛 減一半
若阿母你e
hit支lu假嘴齒ｅ齒抿仔

你拒絕新衫
講：
“ gorh食無外久
舊衫穿穿leh dor有夠a
mtang浪費”

iau有hit塊
表面nua gah金金、滑滑
邊仔suah ki角
你用來家己洗衫e
老cuah板仔

恬恬陪你勇健e
歲月流金

　　詩的表面平實白描，毋過詩裡的形象遐呢親切，閣遐呢真實突出，透過生活中細項物仔的對比，將母仔子互動的感情款款仔鋪排出來，規首詩感動人的所在是觀察的幼路、飽紮，窮實講，這嘛是咱理解張春凰詩藝的基礎：伊的詩，的確就是溫柔感情的直接表現。這款溫柔的感情正是伊過去所寫的散文的本質，是伊一直做運動的氣力來源，嘛是即本詩集的一切內涵，位外表的世界達到內心上燒lo的所在。
　　戰後的台語詩運動發展到tann，除了已經出名的詩人，嘛有濟濟佇台語文相關推展教育班、讀冊會等團體裡底開始寫台語詩的「詩眾」，每一年的詩作發表愈來愈濟，算是一個好現象；毋過，位另外一方面來看，平時會讀詩的民眾敢有增加？這是台語詩發展的另外一個挑戰。按怎兼顧大眾性佮藝術性，予愈濟人讀有好詩，甚至透過詩，佮讀者的生活、生命有牽挽？我想這嘛是張春凰佇這本詩集想欲行出來的路──用伊特別的抒情的書寫，行入空間佮時間的旅行。
張春凰的詩透過旅行行入風景，嘛透過風景行入咱的心，成做咱的旅行。所以，所有欲走揣春天的讀者，請趕緊來讀張春凰的詩，你就會行入這紲有百款面容的春天旅行。



2008/12/16 佇高雄內惟

心ｅ台灣，台灣ｅ心
—歡喜讀春凰ｅ《旅行心詩》
李敏勇

《因為在旅行》是我的一首詩，是我在韓國首爾參加一個世界詩人會議，心有所感，留下來ｅ記憶。

「因為在旅行 ∕ 我無自己的茨 ∕ 從旅館的窗仔 ∕
親像會看著佇海彼旁的茨 ∕ 彼是投影佇空氣中 ∕
漂浮佇雲層頂面的 / 幻想 / 感覺孤單 ∕ 因為自由的緣故∕
空虛的房間 ∕ 空虛的眠床 ∕若親像空白的紙 ∕
等待筆尖振動 ∕……」

旅行是一種佮日常真無共款的代誌。我時常旅行，大多時間攏偕家內。夫妻二人做伙去旅行的感覺，當然比一個人的孤單較好。旅行佮日常生活比較，是詩佮散文的比較。旅行會形成成詩，是真自然的情形，看著張女士春凰的詩稿《旅行心詩》，會感覺出伊想要呈顯的意思。一個愛詩的女性，用伊的福台語 - -也就是通行台灣語文書寫，一首一首詩佇我的目睭前被我閱讀。
閱讀這疊詩稿之前，我gah家內去看電影，佇彼遇著春凰gah伊的先生永進。Yin夫婦是熟識的朋友，先生是數理統計的教授，佇清華大學教書。兩人都推動福台語書寫，嘛攏寫詩。真打拼的二個人。頂回永進有一手詩稿，我無幫伊寫序，真歹勢。這一擺，春凰希望我為伊這本詩集寫序。無法度自由運用福台語書寫的我，接著詩稿了後，讀啊讀，一擺過一擺，想要用我生疏的福台語佇伊這本詩集頭前踏話頭。
《旅行心詩》，看起來是藉旅行抒寫心思的意思。詩集的背景是旅行。因為在旅行，一種特別的心思會流露出來，一些語境佮日常生活時的柴米油鹽不共款。以生活為基礎，但又不是日常的點滴，詩常常意味的動人情愫在這樣的行句之間，散發著也延伸著。
《旅行心詩》收錄「阿里山ｅ交響詩」、「太魯閣、合歡山ｅ天音」、「綠島組曲」三輯，分別是思想起台大數學系1977級畢業三十冬同窗會，台灣之美國家公園詩路以及以綠島延伸兼及春凰與夫婿永進的生活記情。作品的豐富性顯示作者詩歌寫作的熱情與用心。
春凰用詩寫日記，在《旅行心詩》中可見一斑。從輯1的「阿里山ｅ交響詩」來看，藉著參加夫婿永進台大數學系畢業三十冬同窗會，離散分居在台灣與海外的同學做伙在台灣旅行，她不止逐日，而且一日數詩留下深情記事。消失的青春，成熟的人性，三十冬的牽連在島嶼台灣的旅路留下心影。
春凰將人性的回憶印記佇台灣的高山行路，沿途的里程佮人生的旅程相對照，描述的風景有水平的台灣，也有垂直的台灣。以一首一首詩的行句，就像相機的一張一張形影， 跟隨著春凰的心， 投射在紙頁的是對台灣這塊土地的戀春和愛。《旅行心詩》就是這樣的一本詩集，記錄並描繪春凰gah伊身邊的人的島嶼心情風景。台灣佇詩內面，詩內面有台灣。
讀春凰的詩，親像讀一個台灣 女性佇人生的一個階段在觀照性命印拓的土地，女性心佮台灣心相映，一種特別的風景，特別是伊用台灣本土語文來書寫表達，讀起來意味更加無共款。
伊愛台灣的心佇旅程中投射佇動物佮植物的形貌，「烏熊」、「水鹿」、「山貓」攏出現佇詩內面， 「紅檜」、「銀杏」、「月見草」、「百合」嘛受到注目。生態自然風景中的地貌，在東台灣的斷崖、港口、溪流，標示著勇壯的山海子民，流露伊心愛的氣慨。

烏森林自然ｅ一切難ve倒你
只有陷阱困鎖著你ｅ靈魂身心
—〈台灣烏熊〉

月娘來相見
草花串掛月金黃
—〈月見草〉

川流跳躍 一山過一崖
千尺絕谷心ve 驚
萬條瑞氣伴山水隨意流走
驚詠生命ｅ歌
—〈立霧溪〉

讀春凰的《旅行心詩》，親像讀春凰的台灣心。伊gah永進兄一對關心文化，佇台灣語文的書寫投入精神的伴侶，流露在《旅行心詩》的一首一首詩，是yin的心印佇台灣土地的痕跡。佇咱的土地旅行，有自己的茨，ve感覺孤單。
歡喜讀春凰的《旅行心詩》，有詩、有咱本土語文探索的努力。相信， 每一個讀這本詩集的朋友， 會發現新的風景， 感覺連帶佇咱土地的心。

街頭巷尾 通人知ｅ Nobel
張春凰

1. 普世價值
Di我大學畢業 veh請厝內人 ui南部 來北部 參加 畢業典禮ｅ 時，二姊a ga我講：“等你得著Nobel獎， 阮ziah 來去參加！”雖講 這是一個 鼓勵象徵性ｅ 約束， 我卻得著 一個 真可貴ｅ禮物：“ a-quat： 媽媽 di厝裡 等你轉來！”這是 mvat進入學堂ｅ 阮老母， 一世人 頭gai舉筆 寫ho我ｅ 第一張批 啊！ 接著zit張 字畫歪歪ｅ 家書， 無輸 去得著 Nobel獎ｅ 歡天喜地。
1995年 阮寫一篇 〈M是ganna 胃酸過多 會引起 胃潰瘍 niania〉 登di 台灣語文研究社通訊 第四期4月。 Zit篇 deh 講 澳洲ｅ 少年醫師 Barry Marshall發現 胃幽門螺旋桿菌ｅ 經過gah 醫治法。 十冬後， Barry Marshall 得著 Bobel醫學獎， 真歡喜 di十冬前 阮有眼光， 用台文 寫zit篇 預知記錄。
1998年中， 阮一群人 去中研院 做伙gah 李遠哲院長 討論 台灣三大語gah 國際英語潮流ｅ 拼音問題， 李博士 是 1986年 得著 化學Nobel獎， 伊出世di 台灣新竹。 伊 重視 台灣ｅ 現代化教育。
2004年11月27-30號， Turkeyｅ Orhan Pamuk 訪問台灣， 期間 來清大外語系 做一場演講， hit當時 du好我 di外語系 gah 廖炳惠教授 做國科會ｅ 計劃， 間接gah Pamuk 聯絡 ma有 一面之緣。 Pamuk得著 2006年度Nobel文學獎 這diorh是 阮gah Nobel 有一寡寡 實質相關ｅ 所在。
自從Nobel設獎 以來， 無國界ｅ 獎賞 全人類 年度ｅ 最高成就 獎勵 成做 全球 上顯目ｅ 榮譽。 逐冬ｅ年尾， 正是 Nobel頒獎 鬧熱滾滾ｅ 典禮， 不止是 瑞典皇家、 學院ｅ 大事， 得獎人ｅ榮光， ma是 全球期待ｅ 重要時刻。
Di London Buckingham Palace[倫敦 白金漢宮]附近 有 一棟大樓 叫做 Nobel大樓， 加拿大gah美國 有 因為Nobelｅ產業 繁榮起來ｅ 城鎮。 以 咱di 台灣ｅ 街路中， 隨時可看著 Nobel冊店、 Nobel幼稚園、 Nobel才藝班、 Nobel醫療團、 Nobel生物科技、 Nobel食品 等等， zia-e 公司行號、 教育機構， Nobel代表著 品質保證、 精良ｅ 技術研發、 優秀ｅ 人才培養。 有時聽著 厝邊隔壁 開嘴會ga qin-a講：“將來 得Nobel獎！” 口氣充滿 做你去拚， 若拚會著 按怎 攏甘願。 我想， 這diorh是 為什麼 hit當時 阮姊姊 ga我 按呢講ｅ 通俗意義。 Nobel 變做 街頭巷尾 通人知ｅ 榮譽， 伊 是 人類 上進ｅ燈塔， 永遠 di眾人ｅ 心目中， 閃閃sihsih。
Nobel 是 無拍折扣ｅ 國際化 gah 在地化ｅ 先覺者。 Di 國際化效應 形成 無國界ｅ 成功目標 之下， 延伸 無數ｅ 在地化 跨國ｅ 英雄崇拜 圖騰 – Nobel 金獎章， 為世人 立下 上珍貴ｅ 普世價值。

2. 瑞典ｅ國寶-- Nobel
1833 年 Alfred Bernhard Nobel 出世 di Stockholm [斯德哥爾摩]， 老父Immanuel 是 頭腦靈活ｅ 企業家 gah 發明家， 老母Andrietta 出身農家 真耐苦 特別有愛心gah同情心。 Alfred出世ｅ時， du著家中 破產， 後來 經過 大起大落， 天生 有 發明研發ｅ 基因遺傳， Alfred一世人 ma有 真濟發明 一生 至少有 351項專利， 其中 炸藥zit項 得著巨大ｅ 財富。 憑 yin老母ｅ 仁慈身教 gah 伊本身ｅ遠見， Alfred di 1985年 在巴黎ｅ瑞典 - - 挪威俱樂部 立好 遺囑， 後來 以 3100萬瑞典krona [克朗] 成立基金會， 基金ｅ利息 每冬 頒獎ho 前一冬 為人類 做出 大貢獻ｅ人， 來表揚yin 所起造ｅ 大功勞。 Zit筆獎金 用意在 研究者、 專家 di 生活所費 無操煩下 可繼續 安心做kangkue。
Nobel獎 瑞典文 是 Nobelpriset、 挪威文 是 Nobelprisen。 1901年開始 頒發 物理、 化學、 生理gah醫學、 文學、 和平 五個獎， 1969年 增設 經濟學獎。
Di zit六個Nobel獎項 概括 主要ｅ 人文gah科學 領域， 雖然 無ga 數學成就 納入， 後來 di 計算機科學ｅ Turing Award [杜林獎]， hong冠上 計算機科學Nobel獎ｅ 頭銜。 其他 由 Annals of Improbable Research (AIR 科學幽默雜誌) 所主辦ｅ 笑詼Nobel獎 --“the lg Nobel Prizes”， 攏 是 循著 Nobelｅ腳步 做 進一步ｅ 擴展， 人人認為 gah Nobel仝名聲 是 無上ｅ光榮。 東方ｅ日本， di 2001年初 更加 立下目標 di未來 50冬 veh 得著 30個 Nobel獎， 前瞻性 鼓勵ｅ 意義大。
Nobel獎基金會 嘉惠 世間人， 伊 成立ｅ過程 值得dizia 做 淡薄仔簡介。
Nobel指定 伊ｅ 助理Ragnar Sohlman gah 工程師Rodlf Lilljequist 做 伊ｅ遺囑 執行人。 遺產金額 巨大， 跨國企業 所牽涉ｅ 經濟gah法律 範圍複雜， Sohlman數人 經過數年 不斷走zong， 美好心願 總算實現。
基金會 ui籌備 到運作 為什麼 需要hiah久？ 因為 遺囑聲明 獎金 無分國籍， 只要是 上有成就ｅ人 攏有份， diorh按呢， 一寡 有牽連ｅ 親成 gah Nobel 交往過ｅ 查某人， 攏有意見， 因為 有人想veh分， 甚至 瑞典國內 頂頂下下， 攏有 批評雜音， 認為基金 應該針對 祖國本土 人民ｅ福址， 不應該 分散， 後來 瑞典ｅ國王 ma認定 zit份 無國界ｅ 人類共同資產， 確實有 伊ｅ 公共價值， 事後證明， Nobel獎 不止是 為瑞典 帶來 永世ｅ名聲 ma帶來 真大ｅ 國力宣傳， Nobel 可講是 一位無賞ｅ 最佳外交官 文化大使。
助理Sohlman數人ｅ 功勞， yin 負責任ｅ態度， ma愛紀功。 這證明 一個 國家gah國民ｅ 水準， 成就 國家名望ｅ 美談、 美事， 是 無分你我。
Zitma 來看 Nobel效應， 直講 Nobel 是 瑞典ｅ國寶， 是 在腹ｅ呵咾。


3. 為人類 為祖國ｅ 心胸
性朗心空 望故鄉！ 是 Nobel為人類 為祖國ｅ 心胸ｅ 最佳寫照！
伊 心懷故鄉 顧全人類 無分你我， 看遠深思 心清明， 人生 gah 世間財富 仝款是 來來去去， 無代誌！ Alfred Bernhard Nobel， 以家族名 設獎， 正是 台灣人 所重視ｅ 第一門風ｅ 光彩、 第二祖公ｅ 根本， 伊 有大成就 閣是 一位 愛家鄉、 祖國ｅ 人格者。 在生 伊為祖國 為榮， 身後 祖國為伊 為榮。
老父先本 設di國內ｅ 企業， 因為火燒 破產負債， 因為 工業安全法 Immanuel先生 離開瑞典 去國外發展， zit份 堅強ｅ意志， 為家庭 重新kia起， 為子女 再造日後ｅ 根基， 不管 事業如何 發光， 最後 榮歸故鄉。
1886年 到1896年 10冬內， Nobel跨國公司 90外個工廠 已經遍布 21個國家， 歐洲以外， 加拿大、 俄國、 葡萄牙、 巴西、 澳洲、 日本、 南非 等 所在 攏有設廠。 伊 是 現代跨國企業ｅ 前行者。
除了 瑞典ｅ故鄉， 伊 di 德國、 法國、 蘇格蘭、 義大利 各有 卡穩定ｅ住所， mgorh 伊時常 di實驗室 deh無閒， 創新發明 是 伊天生ｅ 細胞， mgorh 伊 m是一個 冷血ｅ頭家， 對 員工 真照顧， 對 詩文、 語文 真重視， 更加 對人類ｅ 和平議題 關愛。
伊 會曉 多種語言， di巴黎 臨終時， 對伊ｅ 下腳手人 用 對方聽無ｅ 母語講話， di 人生ｅ關鍵 講 感情gah靈魂ｅ 話語， 這是 外呢仔 落葉歸根ｅ 意識！
因為伊 富裕無比， 一生 無婚姻、 無固定ｅ 家內， 四界有住所， 有人叫伊 是 好額高貴ｅ 流浪漢！
聰慧勤勞ｅ 紳士、 研究者、 企業家、 慈善家…… gah咱永別， 骨灰運回 故鄉ｅStockholm 安埋 di Northern Churchyard墓園， gah 伊ｅ 爸母兄弟 自按呢 固守著 伊ｅ母土 觀照著 世界進步ｅ 流動。



延伸閱讀

張春凰。 雞啼。台北：前衛，2000。
童鷹 。百年輝煌：諾貝爾gah諾貝爾獎。 台北縣新店市：世潮，2003。
科學月刊。 諾貝爾的榮耀 系列。台北：天下遠見：2005。

思考方法 為何是 一門學科？
張春凰老師 出題， 洪偲僥同學 彙整 ， 摘自 2009年清華大學 春季班 “台文gah 科普想像”期末考 全體同學 精要節錄。

工工06 施威麟
新ｅ思考 帶來 新e思維， 新e思維 才edang ho 咱e 研究gah生活， ma深深影響著 咱 zitma gah 未來ｅ 生活， 所以 思考ｅ方式 m-na 是 一種想法， 更加是 一款 科學進步ｅ 動力， edang 講是 科學之母。

物理系11 尤維琦
Di 生活中 運用著 你ｅ 頭腦gah邏輯推演， diorh親像 智財產權。

工工系11 林柏樺
思考方法 是 人類 di面對問題 時 所出現ｅ 一種想法。 因為無仝ｅ思維， diorh有無仝 解決問題ｅ 理路產生， zit種 變化萬千ｅ 思路 m 是 足ho人入迷？diorh像是 一個科學家 期待著 hia-e 變化莫測ｅ 新實驗 仝款。

化學系11何宇翔
René Descartes 講：「Cogito, ergo sum（英譯： I think, therefore I am.）（中譯：我思 我存在。）」 因為 學了無想 diorh心思ve清， 所以 如何思考 ma是一門學問， 其中 包含真濟 邏輯gah道理。

電機系11吳牧寰
人ｅ思考 diorh是有 一個想法， 經過 有系統ｅ 整理、 歸納 所產生 出來ｅ一個 理想行為， m是 雜亂 無頭尾ｅ 烏白來。

工科系 10鄒超任
科學 是 一門研究 自 創新、 改造 人類生活ｅ 學問。 藉著思考， ui 無仝角度 切入問題， diorh是 咱 從事科學ｅ 核心手段。

工科系11傅省翰
思考能力 並m是 天生diorh有ｅ能力， 除了 愛有一寡 基礎常識， gah愛有 正確清楚ｅ 邏輯。 思考 edang ui 無仝ｅ角度 切入開始， 有時 到最後 會 靈光一閃。

工工系 11郭廷揚
用 科學ｅ 方法思考 edang卡緊 解決問題。

工工系11古佩盈
每一個人 做仝一件事ｅ 思考方法 攏無仝， 所以 愛將 思考方法 設為ㄧ門科學 來分析。

物理系 11楊千瑩
所謂科學 diorh是 探索事物ｅ 過程。 Di zit個過程中 咱需要思考。 Ga各種思考 統整起來， ho 思考 成做 ㄧ門科學。

化工系 09謝至威
使用 經過人類 整理了後ｅ 思考方法 edang ho 咱 用上有效率ｅ 方法 來解決問題。

工科系 11張　傑
仝款事物 經過 無仝思維方法 edang產生 無限多種 無仝ｅ 結果。 真濟看起來 差異真大ｅ 代誌 往往攏是 ui 仝一個 源頭來ｅ。

化工系 10 祝安睿 (宏都拉斯)
思考方法 是 哲理學ｅ 一部分。 Di Greece〔希臘〕時代， 思考方法 卡理論性gah抽象； 現代思考方式 是 實存主義、 唯物主義。 Yin攏是 人類 表示真實ｅ 方法。

物理系 12 鄧逵中
思考方法 是 一種邏輯ｅ 表現， edang藉由 有系統ｅ訓練 來變成 足強ｅ能力。

化工系 11劉芊良
思維 包含 真濟物件， 邏輯、 理性、 感性、 學術……等。 Di 思考ｅ過程中， 咱循序漸進， 先找出問題， 接著討論 想出上好ｅ 方法， 然後 嚐試 去解決。 最後 咱愛想， 是m是 閣有卡好ｅ 解決方法， 所以講， 思考 ma是 一種 訓練ｅ過程。

資工系12曾弘宇
因為 科學ｅ重點 是 kng di 針對 一件事物ｅ 剖析， 有好ｅ 思考方法， diorh edang 用 卡好ｅ方式 做研究， 進一步 來促成 整體科學 向上提升， 一兼二顧， 摸蛤仔 兼洗褲。

醫環系 10 林孟潔
思考方法 了解以後， 將得著ｅ 知識內化， 運用 di 日常生活 當中， ho咱ｅ生活 閣卡進步、 便利， diorh算是 一門學科。

醫環系 10賴宜君
每一款 思考方法 攏可是 經過 足濟ｅ因素 來影響， 包括：社會文化、 家庭背景、 個性……等。 Zia- e 物件 dau起來， 經過整理、 推理。 才edang知影 一種 思維方法ｅ 來由， 所以 思考方法 是 一門科學。

工科系11吳婕伃
思考方法 edang講是 逐家人ｅ邏輯思考 模式， 雖然講 文學思考 ma是 需要思考 才edang寫出 生動唯美ｅ作品， mgorh科學中 需要 更加濟種 思考方法，才edang有所突破 研究出 ham前輩 無仝ｅ物件。

物理系 11 藍孔廷
思考方法 必須以 邏輯ham符合科學ｅ 方法研究。

電機系10 洪偲僥
想veh有 靈活e思維， 必須建立 在傳統科學ｅ 知識上。 Di 咱 擁有前輩ｅ知識後， 咱 閣卡 esai看著 事情ｅ本質。 運用 無仝ｅ思維、 創新 達到目的ｅ 方式 來解決 問題。 伊ma edang 講是 條條大路 通羅馬， 差別di 看咱 是用 什麼方式 來解決。

電機系10蔡明志
思考 edang ho 人 用 一寡方法、 條理 來做研究， 而且 伊有脈絡 ho人due。 科學diorh 愛 ho 人信服， di 仝款ｅ條件 下， 每一個人 做出來ｅ結果 攏是 差不多。思考ｅ方法 千百種， 雖然 咱無一定 會認同， mgorh 這卻是 一個好ｅ 研究方向。

經濟系 11 黃以萱
思考方法 有千萬種， 每一種思維 di 日常生活 中 攏演著 無仝ｅ角色， 解決 各式各樣ｅ 問題， 所以 思考需愛 成做 ㄧ門學科， 經過 不斷累積、 運用， 最後整理出 一套 有系統ｅ 書籍或文字 來傳達 先人ｅ智慧 ho後世。

經濟系 12 翁宸羚
思考 是 一門科學， 伊是輔助 其他 科學發展ｅ 要角， ma需要擁有 相關知識ｅ 專家 di zit個領域ｅ 發揮， 建立愈濟ｅ 新思維， 造福 人類社會。

化學系 09 王莉婷
將 思考發揮 di 任何所在， 攏edang發現 四界攏有 yin ｅ成果， he是奇妙ｅ、 是 激發創意ｅ、是ho人驚嘆ｅ。

生科系 11毛普威
思考方法 di 某方面 ham數學、 邏輯仝款， 是 一種透過 分析gah推理 來達成目的e 學問。

化學系12謝映竹
透過 研究思考方法 zit門科學， ho咱 有效利用 各種 思考方法 解決生活上 面臨ｅ各種問題。 尚且ui 無仝ｅ角度 思考問題 會得著 無仝ｅ答案， 甚至會發現 ho人料想ve到 閣足簡單ｅ 解決途徑。

化學系12江曲涵
無仝ｅ 思考方式 攏是 源di大腦裡 神經放電， 閣來影響 家己ｅ心智， 接續來 表現 di外面。 因此 思考方式 edang算是 一門科學。

動機系09陳德育
因為 思考方式 ma是一種 利用邏輯 去想代誌ｅ 一種方法。 利用 理性ｅ思維 去做代誌ｅ zit種態度 diorh是 科學ｅ態度。

動機系09楊朝舜
思考方法 m-na是 理論， 閣 edang 透過 真濟實例 去驗證， 這gah科學ｅ特性 不謀而合。

工科系 11李依叡
每一種 思考方式 攏會引導出 無仝ｅ 做事方法， 所以有 這呢濟 變數ｅ 一門學問，按怎vedang 稱做 一門科學？

資工系 12 廖彥凱
凡是edang推論出 規則 或是有 正確邏輯 攏edang稱做科學， 因此 思考 當然 edang稱作 科學。

數學系 09 許富琛
咱ｅ思考 大部分ui一件觀察 或是 遭遇著ｅ代誌 所觸發， 然後 依據 進前ｅ經驗 去整理、 推論； 科學ｅ精神diorh di 觀察、 假想gah驗證， 人類ｅ思考 其實diorh是 依照 按呢ｅ原則 運做。

動機系 10游博進
思考方法 是 一門 解決問題ｅ學問， 一門 有 多元思維ｅ 科學。

數學系 11余南宏
無仝ｅ 思考方法 會有 無仝ｅ結果， 用 對ｅ思考方法 edang將 真濟 困難ｅ任務 簡單解決， 所以 zitma真濟人 leh 研究 zit門科學。

電機系 12賴韋廷
思考方法 是 一種 真複雜ｅ研究， 而且 伊ｅ 研究結果 edang應用 di生活裡。

工科系 11陳伯辰
思考方法 千變萬化， 用「 藝術」 來形容伊 上妥當。

物理系 11楊東庭
思考ｅ根本 di邏輯， ui 有限ｅ線索 推論出 正確ｅ結果。

Ui《台文1001譯》看台語文學ｅ新面貌 (原登 台灣文學館通訊 23期 2009年5月出版 p.30-33)
～以《科學怪人》、《金銀島》做例
張春凰*

自1990年代解嚴後到今，台灣在地母語文藝復興運動已有一二十冬，母語復育di文化空間有顯明ｅ作為，除了母語文創作，di Horlor 台語方面，台譯作品ma deh平行擴展，其中繼承2003年推出ｅ《台語世界童話360》套冊ｅ編譯(註 )，有系統聲勢完成以後，再以世界經典文學做底ｅ《台文1001譯》做範例，策畫形成學前、小學、中學、大學到成人閱讀資料ｅ連續大河計劃，到目前，已經有一點仔基礎a。翻譯gah創作仝款重要(註 )，當外國文本以台語表達ｅ時陣，咱代先會du著ｅ是組成文章新生詞類、語詞、語法、句法ｅ比對gah挪用，再進一步消化文本ｅ內容，其中ui情節、人性ｅ描繪到論點，關係著經典文作ｅ特色，di經典ｅ代表性當中，咱看會著他者(others)ｅ文化、歷史人文背景ｅ綜合體，經過台譯zit關，所形成ｅ文化翻譯ｅ引進gah融合，來看台語文學ｅ新面貌，是《台文1001譯》想veh探索ｅ一項文化策畫。
台譯ｅ過程中，有什麼意義gah問題，veh以Mary Shelleyｅ《科學怪人》(Frankenstein)gah Robeert Louis Steversonｅ《金銀島》(Treasure Island)做例，為生長中ｅ母語文看顧著zit個台譯ｅ新興領域，除了栽培新生代 同時ma veh邀請各位先進edang做伙來起造《台文1001譯》ｅ文化工程，ga台文注入一港新氣勢。


關鍵詞：《台文1001譯》、《科學怪人》、《金銀島》、台語文藝復興、科幻文學、海洋文學、旅行文學、翻譯教程、文化翻譯、台語語料庫

一．前言

《台文1001譯》di 2002年開始籌備，原始由江永進提議並構思方法、張春凰策畫並細部執行，受著靜宜大學台灣研究中心鄭邦鎮大力支援、清大通識沈宗瑞支持(註 )。經過四冬ｅ運作，di 2006到2007年陸續推出出版《小王子》、《枕草子》、《科學怪人》、《金銀島》、《Tomｅ歷險記》等世界經典台譯本，到2009年準備進行中veh出版ｅ冊依初期排序已近百，其中包括《菩薩ｅ故事》系列(註 )、 以及Doyle，Arthur Conan，Sirｅ《Sherlock Holmes全集系列》以外(註 )，遠程計劃閣di 增長當中。
全世界ｅ母語流失，隨著全球化ｅ影響有嚴重流失ｅ處境，為veh因應zit款危機，聯合國教科文組織di 1999年11月，宣佈ui 2000年開始，制定每冬ｅ2月21 日是國際母語日，用意在保存各族語ｅ文化基因。台語ｅ人口數大約di四千九百萬(註 )，可是並無親像紐西蘭ｅMaori[毛利]、南非ｅZolu[祖魯語]，dor成做官方語言ｅ地位(註 )。
母語ｅ復興文化工程di近期內積極進行，若只單靠第一手ｅ創作文類資料，di目前處境顯然是鳥隻搬水救火，功效無夠，甚至只限於小小眾。咱當急事務是觀察什麼是經常需要，比如dor di咱日常當中ｅ外國電影gah電視節目ｅ字幕、用品ｅ民生說明書等等接觸，使得翻譯ｅ動作注入di現代人普羅大眾ｅ手中，閣卡免講是書面或多媒體ｅ新出版品或即時知識新聞ｅ傳播。
《台文1001譯》ｅ策畫，有阿拉伯世界傳說著天方夜譚1001ｅ故事象徵，“1001”代表著“多產gah 多元” 做一個起頭實現ｅ指標，帶領台譯成果，做為厚植台語文大翻譯土壤，發揮台灣內建多語多元文化(註 )，台文veh自由大步行ｅ氣度，有zit個經驗，期待可為其他族群同齊愛惜家己母語ｅ參考。
《台文1001譯》系列ui翻譯經典再生、湠開參與翻譯人才ｅ培養gah才能發揮，論及全球化交流，以《科學怪人》、《金銀島》例舉，台語文gah 世界接合gah同步，如美國總統Barack Obamaｅ演說(註 )，亦可ho台語人有仝款機會可聽有gah讀有ｅ即時資訊來分享。

二．經典再生 台文大步行

《台文1001譯》，ui內容來看是一個台譯家族系譜，旨在引進對世界有影響力ｅ經典作品，以台語文ｅ面貌呈現，其中有經典再生ｅ新技巧、新風格。
新技巧是指以現代科技，個人電腦ｅ輸入gah 輸出ｅ應用，如 運用 台、客、華三語ｅ台音輸入法、台音自動注音文程式、台音錄音程式、讓格書寫(註 )、 words排版功能等， 以上省錢、省力ｅ成本效益，突破弱勢語言ｅ資源限制gah 困境，得以促成母語文豐美ｅ底蒂。
新風格是指以台語ｅ語詞、語句、語法、漢羅並用等，針對世界經典內容做翻譯，經過母語文本ｅ對譯，演繹出台語運用 上接近ｅ世界各國文作ｅ精髓，使得創新當中 ho台語ｅ元素再現世人面前，如 豐富ｅ、細膩ｅ台語手動作(註 )、 台語ｅ構詞(註 )、外來語 (註 )ｅ交織展現。
翻譯ｅ定義，簡單講是至少二種語言ｅ平行對換，di盡量無失真ｅ原作骨架下，有第一手、第二手ｅ轉換譯作再傳播，史上出名ｅ佛經、聖經ｅ翻譯活動，遍及ｅ語文gah地區，久遠深廣。佛經對漢語文化ｅ衝擊(註 )直接、間接影響著台語ｅ使用，台語聖經可講是近代對台語文獻上直接ｅ寶典(註 )。
唐朝時代日本排派留學生到中國求新知，帶回平假名、片假名gah大量ｅ漢字，演進到現主時ｅ漢和書寫方式，其中di日本又發展出大量ｅ現代日語漢字詞，如物理、統計、銀行等又引入華語系統，台灣經歷日據時代，台語文受日語、文化ｅ影響，如 郵便、宅急便、ki-mo-zi spring giang (註 )，是免講dor明ｅ文化移植、交流、引進ｅ代誌。
再如，台語版ｅ《花田少年史》做為台語輔助教學上ｅ影音資料，對台語生動ｅ義趣有所增長，《台文1001譯》是希望透過台譯提供向堅實ｅ冊本量展開，使得di台語使用環境ｅ需求上，有親像《花田少年史》ｅ效果，di“聽”以外，應有台文字幕。具備書寫書面文，是兼顧弱勢語言達到普及gah深化效應。
所以藉著經典名作ｅ翻譯達到再創作ｅ階段，台文需要自由大步行。

三． 《科學怪人》gah《金銀島》ｅ台文視野ham種籽

《科學怪人》ham《金銀島》，是《台文1001譯》ｅ其中二本。前者是di 1818年，出自英國才女Mary Shelley；後者是1883年，大作家Robert Louis Stevensonｅ成名作。Zit二本冊，到現主時，閣deh 影響全球ｅ世典文作，除了文學、歌唱，電影、電視節目直接運用、間接延伸di銀幕上，時行ve退。(註 )。
《科學怪人》可稱是科幻小說史上ｅ開基先祖，主題是複製人ｅ製造所引發ｅ論題。人工製造活人ｅ實現，對hit當時是驚天動地ｅ大代誌，挑戰hit當時上帝gah社會宗教習俗，反映著Darwin家族對科學ｅ求真理論gah英國理性時代ｅ來臨，除了文學所具備ｅ人性描繪，其中對恐怖、驚惶、奇妙、壓抑、神祕ｅ心理矛盾書寫，述及女性地位、亦有Alps山區鄰近瑞士山湖gah極地ｅ風景，可講是集科幻想像、懷疑主義、解放傳統、經離教條、科學實驗、驚悚小說、心理透析、兩性關係、旅遊文學等di小說一身。
科技帶來人類文明ｅ進步，使得活di當下ｅ現代普通人，dor可享受過去一、二百冬前ｅ貴族帝王生活，mgorh換一個角度，複製人di人類ｅ創造控制、科學倫理、能力極限頂面，為世界帶來什麼款ｅ正、負ｅ意象？人類是m是違反自然ｅ生態平衡？野心者是m是誤用來毀滅世界？醫療是m是變成販賣器官ｅ圖利廠？zia-ｅ題目，是m是di弱勢語言dor可做自閉di當今社會潮流之外ｅ藉口，然後di hia自悲自嘆？
《金銀島》，是西洋海洋文學ｅ代表之一，背後反應世界歷史海上帝國主義ｅ權力競爭(註 )，表露著歐陸以外ｅ熱帶海洋風光，探險未知國度ｅ神祕民俗風情，同時，尋金之熱被轉化做幸福、富裕ｅ理想追求gah冒險精神，塑造一個少年主角 – Jim，英勇、巧智、熱情，巧妙ｅ為青少年文學 開啟勇士無畏驚ｅ人生奮鬥目標。
台灣是海洋ｅ國度，為什麼除了近年來有廖鴻基ｅ海語海語 (註 )，代表討海人、行船人ｅ心聲gah海上ｅ冒險zit類ｅ海洋文學外，台語書寫真少見著親像Iliad[伊里亞德]、Moby-Dick[白鯨記]、老人gah海等名聲四海ｅ作品。發覺海洋ｅ祕密、開啟海洋資源gah保育，海洋民族ｅ台灣人無需要知影嗎？台譯《金銀島》除了小說本身ｅ故事架構示範，ma期望喚起di咱身邊ｅ海洋氣味，意識著土地gah生活、生活gah文化ｅ合密。同時，咱ui《金銀島》ｅ台譯本來看，可思考明朝鄭和下西洋，閩南人造船，因為無充分ｅ書寫系統來宣揚閩南人一段牽成歷史上ｅ壯舉，是可惜ｅ代誌(註 )。
台語版ｅ《金銀島》，台語文詞ｅ再現，藉著di神鬼奇航、海上烏白道人對立ｅ故事高潮起浮、轉折、緊張、刺激以外，活跳跳ｅ賦予台語復活gah新生詞類ｅ生命，dor以第一章例舉一寡：第一頁ｅ一首老船歌，dor ga台語豐富ｅ語調、變調、音樂性盡情表達出來；其中ｅ台語慣用特別構詞：ABB—粗bebe、AAB—hu-hu叫、AABB—行行seh-seh、ABAC—晃來晃去等ｅ生動展現；全文內底ｅ外來語有diam-a-ga/打馬膠路、布丁、白蘭地、vat-gu(退後)等ｅ引入；gah航海相關ｅ常用語詞：船長、大副、船工、水手、行船人、舵手、船埕/甲板、船艙、船舷、船桅仔、望遠鏡/千里鏡、航海圖、海港、港口、碼頭等活化di文段中；手ｅ動作：guann酒、qiu轉來、denn anan、拗ho斷、sa枴仔 、掠diaudiau、qim著我ｅ手等，表示著手ｅ細膩動態，精密ｅ意味gah辨別智覺。親像按呢ｅ節奏，將台文語言ｅ特色重新鋪排出故事ｅ生動張力，zit類ｅ例 不勝其數，復活di台語文當中。
Ui作者延伸ｅ台譯樹，如冒險ｅ《金銀島》di 1883年出版，接di 1886年Stevenson又閣出版《化身博士》，這又是文學史上被推崇做第一部雙重性格ｅ小說，其中化身博士ｅ變身，加加減減有受著《科學怪人》ｅ影響。Ui多元文體、包羅萬象ｅ內容延伸ｅ台譯家族系譜，旨在擴大閱讀群眾。更何況當今ｅ科幻電影，如《星際大戰》ｅ複制人篇，講祖出《科學怪人》ｅ身影，並無過份。
《科學怪人》、《金銀島》台文版ｅ引進，使得90年代以來大約以228白色恐怖做為大宗ｅ台語小說(註 )，擴展鄉土文學之外，另開一條其他台語閱讀人口ｅ通路，讀者可由zit款文類得著另類興味，認識台語edang承載各文類ｅ書寫功能。


四.全球化之下ｅ在地文學

一本經典名著母本，通常會統計被翻譯ｅ外國語有外濟版本，台語定著m通錯失zit個舞台成員，di《台文1001譯》喚醒台語ｅ用途，由輸入激發台語ｅ不足，開展多元、多樣文類、擴大資料量、厚植台文土壤，zia-ｅ諸多質素，豐美著在地文學ｅ現代性(註 )。
英語di現主時成做世界霸主，英語國家猶原透過網際網路、BLOGｅ設置，將全球經典文學ｅ上網，親像Gutenberg ｅ公共文學資料庫搜集(註 )，已經為世界ｅ文學國際村設立一個資料共享ｅ形態，英語為國際語言之下，有伊ｅ方便性，di 英語有單一強勢ｅ傾向下，各國、各地ｅ語言ma需要重視，親像Wekipedia維基大百科ｅ多語轉換選擇，是兼顧世界語言文化平行發展ｅ一個平台。台譯文獻，亦可參考zit類ｅ做法，為弱勢語言保持生長ｅ機制。
當今，台灣哈日、哈韓、哈美ｅ熱度，顯示流行文化，各種時尚ｅ對流趨勢(註 )，是文化輸出、輸入ｅ典型，咱ｅ語文veh傳遍世界ｅ角落，m是無機會，問題在di咱有什麼。《台文1001譯》，di跨國文化ｅ熱潮當中，應當無數不止去吸收、消化再產出，按呢對母語質量ｅ提升，必有一定ｅ效果，問題是咱有什麼生存ｅ方法。
母語到一定ｅ成熟度，優秀ｅ在地文作興旺了後，好ｅ作品必然感染著ｅ讀者，一個、二個、一國、二國，再由地球村功能，進一步拓展，弱勢者m免過頭悲觀，顛倒是di國際化ｅ趨勢下，在地文學有真大ｅ向度，只是咱愛先有好ｅ內容。
母語文veh如何生存閣有大發旺ｅ生機，台譯是一個重要ｅ母語文化活化大機制，咱愛好好把握。

五. 展望gah願景

《台文1001譯》，設計多面功能，如《科學怪人》等，由清華大學通識ｅ師生同齊完成(註 )；《枕草子》、《金銀島》等由靜宜大學中文系ｅ師生共筆(註 )，一律以原文做底，由張春凰、邱玉山、王惠珍老師監製，這用以培養台文人才庫ｅ方針，以及翻譯教程所涉及ｅ相關面向，如，語詞gah文字方式ｅ參考gah 設定基礎，內容所包括ｅ文化風俗、文藝技巧ｅ引入，多語比較、分析、常用字計量等 大量語料庫ｅ累積，建立gah吸收新文字ham文體方式ｅ趨向以及義趣。
定著，咱可自由ｅ看待台文可由單一譯本擴充到有多種版譯本，《台文1001譯》，更是歡迎關心母語ｅ逐個人來參與完成。
《台文1001譯》除了擴大進行母語復育ｅ深耕度，更可思考常設翻譯獎、翻譯地位ｅ問題(註 )，開啟台譯參與世界文學橫縱全球ｅ熱潮。

致謝： 江永進(清大 統計所)、 鄭邦鎮(國立臺灣文學館 館長)、 王惠珍(清大 台文所)、 邱若山(靜宜 日文系)、 釋達觀師父(智觀寺)、 張圓通(高苑 美工)、 尤美琪(台大 社會所)、 游政榮(台南大學 文化所)、 劉麗錫(家庭主婦)、 楊錦堂(時行臺灣文主編)、 陳慕真(臺灣文學館 通訊編輯)

參考書目：
Mary Shelley著；林慧婷 等譯。 科學怪人。 新竹市：時行台語文會，2007。
Robert Louis Stevenson著； 盧乙欣 等譯。 金銀島。 新竹市：時行台語文會， 2007。
Robert Louis Stevenson著； 游政榮譯。 化身博士。 新竹市 ： 時行台語文會， 2009。 (forthcoming)
江永進、張春凰、呂菁菁。讓格書寫：意義、理由gah 簡則。 臺灣風物，第五十九卷，第一期，p.111-132，2009年3月。
張春凰、江永進、沈冬青合著。 台語文學概論。 台北市：前衛，2001。
張春凰。 台譯ｅ現代性—現況gah 展望。 台灣風物，第56卷，第二期，p.73-114，2006，6月。
張春凰，行向本土化gah全球化ｅ台語世界童話：「編譯改寫」對經典ｅ再生產，《台灣歷史學會會訊》18（2004）：28-38。
廖炳惠、張春凰，當代流行文化志再思， 「20世紀台灣新文化運動與國家建構論文集」p.213-236，吳三連台灣史料基金會，2003。
陳英輝。維多利亞文學風貌。台北：書林，2005。
廖鴻基。鯨生鯨世，台中：晨星，1997。
廖鴻基。海洋遊俠，台北：印刻，2001。
陳慕真。漢字之外，台南：人光，2007。
梁淑慧。當上帝開口說台語，台南：人光，2005。
John Man著；樂為良譯。古騰堡革命。 台北：商周出版；城邦發行，2004。
呂理州。學校無教ｅ西洋歷史。台北：時報，2004。
卡爾維諾。為什麼讀經典，台北：時報，2005。
Peter Newmark著；賴慈芸譯。翻譯教程。台北：台灣培生教育，2005。
林水福。翻譯ｅ處境。文訊，269期，2008年3月(人文關懷)。
湯錦台。閩南人的海上世紀。台北：果實，2005。
大衛．克理斯托（David Crystal）著。語言的死亡（Language death）。宋偉航譯。臺北市：貓頭鷹出版社，2001。
麥格拉斯（Alister McGrath）著。當上帝開始說英文（In the beginning: The story of the King James Bible）。張曌菲譯。台北：新新聞文化，2002。

理性ｅ 智力gah 耐力
～序 “發明ｅ故事” 台語版
張春凰

1.
荷蘭裔美國籍 Hendrik van Loon (1882-1944)， 咱所知影ｅ“發明ｅ故事”、“人類ｅ故事”、“聖經ｅ故事”、“太平洋ｅ故事” 等 冊ｅ 通俗作品 暢銷作家。 伊以 輕鬆、 理智ｅ 筆調 ga咱講述 人ｅ需要 di 想像、 靈感、 智力gah 耐力 交互當中， 發揮潛能 來 創造gah發明ｅ 故事。
Ui 人ｅ 頭殼思想 到 四肢五官ｅ 演化， 所有 日常生活 di 生存 基本條件 到 奢華享受ｅ 境界， 如何擺脫 大自然力ｅ 威脅 gah 野獸ｅ吞食， 代先處理 人身 有所保護 了後， 腦力ｅ意識 gah 天賦 開始突破 人體功能ｅ 先天限制， di 算ve了ｅ“想望”、“試看mai”、“模仿gah 再創造”ｅ 動機之下， 來來回回 傳承了 幾萬冬ｅ 文化進展史。
“發明ｅ故事”dor 是deh講 人類親身ｅ 生存要題， 是 文化史 摻融 科普史ｅ 過程， zit條路途， 可講是 理性ｅ 智力gah耐力 所累積ｅ文明。
“改變”成做“發明”ｅ 推動力，“未來 會 一直來、 一直來”，“未來”意味 改變gah創新。 創新gah改善 互相連結， 到今仔日， 咱ga 冰箱、 網際網路 當作 生活中ｅ 一部份。
食水果 拜樹頭， 感謝 咱祖先ｅ 智力gah 耐力， 感謝van Loon 用 另類ｅ角度 ga 世人發聲。“發明” m是一定 愛關 di 實驗室， 咱 每一個人 攏是 發明家， 比如 你teh石頭 gue腳， 延伸ｅ 是 一條橋ｅ 起造 gah 飛行器ｅ 超越 地面障礙， 筆 是 手ｅ延伸， 電話 是 嘴ｅ變化， zia-ｅ 人體器官ｅ 增值觀點， di zit本冊裡 流轉出 趣味 。
理性ｅ 智力gah 耐力， di “發明ｅ故事”內底， 分做： 人類 又稱發明家、 ui獸皮到摩天大樓、 壓落一切ｅ手、 dui腳到飛行器、 千變萬化ｅ嘴、 鼻、 耳、 目睭， ui “自我”做起點， 發展到 現主時ｅ 科技本身ｅ 普世價值。
所以， Nobel獎 長久 di hia deh 等你！

2.

約 三四冬前， 這是 學生練習 寫台文ｅ 部份作業。 阮課業ｅ 特色之一， 是 師生 做伙去 冒險， 用台語 替van Loonｅ 心智 加一種 語文版本， 一如 本冊中 所講ｅ“就算 人類 從來mvat 發明過 字母表， yin 仝款esai 借用一個 好翻譯， 來知影 世界上 任何 其他所在ｅ 其他人 對 hit個問題ｅ 思考”(見p.95)。
台譯本ｅ 出世， 其實dor是 理性ｅ 智力gah 耐力ｅ 磨練!
到 今仔日ｅ 收成， 愛感謝 真濟人： 永進ｅ 台語拼音教學法、 台音輸入法等， Joyce di 紐約ｅ 舊冊店 替我買一本 “THE STORY OF INVENTION”(我嘴角笑笑 ga 學生講， 冊皮 雖然破破， mgor m知 美國 dor一個總統 ma 讀過ｅ 冊)， 2007年 容慈 初步ｅ彙整、 申請ISBN， 政榮ｅ 再校對， 到2009年春季班 偲僥 來選課， 學期結束 了後 伊di暑假 用 寶貴ｅ時間， 重新斟酌 整理gah排版， 自動做 索引， 方便我 再次做 班長兼摃鐘， iau有 博齊ｅ 封面 包辦 總成果。
理性ｅ 智力gah 耐力， 阮zit 群人 用 熱情付出 來完成a！
這是 所有 參與人ｅ 風神， 雖然 初批 台譯ｅ學生， 一寡名 已經di 轉來轉去ｅ 彙整 過程中 漏gau去， mgor 榮光 ma是 存在 di 台語課程ｅ 傳統 裡。

(20090805重新記事)

狼性思考法 翁宸羚

危險ｅ所在 往往 是 生機ｅ所在， zit種思考法， 表現出 一種 極端化ｅ 哲理。 有按呢ｅ 思考方式ｅ 人， 同時 愛有 超人ｅ 勇氣。

希臘寓言 有 一則故事 按呢 講：
鹿母失去 一蕊目睭， 食草ｅ時陣， 將 看有ｅ目睭 對陸地， 預防 拍獵人 猛獸， 青盲ｅ目睭 對海面， 因為 伊知影 海面 無敵人。 那知影 經過ｅ海盜， 看著鹿母， 對伊射箭； veh死ｅ鹿母 哀歎講：“我對陸地 注視， 掠準危險 來自陸地， 那知 海面 暗藏危機！”

為什麼 veh叫作 狼性思考法 leh？ 因為 zit個 思考方式 是 ui 狼ｅ行為 來ｅ。 故事 是 按呢 講： 有一隻狼 m對無人 看守ｅ所在 逃走， 因為 伊知影 無人ｅ所在， 可能 更加危險。 雖然 最後 伊不幸 死di槍口 （因為 伊向 上危險ｅ 方向 走去）。 Mgorh 若是 對zit個角度 來想： zit隻狼 若是 安全避開 獵人ｅ槍籽， 伊可能 diorh 會使繼續 活落去。 而且 看起來 親像是 安全ｅ所在， 定定會有 更加危險ｅ 存在， 一旦 大意跋落， 才是 死路一條。
上危險ｅ 所在 上安全， 咱 定定 聽人 按呢講。 其實有伊ｅ 道理存在，有 一寡成功ｅ 人 diorh是 因為 zit款思維 ziah達到 伊ｅ目標。 閣有 另zit個故事：有 zit個小丑 di 危急ｅ時陣 對 上危險ｅ所在 去， ziah保全 伊e性命。 舞台下ｅ 觀眾驚叫， 這隻獅 殺性大發， 對 園區ｅ大門 奔走， di人群中 追逐， 連續傷了 真濟人， 一直到 園區員警 走來， 舉槍pah死 zit隻獅， 才ho zit場可怕ｅ 意外事件 平靜落來。 小丑仔 原本是 上有可能 ho走出來ｅ 大獅 吞落去 腹肚內， mgorh 伊vih leh大獅ｅ籠仔 內底 ， 逃過 zit個災難。
Di現實中 親像 一寡 因為 sng股票 來好額ｅ人 yin diorh是 di 別人認為會了錢ｅ時陣 diorh進場， 因為 yin知影 zit個時陣 可能diorh是 股票價錢ｅ 底限；所以yin ziah跳落去 買股票， 運氣若好 diorh趁大錢。
Mgorh， 狼性思考法 定定只有 二條路， m是 大好 diorh是 大歹。 親像頭前ｅ例 diorh是 大歹， 因為 hit隻狼 最後死 a。 Teh股票 來講， 若是失敗diorh會 死gah 真歹看； 仝款ｅ道理， 若是 大獅走轉去 籠仔附近， 小丑仔可能 diorh會死翹翹， 一蕊目睭 失明ｅ鹿母， 卻 身亡di 安全ｅ 安穩思維 中。
勇氣， ma是 狼性思考法 重要ｅ因素。 因為 做重大決定ｅ 時， 咱攏需要 大大ｅ勇氣。 更何況 是 di危急ｅ時陣 le？ 頭前ｅ 所有狀況 若是 無充足ｅ勇氣， 可能攏會 變作 別個故事 吧。
有一遍， 學校ｅ運動會 辦 障礙競賽。 伊分作 真濟路線， 愈好行ｅ路 愈長、 愈歹行ｅ路 愈緊到 終點。 Zit個時陣， 狼性思考法 diorh 發揮作用： 我大膽選擇 上歹行ｅ路， 因為 我想veh贏。 Hit 條路 實在是 真歹行， 我跋倒 真濟遍。 最後 雖然 無得著 第一名，mgorh 我是 第三名。 對我來講， 狼性思考法 di zit寡時陣 會幫助我 做決定， 而且 會增加 我ｅ鬥志、 ho我m驚困難、 繼續前進， 因為 我知影 若是行過， diorh會成功。

和田思考法 廖彥凱

和田法 是 中國創造學 研究者 許立言、張福奎gah上海市 gah田路小學e教師， di 檢核表法 等 技法 基礎 下， 結合 實際情況， 總結出來e 方法。和田法 是 di 創造力潛能 開發過程 中 上常見 ma 簡單操作e 基本方法。
「和田法」e 內容 簡單講， 如下:
加看mai
Edang di zit項物件 頂面 再加上什麼 嗎？ edang ho伊 加大、 加長、 或是 加厚 嗎？ 若是 ho zit項物件 加上 其他物件， 會變gah 安怎?如 電腦洗衣機， 這diorh是 洗衣機 加上 電腦 所產生出e 新產品。
減看mai
Edang di zit項物件 頂面 再減去什麼 嗎？ Edang ho伊 減小、 降低、 變薄 嗎？ Edang省掉 什麼 或是 取消掉 什麼 嗎？ 親像 隱形目鏡， he 是 由 目鏡 去掉鏡架 再縮減 鏡片 所形成e。
充一寡
Ho zit項物件 放大、 擴展 會安怎？ 功能 edang擴大 嗎？ 多用途刀仔 —瑞士刀 ，diorh是一個ve vai e例， 功能 變得 更加多面、 更大a。
減一寡
Ho zit項物件 壓縮 會安怎？ Gam edang折疊？ 像 zitma 一寡 小巧e產品 di市面上 真受喜愛， 親像 迷你型e 電視， 可以 隨身zah leh， 足方便。
變看mai
改變 形狀、 色水、 聲音、 氣味 會怎樣？ 改變順序 會怎樣？ 像 zitma e瓜子， 無像 以前 只有一種味， zitma 閣有 奶油味、 五香味 、蒜頭味 等。
改看mai
zit種物件 閣有 什麼不足 嗎？ zit項物件 閣有什麼 無方便 嗎？ 有辦法 改善 zia-e狀況 嗎? Zitma真濟產品 向多樣化、 微型化、 簡單化、 省力化、 實用化 方向發展。
聯看mai
每項代誌e 結果 gah 伊e起因 有 什麼聯繫 嗎？ edang ui因果 找出解決問題e 方法 或是 幫助咱 達成什麼 嗎？
學看mai
有 什麼事物 可以 ho自己 模仿、 學習 嗎？ 模仿、 或 學習 伊又會有 什麼結果 或能有 什麼創新？ Ford認為 一台車 di 生產線上 裝配 需要 十二個點鐘 實在 是 過頭慢a， 伊學著 屠宰廠、 罐頭廠e 生產過程， 然後 ga學來， 應用 di 汽車生產 ， 了後 效率 diorh 提高足濟。
替看mai
Di zit項物件 有什麼 物件 edang替代？ 若是 用別e材料、 零件、 方法等， 是什麼 leh？ 親像 用 紙替代布 創造出e 紙尿布、 紙內衣 等 拋棄式產品， 價格俗 gorh方便。
搬看mai
Ga zit項物件 搬去 別個所在， 有路用 嗎？ ho zit個想法、 道理 等 搬去別個所在， 有路用 嗎？ 最近幾冬， 透過 對 超音波技術e 進一步 開發， ho一寡 傳統產品 產生 革命性e 變化。
倒反做
若是 ho一件 物件、 代誌e 正反、 上下、 左右、 前後、 內外 顛倒反 會有按怎樣e 結果？ 像 zitma 市面上 四界攏是 現代化e食品， 一寡店 反過來 做 一寡 古早味e 食品， 而且 銷路 特別好， di服裝 時尚頂面， 一再di 流行ｅ款式 復古， diorh是 按呢。
定看mai
Veh解決 一個問題 或是 改進 某物件， 為著 提高效率， 為著 防止事故，需要 定 什麼標準、 規格、 規定？ 像 一件工作 若無 分工 ham 制定目標diorh會變gah 無效率， 所以 若是有 明確e 分工gah目標， 效率diorh會 kah高。
運用zia-ｅ 和田法思維 diorh是 講， 咱e大腦 經常 需要 變換一下， pah亂 原本 死硬 e法， 重新組合， 才會產生 新意。
對 大部分e人 來講， zitma e生活 看起來 一切 攏是 應該有e， 一項物品e 用處ham用法 diorh像 是 只有唯一e 一種選擇， 不過 若 pah破 zit種 一絲仔無變e 想法， 一時間 世界diorh會變gah 更加多彩， 各種 可能性 diorh會出現， 好好運用 zit寡 可能性， diorh edang ho 阮e生活 更加趣味。

先機妙算：Rockefeller思考方式
洪偲僥
「時時求主動，處處占先機，以 上小e代價， 求得 上大e利益。」
美國史上 頭一位 億萬富豪， ma是 上gai好額e 企業家---- John Davison Rockefeller。 伊cut世 di 一個足散赤e 家庭， 是什麼 創造 伊e財富？ 答案是 伊di 1870年創立e Standard Oil zit間 家家戶戶 攏vat伊e 石油公司。 Mai小看 zit間公司， di 全盛期 伊切斷 全美國 90％以上e 所有石油 相關行業。
Rockefeller 到底是 用 什麼 成功e方式 經營呢？ 伊 無所不至 用盡手段， 跨游 di 法律邊緣、 甚至是 各種 違法e方式， 比如：o-se[賄賂]、 威脅政界、 銀行、 鐵路業者， 削價競爭… 等等。 伊e手段 有效 deh拍倒 當時 大多數 競爭對手； 除了 高效率e 競爭手法 以外， 另一個 ho 伊 成功e要素 是 伊拉近 敵人e方式， di 伊 將對手 拍倒 了後， 伊定定 會向 對方提出和解， 並開出 比市價 高出 真濟e價帳 收購 對方e資本。
Diam zia， 值得講e是， 因為 Rockefeller 出身貧寒， 伊並無 can像 一般商人夢想e hit款， 藉著成功 獨占市場 來任意 叫huah價數， 趁夭壽錢。 顛倒面， d i伊統治 石油工業e 數十年間， 伊 將日常用 油帳 大幅壓低 約80％。 伊定定勉勵 員工 講：「咱愛永遠記著 咱是為 散赤人 提供用油， 而且yin愛e 是 俗gorh好e石油。」 伊gorh講：「競爭 是 一種罪惡。」 顛倒來講， 這 ma是 為何美國消費者 會ho Standard Oil 用zit款 ho 人想無e 程度gah速度 控制市場e 原因之一。
逐家mai未記， Rockefeller ma是 一位 超級慈善家。 伊將 伊e鉅富 大都用di 慈善事業， 因此 ho別人 稱做「天使gah魔鬼e 結合體」。 伊是 一位虔誠e 清教徒， 伊抱著 上帝使者e 使命感， 從事 慈善事業。
為著做好 慈善事業， mtang ho受益者e 依賴性 加深， 伊提倡 「相對基金」理念， 實施 「普及性」社會福利。 伊di 醫療gah教育 兩類 慈善事業上 上gai有成就， 所創設e 醫學研究所， 研發出 真濟項 治癒嚴重 傳染病e藥方 並 普及全球； di 教育方面， 尤其是 di當時 非常弱勢e 女性ham非裔美國人e 普及教育上， 更值得 咱推崇。 因為 Rockefeller充分利用伊e財富， 發揮 民間e力量 來發展 政府 無法做著e 社會公益，成為 後世e楷模。
世人攏講 Rockefeller 有「冷靜e腦、 溫暖e心」。 不論是 商業 或是 慈善事業e經營， 攏需要 冷靜e拍算，思索出 上好e方式。 M驚困難， 一關過一關， 抱著 船到橋頭 定著直e 正向態度 接受挑戰。 Suah落來， 咱來看 一個發生 di 伊身上e 小故事， 藉此看出 一位 聰明商人 口袋a裡e 計算機， 是外ni-a頂真。
1876年冬天，di美國賓州e 一間銀行 一如 平常時e 營業。 下晡時， 一位穿gah 足時行體面e 紳士 行入銀行， di 貴賓室 選一個位，大cih cih 坐落來。
Zit工， du好du著 銀行經理 親自接待， 伊對 zit位紳士 講：「請問 zit位先生， 有 什麼代誌 需要我 ga 你效勞？」 伊一頭 熱情 拍招呼， 一頭 上下看 zit位紳士。
「我想veh 向 貴公司 貸款。」 人客講。
「當然ma e-sai！ 請問您 veh借 外濟金額 呢？」 經理 想著 一筆 生意入門， 笑微微講。
「一ko diorh好。」hit位紳士 老神在在 deh講。
「一ko？」經理 驚惶e ti 開嘴。
「我zitma急需一ko nia， gam e-sai？」 hit老神在e gorh 講一gai。
經理e頭殼 馬上 高速運轉： zit個人 穿gah ziah講究， 為什麼 ganna借 一美金？ 伊是m是 di試探阮e 工作品質 gah 服務效率？ suah來， 經理假做 足歡喜e模樣 講：「當然， 只要 有擔保， 無論借 外濟， 阮攏edang照辦。」
「按呢真好。」 hit位先生 ui豪華e皮包裡 teh出 一大堆股票、 債券 kng di經理e 辦公桌上， 交ho經理。
經理用 伊e專業 清點 估計hia e 擔保品， 對zit位人客 講：「先生， 您e擔保品 總價值 大約是 五十萬美金， 作為擔保 是 超過頭濟lo， mgor先生， 您真呢 ganna借一美金？」
「是a， 我ganna需要 一美金。」 hit個人 面無表情 deh講。
「好， 請來hit邊 e 櫃台 排隊 辦手續，年息是六％， 一年後 歸還， 我diorh ga zia 做擔e 股票ham證券 還ho你……」經理 真客氣deh講。
「多謝！」hit位紳士 辦完手續， 準備veh離開 銀行。
經理實在是 忍不著心中e 困惑lo， 伊追去li， 問zit位 行為怪異e 紳士講：「歹勢， 請問我edang問您 一個問題 嗎? 我實在是 想無， 你有 五十萬美金e 財產， 為什麼ganna借 一ko美金？」 經理 滿面困惑。
「好啦， 既然你 ziah好奇， 我diorh實情 ga你講。我來zia，是想veh 辦一件代誌， mgorh你ma知影， 隨身帶zia e 票券真煩， 我問過 幾間銀行， veh租yin e 保險櫃， 租金攏足貴， 我知影貴行e 保全系統 足好， 因此 diorh將zia e票券 用 擔保e形式 寄存di 貴行， 由你 來替我 保管， 我有什麼 ve放心e！ 而且 保管費gorh真俗， 寄kng一冬 才不過六美分，這實在 是 足e會hor……」
經理 一時知理， 而且ma足欽佩 zit 位紳e 做法。 Zit位紳士， diorh是 咱之前 講著e， 頂港有名聲， 下港上出名e 美國大企業家 Rockefeller。
講完 Rockefeller e故事， 咱會 嘴角微笑 gorh佩服 伊e做法。 伊e思路 實在 是 足冷靜gorh靈活。
Di 咱接受e 教育 中， 老師總是 ga咱講， du著問題e 時陣， 應該 愛如何照步數 dau-dau- a解決。 但是 若是 咱zitma e問題 是無正統e 解決途徑， 咱veh安怎 呢？ 有一寡人 iah是會 照步來、 一層一層 解決， 但是 一寡人 會跳出 已有e框架， 另外找 別人從來m-vat想過e 解決問題 方式。 兩者 攏真好， 但是後者，最後 定定成做 各領域e 勝利者。
「跳出 家己設e圓ko-a 想代誌（Think outside of the box.）。」 這是 咱zitma 真正 應該愛學e！

糊塗思考法
陳富信
表面上， 糊塗思考法 是一種 純化 內心敏感度ｅ 方式。 實際上， zit種方式 是 ho人 抹上一層 百害ve侵ｅ 防護膜， ho人 面對世界ｅ 本質， 刁工裝作 vor看見 人生路上ｅ 一切 分枝雜草。
中國 清朝文人 鄭板橋 講： 「聰明難， 糊塗更難。」 糊塗有什麼難？ 伊難di 你雖然 ga代誌 看gah 真清楚， 你要假作 m知影， 你必須抑制 本來會 做出ｅ反應， 這m是 一件簡單ｅ 代誌。 你必須學 會曉忍耐、 寬容。 一旦 你有 zit款能力， 你就會變gah 非常了不起。 以下 有三條 相關ｅ故事， 無定 你ma可體會 糊塗思考ｅ 好處。
美國第九屆總統 William．Henry．Harrison 出世di 一個小鎮上， 厝ｅma m是真好額。 伊細漢 就真文靜， 鎮上ｅ人 攏 甲意 創治伊， 定定 ga一ko gah 五ko 同齊dann ho伊， ho伊選一個。 William 總是 選擇 五角ｅhit個， 逐gai 伊攏 ho大家笑 是 大笨桶。 有一gai， 一個小姐問 伊：「敢講 你m知影 一角ham五分 dor一個 卡值錢？」 伊講：「我 定著知影，若是 我撿hit個一ko， yin就 ve 閣dann ho我 啊。」
第二次世界大戰 期間， 一位 調查深入ｅ 記者得著 情資， 美國軍情部 已經破解 日軍進攻 中途島ｅ密碼， 掌握著 日軍e動向， 準備veh ga伊pah敗。 Chicagoｅ一間報社 diroh 根據 zit個記者ｅ情報，烏白報導， 這ho真濟美國人 煩惱 日軍會知影 相關情報， diorh會影響著 美軍 整體ｅ佈局。面對 ziah重大ｅ 洩密事件， 有人要求 Roosevelt總統 徹底調查， 掠出 幕後ｅ藏鏡人， 但是Roosevelt 卻vor 任何ｅ舉動， 假仙作什麼代誌ma vor發生ｅ形， 軍事部屬 ma vor做任何ｅ 改變。 結果 zit件事 小到 日本情報部 ma vor注意著， 一件 有可能 會毀掉 中途島 成功ｅ事件， ho Roosevelt總統用 巧勢ｅ手段 化解。
當年， Carter想veh選 國會議員 或 Georgia州州長， 伊用這 做目標進行競選， du著 真濟ｅ困境。 伊當時 只是 一個 di伊ｅ家鄉─Georgia州西南部Sumter縣gah伊附近 小有名聲ｅ人 nia nia， di全Georgia洲還是一個 vor什麼人知影ｅ 人物。 有一寡記者 講sng笑ｅ ga伊ｅ名Jimmy‧Carter改成「Jimmy是誰」。 Du開始， 伊對 這個稱號 感覺頭痛。 真緊， 伊調整心態， 想veh用 zit個外號 打知名度。 伊用了 自身有限ｅ 私kia， 印真濟ｅ 宣傳小冊， 家己開車 走遍了 全Georgia州， 直接ham選民 做 上親密ｅ 接觸， 伊ｅ宣傳口號 是：「我是Jimmy」。 伊ma動員了 全家人， di天iau ve光前 就起床 出發去 工廠， 了後 到 每一家公司、 商店、 kia家， m管 du著什麼人， yin 攏 主動去 宣傳， 並且 請求 yinｅ支持。 yin甚至閣到體育場、 牲畜交易所 等 找人做 宣傳工作， 並且 kia di 每一個 賣場外口， 迎接 每一個出來ｅ人， 一直到 大家手中 攏有 宣傳小冊……
第一次參選 雖然失敗了， 但是「Jimmy是誰」 zit個外號 卻ho伊大出名， ma幫助伊 打下了 第二次選舉ｅ 基礎。
經過 短暫歇睏 了後， 伊開始準備 下一次選舉， 伊繼續做 有關土豆ｅ生理， 累積 選舉用ｅ資金。 同時 積極參與 國際獅子會俱樂部ｅ 活動。 He是 一個edang ho伊ｅ名聲 傳到 卡遠ｅ所在。 另外， 伊ma參加 真濟ｅ傳教活動， 這是 競選官職ｅ人 必備ｅ手段。 同時， 伊ma細膩擬定 競選策略。 Di 四年ｅ 競選過程 中， 伊總共 發表了 一千八百篇ｅ 演講， 直接ham六十萬Georgia州選民握手。 歸尾， 伊贏得 zit場選戰。

心得：
世界上 有 濟濟ｅ代誌， 有 一寡代誌 並m是 精明去看待diorh edang找著 上好ｅ辦法， 有當時仔 ma愛糊塗 一下， 想看mai 卡笨 但是有效ｅ方法， 無定diorh有 好ｅ方法 可用。 這ma ga阮講， 什麼代誌 攏有各種ｅ可能， 只要 加想一下， 一定找會著 卡好ｅ 解決方法。

Domino[多明努]思考法
謝至威


Domino思維是leh講，若是有一連串ｅ反應，小小ｅ物件diorh edang造成足大ｅ影響。所以阮ma vedang ga微小ｅ物件當做無看著。

Domino是咱所知影ｅ骨牌，ga in 排ho好，若sak倒第一片骨牌，後壁ｅ骨牌diorh 會ho頭前ｅ骨牌sak倒去，一直到上尾後ｅ一塊骨牌。

但是，有一個英國科學家White[懷特]，用一組真特別ｅ骨牌來做實驗。總有十三塊骨牌，每一塊骨牌攏無仝，第一張骨牌親像指甲仝款大，後面 ｅ骨牌攏比頭前ｅ大50%。 若照按呢排，最後ｅ一張骨牌比第一張大veh二百倍，第一張骨牌倒落ｅ時陣，會繼續推倒後面ｅ骨牌。經過計算，推倒最後一張骨牌ｅ力量，是第一張ｅ二十億倍，Domino效應是真正足可觀。

Gah Domino效應仝名ｅ是蝴蝶效應，這是一個美國天氣學家Lorenz所提出ｅ觀念。Di一擺ｅ天氣模擬中，伊bun惰ui頭開始計算，diorh將卡早計算ｅ結果，拍入電腦內，伊diorh去樓腳lin咖啡。等伊轉來ｅ時陣，伊發現最後計算結果完全無仝。原來伊用.506 代替原本ｅ.506127，所算出來ｅ結果是天gah地ｅ差別。伊後來diorh提出一個講法，一隻di Brazil ｅ蝴蝶所造成ｅ氣流edang ho Texas做風颱，這diorh是足有名ｅ“蝴蝶效應”。

上微小ｅ物件ma edang造成足大ｅ變化，咱vedang輕視zit個效應。若是咱veh用Dominoｅ思維，diorh ai 重視小小物件。有一個故事：一個人ho人關di一個無出口ｅ高塔內，只有一個窗仔edang出去，但是siunn guan，跳lue會摔死去。In某想veh救伊，但是伊無法度ga繩仔、拋到hiah guanｅ所在。Zit個人diorh想著一個方法，伊叫in某找來一隻金龜仔，di 伊頭上抹蜜糖，這金龜仔diorh往上爬去。金龜仔縛著一條綿索仔，綿索仔後壁gorh綁一條ka粗ｅ索仔，一直到一條edang ho人爬ｅ索仔，最後伊diorh用hit條索仔爬落去。按呢zit個人diorh用一隻金龜仔救著家己，你gam有想過一隻小小ｅ蟲edang完成zit款ｅ代誌？

其實，足濟發生di咱生活當中ｅ代誌 攏是Domino效應edang解釋。Diorh 親像 大學生 每一工攏leh讀冊， 雖然in 每一工讀了無gai濟，但是四年了後，in讀ｅ物件gah學問ｅ深度攏差足濟ｅ。也有其他ｅ代誌edang用Domino效應來思考，你gam有想過？

夢境浸透思考法 蔡明志
夢境浸透思考法 對 大部分e人 來講， 並無 特別智慧， mgorh 對 一寡 科學家、發明家、 文學家、 藝術家 gah 從事 創造發明e 人 來講， 卻edang ho人啟發， 引cua出 智慧ｅ果實。
人 di睏e 時 edang進行 夢境思路， zit句話 聽起來 親像 違反常識， 其實無影， 睏眠狀態 m是 等於 思維活動e 絕對靜止， zit時， 潛意識 gorh仝款 leh活動。
人腦 是 由 顯意識 gah 潛意識 系統 構成， 顯意識系統 工作 時， 個體處di 精神狀態， edang自覺 deh支配 言語gah行為， 潛意識 suah hong壓抑diau leh；當 顯意識 hong壓抑 時， 潛意識 diorh 開始活動， 以 觀念形式ｅ方式 支配 行為gah語言。 若是 潛意識 gah 被壓抑e 顯意識 某部分 發生接合， zit時 diorh 會產生 夢境思維。
潛意識系統e 活動gah睏眠 狀態 有密切 相關。 美國Chicago[芝加哥]大學 生理學教授 Klausman[克勞曼] gah Dan May[丹梅] 認為， 正常人e 睏眠 m是 一個單一e 過程， 是 慢波睏眠 gah 快波睏眠 反覆交替e 過程。
慢波睡眠 edang分作 四個階段：慢波一期、 二期、 三期 gah 四期：
慢波一期：開始入眠， 顯意識 呈現 seh神狀態。
慢波二期：進入 淺眠狀態。
慢波三期：睏眠kah深。
慢波四期：睏眠深沈。
Di慢波階段， 潛意識系統 開始活動， mgorh 猶無gah 抑制狀態e 顯意識 發生接密。 快波睏眠 gorh稱 異相睏眠， zit時， 潛意識 處di 活跳狀態， gah部分 顯意識 發生聯繫， 所以 有 夢境思維現象 出現。
中國 宋朝 詩人 陸游 用 《記夢》、 《夢中作》 做題e 詩稿， 濟到 九十外首， 咱 edang ui 伊e題目 中 看出 伊 是 按怎 di夢中 創作。
國外 ma有真濟 ui夢中 得著靈感e 例， 親像 俄國e 化學家Менделе́ев[門捷列夫] 對 元素週期表 研究足久， 但是 攏得ve著 合理e排列， 當 伊 為這苦惱 時， 卻dui夢中 清楚看著 zit張 苦苦求得ｅ 週期表。 德國e 藥理學教授 Lloy[勞伊]， di 伊 看著小說 睏去了後， 半夜 伊ho夢中e情景 驚醒起來， mgorh 伊 只是 雄雄狂狂 記落一寡， 所以 di leh第二工， 伊無h法度 解釋 伊記下e 物件， 一點仔 攏回想 ve起來， diorh dam第二工暝時 gorh出現 仝款ｅ 夢境 ， 伊diorh趕緊 詳細 做了注釋， 接續來， 伊e實驗 證實了 伊e結果。 伊e靈感 是：如果 用 兩隻四腳魚 同齊 作實驗，diorh edang解決 神經傳導e 化學物質 問題。
眠夢浸透思考 對 足濟 從事 科學研究、 發明創造 gah 文藝創作e 人 來講 不止仔 重要， 如果無 夢境浸透思考方法e 幫助， 大作家 Stevenson[史蒂文生] e “Treasure Island”(金銀島)、義大利 出名ｅ 小提琴家Tartini[塔蒂尼] e “Devil's Trill”(魔鬼e顫音) 恐驚 diorh 無才調 完成。 德國 名作曲家Wagner[瓦格納]、 Haydn[海頓]， 俄國 作曲家Stravinsky[斯特文斯基] gah 奧地利 作曲家Mozart[莫札特] ma ve有 ziah偉大ｅ 名曲 gah世人 見面。 法國ｅ 哲學家 兼 理學家、 數學家Descrates[笛卡兒]， 其他 如 英國ｅ 國寶Newton[牛頓]、美國ｅEdison[愛迪生]等 若無 日有所思、 夜有所夢 浸透 di 專注當中，yin ma ve有 hia濟發明。
當 有人 問某一位 諾貝爾得主e 研究思想 主題 dui dor位來ｅ， 伊回答：“di我e眠床頂， di睏醒ｅ 時， 或是 di 睏落眠e時 。 Di 不知不覺 中， 人腦 進行著 大量e 無意識 kangkue， 咱有 真濟 重大問題 diorh是 按呢解決e”。 美國 心理學家Cannon[坎農] dui 少年時 diorh diann diann 藉夢中e靈感 來 解決問題， 伊講：“ 長期以來， 我靠 無意識e 作用過程 幫助我 已經 成做習慣， 參像 我deh 準備演講 時， 我會 先擬好 大綱， di 之後e 暗時， 趕入頭殼內e 就是 gah 大綱有關e 例 gah 妥當e詞句 gah 創新e想法。 我ga紙筆kng di 手邊， 方便 掠取 zia-e可能 足緊 diorh會消失e 思想。”
Kekulé[凱庫勒]有zit句名言：“學習作夢 吧， 眾先生 啊！”。 這ga咱講 有心veh 發明創造e 兄弟姊妺， 夢境思維 edang 開啟人e 靈感。
請問 你敢有 仝款ｅ經驗？

Napoleon[拿破崙]思考法

吳牧寰 (gho bhok huan)

Napoleon[拿破崙]是一個 di戰爭上 真有 軍事才華ｅ 人， 伊一生 pah過 無通計算ｅ 勝戰， 伊 是 為什麼edang hiah-nih-a厲害， 別人sua做 ve到 leh？ 這是 因為 伊真有家己 e主張， 無論 是 di什麼款ｅ 狀況之下， 伊想veh 做啥， 伊diorh敢去做、 敢去試， 而且 去 面對問題 解決問題， 這 diorh是 伊成功ｅ緣因。
Hit當陣， 有zi一個 漢草 gai粗勇ｅ 法國將軍， 伊真討厭 Napoleon[拿破崙]， 所以 伊刁工 di zit個 社交活動ｅ 所在 ga生做 矮dng ｅNapoleon提來 比較著 是 啥人kah guan， 想veh ho伊 歹看。 但是Napoleon sua送伊 一句世界有名ｅ 話語， 伊 是 按呢講ｅ： 若是我願意做， 我edang 馬上diorh teh我ｅ劍 來消去 你我中間ｅ 差別。 Hiah-nih-q簡單ｅ一句話 diorh表現出 這是 真有氣勢ｅ Napoleon精神， 若換做 是 別ｅ普通人， 可能 早diorh氣gah 無法度講話a， ma gorh 卡無可能 講出 zit種 氣派十足ｅ 英雄話， ga hit個鴨霸ｅ 法國將軍 ho 倒轉去。
Di咧歷史上 ma有 一個事件， ma表現出了hit個鴨霸ｅ Napoleon zit種 冷靜敢拚ｅ 精神。
Di 一九八七年ｅ 十月中ｅ 一工， 有一台架蘇聯ｅSU-27戰鬥機， 對 挪威ｅ P38偵查機 做了 一擺成功ｅ 空中手術， ho 西方ｅ 幾個國家 大受驚惶， 代誌 是 按呢 發生ｅ： P38 di 國境線ho SU-27 擋落來 二擺(nng bai)以後， gorh 偷偷仔 駛轉去， 因為 伊想講 SU-27 ma已經轉去a， 想veh 繼續探查 軍情， 但是 ho伊 想ve到ｅ 是 SU-27 竟然gorh 一擺出現， mgor P38 ｅ 駕駛員 認為 按照 hit 當時ｅ 國際情勢 看起來， 對方 是 無可能 會對家己 開火ｅ。 伊 是 真正 無想m對， SU-27並無 用鎗子(cing zi ) 來pah伊， 但是 ma m是 hiah-nih-a 簡單 diorh 放伊sua ｅ。 SU-27 diorh 飛到P38ｅ 後壁， 連後 用伊 利劍劍ｅ 飛能機尾溜， 高速切開 P38ｅ外殼(qua kak)， P38只好 駛著 殘破ｅ 飛能機， 趕緊來 逃命。
SU-27ｅ 駕駛員 按呢nia 什麼攏m驚， 完全按照 家己ｅ 想法gah勇氣 來行動ｅ 精神， diorh 是 咱所講ｅ Napoleon zit個 gai好ｅ範例 a !
假使hit當陣 di咧 P38 hit台 飛能機上ｅ 是你， 你敢有勇氣 來相信 你家己ｅ 駕駛技術， 來完成 這有史 以來 上艱難ｅ 空中手術， 來保衛 國家ｅ機密 leh？

貓仔 食 niau鼠
蔡易宸(靜宜企業4)

有一隻貓仔 vat一隻niau ci， dor 膨風講 家己有 外甲意 niau 鼠， 甲意gah伊 交朋友，了後 niau 鼠 總算同意 gah 貓仔住， 作伙生活。
“咱 必要準備 過冬ｅ物件a， 若無 咱到冬天 dor會 iau 腹肚，” 貓仔講，
“講著你嘛， 我ｅ小niau 鼠， dor位 攏m通去， 我真驚你 會ho什麼niau 鼠夾仔夾著。” niau鼠接受 貓仔ｅ 好建議， 逗陣 dor去買來 一罐豬油， mgorh 兩個人 suah m知 veh ga豬油 kngdi什麼所在。 Yin 日ma 想、 暝ma想， tong尾後 貓仔講：“我想講ga豬油 kng di 教堂裡 是 上穩當ｅ， 因為 誰ma m敢偷 教堂內底ｅ 物件。 咱來ga 豬油 藏di祭壇 下， 無到 萬不一ｅ 時陣 決mai動伊。”
豬油罐 dor按呢 hong放去 安全ｅ所在。 可是 過無外久， 貓仔 開始想veh食豬油了，dor對niau鼠講：“小niau鼠， 我想veh ga你講 一zan代誌。 我ｅ表姐 du生 一個小寶貝， 閣請我 作小寶貝ｅ 教母。 He小寶貝 全身雪白，帶著 一寡 褐色ｅ斑點。 我veh抱伊 去接受 洗禮， 所以 今仔日 veh出去 一下， 你一個人 家己顧厝， 好無？”
“好！ 好！”niau 鼠講， “做你去。 若是 有什麼 好食ｅ物件， 千萬 愛會記我。我 足想veh嘗 一點仔 洗禮時 用ｅ 紅葡萄酒。”
這一切 定著 攏m是 真ｅ， 因為 貓仔 並無表姐， ma無hong請去 作教母。伊直接 去教堂， 偷偷仔 爬去 豬油罐仔 hia， 開始舔呀舔， ga頂面hit層 豬油 舔了了。
了後， 伊 di城裡ｅ 厝頂 散步， 想veh 看會du著 什麼 好運氣 無； 了後dor 倒落來曝日頭。 逐gai想起 hit罐豬油， 伊 dor 擋vediau 舔舔家己ｅ 嘴箍。 伊一直等到 天烏 ziah轉去 厝裡。
“啊， 你 總算轉來 了，” niau 鼠講， “zit一工 一定 過得足歡喜 吧？”
“一切順事。”貓仔回答。
“lin ga qin-a號什麼名 ？”
“無頂層！” 貓仔 冷淡deh講。
“無頂層！”niau鼠 叫出來， “zit個 古怪ｅ名 真罕見。 Lin家常 取 按呢ｅ名嗎？”
“he有什麼？” 貓仔講， “ve比 你hia-e 教子 叫什麼 ‘偷pang幼仔ｅ’ 閣卡vai吧？”
　　過無外久， 貓仔 又想veh食 豬油 了。
伊對niau鼠講：“你ai幫我一個忙， gorh一個人 顧厝。 閣有人 請我作教母 a，zit個qin-aｅ 頷頸 有 一條白箍， 我實在 無法度 推辭。”
好心ｅ niau鼠同意。 貓仔ui 城牆後面 溜進教堂， 一口氣 食掉 半罐豬油。
“什麼物件 ma -ve比 食著 到家己ｅ 嘴內 閣卡 一度贊，” 伊講， 心內 對 zit一工ｅ收獲 感覺 足滿意。 等到厝， niau 鼠問講： “zit個紅嬰仔 號 什麼名字 呀？”
“食了一半 ” 貓仔回答。
“食了一半！ 你 deh講什麼 呀？ 我食ziah老 閣mvat有聽講按呢ｅ號名。我敢打賭， dor是 歷史上 ma-ve按呢叫！”
　　閣無外久， 貓仔ｅ嘴箍 又開始 流嘴nua lo， 閣想veh去 貪豬油。
　　“好事成三 嘛！”
伊講，“又閣 有人請我 去作教母 了。 Zit個qin-a 除了 爪仔是白色ｅ， 歸身烏sorsor， 連 一支白毛 攏無。 這是 罕見ｅ代誌， 你 當然會 同意 我去，對嗎？”
“無頂層！ 食了一半！” niau 鼠回答， “zia-ｅ名 真怪！ 我實在 弄binnve明白。”
“你透早 a ve出門，”貓仔講， “歸工 穿深 灰色ｅ皮裘(hiu5)， 拖著 長長ｅ尾溜， 坐di 厝裡 烏白想， 當然 頭殼ve明白 啦！”
趁著 貓仔 無di厝， niau鼠 ga厝內 拚掃清氣， ga 物件 款ho好勢。 可是he貓仔 ga剩ｅ豬油 食gah 清氣清氣。
“人 只有 ga物件 食ho 清氣清氣 才會放心，” 伊 家己講 家己會。 伊食gah飽飽dudu， 一直到 天黑了 才撐著 圓圓會ｅ 腹肚櫃仔 轉去。 niau 鼠看著伊轉來， 問伊 第三個qin-a 叫什麼名。
“你mave甲意 zit 款名 ，”貓仔說，“伊叫 ‘食gah光光光’。”
“食gah光光光！” niau 鼠 叫出來， “zit個名 hong 花gorgor！ 我 從來mvat di冊裡見過。 食gah光光光！ 這是 什麼意思 呢？” 伊 頭搖搖leh， 身軀縮起來， 倒落去 睏去了。
自 按呢 了後， 貓仔 dor 無人 閣請伊 去作教母。 可是 冬天 來到了，外面 找無 任何 食ｅ物件。
niau 鼠 想著yin 準備ｅ 過冬ｅ物件， dor講： “行 吧， 貓仔！ 咱teh 儲存ｅ 豬油 吧。 咱 edang食 一頓腥臊。”
“是，” 貓仔回答， “若准會 ga你 suisui、 尖尖ｅ 嘴舌 伸到窗外 去lim 西北風 仝款。”
Yin起身 去教堂， 等yin 去到hia， 看著 豬油罐仔 倒di-hia， 內面 suah是空ｅ。 “an-niu-ue哪！” niau 鼠講， “我zitma 總算明白 是按怎樣 啦！ 你有影真是 一個 好朋友！ 你去作 什麼教母ｅ 時陣， ga zia-e豬油 全食 了了了！ 代先是食了上頂guan一層， 閣食了 一半， 上尾後……”
“你ｅ狗嘴 ga我恬去！” 貓仔嚷叫， “你 若再羅嗦， 我連你ma食！”
“……食了了，” 可憐ｅ niau鼠 續嘴講。
伊ga話 講suah， 貓仔dor pa去 伊ｅ身上， 掠著伊， ga吞食落腹。 Zit個世界 dor是按呢！

小 紅 帽 劇本
靜宜學生
故事：小紅帽
編劇：黃淑娟
監製：許雅婷、黃淑娟
演員：旁白—鄭暐諺 拍獵師—許雅婷
小紅帽—方國軒 阿嬤—謝智劦
大野狼—張旂逢 阿母—黃淑娟

旁白：「古早 閣古早 有一個 足古錐ｅ 小姑娘， 真得人緣， ma富有 正義感， 逐個人 攏足疼伊， mgor， 上疼伊ｅ人 dor是 伊ｅ老阿媽， 老阿媽 ga伊 惜命命， 又家己 親手編織 一頂 紅色布料 所作ｅ紅帽 送ho伊， zit個小姑娘 ma真甲意 zit頂帽仔， 日暗 ga戴di 頭殼頂， 所以 逐家攏叫伊 『小紅帽』。」

旁白：「有一工， 阿母知影 老阿媽ｅ厝 定定 著賊偷， dor叫 小紅帽 去找 拍獵師， 請伊 想辦法。」

阿母：「小紅帽阿， 來！ 緊去向 村莊裡ｅ 拍獵師 求助， 阿媽ｅ厝 經常 ho人 偷teh物件， 趕緊 講ho伊知。」

小紅帽：「阿母， 我會 做到好， mai操煩！」

旁白：「dor按呢！ 小紅帽 去向 拍獵師 講 zit款代誌。」

拍獵師：「小紅帽， 我zitma無閒， 等我 攏做好 我ｅ代誌 dor sui 過去看mai。」

旁白：「因為 拍獵師 無法度 馬上過去， 但是 小紅帽 真煩惱 阿媽 會受著 傷害， dor 家己一個人 去看阿媽。 路途中， 小紅帽 ma買 阿媽 上愛食ｅ 臭豆腐 veh去看伊， 想著 veh見著 阿媽 阿dor 足歡喜， 一路上 攏leh 唱歌， 三腳走二腳跳。」

小紅帽：「到阿媽厝 了， 先kok個門 看阿媽 有di 無。」

旁白：「阿媽 聽著門 發出聲音， dor拖著 虛弱ｅ身軀 去應門， 無想著 竟然 是 小紅帽……」

阿媽： 「我ｅ乖孫仔 小紅帽， 阿媽 真歡喜 看著妳啦！ a mgor 我 今仔日 身體ve爽快， 無法度 好好招待 妳， 妳dor 卡委屈 一寡……」

小紅帽：「阿媽！ 我無要緊 啦！ 我會 好好照顧 妳。」

旁白：「阿媽 閣 倒di眠床 歇睏， 小紅帽 ma di眠床邊 照顧伊。」

小紅帽：「看著 阿媽 ziah艱苦， 厝內裡 又無藥草 好食， mgor 我 閣ve放心 阿媽一人 di厝內， zitma是 veh 按怎 呢？」

旁白：「du-a好， 門 又 發出聲音， 是 有人來 啊！ 小紅帽 dor去開門， he m是 人 是 大野狼。」

大野狼：「你好！ 小紅帽。」

小紅帽：「你好， 狼先生。 有什麼代誌 嗎？」

大野狼：「聽人講， 這間厝內 有一位 破病ｅ 老太太 是m是？」

小紅帽：「是啦！ 我du deh煩惱 藥草ｅ 問題…」

旁白：「這時， 大野狼 聽著 小紅帽 按呢講， dor歡喜 開始暗算。」

大野狼：「小紅帽， 阿無按呢， 我替妳 照顧 zit位 破病ｅ 老太太， 妳出去 cue藥草 好無？」
小紅帽：「好阿！多謝你，狼先生。」

旁白：「小紅帽 並無懷疑 dor 趕緊出去 找藥草， ho 大野狼 去 照顧阿媽。 等小紅帽 轉來， du好 看著 大野狼 抱著阿媽 出門。」

小紅帽：「狼先生， 你抱阿媽 是 veh去dor位？」

旁白：「大野狼 無cap伊， dit dit 走去 樹林ｅ內底， 小紅帽 看伊 無回答， dor偷偷a gorh due di 伊後壁行， zit時 拍獵師 ma du-a好到zia， 看著 小紅帽 躡腳行， 伊ma跟著， dor按呢！來到 大野狼ｅ厝。」

小紅帽：「是按怎 狼先生 伊veh cua阿媽 轉去lin厝？」

旁白：「當 小紅帽 感覺奇怪 時， 雄雄 感覺著 有人deh dah伊ｅ肩胛頭， uat頭 dor看著 是 拍獵師， 不過 拍獵師 驚大野狼 發現著伊， dor叫 小紅帽 mai出聲， 兩個人 做伙看 大野狼 到底 是 deh binn 什麼vang。」

大野狼：「今a mai偷物件， 直接 ga zit個veh死ｅ人 帶轉來，有幾仔餐免閣再 煩惱！
哈！哈！嘻！嘻！」

旁白：「當 大野狼 du準備 veh食 阿媽ｅ時， 小紅帽 gah 拍獵師 趕緊出來。」

小紅帽gah拍獵師： 「ga 我擋leh！ 」

小紅帽：「你敢 對我 阿媽 安怎， 你 若ga kap著 一支毛 我dor對 你ve客氣！」

大野狼：「伊 是 我ｅ暗頓 呢！ 誰cap你！」

拍獵師：「我聽ve 落去， ho伊死！」

旁白：「拍獵師 講完 zit句話 了後， dor ga 身上ｅ獵槍， 對 大野狼 開槍， bong！ 大野狼中槍 死qenqen。」

旁白：「了後， 小紅帽 ga阿媽 帶回 阿媽ｅ厝裡， 逐天 煮藥草 ho 阿媽 食， 阿媽ｅ身體 總算 恢復健康， 大家 暫時放落 心肝底ｅ 石頭。」

　Ve pah死結e橫向思考法
江曲涵

橫向思維應該是gah垂直思維相對來講e，意思是指盡量擺脫傳統觀念另外ui新e角度對某一事物重新思考e一種方法。垂直思維強調思維e單向性，橫向思維強調思維e多向性，dor是qau ui多方面、無仝e角度來考慮問題，閣ga可能相關或無相關e要素結合做伙，以期望得著對問題e新創見。橫向思維e提出，ho思維e途徑ui單向發展到多向，因此具有kah濟e創新可能性。

　　絕大多數人di思考一個問題時，慣用e是「垂直式思維」，ma是假定一個目標或角度，然後親像堆積木按呢，一個步驟接一個步驟，照對錯e邏輯推理法則架構起來，電腦e思考方式即為典型e「垂直思維」。「水平思維」則是di思考時有真濟無仝e起點、甚至互相矛盾e假設，像亂散e積木，然後找出zit寡積木之間是m是有「相接」e所在。

　　veh有創造性e思想，咱需要ui別e所在找著資訊來啟發家己，若咱edang廣泛涉獵多個領域，閣藉助zit寡無仝e領域e知識，再應用di咱所愛面對e問題，應用來完成咱e創造，dor edang解決咱e問題。zia-e無仝領域e事物，往往可能di表面上並無直接關係，mgorh咱edang透過橫向思維，就算是牽強ma無關係，將咱所面對e問題gah伊結合，dor機會得著一個有效用e、簡單gah理想e新概念。

　　有人對zit種技巧做出延伸，其實只是提醒咱列出一系列具體閣gah問題無關e物體，並去分析zit寡物體e特性再加以研究，想veh ui分析之中尋求上有可能有效解決問題e方法，zit種聯想方法，edang訓練咱e創新gah啟發能力。

　　除了跨領域e結合，橫向思維也edang講是，ga兩種無並列e事物互相交叉，ga兩者e優點相結合，ho伊成做一個新e事物。比如講，咱可以翻閱商品目錄，將兩項以上目錄上e產品隨機交叉，並去發想一寡獨創性e想法，ga原本看起來並無關係e兩項產品連繫起來，可能咱dor edang開發出獨創e新產品。

　　比如，保溫杯dor是熱水瓶gah水杯強制聯做伙，又比如，ga機槍、播種機gah飛機合做伙，dor可克服地面人工播種慢，mgorh空中又無法度深入播種e問題。Zia-e例，攏是藉由人運用想像力將gah問題無仝e物品、知識領域，藉著不斷橫向e思路轉換，達到思維e快速推進，進一步找出適合e答案，都是橫向思維有代表性e例。

　　我e心得是橫向思維gah一般常用e垂直思維，簡單比較起來，比如講現在veh挖一個洞孔，垂直思維dor是一步一步e向下腳挖，a橫向思維則是di原本e洞附近挖kah濟e洞孔，Zit種發散式e思考，互相無特別相關，每一種答案也無所謂對錯，但往往獨有創意、巧思，ho人拍桌仔huah好，品味無限。

　Ve 單一死結e橫向思考法
江曲涵

橫向思維應該是gah垂直思維相對來講e，意思是指盡量擺脫傳統觀念另外ui新e角度對某一事物重新思考e一種方法。垂直思維強調思維e單向性，橫向思維強調思維e多向性，dor是qau ui多方面、無仝e角度來考慮問題，閣ga可能相關或無相關e要素結合做伙，以期望得著對問題e新創見。橫向思維e提出，ho思維e途徑ui單向發展到多向，因此具有kah濟e創新可能性。

　　絕大多數人di思考一個問題時，慣用e是「垂直式思維」，ma是假定一個目標或角度，然後親像堆積木按呢，一個步驟接一個步驟，照對錯e邏輯推理法則架構起來，電腦e思考方式即為典型e「垂直思維」。「水平思維」則是di思考時有真濟無仝e起點、甚至互相矛盾e假設，像亂散e積木，然後找出zit寡積木之間是m是有「相接」e所在。
　　
veh有創造性e思想，咱需要ui別e所在找著資訊來啟發家己，若咱edang廣泛涉獵多個領域，閣藉助zit寡無仝e領域e知識，再應用di咱所愛面對e問題，應用來完成咱e創造，dor edang解決咱e問題。zia-e無仝領域e事物，往往可能di表面上並無直接關係，mgorh咱edang透過橫向思維，就算是牽強ma無關係，將咱所面對e問題gah伊結合，dor機會得著一個有效用e、簡單gah理想e新概念。
　　
有人對zit種技巧做出延伸，其實只是提醒咱列出一系列具體閣gah問題無關e物體，並去分析zit寡物體e特性再加以研究，想veh ui分析之中尋求上有可能有效解決問題e方法，zit種聯想方法，edang訓練咱e創新gah啟發能力。
　　
除了跨領域e結合，橫向思維也edang講是，ga兩種無並列e事物互相交叉，ga兩者e優點相結合，ho伊成做一個新e事 物。比如講，咱可以翻閱商品目錄，將兩項以上目錄上e產品隨機交叉，並去發想一寡獨創性e想法，ga原本看起來並無關係e兩項產品連繫起來，可能咱dor edang開發出獨創e新產品。
　
　比如，保溫杯dor是熱水瓶gah水杯強制聯做伙，又比如，ga機槍、播種機gah飛機合做伙，dor可克服地面人工播種慢，mgorh空中又無法度深入播種e問題。Zia-e例，攏是藉由人運用想像力將gah問題無仝e物品、知識領域，藉著不斷橫向e思路轉換，達到思維e快速推進，進一步找出適合e答案，都是橫向思維有代表性e例。

　　我e心得是橫向思維gah一般常用e垂直思維，簡單比較起來，比如講現在veh挖一個洞孔，垂直思維dor是一步一步e向下腳挖，a橫向思維則是di原本e洞附近挖kah濟e洞孔，Zit種發散式e思考，互相無特別相關，每一種答案也無所謂對錯，但往往獨有創意、巧思，ho人kiau桌仔huah好，品味無限。