一封情批 李軝

親愛的○○:
今仔日e暗時,窗外e月娘高高掛di天邊,天頂e星光閃閃耀耀,耳孔內傳過來夜蟲ziu-ziu e叫聲。Di zit款無眠e暗眠,我一頭lim著茶米e清香、一頭想起妳美麗e形影。頂一gai gah妳短暫e離別,ho我更加深對妳無限e相思。
妳甘會記:舊年e春天,咱二個手牽手同遊日本東京,欣賞櫻花開e快樂日子。輕輕仔行di上野公園,照di咱目睭前e,是滿天艷麗e櫻花,背後伴著古典e廟寺,景色真sui。妳hit個清秀可愛e嘴pe,摻著櫻花淡淡e清芳,使我迷戀ve止。是「人比花嬌」,a是「花襯儷影」,我分ve清楚。
咱二個鬥陣dor di櫻花樹腳,隨在落花飄滿一身,一種幸福、快樂e情絲,充滿di妳我e心內。一位日本人,ma感染著咱e幸福,伊為咱二個hip著真濟張e相片,ziae相片,ma記錄著咱二個人堅定ve變e愛情:
今仔日暗時e風城,依然吹來一陣陣e強風。立冬以後,寒意漸漸深,妳愛加穿一領衫,ma愛保重家己e身體。Di黃昏e時陣,看著一群群鳥仔向南飛去,ma希望我親像鳥仔仝款,有一對翅仔,會使飛到千里以外,飛去妳e身軀邊,gah妳每工做伙,以免去我對妳e相思。最後,
祝妳
青春美麗!
友李軝謹上
98年11月28日

daiqi007 發表在 痞客邦 PIXNET 留言(0) 人氣()