daiqi007

夢十夜

夏目漱石 著 DCH台譯


第一暗


做一個 按呢ｅ夢境。

雙手攬胸， 坐di枕頭邊， 倒cior coir〔仰躺〕ｅ 查某人 輕輕仔講 伊dih veh死a。 伊ｅ長頭鬃 散cian cian 潑落di枕頭頂， 線條柔美ｅ 雞卵面形 橫舖di頭毛中央。 白siak siak ｅ面肉 透漏出 溫暖ｅ血色， 嘴唇 ma是紅gigi， 看ve出 是 veh死ｅ形。 Mgorh， 查甫人 卻是 真安靜， 閣足清楚 deh表示， 伊dih veh死a。 我真正認為 伊無應該死， diorh an頭問伊： 「敢有影？ diorh veh死a嗎？」 查某人回講： 「是。」 目睭展gah 大lui大lui。 長長ｅ 目睭毛內圍ｅ 目睭仁 大閣濕潤， 一片烏溜溜。 烏金ｅ 目睭仁深處， 真明浮出 我ｅ身影。

我注目zit對 清亮見底ｅ 閃光目仁， 心內想， 敢真正會死？ 了後dor足親密 ga嘴倚過 伊ｅ枕頭邊， 一直ga講， 「你ve sai死！ mtang死。 查某人 烏色ｅ目睭皮 半veh睏、 半開開， 仝款 用 平靜ｅ口氣 講； 「mgorh我會死， 這是 無法度ｅ代誌。」

我刁工問伊， 「你敢看會著 我ｅ面？」 查某人 對我笑 講， 「問我看有無？ m是 投射di hia嗎？」 我恬恬 ga面 ui枕頭邊 徙開， 雙手攬胸 沈思： 伊是安怎 一定veh死 呢？

過一下仔， 查某 又閣 開嘴講話。

「我死了後， 請ga我埋leh。 請用 大kenｅ 珍珠貝 挖墓穴、 用 天落落來ｅ 天星碎片 做墓牌。 了後， 請你 di墓邊 等我， 我會來cua你。」

我問伊 當時 會來cue我？

「日頭會出來， ma會落山。 了後。 Iau會出來， 閣會落山吧！ 紅色ｅ日頭 ui東向西 沈落ｅ時日， 你edang為我等守 嗎?」

我無言語， dom頭。 查某人 提高 平穩ｅ口氣 堅決講， 「請等我 一百冬， 請坐 di我ｅ墓前 一百冬， 我一定 會來cue你！」

我回答 家己未來 只是等待。 Diorh按呢， 烏金清明ｅ 目仁內 我明朗ｅ影像 diorh崩散去a， 親像 恬靜ｅ水面 開始流動， 拍亂了 投影 按呢。 Diorh di我幻覺家己ｅ影 du veh隨著 滿墘ｅ目屎 奔流ｅ時， 查某人 目睭diorh瞌密合。 淚珠 ui長長ｅ 目睭毛 lin落嘴pue。 查某人 已經斷氣a。

了後， 我行向庭埕， 用珍珠貝 掘墓堀。 珍珠貝 是一款 光面平滑 邊仔尖利ｅ 貝殼。 掘土ｅ時， 貝殼 di月光ｅ 照射之下 閃閃sih sih。 土壤散發出 濕軟ｅ氣味。 墓穴 真緊diorh掘好a。 我ga 查某人ｅ身屍 kng入去 墓穴裡。 了後， 閣 ga柔軟ｅ土泥 輕手 ga kam ho好。 每一gai kam一en土泥，珍珠貝 內層 diorh反射出月光。

續落來， 我拾起 天星ｅ碎片， 輕輕仔 kng di土堆頂面。 天星ｅ碎片是圓形ｅ， 長久飄落 di太空中， 尖角 攏磨滑去a。 我手中 捧著 天星ｅ碎片 kng di土堆頂面， 家己ｅ 胸崁gah手心 iau感受著 絲絲仔 溫暖。

我 雙手攬胸 坐di青苔頂面， 注目 圓形ｅ墓牌 沈思： 自今以後ｅ 一百冬 攏di zia等待。 Zit時陣， 照 查某人 所講ｅ， 日頭 ui東方出來， 一輪紅gi gi ｅ 大大大日頭。 接續ma是 照 查某人 所講ｅ， 日頭 di西方落山， 歸粒紅色ｅ 圓球， diorh liam當時 無去a。 我di心內 算計著 二工 已經過去a。

無外久 通紅ｅ日頭 又閣 無聲無說 liong升起來， 了後 恬恬a閣 日落沈辭。我di心內 算數著 二工 已經過去a。

Diorh di zit款 一工、 二工ｅ 算數當中， m知 看 外濟紅日 浮浮沈沈。不管 安怎計算， 算ve了ｅ 火紅日頭， 仝款繼續 超過 我頭殼頂。 尾後， 我看著 佈滿 青苔ｅ 圓石墓牌， 心想家己 是m是ho查某人 拐去a。

Zit 時， 一枝 綠色ｅ草藤 ui石頭下面， 向我ｅ方位 伸長過來。 只看著藤枝 愈發愈長， 到我面頭前diorh停頓。 下一景， 搖晃ｅ藤枝 頂端 垂掛 一蕊 細細長長ｅ 花苞， du deh開啟 伊ｅ花瓣。 目前 雪白ｅ百合花 散發出 嬌滴滴 ｅ芳味。 一點露珠 ui天 顫、 跳、 停ｅ 滴落來， 花蕊ma輕舞風騷。我 伸頷頸仔 向前 輕輕仔 zim著 沾附冰涼露珠ｅ 白色花瓣。 當我ｅ面 離開百合花ｅ 時， 看著 遠遠ｅ天邊 有一粒星 閃閃sih sih。

「原來 一百冬 已經到a！」 zit時 我才發覺。

文化台語 鄭丞勛


***
詩人張德本 e台灣史詩─《累世之靶》，ho讀者甚麼意旨？
就你所台譯e《破立台灣》文章，在引證作者veh關心e台灣形象如何？

希望讀者了解，住在台灣e人，更要對家己的文化e認同，di大中國e觀念下，已經忘記咱是台灣人，所以張德本老師用台語詩e方法來表達伊e怨嘆，內容包括伊對台灣歷史e了解gah對台灣文化e喜愛ma有寫有關原住民文化，內容讓咱意識抬頭，提醒咱台灣文化e美好，不再成為累世之靶。

台灣長期被宗教gah外來文化所支配，有寡人常常批評別人都無進步，只做井底之蛙關懷台灣e文化，無接受外來的文化，這講來好笑，講這句話e人真正了解台灣嗎？連家己故鄉不了解e人，edong有能力講別人無見識嗎？mgorh現在台灣就是ziah悲哀，最近e總統大選ma無人提醒自身意識應該要抬頭，連咱e元首都無在意a，人民哪會認同自己e文化？要怎麼讓台灣di世界有一席之地，這本冊提醒咱e就是hiah簡單，是台灣人攏愛好好反省。



***
南美gah台灣被殖民e命運是宿命嗎？
外這殖民gah內在殖民 di zit兩個所在e色彩如何？

南美gah台灣有足濟仝款e所在，因為對家己文化e不認識gah家己人迫害家己人，ho別國有機會進攻進來，我認為這可能就是被殖民e原因mgorh我感覺宿命是edong改變e，是需要天時地利人和，所以我認為咱有仝款被殖民e原因，mgorh m是絕對e宿命。

外在殖民是講被他國所殖民，主要是因為國家自身e利益，可以ho別人利用，ho人目紅所造成，使自身文化gah外來融合。內在殖民是因為人民看ve起家己，無認同家己e文化，一再崇洋媚外e心態，使自身文化被國內政策下gah外來融合。(e.g.台灣人無講台語，認為講台語是低俗e)

文化台語 陳凱普


***


南美gah台灣被殖民ｅ命運是宿命嗎？
外在殖民gah內在殖民di zit兩個所在ｅ色彩如何？


阮認為可能是，因為豐富ｅ資源du好變成殖民者眼中ｅ獵物，南美〔黃金〕gah台灣〔鹿皮、甘蔗、樟腦…〕zia變成殖民地ｅ命運。
外在ｅ殖民：對南美來講，破壞了伊足濟ｅ建築，但是更加堅定伊ｅ人民ｅ向心力。對台灣來講ma是仝款，diorh算講荷蘭人用欺騙ｅ行為得著足濟ｅ土地，台灣ho統治ｅ人ma是ve因為按呢失去了尊嚴。內在殖民：對南美來講卡無hia呢嚴重，對台灣來講卡明顯，親像是凊朝對台灣ｅ統治，舉一個例來講，朱一貴gah所有ｅ台灣人攏ho康熙皇帝ｅ好聲話騙去，最後朱一貴ho tai死。

文化台語
張翠如

＊＊＊
詩人 張德本 ｅ 台語史詩—《累世之靶》， ho讀者什麼意旨？
就你所台譯ｅ《破立台灣》文章， 再引證 作者所veh 關心ｅ台灣形象如何？

a. 台灣文化是歷史原型gah現實建構、歷史原型一直無hong重視，台灣歷史原型即為「累世之靶」!!
b. 在地台灣鄉土文化，作者希望身為台灣人e一份子，應該要重視台灣文學，文學無法度ui足短e時間diorh全盤透徹了解，是要有時間去磨出來，伊希望台灣e dang破立出台灣家己e文化，有家己e文化特色親像是原住民時期有足多e特色文化!


＊＊＊
你對 台譯 gah 母語演戲 有何心得？

a. 其實經由翻譯台文作業，我gorhga e dang了解台語拼音裡底e原理，而且越翻越上手，幾乎e dang看到句子diorh翻出來。
我原本以為ma要用老師ho大家e軟體用，所以我也把他拿來用，用聽e更加了解發音。
b. 台文演戲原本我們就不想要用童話故事下去演，剛好討論出e dang用新聞e方式來表現出時事問題，親像是治安、教育之類ｅ，我覺得按呢不只台語e進步，同學感情ma變好!真是趣味!

＊＊＊
(a). 聯合國 為何制訂 每冬ｅ2月21日 為 國際母語日(International Mother Language Day)？
(b). 如何振興母語？


(a)因為現代大家追求學習世界語言，英文、日文、中文……為了e dang跟上時代，卻家己e母語不去重視，按呢家己e文化特色diorh e 漸漸消失去了，為著避免大家追求時代腳步卻失去家己文化建立著國際母語日!
(b)若要振興母語diorh要ho國家人民有母國文化e意識，按呢才會長久有人e去從事母語振興e代誌。而且要有一套專屬hit e母語e文字，才e dang留傳ho下一代子孫，我認為e dang ui外國文學、國內文學去翻譯成台語開始，不只有其他文化色彩，gorh有母語練習，是ve-vai e方式!

文化台語
王佳甄

＊＊＊
詩人 張德本 ｅ 台語史詩—《累世之靶》， ho讀者什麼意旨？
就你所台譯ｅ《破立台灣》文章， 再引證 作者所veh 關心ｅ台灣形象如何？

1. 台灣e歷史是一面「累世之靶」，台灣e文化是由政治神話ham宗教神話所建構，歷史是神話gah現實組成。作者想vah傳達ho讀者知影e是台灣歷史e重要。
2 .台灣要有家己e主體性、在地化，強調鄉土意識e歸屬gah認同感。



＊＊＊
南美 gah 台灣 被殖民ｅ命運 是 宿命嗎？
外在殖民gah 內在殖民 di zit 兩個所在ｅ色彩 如何？

1. 因為hit當陣e南美gah台灣處di du 開始發展e時期。Gah殖民者e心智比起，人民e心智ia閣足純樸e，自我意識ma足薄弱，加上國家e力量bhor強大，所以ho殖民e命運是宿命。
2. 外在殖民-強勢、鴨霸，不講道哩，使用武力ho人屈服、投降。
內在殖民-先收攏人心，使其卸下心防，然後再將其一網打盡。




＊＊＊
(a). 聯合國 為何制訂 每冬ｅ2月21日 為 國際母語日(International Mother Language Day)？
(b). 如何振興母語？

1. 希望大家e dang重視due家己國家、故鄉e認同，而且e sai保護hit gua逐漸消失e語言。人民現在忙著學習第一語言、第二外語…增加家己e實力，與外界交流e同時，卻忽略了最初e語言-母語。藉由國際母語日，希望能找回最原始、單純的自己。
2. 生活中講母語ho母語e使用普遍化。
設立母語文化e學堂ham課程，ho卡濟人知影母語e特色、趣味。
發行母語報紙、書刊…。
母語e電台、廣播、戲劇…。

新年有感 2012 0101
天送伯


舊年e煙火
12點準時 仝款
羅東彈 宜蘭放 電視放送

今年e煙火
12點準時 仝款
連大同 玉蘭嘛響
親像火燒山

明年e煙火
應該仝款
12點準時

射出一粒比一粒較大粒e希望
照出一簇比一簇較大簇e貪婪

冬ｅ 苦澀gah想望
-- 敬悼 楊教授 克峻先生

雄雄ｅ一陣刺激
刺入去 敬愛你ｅ 親友弟兄
九降風ｅ哮叫 是 阮心酸ｅ代言

溫文紳士 深思觀照
zit塊土地ｅ走向
憂愁ｅ國 ho你 心肝結歸球
操煩ｅ心思 網束 你ｅ出口

無你ｅ人世間
滴滴珠淚 攏是 阮m甘ｅ苦汁

無你ｅ人世間
點點氣力 攏是 咱做伙拍拚ｅ想望
因為 你替阮 擔起苦澀 ho阮繼續向前ｅ氣魄

(江永進 張春凰 2011 1128 清大東院)

「波羅˙ㄉㄜ海?」
觀眾朋友， 這 m是 主播ｅ．m-dior 啦！
游政榮

漢字 m管 用台語讀 ia是 用華語讀 攏有 破音字， 有當時 如果 讀m-diorh音（讀作 另一個音）， 是 有可能 鬧出笑話 ｅ。 阮 veh 舉一個 真有名ｅ 音譯詞 讀m-diorh ｅ 例 來說明 zit種狀況。
根據 《自由時報》 2011年3月8號 ｅ 報導， 中天電視台 主播 盧申芳 di 2月24號 報導 「波羅的海冰層20年最厚 漁船受困」ｅ 相關新聞 時， 疑似 將「波羅」 當作國名， ga 「波羅的（ㄉㄧˋ）海」 讀作「波羅的（˙ㄉㄜ）海」， zit位主播 ma 感覺怪怪， 最後 歸ki 改讀作 「波羅海」， 引來 網友 批評 「基礎教育ｅ 程度 有問題」。〔注釋1〕
出現 zit種錯誤 ｅ 原因 敢講 完全是 zit位主播ｅ 個人問題？ 咱 di 國中、高中ｅ 地理課 攏學過 「波羅的海 三小國」ｅ 知識， 但是 zit位主播 是 di 美國加州 讀大學 ｅ， 而且 自國中時 dior 出國留學，〔注釋2〕 如果 按呢 dior 斷定 伊 m知影 「波羅的海」ｅ 地理知識， 閣 無sann合理。
Ka有可能ｅ 推論 是， zit位主播 di美國ｅ 受教語言 是英文， 伊 是 讀 英文教科書 ｅ， 所以 伊 應該讀過 “Baltic Sea”（寫文句時 愛加 冠詞“The”）， 但是 伊 m知影 台灣 將 “Baltic Sea” 音譯為 「波羅的海」， 而且 「的」 愛讀「ㄉㄧˋ」， 無怪 看著 「波羅的海」 時， 無法度 聯想著 “Baltic Sea”。 這 只是 zit個 誤讀事件 ｅ 其中一個 原因。
造成 盧申芳 「持續」誤讀 ｅ 條件 總共 有三個：

(1) 標題 「波羅的海冰層20年最厚 漁船受困」 無lang格
(2) 前述 盧申芳 di美國 留學 ｅ 教育背景
(3) 破音字「的」 du好 有 「˙ㄉㄜ」zit個音 （必要條件）

阮 第一擺 看著 zit篇報導 ｅ 時， ma ham 一般ｅ網友 仝款， 認為 是 主播個人ｅ 素質問題。 因為 阮 原本 dior知影 zit位主播 di外國 留學過， ma 曾經 di民視 播 英語新聞， 阮 ziah會 一開始 dior認定 是 主播ｅ 教育背景 導致 讀m-diorh音ｅ 錯誤。 Mgor 當 阮 ga zit篇新聞 閣讀一遍 時， 發現 最主要ｅ 原因 並m是 主播 個人ｅ問題。
第一個 條件 ziah是 引起誤讀 最主要ｅ 原因。 「波羅的海冰層20年最厚 漁船受困」， 相信 大多數ｅ人 du看著 zit兩句 時， 一定是 按呢斷詞ｅ： 「波羅的 海冰層 20年最厚 漁船受困」， mgor 正確ｅ斷詞 應該是： 「波羅的海 冰層 20年最厚 漁船受困」， 如果 edang 像按呢 lang格， 讀m-diorh．ｅ 主播 應該ka少。
為啥麼 講 「應該ka少」， m是 「大部分」 攏ve出錯 leh？ 關鍵 di 「的」zit個字。 「的」 di中文內 應該是 出現頻率 上guan ｅ 字， 大部分ｅ 時陣 攏 接di 形容詞、 名詞、 代名詞 ｅ 後壁， 用 「˙ㄉㄜ」zit個音ｅ 意思， 如果 di du看著時 無法度 ui 記憶庫中 sa出 「波羅的海 三小國」ｅ 地理知識， dior會 ga「波羅」 看作名詞， 讀m-diorh音ｅ 機率 真大。 連lang格 ma有可能 造成誤讀， 所以 用 「波羅的海」 來翻譯 “Baltic Sea” 是 非常差ｅ 音譯方式。
如果 自細漢 到大漢 攏di台灣 受教育 ｅ 主播 有 事先看稿， 按呢 大多數ｅ 主播 di 報新聞時 攏ve 讀m-diorh。 但是 kah-su 報新聞時 dior是 第一遍 讀稿， m管 教育背景 是啥麼， 差不多 所有ｅ人 攏會 讀m-diorh。 這 是 無lang格 造成 ｅ。
無lang格 造成 逐家 di 第一時間 攏會 讀m-diorh， 但是 di台灣 受教育 ｅ 主播 如果 意識到 讀起來 怪怪， 是 有可能 修正過來 ｅ。 A-na〔至於〕 盧申芳 dior 無仝款a， 伊ｅ 教育背景 會 ho伊 「持續誤讀」， dior像 報紙報導ｅ， 最後 讀作 「波羅海」。
Di-zia veh 提出 一個想法， 既然 漢字ｅ 破音字 會有 讀作 另一個音 ｅ 問題， 咱 edang考慮 di 用漢字 音譯 時， mai使用 破音字， dior-edang 減少 誤讀ｅ機會。
節錄自 游政榮， 《由 選擇．成本 看 台、華語 音譯詞》， 臺南大學 台灣文化所 碩士論文

注釋1. 請參看 《自由時報電子報》「影視名人」新聞，2011年3月8日。網址：
http://www.libertytimes.com.tw/2011/new/mar/8/today-show4.htm
注釋2. 請參看 中天電視台 網站， 網址： http://blog.ctitv.com.tw/lu-sis/category/69.aspx； 以及
維基百科， 網址： http://zh.wikipedia.org/wiki/%E7%9B%A7%E7%94%B3%E8%8A%B3。

法喜充滿
e世代佛典羅馬拼音台語版--《大乘妙法蓮華經》 e出世，可講是 示現《金剛經》所讚歎e 天下 最上 第一 稀有e 成就之一。
　　Zit本 加注 台語羅馬拼音e 《大乘妙法蓮華經》，是新竹市明湖路 智觀寺 釋達觀大師父 所發心e大作，如今已經veh gah世人 見面， 當稱是法喜充滿e 一刻。
所謂e大作 意涵著 釋達觀大師父e 願力， 自從2004年， e世代佛典羅馬拼音台語版e時代 四合本--《金剛經》、《阿彌陀經》、《藥師經》、《普門品》出版以來，接續閣有 《地藏經》、 《心經》、 《大悲咒》 等 台語羅馬音版 產出以後， 大師父dor堅心達到 經王《妙法蓮華經》台語注音文e 製作。
過程中， 親像 菩薩deh看顧、 加持著 大師父心血之作e 點點滴滴。2005年，有一工早起， 大師父di透早e寺埕dng坐di土腳， zit聲不得了，平常時， 師父dor有捐血e慣例， 一直到65歲 最高年齡限制 才停止，這是伊e 清淨修持 所有e勇健。 無疑誤， 長年短月以來 一心一意 坐di電腦頭前， 卻ve記得， zit尊肉體身 mave 堪得e時陣，di健康上 有損害著來發出訊息， 大師父 只好暫時休養。
Di 復健期間， 大師父 並無放ve記得--veh 完成 《妙法蓮華經》 台語版e編作， 好佳哉！ di眾信徒、 菩薩護法之下， 大師父 歷經 肉體透疼了後，秉持 施無畏e 精神 總算完成 zit部 台音編註經中之王。
Di身苦病疼中， 大師父 時時刻刻、 聲聲句句 攏deh 念記 zit項大事，實現《金剛經》 所述e“如來 是 真語者、 實語者、 如語者、 不誑語者、不異語者”， di生活教育 上， 大師父 ho阮 實實在在e 見證。 通常 家家戶戶 對 《觀世音菩薩普門品》 攏有 多少熟識， zit部經 dor是出自 《大乘妙法蓮華經》 卷七第二十五品， 教化世人 開發 善意識、 善功德e潛在能力-- 真觀清淨觀 廣大智慧觀 悲觀及慈觀 常願常瞻仰--edang 得聞是經信心清淨， 種種e義趣。
《大乘妙法蓮華經》在在處處， 攏以妙法、 妙喻， 永遠恆常 不輕慢一切眾生， 隨喜功德， 來宣揚、 偈頌 良善端美 志事。
《大乘妙法蓮華經》， 除了 潔白、 清淨、 完美e 經典象徵， 其中 方便微妙法 加上 優美文質， di佛教思想史、 文學史、 漢語e 文化史gah翻譯史 上 有深遠e 影響。 自古以來 法音流布 廣泛傳送 美好e 人世價值。
宗教以外， di台語文e 學習中 zit部經典 可稱是 一大詞典， 一部 結合人格教養、 體悟 人生智慧、 加上 菩薩護持e 人生百科全書。
有智慧e人 甲意聽 真實e道理，卡欠慧根e人 甲意聽 迷人e道理，雖然 di文體上， zit部經典 對一般現代人 來講 除了《普門品》外， 可能卡無機會深入， mgorh 根據 深涵意義e 底本， 隨著 時代e流變， 當今之日， 當可大發揮， 釋達觀大師父e 一部一部 台音經冊， ga咱 做一個妙示範， 菩薩 樂意看著 按呢e進展。
在外淺學 如阮二人， 時常 ho 大師父 無棄嫌 來帶領， 交待阮 寫zit篇記文， 真正汗顏， 承蒙 佛光普照， 開啟引導 如我 昏庸之輩， 可效隨娑竭羅王e 公主 龍女， di伊8歲e 小小年紀 dor 聽聞 妙法蓮華經， 當下隨即 女轉男身， 尚且 智成佛道！
再次 頌禱 “大乘妙法蓮華經” 經號 自是 法喜充滿！

江永進 張春凰
(佛後2553年/2009AD，農曆2月19觀世音菩薩聖誕起稿謹上)

日落紅毛港
陳瓊羽

鴨卵黃e太陽漸漸veh落山a，m願離開e伊，將大海ma染成柑a色，ho逐家攏esai將眼前e zit個美景，當做是太陽存在過e記憶，ma是討海人一工e結束。
天iau未光，海湧di港邊來來回回， diorh已經吵醒討海人e好眠，鹽味、腥味變成yin e記號，雙手e繭滿滿是，為著yin e家庭，zia已經是yin金習慣e生活a，拉機歐開gah上大聲，聽天氣報導來知影天公伯a今a日veh ho yin出海vor，suah落來〈裡町人生〉e歌曲開始漂浮di大海e頂面，哼哼唱唱e音樂gah海湧拍diorh船e節奏，變成一條索仔，拉開天頂e ca-deng﹝窗簾/curtain﹞，ho日頭照遍海邊e紅毛港。
有e時陣，一出海diorh是十多工，上少ma愛半工，大海已經是討海人e朋友a，yin會互相幫助iau是分擔心情，海流e前進是討海人轉去厝內唯一e一條路，滿歸e漁獲gah歷史e記憶攏隨著海湧e沉浮完成，母親e思念ma化做白雲due著海湧陪伴diorh討海人，ho yin一路上ve再孤單，因為yin知影日頭落山之時，海口e雙臂會為yin pah開。
正月初二，si母親轉去後頭厝e日子，阿爸開車駛到偎輪渡站e時陣攏會打開窗a門，ho海水e鹹味喚醒阮e記憶，唯一e大路「海汕路」，乘載diorh所有紅毛港人e回憶，大舅gah三舅veh討海一定會經過，表姊透早veh上課ma會經過，阿爸ma是ui zit條路娶diorh阿母zit個美麗e新娘a，陪阿母轉去後頭厝ma是愛di zit條路留落印跡，ziah edang回到伊生命e源頭，尤其紅毛港只要有人veh娶人客e時陣，歸條路好親像海龍王穿diorh伊e紅西裝，ma作伙來食流水席dau熱鬧，順便為生命e結合gah流傳做見證。
Hiah-nih-a美麗e所在猶原抵ve過政府e決定，為diorh veh擴充貨櫃放置e所在，海水e偎靠站──紅毛港變成堆積木e紅毛土地，記憶e出發點zitma已經m知影veh去叨位找，gorh ka濟e目屎gah m願ma阻擋ve了怪手e無情，挖開ho阮安心e厝頂ma挖走外公、外媽e汗水，本底鴨卵黃e紅毛港，zitma已經蓋diorh一層烏灰e面紗，永遠vedang gorh再掀開，好好a面對海龍王e邀請。
Kia di阿母e後頭厝頭前，我知影zit gai是最後一遍轉來紅毛港，看diorh門口頂guan刻上「洪」zit字，外濟e歷史gah討海人共同e記憶攏di紅毛港zit塊土地醞釀，爬上去厝頂，歸片e紅瓦屋頂是討海人ui海上轉來e依據，ma是外媽等待大舅gah三舅轉來e日落心情，ui厝頂看e diorh鴨卵黃e大海，diorh表示海上e孤船ma看會著紅瓦e思慕。
相片內e紅毛港，雖然已經vedang閣再轉去a，mgorh ui三舅唱〈裡町人生〉e歌聲中，我知影逐家守護e紅毛港會永遠留di心肝內底，漁船ma會找diorh轉去e路，紅瓦e思念之情ma替阮找diorh到未來e路。

序：
台譯《斷頭谷傳奇》、《李伯大夢》gah《時間機器》ｅ後半部
王睿農

真歡喜有zit個難得ｅ機會edang接觸著台文翻譯。當初是因為選擇春凰老師ｅ台文課，發現台文經過春凰老師趣味有料ｅ發揮，m na是咱一般ｅ對話，更加是一門真有特色ｅ藝術。作一個讀理工科ｅ學生，真濟人可能會對我投入翻譯感覺意外，無的確ma無認同。Ia mgorh自細漢我ｅ父母dor會gah我講台語，台語真自然dor是我ｅ母語，對台文翻譯有一種講ve出來ｅ親切。Di翻譯過程中，我真感謝我ｅ媽媽，伊會提醒我一寡台語優美ｅ使用方法，一直ga我鼓勵，支持我做我想veh做ｅ代誌。

這是我頭一擺作翻譯，一個人獨立完成《斷頭谷傳奇》、《李伯大夢》gah《時間機器》ｅ後半部。完成了後ｅ歡喜ho我感覺過程ｅ辛苦攏放ve記a。我所翻譯ｅzit三部作品攏真有特色，會吸引人想veh一直看落去。

《斷頭谷傳奇》主要是leh講一個di美國田庄通人知ｅ神秘ｅ故事，景物ｅ描寫真濟是作者真特別ｅ手法。Ui故事當中edang ho人感受著樸實ｅ作穡人yinｅ生活環境gah生活習慣，故事ｅ主要人物gah「無頭騎士」對抗ｅ過程ma真精采。雖然故事中對話無濟，看ｅ人愛閣卡用心ziah edang體會內容，mgorh讀zit個故事m是ganna文字，閣edang看著畫面，ho咱讀ｅ人好親像入去3D電影內底，gah故事ｅ進行作伙驚惶、緊張。

《李伯大夢》是世界有名ｅ故事。李伯因為食酒醉睏落深眠，一睏二十冬。Ziah-nih稀奇ｅ代誌、二十冬環境人事ｅ改變，攏ho李伯gah生活di伊四箍笠仔ｅ人m知影veh安怎。李伯di夢中所看著ｅ是一場夢？Ia是伊確實看著gah咱人無仝款ｅ人類？故事當中對人物ｅ特性做了真深入ｅ描寫，特別是主角李伯gah yin某天差地遠ｅ個性ho zit個故事閣卡趣味。李伯gah伊ｅ狗沃夫永遠ve變卦ｅ感情，ho我zit個愛狗ｅ人閣卡珍惜我gah我ｅ狗逗陣ｅ時間。

《時間機器》是一部行di時代頭前ｅ科學幻想小說。生長di 19世紀ｅ作者竟然edang寫出咱所生活ｅ21世紀gah閣卡遙遠ｅ幾落千萬年以後未來ｅ景象，zit款澎湃ｅ夢想，m是一般人有ｅ。Zit個故事真清楚表達作者對咱人破壞環境感覺著急，一般人看ve著ｅ可能，作者攏替咱想著a。Di未來ｅ世界，咱人變gah閣卡野蠻，生活當中攏是驚惶，是什麼原因造成zit款ｅ結局？時間機器是真濟人空思夢想想veh得著ｅ物件，mgorh作者想veh ho逐家知影，過去無法度改變，只有改變zit maｅ錯誤ziah edang得著未來ｅ幸福。

三篇故事攏leh講咱人真真假假ｅ幻想，veh相信ia是m相信dor看每一個人家己。我di翻譯過程中得著真濟快樂，ui無仝款ｅ角度去欣賞作者想veh表達ｅ意思。Di了解zit三個故事了後，我想veh用「李伯」作夢ｅ心情去享受「斷頭谷」美麗ｅ田庄，並且使用「時間機器」ｅ科技來體會無仝款ｅ人生。

一本理論kah實務結合的好冊
方耀乾
春凰姊koh拍破一項記錄！春凰姊是台文界的破紀錄者，是先鋒。伊是第一個女性出版台語散文集的作家，伊是第一個出版台語文學概論的作家，伊是第一個用台語出版電影評論集的作家，tsit-ma伊是第一个出版有關台語閱讀kah書寫的作家。伊的台語書寫速度kah接觸的闊度值得咱呵咾、敬佩。
伊欲出tsit本冊名稱號做《閱讀gah書寫》，是用台語書寫的，是一本理論kah實務結合的好冊。過去，台語受著壓制，久長以來台語無hong容允ti正式的教育體制傳授，致使正式的教育體制無培養出任何台語的人才，咱無台語文本thang閱讀，咱也毋知欲去佗位學習書寫。佳哉，百幾冬來真濟有志ti民間、ti邊緣用土法煉鋼的方式出版一寡台語冊，包含字典、散文、詩、小說kah評論，咱今仔日才有一寡台語文本予咱閱讀，嘛才有法度提供「借鏡」予咱學習按怎書寫。春凰姊tsit本冊ui閱讀gah書寫的歷史發展、為何閱讀、為何書寫、到書寫kah閱讀的方法論long有真簡明、實用的論述，koh將伊ti大學開設通識課「閱讀gah書寫」的實踐方法、步數、順序、實例，一項一項拆明講透機。所以我講這是一本理論kah實務結合的好冊，真正值得咱提來好好看、好好讀。
當然tsit本冊毋是kan-ta欲用來閱讀「台語」的文本，咱會當透過tsit本冊來學習著閱讀「任何語言」的文本。千萬毋通因為伊是用台語寫的，所以就誤會伊的「實用性」較無，伊的「闊度」較欠。按呢，你就去想重耽去，大錯特錯囉。伊是一本用台語來介紹如何閱讀kah書寫的冊，當然春凰姊上向望你會當閱讀台語冊、書寫台語文。
Tsit本冊雖然有一寡理論，毋過逐個無免驚，冊裡並無焦燥、高深的理論，long是一般常民會當理解的理念。咱一面「閱讀」作者提供予咱的理論，一面按照實踐方法、步數、順序、實例來「書寫」，相信你真緊會成做「閱讀kah書寫」的高手。這是一本有意義的冊，我真願意為伊寫序。
（作者是 台中教育大學 台灣語文學系 副教授）
（2010.8.23台南永康永二街）

科技台文…利用砷 取代磷 來組成 生物分子e細菌 曾文宣
科學家di加州ｅMono Lake 發現一款細菌， 竟然ga DNA、 蛋白質 ham脂肪中ｅ磷 用原本對生物有毒ｅ砷 來取代。 這改變人類 對生物化學ｅ了解，將會改寫 所有 生物學冊本， 是一款 mvat發見未知ｅ 生命形態。 Zit個代誌表示講 這可能閣有 咱m知ｅ生命型態 存在di地球， 甚至 外星當中。
科學家 原本掠準 所有生物體 攏需要 磷zit個元素， 加上 氫、 氧、 碳、氣ham硫， 攏是 生命siong基本ｅ元素。 雖然 有科幻作家 認為di週期表上仝族ｅ元素 可能di生命體中 互相取代， 比如 用矽來取代碳 等等， 但科學家 幾百冬來 攏無發現 用其他元素取代he六個元素ｅ 生命體存在。
磷酸根PO43- di生物細胞中 有足重要ｅ角色 ：yin維持DNA以及RNAｅ結構、 組成 磷脂 來成為 細胞膜， 而且 dui ATP形式 傳送能量。 砷di週期表中di磷ｅ下腳， 所以 兩款元素 edang進行相像ｅ 化學反應。 例如 砷酸根AsO43- ham磷酸根 有相像ｅ結構。 Ma因為 砷gah磷 相像ｅ化學性質， 造成砷edang di細胞 來取代磷內 有足guan e毒性。
M gorh美國航太總署（NASA）天體生物學研究所 ham 美國地質調查所ｅ Felisa Wolfe-Simon zit群人， 發現一款 鹽單胞菌科（Halomonadaceae）細菌，suah edang用砷來取代磷。 美國加州大學聖塔巴巴拉分校ｅ 地質化學家David Valentine講，zit個發現表示diorh磷zit個元素將ui生命必要元素中 刪除。
Wolfe-Simon認為就算 砷有足guan e毒性， 伊ma是edang執行磷di細胞中ｅ工作。 所以 伊gau加州東部ｅMono湖 去尋找 是m是ganna 可耐受砷，而且閣使用砷ｅ生物。 Wolfe-Simon ui湖中 收集泥土， 閣ga樣本 放入缺磷suah有大量砷ｅ培養基 中。 然後yin進行系列稀釋 來洗去 殘留ｅ磷， 結果yin發現有一款微生物 di含砷ｅ環境中 生長速度 閣卡緊。 Yin ga hit個細菌 分離出來了後， 發現 伊di砷溶液中ｅ生長速率 是 di磷溶液中ｅ六成。 當缺磷ham砷時， zit個細菌diorh vedang生存。
Wolfe-Simon表示， yinｅ證據 在在顯示 砷di鹽單胞菌中 取代了磷， ma表示， 若是講 普通ｅ鹽單胞菌 攏edang用砷來取代磷， 按呢其他細菌ma edang。 He將是 一個攏無看過ｅ世界。
NASA天體生物學計畫ｅ主持人 Mary Voytek表示， zit個發現 非常有說服力。 伊認為zia ｅ證據加起來， 就painn有其他e解釋。 M gorh美國佛羅里達國際大學ｅ生化學家Barry Rosen講， 若是 真實愛有說服力， yin閣必須愛證實DNA ｅ骨架 ka su是砷建構ｅ。 閣有， 砷取代磷對細胞ｅ意義 猶m知。 咱閣需要知影細胞中 dor幾個分子有砷， dor幾個分子 真正有zit個功能。 比如， 當砷取代liau ATP中ｅ磷， 能量傳遞ｅ效率 gam有仝款？ 蛋白質ho磷酸化ｅ改變功能， 按呢ho砷酸化neh？ 美國佛羅里達應用分子演化基金會e Steven Benner表示， 砷酸di水中形成ｅ鍵結 比 磷酸 kah弱， 會di幾分鐘diorh分離， 所以講 有可能 存在 其他分子 穩定yin ｅ鍵結。 Yin閣解釋zia ｅ問題。 若是進一步化學分析 發現砷 真正取代了磷， 按呢 咱對生物系統ｅ分子ｅ了解diorh愛改寫lo !

台語文 浮世繪
台文gah 科普想像
黃鴻偉

1. A. 生活中 為何需要思考方法？
b. 請舉 二個思考方法 並略述其精義。

生活中一定會du著 家己無法度解決e問題， 這時陣diroh愛思考解決e方法， 但是， 問題百百種， gan na靠一種思考方法 是無才調應付， 所以， 咱愛學卡濟e思考法， 用vor仝e角度 去面對問題， 最後一定會cue出 一個 完滿e解決方法。
Laconia[拉哥尼亞]思考法是leh講用簡單e字來表現， diorh e dang造成真大e回應， 親像選舉用e口號， 歐巴馬講〝yes ,we can.〞這句話ho美國人e精神團結起來。
Domino[多明諾]思考法是leh講， 若是有一連串e反應， 小小e物件diorh會造成真大e影響， 所以， 咱ve dang忽略微小e物件， 親像大學生leh讀冊， 雖然一工讀落來真少， 但是， 四年了後， 累積起來e知識 是真濟ham真深。

2. （a）為何需要 以 漢羅並用書寫方式 表達台文？

假使全部 用漢字 去表現台文， 會du著一gua問題， 親像台語ui e音是漢字無法度表達e， 閣有， 讀e人 讀起來會感覺ve順， 所以咱愛用漢羅並用來書寫， an ne問題diorh會解決， 而且， 讀起來ma會感覺親切。

（b）為何 台語 需要聽力測驗？
台語會hiau講， 但是聽ma gai重要， 你若ve hiau聽， 你diorh聽vor別人leh講啥， 你diorh無法度回答別人e問題， 無法度ham人 用台語開講， 而且， 咱阿公阿媽hit輩份e， 攏ma用台語leh講話， 所以，為著友孝阿公阿媽， ma是為著 保存台語文化， 咱愛也hiau聽 ma愛也hiau講，聽有m zia有法度教別人。 Sin suah講一leh， 台語聽力測驗e時陣 e dang聽看mai正確e音安怎唸， m tang家己唸m對閣繼續m對落去。

3. 為何需要 台譯 世界經典？ 你對台譯心得如何？
讀中文冊是學中文siong好e方法； 讀英文冊是學英文siong好e方法。 工款e道理， 若是veh學台語， diorh愛讀台語冊。 世界e人siong愛讀e冊diorh是各國e經典， 所以 一本經典 可能包含 真濟翻譯本， 照安ne看起來， ve sai無台灣e母語：台語。 為著保存文化ham學台語， 咱需要台譯經典來幫助。
Qua leh翻譯經典e時陣， 是感覺真快樂e， 因為想著 這是為著veh保存台語文化， qua diorh想veh ga完成， 自小漢qua di厝diorh全部用台語ham厝內e人講話， qua感覺台語e dang ho厝內人e意識更加團結， 而且講起來真親切。 雖然翻譯e過程 ma是有du著問題， 親像這leh字ve hiau翻， m gorh qua盡量去翻出來， 最後ma是完成a， ho老師改出來了後 閣有發現家己m對e， 家己diorh會記起來， 提醒家己以後ve dang閣錯di仝款e字a！

4. Di《科學怪人》中 請以 下列四個問題論述：

（a）經典文學e觀點：
Di經典文學方面， zit本冊充滿著 恐怖， 血腥e畫面， 所以並vor贊成qin-a去讀。 M gorh， zit本小說寫了ve vai， 劇情e安排、 故事e發展、料想ve到e結局， 引領quan進入這本冊e情境， diorh親像 咱家己是主角， 一切攏發生di咱e面頭前， 隨著故事來冒險， ho咱讀起來真驚hiann，m gorh真趣味， 所以伊確定是一本ve vai e經典喔！

（b）兩性地位e觀點：
科學怪人內面 所使用e觀點 大部分是男性e觀點， 其實，ui古早到現代， 科學e領域差不多攏是查甫leh掌管e， 真少有查某， 所以講到科學領域自然diorh會想到查甫， 造成有關科幻e小說 差不多攏是 用男性e觀點來寫， 未來 是m是 會用查某e觀點來寫 值得期待。

（c）法律制度e觀點：
科學怪人是複製出來e生物， 所以di法律上 到底是m是 算一個獨立e個體， 這ho qua想著複製人e問題， 複製人hong製造出來 其中一個目的是veh用伊e器官， 但是， 用伊e器官 diorh表示 愛伊e生命， di法律上， 安ne gak有算犯殺人罪， 這e法律問題 值得思考。

（d）科學倫理e觀點：
仝款是複製人e問題， 今na日 若是有複製人， 伊e面貌ham hong複製e人一模一樣， 安ne yin厝內e人 是veh安怎稱呼 hit個複製人， 閣有，法律規定近親ve dang結婚， m過， 複製人ham yin a vor血緣關係a， 所以是e dang結婚？ 但是 結婚了後e 種種倫理問題是 veh安怎面對， 這e倫理問題 值得思考。

5. （a）《科學怪人》gah《隱形人》有何異同？
仝：1.攏是科幻小說。
2.內面e主角 攏為著追求 科學e突破 所以 發明出 創新e物件。
3.故事e結局 攏是用悲劇結束e。
4.攏是 用男性觀點去寫。

Vor工：1.科學怪人有好e一面， 親像科學怪人想veh一個家庭e愛； 隱 形人gan na攏是壞e想法nai nia。
2.科學怪人e科學家 為著追科學怪人， 表現出 辛苦e一面； 隱形人e主角 為著做歹代誌 去cong di人，表現輕鬆e一面。
3.科學怪人e結局是兩敗俱傷； 隱形人e結局是主角ho村民pah死。
4.科學怪人e科學家 想veh ham上帝仝款造人； 隱形人e主角是想 veh報仇。

（b）對當前 塑化劑 DEHP等 毒化國民 遺害健康 你有什麼見解？
塑化劑di保鮮膜內底存在真厚， 咱用完保鮮膜diorh dan掉， 伊會hong送去燒掉， 燒e過程 若出差錯， 伊diorh會釋放 真毒e物件 入空氣中， hit leh物件叫做：戴奧辛。 人若接觸著， 會產生文明病， 親像心臟病、 糖尿病等等， iau閣有， 塑化劑 會造成 內分泌失調， 然後造成不孕、 流產、 精子不足等等， 所以 塑化劑 對人e身體 來講， 是 一種接觸濟了後 會傷害身體e物件。 最近， 聽新聞leh講， lu來lu濟e飲料hong發現有塑化劑， 所以為著咱家己e健康， 應該要減lim飲料ziah對， 其實， lim水本來diorh真健康a， 而且， 水閣比飲料e dang止嘴焦leh。

台語文浮世繪
台文gah科普想像
洪英展

1. 生活中 為何需要思考方法？
請舉 二個思考方法 並略述其精意。

(a) 生活中diann diann會du著足濟e問題。 有時陣 因為想法e無仝 diorh edang 有 無仝e看法 gah 解決問題e方法， 所以有 愈濟無仝e思考法， diorh edang 提供咱 愈濟 看問題 gah 看代誌e 方法。

(b) 第一個 是 簡單思考法， diorh是想解決問e方法e時陣， mai想gah太複雜 太困難， 上好是 用腳頭u diorh edang 想出來， 因為 咱學e知識 愈來愈濟， 所以 咱diann diann會ga問題 想gah太複雜， ve記leh簡單思考法ｅ重要。
第二個是Napoleon思考法， diorh是 面對 困難gah挑戰e時陣 ai勇敢去做、 勇敢去試， mai拖sua， ai有hit leh 魄力 去面對， kah有可能解決問題。

2. a. 為何需要 以 漢羅並用書寫方式 表達台文？
b. 為何 台語需要聽力測驗？

(a) 因為 漢字 是 zit ma大家ka熟e文字， 羅馬拼音 是 全世界通用e 拼音方式， 所以 用 漢羅並用書寫方式 來表達台文 edang ho大家 卡快了解gah使用， 處理 外來語、 新生詞、台語特別詞 ma特別好用。

(b) 聽gah講 是 gah別人溝通 上重要e 兩個工具， 所以zit兩個能力 攏真重要。 di台語當中， 有足濟e聲調 來表達感情， 所以聽e能力gorh卡重要。

3. 為何需要 台譯 世界經典？ 你對台譯心得如何？

(a) 台語zit ma 常用diorh e所在 攏是生活中e溝通， di文學、 科技e方面卡少， 所以 用台語來翻譯 世界經典文學 zit方面edang豐富台語e 使用範圍， ho台語e使用gah保留 有gorh卡大e空間， 另外ma edang ho gorh卡濟 使用台語e lang edang讀世界經典文學， 豐富心境gah視野。

(b) 翻譯真困難， ai對兩種語言 攏有一定e了解卡有法度 做ho好， 雖然足
困難， a m gorh edang學著真濟， 對台文ma u gorh 卡濟e了解。


4. Di 《科學怪人》中 請以 下列四個問題論述：
(a) 經典文學ｅ觀點；
(b) 兩性地位ｅ觀點；
(c) 法律制度ｅ觀點；
(d) 科學倫理ｅ觀點；

(a) 科學怪人 是 第一本科幻小說， 而且 伊對情節e描述 真詳細gah細膩， 恐怖 e所在 diann diann ho讀者 感覺 身歷其境， vok怪是世界e經典文學。

(b) 科學怪人中e怪物 真想veh gah lang逗陣， a m gorh伊diann diann ho lang 欺負gah拒絕， 所以想veh有 另外一個女怪物 edang gah伊共同組織 一個 家 庭， ho伊有依靠。

(c) 法律制度來講 diorh有真濟e問題， 到底zit個 怪物 是m是lang？ 伊gann有 一般人 所有e權力？ 伊e父母是誰？ 伊所犯e罪 veh用什麼款e法律條例管理……等等， 有真濟e問題edang ho阮去思考。

(d) 科學倫理來講， 科學家 gam edang創造 ia是 毀掉一個生命？ a gorh有創造一個生命 是m是會害著 zit個世界？ 有真濟問題ai思考。

5. (a)《科學怪人》gah 《隱形人》有何異同？
(b) 對當前 塑化劑 DEHP等 毒化國民 遺害健康 你有什麼見解？

(a) 這兩本 攏是 科幻小說， 科學怪人 是講伊創造出來e 怪物ve受著伊e控制， 害著伊家己e親人， 隱形人是 講隱形 m好e所在， 親像講伊ve dang偷 拿錢， 因為 伊偷拿e時陣， 別人看著e狀況 是 錢di天頂飛， 自然diorh 會hong發現， 真趣味e 一本書。

(b) zit 個狀況diann diann發生， 可能是 因為 以前 大家e生活vor好， 所以ga趁錢 當zue是 第一要務， 但是suah ve記leh趁錢 愛有良心， 因此我gam覺zit ben e事件 是 真好e教訓， 希望咱以後e教育 愛教qin-a卡有倫理gah良心。