明柔花木 情意深 張春凰

.銀柳 gah 蘭花

銀柳gah 蘭花 是 今春 親友送阮e 二項禮物。
Veh過年a, 宜蘭三星 天送埤e 天送伯a, 運送寄來 數量ve少e銀柳。 自按呢, 銀柳來di阮兜e客廳, 伴阮過了 跨年e 冬春, 展出 伊e美姿, 一直忠守著 長長e 一個季節, 看伊綠色猶再 反勢會比 一個季節 閣卡長久。
過年佳期, 故鄉e小姑 送來一盆 阿里山e 桃紅蝴蝶蘭, 花蕊柔美 帶嬌艷, 一看diorh會ho sannh著, diorh按呢, zit盆貴客 ia來陪伴阮。
自來 阮mvat 真正 接觸過 銀柳gah蘭花。
這是一段 耐心e約會、 ma是 體貼溫純e 表徵。
銀柳 採枝 離田土, 約有 一公尺外 帶著 五六十個 烏do紅e 花苞, 一如 小楷毛筆e 形體。 Zit層包膜 堅實e時 veh剝伊 未輸deh咬開瓜子e 防護功能, 等到花veh開e時, 閣假若 土豆膜 輕輕仔lut一下, diorh可ga伊e外衣 褪掉。
銀柳 閣叫做 貓柳, 原來是 花苞 脫離外膜 了後, 正式e 花蕊真形 ziah開始顯出 銀色貓尾花e 身份。 通常zit個 身世階段 上gai普遍 。 西洋e聖誕樹 通常 ve kng 過 新曆年e初一、 二, 台灣 插花過年e 鬧熱氣氛 大約ma ve 超過 一般花蕊e 枯退期, 所以 銀柳e命名, 注定dizia。
因為 無閒去ga管顧, 銀柳 逃過一般dansake花期命運, 奇蹟diorh 呈現 di zit暫 後半存活e 自然美貌。
精彩e所在 dizia。
貓尾一開始 是 銀sihsihe珍珠輝, 一點一點 di禿枝上 若 夜暗e天星。 飽實e 毛筆尖花, 閣若像是 一隻無尾熊 anan kinn-di 樹箍身e縮影, 等候 過了 一二工久, 花蕊閣開始 變到 放鬆e身段, zit時 一蕊一蕊e花毛絮(su2), 閣若像是 無尾熊e 膨紗毛, 按呢 銀灰銀灰 自有典雅。
鬆化ho人想著 年老e退化、 結束e前奏, mgorh 通例 必有例外, 驚喜 ma是dizia。 Di 幾百蕊e 銀貓柳 當中, 有幾蕊苞柄, 出現 綠青e色緻, 粉綠絨毛hit款顯目e 特色, 在你閣卡無閒, ma ve去ga漏過, he是一種 明柔e 訊息色水 來拍招呼。
生命e飽水 ho人懷疑, 這敢是真e? 本底二公分e 小楷毛筆頭 大部份攏 功成名退, 只有 其中 極少數 拓展到 二倍大, zit個形體 m是貓尾e 小局面, 伊開始di花身 一直漲膨, 好參像是 有身e女性, 腹肚內 有神聖e任務 等待完成。
按呢e現象, ho人連想著 一巢蜜蜂, 只有一隻 女王蜂e存在, 其他大群e工蜂, 攏是 為著群體 來付出, 甘願 用生命 為 家己e種族 做一個幕後小卒仔?
閣過二工, zit蕊蜂王花 營養充足, 花托e頭座 孵出幼幼e 葉影, 花蕊本身 出現 一條一條e花序, 斟酌ga看, 花絲頂面 閣有花藥, 花房粉翠、 花絲粉綠黃, 盛開e銀柳 已經有 五六公分, 伊e形態 有寡 膨鼠e 翹尾溜。
再過二三工, zit蕊 多變化e 花, 親像 一支 棕cing仔花 [刷子花] 按呢e花絲, 閣有 淡薄仔 刺毛蟲e 圓身形, 開始橫平, 身長 七公分、 身圍 二公分。
Zit時 凸枝e身上, 葉仔穎 ma m認輸, zong出來 裝飾, 好一個 銀柳奇妙旅程。 朋友來厝裡, yin 用經驗ga阮講 yin mvat看過 銀柳zit段後力 豐美e生命。
銀柳e身邊 有一盆 桃紅蝴蝶蘭, 應該是 台灣原生e 姬蝴蝶蘭。 Zit盆蘭花 逢春盛開, 枝頭到枝尾 點綴著 生機健美e 花串, 一蕊一蕊 攏 幼秀柔美 ziau勻青春。 雖然 盆坩是 一個 真普通e 塑膠套, 伊有氣根 攀著坩沿、 飽水e葉片, 一銀一桃紅, 艷麗相映, 光亮e銀柳 di暗暗e室內 有光點, 陪伴著 山谷來e 幽蘭, 富貴風尚 總是春輝。
銀柳gah 蘭花 親像一對 金童玉女, yin守護著 一室e優雅, 充沛e心力, 為阮seh轉e人生, 帶來調適。
過了一季 花期原在, 當 阮ga親友敘述, 有人講 因為靠窗 空氣、 日光、 水氣 充分, 所以 生機旺盛; 有人講 花位e風水 好, 叫阮緊坐di hia 設想投資e計劃 必然有 好手氣。
O~oh~, a是 用一枝筆 記落 銀柳gah 蘭花e 身段, 阮甲意 按呢想lin!

.緋櫻 gah桑椹
冬寒掃去 櫻花e葉衣, 樹木枯枝 仝款是 自然sui。
年年冬節時分, 緋櫻 為世間 宣示 一冬閣到lo, 四季節氣 已經 一循環, 辛苦e人啊, 請你 停一下仔腳, 品賞 樹箍身gah枝脈身骨。 就使 hit欉陳年五葉松 仝款 一身青衫 向天, zit排櫻樹 枝格紋理 可是 樹皮烏金金。
過了風寒, 春神手拽一下, zit排櫻樹 一時 精神起來, 平常恬靜e 人行路道, 桃紅櫻花 來鬥春。 細細e蜜蜂 沈醉di花蜜e美味, 細細e綠笛a 跳徙di 枝花當中。
緋櫻 來deh緊、 ma 謝幕了緊, 過幾工, 伊身傘下e 土地 攏是 落花e色水。
閣過了一暫仔, 嫩葉 代替花蕊 添滿樹欉, 一樹親像deh 變魔術, 一直deh換戲裝。
應該是 停止大變化e 時陣a, 應該是 甘願安份e 時陣a。
日出日落, 阮行過 無數e來回。
有一回, 樹欉e搖動 招醒 過路人e心, 為什麼 鳥隻飛動 di枝葉間?
探頭ga相, 原來 隱藏di樹枝頂e 櫻果 已經 鮮紅, 閣有 烏do紅e深熟, gah櫻桃e色緻 仝款, 原來 這是 生命循環e 祕密。
幾冬前, 區內e 一個太太, 來來回回 deh巡看 土腳e 幼樹栽, 後來阮閣看著 伊deh 種zia-e櫻花栽, di 日頭腳 cai竹棍 固定樹仔, 幾年後, 這diorh是 答案。
緋櫻 是 台灣原生樹種, 俗名叫做 山櫻花、 山櫻桃。
山櫻花 樹欉 卡明顯, 比 桂花 卡大欉, 比 桑椹 卡大閣結實。
土生e桑椹 真qau 家己生湠, 有土 伊diorh會活, 花臺e一小撮土, 伊攏 掠著機會m放。 土腳 只要 lu草e工人 放過伊一季 來年 diorh有機會壯大。
有一欉桑椹 阮已經 看伊二十冬a, hit欉玉蘭花 十冬e樹齡 早早diorh 大出伊e 幾倍身guan, zit欉桑椹 仝款 凍結青春 di伊e 軟枝 短巧身材。
Diorh di櫻花e果實 熟透e同時, 幽靜e校園內, 一群樹鵲 ga-ga叫, 鳥群 一隻一隻 輪流輕歇 振動 細樹枝, 鳥喙 相準準 deh啄 桑椹e果實。
院園內 樹欉真濟, gah 隔壁e 光明新村 連做一片, 閣有 成功湖e水塘, 鳥隻生態 多樣, 有影是 水木清華。 朋友來訪, 對著 幾欉 筆挺e 南洋杉 講:“埕斗 有zit款稀寶, 子弟qau讀冊”。
講到zia, 過往e 清大北院, 還ho 台灣銀行, 起造一大片e 商店gah住宅, 現金 添加e同時, 人類環境e 肺部呼吸 閣減一塊, hia-e樹欉花草 免不了 消滅。 唉呀! Hia-e 櫻、 桑、 苦楝舅 gah 南洋杉 深鎖di阮e頭殼內。
佳哉! 桑椹, 只要有 一小撮土, yin ve放棄 生存機會, 永遠ve放棄!
霧社緋櫻ho人想起 佳人英雄, hit款 風中溫存e 母土之愛! 所以 平地繁花點點, 點起 一段淒美e 歷史過往。


.流蘇gah綠汽水
靜宜大學 靜園e 小食部邊緣 有一片 空地, 清明前 ziann百欉e流蘇 接著苦楝e 粉茄仔 細蕊花, 現出 大範e雪白。
流蘇gah苦楝 仝款 攏di 樹欉 上gai精華e 頭殼部位 開蘗, 迎著風、 接著日月, 蜂蝶ma來聚會。
流蘇 遠遠ga觀賞 純潔淨雅, 近看ziah可察是 聚繖花序。 流蘇可比 女子e飾帶, 名e本身 diorh有 浪漫風神, 花蕊密實 形成花海 更是 數大美集, 一旦gah伊相du頭, 無去ga注目 應該m是常態。 Diorh按呢生, 阮拋棄 gah時間競賽e 堅持, 暫時放落 有e無e 什麼代誌, 緊急veh去 gah伊相會, 彷彿 愛著病相思e 青狂。
特出e花 白paupau, 配對 新春e 青嫩葉, 白青相伴, 光影清新 柔和。
少年e時 身邊e伴 總會邀請 阮去 伊e母校 觀賞流蘇, 二十冬後, 第二代少年家 興hip相, ma歡喜put-put gah阮分享 伊e心意, 流蘇牽連yin 父仔囝e 校友情, 一份 仝款e記憶 di生命流動。
Hit冬 感內 少年家e熱情, 閣撥工 去看流蘇, 一份 愛情gah親情e 滾絞gah延續, 滿足 自在心胸。
春陽軟勢, 午後e咖啡座, 來 di課後e放鬆。
我愛沿著 hit個公園, 享受 新春氣息, 再坐落 伊e身邊。
伊 熱情款待 goziann阮 來一杯 伊du-zia 享用e 透明綠soda, 無lim一杯,人生 會抱憾。
面前e綠soda 猶velim, 心肝頭diorh sannh一下, 純觀看 是 頂級 透明化e琉璃 上乘藝作, 一球 香草冰淇淋 粉米黃 配著 清汽水, 氣泡仔 一點一點, 杯面 有一層 翠綠玉e 飲料, 智覺ga阮講, gam正實是veh ga灌入腹?
一滴一滴 透過吸管, 甜甜綿綿neh! 夢e滋味!
驚奇閣di後面, 冰淇淋 開始散開 慢慢沈落底, 歸杯汽水 開始 重新調色, ua! 平常ganna lim白滾水e人, zit份彩演 自然對比著 生活e清淡。
莫怪 伊veh極力推薦。
變化 是 生活e詩意, 四季變換 花木先cua頭。
花木美好 如此明柔, 賞心悅讀 出情意, 來吧! 來吧! 一切攏是 上好e安排!

(原登台文戰線19期)










daiqi007 發表在 痞客邦 PIXNET 留言(0) 人氣()