薰草gah魔神仔 芥川龍之介;張春凰、王惠珍台譯



薰草zit項植物,本底di日本是無e。A伊是dng時ui國外引入來e?關係年代各種記錄並無確定。有e講是慶長記年期間(1),ma有人講是天文年間(2)。一直到慶長10年e腳dau,全國四界好親像攏有種作a。文祿年間(3),吸薰e風氣普遍時行,甚至ma有按呢e詩句deh kauseh社會:

Mai講是禁薰令,

一張空文金錢令,

天皇聖旨無人聽,

醫生看病ma ve靈。



薰草是啥人dua入來e?所有e歷史學家攏會答講,是葡萄牙人或者是西班牙人。Mgor事實無的確。流傳中,iau有另外一種答案。聽著薰草是魔神仔ui什物所在dua入來e。A魔神仔gorh是天主教神父(恐驚是方濟各司鐸(4))萬里遙遠zah來到日本。



若按呢講,天主教徒可能會罵我誣賴yin e神父。照我看,事實親像是按呢。因為,南蠻(5)e天主來到ehit當時,hia e魔神仔ma due leh來——引入西洋e善e當陣,ma dua 入惡,這是真自然e代誌。



Mgor魔神仔是m是真正ga薰草dua來日本呢?zit點我m敢保證,聽講Anatole France[法郎士](6)e作品,魔鬼ma vat用木犀草(桂花)來引誘一個修士。若按呢,伊ga薰草zah來日本,dor無一定是造假,di某一種意義頂面可能有料ve到e事實存在。因為有頂面e講法,我想veh di下面,記錄一個引入薰草e傳說。



***



天文十八年(7),魔神仔變成方濟各‧沙勿略(Zavieru)手下e一位傳教士,經過長時間e航路,平安來到日本。伊會成做一位傳教士,dor是因為hit個傳教士本人di阿媽港,iah是叫做什物港口e所在上岸,一隊人坐e烏船dor啟碇,ga伊放 di岸上。魔神仔一直ga尾仔捲di帆架e橫柱頂面,倒吊來偷偷仔看船內e動靜。Dor按呢,伊dor變身做hit個傳教士,歸工侍候方濟各司鐸。若是zit位先生去拜訪Fausuto[浮士德]博士,伊仝款有本事,edang變做紅大裘e威風騎士O!zia-e齣頭小sng一下,無算外了不起。



Mgor,來到日本探看,gah伊di西洋人時陣讀過《Maruko.Polo》(馬可‧波羅遊記)內底所講e是一丈差九尺。代先,遊記ga zit個國度描寫gah差不多黃金歸四界,mgor,連一絲仔影跡dor無。看起來,只好用指甲ga十字架tut tut leh,ga伊變做金e,按呢對當地人dor有相當吸引力a。馬可‧波羅gorh講,日本人靠珍珠zit類e特效,ho死人ma會重生,這恐驚是講白賊。假使若是白賊話,ganna看著古井dor向井底pui嘴nua,ho傳染病流傳,大多數人會痛苦gah ve記得,死了edang去天堂e代誌ve記了了。魔神仔假做足虔誠e形,跟隨方濟司鐸四界去參觀,心內真hiau bai,私下家己信心滿滿,漏di嘴角微微笑。



Dor只有zit項切人意e代誌,連魔神仔ma無奈。因為方濟各‧沙勿略dann來到日本,若是傳道無流行,連傳gah一個善男信女dor無,魔神仔ma cue無tang誘拐e對象。對zit點,連魔神仔ma感覺qainn qiorh[尷尬]。Mai講別項,歸工閒lor仙,m知veh安怎消磨時間。



魔神仔想來想去,伊拍算veh種寡花草來消悶。離開西洋e時,伊dor di耳仔裡裝著各種植物e種籽。若是田土,dor ui身邊借一塊地dor好a。對zit項代誌,方濟各司鐸ma完全贊成。司鐸單純掠準隨身手下zit個傳教士,想veh di日本移種西洋藥草zit類e事務。



魔神仔趕緊ga鋤頭gah椽筆借來用,耐心十足deh耕作路邊e田園。



Du dng開春雨澹e季節,隔著一層厚厚e茫霧,遠遠hit頭寺院,傳過來“huang”e懶絲e鐘聲。聲音足清脆響亮,無摻像教堂鐘聲hit款,鐘聲強veh回gah臭耳聾。若是di zit 款和祥e環境中,是m是,魔神仔dor kah輕鬆?ziah m是按呢leh!



魔神仔隨聽著zit種梵鐘e聲響,隨dor目頭結起來,比聽著聖保羅教堂e鐘聲kah艱苦,伊下性命deh挖土。因為人若聽著zit頭快慢平穩e鐘聲,gorh浸di明麗e日頭光中,he心情dor足奇妙自然輕鬆起來,ve去想veh做善事,ma ve去想veh做歹代誌。魔神仔用心計較渡海來誘拐日本人,這m是白走一zua。魔神仔貪惰勞動,雙手無結len,ma ho Iwan[伊凡]e妹妹(8)罵過伊。伊為什麼veh拚命操作椽筆neh?這純是為著veh趕走he無張持dor會來ga gorgor纏,會ho伊變做有道德觀念edu gu ha hi[打瞌睡] ziah按呢做e。



魔神仔總算下幾工e時間,ga地整理好,再ui伊e耳仔內挖出種籽,ga種落去田土裡。



***



Gorh過幾個月,ia落e種籽開始buh inn,抽枝骨,到熱天尾,闊闊e大片綠葉ga園裡e田土歸片kam leh。Mgor,無人知影zit款植物叫什麼名。連方濟各司鐸親嘴問伊,伊攏是嘴角笑一下,無回答。



連後zit種植物e頂頭開一cok一cok e花蕊,是漏斗仔形體e淺茄仔色花。魔神仔可能是因為用心deh耕作,看著開花a,有夠歡喜。早暗祈禱了後,伊dor去田裡盡心力deh維護。



有一工,(這代誌du好發生di方濟各出外去傳教無die期間),一個牛販牽一隻黃牛ui zit ku園e邊仔經過。看著di淺茄仔色e花園籬笆裡,一個穿黑袍、頭戴潤邊帽仔e西方傳教士,di hia全精神leh掠蟲,he花色足稀罕,牛販自然停腳,ga葵笠褪落來,恭敬向hit個傳教士拍招呼:「喂!神父大人,he是什麼花?」



傳教士越頭過來。看伊是鼻短短、目睭細細,一看dor知伊是好性地e紅毛a。

「這?」

「是!」

紅毛人倚di籬笆搖頭。伊用半生疏e日本話講:「失禮,這名vai使ga人講。」

「O!是方濟各m允准你講?」

「M是!」

「你敢esai ga我講?我最近有受著方濟各神父e感化,有落教a,你看!」



牛販真sang勢deh指家己e胸葉。真e,伊e頷頸仔hia掛一個小小e黃銅十字架,du di日頭下照gah閃閃sih sih。可能是gorh kah好禮e口氣,半真半假講:「按呢ma vesai。這是阮e國家e規矩,ve准ga別人講。不如你家己臆看mai。日本人頭殼巧巧a,一定臆有。你若臆著,土地發cuai e物件,我全部送你。」



牛販掠準傳教士deh講sng笑。伊hit個曝烏e面ma笑笑,刁工用力ho頭ki ki,講:「是什麼leh?一時ma臆ve cuai。」



「Ai,免趕di今仔日。三工內,你去想,想好kah gorh來。問人ma esai。若是你臆著,dor全部ho你。另外,ma有紅葡萄酒。若無夠,再ho你一張地上樂園圖吧!」



對方興cih cih,牛販ma加減著驚。「若猜無,veh按怎?」

傳教士ga帽仔向後戴,一頭ga手hiuhiu leh,笑出來。伊e笑聲若烏鴉仔hiah尖,牛販ma感覺奇怪。



「若是臆無,我veh ga 你討一寡物件。咱來打睹。臆有、臆無,橫直dor押zit個du[注]。若臆有,dor全是你e。」紅毛e,講leh講leh,聲調又gorh變溫和a。

「好a。按呢我dor gah你拚,你愛啥,我dor ho你。」

「什麼攏veh ho我?ham牛ma肯?」

「你若無棄嫌,zitma dor ho你。」牛販一頭笑,頭sor黃牛e額頭,伊親像一直掠準是zit位和祥e傳教士deh gah伊講笑leh。「若我贏,全部開花e草dor算我e lo!」

「好!好!講好dor算!」

「答應a。我憑主耶穌e名咒誓。」

傳教士聽了,一對細蕊目睭,liam mih閃leh閃leh,得意發出hang hng e鼻聲。伊倒手叉腰,略仔挺胸,用正手摸紫花蕊講:「若是臆無,我dor veh愛你e肉體gah靈魂。」



紅毛人講leh,qiah起正手胳,ga帽仔褪落來。頭鬃亂散,內底發一對親像兩隻山羊e大羊角。牛販驚一dior,面色大變,ga手中e葵笠仔落di土腳。可能是日頭斜西e關係,地面e一片花海gah葉仔一下仔攏失去光彩。連牛ma ho驚一下,ga頭ehit對牛角向土腳,用一種假若大地動e轟鳴聲大叫。



「你答應我e話愛準算。你m是用hit個我禁忌叫e名字咒誓a hiorh?vesai ve記,期限是三工。Dor按呢,再會!」



魔神仔是看ve起別人e,mgor gorh假仙做真好禮e口氣deh講,又刁工恭敬向牛販行禮。



***



牛販後悔家己e輕浮大意,中著魔神仔e計算。照按呢落去,終期尾會ho hit個「惡魔」掠著leh,肉體gah靈魂dor會di「永無停止e烈火」中困燒。若按呢,家己m是白了工放棄過去e信仰去受洗a嗎?



伊既然已經奉耶穌e名咒誓過a,dor vedang收回約束。上好若是有方濟各司鐸在場,好歹iau esai想出辦法對付;真無du好,伊zitma du出去外地。Veh按怎用計將計,mai ho魔神仔e陰謀成功neh?伊連睏ma ve睏zit,足足想三暝三工。為著veh贏,一定愛想辦法了解hit款植物e名稱。Mgor連方濟各司鐸攏m知,gorh有啥人知?……



Di期限到ehit暗,牛販總算牽著黃牛,偷偷仔去傳教士dua e厝間e邊仔。Hit座房間起di hit ku園e邊仔,厝前dor是大條路。走過去探看,傳教士大約是去睏a,窗仔內無光。雖是有月娘,卻是陰森e暗暝,四界無聲,di微暗中,小可看有茄仔色e花蕊孤單無伴e身影。原來牛販仔想著一個無外勝算e主意,ziah勉強sor腳len手來zia。



Mgor,zit大片e死靜ho伊看gah驚心,伊想講歸氣越轉去。尤其是hit位發山羊角e魔神仔,di hit扇門後du leh睏入眠,di地獄cittor leh,真無簡單dann激cuai e勇氣攏起了了a。Mgor,心意一轉變,nai esai ga肉體gah靈魂交ho「惡魔」leh?絕對vesi漏氣漏dak!



Dor按呢,牛販仔一頭祈求童貞瑪莉亞e保庇,一頭決心實行預備好e計畫。He dor是ga牽黃牛e索仔tau落來,對牛尻川重重ga拍落去,出力ga趕入田園內底。



牛尻川hong拍gah疼,擋ve diau,ga籬笆zong倒,ga園仔蹧踏gah爛糊糊。伊gorh ga牛角一直zong向厝間e牆壁。牛叫gah mo mo吼e聲,振動著夜中e薄霧湠開四界。Zit時,有人拍開窗仔,出面。雖講di烏暗暝中看ve清,這肯定是變做傳教士e魔神仔lo,直覺上,透過烏暗,iau會看清伊頭上e頭角。



「Zit隻精牲,創啥veh tun踏我e薰草園leh?」

魔神仔手hiu hiu leh(甩甩手),用愛睏e聲嚷。伊大概du睏去,dor hong 吵醒,氣gah veh死。



牛販仔du vih di 園仔後面偷聽。魔神仔e話,伊聽起來,親像耶穌e福音hit款… …



「Zit隻精牲,創啥veh tun踏我e薰草園leh?」



***



Gah所有e故事仝款,zit個故事ma結束gah足圓滿。換一句話講,牛販仔順事臆著薰草zit個名,buah贏魔神仔,gorh ga園仔e物件佔做伊e。



Mgor依我個人早dor有e想法,zit個傳說可能有另外e意義。因為魔神仔雖是無ga牛販仔e肉體gah靈魂搶來,卻ho薰草di日本生湠。若按呢,dor親像牛販仔e得救伴隨墮落e一面,魔神仔e失敗ma伴隨勝利e一面吧!魔神仔連跋一倒,ma ve凊采kia起來。Dng人自認已經戰勝了引誘e時,無一定ma 陷入去陷阱。



Gorh 再講一點仔魔神仔e結果。方濟各司鐸轉來,dor憑伊e手中牧拐e威力,ga魔神仔趕走a。Mgor,自按呢以後,伊親像做一個傳教士仝款,四界去流浪。Iau有關係起造南蠻寺e時間,聽講伊定定出入京都e記載。Ma有關係愚弄松永彈正(註9)e果心居士dor是zit個魔神仔e講法,關係zit點,小泉八雲(註10)先生已經寫過,di zia免gorh加講。自從豐臣、德川兩氏禁傳外教以來(註11),一開始魔神仔iau有出面過,尾後總算離開日本。… …關係魔神仔e記載,dor寫到zia為止。進入明治年代了後,伊有gorh來過日本,mgor對伊e活動情況,我攏m知,足遺憾a… …(1916.10.21)



註1:慶長年間是一五九六至一六一五年。

註2:天文年間是一五三二至一五五四年。

註3:文祿年間是一五九二至一五九五年。

註4:方濟各.沙勿略(一五○六 ~ 一五五二),西班牙天主教耶穌會e傳教士,vat di印度gah日本傳教。司鐸是神父e尊稱。

註5:日本室町時代(一三九二 ~ 一五七三)末期至江戶時代ga呂宋、爪哇等南洋各島稱作南蠻。後來又ga經由南洋過來e西歐(主要是西班牙、葡萄牙)人叫作南蠻人,並將天主教叫作南蠻宋,天主教堂叫作南蠻寺。

註6:Anatole France [阿那托爾.法朗士, 1844~1924],法國小說家、評論家。

註7:天文十八年是一五四九年。

註8:伊凡e小妹是俄國小說家Lev N. Tolstoi[列夫.托爾斯泰, 1828~1910] e童話『傻瓜伊凡』中e人物。只要是到yin哥哥伊凡厝內來食飯e人客,伊攏veh檢查yin e手bor,無生繭e人就vedang入座。

註9:松永彈正即松永久秀(一五一○ ~ 一五七七),日本室町時代末期e武將。彈正是伊e職稱。

註10:小泉八雲(一八五○ ~ 一九○四),原本是英國人,叫Lafcadio Hearn[拉夫卡迪奧.赫恩],di希臘出世。一八九○年以記者身份去日本,gah日本女人小泉節子結婚,入日本籍,著有關係日本e英文著作多種。

註11:豐臣秀吉統一全國了後,di一五八七年下令禁止天主教。日本武將德川家康(一五四二 ~ 一六一六) di一六○三年成立江戶幕府,一六一三年重新下令禁止天主教。













-----
創作者介紹

daiqi007

daiqi007 發表在 痞客邦 PIXNET 留言(0) 人氣()