daiqi007

1、四季之美

春天上suiｅ時陣是di日出ｅ當時。漸漸轉白ｅ山頂，透出va-vu光，紫色ｅ雲彩輕輕仔飄di頂頭。

夏天是暗時上sui。有月娘ｅ時m免講，就算無月ｅ暗暝，也有火金姑四界飛來飛去，加上落一陣清涼ｅ雨，dor更加有意思lo！

秋天是黃昏上sui。夕陽照映山崙，烏鴉歸siu〔註1〕，三隻、四隻，或者是兩、三隻同齊急促veh歸siuｅ鳥隻飛過，加添心內傷感。有時看著排列成隊ｅ雁影飛過遠天，然vong真細，更加有風情。等日頭落山以後，風吹過ｅ聲gah蟲ｅ叫聲，也是真趣味。

冬天是早起上sui。落雪時m免講，有當陣只是結透白ｅ霜，iah是無霜雪ma感覺真寒ｅ時，趕緊起一盆火，提著火炭分送ho人，ma真合時節。可惜到中晝ｅ時陣，天氣漸漸溫暖，盆內ｅ火炭變白灰，dor無啥心適lo。

註解

1.巢。

2、時節

時節是正月、三月、四五月、七八月、九月、十一月gah十二月上好，其實每一個季節攏有特色，歸年tang天攏會使遊賞體會。

3、正月初一

正月初一，天氣清朗，而且出現彩霞，所有ｅ人攏將家己妝gah sui-sui-sui，除了祝福天皇，也為家己祈福，這是真有意思ｅ代誌。

初七，di雪溶了ｅ所在挽一寡野菜〔註1〕，平時真罕呢看著zit款青草、野菜ｅ貴族，攏真歡喜，氣氛ma真鬧熱。Zit工也是參觀「白馬」〔註2〕ｅ日子，di厝內ｅ官員家屬將車美容結彩，前往參觀。當牛車通過待賢門戶碇ｅ時陣，車身hainn來hainn去，坐di車內ｅ人頭殼相kok，插di頭殼頂ｅ梳仔ma落去，甚至拗斷，ho人感覺真歹勢閣足好笑。建春門外南爿ｅ左衛門陣，有一寡殿上人，提著舍人〔註3〕ｅ弓，嚇驚馬匹做滾笑。Ui牛車ｅ布簾看出去，edang看著格子牆〔立蔀〕內面有主殿司〔註4〕gah女官〔註5〕行來行去，有夠趣味。這是外lin-a幸福，edang di九重禁地中自由行動，想起來感覺真欣羨。Zit角位仔只是宮中小小ｅ一部分，舍人面頂ｅ粉已經落去，白粉抹無著ｅ所在，親像烏土頂面ｅ雪幼仔，實在真歹看。馬ｅ走跳ho人感覺可怕，所以將身軀vih入車內，dor什麼也看ve著a。

初八，逐家為著謝恩無閒，四界歡喜走zong，車聲嘈雜，鬧熱滾滾。

十五是食「望日糜」〔註6〕ｅ日子，將糜進獻ho天皇，無論是公主iah是少年女官，逐家偷偷仔提著煮糜燒無了ｅ柴，等待機會拍人，閣愛提防有人ui後面拍過來，zit款模樣有夠趣味。打著人ｅ，歡喜gah笑聲連連，鬧熱ci-cap，hong拍著ｅ人，感覺真歹勢，這也莫怪。

舊年結婚ｅ翁婿，m知當時會來〔註7〕，害公主等gah坐vediau。一寡自認伶俐ｅ女官先輩，vih deh內面偷看，di公主身邊侍候ｅ人，忍vediau笑出來，mgor隨ho人勸講：「kah細聲ｅ！」公主顛倒是什麼攏m知ｅ款，端莊坐gah直直直。有人假意講：「ho我來收拾ziaｅ物件。」Dor趁zit陣行倚來，將公主ｅ腰拍一下diorh隨suan走，引起在場ｅ人攏笑出來。新郎只是微微仔笑，新娘ma無感覺有什麼奇怪，mgor面suah紅起來，gah人sng做伙。逐家互相拍來拍去，連查甫也拍落去，這m知是什麼心境？Hong拍著ｅ人na哭na生氣，閣罵拍伊ｅ人，連歹吉兆ｅ話ma講出來，這也真心適。親像王宮zit款嚴肅ｅ所在，今仔日suah亂糟糟，一點仔dor無講規矩。

敘官除目〔註8〕ｅ時陣，宮內非常鬧熱。大雪dng落，天寒地凍，逐個人提著自薦書走來走去，官居四位、五位ｅ少年人，精神真好，看起來前途光明；頭毛白蒼蒼ｅ老人，向大官拜託、講情，iah是到女官ｅ處所講家已ｅ優點，少年女官學yinｅ氣口講sng笑，yin家己suah m知影，閣對女官講：「拜託ｅ，向天皇好好廩告a！」講gah真費心，若有得著官位是無要緊，若是得ve著，按呢dor真可憐。

三月初三，天氣清朗，桃花初開，柳樹也值得觀賞。柳芽親像卷起來ｅ蠶繭，但是一旦葉子ti開變大，dor ho人感覺ve爽快。拗一節長長ｅ櫻花樹枝，插di大花矸內，比di外口ｅ時ka好看。無論是人客，iah是皇后ｅ兄弟公子，穿著表面白內底紅ｅ直衣〔註9〕，下面露出美麗ｅ內衫，做伙講話ｅ模樣，看起來真風流。若是有鳥仔gah蝴蝶飛近yinｅ面前，dor更加有情韻。

四月，賀茂祭〔註10〕ｅ時尤其有意思。樹葉iah vue茂盛，葉仔ma真青幼，無霞無霧ｅ天色，ho人有講vue出ｅ感覺，di小可暗淡ｅ黃昏iah是di暗暝，聽著杜鵑稀微ｅ啼聲，假若有閣假若無，zit種心情實在無法形容。等到祭日veh到ｅ時，使者捧著用紙凊采包ｅ黃綠色、深茄仔色ｅ布，四界無閒走zong。Hia-e下面染作深色ｅ，深淺雜染ｅ布，攏比平常時好看，按呢真趣味。女童梳妝打扮，雖然衫是穿舊ｅ、斷線ｅ，鞋仔帶ma是斷去ｅ，猶原hi-hi-hua-huah歸厝間走來走去，ng望祭日趕緊到位。Mgor一旦穿著盛裝，平常時活潑愛din動ｅ查某qin-a，突然變作像捧香爐ｅ法師di練腳步。但是這ma ho人ve放心，所以親族中ｅ婦女iah是阿姊，攏會di邊仔隨時看顧，按呢ma真趣味。

若veh得著藏人ｅ職位，不管yin是m是會得著，ma是仝款穿青色ｅ衫，zit款衫ｅ質料一定是綾織物。

註解

1.正月初七挽七種野草、野菜，將葉仔煮作羹來食，edang除病避邪，zit個風俗來自中國。

2.初七看馬ｅ風俗也是ui中國傳來，看馬edang消除一冬ｅ災禍。

3.殿上人指公卿中edang登殿者，品級di五位以上；舍人是王宮侍衛。

4.主殿司是後宮十二司之一，掌管燈油、薪炭、拚掃ｅ代誌。

5.宮中命婦以上ｅ上級女官。

6.十五食「望日之糜」以除邪，有以煮糜ｅ柴棍仔摃查某人ｅ腰，edang生查甫qin-aｅ講法。

7.日本當時婚俗，由男方前往女方ｅ厝內。

8.除去舊職就任新官職，正月初九至十一，是地方官員任免ｅ日期。

9.公卿貴族ｅ日常服叫做直衣。

10.四月酉日ｅ祭祀。